ງູທອງແດງ
ບົດ 41
ງູທອງແດງ
ງູທີ່ພັນຢູ່ຮອບເສົາເບິ່ງຄືງູແທ້ບໍ? ມັນບໍ່ແມ່ນງູແທ້ໆ. ງູນັ້ນເຮັດດ້ວຍທອງແດງ. ພະເຢໂຫວາສັ່ງໃຫ້ໂມເຊເອົາງູນັ້ນພັນໄວ້ທີ່ເສົາ ເພື່ອຜູ້ຄົນຈະແນມເບິ່ງແລ້ວຈະມີຊີວິດ. ແຕ່ງູຕົວອື່ນໆທີ່ຢູ່ຕາມພື້ນດິນນັ້ນເປັນງູແທ້. ງູເຫຼົ່ານີ້ໄດ້ກັດປວງຊົນແລະເຮັດໃຫ້ເຂົາລົ້ມເຈັບລົງ. ເຈົ້າຮູ້ບໍວ່າເປັນຫຍັງ?
ເພາະເຫດທີ່ຊົນຍິດສະລາເອນເວົ້າຕໍ່ຕ້ານພະເຈົ້າແລະໂມເຊ. ພວກເຂົາຈົ່ມວ່າ: ‘ເປັນຫຍັງທ່ານນຳເຮົາອອກມາຈາກອີຢີບເພື່ອໃຫ້ມາຕາຍໃນປ່າທຸລະກັນດານນີ້? ບໍ່ມີອາຫານຫຼືນ້ຳຢູ່ທີ່ນີ້. ແລະເຮົາຈະທົນກິນມານານີ້ບໍ່ໄດ້ອີກແລ້ວ.’
ແຕ່ມານາເປັນອາຫານທີ່ດີ. ພະເຢໂຫວາປະທານມານາໃຫ້ເຂົາໂດຍການອັດສະຈັນ. ແລະໂດຍການອັດສະຈັນພະອົງປະທານນ້ຳໃຫ້ພວກເຂົາດື່ມດ້ວຍ. ແຕ່ຜູ້ຄົນບໍ່ຮູ້ສຶກຂອບໃຈໃນວິທີທີ່ພະເຈົ້າໄດ້ດູແລເອົາໃຈໃສ່ເຂົາ. ດັ່ງນັ້ນພະເຢໂຫວາຈຶ່ງສົ່ງງູພິດເຫຼົ່ານີ້ລົງໂທດຊົນຍິດສະລາເອນ. ຫຼາຍຄົນໃນພວກເຂົາຕາຍຍ້ອນງູກັດ.
ໃນທີ່ສຸດຜູ້ຄົນມາຫາໂມເຊແລະກ່າວວ່າ: ‘ເຮົາໄດ້ເຮັດບາບ ເພາະວ່າເຮົາໄດ້ເວົ້າຕໍ່ຕ້ານພະເຢໂຫວາແລະທ່ານ. ບັດນີ້ຂໍອະທິດຖານເຖິງພະເຢໂຫວາໃຫ້ເອົາງູເຫຼົ່ານີ້ໄປເຖີດ.’
ດັ່ງນັ້ນໂມເຊຈຶ່ງອະທິດຖານຂໍເພື່ອປະຊາຊົນ. ພະເຢໂຫວາສັ່ງໂມເຊໃຫ້ເຮັດງູທອງແດງຕົວນີ້ຂຶ້ນ. ພະອົງບອກວ່າໃຫ້ເອົາງູທອງແດງນັ້ນພັນໄວ້ທີ່ເສົາ ແລະໃຫ້ທຸກຄົນທີ່ຖືກງູກັດເບິ່ງຮູບງູນັ້ນ. ໂມເຊເຮັດຕາມທີ່ພະເຈົ້າໄດ້ສັ່ງ. ແລະປະຊາຊົນຜູ້ທີ່ຖືກງູກັດເມື່ອເບິ່ງງູທອງແດງນັ້ນກໍ່ຫາຍເປັນປົກກະຕິ.
ເຫດການນີ້ເປັນບົດຮຽນສຳລັບເຮົາ. ເຮົາທັງຫຼາຍຢູ່ໃນສະພາບດຽວກັນກັບຊົນຍິດສະລາເອນເຫຼົ່ານັ້ນທີ່ຖືກງູກັດ. ເຮົາທຸກຄົນຢູ່ໃນສະພາບທີ່ຕ້ອງຕາຍ. ຈົ່ງມອງເບິ່ງຮອບໆ ແລະເຈົ້າຈະເຫັນວ່າຜູ້ຄົນແກ່ລົງ ເຈັບປ່ວຍແລ້ວກໍ່ຕາຍ. ທັງນີ້ເພາະອາດາມແລະເອວາມະນຸດຊາຍຍິງຄູ່ທຳອິດ ໄດ້ຫັນໜ້າໜີຈາກພະເຢໂຫວາ ແລະພວກເຮົາລ້ວນເປັນລູກຫຼານຂອງເຂົາ. ແຕ່ພະເຢໂຫວາໄດ້ຈັດຕຽມຫົນທາງຂຶ້ນໄວ້ເພື່ອເຮົາຈະມີຊີວິດຢູ່ໄດ້ຕະຫຼອດໄປ.
ພະເຢໂຫວາໄດ້ສົ່ງພະເຍຊູຄລິດພະບຸດຂອງພະອົງມາຍັງແຜ່ນດິນໂລກ. ພະເຍຊູຖືກແຂວນໄວ້ເທິງເສົາ ເພາະຫຼາຍຄົນຄິດວ່າພະອົງບໍ່ດີ. ແຕ່ພະເຢໂຫວາປະທານພະເຍຊູເພື່ອຊ່ວຍຊີວິດພວກເຮົາ. ຖ້າເຮົາໝາຍເພິ່ງພະອົງ ປະຕິບັດຕາມພະອົງເຮົາກໍ່ຈະມີຊີວິດຕະຫຼອດໄປ. ແຕ່ເຮົາຈະຮຽນຫຼາຍຂຶ້ນກ່ຽວກັບເລື່ອງນີ້ພາຍຫຼັງ.
