ເທິງພູເຂົາກົກໝາກກອກ
ບົດ 98
ເທິງພູເຂົາກົກໝາກກອກ
ນີ້ຄືພະເຍຊູຢູ່ເທິງພູເຂົາກົກໝາກກອກ. ຊາຍສີ່ຄົນທີ່ຢູ່ກັບພະອົງແມ່ນພວກອັກຄະສາວົກຂອງພະອົງ. ມີອັນດະເລອາກັບເປໂຕສອງອ້າຍນ້ອງ ແລະຍາໂກໂບກັບໂຍຮັນສອງອ້າຍນ້ອງດ້ວຍ. ທາງພຸ້ນເຈົ້າຄົງເຫັນວິຫານຂອງພະເຈົ້າໃນເມືອງເຢຣຶຊາເລມ.
ເປັນເວລາສອງມື້ມາແລ້ວຕັ້ງແຕ່ພະເຍຊູຂີ່ລູກລາສະເດັດເຂົ້າໄປເຢຣຶຊາເລມ. ມື້ນີ້ເປັນວັນອັງຄານ. ຕອນເຊົ້າພະເຍຊູຢູ່ທີ່ວິຫານ. ທີ່ນັ້ນພວກປະໂລຫິດພະຍາຍາມຈະຈັບພະເຍຊູເພື່ອເອົາໄປຂ້າ. ແຕ່ພວກເຂົາບໍ່ກ້າເພາະຜູ້ຄົນມັກພະເຍຊູ.
ພະເຍຊູເອີ້ນພວກຫົວໜ້າສາສະໜາເຫຼົ່ານີ້ວ່າ: ‘ເຈົ້າພວກຊາດງູຮ້າຍແລະເຜົ່າພັນງູຮ້າຍ!’ ຄັນແລ້ວພະເຍຊູຕັດວ່າ ພະເຈົ້າຈະລົງໂທດເຂົາເພາະສິ່ງຊົ່ວຮ້າຍທັງຫຼາຍຊຶ່ງເຂົາໄດ້ເຮັດ. ຫຼັງຈາກນັ້ນພະເຍຊູສະເດັດຂຶ້ນພູເຂົາກົກໝາກກອກ ຄັນແລ້ວອັກຄະສາວົກສີ່ຄົນເຫຼົ່ານີ້ເລີ່ມຕົ້ນຖາມພະອົງ. ເຈົ້າຮູ້ບໍວ່າພວກເຂົາພວມຖາມພະເຍຊູເຖິງເລື່ອງໃດ?
ພວກອັກຄະສາວົກພວມຖາມກ່ຽວກັບສິ່ງຕ່າງໆທີ່ຈະເກີດຂຶ້ນໃນອະນາຄົດ. ເຂົາຮູ້ວ່າພະເຍຊູຈະທຳລາຍຄວາມຊົ່ວຊ້າທັງໝົດເທິງແຜ່ນດິນໂລກ. ແຕ່ເຂົາຢາກຈະຮູ້ວ່າເຫດການນີ້ຈະເກີດຂຶ້ນເມື່ອໃດ? ພະເຍຊູຈະສະເດັດກັບມາອີກເພື່ອປົກຄອງໃນຖານະເປັນກະສັດເມື່ອໃດ?
ພະເຍຊູຊາບວ່າພວກສາວົກຂອງພະອົງທີ່ຢູ່ເທິງແຜ່ນດິນໂລກນີ້ຈະບໍ່ສາມາດເຫັນພະອົງໄດ້ເມື່ອພະອົງສະເດັດມາອີກ. ທັງນີ້ກໍ່ເພາະວ່າພະອົງຈະຢູ່ໃນສະຫວັນ ແລະເຂົາຈະບໍ່ສາມາດເຫັນພະອົງທີ່ນັ້ນໄດ້. ດັ່ງນັ້ນພະເຍຊູບອກພວກອັກຄະສາວົກເຖິງບາງສິ່ງທີ່ຈະເກີດຂຶ້ນເທິງແຜ່ນດິນໂລກເມື່ອພະອົງຈະປົກຄອງເປັນກະສັດທາງພາກສະຫວັນ. ສິ່ງເຫຼົ່ານີ້ມີຫຍັງແດ່?
ພະເຍຊູບອກວ່າຈະມີສົງຄາມໃຫຍ່ ຜູ້ຄົນຫຼາຍໆຄົນຈະເຈັບປ່ວຍ ແລະຫິວອາຫານ ອາດຊະຍາກຳຈະຮ້າຍແຮງຍິ່ງນັກ ແລະຈະເກີດແຜ່ນດິນໄຫວໃຫຍ່. ພະເຍຊູບອກດ້ວຍວ່າຂ່າວດີເລື່ອງລາຊະອານາຈັກຂອງພະເຈົ້າຈະໄດ້ຮັບການປະກາດໄປທຸກແຫ່ງເທິງແຜ່ນດິນໂລກ. ເຮົາໄດ້ເຫັນສິ່ງເຫຼົ່ານີ້ເກີດຂຶ້ນໃນສະໄໝຂອງເຮົາບໍ? ແມ່ນແລ້ວ! ແລະດັ່ງນັ້ນເຮົາສາມາດແນ່ໃຈໄດ້ທີ່ວ່າຂະນະນີ້ພະເຍຊູພວມປົກຄອງໃນສະຫວັນ. ໃນບໍ່ຊ້າພະອົງຈະເຮັດໃຫ້ຄວາມຊົ່ວຮ້າຍທັງໝົດເທິງແຜ່ນດິນໂລກສິ້ນສຸດລົງ.
ມັດທາຍ 21:46; 23:1-39; 24:1-14; ມາລະໂກ 13:3-10.