ພະເຍຊູສະເດັດໃນຖານະກະສັດ
ບົດ 97
ພະເຍຊູສະເດັດໃນຖານະກະສັດ
ບໍ່ດົນຫຼັງຈາກປິ່ນປົວຄົນຂໍທານຕາບອດສອງຄົນນັ້ນແລ້ວ ພະເຍຊູກໍ່ມາເຖິງຫມູ່ບ້ານນ້ອຍໆແຫ່ງນຶ່ງໃກ້ເຢຣຶຊາເລມ. ພະອົງບອກສາວົກສອງຄົນວ່າ: ‘ຈົ່ງເຂົ້າໄປໃນຫມູ່ບ້ານແລະເຈົ້າຈະພົບລູກລາຕົວນຶ່ງ. ຈົ່ງແກ້ແລ້ວຈູງມາຫາເຮົາ.’
ເມື່ອຈູງລາມາໃຫ້ພະອົງແລ້ວ ພະອົງຂຶ້ນນັ່ງເທິງຫຼັງລາຕົວນີ້ໄປເຢຣຶຊາເລມຊຶ່ງຢູ່ບໍ່ໄກ. ເມື່ອພະອົງມາໃກ້ເມືອງແລ້ວ ຝູງຊົນກຸ່ມໃຫຍ່ອອກມາຕ້ອນຮັບພະອົງ. ຄົນສ່ວນຫຼາຍຖອດເສື້ອຊັ້ນນອກອອກແລ້ວປູຕາມທາງ. ບາງຄົນກໍ່ຕັດງ່າຕານປູຖະໜົນ ແລ້ວໂຫ່ຮ້ອງວ່າ: ‘ຂໍພະເຈົ້າຊົງອວຍພອນໃຫ້ກະສັດຜູ້ມາໃນນາມຂອງພະເຢໂຫວາເຖີດ!’
ດົນມາແລ້ວໃນຍິດສະລາເອນ ກະສັດອົງໃໝ່ຈະຕ້ອງຂີ່ເທິງຕົວລູກລາເຂົ້າໄປເຢຣຶຊາເລມເພື່ອສະແດງຕົວຕໍ່ຜູ້ຄົນ. ພະເຍຊູພວມເຮັດຢ່າງນັ້ນ. ແລະຜູ້ຄົນສະແດງວ່າເຂົາຕ້ອງການໃຫ້ພະເຍຊູເປັນກະສັດຂອງຕົນ. ແຕ່ບໍ່ແມ່ນໝົດທຸກຄົນຕ້ອງການພະອົງ. ເຮົາຮູ້ໄດ້ກໍ່ໂດຍເຫດການຊຶ່ງເກີດຂຶ້ນເມື່ອພະເຍຊູໄປຍັງວິຫານ.
ນະ ວິຫານພະເຍຊູປິ່ນປົວຄົນຕາບອດແລະຄົນງ່ອຍໃຫ້ຫາຍດີ. ເມື່ອພວກເດັກນ້ອຍແລເຫັນເຫດການເຫຼົ່ານີ້ ເຂົາຈຶ່ງພາກັນໂຫ່ຮ້ອງສັນລະເສີນພະເຍຊູ. ແຕ່ວ່າທັງນີ້ເຮັດໃຫ້ພວກປະໂລຫິດເຄືອງໃຈ ແລະເຂົາຈຶ່ງບອກພະເຍຊູວ່າ: ‘ທ່ານໄດ້ຍິນຖ້ອຍຄຳທີ່ພວກເດັກນ້ອຍກ່າວນັ້ນບໍ?’
ພະເຍຊູຕອບວ່າ: ‘ໄດ້ຍິນ’ ພວກທ່ານບໍ່ເຄີຍອ່ານໃນຄຳພີຫຼືເຖິງຕອນທີ່ວ່າ: “ພະອົງໄດ້ຕັ້ງຄວາມສັກເສີນແຫ່ງຕົນໄວ້ດ້ວຍປາກຂອງພວກເດັກນ້ອຍ” ດັ່ງນັ້ນເດັກນ້ອຍຈຶ່ງຍັງສັນລະເສີນກະສັດຂອງພະເຈົ້າຢູ່ຕໍ່ໄປ.
ເຮົາຢາກເປັນຢ່າງເດັກນ້ອຍເຫຼົ່ານັ້ນບໍ່ແມ່ນບໍ? ບາງຄົນອາດພະຍາຍາມເຮັດໃຫ້ພວກເຮົາເລີກຈາກການເວົ້າເຖິງລາຊະອານາຈັກຂອງພະເຈົ້າກໍ່ໄດ້. ແຕ່ພວກເຮົາກໍ່ຈະບອກຄົນອື່ນຕໍ່ໆໄປກ່ຽວກັບສິ່ງໜ້າພິດສະຫວົງທີ່ພະເຍຊູຈະເຮັດເພື່ອຜູ້ຄົນ.
ເມື່ອພະເຍຊູຢູ່ເທິງແຜ່ນດິນໂລກນີ້ຍັງບໍ່ເຖິງເວລາກຳນົດທີ່ພະອົງຈະເລີ່ມປົກຄອງເປັນກະສັດ. ເວລາກຳນົດນັ້ນຈະມາເຖິງເມື່ອໃດ? ສາວົກຂອງພະເຍຊູຢາກຈະຮູ້. ເຮົາຈະອ່ານກ່ຽວກັບເລື່ອງນີ້ຕໍ່ໄປ.
ມັດທາຍ 21:1-17: ໂຍຮັນ 12:12-16.
