ເຍຊູຜູ້ຫນຸ່ມນ້ອຍໃນວິຫານ
ບົດ 87
ເຍຊູຜູ້ຫນຸ່ມນ້ອຍໃນວິຫານ
ເບິ່ງເດັກຊາຍທີ່ພວມເວົ້າກັບຄົນຜູ້ສູງອາຍຸເຫຼົ່ານີ້. ຄົນເຫຼົ່ານັ້ນຄືຄູສອນນະວິຫານຂອງພະເຈົ້າທີ່ເຢຣຶຊາເລມ. ແລະເດັກຊາຍຄົນນີ້ຄືພະເຍຊູ. ພະອົງເຕີບໂຕໃຫຍ່ຂຶ້ນບໍ່ນ້ອຍ. ຕອນນີ້ພະອົງມີອາຍຸ 12 ປີ.
ພວກຄູປະຫຼາດໃຈຫຼາຍທີ່ພະເຍຊູຮູ້ຫຼວງຫຼາຍກ່ຽວກັບພະເຈົ້າແລະສິ່ງທີ່ຂຽນໄວ້ໃນຄຳພີ. ແຕ່ເປັນຫຍັງໂຍເຊບແລະມາລີບໍ່ຢູ່ທີ່ນີ້ດ້ວຍ? ພວກເຂົາຢູ່ໃສ? ໃຫ້ເຮົາຄົ້ນເບິ່ງ.
ທຸກໆປີໂຍເຊບພາຄອບຄົວຂອງຕົນໄປເຢຣຶຊາເລມເພື່ອງານສະຫຼອງພິເສດທີ່ຮຽກວ່າປັດສະຄາ. ການເດີນທາງຈາກນາຊາເລດໄປເຢຣຶຊາເລມນັບວ່າໄກແທ້. ບໍ່ມີຜູ້ໃດມີລົດໂອໂຕ ແລະລົດໄຟກໍ່ບໍ່ມີ. ໃນສະໄໝນັ້ນພວກເຂົາບໍ່ທັນມີຍານພາຫະນະແບບນີ້. ຄົນສ່ວນຫຼາຍຕ້ອງຍ່າງໄປ ແລະຕ້ອງໃຊ້ເວລາເດີນທາງປະມານສາມມື້.
ໃນຕອນນີ້ໂຍເຊບມີຄອບຄົວໃຫຍ່. ສະນັ້ນມີພວກນ້ອງໆຂອງພະເຍຊູທັງຊາຍແລະຍິງທີ່ຕ້ອງດູແລ. ເອົາລະ ປີນີ້ໂຍເຊບແລະມາລີໄດ້ອອກເດີນທາງໄກເມືອບ້ານນາຊາເລດພ້ອມກັບລູກໆ. ເຂົາທັງສອງຄິດວ່າພະເຍຊູ ເດີນທາງຮ່ວມກັບຄົນອື່ນໆ. ແຕ່ເມື່ອຢຸດພັກແລງວັນນັ້ນ ເຂົາບໍ່ເຫັນພະເຍຊູ. ເຂົາຊອກຫາພະອົງໃນຫມູ່ຍາດພີ່ນ້ອງແລະເພື່ອນຝູງ ແຕ່ພະອົງບໍ່ຢູ່ກັບພວກເຂົາ! ເຂົາຈຶ່ງກັບໄປຊອກຫາພະອົງທີ່ເຢຣຶຊາເລມ.
ໃນທີ່ສຸດເຂົາພົບພະເຍຊູຢູ່ກັບພວກຄູທີ່ນີ້. ພະອົງຟັງພວກເຂົາແລະຖາມຄຳຖາມຕ່າງໆ. ແລະຄົນທັງປວງປະຫຼາດໃຈໃນຄວາມສະຫຼາດຂອງພະເຍຊູ. ແຕ່ມາລີເວົ້າວ່າ: ‘ລູກເອີຍ ເປັນຫຍັງລູກຈຶ່ງເຮັດກັບເຮົາຢ່າງນີ້? ພໍ່ແມ່ອຸກໃຈຫຼາຍເພາະພະຍາຍາມຊອກຫາເຈົ້າ.’
ພະເຍຊູຕອບວ່າ: ‘ພໍ່ແມ່ຈະຕ້ອງຊອກຫາລູກເຮັດຫຍັງ? ພໍ່ແມ່ບໍ່ຮູ້ຫຼືວ່າ ລູກຈະຕ້ອງຢູ່ໃນລາຊະສຳນັກຂອງພະບິດາ?’
ຖືກແລ້ວ ພະເຍຊູຍິນດີຈະຢູ່ໃນບ່ອນໃດຊຶ່ງພະອົງສາມາດຮຽນຮູ້ເຖິງພະເຈົ້າໄດ້. ເຮົາຄວນຮູ້ສຶກຢ່າງນັ້ນດ້ວຍບໍ່ແມ່ນບໍ? ຢູ່ບ້ານນາຊາເລດ ພະເຍຊູຈະໄປຮ່ວມປະຊຸມເພື່ອການນະມັດສະການທຸກອາທິດ. ເພາະພະອົງເອົາໃຈໃສ່ຟັງສະເໝີ ພະອົງຮຽນຮູ້ຫຼາຍສິ່ງຈາກຄຳພີ. ຂໍໃຫ້ເຮົາເປັນເໝືອນພະເຍຊູແລະປະຕິບັດຕາມຕົວຢ່າງຂອງພະອົງ.
ລຶກາ 2:41-52; ມັດທາຍ 13:53-56.
