ກຳແພງນະຄອນເຢຣຶຊາເລມ
ບົດ 83
ກຳແພງນະຄອນເຢຣຶຊາເລມ
ເບິ່ງງານທັງໝົດທີ່ພວມເຮັດກັນຢູ່ທີ່ນີ້. ຊົນຍິດສະລາເອນທຸກຄົນຕ່າງກໍ່ຫຍຸ້ງຢູ່ກັບການກໍ່ສ້າງກຳແພງເມືອງເຢຣຶຊາເລມ. ເມື່ອ 152 ປີກ່ອນໜ້ານີ້ ເມື່ອກະສັດເນບຶກາດເນດຊາເຣໄດ້ທຳລາຍນະຄອນເຢຣຶຊາເລມ ທ່ານໄດ້ຮື້ພັງກຳແພງແລະເຜົາປະຕູເມືອງທັງຫຼາຍ. ຕອນທຳອິດ ເມື່ອຊົນຍິດສະລາເອນກັບຄືນມາຈາກບາບີໂລນພວກເຂົາຍັງບໍ່ໄດ້ກໍ່ກຳແພງຂຶ້ນອີກ.
ເຈົ້າຄິດວ່າຜູ້ຄົນຈະຮູ້ສຶກຢ່າງໃດທີ່ອາໄສຢູ່ທີ່ນີ້ຫຼາຍປີປັດສະຈາກກຳແພງອ້ອມລ້ອມເມືອງຂອງເຂົາ? ເຂົາຍ່ອມຮູ້ສຶກບໍ່ປອດໄພ. ສັດຕູອາດເຂົ້າມາແລະໂຈມຕີໄດ້ງ່າຍ. ແຕ່ຂະນະນີ້ເນເຫມີບຸລຸດຜູ້ນີ້ໄດ້ມາຊ່ວຍຜູ້ຄົນກໍ່ກຳແພງຂຶ້ນອີກໃນທີ່ສຸດ. ເຈົ້າຮູ້ບໍວ່າເນເຫມີຄືຜູ້ໃດ?
ເນເຫມີຄືຊົນຍິດສະລາເອນມາຈາກນະຄອນຊຶເຊ ເມືອງຫຼວງທີ່ມາເຣໂດເກແລະເອເຊເທເຣຢູ່. ເນເຫມີໄດ້ເຮັດງານໃນວັງກະສັດ ດັ່ງນັ້ນທ່ານອາດເຄີຍເປັນເພື່ອນທີ່ດີຂອງມາເຣໂດເກແລະລາຊີນີເອເຊເທເຣ. ແຕ່ຄຳພີໄບເບິນບໍ່ໄດ້ກ່າວວ່າເນເຫມີໄດ້ເຮັດງານໃຫ້ສາມີຂອງເອເຊເທເຣກະສັດອາຊຶເອຣຶເຊ. ທ່ານໄດ້ເຮັດງານໃຫ້ອາເຣຕາເຊເຣເຊຄືກະສັດອົງຖັດໄປ.
ເຈົ້າຄົງຈື່ໄດ້ວ່າ ອາເຣຕາເຊເຣເຊເປັນກະສັດທີ່ດີຜູ້ມອບເງິນທັງໝົດນັ້ນໃຫ້ເອເຊດຣາເຊເອົາໄປເຢຣຶຊາເລມເພື່ອໃຊ້ຕົກແຕ່ງວິຫານຂອງພະເຢໂຫວາ. ແຕ່ເອເຊດຣາເຊບໍ່ໄດ້ກໍ່ກຳແພງເມືອງທີ່ໄດ້ຫັກພັງລົງ. ໃຫ້ເຮົາເບິ່ງວ່າເຫດການເປັນຢ່າງໃດທີ່ເນເຫມີໄດ້ມາເຮັດງານນີ້.
ເປັນເວລາ 13 ປີຕັ້ງແຕ່ອາເຣຕາເຊເຣເຊໄດ້ມອບເງິນໃຫ້ເອເຊດຣາເຊໄປຕົກແຕ່ງວິຫານ. ເນເຫມີຕອນນີ້ເປັນຫົວໜ້າຂອງພວກຜູ້ຮັບໃຊ້ຜູ້ຖືຈອກຖວາຍແກ່ກະສັດອາເຣຕາເຊເຣເຊ. ນີ້ໝາຍຄວາມວ່າທ່ານເປັນຜູ້ຮັບໃຊ້ຖວາຍເຫຼົ້າອະງຸ່ນໃຫ້ກະສັດ ແລະເຮັດໃຫ້ແນ່ໃຈວ່າຈະບໍ່ມີຜູ້ໃດໃສ່ຢາພິດກະສັດໄດ້. ງານນີ້ນັບວ່າສຳຄັນຫຼາຍ.
ເອົາລະ ມື້ນຶ່ງຫານານີອ້າຍຂອງເນເຫມີແລະຄົນອື່ນໆຈາກແຜ່ນດິນຍິດສະລາເອນມາຢ້ຽມເນເຫມີ ເຂົາບອກເພິ່ນກ່ຽວກັບຄວາມລຳບາກທີ່ມີໃນຍິດສະລາເອນແລະກຳແພງແຫ່ງເຢຣຶຊາເລມທີ່ຍັງຄົງຫັກພັງຢູ່. ຂ່າວນີ້ເຮັດໃຫ້ເນເຫມີເສົ້າໃຈຫຼາຍ ແລະເພິ່ນອະທິດຖານຕໍ່ພະເຢໂຫວາກ່ຽວກັບເລື່ອງນີ້.
ມື້ນຶ່ງກະສັດສັງເກດເຫັນເນເຫມີມີໜ້າເສົ້າໝອງຈຶ່ງຖາມວ່າ: ‘ເປັນຫຍັງເຈົ້າຈຶ່ງມີໜ້າໂສກເສົ້າ?’ ເນເຫມີທູນວ່າທັງນີ້ກໍ່ເພາະວ່າເຢຣຶຊາເລມຢູ່ໃນສະພາບທີ່ບໍ່ດີແລະກຳແພງກໍ່ຫັກພັງ. ກະສັດຈຶ່ງຖາມວ່າ: ‘ມີສິ່ງໃດທີ່ເຈົ້າຕ້ອງການ?’.
ເນເຫມີທູນວ່າ: ‘ຂໍອະນຸຍາດໃຫ້ຂ້າພະເຈົ້າໄປເຢຣຶຊາເລມ ເພື່ອຂ້າພະເຈົ້າຈະໄດ້ກໍ່ສ້າງກຳແພງ.’ ອາເຣຕາເຊເຣເຊເປັນກະສັດທີ່ມີຄວາມກະລຸນາຫຼາຍ. ກະສັດບອກເນເຫມີວ່າເຈົ້າຈົ່ງໄປເຖີດ ແລະທ່ານໄດ້ຊ່ວຍຈັດຫາໄມ້ເພື່ອໃຊ້ໃນການກໍ່ສ້າງດ້ວຍ. ບໍ່ຊ້າຫຼັງຈາກນັ້ນເນເຫມີມາເຖິງເຢຣຶຊາເລມ ເພິ່ນບອກຜູ້ຄົນກ່ຽວກັບແຜນການຂອງຕົນ. ພວກເຂົາພໍໃຈໃນຄວາມຄິດນັ້ນແລະກ່າວວ່າ: ‘ໃຫ້ເຮົາເລີ່ມສ້າງກັນເຖີດ.’
ເມື່ອພວກສັດຕູຂອງຊົນຍິດສະລາເອນເຫັນວ່າມີການກໍ່ກຳແພງຂຶ້ນ ເຂົາເວົ້າກັນວ່າ: ‘ເຮົາຈະໄປຂ້າພວກເຂົາ ແລະເຮັດໃຫ້ງານກໍ່ສ້າງເລີກລົ້ມ.’ ເມື່ອເນເຫມີຮູ້ກ່ຽວກັບເລື່ອງນີ້ ທ່ານຈັດໃຫ້ພວກຄົນງານຖືດາບແລະຫອກພ້ອມ. ແລະທ່ານບອກວ່າ: ‘ບໍ່ຕ້ອງຢ້ານພວກສັດຕູ ຈົ່ງຕໍ່ສູ້ເພື່ອພີ່ນ້ອງ ລູກຫຼານ ເມຍແລະບ້ານເຮືອນຂອງເຈົ້າເຖີດ.’
ຜູ້ຄົນຕ່າງກໍ່ມີໃຈກ້າຫານ. ພວກເຂົາຖືອາວຸດພ້ອມທັງກາງເວັນແລະກາງຄືນ ແລະທຳການກໍ່ສ້າງຕໍ່ໄປ. ດັ່ງນັ້ນພາຍໃນ 52 ມື້ເທົ່ານັ້ນກຳແພງກໍ່ເສັດ. ບັດນີ້ຜູ້ຄົນທີ່ຢູ່ໃນເມືອງຮູ້ສຶກປອດໄພ. ເນເຫມີແລະເອເຊດຣາເຊສັ່ງສອນປະຊາຊົນເຖິງກົດໝາຍຂອງພະເຈົ້າ ແລະພວກເຂົາຕ່າງກໍ່ມີຄວາມສຸກສະບາຍໃຈ.
ແຕ່ສິ່ງຕ່າງໆກໍ່ຍັງບໍ່ເປັນຄືສະໄໝກ່ອນ ກ່ອນທີ່ຊົນຍິດສະລາເອນຖືກເອົາໄປເປັນຊະເລີຍທີ່ບາບີໂລນ. ຜູ້ຄົນຢູ່ໃຕ້ການປົກຄອງຂອງກະສັດເປເຣເຊແລະເຂົາຕ້ອງຮັບໃຊ້ກະສັດນັ້ນ. ແຕ່ພະເຢໂຫວາໄດ້ສັນຍາໄວ້ວ່າພະອົງຈະສົ່ງກະສັດອົງໃໝ່ມາແລະກະສັດອົງນີ້ຈະນຳເອົາສັນຕິສຸກມາສູ່ພົນລະເມືອງ. ກະສັດອົງນີ້ຄືຜູ້ໃດ? ພະອົງຈະນຳເອົາສັນຕິສຸກມາສູ່ແຜ່ນດິນໂລກໂດຍວິທີໃດ? ປະມານ 450 ປີໄດ້ຜ່ານໄປກ່ອນທີ່ຄົນໃດໆຈະມີໂອກາດຮຽນຮູ້ກ່ຽວກັບເລື່ອງນີ້ຫຼາຍຂຶ້ນ. ແລ້ວກໍ່ມີການກຳເນີດຂອງທາລົກຄັ້ງສຳຄັນທີ່ສຸດ. ແຕ່ວ່ານັ້ນເປັນອີກເລື່ອງນຶ່ງ.
