ຄົນພວກນຶ່ງອາໄສດາວນຳທາງ
ບົດ 86
ຄົນພວກນຶ່ງອາໄສດາວນຳທາງ
ເຈົ້າເຫັນດາວສຸກໃສທີ່ຊາຍຄົນນຶ່ງພວມຊີ້ມືໃຫ້ເບິ່ງນັ້ນບໍ? ເມື່ອພວກເຂົາອອກຈາກເຢຣຶຊາເລມ ດາວໄດ້ປາກົດຂຶ້ນ. ຄົນເຫຼົ່ານີ້ມາຈາກທິດຕາເວັນອອກ ເປັນພວກທີ່ສຶກສາເລື່ອງດວງດາວ. ເຂົາເຊື່ອວ່າດວງດາວໃໝ່ນີ້ພວມນຳເຂົາໄປຫາຄົນສຳຄັນຜູ້ນຶ່ງ.
ຕອນທີ່ເຂົາມາເຖິງເຢຣຶຊາເລມ ເຂົາຖາມວ່າ: ‘ກຸມານຜູ້ທີ່ຈະເປັນກະສັດຂອງພວກຍິວນັ້ນຢູ່ໃສ?’ “ພວກຍິວ” ເປັນອີກຊື່ນຶ່ງຂອງພວກຍິດສະລາເອນ. ຄົນເຫຼົ່ານັ້ນກ່າວວ່າ: ‘ທຳອິດເຮົາໄດ້ເຫັນດາວຂອງກຸມານນັ້ນຂະນະທີ່ເຮົາຢູ່ທິດຕາເວັນອອກ ແລະພວກເຮົາມາເພື່ອນະມັດສະການພະອົງ.’
ເມື່ອເຫໂລດຜູ້ເປັນກະສັດທີ່ນະຄອນເຢຣຶຊາເລມໄດ້ຍິນເລື່ອງນີ້ທ່ານກໍ່ວຸ່ນວາຍໃຈ. ທ່ານບໍ່ຢາກໃຫ້ກະສັດອົງອື່ນມາຍຶດເອົາຕຳແໜ່ງຂອງທ່ານ. ດັ່ງນັ້ນເຫໂລດຈຶ່ງເອີ້ນພວກປະໂລຫິດໃຫຍ່ມາແລະຖາມວ່າ: ‘ກະສັດທີ່ມີຄຳສັນຍາໄວ້ນັ້ນຈະມາປະສູດທີ່ໃດ?’ ພວກເຂົາຕອບວ່າ: ‘ຄຳພີໄບເບິນບອກວ່າທີ່ບ້ານເບດເລເຫມ.’
ສະນັ້ນເຫໂລດຈຶ່ງໄດ້ຮຽກພວກຄົນທີ່ມາຈາກຕາເວັນອອກ ແລະສັ່ງວ່າ: ‘ຈົ່ງໄປສືບຫາກຸມານນັ້ນ. ເມື່ອພົບທ່ານແລ້ວ ຈົ່ງມາແຈ້ງໃຫ້ເຮົາຊາບ. ເຮົາຢາກຈະໄປນະມັດສະການທ່ານດ້ວຍ.’ ແຕ່ແທ້ຈິງແລ້ວ ເຫໂລດຢາກຈະພົບກຸມານນັ້ນເພື່ອຂ້າທ່ານເສຍ!
ຄັນແລ້ວດາວກໍ່ນຳຄົນເຫຼົ່ານັ້ນເຖິງເບດເລເຫມແລະຢຸດເທິງບ່ອນກຸມານຢູ່. ເມື່ອເຂົ້າໃນເຮືອນກໍ່ພົບມາລີແລະພະເຍຊູ. ເຂົາເອົາຂອງກຳນັນມາຖວາຍພະເຍຊູ. ແຕ່ຕໍ່ມາພະເຢໂຫວາເຕືອນຄົນພວກນີ້ໃນຄວາມຝັນ ຫ້າມບໍ່ໃຫ້ກັບໄປຫາເຫໂລດ. ດັ່ງນັ້ນພວກເຂົາຈຶ່ງເມືອປະເທດຂອງຕົນຕາມທາງເສັ້ນອື່ນ.
ເມື່ອເຫໂລດຮູ້ວ່າຄົນພວກນັ້ນທີ່ມາຈາກທິດຕາເວັນອອກໄດ້ເດີນທາງເມືອບ້ານແລ້ວທ່ານກໍ່ໂກດຫຼາຍ. ດັ່ງນັ້ນທ່ານຈຶ່ງສັ່ງໃຫ້ເອົາຜູ້ຊາຍທັງໝົດໃນເບດເລເຫມທີ່ມີອາຍຸສອງປີແລະຕ່ຳກວ່າໄປຂ້າ. ແຕ່ພະເຢໂຫວາເຕືອນໂຍເຊບໄວ້ກ່ອນໃນຄວາມຝັນ ໂຍເຊບກັບຄອບຄົວອອກເດີນທາງໄປອີຢີບ. ພາຍຫຼັງເມື່ອໂຍເຊບຮູ້ວ່າເຫໂລດສິ້ນຊີວິດແລ້ວ ເຂົາຈຶ່ງພາມາລີແລະພະເຍຊູກັບເມືອບ້ານທີ່ເມືອງນາຊາເລດ. ພະເຍຊູເຕີບໂຕຂຶ້ນທີ່ນັ້ນ.
ເຈົ້າຄິດວ່າໃຜເຮັດໃຫ້ດາວດວງໃໝ່ນັ້ນສ່ອງແສງ? ຈົ່ງຈື່ໄວ້ວ່າ ທຳອິດນັ້ນຄົນພວກນີ້ໄປເຢຣຶຊາເລມຫຼັງຈາກແລເຫັນດາວ. ພະຍາມານຊາຕານຕ້ອງການຈະຂ້າພະບຸດຂອງພະເຈົ້າ ແລະມັນຮູ້ວ່າກະສັດເຫໂລດແຫ່ງເຢຣຶຊາເລມຄົງຈະພະຍາຍາມຂ້າພະອົງ. ດັ່ງນັ້ນຊາຕານຕ້ອງເປັນຜູ້ທີ່ໄດ້ເຮັດໃຫ້ດາວດວງນັ້ນສ່ອງແສງ.