ພວກເຂົາບໍ່ຍອມກົ້ມຕົວລົງ
ບົດ 77
ພວກເຂົາບໍ່ຍອມກົ້ມຕົວລົງ
ເຈົ້າຈື່ເລື່ອງທີ່ໄດ້ຟັງມາແລ້ວກ່ຽວກັບຊາຍຫນຸ່ມສາມຄົນເຫຼົ່ານີ້ບໍ? ແມ່ນແລ້ວ ເຂົາຄືເພື່ອນຂອງດານຽນຜູ້ຊຶ່ງປະຕິເສດກິນອາຫານທີ່ບໍ່ດີສຳລັບຕົນ. ຊາວບາບີໂລນເອີ້ນພວກເຂົາວ່າ ຊາດຣາກ ເມຊາກ ແລະອາເບດເນໂຄ. ແຕ່ເບິ່ງພວກເຂົາໃນຂະນະນີ້ແດ່. ເປັນຫຍັງພວກເຂົາຈຶ່ງບໍ່ກົ້ມລົງຕໍ່ໜ້າຮູບຈຳລອງອັນໃຫຍ່ນີ້ເໝືອນກັບຄົນອື່ນໆ? ຂໍໃຫ້ເຮົາພິຈາລະນາເບິ່ງ.
ເຈົ້າຈື່ກົດໝາຍທີ່ເອີ້ນວ່າພະບັນຍັດສິບປະການຊຶ່ງພະເຢໂຫວາເອງໄດ້ຈາລຶກໄວ້ນັ້ນບໍ? ປະການທຳອິດຄື: ‘ເຈົ້າຢ່ານະມັດສະການພະເຈົ້າອົງອື່ນນອກຈາກເຮົາ.’ ພວກຊາຍຫນຸ່ມທີ່ນີ້ປະຕິບັດຕາມກົດໝາຍຂໍ້ນີ້ ເຖິງແມ່ນວ່າບໍ່ເປັນສິ່ງທີ່ງ່າຍ.
ກະສັດເນບຶກາດເນດຊາເຣແຫ່ງບາບີໂລນຮຽກຮ້ອງບຸກຄົນສຳຄັນໆມາເພື່ອສະແດງຄວາມເຄົາລົບຕໍ່ຮູບຈຳລອງທີ່ທ່ານຕັ້ງຂຶ້ນນັ້ນ. ທ່ານຫາກໍ່ເວົ້າສຸດລົງຕໍ່ຄົນທັງປວງວ່າ: ‘ເມື່ອພວກເຈົ້າໄດ້ຍິນສຽງແກສຽງກະຈັບປີ່ມືແລະສຽງດົນຕີອື່ນໆ ເຈົ້າຈົ່ງກົ້ມຕົວລົງນະມັດສະການຮູບຄຳນີ້. ຜູ້ໃດທີ່ບໍ່ກົ້ມຕົວລົງແລະບໍ່ນະມັດສະການກໍ່ຈະຖືກໂຍນເຂົ້າໃນເຕົາໄຟທີ່ຕິດໄຟລຸກອັນຮ້ອນກ້ານັ້ນທັນທີ.’
ຄັນເນບຶກາດເນດຊາເຣຮູ້ແລ້ວວ່າຊາດຣາກ ເມຊາກແລະອາເບດເນໂຄບໍ່ໄດ້ກົ້ມຕົວລົງ ທ່ານກໍ່ມີຄວາມຄຽດຮ້າຍຫຼາຍ. ກະສັດສັ່ງໃຫ້ນຳຕົວເຂົາເຂົ້າມາເຝົ້າ. ທ່ານໄດ້ໃຫ້ໂອກາດແກ່ເຂົາອີກຄັ້ງນຶ່ງທີ່ຈະກົ້ມຕົວລົງ. ແຕ່ຊາຍຫນຸ່ມເຫຼົ່ານີ້ວາງໃຈໃນພະເຢໂຫວາ. ເຂົາຫຼອງຕໍ່ເນບຶກາດເນດຊາເຣວ່າ: ‘ພະເຈົ້າຂອງພວກຂ້າພະເຈົ້າຊຶ່ງພວກຂ້າພະເຈົ້າປະຕິບັດສາມາດຊ່ວຍພວກຂ້າພະເຈົ້າໃຫ້ລອດໄດ້. ແຕ່ເຖິງແມ່ນວ່າພະອົງບໍ່ຊ່ວຍພວກຂ້າພະເຈົ້າໃຫ້ລອດ ພວກຂ້າພະເຈົ້າຈະບໍ່ກົ້ມຕົວລົງຕໍ່ຮູບຈຳລອງຂອງທ່ານ.’
ເມື່ອໄດ້ຍິນຄຳນີ້ ເນບຶກາດເນດຊາເຣກໍ່ຍິ່ງມີຄວາມຄຽດຮ້າຍ. ໃນທີ່ນັ້ນມີເຕົາໄຟຢູ່ໃກ້ໆແລະທ່ານອອກຄຳສັ່ງວ່າ: ‘ຈົ່ງໃຫ້ເຕົາໄຟຮ້ອນຂຶ້ນ 7 ເທົ່າກວ່າແຕ່ກ່ອນ!’ ແລ້ວໃຫ້ຄົນມີແຮງທີ່ສຸດໃນກອງທັບຂອງທ່ານມັດຊາດຣາກ ເມຊາກແລະອາເບດເນໂຄເອົາຕົວເຂົາໂຍນເຂົ້າໄປໃນເຕົາໄຟ. ເຕົານັ້ນກໍ່ຮ້ອນກ້າຢ່າງຍິ່ງຈົນເຖິງພວກຄົນແຂງແຮງພວກນັ້ນຖືກຂ້າຕາຍຍ້ອນແປວໄຟ. ສ່ວນຊາຍຫນຸ່ມສາມຄົນຜູ້ທີ່ຖືກໂຍນເຂົ້າໄປຂ້າງໃນນັ້ນເປັນຢ່າງໃດ?
ກະສັດຈ້ອງມອງເຂົ້າໄປໃນເຕົາໄຟ ແລະແລ້ວກໍ່ເກີດມີຄວາມຫວາດກົວຫຼາຍ. ທ່ານຈຶ່ງຮ້ອງຖາມວ່າ: ‘ເຮົາໄດ້ມັດຊາຍສາມຄົນແລະໂຍນເຂົ້າໄປໃນເຕົາໄຟອັນຮ້ອນກ້ານັ້ນບໍ່ໃຊ່ຫຼື?’
ຂ້າລາຊະການຂອງທ່ານຕອບວ່າ: ‘ແມ່ນແລ້ວ’
ທ່ານກ່າວວ່າ: ‘ແຕ່ເຮົາເຫັນຊາຍສີ່ຄົນຍ່າງໄປມາໃນກາງໄຟ ພວກເຂົາບໍ່ໄດ້ຖືກມັດໄວ້ເລີຍ ແລະໄຟກໍ່ບໍ່ເປັນອັນຕະລາຍແກ່ເຂົາ. ແລະຜູ້ທີສີ່ນັ້ນຄ້າຍຄືພະເຈົ້າອົງນຶ່ງ.’ ກະສັດຫຍັບເຂົ້າໄປໃກ້ປະຕູເຕົາໄຟແລະຮ້ອງວ່າ: ‘ຊາດຣາກ ເມຊາກ ອາເບດເນໂຄ ຈົ່ງອອກມາເຖີດ ເຈົ້າຜູ້ຮັບໃຊ້ແຫ່ງພະເຈົ້າອົງສູງສຸດ!’
ເມື່ອເຂົາອອກມາ ທຸກຄົນສາມາດເຫັນໄດ້ວ່າເຂົາບໍ່ໄດ້ຮັບອັນຕະລາຍເລີຍ. ແລ້ວກະສັດກ່າວວ່າ: ‘ຂໍໃຫ້ພະເຈົ້າຂອງຊາດຣາກ ເມຊາກແລະອາເບດເນໂຄຈົ່ງໄດ້ຮັບຄຳຍົກຍ້ອງສັນລະເສີນເຖີດ! ພະອົງໄດ້ສົ່ງທູດຂອງພະອົງມາຊ່ວຍເຂົາໃຫ້ລອດ ເພາະເຂົາບໍ່ກົ້ມຕົວລົງນະມັດສະການພະເຈົ້າອື່ນ ນອກຈາກພະເຈົ້າຂອງເຂົາເອງ.’
ເລື່ອງນີ້ເປັນຕົວຢ່າງທີ່ດີເລີດ ທີ່ເຮົາຄວນປະຕິບັດຕາມໃນເລື່ອງຄວາມສັດຊື່ໝັ້ນຄົງຕໍ່ພະເຢໂຫວາແມ່ນບໍ?
ອຸປະຍົກໜີ 20:3; ດານຽນ 3:1-30.