ບົດຮຽນ 5
ເພື່ອນຂອງພະເຈົ້າຈະມີຊີວິດຢູ່ໃນອຸທິຍານ
ອຸທິຍານຈະບໍ່ເປັນຄືກັນກັບໂລກທີ່ເຮົາອາໄສຢູ່ໃນປັດຈຸບັນນີ້. ພະເຈົ້າບໍ່ເຄີຍປະສົງໃຫ້ແຜ່ນດິນໂລກເຕັມໄປດ້ວຍຄວາມຫຍຸ້ງຍາກແລະຄວາມທຸກໂສກ, ຄວາມເຈັບປວດແລະຄວາມທຸກທໍລະມານ. ໃນອະນາຄົດ ພະເຈົ້າຈະເຮັດໃຫ້ແຜ່ນດິນໂລກເປັນອຸທິຍານ. ອຸທິຍານຈະເປັນແບບໃດ? ໃຫ້ເຮົາພິຈາລະນາສິ່ງທີ່ຄຳພີໄບເບິນກ່າວໄວ້:
ຄົນທີ່ດີ. ອຸທິຍານຈະເປັນບ້ານຂອງເພື່ອນຂອງພະເຈົ້າ. ພວກເຂົາຈະເຮັດສິ່ງທີ່ດີຕໍ່ກັນແລະກັນ. ພວກເຂົາຈະດຳເນີນຊີວິດຕາມແນວທາງອັນຊອບທຳຂອງພະເຈົ້າ.—ສຸພາສິດ 2:21.
ອາຫານບໍລິບູນ. ໃນອຸທິຍານຈະບໍ່ມີຄວາມອຶດຢາກ. ຄຳພີໄບເບິນກ່າວວ່າ “ທີ່ແຜ່ນດິນນັ້ນຈະມີເຂົ້າ [ຫຼືອາຫານ] ອັນບໍລິບູນ.”—ຄຳເພງ 72:16.
ບ້ານທີ່ສວຍງາມແລະວຽກທີ່ມ່ວນຊື່ນ. ເທິງແຜ່ນດິນໂລກທີ່ເປັນອຸທິຍານ ທຸກຄອບຄົວຈະມີບ້ານຂອງຕົນເອງ. ທຸກຄົນຈະເຮັດວຽກທີ່ນຳມາຄວາມສຸກອັນແທ້ຈິງ.—ເອຊາອີ 65:21-23.
ສັນຕິສຸກຈະເກີດຂຶ້ນທົ່ວໂລກ. ມະນຸດເຮົາຈະບໍ່ຕໍ່ສູ້ແລະຕາຍໃນສົງຄາມອີກຕໍ່ໄປ. ພະຄຳຂອງພະເຈົ້າກ່າວວ່າ “[ພະເຈົ້າ] ໄດ້ໂຜດໃຫ້ການເສິກທັງຫຼາຍເຊົາ.”—ຄຳເພງ 46:8, 9.
ສຸຂະພາບດີ. ຄຳພີໄບເບິນສັນຍາວ່າ “ຊາວຊົນ [ໃນອຸທິຍານ] ຈະບໍ່ກ່າວວ່າ ‘ຂ້ອຍບໍ່ສຳບາຍ.’” (ເອຊາອີ 33:24) ເຊັ່ນດຽວກັນ ຈະບໍ່ມີໃຜເປັນງ່ອຍ ຫຼືຕາບອດ ຫຼືຫູໜວກ ຫຼືປາກກຶກ.—ເອຊາອີ 35:5, 6.
ຈຸດຈົບຂອງຄວາມເຈັບປວດ, ຄວາມທຸກໂສກ, ແລະຄວາມຕາຍ. ພະຄຳຂອງພະເຈົ້າກ່າວວ່າ “ຄວາມຕາຍຈະບໍ່ມີຕໍ່ໄປ ແລະຄວາມທຸກໂສກແລະຮ້ອງໄຫ້ແລະເຈັບປວດຈະບໍ່ມີຕໍ່ໄປ ເຫດວ່າສິ່ງທັງຫຼາຍທີ່ເປັນເມື່ອກ່ອນນັ້ນກໍລ່ວງໄປແລ້ວ.”—ຄຳປາກົດ 21:4.
ຄົນບໍ່ດີຈະໝົດໄປ. ພະເຢໂຫວາສັນຍາວ່າ “ຄົນຮ້າຍທັງຫຼາຍຈະຈິບຫາຍໄປຈາກແຜ່ນດິນ; ແລະຄົນອຸບາຍທັງຫຼາຍຈະເປັນທີ່ຖອນອອກຈາກທີ່ນັ້ນ.”—ສຸພາສິດ 2:22.
ຜູ້ຄົນຈະຮັກແລະນັບຖືກັນແລະກັນ. ອີກບໍ່ດົນຈະບໍ່ມີຄວາມອະຍຸດຕິທຳ, ການກົດຂີ່, ຄວາມໂລບ ແລະຄວາມກຽດຊັງ. ຜູ້ຄົນຈະເປັນອັນໜຶ່ງອັນດຽວກັນແລະຈະດຳເນີນຊີວິດປະສານກັບແນວທາງອັນຖືກຕ້ອງຂອງພະເຈົ້າ.—ເອຊາອີ 26:9.
