ໂຍຮັນໃຫ້ພະເຍຊູຮັບບັບເຕມາ
ບົດ 88
ໂຍຮັນໃຫ້ພະເຍຊູຮັບບັບເຕມາ
ເບິ່ງນົກເຂົາພວມລົງມາເທິງຫົວຂອງຜູ້ຊາຍຄົນນີ້. ຜູ້ຊາຍຄົນນີ້ຄືພະເຍຊູ. ປັດຈຸບັນພະອົງມີອາຍຸປະມານ 30 ປີ. ແລະຜູ້ຊາຍທີ່ຢູ່ກັບພະອົງຄື ໂຍຮັນ. ເຮົາໄດ້ຮຽນຮູ້ບາງຢ່າງກ່ຽວກັບເພິ່ນ. ເຈົ້າຈື່ໄດ້ບໍຕອນມາລີໄປຢາມເອລີຊາເບດພີ່ນ້ອງຂອງນາງ ແລະເດັກອ່ອນໃນທ້ອງເອລີຊາເບດດີ້ນດ້ວຍຄວາມຍິນດີ? ເດັກອ່ອນຜູ້ນັ້ນຄື ໂຍຮັນ. ແຕ່ຕອນນີ້ໂຍຮັນກັບພະເຍຊູພວມເຮັດຫຍັງ?
ໂຍຮັນຫາກໍ່ຈຸ່ມພະເຍຊູລົງໃນນ້ຳທີ່ແມ່ນ້ຳຢູລະເດນ. ນີ້ຄືວິທີທີ່ຄົນເຮົາຮັບບັບເຕມາ. ທຳອິດ ຜູ້ນັ້ນຈະຖືກເອົາຕົວຈຸ່ມຫລຸບລົງໃນນ້ຳ ແລ້ວເອົາຕົວຂຶ້ນມາອີກ. ເພາະໂຍຮັນເຮັດຢ່າງນີ້ກັບຜູ້ຄົນ ເພິ່ນຈຶ່ງຖືກເອີ້ນວ່າໂຍຮັນຜູ້ໃຫ້ຮັບບັບເຕມາ. ແຕ່ເປັນຫຍັງໂຍຮັນໃຫ້ພະເຍຊູຮັບບັບເຕມາ?
ເອົາລະ ໂຍຮັນເຮັດດັ່ງນັ້ນເພາະພະເຍຊູມາຫາໂຍຮັນແລະຂໍຮັບບັບເຕມາ. ໂຍຮັນໃຫ້ຜູ້ຄົນທີ່ຕ້ອງການສະແດງວ່າເຂົາເສຍໃຈເພາະການຊົ່ວຫຼາຍຢ່າງທີ່ເຂົາໄດ້ເຮັດມາກ່ອນນັ້ນຮັບບັບເຕມາ. ແຕ່ພະເຍຊູເຄີຍເຮັດສິ່ງນຶ່ງສິ່ງໃດຊົ່ວທີ່ຈະຕ້ອງຮູ້ສຶກເສຍໃຈບໍ? ບໍ່ ພະເຍຊູບໍ່ເຄີຍເຮັດການຊົ່ວ ເພາະພະອົງເປັນບຸດຂອງພະເຈົ້າເອງຊຶ່ງມາຈາກສະຫວັນ. ດັ່ງນັ້ນການທີ່ພະອົງມາຫາໂຍຮັນຂໍຮັບບັບເຕມາກໍ່ເພື່ອເຫດຜົນອີກຢ່າງນຶ່ງ. ໃຫ້ເຮົາເບິ່ງວ່າເຫດຜົນນັ້ນຄືອັນໃດ?
ກ່ອນພະເຍຊູມາຫາໂຍຮັນ ພະອົງເປັນຊ່າງໄມ້. ຊ່າງໄມ້ຄືຄົນເຮັດສິ່ງຕ່າງໆດ້ວຍໄມ້ ເຊັ່ນໂຕ໊ະຕັ່ງອີ້ແລະຕັ່ງມ້ານັ່ງ. ໂຍເຊບຜົວຂອງມາລີເປັນຊ່າງໄມ້ ແລະເຂົາຈຶ່ງໄດ້ສອນພະເຍຊູໃຫ້ເປັນຊ່າງໄມ້ດ້ວຍ. ແຕ່ພະເຢໂຫວາບໍ່ໄດ້ສົ່ງພະບຸດຂອງພະອົງລົງມາແຜ່ນດິນໂລກໃຫ້ເປັນຊ່າງໄມ້. ພະອົງມີງານພິເສດໃຫ້ພະເຍຊູເຮັດແລະກໍ່ເຖິງເວລາທີ່ພະເຍຊູຈະເລີ່ມເຮັດງານນັ້ນ. ດັ່ງນັ້ນເພື່ອສະແດງວ່າບັດນີ້ພະອົງພ້ອມທີ່ຈະເຮັດຕາມນ້ຳພະໄທຂອງພະບິດາຂອງພະອົງ ພະເຍຊູຈຶ່ງມາຫາໂຍຮັນຂໍຮັບບັບເຕມາ. ພະເຈົ້າຊອບໃຈບໍ?
ແນ່ນອນພະອົງຊອບໃຈ ເພາະວ່າຫຼັງຈາກພະເຍຊູຂຶ້ນມາຈາກນ້ຳ ມີສຽງຈາກສະຫວັນກ່າວວ່າ: ‘ພະອົງນີ້ຄືພະບຸດຂອງເຮົາ ເຮົາຊອບໃຈໃນພະອົງ.’ ນອກຈາກນີ້ທ້ອງຟ້າເບິ່ງຄືແຫວກອອກແລະນົກເຂົາຕົວນີ້ລົງມາຢູ່ເທິງພະເຍຊູ. ແຕ່ບໍ່ແມ່ນນົກເຂົາແທ້ໆ. ພຽງແຕ່ເບິ່ງຄ້າຍກັບນົກເຂົາເທົ່ານັ້ນເອງ. ແທ້ຈິງແລ້ວນັ້ນຄືພະວິນຍານບໍລິສຸດຂອງພະເຈົ້າ.
ບັດນີ້ພະເຍຊູມີຫຼາຍສິ່ງທີ່ຈະຕ້ອງຄຶດເຖິງ ດັ່ງນັ້ນພະອົງຈຶ່ງໄປທີ່ງຽບດີເປັນເວລາ 40 ວັນ. ຊາຕານໄດ້ມາຫາພະອົງທີ່ນັ້ນ. ຊາຕານພະຍາຍາມເຖິງສາມເທື່ອທີ່ຈະໃຫ້ພະເຍຊູເຮັດບາງຢ່າງທີ່ຂັດຂືນກັບກົດໝາຍຂອງພະເຈົ້າ. ແຕ່ພະເຍຊູບໍ່ຍອມເຮັດ.
ຫຼັງຈາກນັ້ນ ພະເຍຊູກັບມາແລະພົບຜູ້ຊາຍບາງຄົນຊຶ່ງເຂົ້າມາເປັນຜູ້ຕິດຕາມຫຼືເປັນສາວົກຂອງພະອົງໃນຮຸ່ນທຳອິດ. ບາງຄົນໃນພວກເຂົາຊື່ອັນດະເລອາ ເປໂຕ (ເອີ້ນວ່າຊີໂມນດ້ວຍ). ຟີລິບແລະນະທານາເອນ (ເອີ້ນວ່າບາເທເລມີດ້ວຍ) ພະເຍຊູແລະສາວົກໃໝ່ເຫຼົ່ານີ້ອອກເດີນທາງໄປແຂວງຄາລິເລ. ໃນຄາລິເລເຂົາພັກຢູ່ທີ່ການາ ຊຶ່ງເປັນບ້ານເກີດຂອງນະທານາເອນ. ພະເຍຊູໄປຮ່ວມການລ້ຽງໃຫຍ່ໃນງານແຕ່ງດອງທີ່ນັ້ນ ແລະເຮັດການອັດສະຈັນເປັນເທື່ອທຳອິດ. ການອັດສະຈັນອັນໃດເຈົ້າຮູ້ບໍ? ພະອົງເຮັດໃຫ້ນ້ຳປ່ຽນເປັນເຫຼົ້າອະງຸ່ນ.
ມັດທາຍ 3:13-17; 4:1-11; 13:55; ມາລະໂກ 6:3; ໂຍຮັນ 1:29-51; 2:1-12.
