ເຢຊາເບນ—ລາຊີນີຊົ່ວຮ້າຍ
ບົດ 66
ເຢຊາເບນ—ລາຊີນີຊົ່ວຮ້າຍ
ຫຼັງຈາກກະສັດເຢໂຣໂບອາມຕາຍ ກະສັດແຕ່ລະອົງຜູ້ທີ່ປົກຄອງອານາຈັກ 10 ກະກູນຂອງທິດເໜືອແຫ່ງຍິດສະລາເອນກໍ່ເຮັດແຕ່ຊົ່ວ. ກະສັດອາກາບເປັນກະສັດທີ່ຊົ່ວຮ້າຍທີ່ສຸດໃນທ່າມກາງກະສັດທັງໝົດ. ເຈົ້າຮູ້ບໍວ່າເພາະເຫດໃດ? ເຫດຜົນສຳຄັນອັນນຶ່ງກໍ່ຄືເຢຊາເບນເມຍຂອງທ່ານທີ່ເປັນລາຊີນີຊົ່ວຮ້າຍ.
ເຢຊາເບນບໍ່ແມ່ນຍິງຍິດສະລາເອນ. ນາງເປັນລູກສາວຂອງກະສັດຊີດົນ. ນາງນະມັດສະການພະບາອານພະປອມ ແລະນາງຊັກນຳອາກາບແລະຊົນຍິດສະລາເອນຫຼາຍຄົນໃຫ້ນະມັດສະການພະບາອານດ້ວຍ. ເຢຊາເບນກຽດຊັງພະເຢໂຫວາແລະຂ້າຜູ້ທຳນວາຍຂອງພະອົງຫຼາຍຄົນ ຜູ້ທຳນວາຍບາງຄົນໄດ້ໄປລີ້ຕົວຢູ່ໃນຖ້ຳເພື່ອເຂົາຈະບໍ່ຖືກຂ້າ. ຖ້າເຢຊາເບນຕ້ອງການສິ່ງໃດ ນາງຈະຕ້ອງເອົາໃຫ້ໄດ້ແມ່ນວ່າຈະຕ້ອງຂ້າເອົາ.
ມື້ນຶ່ງກະສັດອາກາບຮູ້ສຶກເສົ້າໂສກຫຼາຍ. ດັ່ງນັ້ນເຢຊາເບນຈຶ່ງຖາມທ່ານວ່າ: ‘ເຫດໃດມື້ນີ້ພະອົງຈຶ່ງເສົ້າໂສກແທ້?’
ອາກາບຕອບວ່າ: ‘ເນື່ອງຈາກເລື່ອງທີ່ນາບອດໄດ້ເວົ້າແກ່ເຮົານັ້ນ. ເຮົາຕ້ອງການຊື້ສວນອະງຸ່ນຂອງເພິ່ນ. ແຕ່ເພິ່ນບອກວ່າເຮົາຈະຊື້ສວນນັ້ນບໍ່ໄດ້.’
ເຢຊາເບນບອກວ່າ: ‘ບໍ່ຕ້ອງເປັນຫ່ວງ ຂ້າພະເຈົ້າຈະເອົາສວນນັ້ນໃຫ້ທ່ານ.’
ດັ່ງນັ້ນເຢຊາເບນຂຽນຈົດໝາຍເຖິງພວກຜູ້ເຖົ້າແກ່ກັບພວກອາດຍາເຈົ້ານາຍໃນເມືອງທີ່ນາບອດອາໄສຢູ່. ນາງບອກເຂົາວ່າ: ‘ຈົ່ງຈັດຫາຄົນຮ້າຍຕັ້ງຂໍ້ກ່າວຫາວ່ານາບອດໄດ້ສາບແຊ່ງພະເຈົ້າແລະກະສັດ ຈາກນັ້ນຈົ່ງນຳເພິ່ນອອກໄປນອກເມືອງແລະຍົກໝາກຫີນຄວ່າງເພິ່ນໃຫ້ຕາຍ.’
ທັນໃດທີ່ເຢຊາເບນຮູ້ວ່ານາບອດຕາຍແລ້ວ ນາງກ່າວແກ່ອາກາບວ່າ: ‘ຈົ່ງຮີບໄປແລະເອົາສວນຂອງເພິ່ນເຖີດ.’ ເຈົ້າເຫັນດ້ວຍບໍວ່າເຢຊາເບນຄວນຖືກລົງໂທດໃນການເຮັດສິ່ງທີ່ຊົ່ວຮ້າຍເຊັ່ນນີ້?
ດັ່ງນັ້ນ ເມື່ອເວລາຜ່ານໄປ ພະເຢໂຫວາສົ່ງຊາຍຄົນນຶ່ງຊື່ເຢຫຶໄປລົງໂທດນາງ. ເມື່ອເຢຊາເບນຮູ້ວ່າເຢຫຶພວມມາ ນາງຈຶ່ງແຕ້ມຕາແລະແຕ່ງຕົວນາງເອງໃຫ້ເບິ່ງສວຍງາມ. ແຕ່ເມື່ອເຢຫຶມາເຖິງແລະເຫັນນາງທີ່ປ່ອງຢ້ຽມ ທ່ານຈຶ່ງຮ້ອງບອກຄົນທີ່ຢູ່ໃນລາຊະວັງວ່າ: ‘ຈົ່ງຖິ້ມນາງລົງມາ!’ ພວກຜູ້ຊາຍກໍ່ເຮັດຕາມ ດັ່ງທີ່ເຈົ້າເຫັນໄດ້ໃນຮູບນີ້. ພວກເຂົາຖິ້ມນາງລົງໄປ ແລະນາງກໍ່ຕາຍ. ນີ້ຄືການສິ້ນສຸດຂອງລາຊີນີເຢຊາເບນຜູ້ຊົ່ວຮ້າຍນັ້ນ.
1 ກະສັດ 16:29-33; 18:1-4; 21:1-16; 2 ກະສັດ 9:30-37.