ເຫດຜົນທີ່ພວກເຂົາໄດ້ເສຍທີ່ຢູ່ອາໄສ
ບົດ 4
ເຫດຜົນທີ່ພວກເຂົາໄດ້ເສຍທີ່ຢູ່ອາໄສ
ເບິ່ງບັດນີ້ມີຫຍັງເກີດຂຶ້ນ. ອາດາມແລະເອວາຖືກຂັບໄລ່ອອກຈາກສວນເອເດນສວນສວຍງາມນັ້ນ. ເຈົ້າຮູ້ບໍວ່າເພາະເຫດໃດ?
ເພາະເຂົາໄດ້ເຮັດບາງຢ່າງທີ່ບໍ່ດີຫຼາຍ. ດັ່ງນັ້ນພະເຢໂຫວາຈຶ່ງລົງໂທດເຂົາເຈົ້າ. ເຈົ້າຮູ້ບໍສິ່ງໃດທີ່ອາດາມແລະເອວາໄດ້ເຮັດທີ່ບໍ່ດີນັ້ນ?
ເຂົາເຮັດສິ່ງນຶ່ງທີ່ພະເຈົ້າບອກເຂົາບໍ່ໃຫ້ເຮັດ. ພະເຈົ້າບອກເຂົາວ່າເຂົາກິນໝາກໄມ້ຈາກຕົ້ນໄມ້ໃນສວນໄດ້. ເວັ້ນແຕ່ຈາກຕົ້ນດຽວພະເຈົ້າບອກບໍ່ໃຫ້ກິນ ຫາກວ່າກິນເຂົາຈະຕາຍ. ພະອົງສະຫງວນຕົ້ນໄມ້ຕົ້ນນັ້ນເປັນຂອງພະອົງເອງ. ແລະເຮົາຮູ້ຢູ່ວ່າການເອົາບາງສິ່ງທີ່ເປັນຂອງຄົນອື່ນນັ້ນ ເປັນການເຮັດຜິດແມ່ນບໍ? ເອົາລະ ມີຫຍັງເກີດຂຶ້ນ?
ມື້ນຶ່ງເມື່ອເອວາຢູ່ຄົນດຽວ ງູຕົວນຶ່ງເວົ້າກັບນາງ. ລອງຄິດເບິ່ງເດີ! ມັນບອກໃຫ້ເອວາກິນໝາກໄມ້ຈາກຕົ້ນໄມ້ຊຶ່ງພະເຈົ້າສັ່ງຫ້າມບໍ່ໃຫ້ກິນ. ຄືວ່າ ເມື່ອພະເຢໂຫວາສ້າງງູນັ້ນພະອົງບໍ່ໄດ້ສ້າງໃຫ້ມັນເວົ້າໄດ້. ດັ່ງນັ້ນກໍ່ຕ້ອງມີຜູ້ອື່ນອີກທີ່ເຮັດໃຫ້ງູເວົ້າໄດ້. ຜູ້ນັ້ນແມ່ນໃຜ?
ບໍ່ແມ່ນອາດາມ. ດັ່ງນັ້ນຕ້ອງເປັນຜູ້ນຶ່ງໃນບັນດາບຸກຄົນທີ່ພະເຢໂຫວາສ້າງດົນນານກ່ອນທີ່ພະອົງສ້າງແຜ່ນດິນໂລກ. ບຸກຄົນເຫຼົ່ານັ້ນຄືພວກທູດສະຫວັນແລະເຮົາບໍ່ສາມາດເຫັນເຂົາໄດ້. ທູດສະຫວັນອົງນີ້ໄດ້ກາຍເປັນຜູ້ທີ່ຈອງຫອງຫຼາຍໆ. ເຂົາເລີ່ມຄິດວ່າຕົນຄວນຈະເປັນຜູ້ປົກຄອງຄືກັບພະເຈົ້າ. ແລະເຂົາຢາກໃຫ້ຄົນເຮົາເຊື່ອຟັງເຂົາແທນພະເຢໂຫວາ. ທູດສະຫວັນອົງນັ້ນແຫຼະທີ່ໄດ້ເຮັດໃຫ້ງູເວົ້າ.
ທູດສະຫວັນອົງນີ້ສາມາດຫຼອກລວງເອວາໄດ້. ເມື່ອເຂົາບອກວ່າຖ້ານາງກິນໝາກໄມ້ນາງຈະກາຍເປັນເໝືອນພະເຈົ້າ ນາງໄດ້ເຊື່ອ. ດັ່ງນັ້ນນາງກໍ່ໄດ້ກິນ ແລະອາດາມກໍ່ໄດ້ກິນດ້ວຍ. ອາດາມແລະເອວາບໍ່ໄດ້ເຊື່ອຟັງພະເຈົ້າ ແລະດ້ວຍເຫດນັ້ນເຂົາຈຶ່ງເສຍທີ່ຢູ່ອາໄສອັນສວຍງາມຂອງເຂົາ.
ແຕ່ຈະມີມື້ນຶ່ງຊຶ່ງພະເຈົ້າຈະຈັດໃຫ້ແຜ່ນດິນໂລກທັງໝົດເປັນສວນອັນສວຍງາມຄືດັ່ງສວນເອເດນ. ພາຍຫຼັງເຮົາຈະໄດ້ຮຽນຮູ້ເຖິງວິທີທີ່ເຈົ້າອາດມີສ່ວນເຮັດໃຫ້ແຜ່ນດິນໂລກເປັນສວນແບບນີ້. ແຕ່ບັດນີ້ ໃຫ້ເຮົາສືບຄົ້ນຫາວ່າມີຫຍັງເກີດຂຶ້ນກັບອາດາມແລະເອວາ.
ຕົ້ນເດິມ 2:16, 17; 3:1-13, 24; ຄຳປາກົດ 12:9.
