ເຫດທີ່ດາວິດຕ້ອງໜີໄປ
ບົດ 59
ເຫດທີ່ດາວິດຕ້ອງໜີໄປ
ຫຼັງຈາກດາວິດຂ້າໂຄລີອາດ ອາບເນຫົວໜ້າກອງທັບຂອງຊາດຍິດສະລາເອນຈຶ່ງນຳເພິ່ນເຂົ້າຫາຊາອຶເລ. ຊາອຶເລຮູ້ສຶກພໍໃຈກັບດາວິດຫຼາຍ. ທ່ານແຕ່ງຕັ້ງດາວິດເປັນແມ່ທັບຄົນນຶ່ງໃນກອງທັບແລະຮັບດາວິດມາຢູ່ໃນສຳນັກຂອງກະສັດ.
ຕໍ່ມາເມື່ອກອງທັບກັບມາຈາກການຕໍ່ສູ້ກັບຊາວຟີລີດຕີນ ພວກຜູ້ຍິງພາກັນຮ້ອງເພງວ່າ: ‘ຊາອຶເລໄດ້ຂ້າເປັນພັນໆ ແຕ່ດາວິດໄດ້ຂ້າເປັນໝື່ນໆ.’ ທັງນີ້ເຮັດໃຫ້ຊາອຶເລອິດສາ ເພາະວ່າດາວິດໄດ້ຮັບກຽດຫຼາຍກວ່າຊາອຶເລ. ແຕ່ໂຍນາທານບຸດຊາຍຂອງຊາອຶເລບໍ່ອິດສາ. ທ່ານຮັກດາວິດຫຼາຍ ແລະດາວິດກໍ່ຮັກໂຍນາທານຄືກັນ. ດັ່ງນັ້ນເຂົາທັງສອງເຮັດສັນຍາຕໍ່ກັນແລະກັນວ່າຈະເປັນເພື່ອນກັນຕະຫຼອດໄປ.
ດາວິດເປັນຄົນດີດພິນໄດ້ເກ່ງຫຼາຍ ແລະຊາອຶເລກໍ່ມັກຟັງດົນຕີທີ່ດາວິດຫຼິ້ນນັ້ນ. ແຕ່ມື້ນຶ່ງຄວາມອິດສາຂອງຊາອຶເລເປັນເຫດໃຫ້ທ່ານເຮັດສິ່ງທີ່ຊົ່ວຫຼາຍ. ຂະນະທີ່ດາວິດພວມດີດພິນຢູ່ ຊາອຶເລກໍ່ຈັບເອົາຫອກພຸ່ງໄປ ໂດຍກ່າວວ່າ: ‘ຂ້າຈະປັກດາວິດໃຫ້ຕິດກັບຝາ!’ ແຕ່ດາວິດຫຼົບທັນຈຶ່ງບໍ່ຖືກຫອກ. ຕໍ່ມາຫອກຂອງຊາອຶເລກໍ່ບໍ່ຖືກດາວິດອີກ. ດັ່ງນັ້ນດາວິດຮູ້ວ່າບັດນີ້ເຂົາຕ້ອງລະວັງຕົວໃຫ້ດີ.
ເຈົ້າຈື່ຄຳສັນຍາທີ່ຊາອຶເລໄດ້ເຮັດໄວ້ບໍ? ຊາອຶເລໄດ້ກ່າວວ່າຈະຍົກທິດາໃຫ້ເປັນເມຍແກ່ຜູ້ທີ່ຂ້າໂຄລີອາດໄດ້. ໃນທີ່ສຸດຊາອຶເລບອກດາວິດວ່າ ຈະຍົກມີກາເລທິດາຂອງຕົນໃຫ້ເປັນເມຍດາວິດ ແຕ່ກ່ອນອື່ນດາວິດຕ້ອງຂ້າສັດຕູຊາວຟີລີດຕີນ 100 ຄົນ. ຈົ່ງຄິດເບິ່ງ! ແທ້ຈິງແລ້ວຊາອຶເລຫວັງວ່າຊາວຟີລີດຕີນຈະຂ້າດາວິດ. ແຕ່ພວກເຂົາຂ້າບໍ່ໄດ້ ແລະດັ່ງນັ້ນຊາອຶເລຈຶ່ງຍົກທິດາຂອງຕົນໃຫ້ເປັນເມຍຂອງດາວິດ.
ມື້ນຶ່ງຊາອຶເລບອກໂຍນາທານແລະຂ້າລາຊະການວ່າທ່ານຢາກຈະຂ້າດາວິດ. ແຕ່ໂຍນາທານທູນລາຊະບິດາວ່າ: ‘ໂປດຢ່າເຮັດອັນຕະລາຍແກ່ດາວິດ. ເພິ່ນບໍ່ໄດ້ເຮັດສິ່ງຜິດຕໍ່ພະອົງເລີຍ. ກົງກັນຂ້າມ ທຸກສິ່ງທີ່ດາວິດໄດ້ເຮັດລ້ວນເປັນການຊ່ວຍເຫຼືອພະອົງຢ່າງໃຫຍ່ຫຼວງ. ດາວິດຍອມສ່ຽງຊີວິດຂອງຕົນເມື່ອໄດ້ຂ້າໂຄລີອາດນັ້ນ ແລະຄັນທ່ານເຫັນແລ້ວທ່ານກໍ່ມີຄວາມຍິນດີ.’
ຊາອຶເລກໍ່ຍອມຟັງລາຊະບຸດຂອງຕົນ ແລະສັນຍາວ່າຈະບໍ່ເຮັດອັນຕະລາຍດາວິດ. ດາວິດໄດ້ຖືກນຳຕົວກັບເຂົ້າມາຮັບໃຊ້ຊາອຶເລຢູ່ໃນລາຊະສຳນັກອີກດັ່ງໄດ້ເຮັດແຕ່ກ່ອນ. ຢ່າງໃດກໍ່ດີ ມື້ນຶ່ງຂະນະທີ່ດາວິດພວມຫຼິ້ນດົນຕີຢູ່ ຊາອຶເລຊັດຫອກໄປທີ່ດາວິດອີກ. ດາວິດຫຼົບທັນ ແລະຫອກຈຶ່ງປັກຖືກຝາ. ນີ້ເປັນເທື່ອທີສາມແລ້ວ! ດຽວນີ້ດາວິດຮູ້ວ່າບັດນີ້ຕົນຕ້ອງໜີໄປ!
ຄືນນັ້ນດາວິດໄປເຮືອນຂອງຕົນ. ແຕ່ຊາອຶເລສົ່ງບາງຄົນໄປຂ້າດາວິດ. ມີກາເລຮູ້ອຸບາຍລາຊະບິດາຂອງນາງ. ດັ່ງນັ້ນນາງຈຶ່ງບອກຜົວວ່າ: ‘ຖ້າທ່ານບໍ່ໜີໄປຄືນນີ້ ມື້ອື່ນທ່ານຈະຕາຍ.’ ຄືນນັ້ນມີກາເລຊ່ວຍດາວິດຫຼົບໜີທາງປ່ອງຢ້ຽມ. ດາວິດຕ້ອງຫຼົບລີ້ຕົວຕາມທີ່ຕ່າງໆເປັນເວລາເຈັດປີເພື່ອວ່າຊາອຶເລຈະບໍ່ສາມາດພົບຕົວໄດ້.