ບົດທີ 11
“ແນວທາງຂອງເພິ່ນຍຸຕິທຳ”
1, 2. (ກ) ໂຢເຊັບເຈິເລື່ອງທີ່ບໍ່ຍຸຕິທຳຫຍັງແດ່? (ຂ) ພະເຢໂຫວາຊ່ວຍລາວແນວໃດ?
ໂຢເຊັບເຈິເລື່ອງທີ່ບໍ່ຍຸຕິທຳຫຼາຍຢ່າງໃນຊີວິດ. ຕອນອາຍຸ 17 ປີ ລາວເກືອບຖືກພວກອ້າຍຂ້າແລ້ວ ແຕ່ເຂົາເຈົ້າປ່ຽນໃຈຂາຍລາວໃຫ້ໄປເປັນທາດແລະໄດ້ໄປຢູ່ຕ່າງປະເທດ. ຕອນຢູ່ຫັ້ນ ເມຍຂອງເຈົ້ານາຍຢາກນອນນຳໂຢເຊັບ. ເມື່ອໂຢເຊັບປະຕິເສດ ລາວກໍໃຈຮ້າຍຫຼາຍແລະກ່າວຫາວ່າໂຢເຊັບພະຍາຍາມຂົ່ມຂືນລາວ ໂຢເຊັບຈຶ່ງຖືກຈັບຂັງຄຸກທັງໆທີ່ບໍ່ໄດ້ເຮັດຫຍັງຜິດ. ເບິ່ງຄືວ່າບໍ່ມີໃຜຈະຊ່ວຍໂຢເຊັບໄດ້.
2 ແຕ່ພະເຈົ້າທີ່ “ຮັກຄວາມຖືກຕ້ອງແລະຮັກຄວາມຍຸຕິທຳ” ກຳລັງເບິ່ງຢູ່. (ເພງສັນລະເສີນ 33:5) ພະເຢໂຫວາຊ່ວຍໂຢເຊັບ. ເພິ່ນເຮັດໃຫ້ລາວໄດ້ອອກຈາກຄຸກ ໃຫ້ລາວໄດ້ຮັບກຽດ ແລະຖືກແຕ່ງຕັ້ງໃຫ້ມີຕຳແໜ່ງສູງໃນປະເທດເອຢິບ. (ປະຖົມມະການ 40:15; 41:41-43; ເພງສັນລະເສີນ 105:17, 18) ໃນທີ່ສຸດ ໂຢເຊັບກໍໄດ້ຮັບການພິສູດວ່າບໍ່ມີຄວາມຜິດ ແລະລາວໄດ້ໃຊ້ຕຳແໜ່ງຂອງລາວເພື່ອຊ່ວຍຄົນຂອງພະເຢໂຫວາ.—ປະຖົມມະການ 45:5-8
ໂຢເຊັບເຈິເລື່ອງທີ່ບໍ່ຍຸຕິທຳແລະຕ້ອງຖືກຈັບຂັງຄຸກ
3. ເປັນຫຍັງເຮົາທຸກຄົນຢາກໃຫ້ຄົນອື່ນປະຕິບັດຕໍ່ເຮົາແບບຍຸຕິທຳ?
3 ເລື່ອງຂອງໂຢເຊັບໃຫ້ກຳລັງໃຈເຮົາຫຼາຍ ຍ້ອນເຮົາອາດຈະເຫັນຄົນທີ່ເຈິກັບເລື່ອງທີ່ບໍ່ຍຸຕິທຳ ຫຼືເຮົາເອງກໍອາດຈະເຄີຍເຈິກັບເລື່ອງບໍ່ຍຸຕິທຳ. ເຮົາທຸກຄົນຢາກໃຫ້ຄົນອື່ນປະຕິບັດຕໍ່ເຮົາແບບຍຸຕິທຳແລະບໍ່ລຳອຽງ. ນີ້ບໍ່ແປກ ຍ້ອນພະເຢໂຫວາສ້າງໃຫ້ເຮົາມີຄຸນລັກສະນະຕ່າງໆທີ່ຄືກັບເພິ່ນ ແລະຄວາມຍຸຕິທຳກໍເປັນຄຸນລັກສະນະໜຶ່ງທີ່ສຳຄັນ. (ປະຖົມມະການ 1:27) ເພື່ອຈະຮູ້ຈັກພະເຢໂຫວາດີຂຶ້ນ ເຮົາຕ້ອງເຂົ້າໃຈວ່າເພິ່ນຄິດແນວໃດໃນເລື່ອງຄວາມຍຸຕິທຳ. ນີ້ຈະຊ່ວຍເຮົາໃຫ້ຮັກພະເຢໂຫວາຫຼາຍຂຶ້ນແລະຖືກກະຕຸ້ນໃຫ້ໃກ້ຊິດກັບເພິ່ນຫຼາຍຂຶ້ນ.
ຄວາມຍຸຕິທຳແມ່ນຫຍັງ?
4. ຄົນສ່ວນຫຼາຍຄິດວ່າຄວາມຍຸຕິທຳໝາຍເຖິງຫຍັງ?
4 ຄົນສ່ວນຫຼາຍຄິດວ່າຄວາມຍຸຕິທຳໝາຍເຖິງການເອົາກົດໝາຍມາໃຊ້ຢ່າງຍຸຕິທຳ. ປຶ້ມຫົວໜຶ່ງອະທິບາຍວ່າ: “ຄວາມຍຸຕິທຳກ່ຽວຂ້ອງກັບກົດໝາຍ ສິດ ແລະໜ້າທີ່ຂອງຄົນເຮົາ ແລະກ່ຽວຂ້ອງກັບຄວາມຄິດທີ່ວ່າແຕ່ລະຄົນຄວນໄດ້ຮັບຜົນດີຈາກສິ່ງທີ່ໂຕເອງເຮັດດີ ແລະສົມຄວນໄດ້ຮັບໂທດເມື່ອບໍ່ເຮັດຕາມກົດໝາຍ.” ແຕ່ສຳລັບພະເຢໂຫວາຄວາມຍຸຕິທຳບໍ່ແມ່ນແຕ່ການເຮັດຕາມກົດໝາຍຍ້ອນເປັນໜ້າທີ່ທີ່ຕ້ອງເຮັດເທົ່ານັ້ນ.
5, 6. (ກ) ຄວາມໝາຍແທ້ໆຂອງຄຳພາສາດັ້ງເດີມທີ່ໄດ້ແປວ່າ “ຄວາມຍຸຕິທຳ” ແມ່ນຫຍັງ? (ຂ) ການທີ່ພະເຈົ້າຍຸຕິທຳໝາຍຄວາມວ່າແນວໃດ?
5 ເຮົາຈະເຂົ້າໃຈຄວາມຍຸຕິທຳຂອງພະເຢໂຫວາຫຼາຍຂຶ້ນເມື່ອເຮົາເບິ່ງຄຳໃນພາສາດັ້ງເດີມທີ່ໃຊ້ໃນຄຳພີໄບເບິນ. ໃນພະຄຳພີພາກພາສາເຮັບເຣີມີການໃຊ້ 3 ຄຳທີ່ກ່ຽວກັບຄວາມຍຸຕິທຳ. ຄຳທີ່ມັກແປວ່າ “ຄວາມຍຸຕິທຳ” ອາດແປໄດ້ວ່າ “ສິ່ງທີ່ຖືກຕ້ອງ.” (ປະຖົມມະການ 18:25) ສ່ວນອີກ 2 ຄຳມັກຈະແປວ່າ “ຄວາມຖືກຕ້ອງ.” ໃນພະຄຳພີຄລິດຕຽນພາກພາສາກຣີກ ຄຳທີ່ແປວ່າ “ຄວາມຖືກຕ້ອງ” ມີການອະທິບາຍວ່າເປັນ “ຄຸນລັກສະນະຂອງຄວາມຖືກຕ້ອງຫຼືຄວາມຍຸຕິທຳ.” ດັ່ງນັ້ນ ຄວາມຖືກຕ້ອງແລະຄວາມຍຸຕິທຳຈຶ່ງກ່ຽວຂ້ອງກັນ.—ອາໂມດ 5:24
6 ເມື່ອຄຳພີໄບເບິນບອກວ່າພະເຈົ້າຍຸຕິທຳ ເຮັດໃຫ້ເຮົາຮູ້ວ່າເພິ່ນບໍ່ລຳອຽງ. ເພິ່ນເຮັດສິ່ງທີ່ຖືກຕ້ອງແລະຍຸຕິທຳສະເໝີ. (ໂຣມ 2:11) ເອລີຮູຮູ້ຈັກພະເຢໂຫວາດີ ລາວຈຶ່ງເວົ້າກ່ຽວກັບເພິ່ນວ່າ: “ເປັນໄປບໍ່ໄດ້ທີ່ພະເຈົ້າທ່ຽງແທ້ຈະເຮັດຊົ່ວ ແລະບໍ່ມີທາງທີ່ຜູ້ມີລິດເດດສູງສຸດຈະເຮັດຜິດ.” (ໂຢບ 34:10) ດັ່ງນັ້ນ ເປັນໄປບໍ່ໄດ້ທີ່ພະເຢໂຫວາຈະບໍ່ຍຸຕິທຳ. ຍ້ອນຫຍັງ? ມີເຫດຜົນສຳຄັນ 2 ຢ່າງ.
7, 8. (ກ) ເປັນຫຍັງພະເຢໂຫວາຈຶ່ງບໍ່ມີທາງທີ່ຈະເຮັດສິ່ງທີ່ບໍ່ຍຸຕິທຳ? (ຂ) ແມ່ນຫຍັງກະຕຸ້ນເພິ່ນໃຫ້ເຮັດສິ່ງທີ່ຖືກຕ້ອງແລະຍຸຕິທຳ?
7 ເຫດຜົນທຳອິດ ເພິ່ນບໍລິສຸດ. ດັ່ງທີ່ເຮົາໄດ້ເຫັນໃນບົດທີ 3 ພະເຢໂຫວາບໍລິສຸດແລະເຮັດສິ່ງທີ່ຖືກຕ້ອງສະເໝີ. ຍ້ອນແນວນັ້ນ ເພິ່ນຈຶ່ງບໍ່ເຮັດສິ່ງທີ່ບໍ່ຍຸຕິທຳເລີຍ. ນີ້ໝາຍຄວາມວ່າແນວໃດ? ຍ້ອນພໍ່ຂອງເຮົາທີ່ຢູ່ໃນສະຫວັນບໍລິສຸດ ເຮົາຈຶ່ງໝັ້ນໃຈໄດ້ເຕັມຮ້ອຍວ່າເພິ່ນຈະເຮັດດີກັບເຮົາ. ພະເຢຊູກໍໝັ້ນໃຈແບບນັ້ນ. ໃນຄືນສຸດທ້າຍທີ່ເພິ່ນມີຊີວິດຢູ່ໂລກ ເພິ່ນໄດ້ອະທິດຖານວ່າ: “ພໍ່ຜູ້ບໍລິສຸດ ຂໍເບິ່ງແຍງເຂົາເຈົ້າເພື່ອເຫັນແກ່ຊື່ຂອງພໍ່ເອງ.” (ໂຢຮັນ 17:11) ໃນຄຳພີໄບເບິນຄຳວ່າ “ພໍ່ຜູ້ບໍລິສຸດ” ໃຊ້ໄດ້ແຕ່ກັບພະເຢໂຫວາຜູ້ດຽວ. ຄຳນີ້ເໝາະສົມແທ້ໆຍ້ອນບໍ່ມີພໍ່ຄົນໃດທີ່ຈະບໍລິສຸດຄືກັບພະເຢໂຫວາ. ພະເຢຊູໝັ້ນໃຈແທ້ໆວ່າພວກລູກສິດຂອງເພິ່ນຈະໄດ້ຮັບການປົກປ້ອງຈາກພໍ່ຜູ້ບໍລິສຸດ ສະອາດທຸກດ້ານ ແລະບໍ່ມີບາບ.—ມັດທາຍ 23:9
8 ເຫດຜົນທີ 2 ພະເຢໂຫວາເປັນຄວາມຮັກ. ຄວາມຮັກກະຕຸ້ນເພິ່ນໃຫ້ເຮັດສິ່ງທີ່ຖືກຕ້ອງແລະຍຸຕິທຳກັບຄົນອື່ນ. ແຕ່ຄວາມບໍ່ຍຸຕິທຳທີ່ມີຫຼາຍຮູບຫຼາຍແບບບໍ່ວ່າຈະເປັນການແບ່ງແຍກສີຜິວ ການລຳອຽງ ແລະການຮັກບັງຊັງບ່ຽງ. ຫຼາຍເທື່ອເກີດຈາກຄວາມໂລບແລະຄວາມເຫັນແກ່ໂຕ ເຊິ່ງກົງກັນຂ້າມກັບຄວາມຮັກແທ້ໆ. ແຕ່ຄຳພີໄບເບິນຮັບຮອງກັບເຮົາກ່ຽວກັບພະເຈົ້າຜູ້ເປັນຄວາມຮັກວ່າ: “ພະເຢໂຫວາຍຸຕິທຳແລະເພິ່ນມັກການເຮັດສິ່ງທີ່ຖືກຕ້ອງ.” (ເພງສັນລະເສີນ 11:7) ພະເຢໂຫວາບອກກ່ຽວກັບເພິ່ນເອງວ່າ: “ເຮົາເຢໂຫວາຮັກຄວາມຍຸຕິທຳ.” (ເອຊາຢາ 61:8) ເລື່ອງນີ້ເຮັດໃຫ້ເຮົາມີກຳລັງໃຈຫຼາຍແທ້ໆທີ່ຮູ້ວ່າພະເຈົ້າຂອງເຮົາມັກເຮັດສິ່ງທີ່ຖືກຕ້ອງແລະຍຸຕິທຳ.—ເຢເຣມີຢາ 9:24
ຄວາມເມດຕາແລະຄວາມຍຸຕິທຳທີ່ສົມບູນແບບຂອງພະເຢໂຫວາ
9-11. (ກ) ຄວາມຍຸຕິທຳຂອງພະເຢໂຫວາກ່ຽວຂ້ອງກັບຄວາມເມດຕາຂອງເພິ່ນແນວໃດ? (ຂ) ຄວາມຍຸຕິທຳແລະຄວາມເມດຕາຂອງພະເຢໂຫວາເຫັນໄດ້ແຈ້ງແນວໃດໃນວິທີທີ່ເພິ່ນປະຕິບັດຕໍ່ມະນຸດທີ່ຜິດບາບ?
9 ພະເຢໂຫວາສະແດງຄວາມຍຸຕິທຳໄດ້ຢ່າງສົມບູນແບບຄືກັບຄຸນລັກສະນະທີ່ດີເລີດອື່ນໆຂອງເພິ່ນ. ໂມເຊໄດ້ສັນລະເສີນພະເຢໂຫວາວ່າ: “ພະເຈົ້າເປັນຄືກັບຫີນຜາ. ທຸກສິ່ງທີ່ເພິ່ນເຮັດບໍ່ມີບ່ອນຕິ. ແນວທາງຂອງເພິ່ນຍຸຕິທຳ. ເພິ່ນເປັນຜູ້ທີ່ພວກເຮົາໄວ້ໃຈໄດ້. ເພິ່ນຍຸຕິທຳແລະດີແທ້ໆ.” (ພະບັນຍັດ 32:3, 4) ພະເຢໂຫວາສະແດງຄວາມຍຸຕິທຳສະເໝີ ແລະເພິ່ນບໍ່ເຂັ້ມງວດເກີນໄປ.
10 ຄວາມຍຸຕິທຳຂອງພະເຢໂຫວາກ່ຽວຂ້ອງກັບຄວາມເມດຕານຳ. ເພງສັນລະເສີນ 116:5 ບອກວ່າ: “ພະເຢໂຫວາໃຈດີແລະຍຸຕິທຳ. ພະເຈົ້າຂອງພວກເຮົາມີຄວາມເມດຕາ.” ພະເຢໂຫວາເປັນພະເຈົ້າທີ່ຍຸຕິທຳແລະເມດຕາ. ຄຸນລັກສະນະທັງສອງຢ່າງນີ້ບໍ່ໄດ້ຂັດແຍ່ງກັນ. ເມື່ອພະເຢໂຫວາສະແດງຄວາມເມດຕາ ຄວາມຍຸຕິທຳຂອງເພິ່ນກໍບໍ່ໄດ້ໜ້ອຍລົງ. ທີ່ຈິງ ຕອນທີ່ເພິ່ນເຮັດສິ່ງຕ່າງໆ ເພິ່ນມັກສະແດງຄຸນລັກສະນະ 2 ຢ່າງນີ້ພ້ອມກັນ. ໃຫ້ເຮົາເບິ່ງຕົວຢ່າງໜຶ່ງນຳກັນ.
11 ເຮົາທຸກຄົນໄດ້ຮັບບາບມາຈາກອາດາມ ເຮົາຈຶ່ງຕ້ອງຕາຍ. (ໂຣມ 5:12) ແຕ່ພະເຢໂຫວາບໍ່ໄດ້ດີໃຈເລີຍທີ່ເຫັນຄົນບາບຕາຍ. ເພິ່ນເປັນ “ພະເຈົ້າທີ່ພ້ອມຈະໃຫ້ອະໄພ ໃຈດີ ມີຄວາມເມດຕາ.” (ເນເຮມີຢາ 9:17) ແຕ່ຍ້ອນເພິ່ນບໍລິສຸດ ເພິ່ນຈຶ່ງບໍ່ສາມາດເບິ່ງຂ້າມບາບໄດ້. ຖ້າເປັນແນວນັ້ນ ເພິ່ນຈະສະແດງຄວາມເມດຕາກັບເຮົາທີ່ເປັນຄົນບາບໄດ້ແນວໃດ? ຄຳພີໄບເບິນມີຄຳຕອບກ່ຽວກັບເລື່ອງນີ້ທີ່ເວົ້າເຖິງການຈັດກຽມຂອງພະເຢໂຫວາເລື່ອງຄ່າໄຖ່ເພື່ອໃຫ້ມະນຸດທຸກຄົນພົ້ນຈາກບາບແລະຄວາມຕາຍ. ນີ້ເປັນຄຳສອນທີ່ມີຄ່າທີ່ສຸດເລື່ອງໜຶ່ງ. ໃນບົດທີ 14 ເຮົາຈະຮຽນຮູ້ຫຼາຍຂຶ້ນກ່ຽວກັບການຈັດກຽມທີ່ມາຈາກຄວາມຮັກເຊິ່ງເຮັດໃຫ້ເຮົາເຫັນທັງຄວາມຍຸຕິທຳແລະຄວາມເມດຕາຂອງພະເຈົ້າ. ໂດຍທາງການຈັດກຽມນີ້ ພະເຢໂຫວາສະແດງຄວາມເມດຕາຫຼາຍຕໍ່ຄົນບາບທີ່ໄດ້ກັບໃຈ ແລະໃນເວລາດຽວກັນເພິ່ນກໍຮັກສາມາດຕະຖານຄວາມຍຸຕິທຳທີ່ສົມບູນແບບຂອງເພິ່ນໄວ້ນຳ.—ໂຣມ 3:21-26
ຄວາມຍຸຕິທຳຂອງພະເຢໂຫວາເຮັດໃຫ້ເຮົາຢາກໃກ້ຊິດກັບເພິ່ນຫຼາຍຂຶ້ນ
12, 13. (ກ) ເປັນຫຍັງຄວາມຍຸຕິທຳຂອງພະເຢໂຫວາຈຶ່ງເຮັດໃຫ້ເຮົາຢາກໃກ້ຊິດກັບເພິ່ນ? (ຂ) ດາວິດສະຫຼຸບແນວໃດກ່ຽວກັບຄວາມຍຸຕິທຳຂອງພະເຢໂຫວາ ແລະເລື່ອງນີ້ເຮັດໃຫ້ເຮົາໄດ້ກຳລັງໃຈແນວໃດ?
12 ຄວາມຍຸຕິທຳຂອງພະເຢໂຫວາບໍ່ໄດ້ເຮັດໃຫ້ເຮົາຢ້ານເພິ່ນແລະບໍ່ຢາກໃກ້ຊິດກັບເພິ່ນ. ຄຳພີໄບເບິນບອກຢ່າງຈະແຈ້ງວ່າພະເຢໂຫວາສະແດງຄວາມຍຸຕິທຳດ້ວຍຄວາມຮັກແລະຄວາມເມດຕາ. ໃຫ້ເຮົາເບິ່ງຕົວຢ່າງທີ່ໜ້າປະທັບໃຈນຳກັນ.
13 ຄວາມຍຸຕິທຳທີ່ສົມບູນແບບຂອງພະເຢໂຫວາເຮັດໃຫ້ເພິ່ນສະແດງຄວາມສັດຊື່ຕໍ່ຜູ້ຮັບໃຊ້ຂອງເພິ່ນ. ດາວິດຜູ້ຂຽນເພງສັນລະເສີນເຂົ້າໃຈເລື່ອງນີ້ດີທັງຈາກປະສົບການຂອງລາວແລະຈາກການທີ່ລາວສັງເກດວິທີທີ່ພະເຈົ້າປະຕິບັດກັບຜູ້ຮັບໃຊ້ຄົນອື່ນຂອງເພິ່ນ. ດາວິດສະຫຼຸບວ່າ: “ພະເຢໂຫວາຮັກຄວາມຍຸຕິທຳ ແລະເພິ່ນຈະບໍ່ປະຖິ້ມຄົນທີ່ສັດຊື່ຕໍ່ເພິ່ນ. ເພິ່ນຈະປົກປ້ອງເຂົາເຈົ້າສະເໝີ.” (ເພງສັນລະເສີນ 37:28) ນີ້ເປັນຄຳຮັບຮອງທີ່ໃຫ້ກຳລັງໃຈແທ້ໆ! ພະເຈົ້າຂອງເຮົາຈະບໍ່ປະບໍ່ຖິ້ມຜູ້ທີ່ສັດຊື່ຕໍ່ເພິ່ນ. ດັ່ງນັ້ນ ເຮົາຈຶ່ງໝັ້ນໃຈໄດ້ວ່າເພິ່ນຈະຮັກແລະສົນໃຈເຮົາສະເໝີ!—ສຸພາສິດ 2:7, 8
14. ກົດໝາຍທີ່ພະເຢໂຫວາໃຫ້ພວກອິດສະຣາເອນເຮັດໃຫ້ເຫັນແນວໃດວ່າເພິ່ນເປັນຫ່ວງຄົນທີ່ຕ້ອງການຄວາມຊ່ວຍເຫຼືອ?
14 ພະເຢໂຫວາຮັກຄວາມຍຸຕິທຳ. ເພິ່ນເປັນຫ່ວງຄົນທີ່ຕ້ອງການຄວາມຊ່ວຍເຫຼືອຫຼາຍ. ເຮົາເຫັນເລື່ອງນີ້ໃນກົດໝາຍທີ່ເພິ່ນໃຫ້ພວກອິດສະຣາເອນ. ຕົວຢ່າງເຊັ່ນ ເພິ່ນບອກໄວ້ແຈ້ງເລີຍວ່າຄວນປະຕິບັດຕໍ່ລູກກຳພ້າແລະແມ່ໝ້າຍແນວໃດ. (ພະບັນຍັດ 24:17-21) ເພິ່ນຮູ້ດີວ່າຊີວິດຂອງເຂົາເຈົ້າທຸກຍາກສ່ຳໃດ ເພິ່ນຈຶ່ງເປັນພໍ່ຂອງລູກກຳພ້າແລະເປັນຜູ້ປົກປ້ອງແມ່ໝ້າຍ. ຄຳພີໄບເບິນບອກວ່າ: “ເພິ່ນຍຸຕິທຳກັບລູກກຳພ້າແລະແມ່ໝ້າຍ.” a (ພະບັນຍັດ 10:18; ເພງສັນລະເສີນ 68:5) ພະເຢໂຫວາເຕືອນພວກອິດສະຣາເອນວ່າຖ້າເຂົາເຈົ້າເຮັດບໍ່ດີກັບຜູ້ຍິງແລະເດັກນ້ອຍທີ່ບໍ່ມີທາງສູ້ ເພິ່ນຈະຟັງສຽງຮ້ອງທຸກຂອງຄົນເຫຼົ່ານັ້ນແນ່ນອນ. ເພິ່ນບອກວ່າ: “ເຮົາຈະໃຈຮ້າຍ [ໃຫ້ເຈົ້າ] ຫຼາຍ.” (ອົບພະຍົບ 22:22-24) ເຖິງວ່າພະເຢໂຫວາຈະບໍ່ໃຈຮ້າຍງ່າຍ ແຕ່ຖ້າບາງຄົນຕັ້ງໃຈເຮັດບໍ່ດີກັບຄົນອື່ນ ເພິ່ນກໍຈະໃຈຮ້າຍໃຫ້ເຂົາເຈົ້າຫຼາຍ ໂດຍສະເພາະຖ້າຄົນທີ່ຖືກທຳຮ້າຍເປັນຄົນອ່ອນແອແລະບໍ່ມີທາງສູ້.—ເພງສັນລະເສີນ 103:6
15, 16. ມີຫຼັກຖານຫຍັງທີ່ສະແດງວ່າພະເຢໂຫວາບໍ່ລຳອຽງ?
15 ພະເຢໂຫວາຍັງຮັບຮອງກັບເຮົານຳວ່າເພິ່ນ “ບໍ່ລຳອຽງແລະບໍ່ຮັບສິນບົນ.” (ພະບັນຍັດ 10:17) ພະເຢໂຫວາບໍ່ລຳອຽງ ເພິ່ນບໍ່ຄືກັບມະນຸດທີ່ມີອຳນາດທີ່ມັກເຮັດດີແຕ່ກັບຄົນລວຍຫຼືຄົນທີ່ມີຊື່ສຽງເທົ່ານັ້ນ. ພະເຢໂຫວາໃຫ້ທຸກຄົນມີໂອກາດມານະມັດສະການເພິ່ນແລະມີຄວາມຫວັງທີ່ຈະມີຊີວິດຕະຫຼອດໄປ. ຄຳພີໄບເບິນບອກວ່າ: “ເພິ່ນຍອມຮັບທຸກຄົນທີ່ຢ້ານຢຳເພິ່ນແລະເຮັດສິ່ງທີ່ຖືກຕ້ອງ ບໍ່ວ່າລາວຈະເປັນຄົນຊາດໃດກໍຕາມ.” (ກິດຈະການ 10:34, 35) ພະເຢໂຫວາໃຫ້ຄວາມຫວັງທີ່ດີໆນີ້ກັບທຸກຄົນບໍ່ວ່າເຂົາເຈົ້າຈະມີຖານະແບບໃດທາງສັງຄົມ ມີຜິວສີຫຍັງ ຫຼືມາຈາກປະເທດໃດ. ເຮົາເຫັນແຈ້ງເລີຍວ່າພະເຢໂຫວາສະແດງຄວາມຍຸຕິທຳໄດ້ດີແທ້ໆ.
16 ຕອນນີ້ໃຫ້ເຮົາມາເບິ່ງອີກວິທີໜຶ່ງທີ່ພະເຢໂຫວາສະແດງຄວາມຍຸຕິທຳທີ່ສົມບູນແບບ ເຊິ່ງກໍແມ່ນວິທີທີ່ເພິ່ນຈັດການກັບຄົນທີ່ບໍ່ຍອມເຮັດຕາມມາດຕະຖານທີ່ຖືກຕ້ອງຂອງເພິ່ນ.
ພະເຢໂຫວາຈະລົງໂທດຄົນທີ່ເຮັດຜິດ
17. ເປັນຫຍັງບັນຫາທີ່ມີຢູ່ໃນໂລກບໍ່ຄວນເຮັດໃຫ້ເຮົາຄິດວ່າພະເຢໂຫວາບໍ່ຍຸຕິທຳ? ຂໍໃຫ້ອະທິບາຍ.
17 ບາງຄົນອາດສົງໄສວ່າ ‘ຖ້າພະເຢໂຫວາບໍ່ມັກເລື່ອງທີ່ບໍ່ຍຸຕິທຳ ແລ້ວເປັນຫຍັງໂລກທຸກມື້ນີ້ຈຶ່ງເຕັມແຕ່ການສໍ້ໂກງແລະຄວາມທຸກ?’ ບັນຫາເຫຼົ່ານີ້ບໍ່ຄວນເຮັດໃຫ້ເຮົາຄິດວ່າພະເຢໂຫວາບໍ່ຍຸຕິທຳ. ບັນຫາຫຼາຍຢ່າງໃນໂລກເກີດຂຶ້ນກໍຍ້ອນມະນຸດໄດ້ຮັບບາບຈາກອາດາມ ແລະຍ້ອນໂລກເຕັມແຕ່ຄົນທີ່ບໍ່ຍອມເຊື່ອຟັງພະເຢໂຫວາ. ແຕ່ອີກບໍ່ດົນຄວາມບໍ່ຍຸຕິທຳແລະບັນຫາຕ່າງໆຈະໝົດໄປ.—ພະບັນຍັດ 32:5
18, 19. ເຮົາຮູ້ໄດ້ແນວໃດວ່າພະເຢໂຫວາຈະຈັດການຄົນທີ່ຝ່າຝືນກົດໝາຍທີ່ຖືກຕ້ອງຂອງເພິ່ນ?
18 ເຖິງວ່າພະເຢໂຫວາຈະສະແດງຄວາມເມດຕາຕໍ່ຄົນທີ່ເຂົ້າມາໃກ້ຊິດກັບເພິ່ນດ້ວຍຄວາມຈິງໃຈ. ແຕ່ເພິ່ນຈະບໍ່ຍອມໃຫ້ຜູ້ໃດໝິ່ນປະໝາດຊື່ຂອງເພິ່ນຕະຫຼອດໄປ. (ເພງສັນລະເສີນ 74:10, 22, 23) ບໍ່ມີຜູ້ໃດຈະມາຕົວະພະເຈົ້າຜູ້ທີ່ມີຄວາມຍຸຕິທຳໄດ້. ເພິ່ນຈະລົງໂທດຄົນທີ່ຕັ້ງໃຈເຮັດຊົ່ວໃຫ້ສົມກັບຄວາມຜິດຂອງເຂົາເຈົ້າ. ພະເຢໂຫວາບອກວ່າ: “ເຮົາເປັນພະເຈົ້າທີ່ມີຄວາມເມດຕາ ໃຈດີ ບໍ່ໃຈຮ້າຍງ່າຍ ມີຄວາມຮັກທີ່ໝັ້ນຄົງຫຼາຍທີ່ສຸດ ແລະເວົ້າແຕ່ຄວາມຈິງ . . . ແຕ່ເຮົາຊິບໍ່ປ່ອຍໃຫ້ຄົນທີ່ເຮັດຜິດບໍ່ຖືກລົງໂທດ.” (ອົບພະຍົບ 34:6, 7) ໃນອະດີດພະເຢໂຫວາກໍເຄີຍລົງໂທດຄົນທີ່ຕັ້ງໃຈຝ່າຝືນກົດໝາຍທີ່ຖືກຕ້ອງຂອງເພິ່ນໄປແລ້ວ.
19 ຂໍໃຫ້ຄິດເຖິງຕົວຢ່າງຂອງພວກອິດສະຣາເອນບູຮານ. ເຖິງວ່າພະເຢໂຫວາພາເຂົາເຈົ້າເຂົ້າໄປໃນແຜ່ນດິນທີ່ເພິ່ນສັນຍາ ແຕ່ເຂົາເຈົ້າກໍບໍ່ຟັງຄວາມເພິ່ນບັກຫຼາຍໆເທື່ອ. ເຂົາເຈົ້າເຮັດໃຫ້ພະເຢໂຫວາ “ເສຍໃຈ” ແຕ່ເພິ່ນກໍບໍ່ໄດ້ຖິ້ມເຂົາເຈົ້າທັນທີ. (ເພງສັນລະເສີນ 78:38-41) ພະເຢໂຫວາເມດຕາແລະໃຫ້ໂອກາດເຂົາເຈົ້າທີ່ຈະປ່ຽນແປງໂຕເອງ. ເພິ່ນບອກເຂົາເຈົ້າວ່າ: “ເຮົາຈະບໍ່ດີໃຈທີ່ເຫັນຄົນຊົ່ວຕາຍ ແຕ່ເຮົາຢາກໃຫ້ລາວເຊົາເຮັດຊົ່ວ ເພື່ອລາວຈະມີຊີວິດຢູ່ຕໍ່ໄປ. ພວກອິດສະຣາເອນເອີ້ຍ ເຊົາເຮັດຊົ່ວແມ້ ເພື່ອພວກເຈົ້າຈະບໍ່ຕາຍ.” (ເອເຊກຽນ 33:11) ພະເຢໂຫວາບໍ່ຢາກໃຫ້ໃຜຖືກທຳລາຍ ເພິ່ນຈຶ່ງສົ່ງຜູ້ພະຍາກອນຂອງເພິ່ນໄປຫາເຂົາເຈົ້າບັກຫຼາຍໆເທື່ອ ແຕ່ເຂົາເຈົ້າສ່ວນຫຼາຍກໍບໍ່ຍອມຟັງແລະບໍ່ຍອມກັບໃຈ. ໃນທີ່ສຸດ ພະເຢໂຫວາກໍຍອມໃຫ້ສັດຕູຊະນະເຂົາເຈົ້າເພື່ອເຮັດໃຫ້ເຫັນວ່າເພິ່ນເປັນພະເຈົ້າທີ່ບໍລິສຸດແລະຍຸຕິທຳ.—ເນເຮມີຢາ 9:26-30
20. (ກ) ວິທີທີ່ພະເຢໂຫວາປະຕິບັດກັບພວກອິດສະຣາເອນບອກໃຫ້ເຮົາຮູ້ຫຍັງກ່ຽວກັບເພິ່ນ? (ຂ) ເປັນຫຍັງຈຶ່ງເໝາະສົມທີ່ໃຊ້ໂຕສິງເປັນສັນຍະລັກເຖິງຄວາມຍຸຕິທຳຂອງພະເຢໂຫວາ?
20 ເຮົາໄດ້ບົດຮຽນຫຍັງກ່ຽວກັບພະເຢໂຫວາຈາກວິທີທີ່ເພິ່ນປະຕິບັດກັບພວກອິດສະຣາເອນ? ເຮົາໄດ້ຮຽນຮູ້ວ່າພະເຢໂຫວາເຫັນການກະທຳທຸກຢ່າງທີ່ບໍ່ຍຸຕິທຳ ແລະສິ່ງເຫຼົ່ານີ້ກໍເຮັດໃຫ້ເພິ່ນເສຍໃຈຫຼາຍ. (ສຸພາສິດ 15:3) ເຮົາຍັງໄດ້ຮຽນຮູ້ອີກວ່າພະເຢໂຫວາຊອກຫາວິທີທີ່ຈະສະແດງຄວາມເມດຕາຕໍ່ຄົນທີ່ກັບໃຈ. ເລື່ອງນີ້ເຮັດໃຫ້ເຮົາໄດ້ກຳລັງໃຈແທ້ໆ. ເຮົາຍັງຮຽນຮູ້ອີກວ່າພະເຢໂຫວາອົດທົນແລະໃຫ້ໂອກາດທຸກຄົນທີ່ຈະປ່ຽນແປງໂຕເອງ ນີ້ຈຶ່ງເຮັດໃຫ້ຫຼາຍຄົນເຂົ້າໃຈຜິດວ່າເພິ່ນບໍ່ລົງໂທດຄົນຊົ່ວ. ແຕ່ນັ້ນບໍ່ແມ່ນຄວາມຈິງ ວິທີທີ່ເພິ່ນປະຕິບັດກັບພວກອິດສະຣາເອນສອນເຮົາວ່າຄວາມອົດທົນຂອງເພິ່ນມີຂີດຈຳກັດ. ພະເຢໂຫວາຍຸຕິທຳແລະກ້າເຮັດສິ່ງທີ່ຖືກຕ້ອງສະເໝີ. ເພິ່ນບໍ່ຄືກັບມະນຸດທີ່ຫຼາຍເທື່ອບໍ່ກ້າຈັດການຄົນທີ່ເຮັດຜິດ. ນີ້ຈຶ່ງເໝາະສົມແລ້ວທີ່ຄຳພີໄບເບິນໃຊ້ໂຕສິງເປັນສັນຍະລັກເຖິງຄວາມຍຸຕິທຳຂອງພະເຢໂຫວາ. b (ເອເຊກຽນ 1:10; ພະນິມິດ 4:7) ດັ່ງນັ້ນ ເຮົາໝັ້ນໃຈໄດ້ວ່າເພິ່ນຈະເຮັດຕາມຄຳສັນຍາຂອງເພິ່ນທີ່ຈະເຮັດໃຫ້ໂລກມີແຕ່ຄວາມຍຸຕິທຳ. ເຮົາສະຫຼຸບໄດ້ວ່າ ພະເຢໂຫວາຈະລົງໂທດຄົນທີ່ເຮັດຜິດແນ່ນອນ ແຕ່ເພິ່ນກໍພ້ອມທີ່ຈະສະແດງຄວາມເມດຕາກັບທຸກຄົນທີ່ກັບໃຈ.—2 ເປໂຕ 3:9
ການໃກ້ຊິດພະເຈົ້າທີ່ມີຄວາມຍຸຕິທຳ
21. ເມື່ອຄິດຕຶກຕອງວິທີທີ່ພະເຢໂຫວາສະແດງຄວາມຍຸຕິທຳ ເຮົາຄວນຮູ້ສຶກແນວໃດ ແລະຍ້ອນຫຍັງ?
21 ເມື່ອເຮົາຄິດຕຶກຕອງວິທີທີ່ພະເຢໂຫວາສະແດງຄວາມຍຸຕິທຳ ເຮົາບໍ່ຄວນຮູ້ສຶກວ່າເພິ່ນເປັນພະເຈົ້າທີ່ບໍ່ມີຄວາມຮູ້ສຶກ ເຂັ້ມງວດ ແລະມີແຕ່ຢາກຕັດສິນລົງໂທດຜູ້ເຮັດຜິດເທົ່ານັ້ນ. ແຕ່ເຮົາຄວນຄິດວ່າເພິ່ນເປັນພໍ່ທີ່ມີຄວາມຮັກ ແລະເຮັດສິ່ງທີ່ດີທີ່ສຸດເພື່ອລູກຂອງເພິ່ນສະເໝີ. ພະເຢໂຫວາເປັນພໍ່ທີ່ຍຸຕິທຳ ເພິ່ນພ້ອມທີ່ຈະເຮັດສິ່ງທີ່ຖືກຕ້ອງ. ແຕ່ໃນເວລາດຽວກັນເພິ່ນກໍສະແດງຄວາມເມດຕາຕໍ່ລູກຂອງເພິ່ນທີ່ຢູ່ໃນໂລກເຊິ່ງເປັນຜູ້ທີ່ຕ້ອງໄດ້ຮັບຄວາມຊ່ວຍເຫຼືອແລະການໃຫ້ອະໄພຈາກເພິ່ນ.—ເພງສັນລະເສີນ 103:10, 13
22. ຄວາມຍຸຕິທຳຂອງພະເຢໂຫວາເຮັດໃຫ້ເຮົາມີຄວາມຫວັງໃນເລື່ອງໃດ ແລະເປັນຫຍັງເພິ່ນຈຶ່ງເຮັດແນວນັ້ນ?
22 ເຮົາຮູ້ສຶກຂອບໃຈແທ້ໆທີ່ຄວາມຍຸຕິທຳຂອງພະເຢໂຫວາບໍ່ໄດ້ໝາຍເຖິງແຕ່ການລົງໂທດຄົນທີ່ເຮັດຜິດເທົ່ານັ້ນ! ຍ້ອນພະເຢໂຫວາເຮັດທຸກຢ່າງດ້ວຍຄວາມຍຸຕິທຳ ເຮົາຈຶ່ງມີຄວາມຫວັງທີ່ດີທີ່ສຸດທີ່ຈະມີຊີວິດສົມບູນແບບໃນໂລກທີ່ “ທຸກຄົນຈະເຮັດສິ່ງທີ່ຖືກຕ້ອງຕະຫຼອດໄປ.” (2 ເປໂຕ 3:13) ນີ້ສະແດງໃຫ້ເຫັນວ່າຄວາມຍຸຕິທຳຂອງພະເຢໂຫວາກະຕຸ້ນເພິ່ນໃຫ້ຊອກຫາວິທີທີ່ຈະຊ່ວຍຄົນໃຫ້ລອດແທນທີ່ຈະລົງໂທດເຂົາເຈົ້າ. ເມື່ອເຮົາເຂົ້າໃຈວ່າຄວາມຍຸຕິທຳຂອງພະເຢໂຫວາໝາຍເຖິງຫຍັງ ເຮົາກໍຢາກໃກ້ຊິດກັບເພິ່ນຫຼາຍຂຶ້ນ! ໃນບົດຕໍ່ໆໄປ ເຮົາຈະຮຽນຮູ້ຫຼາຍຂຶ້ນວ່າພະເຢໂຫວາສະແດງຄຸນລັກສະນະທີ່ດີເລີດນີ້ແນວໃດ.
a ຄຳວ່າ “ລູກກຳພ້າ” ເຮັດໃຫ້ເຫັນວ່າພະເຢໂຫວາເປັນຫ່ວງທັງເດັກນ້ອຍຜູ້ຍິງແລະເດັກນ້ອຍຜູ້ຊາຍທີ່ກຳພ້າພໍ່. ເພິ່ນໃຫ້ບັນທຶກເລື່ອງລູກສາວຂອງເຊໂລເຟຂາດທີ່ເພິ່ນຕັດສິນໃຫ້ເຂົາເຈົ້າໄດ້ຮັບດິນທີ່ເປັນມໍລະດົກຂອງພໍ່ເຂົາເຈົ້າ. ເພິ່ນເຮັດໃຫ້ການຕັດສິນນີ້ເປັນກົດໝາຍທີ່ປົກປ້ອງສິດຂອງເດັກນ້ອຍຜູ້ຍິງທີ່ກຳພ້າພໍ່.—ຈົດເຊັນບັນຊີ 27:1-8
b ພະເຢໂຫວາປຽບທຽບເພິ່ນເອງເປັນຄືກັບໂຕສິງຕອນທີ່ເພິ່ນຕັດສິນລົງໂທດພວກອິດສະຣາເອນທີ່ບໍ່ສັດຊື່.—ເຢເຣມີຢາ 25:38; ໂຮເຊອາ 5:14
ເລື່ອງທີ່ເຈົ້າອາດຈະມັກ
ຫໍສັງເກດການ
ຈະເກີດຫຍັງຂຶ້ນໃນວັນພິພາກສາ?
ຄວາມເຊື່ອທີ່ແຕກຕ່າງກັນກ່ຽວກັບວັນພິພາກສາ ເປັນສິ່ງທີ່ຄິດວ່າເປັນຕາຢ້ານບໍ? ຈະໄດ້ຮັບພອນຫຍັງແດ່?
