ພະເຍຊູຖືກປະຫານ
ບົດ 101
ພະເຍຊູຖືກປະຫານ
ເບິ່ງສິ່ງທີ່ຮ້າຍກາດຊຶ່ງພວມເກີດຂຶ້ນທີ່ນີ້ເດີ! ພະເຍຊູພວມຖືກປະຫານ. ເຂົາເອົາພະອົງຕອກກັບຫຼັກ. ເອົາຕະປູຕອກລົງທີ່ມືແລະຕີນຂອງພະອົງ. ເຫດໃດທີ່ຜູ້ໃດຜູ້ນຶ່ງຢາກເຮັດຢ່າງນີ້ກັບພະເຍຊູ?
ທັງນີ້ກໍ່ເພາະວ່າມີບາງຄົນຊັງພະເຍຊູ. ຄົນພວກນີ້ແມ່ນໃຜເຈົ້າຮູ້ບໍ? ຜູ້ນຶ່ງໃນພວກເຂົາຄືຊາຕານພະຍາມານທູດສະຫວັນຊົ່ວຮ້າຍນັ້ນ. ພະຍາມານເປັນຜູ້ນັ້ນທີ່ສາມາດເຮັດໃຫ້ອາດາມແລະເອວາບໍ່ເຊື່ອຟັງພະເຢໂຫວາ. ແລະຊາຕານເປັນຜູ້ນັ້ນທີ່ກໍ່ໃຫ້ພວກສັດຕູຂອງພະເຍຊູເຮັດອາດຊະຍາກຳອັນຮ້າຍກາດແນວນີ້.
ສັດຕູຂອງພະອົງເຮັດສິ່ງຊົ່ວຊ້າຫຼາຍຢ່າງຕໍ່ພະເຍຊູແມ່ນແຕ່ກ່ອນທີ່ພະອົງຖືກຕອກກັບຫຼັກ. ຈື່ໄດ້ບໍຕອນທີ່ພວກເຂົາເຂົ້າມາໃນສວນເຄດເຊມາເນແລະຈັບກຸມເອົາພະອົງໄປ? ສັດຕູເຫຼົ່ານັ້ນແມ່ນໃຜ? ແມ່ນແລ້ວ ເຂົາເປັນພວກຫົວໜ້າສາສະໜາ. ເອົາລະ ໃຫ້ເຮົາເບິ່ງວ່າຈະມີຫຍັງເກີດຂຶ້ນຕໍ່ໄປ.
ເມື່ອບັນດາຫົວໜ້າສາສະໜາຈັບພະເຍຊູໄປແລ້ວ ພວກອັກຄະສາວົກຂອງພະອົງຕ່າງກໍ່ແລ່ນໜີກັນ ຖິ້ມພະອົງໄວ້ແຕ່ລຳພັງກັບພວກສັດຕູ. ເຫດວ່າພວກເຂົາຢ້ານ. ແຕ່ອັກຄະສາວົກເປໂຕແລະໂຍຮັນບໍ່ໄດ້ໄປໄກໜັກ. ເຂົາຕິດຕາມໄປເບິ່ງວ່າຈະມີຫຍັງເກີດຂຶ້ນກັບພະເຍຊູ.
ພວກປະໂລຫິດນຳພະເຍຊູໄປຫາອັນນາຜູ້ສູງອາຍຸ ຊຶ່ງເຄີຍເປັນປະໂລຫິດຜູ້ໃຫຍ່ມາກ່ອນ. ຝູງຊົນຢູ່ທີ່ນີ້ບໍ່ດົນ. ຕໍ່ຈາກນັ້ນເຂົານຳພະເຍຊູໄປທີ່ເຮືອນກາອີເຟຜູ້ເປັນປະໂລຫິດຜູ້ໃຫຍ່ໃນເວລານີ້. ພວກຫົວໜ້າສາສະໜາຫຼາຍຄົນມາຊຸມນຸມກັນທີ່ເຮືອນທ່ານ.
ມີການພິຈາລະນາຄະດີໃນເຮືອນຂອງກາອີເຟນີ້ເອງ. ບາງຄົນຖືກນຳຕົວເຂົ້າມາໃຫ້ເວົ້າຄວາມບໍ່ຈິງກ່ຽວກັບພະເຍຊູ. ຫົວໜ້າສາສະໜາທັງໝົດບອກວ່າ: ‘ພະເຍຊູຄວນຈະຖືກປະຫານ.’ ແລ້ວເຂົາກໍ່ຖົ່ມນ້ຳລາຍໃສ່ໜ້າພະອົງ ແລະທຸບຕີພະອົງດ້ວຍກຳປັ້ນຂອງເຂົາ.
ລະຫວ່າງທີ່ເຫດການເຫຼົ່ານີ້ພວມດຳເນີນຢູ່ ເປໂຕຢູ່ຂ້າງນອກໃນລານເຮືອນ. ຄ່ຳຄືນນັ້ນອາກາດໜາວ ຜູ້ຄົນກໍ່ດັງໄຟຂຶ້ນ. ຂະນະທີ່ເຂົາຝິງໄຟກັນຢູ່ຮອບໆ ສາວໃຊ້ຄົນນຶ່ງແນມເບິ່ງເປໂຕແລ້ວກ່າວວ່າ: ‘ຊາຍຄົນນີ້ເຄີຍຢູ່ກັບພະເຍຊູດ້ວຍ.’
ເປໂຕຕອບວ່າ: ‘ບໍ່ ຂ້ອຍບໍ່ເຄີຍ!’
ຜູ້ຄົນກ່າວກັບເປໂຕເຖິງສາມເທື່ອວ່າທ່ານເຄີຍຢູ່ນຳພະເຍຊູ. ແຕ່ລະເທື່ອເປໂຕບອກວ່າບໍ່ຈິງ. ເທື່ອທີສາມທີ່ເປໂຕເວົ້າດັ່ງນີ້ ພະເຍຊູຫັນໄປເບິ່ງເຂົາ. ເປໂຕຮູ້ສຶກເສຍໃຈຢ່າງຍິ່ງທີ່ໄດ້ເວົ້າຄຳຕົວະຢ່າງນີ້ ເຂົາຈຶ່ງອອກໄປຂ້າງນອກແລ້ວຮ້ອງໄຫ້ເປັນທຸກໃຈຫຼາຍ.
ຕອນເຊົ້າຂອງວັນສຸກຂະນະດວງອາທິດເລີ່ມຂຶ້ນ ພວກປະໂລຫິດນຳເອົາພະເຍຊູໄປທີ່ແຊນເຮດດຣິນ ຄືຫໍປະຊຸມໃຫຍ່ຂອງເຂົາ. ນະ ທີ່ນີ້ພວກເຂົາພິຈາລະນາກັນວ່າຈະເຮັດຢ່າງໃດກັບພະເຍຊູ. ເຂົາຄຸມຕົວພະອົງໄປຫາປົນເຊພີລາດ ຜູ້ປົກຄອງແຂວງຢູດາ.
ພວກປະໂລຫິດບອກພີລາດວ່າ: ‘ຊາຍຜູ້ນີ້ເປັນຄົນຊົ່ວຮ້າຍ ເຂົາຄວນຖືກປະຫານ.’ ຫຼັງຈາກໄດ້ສອບຖາມພະເຍຊູແລ້ວ ພີລາດກ່າວວ່າ: ‘ເຮົາບໍ່ເຫັນຄົນຜູ້ນີ້ເຮັດຜິດປະການໃດ.’ ຈາກນັ້ນພີລາດສົ່ງພະເຍຊູໄປຫາເຫໂລດອັນຕິປາ. ເຫໂລດເປັນຜູ້ປົກຄອງແຂວງຄາລິເລ ແຕ່ທ່ານອາໄສຢູ່ເຢຣຶຊາເລມ. ເຫໂລດກໍ່ຄືກັນບໍ່ເຫັນວ່າພະເຍຊູເຮັດສິ່ງໃດຜິດ ຈຶ່ງສົ່ງພະເຍຊູກັບຄືນໄປຫາພີລາດ.
ພີລາດຕ້ອງການຈະປ່ອຍພະເຍຊູໄປ. ແຕ່ພວກສັດຕູຂອງພະເຍຊູຕ້ອງການໃຫ້ປ່ອຍນັກໂທດອີກຄົນນຶ່ງແທນ. ຊາຍຄົນນີ້ຄືບາລັບບາດນັກປຸ້ນຜູ້ຮ້າຍ. ຕອນນີ້ເປັນເວລາເກືອບທ່ຽງມື້ຂະນະທີ່ພີລາດນຳເອົາພະເຍຊູອອກມາຂ້າງນອກ. ທ່ານບອກຜູ້ຄົນວ່າ: ‘ເບິ່ງເຖີດ! ກະສັດຂອງພວກທ່ານ!’ ແຕ່ພວກຫົວໜ້າປະໂລຫິດຮ້ອງສຽງດັງວ່າ: ‘ຈົ່ງເອົາເຂົາໄປເສຍ! ຂ້າເຂົາ! ຂ້າເຂົາ!’ ສະນັ້ນພີລາດຈຶ່ງໄດ້ປ່ອຍບາລັບບາດແລ້ວເອົາພະເຍຊູໄປປະຫານຊີວິດ.
ພະເຍຊູຖືກຕອກໃສ່ຫຼັກຕອນບ່າຍຂອງວັນສຸກ. ເຂົາໄດ້ເອົາຜູ້ຮ້າຍສອງຄົນໄປປະຫານທີ່ຫຼັກທໍລະມານຄົນລະຂ້າງຂອງພະເຍຊູດ້ວຍ. ແຕ່ເຈົ້າຈະບໍ່ເຫັນເຂົາໃນຮູບນີ້. ບໍ່ດົນກ່ອນພະເຍຊູຈະສິ້ນພະຊົນ ຜູ້ຮ້າຍຄົນນຶ່ງທູນພະອົງວ່າ: ‘ຂໍລະນຶກເຖິງຂ້າພະເຈົ້າເມື່ອພະອົງສະເດັດເຂົ້າໄປໃນລາຊະອານາຈັກຂອງພະອົງເຖີດ.’ ແລະພະເຍຊູຕອບວ່າ: ‘ເຮົາສັນຍາກັບເຈົ້າວ່າເຈົ້າຈະຢູ່ກັບເຮົາໃນອຸດທະຍານ.’
ນັ້ນເປັນຄຳສັນຍາທີ່ໜ້າຊື່ນໃຈບໍ່ແມ່ນບໍ? ເຈົ້າຮູ້ບໍວ່າອຸດທະຍານອັນໃດກັນທີ່ພະເຍຊູເວົ້າເຖິງ? ທຳອິດພະເຈົ້າສ້າງອຸດທະຍານໄວ້ໃຫ້ຢູ່ທີ່ໃດ? ຖືກແລ້ວ ທີ່ແຜ່ນດິນໂລກ. ແລະເມື່ອພະເຍຊູປົກຄອງເປັນກະສັດໃນສະຫວັນນັ້ນ ພະອົງຈະນຳເອົາຊາຍຄົນນີ້ກັບຄືນສູ່ຊີວິດອີກເພື່ອຈະໄດ້ຮັບຄວາມຊື່ນບານກັບຊີວິດໃນອຸດທະຍານໃໝ່ເທິງແຜ່ນດິນໂລກນີ້. ເລື່ອງນີ້ສາມາດເຮັດໃຫ້ເຮົາມີຄວາມສຸກເບີກບານໄດ້ບໍ່ແມ່ນບໍ?
ມັດທາຍ 26:57-75; 27:1-50; ລຶກາ 22:54-71; 23:1-49; ໂຍຮັນ 18:12-40; 19:1-30.
