ມະນຸດຜູ້ຊາຍຜູ້ຍິງຄູ່ທຳອິດ
ບົດ 3
ມະນຸດຜູ້ຊາຍຜູ້ຍິງຄູ່ທຳອິດ
ໃນຮູບນີ້ມີອັນໃດແຕກຕ່າງອອກໄປ? ຄວາມແຕກຕ່າງກໍ່ຄືມີຄົນຢູ່ໃນຮູບນີ້. ເຂົາຄືຜູ້ຊາຍແລະຜູ້ຍິງຄູ່ທຳອິດ. ຜູ້ໃດສ້າງເຂົາ? ພະເຈົ້າໄດ້ສ້າງເຂົາ. ເຈົ້າຮູ້ຈັກຊື່ຂອງພະອົງບໍ? ພະອົງມີຊື່ວ່າພະເຢໂຫວາ. ຜູ້ຊາຍແລະຜູ້ຍິງຖືກເອີ້ນຊືວ່າອາດາມແລະເອວາ.
ພະເຢໂຫວາສ້າງອາດາມດ້ວຍວິທີນີ້. ພະອົງໄດ້ເອົາຂີ້ຝຸ່ນດິນຈາກພື້ນດິນມາປັ້ນເປັນຮ່າງກາຍຂອງຜູ້ຊາຍຜູ້ສົມບູນແບບ. ຄັນແລ້ວພະອົງກໍ່ເປົ່າລົມເຂົ້າໄປໃນຮູດັງຜູ້ຊາຍຄົນນັ້ນ ແລະອາດາມຈຶ່ງບັງເກີດເປັນຜູ້ມີຊີວິດຢູ່.
ພະເຢໂຫວາພະເຈົ້າມີວຽກໃຫ້ອາດາມເຮັດ. ພະອົງບອກໃຫ້ອາດາມຕັ້ງຊື່ສັດທຸກຊະນິດ. ອາດາມອາດໄດ້ສັງເກດເບິ່ງພວກສັດເປັນເວລານານເພື່ອຕັ້ງຊື່ທີ່ເໝາະສົມທີ່ສຸດສຳລັບສັດທຸກຢ່າງ. ຂະນະທີ່ອາດາມພວມຕັ້ງຊື່ສັດຢູ່ນັ້ນເຂົາເລີ່ມສັງເກດອັນໃດບາງຢ່າງ. ສິ່ງນັ້ນຄືຫຍັງເຈົ້າຮູ້ບໍ?
ສັດທຸກຢ່າງຕ່າງກໍ່ມີຄູ່. ມີພໍ່ຊ້າງ ແມ່ຊ້າງ ມີພໍ່ສິງແລະແມ່ສິງ. ແຕ່ອາດາມບໍ່ທັນມີໃຜເປັນຄູ່ຂອງຕົນ. ດັ່ງນັ້ນພະເຢໂຫວາເຮັດໃຫ້ອາດາມນອນຫຼັບສະໜິດ ແລ້ວເອົາກະດູກຂ້າງເຫຼັ້ມນຶ່ງຂອງເຂົາອອກມາ. ພະເຢໂຫວາສ້າງຜູ້ຍິງຄົນນຶ່ງຂຶ້ນສຳລັບອາດາມໂດຍໃຊ້ກະດູກຂ້າງນີ້ ແລະນາງໄດ້ກາຍມາເປັນເມຍຂອງທ່ານ.
ບັດນີ້ອາດາມມີຄວາມສຸກເບີກບານອີ່ຫຼີ! ແລະຈົ່ງຄຶດເບິ່ງວ່າ ເອວາຄົງມີຄວາມສຸກເທົ່າໃດທີ່ໄດ້ຢູ່ໃນສວນອັນສວຍງາມແນວນີ້! ດຽວນີ້ເຂົາທັງສອງສາມາດມີລູກແລະຢູ່ຮ່ວມກັນດ້ວຍຄວາມສຸກ.
ພະເຢໂຫວາຕ້ອງການໃຫ້ອາດາມແລະເອວາມີຊີວິດຕະຫຼອດໄປ. ພະອົງຕ້ອງການໃຫ້ເຂົາເຮັດໃຫ້ແຜ່ນດິນໂລກສວຍງາມຄືກັບສວນເອເດນ. ເມື່ອເຂົາຄຶດເຖິງການເຮັດເຊັ່ນນີ້ເຂົາໜ້າຈະມີຄວາມສຸກແທ້ໆ! ເຈົ້າຢາກມີສ່ວນທີ່ຈະເຮັດໃຫ້ແຜ່ນດິນໂລກເປັນສວນທີ່ສວຍງາມບໍ? ແຕ່ຄວາມສຸກຂອງອາດາມແລະເອວາຢູ່ໄດ້ບໍ່ດົນ. ຂໍໃຫ້ເຮົາສືບເບິ່ງວ່າເຫດໃດເປັນເຊັ່ນນັ້ນ.
ຄຳເພງ 83:18; ຕົ້ນເດິມ 1:26-31; 2:7-25.
