ພະເຍຊູມີຊີວິດຢູ່
ບົດ 102
ພະເຍຊູມີຊີວິດຢູ່
ເຈົ້າຮູ້ບໍວ່າຜູ້ຍິງແລະຜູ້ຊາຍສອງຄົນນັ້ນແມ່ນໃຜ? ຜູ້ຍິງຄົນນີ້ຄືມາລີ ມັກດາລາ ເພື່ອນຂອງພະເຍຊູ. ແລະຊາຍສອງຄົນທີ່ນຸ່ງຫົ່ມເສື້ອຜ້າຂາວນັ້ນຄືທູດສະຫວັນ. ຫ້ອງນ້ອຍໆທີ່ມາລີມອງເບິ່ງເຂົ້າໄປນີ້ແມ່ນບ່ອນທີ່ເອົາສົບຂອງພະເຍຊູໃສ່ໄວ້ຫຼັງຈາກພະອົງສິ້ນຊີວິດ. ເຂົາເອີ້ນວ່າອຸມົງຝັງສົບ. ແຕ່ບັດນີ້ສົບນັ້ນຫາຍໄປ! ໃຜເອົາສົບນັ້ນໄປ? ໃຫ້ເຮົາອ່ານເບິ່ງ.
ຫຼັງຈາກພະເຍຊູສິ້ນຊີວິດ ພວກປະໂລຫິດເວົ້າກັບພີລາດວ່າ: ‘ເມື່ອພະເຍຊູຍັງມີຊີວິດຢູ່ເຂົາບອກວ່າ ເຂົາຈະຖືກປຸກຂຶ້ນມາຈາກຕາຍຫຼັງຈາກສາມມື້. ສະນັ້ນຂໍສັ່ງໃຫ້ມີການເຝົ້າອຸມົງ. ແລ້ວພວກສາວົກຂອງເຂົາຈະມາລັກເອົາສົບໄປບໍ່ໄດ້ ແລະຈະບອກບໍ່ໄດ້ວ່າເຂົາຖືກປຸກໃຫ້ເປັນຂຶ້ນຈາກຕາຍ!’ ພີລາດຈຶ່ງສົ່ງທະຫານໄປເຝົ້າອຸມົງ.
ແຕ່ຕອນເຊົ້າມືດຂອງມື້ທີສາມຫຼັງຈາກພະເຍຊູສິ້ນຊີວິດ ທັນໃດນັ້ນທູດສະຫວັນອົງນຶ່ງຂອງພະເຢໂຫວາມາ. ທ່ານກິ້ງຫີນອອກຈາກປາກອຸມົງ. ພວກທະຫານຮູ້ສຶກຢ້ານຈົນຕົວແຂງ. ໃນທີ່ສຸດເມື່ອພວກເຂົາມອງເຂົ້າໄປໃນອຸມົງສົບກໍ່ຫາຍໄປແລ້ວ! ທະຫານບາງຄົນເຂົ້າໄປໃນເມືອງແລະແຈ້ງໃຫ້ພວກປະໂລຫິດຮູ້. ເຈົ້າຮູ້ບໍວ່າປະໂລຫິດຊົ່ວເຫຼົ່ານີ້ເຮັດຢ່າງໃດ? ເຂົາເອົາເງິນຈ້າງພວກທະຫານໃຫ້ເວົ້າຕົວະ. ພວກປະໂລຫິດບອກທະຫານຍາມດັ່ງນີ້: ‘ຈົ່ງບອກວ່າພວກສາວົກຂອງເຂົາມາລັກເອົາສົບໄປໃນເວລາກາງຄືນ ຂະນະທີ່ພວກເຮົານອນຫຼັບຢູ່.’
ໃນລະຫວ່າງນັ້ນພວກຜູ້ຍິງບາງຄົນຊຶ່ງເປັນສະຫາຍຂອງພະເຍຊູມາຢ້ຽມທີ່ອຸມົງ. ພວກເຂົາປະຫຼາດໃຈແທ້ໆທີ່ເຫັນອຸມົງນັ້ນວ່າງເປົ່າ! ທັນໃດນັ້ນທູດສະຫວັນສອງອົງນຸ່ງຫົ່ມເສື້ອຜ້າຂາວເຫຼື້ອມມາປາກົດຕົວ. ທູດສະຫວັນຖາມວ່າ: ‘ເປັນຫຍັງເຈົ້າຈຶ່ງຊອກຫາພະເຍຊູທີ່ນີ້? ພະອົງຖືກປຸກໃຫ້ເປັນຂຶ້ນມາຈາກຕາຍແລ້ວ. ຈົ່ງຮີບໄປບອກພວກສາວົກຂອງພະອົງເຖີດ.’ ພວກຜູ້ຍິງກໍ່ພາກັນແລ່ນໄປຢ່າງໄວ! ແຕ່ຂະນະຕາມທາງນັ້ນມີຊາຍຄົນນຶ່ງເອີ້ນໃຫ້ເຂົາຢຸດ. ເຈົ້າຮູ້ບໍວ່າຊາຍຄົນນັ້ນຄືຜູ້ໃດ? ຄືພະເຍຊູ! ພະອົງຕັດວ່າ: ‘ຈົ່ງໄປບອກສາວົກຂອງເຮົາ.’
ເມື່ອພວກຜູ້ຍິງບອກເຫຼົ່າສາວົກວ່າພະເຍຊູມີຊີວິດຢູ່ແລະພວກຕົນໄດ້ເຫັນພະອົງແລ້ວ ພວກສາວົກເຫັນວ່າເລື່ອງນີ້ເຊື່ອໄດ້ຍາກ. ເປໂຕກັບໂຍຮັນຈຶ່ງແລ່ນໄປທີ່ອຸມົງເພື່ອຈະເຫັນດ້ວຍຕົນເອງ ແຕ່ອຸມົງວ່າງເປົ່າອີ່ຫຼີ! ເມື່ອເປໂຕແລະໂຍຮັນອອກໄປແລ້ວ ມາລີມັກດາລາຍັງຄ້າງຢູ່ທີ່ນັ້ນ. ຕອນນັ້ນເອງນາງຈຶ່ງມອງເບິ່ງຂ້າງໃນອຸມົງແລະກໍ່ເຫັນທູດສະຫວັນສອງອົງ.
ເຈົ້າຮູ້ບໍວ່າມີສິ່ງໃດໄດ້ເກີດຂຶ້ນກັບສົບຂອງພະເຍຊູ? ພະເຈົ້າບັນດານໃຫ້ສົບນັ້ນຫາຍສາບສູນໄປ. ພະເຈົ້າບໍ່ໄດ້ປຸກພະເຍຊູເປັນຂຶ້ນມາໃຫ້ມີຊີວິດອີກໃນຮ່າງກາຍເນື້ອໜັງຊຶ່ງພະອົງຕາຍໄປນັ້ນ. ແຕ່ພະເຈົ້າໄດ້ໃຫ້ຮ່າງກາຍໃໝ່ ຄືກາຍວິນຍານແກ່ພະເຍຊູ ຢ່າງທີ່ທູດສະຫວັນມີໃນພາກສະຫວັນ. ແຕ່ເພື່ອສະແດງໃຫ້ສາວົກຂອງພະອົງເຫັນວ່າພະອົງມີຊີວິດຢູ່ ພະເຍຊູຈຶ່ງແປງກາຍຊຶ່ງຄົນເຮົາເຫັນໄດ້ ດັ່ງທີ່ພວກເຮົາຈະຮຽນຮູ້ກັນ.
ມັດທາຍ 27:62-66; 28:1-15; ລຶກາ 24:1-12; ໂຍຮັນ 20:1-12.