ຜູ້ສອດແນມ 12 ຄົນ
ບົດ 38
ຜູ້ສອດແນມ 12 ຄົນ
ເບິ່ງໝາກໄມ້ທີ່ພວກຜູ້ຊາຍເຫຼົ່ານີ້ພວມຫາມມາ. ພວງໝາກອະງຸ່ນເບິ່ງໃຫຍ່ແທ້ໆ. ຈົນເຖິງຕ້ອງໃຊ້ຜູ້ຊາຍສອງຄົນຫາມມາກັບໄມ້ຄານ. ແລະເບິ່ງໝາກເດື່ອເທດແລະໝາກພິລາຫຼືທັບທິມ. ໝາກໄມ້ທີ່ສວຍງາມນີ້ມາຈາກໃສ? ມາຈາກແຜ່ນດິນການາອານ. ຢ່າລືມວ່າອັບລາຫາມ ອີຊາກແລະຍາໂຄບເຄີຍອາໄສຢູ່ແຜ່ນດິນການາອານມາແລ້ວຄັ້ງນຶ່ງ. ແຕ່ເພາະມີຄວາມອຶດຢາກອາຫານຢູ່ທີ່ນັ້ນຍາໂຄບພ້ອມດ້ວຍຄອບຄົວຈຶ່ງໄດ້ຍ້າຍໄປຢູ່ອີຢີບ. ບັດນີ້ປະມານ 216 ປີຕໍ່ມາ ໂມເຊນຳຊົນຍິດສະລາເອນກັບໄປຍັງການາອານ. ເຂົາໄດ້ມາເຖິງປ່າທຸລະກັນດານທີ່ມີຊື່ວ່າກາເດເຊ.
ຄົນທີ່ອາໄສໃນແຜ່ນດິນການາອານກໍ່ເປັນຄົນຊົ່ວຮ້າຍ. ດັ່ງນັ້ນໂມເຊຈຶ່ງສົ່ງຄົນສອດແນມ 12 ຄົນອອກໄປແລະບອກເຂົາວ່າ: ‘ຈົ່ງໄປສືບເບິ່ງວ່າມີຜູ້ຄົນຢູ່ທີ່ນັ້ນຫຼາຍທໍ່ໃດ ແລະມີກຳລັງແຂງແຮງບໍ. ໃຫ້ເບິ່ງວ່າແຜ່ນດິນດີສຳລັບການເພາະປູກບໍ. ແລະຢ່າລືມເອົາໝາກໄມ້ມານຳດ້ວຍ.’
ເມື່ອພວກສອດແນມກັບມາເຖິງກາເດເຊ ເຂົາເລົ່າໃຫ້ໂມເຊຟັງວ່າ: ‘ການາອານເປັນປະເທດທີ່ດີແທ້ໆ.’ ແລະເພື່ອພິສູດຂໍ້ນີ້ ເຂົາສະແດງໃຫ້ໂມເຊເບິ່ງໝາກໄມ້ບາງແນວ. ແຕ່ພວກສອດແນມ 10 ຄົນກ່າວວ່າ: ‘ຜູ້ຄົນຢູ່ທີ່ນັ້ນມີຮູບຮ່າງໃຫຍ່ສູງແລະແຂງແຮງ. ຖ້າພວກເຮົາຈະພະຍາຍາມຍຶດເອົາແຜ່ນດິນນັ້ນເຮົາຈະຖືກຂ້າຕາຍແນ່.’
ເມື່ອຊົນຍິດສະລາເອນໄດ້ຍິນເລື່ອງນີ້ເຂົາມີຄວາມຢ້ານແລະກ່າວວ່າ: ‘ຖ້າວ່າຕາຍໃນອີຢີບຫຼືແມ່ນແຕ່ຕາຍໃນປ່າທຸລະກັນດານກໍ່ຄົງຈະດີກວ່ານີ້. ພວກເຮົາຈະຖືກຂ້າຕາຍໃນການສູ້ຮົບ ແລ້ວເມຍແລະລູກໆຂອງເຮົາກໍ່ຈະຖືກຈັບເປັນຊະເລີຍ. ໃຫ້ເຮົາເລືອກຜູ້ນຳຄົນໃໝ່ແທນໂມເຊ ແລະກັບຄືນໄປຍັງອີຢີບ!’
ແຕ່ມີຜູ້ສອດແນມສອງຄົນວາງໃຈໃນພະເຢໂຫວາ ແລະພະຍາຍາມເຮັດໃຫ້ຜູ້ຄົນສະຫງົບລົງ. ເຂົາມີຊື່ວ່າໂຢຊວຍແລະກາເລບ. ເຂົາກ່າວວ່າ: ‘ຢ່າຊູ່ຢ້ານເລີຍ. ພະເຢໂຫວາສະຖິດຢູ່ກັບພວກເຮົາ. ຈະເປັນການງ່າຍທີ່ຈະຍຶດເອົາແຜ່ນດິນນັ້ນ.’ ແຕ່ຜູ້ຄົນບໍ່ຍອມຟັງ. ພວກເຂົາເຖິງກັບຢາກຂ້າໂຢຊວຍແລະກາເລບ.
ທັງນີ້ຈຶ່ງກະທຳໃຫ້ພະເຢໂຫວາຮູ້ສຶກຄຽດຫຼາຍ ແລະພະອົງຕັດກັບໂມເຊວ່າ: ‘ໃນພວກຄົນທີ່ມີອາຍຸຕັ້ງແຕ່ 20 ປີຂຶ້ນໄປຈະບໍ່ມີຄົນໃດເລີຍທີ່ຈະໄດ້ເຂົ້າໄປແຜ່ນດິນການາອານ. ພວກເຂົາໄດ້ເຫັນການອັດສະຈັນທີ່ເຮົາໄດ້ກະທຳໃນອີຢີບແລະໃນປ່າທຸລະກັນດານມາແລ້ວ ແຕ່ເຖິງຢ່າງນັ້ນພວກເຂົາກໍ່ຍັງບໍ່ໄວ້ວາງໃຈໃນເຮົາ. ດັ່ງນັ້ນເຂົາຈະເດີນເລາະລຽບໄປມາໃນປ່າທຸລະກັນດານນີ້ເປັນເວລາ 40 ປີຈົນກວ່າຄົນສຸດທ້າຍໃນພວກນີ້ຈະຕາຍໄປ. ເວັ້ນແຕ່ໂຢຊວຍແລະກາເລບທໍ່ນັ້ນຈະໄດ້ເຂົ້າໄປໃນແຜ່ນດິນການາອານ.’
ຈົດເຊັນບານຊີ 13:1-33; 14:1-38.
