ໂຍນາແລະປາໃຫຍ່
ບົດ 70
ໂຍນາແລະປາໃຫຍ່
ເບິ່ງຊາຍຄົນນັ້ນໃນນ້ຳແດ່. ເຂົາພວມໄດ້ຮັບຄວາມລຳບາກຫຼາຍ ແມ່ນບໍ? ປາຕົວນັ້ນພວມຈະກືນເຂົາ! ເຈົ້າຮູ້ບໍວ່າຜູ້ຊາຍຄົນນີ້ຄືຜູ້ໃດ? ເຂົາຊື່ໂຍນາ. ໃຫ້ເຮົາພິຈາລະນາເບິ່ງວ່າເຂົາໄດ້ຕົກເຂົ້າສູ່ການອັນຕະລາຍນີ້ໂດຍວິທີໃດ.
ໂຍນາເປັນຜູ້ທຳນວາຍຂອງພະເຢໂຫວາ. ຫຼັງຈາກທີ່ຜູ້ທຳນວາຍເອລີເຊຕາຍບໍ່ດົນພະເຢໂຫວາສັ່ງໂຍນາວ່າ: ‘ຈົ່ງໄປນີນີເວເມືອງໃຫຍ່. ຄວາມຊົ່ວຮ້າຍຂອງປະຊາຊົນທີ່ນັ້ນມີມາກມາຍ. ແລະເຮົາຕ້ອງການໃຫ້ເຈົ້າໄປບອກເຂົາເຖິງເລື່ອງນີ້.’
ແຕ່ໂຍນາບໍ່ຢາກໄປ. ດັ່ງນັ້ນທ່ານຈຶ່ງຂຶ້ນເຮືອລຳນຶ່ງຊຶ່ງຈະໄປໃນທິດກົງກັນຂ້າມຈາກນີນີເວ. ພະເຢໂຫວາບໍ່ຍິນດີກັບໂຍນາເພາະເຂົາຫຼົບໜີຢ່າງນັ້ນ. ດັ່ງນັ້ນພະອົງບັນດານໃຫ້ເກີດລົມພາຍຸໃຫຍ່. ລົມພາຍຸນັ້ນແຮງກ້າຫຼາຍຈົນເຖິງກັບເຮືອນັ້ນຢູ່ໃນອັນຕະລາຍຈະຈົມ. ພວກລູກເຮືອກໍ່ມີຄວາມຢ້ານຫຼາຍ ແລະພວກເຂົາຂໍຄວາມຊ່ວຍເຫຼືອຈາກພະຂອງຕົນ.
ໃນທີ່ສຸດໂຍນາບອກພວກເຂົາວ່າ: ‘ຂ້າພະເຈົ້ານະມັດສະການພະເຢໂຫວາ ພະເຈົ້າຜູ້ໄດ້ສ້າງຟ້າສະຫວັນແລະແຜ່ນດິນໂລກ. ແລະຂ້າພະເຈົ້າພວມຫຼົບໜີຈາກການເຮັດສິ່ງທີ່ພະເຢໂຫວາສັ່ງໃຫ້ຂ້າພະເຈົ້າເຮັດນັ້ນ.’ ດັ່ງນັ້ນພວກລູກເຮືອຈຶ່ງຖາມວ່າ: ‘ພວກເຮົາຄວນຈະເຮັດຢ່າງໃດແກ່ທ່ານເພື່ອໃຫ້ລົມພາຍຸສະຫງົບລົງ?’
ໂຍນາບອກວ່າ: ‘ຈົ່ງໂຍນຂ້າພະເຈົ້າລົງໃນນ້ຳທະເລເຖີດ ແລະນ້ຳທະເລກໍ່ຈະສະຫງົບອີກ.’ ພວກລູກເຮືອບໍ່ຢາກເຮັດດັ່ງນັ້ນ ແຕ່ລົມພາຍຸຍິ່ງຮ້າຍແຮງຂຶ້ນທຸກທີ ໃນທີ່ສຸດພວກເຂົາຈຶ່ງຈັບໂຍນາຖິ້ມລົງໃນທະເລ. ລົມພາຍຸກໍ່ຢຸດທັນທີ ແລະນ້ຳທະເລກໍ່ສະຫງົບອີກ.
ຂະນະທີ່ໂຍນາຈົມລົງໃນນ້ຳ ປາໃຫຍ່ຕົວນຶ່ງກໍ່ມາກືນເຂົາ. ແຕ່ເຂົາບໍ່ໄດ້ຕາຍ. ເຂົາຢູ່ໃນທ້ອງປານັ້ນເປັນເວລາສາມມື້ສາມຄືນ. ໂຍນາເສຍໃຈຫຼາຍທີ່ເຂົາບໍ່ໄດ້ເຊື່ອຟັງພະເຢໂຫວາທີ່ໃຫ້ໄປເມືອງນີນີເວ. ດັ່ງນັ້ນເຈົ້າຮູ້ບໍວ່າເຂົາໄດ້ເຮັດຢ່າງໃດ?
ໂຍນາອະທິດຖານຂໍຄວາມຊ່ວຍເຫຼືອຈາກພະເຢໂຫວາ. ຄັນແລ້ວພະອົງບັນດານໃຫ້ປານັ້ນຮາກໂຍນາອອກເທິງດິນແຫ້ງ. ຫຼັງຈາກນັ້ນໂຍນາກໍ່ໄປທີ່ເມືອງນີນີເວ. ເລື່ອງນີ້ສອນວ່າການເຮັດສິ່ງທີ່ພະເຢໂຫວາກ່າວນັ້ນສຳຄັນອີ່ຫຼີບໍ່ແມ່ນບໍ?
ປະຫວັດໂຍນາໃນຄຳພີໄບເບິນ.
