ໝວດ 26
ອຸທິຍານໄດ້ກັບຄືນມາແລ້ວ!
ໂດຍທາງລາຊະອານາຈັກທີ່ພະຄລິດປົກຄອງ ພະເຢໂຫວາເຮັດໃຫ້ຊື່ຂອງພະອົງເປັນທີ່ນັບຖື ພິສູດເຖິງຄວາມຖືກຕ້ອງຂອງສິດທິຂອງພະເຈົ້າໃນການປົກຄອງ ແລະທຳລາຍຄວາມຊົ່ວຮ້າຍທັງໝົດ
ພະທຳເຫຼັ້ມສຸດທ້າຍຂອງພະຄຳພີມີຊື່ວ່າຄຳປາກົດຫຼືອາໂພກາລິບສ ໃຫ້ຄວາມຫວັງແກ່ມະນຸດທຸກຄົນ. ອັກຄະສາວົກໂຢຮັນຂຽນພະທຳນີ້ ເຊິ່ງມີນິມິດຕ່າງໆກ່ຽວກັບເຫດການໃນອະນາຄົດ ຈຸດສຸດຍອດຂອງຄວາມສຳເລັດເປັນຈິງກ່ຽວກັບຈຸດປະສົງຂອງພະເຢໂຫວາ.
ໃນນິມິດທຳອິດ ພະເຍຊູທີ່ຖືກປຸກໃຫ້ຟື້ນຄືນມາຈາກຕາຍໃຫ້ຄຳແນະນຳແລະແກ້ໄຂປະຊາຄົມຕ່າງໆ ໃຫ້ກຳລັງໃຈສະມາຊິກປະຊາຄົມດັ່ງກ່າວໃຫ້ຮັກສາຄວາມສັດຊື່. ນິມິດຕໍ່ໄປສະແດງເຖິງລາຊະບັນລັງຂອງພະເຢໂຫວາໃນສະຫວັນ ບ່ອນທີ່ເຫຼົ່າກາຍວິນຍານສັນລະເສີນພະອົງ.
ເມື່ອຈຸດປະສົງຂອງພະເຢໂຫວາດຳເນີນຕໍ່ໄປ ລູກແກະເຊິ່ງກໍຄືພະເຍຊູຄລິດໄດ້ຮັບໜັງສືມ້ວນໜຶ່ງທີ່ມີກາປະທັບເຈັດອັນ. ໂດຍການເປີດກາປະທັບສີ່ກາທຳອິດ ຄົນຂີ່ມ້າແມ່ນສັນຍະລັກທີ່ໄດ້ປາກົດຕົວ. ຄົນທຳອິດແມ່ນພະເຍຊູນັ່ງຢູ່ເທິງມ້າຂາວແລະໃສ່ມົງກຸດໃນຖານະເປັນກະສັດ. ຈາກນັ້ນ ແມ່ນຄົນຂີ່ມ້າອື່ນໆທີ່ມີມ້າສີຕ່າງກັນເຊິ່ງບອກລ່ວງໜ້າເຖິງສົງຄາມ ຄວາມອຶດຢາກ ແລະໂລກລະບາດ ສິ່ງທັງໝົດເຫຼົ່ານີ້ເກີດຂຶ້ນໃນສະໄໝສຸດທ້າຍຂອງລະບົບນີ້. ການເປີດກາປະທັບອັນທີເຈັດນຳໄປສູ່ການເປົ່າແກເຈັດອັນທີ່ເປັນສັນຍະລັກ ເຊິ່ງໝາຍເຖິງການປະກາດຄຳຕັດສິນຂອງພະເຢໂຫວາ. ການເປົ່າແກເຫຼົ່ານີ້ນຳໄປສູ່ສັນຍະລັກຂອງໄພພິບັດເຈັດຢ່າງ ຫຼືສະແດງເຖິງຄວາມຄຽດຂອງພະເຈົ້າ.
ລາຊະອານາຈັກຂອງພະເຈົ້າແມ່ນສ້າງຕັ້ງຂຶ້ນໃນສະຫວັນ ເຊິ່ງມີການອະທິບາຍວ່າເປັນຄືກັບແອນ້ອຍຜູ້ຊາຍທີ່ຫາກໍເກີດ. ມີສົງຄາມເກີດຂຶ້ນ ຊາຕານແລະທູດສະຫວັນທີ່ຊົ່ວຂອງມັນຖືກຖິ້ມລົງມາທີ່ແຜ່ນດິນໂລກ. ມີສຽງຮ້ອງດັງບອກວ່າ “ວິບາກແກ່ແຜ່ນດິນໂລກ.” ພະຍາມານມີຄວາມຄຽດຮ້າຍຢ່າງໜັກ ເພາະຮູ້ວ່າເວລາຂອງມັນຍັງເຫຼືອໜ້ອຍ.—ຄຳປາກົດ 12:12.
ໂຢຮັນເຫັນພະເຍຊູຢູ່ໃນສະຫວັນມີລັກສະນະຄືລູກແກະ ແລະກັບພະອົງມີຄົນຈຳນວນ 144.000 ຄົນຜູ້ທີ່ຖືກເລືອກຈາກທ່າມກາງມະນຸດ. ຄົນເຫຼົ່ານີ້ “ຈະຄຸ້ມຄອງດ້ວຍກັນກັບ” ພະເຍຊູ. ເພາະສະນັ້ນພະທຳຄຳປາກົດເປີດເຜີຍວ່າເຊື້ອສາຍອັນດັບຮອງຈະມີຈຳນວນທັງໝົດ 144.000 ຄົນ.—ຄຳປາກົດ 14:1; 20:6.
ບັນດາຜູ້ປົກຄອງແຫ່ງແຜ່ນດິນໂລກເຕົ້າໂຮມເພື່ອໄປສູ່ອະລະມະເຄໂດນ ເຊິ່ງແມ່ນ “ການເສິກໃນວັນອັນໃຫຍ່ຂອງພະເຈົ້າຜູ້ມີລິດເດດອັນໃຫຍ່ທີ່ສຸດ.” ພວກເຂົາເຈົ້າຕໍ່ສູ້ກັບຜູ້ທີ່ນັ່ງຢູ່ເທິງມ້າສີຂາວເຊິ່ງແມ່ນພະເຍຊູ ຜູ້ນຳໜ້າກອງທັບທາງພາກສະຫວັນ. ຜູ້ປົກຄອງແຫ່ງແຜ່ນດິນໂລກທັງໝົດຈະຖືກທຳລາຍ. ຊາຕານຈະຖືກມັດໄວ້ ພະເຍຊູແລະ 144.000 ຄົນຈະປົກຄອງແຜ່ນດິນໂລກເປັນເວລາ “ພັນປີ.” ໃນຕອນທ້າຍຂອງໜຶ່ງພັນປີ ຊາຕານຈະຖືກທຳລາຍ.—ຄຳປາກົດ 16:14; 20:4.
ສຳລັບມະນຸດທີ່ເຊື່ອຟັງ ການປົກຄອງໜຶ່ງພັນປີຂອງພະຄລິດແລະຜູ້ຮ່ວມປົກຄອງຈະໝາຍເຖິງຫຍັງ? ໂຢຮັນຂຽນວ່າ “[ພະເຢໂຫວາ] ຈະເຊັດນໍ້າຕາທັງຫຼາຍຈາກຕາຂອງເຂົາ ແລະຄວາມຕາຍຈະບໍ່ມີຕໍ່ໄປ ແລະຄວາມທຸກໂສກ ແລະຮ້ອງໄຫ້ ແລະເຈັບປວດຈະບໍ່ມີຕໍ່ໄປ. ເຫດວ່າສິ່ງທັງຫຼາຍທີ່ເປັນເມື່ອກ່ອນນັ້ນກໍລ່ວງໄປແລ້ວ.” (ຄຳປາກົດ 21:4) ແລ້ວແຜ່ນດິນໂລກກໍຈະກາຍເປັນອຸທິຍານ!
ດັ່ງນັ້ນພະທຳຄຳປາກົດຈຶ່ງເຮັດໃຫ້ຂ່າວສານຂອງຄຳພີໄບເບິນຄົບຖ້ວນ. ໂດຍທາງລາຊະອານາຈັກເມຊີ ຊື່ຂອງພະເຢໂຫວາຈະເປັນທີ່ນັບຖືອັນບໍລິສຸດແລະສິດອຳນາດໃນການປົກຄອງຂອງພະອົງຈະໄດ້ຮັບການພິສູດວ່າຖືກຕ້ອງແທ້ຕະຫຼອດການ!
—ຂໍ້ມູນມາຈາກຄຳປາກົດ.
