ຂະໂມຍຄົນນຶ່ງໃນຍິດສະລາເອນ
ບົດ 47
ຂະໂມຍຄົນນຶ່ງໃນຍິດສະລາເອນ
ເບິ່ງຊາຍຄົນນີ້ພວມຝັງຂອງອັນໃດໃນເຕັນຂອງຕົນ! ມີເສື້ອຄຸມງາມຕົວນຶ່ງ ຄຳແທ່ງນຶ່ງແລະເງິນສອງສາມແຜ່ນ. ເຂົາໄດ້ເອົາຂອງເຫຼົ່ານີ້ມາຈາກເມືອງເຢລິໂກ. ແຕ່ວ່າເຂົາຄວນເຮັດຢ່າງໃດກັບສິ່ງຂອງຕ່າງໆໃນເມືອງ? ເຈົ້າຈື່ໄດ້ບໍ?
ຂອງເຫຼົ່ານີ້ຄວນທຳລາຍເສຍ ສ່ວນຄຳແລະເງິນກໍ່ຄວນເອົາໄປໄວ້ໃນຄັງແຫ່ງຈຳໜັກອາໄສຂອງພະເຢໂຫວາ. ພວກນີ້ບໍ່ໄດ້ເຊື່ອຟັງພະເຈົ້າ. ເຂົາໄດ້ລັກເອົາສິ່ງຂອງທີ່ເປັນຂອງພະເຈົ້າ. ຊາຍຄົນນັ້ນຊື່ອາການ ແລະຄົນທີ່ຢູ່ນຳເຂົາກໍ່ຄືສະມາຊິກຄອບຄົວຂອງເຂົາ. ໃຫ້ເຮົາເບິ່ງວ່າຈະມີຫຍັງເກີດຂຶ້ນ.
ຫຼັງຈາກອາການລັກສິ່ງຂອງເຫຼົ່ານີ້ ໂຢຊວຍສົ່ງຜູ້ຊາຍບາງຄົນອອກໄປຕໍ່ສູ້ເມືອງອາອີ. ແຕ່ພວກເຂົາເສຍໄຊໃນການສູ້ຮົບ. ບາງຄົນກໍ່ຖືກຂ້າ ແລະສ່ວນທີ່ເຫຼືອນັ້ນກໍ່ແລ່ນໜີ ໂຢຊວຍຮູ້ສຶກເສົ້າໃຈຫຼາຍ. ເຂົາຈຶ່ງຫມູບໜ້າລົງເຖິງດິນແລະອະທິດຖານເຖິງພະເຢໂຫວາວ່າ: ‘ເຫດສັນໃດພະອົງໄດ້ໃຫ້ເຫດການເຊັ່ນນີ້ເກີດຂຶ້ນແກ່ພວກຂ້າພະເຈົ້າ?’
ພະເຢໂຫວາຕອບວ່າ: ‘ຈົ່ງລຸກຂຶ້ນ! ຊົນຍິດສະລາເອນໄດ້ເຮັດບາບ. ເຂົາໄດ້ເອົາສິ່ງຂອງບາງຢ່າງໄວ້ຊຶ່ງເຂົາຄວນທຳລາຍເສຍ ຫຼືນຳມາໄວ້ທີ່ຈຳໜັກອາໄສຂອງພະເຢໂຫວາ. ເຂົາໄດ້ຂະໂມຍເອົາເສື້ອຄຸມງາມຕົວນຶ່ງເຊື່ອງໄວ້. ເຮົາຈະບໍ່ອວຍພອນເຈົ້າຈົນກວ່າເຈົ້າຈະທຳລາຍສິ່ງຂອງນັ້ນ ແລະຜູ້ທີ່ຂະໂມຍເອົາສິ່ງຂອງນັ້ນ.’ ພະເຢໂຫວາຕັດວ່າ ພະອົງຈະຊີ້ໃຫ້ໂຢຊວຍເຫັນວ່າຄົນຊົ່ວນີ້ຄືຜູ້ໃດ.
ດັ່ງນັ້ນໂຢຊວຍຈຶ່ງທ້ອນໂຮມປະຊາຊົນໃຫ້ມາຊຸມນຸມກັນ ແລະພະເຢໂຫວາກໍ່ຄັດເອົາຕົວອາການຄົນຊົ່ວນັ້ນ. ອາການສາລະພາບວ່າ: ‘ຂ້າພະເຈົ້າໄດ້ເຮັດບາບແລ້ວ. ຂ້າພະເຈົ້າເຫັນເສື້ອຄຸມອັນງາມຕົວນຶ່ງ ແລະແທ່ງຄຳແລະແຜ່ນເງິນດ້ວຍ. ຂ້າພະເຈົ້າຢາກໄດ້ສິ່ງຂອງນັ້ນຫຼາຍທີ່ສຸດຈຶ່ງໄດ້ເອົາ. ທ່ານຈະພົບຂອງເຫຼົ່ານັ້ນຝັງຢູ່ໃນເຕັນຂອງຂ້າພະເຈົ້າ.’
ເມື່ອໄດ້ພົບສິ່ງຂອງເຫຼົ່ານີ້ແລະນຳມາໃຫ້ໂຢຊວຍ ເຂົາກ່າວແກ່ອາການວ່າ: ‘ເຫດໃດເຈົ້າໄດ້ນຳເອົາຄວາມລຳບາກມາໃຫ້ພວກເຮົາ? ບັດນີ້ພະເຢໂຫວາຈະນຳເອົາຄວາມລຳບາກມາໃຫ້ແກ່ເຈົ້າ!’ ແລ້ວຄົນທັງປວງເອົາກ້ອນຫີນຄວ່າງໃສ່ອາການແລະຄອບຄົວຂອງເຂົາຈົນຕາຍ. ເລື່ອງນັ້ນສະແດງໃຫ້ເຫັນວ່າເຮົາບໍ່ຄວນຍັກຍອກສິ່ງຂອງທີ່ບໍ່ແມ່ນຂອງເຮົາ.
ຕໍ່ມາຊົນຍິດສະລາເອນອອກໄປຕໍ່ສູ້ກັບຊາວຊົນເມືອງອາອີອີກ. ເທື່ອນີ້ພະເຢໂຫວາຊ່ວຍຜູ້ຄົນຂອງພະອົງ ແລະພວກເຂົາກໍ່ໄດ້ຊະນະໃນການສູ້ຮົບນັ້ນ.
