ຊາຍຜູ້ກ້າຫານ
ບົດ 7
ຊາຍຜູ້ກ້າຫານ
ຂະນະທີ່ຈຳນວນຄົນເລີ່ມຕົ້ນເພີ່ມຂຶ້ນຫຼາຍເທິງແຜ່ນດິນໂລກ ຄົນສ່ວນຫຼາຍໄດ້ເຮັດສິ່ງບໍ່ດີຄືກັນກັບກາອີນ. ແຕ່ມີຊາຍຄົນນຶ່ງທີ່ແຕກຕ່າງຈາກເຂົາ. ຊາຍຄົນນີ້ມີຊື່ວ່າເຫນົກ. ເຫນົກເປັນຄົນກ້າຫານ. ຜູ້ຄົນທັງຫຼາຍຢູ່ຮອບໆທ່ານນັ້ນເຮັດສິ່ງບໍ່ດີ ແຕ່ເຫນົກກໍ່ຍັງຄົງຮັບໃຊ້ພະເຈົ້າຢູ່ຕໍ່ໄປ.
ເຈົ້າຮູ້ບໍວ່າເປັນຫຍັງຜູ້ຄົນໃນສະໄໝນັ້ນເຮັດສິ່ງບໍ່ດີຫຼາຍຢ່າງ? ເອົາລະ ຈົ່ງຄຶດເບິ່ງ ແມ່ນໃຜເປັນເຫດເຮັດໃຫ້ອາດາມແລະເອວາບໍ່ເຊື່ອຟັງພະເຈົ້າແລະກິນໝາກໄມ້ທີ່ພະເຈົ້າບອກໄວ້ວ່າພວກເຂົາບໍ່ຄວນກິນ? ຖືກແລ້ວ ຜູ້ນັ້ນຄືທູດສະຫວັນຊົ່ວ. ຄຳພີໄບເບິນໃຫ້ຊື່ຜູ້ນັ້ນວ່າຊາຕານ. ແລະມັນພະຍາຍາມທີ່ຈະເຮັດໃຫ້ທຸກຄົນເປັນຄົນຊົ່ວ.
ມື້ນຶ່ງພະເຢໂຫວາພະເຈົ້າໃຫ້ເຫນົກບອກຜູ້ຄົນເຖິງບາງຢ່າງທີ່ເຂົາບໍ່ຢາກຈະໄດ້ຍິນ. ເລື່ອງຄືວ່າ: ‘ໃນມື້ນຶ່ງພະເຈົ້າຈະທຳລາຍຄົນທັງຫຼາຍທີ່ເຮັດຊົ່ວ.’ ເມື່ອໄດ້ຍິນເຊັ່ນນີ້ຄົງເຮັດໃຫ້ຜູ້ຄົນຄຽດຫຼາຍ. ພວກເຂົາອາດເຖິງພະຍາຍາມຈະຂ້າເຫນົກ. ດັ່ງນັ້ນເຫນົກຈຳເປັນຕ້ອງກ້າຫານແທ້ໆທີ່ຈະບອກຜູ້ຄົນກ່ຽວກັບສິ່ງທີ່ພະເຈົ້າຈະກະທຳ.
ພະເຈົ້າບໍ່ໄດ້ປ່ອຍໃຫ້ເຫນົກມີຊີວິດຢູ່ເປັນເວລາຍາວນານໃນທ່າມກາງຄົນຊົ່ວເຫຼົ່ານັ້ນ. ເຫນົກໄດ້ມີຊີວິດຢູ່ພຽງແຕ່ 365 ປີເທົ່ານັ້ນ. ເປັນຫຍັງເຮົາຈຶ່ງເວົ້າວ່າ: “ພຽງແຕ່ 365 ປີ” ເທົ່ານັ້ນ? ເພາະຄົນໃນສະໄໝນັ້ນແຂງແຮງກວ່າຄົນສະໄໝນີ້ແລະມີຊີວິດຢູ່ຍາວນານກວ່າ. ທີ່ຈິງ ເມທຶເຊລາລູກຂອງເຫນົກມີຊີວິດຢູ່ໄດ້ເຖິງ 969 ປີ.
ເອົາລະ ຫຼັງຈາກເຫນົກຕາຍໄປແລ້ວ. ຜູ້ຄົນກໍ່ຍິ່ງຊົ່ວຮ້າຍໜັກຂຶ້ນ. ພະຄຳພີກ່າວວ່າ: ‘ຄວາມຄຶດທຸກຢ່າງຂອງເຂົາເປັນເລື່ອງຊົ່ວຮ້າຍຕະຫຼອດເວລາ’ ແລະເພີ່ມວ່າ: ‘ແຜ່ນດິນໂລກຈຶ່ງເຕັມໄປດ້ວຍຄວາມຮຸນແຮງ.’
ເຈົ້າຮູ້ຈັກເຫດຜົນອັນນຶ່ງບໍ່ທີ່ເຮັດໃຫ້ມີຄວາມຫຍຸ້ງຍາກມາກມາຍເທິງແຜ່ນດິນໂລກໃນສະໄໝນັ້ນ? ທັງນີ້ກໍ່ເພາະວ່າຊາຕານມີວິທີໃໝ່ໃນການກໍ່ໃຫ້ຜູ້ຄົນເຮັດສິ່ງຊົ່ວ. ຕໍ່ໄປເຮົາຈະຮຽນຮູ້ເຖິງເລື່ອງນີ້.
ຕົ້ນເດິມ 5:21-24, 27; 6:5; ເຫບເລິ 11:5; ຍູເດ 14, 15.
