ຫາກ​ທ່ານ​ຢາກ​ເປັນ​ເພື່ອນ​ຂອງ​ພະເຈົ້າ ທ່ານ​ຈະ​ຕ້ອງ​ປະຕິບັດ​ສາສະໜາ​ທີ່​ພະເຈົ້າ​ພໍ​ພະໄທ. ພະ​ເຍຊູ​ກ່າວ​ວ່າ “ຜູ້​ນະມັດສະການ​ແທ້” ຈະ​ນະມັດສະການ​ພະເຈົ້າ​ຕາມ​ແບບ​ທີ່​ປະສານ​ກັບ “ຄວາມ​ຈິງ.” (ໂຍຮັນ 4:23, 24, ລ.ມ.) ມີ​ທາງ​ດຽວ​ເທົ່າ​ນັ້ນ​ທີ່​ຖືກ​ຕ້ອງ​ທີ່​ຈະ​ນະມັດສະການ​ພະເຈົ້າ. (ເອເຟດ 4:4-6) ສາສະໜາ​ແທ້​ນຳ​ໄປ​ສູ່​ຊີວິດ​ຕະຫຼອດ​ໄປ​ເປັນ​ນິດ ແລະ​ສາສະໜາ​ປອມ​ນຳ​ໄປ​ສູ່​ການ​ຖືກ​ທຳລາຍ.—ມັດທາຍ 7:13, 14.

ທ່ານ​ສາມາດ​ຮູ້​ຈັກ​ສາສະໜາ​ແທ້​ໄດ້​ໂດຍ​ການ​ສັງເກດ​ຜູ້​ຄົນ​ທີ່​ປະຕິບັດ​ສາສະໜາ​ນັ້ນ. ເນື່ອງ​ຈາກ​ພະ​ເຢໂຫວາ​ແມ່ນ​ດີ ຄົນ​ເຫຼົ່າ​ນັ້ນ​ຊຶ່ງ​ແມ່ນ​ຜູ້​ນະມັດສະການ​ທີ່​ແທ້​ຈິງ​ຂອງ​ພະອົງ​ຕ້ອງ​ເປັນ​ຄົນ​ດີ. ເຊັ່ນ​ດຽວ​ກັບ​ຕົ້ນ​ໝາກ​ກ້ຽງ​ທີ່​ດີ​ອອກ​ໝາກ​ທີ່​ດີ ສາສະໜາ​ແທ້​ເຮັດ​ໃຫ້​ເກີດ​ຜູ້​ຄົນ​ທີ່​ດີ.—ມັດທາຍ 7:15-20.

ເພື່ອນ​ຂອງ​ພະ​ເຢໂຫວາ​ມີ​ຄວາມ​ນັບຖື​ຢ່າງ​ເລິກ​ເຊິ່ງ​ຕໍ່​ຄຳພີ​ໄບເບິນ. ພວກ​ເຂົາ​ຮູ້​ວ່າ​ຄຳພີ​ໄບເບິນ​ແມ່ນ​ມາ​ຈາກ​ພະເຈົ້າ. ພວກ​ເຂົາ​ຍອມ​ໃຫ້​ສິ່ງ​ທີ່​ກ່າວ​ໃນ​ຄຳພີ​ໄບເບິນ​ນຳ​ທາງ​ຊີວິດ​ຂອງ​ເຂົາ, ແກ້ໄຂ​ບັນຫາ​ຂອງ​ເຂົາ, ແລະ​ຊ່ວຍ​ເຂົາ​ໃນ​ການ​ຮຽນ​ຮູ້​ກ່ຽວ​ກັບ​ພະເຈົ້າ. (2 ຕີໂມເຕ 3:16) ພວກ​ເຂົາ​ພະຍາຍາມ​ປະຕິບັດ​ໃນ​ສິ່ງ​ທີ່​ເຂົາ​ປະກາດ​ສັ່ງ​ສອນ.

 ເພື່ອນ​ຂອງ​ພະ​ເຢໂຫວາ​ສະແດງ​ຄວາມ​ຮັກ​ຕໍ່​ກັນ​ແລະ​ກັນ. ພະ​ເຍຊູ​ໄດ້​ສະແດງ​ຄວາມ​ຮັກ​ຕໍ່​ປະຊາຊົນ​ໂດຍ​ການ​ສອນ​ພວກ​ເຂົາ​ກ່ຽວ​ກັບ​ພະເຈົ້າ, ໂດຍ​ການ​ຮັກສາ​ຄົນ​ເຫຼົ່າ​ນັ້ນ​ທີ່​ບໍ່​ສະບາຍ. ຜູ້​ທີ່​ປະຕິບັດ​ສາສະໜາ​ແທ້​ສະແດງ​ຄວາມ​ຮັກ​ຕໍ່​ຄົນ​ອື່ນ​ເຊັ່ນ​ກັນ. ຄື​ດັ່ງ​ພະ​ເຍຊູ ພວກ​ເຂົາ​ບໍ່​ດູ​ຖູ​ກ​ຄົນ​ເຫຼົ່າ​ນັ້ນ​ທີ່​ທຸກ​ຍາກ​ຫຼື​ຢູ່​ໃນ​ກຸ່ມ​ເຜົ່າ​ພັນ​ທີ່​ຕ່າງ​ອອກ​ໄປ. ພະ​ເຍຊູ​ກ່າວ​ວ່າ​ຄົນ​ທັງ​ຫຼາຍ​ຈະ​ຮູ້​ຈັກ​ເຫຼົ່າ​ສາວົກ​ຂອງ​ພະອົງ​ໄດ້​ໂດຍ​ຄວາມ​ຮັກ​ທີ່​ພວກ​ເຂົາ​ສະແດງ​ຕໍ່​ກັນ​ແລະ​ກັນ.—ໂຍຮັນ 13:35.

ເພື່ອນ​ຂອງ​ພະເຈົ້າ​ນັບຖື​ພະ​ນາມ​ຂອງ​ພະເຈົ້າ​ເຢໂຫວາ. ຫາກ​ບາງ​ຄົນ​ປະຕິເສດ​ທີ່​ຈະ​ໃຊ້​ຊື່​ຂອງ​ທ່ານ ບຸກຄົນ​ນັ້ນ​ຈະ​ແມ່ນ​ເພື່ອນ​ສະໜິດ​ຂອງ​ທ່ານ​ບໍ? ບໍ່​ແມ່ນ​ແນ່ນອນ. ເມື່ອ​ເຮົາ​ມີ​ເພື່ອນ ພວກ​ເຮົາ​ໃຊ້​ຊື່​ຂອງ​ເຂົາ​ແລະ​ເວົ້າ​ສິ່ງ​ທີ່​ດີ​ກ່ຽວ​ກັບ​ເພື່ອນ​ຄົນ​ນັ້ນ​ໃຫ້​ຄົນ​ອື່ນ​ຟັງ. ສະນັ້ນ ຄົນ​ເຫຼົ່າ​ນັ້ນ​ຊຶ່ງ​ປາຖະໜາ​ຈະ​ເປັນ​ເພື່ອນ​ຂອງ​ພະເຈົ້າ​ຄວນ​ໃຊ້​ນາມ​ຊື່​ຂອງ​ພະອົງ​ແລະ​ເວົ້າ​ກ່ຽວ​ກັບ​ພະອົງ​ໃຫ້​ຄົນ​ອື່ນ​ຟັງ. ພະ​ເຢໂຫວາ​ປະສົງ​ໃຫ້​ເຮົາ​ເຮັດ​ແບບ​ນັ້ນ.—ມັດທາຍ 6:9; ໂລມ 10:13, 14.

ເຊັ່ນ​ດຽວ​ກັບ​ພະ​ເຍຊູ ເພື່ອນ​ຂອງ​ພະເຈົ້າ​ສອນ​ປະຊາຊົນ​ກ່ຽວ​ກັບ​ລາຊະອານາຈັກ​ຂອງ​ພະອົງ. ລາຊະອານາຈັກ​ຂອງ​ພະເຈົ້າ​ແມ່ນ​ລັດຖະບານ​ທາງ​ພາກ​ສະຫວັນ​ຊຶ່ງ​ຈະ​ເຮັດ​ໃຫ້​ແຜ່ນດິນ​ໂລກ​ເປັນ​ອຸທິຍານ. ເພື່ອນ​ຂອງ​ພະເຈົ້າ​ແບ່ງ​ປັນ​ຂ່າວ​ດີ​ກ່ຽວ​ກັບ​ລາຊະອານາຈັກ​ຂອງ​ພະອົງ​ກັບ​ຄົນ​ອື່ນ.—ມັດທາຍ 24:14.

ພະຍານ​ພະ​ເຢໂຫວາ​ພະຍາຍາມ​ເປັນ​ເພື່ອນ​ຂອງ​ພະເຈົ້າ. ພວກ​ເຂົາ​ນັບຖື​ຄຳພີ​ໄບເບິນ​ແລະ​ມີ​ຄວາມ​ຮັກ​ໃນ​ທ່າມກາງ​ພວກ​ເຂົາ. ພວກ​ເຂົາ​ໃຊ້​ແລະ​ໃຫ້​ກຽດ​ພະ​ນາມ​ຂອງ​ພະເຈົ້າ​ເຊັ່ນ​ກັນ​ແລະ​ສອນ​ຄົນ​ອື່ນ​ກ່ຽວ​ກັບ​ລາຊະອານາຈັກ​ຂອງ​ພະເຈົ້າ. ພະຍານ​ພະ​ເຢໂຫວາ​ໄດ້​ປະຕິບັດ​ສາສະໜາ​ແທ້​ຢູ່​ເທິງ​ແຜ່ນດິນ​ໂລກ​ທຸກ​ວັນ​ນີ້.