ລໍຖ້າຢູ່ໃນນະຄອນເຢຣຶຊາເລມ
ບົດ 105
ລໍຖ້າຢູ່ໃນນະຄອນເຢຣຶຊາເລມ
ຄົນໃນຮູບນີ້ແມ່ນສາວົກຂອງພະເຍຊູ. ເຂົາໄດ້ເຊື່ອຟັງພະເຍຊູແລະໄດ້ຄອຍຢູ່ໃນນະຄອນເຢຣຶຊາເລມ. ແລະຂະນະທີ່ທຸກຄົນລໍຄອຍຢູ່ດ້ວຍກັນນັ້ນ ມີສຽງດັງສະໜັ່ນກ້ອງໄປທົ່ວເຮືອນ. ສຽງນັ້ນຄ້າຍກັບສຽງລົມພາຍຸກ້າພັດແຮງ. ຄັນແລ້ວກໍ່ມີແປວໄຟຄືລີ້ນເລີ່ມປາກົດເທິງຫົວຂອງພວກສາວົກແຕ່ລະຄົນ. ເຈົ້າເຫັນແປວໄຟຢູ່ເທິງຫົວຂອງພວກເຂົາແຕ່ລະຄົນບໍ? ທັງໝົດນີ້ມີຄວາມໝາຍອັນໃດ?
ນັ້ນເປັນການອັດສະຈັນ! ພະເຍຊູສະເດັດກັບໄປຢູ່ກັບພະບິດາຂອງພະອົງໃນສະຫວັນແລະຫຼັ່ງພະວິນຍານບໍລິສຸດຂອງພະເຈົ້າລົງເໜືອພວກສາວົກຂອງພະອົງ. ພະວິນຍານນີ້ກະຕຸ້ນເຂົາໃຫ້ເຮັດອັນໃດເຈົ້າຮູ້ບໍ? ພວກເຂົາທຸກຄົນເລີ່ມເວົ້າພາສາຕ່າງໆກັນ.
ຄົນຫຼາຍຄົນໃນນະຄອນເຢຣຶຊາເລມໄດ້ຍິນສຽງຄ້າຍກັບສຽງລົມພາຍຸອັນແຮງກ້າ ແລະເຂົາຈຶ່ງພາກັນມາເບິ່ງວ່າມີຫຍັງເກີດຂຶ້ນ. ບາງຄົນຈາກປະເທດອື່ນໆມາທີ່ນີ້ເພື່ອຮ່ວມງານສະຫຼອງວັນເພນເຕກອດຂອງຊົນຍິດສະລາເອນ. ຜູ້ທີ່ເປັນແຂກເຫຼົ່ານີ້ປະສົບສິ່ງໜ້າປະຫຼາດອີ່ຫຼີ! ພວກເຂົາໄດ້ຍິນເຫຼົ່າສາວົກຂອງພະເຍຊູເວົ້າພາສາຂອງຕົນເຖິງສິ່ງໜ້າພິດສະຫວົງຕ່າງໆທີ່ພະເຈົ້າໄດ້ກະທຳນັ້ນ.
ບັນດາຜູ້ເປັນແຂກມາຢ້ຽມກ່າວວ່າ: ‘ຄົນເຫຼົ່ານີ້ທັງໝົດມາຈາກຄາລິເລ ເຫດໃດເຂົາຈຶ່ງສາມາດເວົ້າພາສາຕ່າງໆໄດ້ທີ່ເປັນພາສາຂອງປະເທດຕ່າງໆແຫ່ງບ້ານເກີດຂອງເຮົາເອງ?’
ຕອນນີ້ເປໂຕຢືນຂຶ້ນອະທິບາຍໃຫ້ເຂົາຟັງ. ທ່ານເປ່ງສຽງກ່າວແກ່ຜູ້ຄົນເຖິງວິທີທີ່ພະເຍຊູຖືກປະຫານແລະການທີ່ພະເຢໂຫວາໄດ້ປຸກພະອົງໃຫ້ເປັນຂຶ້ນມາຈາກຕາຍ. ເປໂຕກ່າວວ່າ: ‘ດຽວນີ້ພະເຍຊູຢູ່ເບື້ອງຂວາມືຂອງພະເຈົ້າ ແລະພະອົງໄດ້ຫຼັ່ງພະວິນຍານບໍລິສຸດລົງມາຕາມທີ່ໄດ້ສັນຍາໄວ້. ດ້ວຍເຫດນີ້ພວກທ່ານຈຶ່ງໄດ້ເຫັນແລະໄດ້ຍິນສິ່ງໜ້າອັດສະຈັນເຫຼົ່ານີ້.’
ເອົາລະ ເມື່ອເປໂຕເວົ້າເຖິງສິ່ງເຫຼົ່ານີ້ແລ້ວ ຄົນຫຼາຍຄົນຮູ້ສຶກເສຍໃຈຢ່າງຍິ່ງເຖິງການທີ່ໄດ້ເຮັດແກ່ພະເຍຊູ. ເຂົາຖາມວ່າ: ‘ພວກເຮົາຄວນຈະເຮັດປະການໃດ?’ ເປໂຕບອກເຂົາວ່າ: ‘ທ່ານທັງຫຼາຍຈຳເປັນຕ້ອງປ່ຽນແນວທາງຊີວິດຂອງຕົນແລະຮັບບັບເຕມາ.’ ດັ່ງນັ້ນໃນວັນນັ້ນເອງມີປະມານ 3000 ຄົນຮັບບັບເຕມາແລະເຂົ້າມາເປັນສາວົກຂອງພະເຍຊູ.
