ດາວິດແລະໂຄລີອາດ
ບົດ 58
ດາວິດແລະໂຄລີອາດ
ຊົນຊາດຟີລີດຕີນຍົກທັບມາຕໍ່ສູ້ຊົນຍິດສະລາເອນອີກ. ຂະນະນີ້ພວກອ້າຍຂອງດາວິດສາມຄົນຢູ່ໃນກອງທັບຂອງຊາອຶເລ. ມື້ນຶ່ງອີຊາຍບອກດາວິດວ່າ: ‘ຈົ່ງເອົາເຂົ້າກັບເຂົ້າຈີ່ໄປສົ່ງໃຫ້ພວກອ້າຍຂອງເຈົ້າ. ຈົ່ງສືບຖາມເບິ່ງວ່າເຂົາເປັນຢ່າງໃດ?’
ເມື່ອດາວິດມາເຖິງຄ້າຍກອງທັບເພິ່ນຈຶ່ງແລ່ນໄປບ່ອນແນວໜ້າຊອກຫາພວກອ້າຍຂອງຕົນ. ໂຄລີອາດຊາວຟີລີດຕີນຮູບຮ່າງສູງຂະໜາດຍັກອອກມາເວົ້າເຍາະເຍີ້ຍຊົນຍິດສະລາເອນ. ເຂົາເຮັດຢ່າງນີ້ທຸກເຊົ້າແລະທຸກແລງເປັນເວລາ 40 ມື້. ເຂົາຮ້ອງສຽງດັງວ່າ: ‘ຈົ່ງເລືອກເອົາຜູ້ນຶ່ງຂອງພວກເຈົ້າມາຕໍ່ສູ້ກັບເຮົາ. ຖ້າເຂົາຊະນະແລະຂ້າເຮົາ ພວກເຮົາຈະຍອມເປັນທາດຂອງພວກເຈົ້າ. ແຕ່ຖ້າເຮົາຊະນະແລະຂ້າເຂົາ ພວກເຈົ້າຈະຕ້ອງເປັນທາດຂອງເຮົາ. ເຮົາທ້າໃຫ້ພວກເຈົ້າເລືອກເອົາຄົນນຶ່ງມາຕໍ່ສູ້ກັບເຮົາ.’
ດາວິດຖາມພວກທະຫານບາງຄົນວ່າ: ‘ຜູ້ທີ່ຈະຂ້າຟີລີດຕີນຄົນນີ້ແລະຊ່ວຍກູ້ຊາດຍິດສະລາເອນຈາກຄວາມອັບອາຍນີ້ຈະໄດ້ສິ່ງໃດ?’
ທະຫານຄົນນຶ່ງຕອບວ່າ: ‘ຊາອຶເລຈະໃຫ້ຊັບສົມບັດຫຼາກຫຼາຍແກ່ຜູ້ນັ້ນ ແລະລາວຈະຍົກທິດາຂອງລາວໃຫ້ເປັນເມຍເພິ່ນ.’
ແຕ່ຊົນຍິດສະລາເອນທັງໝົດຢ້ານໂຄລີອາດເພາະວ່າເຂົາເປັນຄົນຮູບຮ່າງໃຫຍ່ຫຼາຍ. ສູງກວ່າ 9 ຟຸດ (ປະມານ 3 ແມດ) ແລະເຂົາມີທະຫານຜູ້ນຶ່ງຖືໂລ້ໃຫ້ເຂົາ.
ທະຫານບາງຄົນໄປທູນຊາອຶເລວ່າ ດາວິດຢາກຕໍ່ສູ້ກັບໂຄລີອາດ. ແຕ່ຊາອຶເລບອກດາວິດວ່າ: ‘ເຈົ້າຈະບໍ່ສາມາດຕໍ່ສູ້ຟີລີດຕີນຄົນນີ້ໄດ້. ເຈົ້າເປັນພຽງແຕ່ເດັກຫນຸ່ມ ສ່ວນເຂົາເຄີຍເປັນທະຫານມາແລ້ວຕະຫຼອດຊີວິດຂອງເຂົາ.’ ດາວິດຕອບວ່າ: ‘ຂ້າພະເຈົ້າໄດ້ຂ້າໝີແລະຂ້າສິງທີ່ໄດ້ຄາບເອົາແກະຂອງພໍ່ຂ້າພະເຈົ້າໄປ. ແລະຄົນຟີລີດຕີນຄົນນີ້ກໍ່ຈະຖືກຂ້າຢ່າງສັດພວກນັ້ນ. ພະເຢໂຫວາຈະຊ່ວຍຂ້າພະເຈົ້າ.’ ດັ່ງນັ້ນຊາອຶເລຈຶ່ງກ່າວວ່າ: ‘ຈົ່ງໄປເຖີດ ແລະຂໍໃຫ້ພະເຢໂຫວາສະຖິດຢູ່ກັບເຈົ້າ.’
ດາວິດລົງໄປທີ່ຫ້ວຍແລ້ວເກັບເອົາກ້ອນຫີນຫ້າກ້ອນທີ່ລະອຽດດີແລະເກັບໃສ່ໃນຖົງຍ່າມຕົນ. ຄັນແລ້ວກໍ່ເອົາທວງຫຼືສະລິງຂອງຕົນອອກໄປພົບຊາຍຂະໜາດຍັກຄົນນັ້ນ. ເມື່ອໂຄລີອາດເຫັນດາວິດ ເຂົາແທບບໍ່ເຊື່ອຕາຕົວເອງ. ເຂົາຄິດວ່າຈະເປັນການງ່າຍຫຼາຍທີ່ຈະຂ້າດາວິດ.
ໂຄລີອາດເວົ້າວ່າ: ‘ຈົ່ງມາຫາເຮົາແລະເຮົາຈະເອົາຕົວຂອງເຈົ້າໃຫ້ຝູງນົກແລະຝູງສັດກິນ.’ ແຕ່ດາວິດເວົ້າວ່າ: ‘ເຈົ້າມາຫາເຮົາດ້ວຍດາບ ດ້ວຍຫອກຍາວແລະຫອກສັ້ນ ແຕ່ເຮົາມາຫາເຈົ້າດ້ວຍພະນາມຂອງພະເຢໂຫວາ. ມື້ນີ້ພະເຢໂຫວາຈະມອບເຈົ້າໄວ້ໃນມືຂອງເຮົາແລະເຮົາຈະຂ້າເຈົ້າ.’
ແລ້ວດາວິດກໍ່ແລ່ນເຂົ້າໄປຫາໂຄລີອາດ. ເຂົາເອົາຫີນກ້ອນນຶ່ງອອກຈາກຖົງຍ່າມແລະໃສ່ເຂົ້າໃນທວງຫຼືສະລິງແລ້ວແກວ່ງສະລິງນັ້ນສຸດແຮງ. ກ້ອນຫີນກໍ່ຊື່ໄປຖືກຫົວຂອງໂຄລີອາດ ແລະເຂົາກໍ່ລົ້ມລົງຕາຍ! ເມື່ອຊາວຟີລີດຕີນເຫັນຜູ້ຊາຍຍອດນັກຮົບຂອງຕົນລົ້ມຕາຍ ພວກເຂົາທຸກຄົນຫັນກັບແລ່ນໜີ. ຊົນຍິດສະລາເອນພາກັນແລ່ນໄລ່ຕາມແລະມີໄຊຊະນະໃນການສູ້ຮົບຄັ້ງນັ້ນ.