ເພື່ອ​ທີ່​ຈະ​ເປັນ​ເພື່ອນ​ຂອງ​ພະເຈົ້າ ທ່ານ​ຈຳເປັນ​ຕ້ອງ​ຮຽນ​ຮູ້​ກ່ຽວ​ກັບ​ພະອົງ. ເພື່ອນ​ຂອງ​ທ່ານ​ຮູ້​ຊື່​ຂອງ​ທ່ານ​ແລະ​ໃຊ້​ຊື່​ນັ້ນ​ບໍ? ແນ່ນອນ​ພວກ​ເຂົາ​ໃຊ້. ພະເຈົ້າ​ກໍ​ເຊັ່ນ​ດຽວ​ກັນ​ຕ້ອງການ​ໃຫ້​ທ່ານ​ຮູ້​ແລະ​ໃຊ້​ນາມ​ຊື່​ຂອງ​ພະອົງ. ນາມ​ຊື່​ຂອງ​ພະເຈົ້າ​ແມ່ນ​ເຢໂຫວາ. (ຄຳເພງ 83:18; ມັດທາຍ 6:9) ທ່ານ​ຕ້ອງ​ຮຽນ​ຮູ້​ທັງ​ສິ່ງ​ທີ່​ພະອົງ​ມັກ​ແລະ​ສິ່ງ​ທີ່​ພະອົງ​ບໍ່​ມັກ​ດ້ວຍ. ທ່ານ​ຕ້ອງ​ຮູ້​ວ່າ​ໃຜ​ແມ່ນ​ເພື່ອນ​ຂອງ​ພະອົງ​ແລະ​ໃຜ​ແມ່ນ​ສັດຕູ​ຂອງ​ພະອົງ. ຕ້ອງ​ໃຊ້​ເວລາ​ເພື່ອ​ຮູ້​ຈັກ​ກັບ​ຄົນ​ຜູ້​ໜຶ່ງ. ຄຳພີ​ໄບເບິນ​ກ່າວ​ວ່າ​ເປັນ​ເລື່ອງ​ສະຫຼາດ​ທີ່​ຈະ​ກັນ​ເວລາ​ໄວ້​ເພື່ອ​ຮຽນ​ຮູ້​ກ່ຽວ​ກັບ​ພະ​ເຢໂຫວາ.—ເອເຟດ 5:15, 16.

ເພື່ອນ​ຂອງ​ພະເຈົ້າ​ເຮັດ​ໃນ​ສິ່ງ​ທີ່​ພະອົງ​ພໍ​ພະໄທ. ຄິດ​ກ່ຽວ​ກັບ​ເພື່ອນ​ຂອງ​ທ່ານ. ຖ້າ​ທ່ານ​ປະຕິບັດ​ກັບ​ເຂົາ​ໃນ​ທາງ​ທີ່​ບໍ່​ດີ​ແລະ​ເຮັດ​ໃນ​ສິ່ງ​ທີ່​ເຂົາ​ກຽດ​ຊັງ ເຂົາ​ຈະ​ເປັນ​ເພື່ອນ​ຂອງ​ທ່ານ​ຕໍ່​ໄປ​ບໍ? ບໍ່​ແນ່ນອນ! ໃນ​ທຳນອງ​ດຽວ​ກັນ ຫາກ​ທ່ານ​ຕ້ອງການ​ເປັນ​ເພື່ອນ​ຂອງ​ພະເຈົ້າ ທ່ານ​ຈະ​ຕ້ອງ​ເຮັດ​ໃນ​ສິ່ງ​ທີ່​ພະອົງ​ພໍ​ພະໄທ.—ໂຍຮັນ 4:24.

ບໍ່​ແມ່ນ​ທຸກ​ສາສະໜາ​ນຳ​ໄປ​ສູ່​ມິດຕະພາບ​ກັບ​ພະເຈົ້າ. ພະ​ເຍຊູ​ຊຶ່ງ​ເປັນ​ເພື່ອນ​ໃກ້​ຊິດ​ທີ່​ສຸດ​ຂອງ​ພະເຈົ້າ​ກ່າວ​ເຖິງ​ທາງ​ສອງ​ເສັ້ນ. ທາງ​ເສັ້ນ​ໜຶ່ງ​ແມ່ນ​ກວ້າງ​ແລະ​ມີ​ຫຼາຍ​ຄົນ​ທຽວ. ທາງ​ເສັ້ນ​ນັ້ນ​ນຳ​ໄປ​ສູ່​ຄວາມ​ຈິບຫາຍ. ທາງ​ອີກ​ເສັ້ນ​ໜຶ່ງ​ແຄບ​ແລະ​ບໍ່​ມີ​ຫຼາຍ​ຄົນ​ທຽວ​ເທິງ​ທາງ​ນັ້ນ. ທາງ​ນັ້ນ​ນຳ​ໄປ​ສູ່​ຊີວິດ​ຕະຫຼອດ​ໄປ​ເປັນ​ນິດ. ນີ້​ໝາຍ​ຄວາມ​ວ່າ​ຖ້າ​ທ່ານ​ຕ້ອງການ​ມີ​ມິດຕະພາບ​ກັບ​ພະເຈົ້າ ທ່ານ​ຕ້ອງ​ຮຽນ​ຮູ້​ເຖິງ​ແນວ​ທາງ​ທີ່​ຖືກ​ຕ້ອງ​ເພື່ອ​ນະມັດສະການ​ພະອົງ.—ມັດທາຍ 7:13, 14.