ບົດຮຽນ 18
ເປັນເພື່ອນຂອງພະເຈົ້າຕະຫຼອດໄປ!
ຕ້ອງໃຊ້ຄວາມພະຍາຍາມທີ່ຈະໄດ້ເພື່ອນ; ຕ້ອງໃຊ້ຄວາມພະຍາຍາມເພື່ອຮັກສາເພື່ອນໄວ້. ຄວາມພະຍາຍາມຂອງທ່ານທີ່ຈະກາຍເປັນແລະຢັ້ງຢືນໃນການເປັນເພື່ອນຂອງພະເຈົ້າຈະຮັບພະພອນອັນໃຫຍ່ຫຼວງ. ພະເຍຊູກ່າວແກ່ຄົນເຫຼົ່ານັ້ນຊຶ່ງເຊື່ອໃນພະອົງວ່າ “ຄວາມຈິງຈະທຳໃຫ້ທ່ານເປັນອິດສະຫຼະ.” (ໂຍຮັນ 8:32, ລ.ມ.) ນັ້ນມີຄວາມໝາຍຢ່າງໃດ?
ທ່ານສາມາດເພີດເພີນກັບເສລີພາບໃນຂະນະນີ້. ທ່ານສາມາດເປັນອິດສະຫຼະຈາກການສອນທີ່ຜິດແລະການຕົວະຊຶ່ງໄດ້ຮັບການແຜ່ອອກໂດຍຊາຕານ. ທ່ານສາມາດເປັນອິດສະຫຼະຈາກຄວາມສິ້ນຫວັງຊຶ່ງຄອບງຳຊີວິດຂອງຜູ້ຄົນເປັນລ້ານໆທີ່ບໍ່ຮູ້ຈັກພະເຢໂຫວາ. (ໂລມ 8:22) ເພື່ອນຂອງພະເຈົ້າຍັງເປັນອິດສະຫຼະຈາກການ “ຢ້ານຄວາມຕາຍ” ອີກດ້ວຍ.—ເຫບເລິ 2:14, 15.
ທ່ານສາມາດເພີດເພີນກັບເສລີພາບໃນໂລກໃໝ່ຂອງພະເຈົ້າ. ນີ້ເປັນອິດສະຫຼະອັນຍອດຢ້ຽມທີ່ທ່ານສາມາດປະສົບໃນອະນາຄົດ! ໃນແຜ່ນດິນໂລກທີ່ເປັນອຸທິຍານຈະມີອິດສະຫຼະພາບຈາກສົງຄາມ, ຄວາມເຈັບປ່ວຍ, ແລະອາດຊະຍາກຳ. ອິດສະຫຼະພາບຈາກຄວາມທຸກຍາກແລະຄວາມອຶດຢາກ. ອິດສະຫຼະພາບຈາກໄວຊະລາແລະຄວາມຕາຍ. ອິດສະຫຼະພາບຈາກຄວາມຢ້ານກົວ, ການກົດຂີ່ຂົ່ມເຫງ, ແລະຄວາມບໍ່ຍຸດຕິທຳ. ຄຳພີໄບເບິນກ່າວເຖິງພະເຈົ້າວ່າ “ພະອົງແບມືອອກແລະໃຫ້ສິ່ງທັງປວງທີ່ມີຊີວິດຢູ່ກິນອີ່ມບໍລິບູນ.”—ຄຳເພງ 145:16.
ເພື່ອນຂອງພະເຈົ້າຈະມີຊີວິດຕະຫຼອດໄປ. ຊີວິດຕະຫຼອດໄປເປັນນິດແມ່ນຂອງຂວັນອັນລໍ້າຄ່າທີ່ພະເຈົ້າຈະປະທານໃຫ້ຄົນທີ່ຊອກຫາມິດຕະພາບກັບພະອົງ. (ໂລມ 6:23) ລອງຄິດເຖິງຊີວິດທີ່ບໍ່ມີສິ້ນສຸດຈະໝາຍເຖິງອັນໃດແດ່ສຳລັບທ່ານ!
ທ່ານຈະມີເວລາເຮັດຫຼາຍສິ່ງຫຼາຍຢ່າງ. ບາງທີທ່ານຢາກຮຽນຮູ້ວິທີຫຼິ້ນເຄື່ອງດົນຕີ. ຫຼືບາງທີທ່ານຢາກຮຽນການແຕ້ມຮູບຫຼືເປັນຊ່າງໄມ້. ທ່ານອາດຢາກຮຽນຮູ້ກ່ຽວກັບສັດຫຼືພືດ. ຫຼືທ່ານອາດຢາກທ່ອງທ່ຽວແລະຊົມດິນແດນແລະຜູ້ຄົນທີ່ແຕກຕ່າງ. ການມີຊີວິດຕະຫຼອດໄປຈະເຮັດໃຫ້ສິ່ງທັງໝົດເຫຼົ່ານີ້ເປັນໄປໄດ້.
ທ່ານຈະມີເວລາສ້າງມິດຕະພາບກັບຫຼາຍຄົນ. ການມີຊີວິດຕະຫຼອດໄປຈະເຮັດໃຫ້ເປັນໄປໄດ້ທີ່ຈະຮູ້ຈັກກັບຫຼາຍຄົນຊຶ່ງໄດ້ກາຍເປັນເພື່ອນກັບພະເຈົ້າ. ທ່ານຈະຮູ້ເຖິງຄວາມສາມາດພິເສດແລະຄຸນສົມບັດທີ່ດີຂອງພວກເຂົາ ແລະພວກເຂົາຈະເປັນເພື່ອນຂອງທ່ານເຊັ່ນດຽວກັນ. ທ່ານຈະຮັກພວກເຂົາ ແລະພວກເຂົາກໍຈະຮັກທ່ານ. (1 ໂກລິນໂທ 13:8) ການມີຊີວິດບໍ່ສິ້ນສຸດຈະເຮັດໃຫ້ທ່ານມີເວລາທີ່ຈະເປັນເພື່ອນກັບທຸກຄົນຊຶ່ງຢູ່ເທິງແຜ່ນດິນໂລກ! ທີ່ດີທີ່ສຸດ ຄືມິດຕະພາບຂອງທ່ານກັບພະເຢໂຫວາຈະແໜ້ນແຟ້ນຫຼາຍຂຶ້ນຂະນະທີ່ຫຼາຍສະຕະວັດຜ່ານໄປ. ຂໍໃຫ້ທ່ານເປັນເພື່ອນຂອງພະເຈົ້າຕະຫຼອດໄປ!
