ລຶດແລະນາໂອມີ
ບົດ 51
ລຶດແລະນາໂອມີ
ໃນພະຄຳພີ ເຈົ້າຈະພົບໜັງສືເຫຼັ້ມນຶ່ງເອີ້ນວ່າລຶດ. ເປັນເລື່ອງກ່ຽວກັບຄອບຄົວນຶ່ງທີ່ມີຊີວິດຢູ່ໃນສະໄໝເມື່ອປະເທດຍິດສະລາເອນມີຜູ້ຕັດສິນ. ລຶດເປັນຍິງສາວທີ່ມາຈາກແຜ່ນດິນໂມອາບ ນາງບໍ່ໄດ້ເປັນຄົນໃນຊົນຊາດຍິດສະລາເອນຂອງພະເຈົ້າ. ແຕ່ເມື່ອລຶດຮຽນຮູ້ເຖິງເລື່ອງຄວາມຈິງກ່ຽວກັບພະເຈົ້າພະເຢໂຫວາ ນາງຈຶ່ງໄດ້ມາຮັກແພງພະອົງຫຼາຍ. ນາໂອມີເປັນຍິງຊະລາຜູ້ຊຶ່ງຊ່ວຍລຶດຮຽນຮູ້ເຖິງພະເຢໂຫວາ.
ນາໂອມີເປັນຍິງຊາດຍິດສະລາເອນ. ນາງແລະຜົວກັບລູກຊາຍສອງຄົນຍ້າຍໄປຢູ່ທີ່ແຜ່ນດິນໂມອາບຄາວເມື່ອອາຫານມີບໍ່ພໍກິນໃນແຜ່ນດິນຍິດສະລາເອນ. ຕໍ່ມາມື້ນຶ່ງຜົວຂອງນາໂອມີຕາຍ. ຫຼັງຈາກນັ້ນລູກຊາຍສອງຄົນຂອງນາໂອມີແຕ່ງດອງກັບຍິງສາວຊາວໂມອາບສອງຄົນຊື່ລຶດແລະໂອລາຟາ. ແຕ່ພາຍຫຼັງປະມານ 10 ປີລູກຊາຍສອງຄົນຂອງນາໂອມີກໍ່ຕາຍ. ນາໂອມີແລະຍິງສອງຄົນມີຄວາມເສົ້າໂສກຫຼາຍອີ່ຫຼີ! ບັດນີ້ນາໂອມີຈະເຮັດແນວໃດ?
ມື້ນຶ່ງນາໂອມີຕັດສິນໃຈອອກເດີນທາງໄກກັບບ້ານໄປຫາຊົນຊາດຂອງນາງ. ລຶດແລະໂອລາຟາປາຖະໜາຢູ່ກັບນາງ ດັ່ງນັ້ນເຂົາຈຶ່ງໄປດ້ວຍກັນ. ແຕ່ຫຼັງຈາກເຂົາເດີນໄປຊົ່ວຂະນະນຶ່ງ ນາໂອມີຈຶ່ງຫັນໜ້າມາເວົ້າກັບລູກສະໃພ້ທັງສອງວ່າ: ‘ຈົ່ງກັບບ້ານແລະໄປຢູ່ກັບແມ່ຂອງເຈົ້າເຖີດ.’
ນາໂອມີຈູບສັ່ງລາລູກສະໃພ້ທັງສອງ. ຂະນະນີ້ເຂົາທັງສອງກໍ່ເລີ່ມຮ້ອງໄຫ້ ເພາະເຂົາຮັກນາໂອມີຫຼາຍ. ເຂົາທັງສອງກ່າວວ່າ: ‘ບໍ່ດອກ! ເຮົາຈະໄປນຳແມ່ ໄປຫາຊົນຊາດຂອງແມ່.’ ແຕ່ນາໂອມີຕອບວ່າ: ‘ລູກເອີຍ ລູກຕ້ອງກັບໄປ. ຖ້າລູກກັບໄປຢູ່ທີ່ບ້ານກໍ່ຈະດີກວ່າ.’ ດັ່ງນັ້ນໂອລາຟາຈຶ່ງເລີ່ມເດີນທາງກັບບ້ານຂອງຕົນ. ແຕ່ລຶດບໍ່ຍອມກັບໄປ.
ນາໂອມີຫັນໜ້າເວົ້າກັບລຶດວ່າ: ‘ໂອລາຟາກໍ່ກັບໄປແລ້ວ. ເຈົ້າດ້ວຍຈົ່ງເມືອບ້ານກັບເຂົາເຖີດ.’ ແຕ່ລຶດຕອບວ່າ: ‘ຂໍແມ່ຢ່າພະຍາຍາມໃຫ້ລູກຈາກໄປເລີຍ! ຂໍໃຫ້ລູກໄປກັບແມ່ເຖີດ. ແມ່ຈະໄປໃສລູກຈະໄປດ້ວຍ ແມ່ອາໄສຢູ່ບ່ອນໃດລູກຈະອາໄສຢູ່ທີ່ນັ້ນ. ຊົນຊາດຂອງແມ່ກໍ່ຈະເປັນຂອງລູກ ແລະພະເຈົ້າຂອງແມ່ກໍ່ຈະເປັນພະເຈົ້າຂອງລູກ. ແມ່ຈະຕາຍບ່ອນໃດລູກຈະຕາຍທີ່ນັ້ນ ແລະທີ່ນັ້ນຈະເປັນທີ່ຝັງລູກດ້ວຍ.’ ເມື່ອລຶດເວົ້າດັ່ງນີ້ ນາໂອມີຈຶ່ງບໍ່ພະຍາຍາມທີ່ຈະເຮັດໃຫ້ນາງເມືອບ້ານອີກ.
ໃນທີ່ສຸດຍິງທັງສອງມາເຖິງປະເທດຍິດສະລາເອນ. ເຂົາຕັ້ງຫຼັກຢູ່ທີ່ນັ້ນ. ລຶດເລີ່ມເຮັດວຽກໃນທົ່ງນາທັນທີ ເພາະເປັນລະດູກ່ຽວເຂົ້າບາເລ. ຊາຍຄົນນຶ່ງຊື່ໂບອາດໃຫ້ນາງເກັບເຂົ້າບາເລໃນທົ່ງນາຂອງຕົນ. ເຈົ້າຮູ້ບໍວ່າຜູ້ໃດເປັນແມ່ຂອງໂບອາດ? ຄືລາຫາບຈາກເມືອງເຢລິໂກ.
ມື້ນຶ່ງໂບອາດບອກລຶດວ່າ: ‘ເຮົາໄດ້ຍິນທຸກຢ່າງກ່ຽວກັບເຈົ້າ ແລະທີ່ເຈົ້າໄດ້ມີນ້ຳໃຈກະລຸນາຕໍ່ນາໂອມີ. ເຮົາຮູ້ວ່າເຈົ້າໄດ້ຈາກພໍ່ແມ່ແລະປະເທດຂອງເຈົ້າ ແລະມາອາໄສຢູ່ທ່າມກາງຊົນຊາດທີ່ເຈົ້າບໍ່ຮູ້ຈັກມາກ່ອນ. ຂໍໃຫ້ພະເຢໂຫວາກະທຳຄວາມດີແກ່ເຈົ້າເຖີດ!’
ລຶດຕອບວ່າ: ‘ທ່ານໄດ້ສະແດງຄວາມກະລຸນາແກ່ຂ້ອຍຫຼາຍ. ຂ້ອຍຮູ້ສຶກສະບາຍໃຈຂຶ້ນເພາະຄຳເວົ້າອັນດີງາມຂອງທ່ານຕໍ່ຂ້ອຍ.’ ໂບອາດພໍໃຈກັບລຶດຫຼາຍ ແລະບໍ່ດົນເຂົາກໍ່ໄດ້ແຕ່ງດອງກັນ. ເລື່ອງນີ້ເຮັດໃຫ້ນາໂອມີມີຄວາມສຸກເບີກບານບໍ່ແມ່ນໜ້ອຍ! ແຕ່ນາໂອມີມີຄວາມສຸກຫຼາຍຂຶ້ນອີກເມື່ອລຶດແລະໂບອາດໄດ້ລູກຊາຍຫົວປີຊື່ໂອເບດ. ຕໍ່ມາໂອເບດກໍ່ກາຍເປັນພໍ່ເຖົ້າຂອງດາວິດ ຜູ້ທີ່ເຮົາຈະໄດ້ຮຽນຮູ້ຫຼາຍອີກໃນຕອນຫຼັງ.
ປະຫວັດນາງລຶດໃນຄຳພີໄບເບິນ
