ລາຍມືທີ່ຝາກັ້ນ
ບົດ 78
ລາຍມືທີ່ຝາກັ້ນ
ທີ່ນີ້ມີຫຍັງເກີດຂຶ້ນ? ຜູ້ຄົນພວມມີການກິນລ້ຽງໃຫຍ່. ກະສັດແຫ່ງນະຄອນບາບີໂລນໄດ້ເຊີນບັນດາແຂກສຳຄັນໆພັນຄົນມາໃນງານລ້ຽງ. ພວກເຂົາເອົາຈອກຄຳຈອກເງິນແລະຖ້ວຍຕ່າງໆທີ່ເອົາມາຈາກວິຫານຂອງພະເຢໂຫວາທີ່ນະຄອນເຢຣຶຊາເລມມາໃຊ້. ແຕ່ວ່າໃນທັນໃດນັ້ນກໍ່ມີນິ້ວມືຄົນປາກົດຂຶ້ນໃນອາກາດແລະເລີ່ມຂຽນເທິງຝາກັ້ນ. ທຸກຄົນຕ່າງກໍ່ຕົກໃຈຢ້ານ.
ເບນຊາດຊາເຣຫຼານຊາຍຂອງເນບຶກາດເນດຊາເຣເປັນກະສັດໃນເວລານີ້. ທ່ານຮ້ອງສັ່ງດ້ວຍສຽງອັນດັງໃຫ້ນຳເອົາພວກນັກປາດຂອງທ່ານເຂົ້າມາເຝົ້າ. ກະສັດກ່າວວ່າ: ‘ຜູ້ໃດຫາກອ່ານຂໍ້ຄວາມຂຽນນີ້ໄດ້ແລະແປຄວາມໝາຍໃຫ້ເຮົາຟັງ ເຮົາຈະປະທານຂອງຂວັນຫຼາຍຢ່າງແລະຈະຕັ້ງໃຫ້ເປັນຜູ້ປົກຄອງສຳຄັນຄົນທີສາມໃນລາຊະອານາຈັກ.’ ແຕ່ບໍ່ມີນັກປາດຄົນໃດອ່ານຂໍ້ຄວາມທີ່ຂຽນເທິງຝາກັ້ນແລະບອກຄວາມໝາຍນັ້ນໄດ້ເລີຍ.
ແມ່ຂອງກະສັດໄດ້ຍິນສຽງອຶກກະທຶກເຊັ່ນນັ້ນ ຈຶ່ງເຂົ້າມາໃນຫ້ອງໃຫຍ່ທີ່ມີການກິນລ້ຽງ. ນາງບອກກະສັດວ່າ: ‘ຂໍຢ່າວຸ່ນວາຍຕົກໃຈເລີຍ ໃນອານາຈັກຂອງທ່ານມີຊາຍຄົນນຶ່ງທີ່ຮູ້ຈັກພະຜູ້ບໍລິສຸດທັງຫຼາຍ. ເມື່ອເນບຶກາດເນດຊາເຣປູ່ຂອງທ່ານເປັນກະສັດໃນສະໄໝນັ້ນ ທ່ານໄດ້ຕັ້ງຊາຍຄົນນີ້ເປັນຫົວໜ້ານັກປາດທັງຫຼາຍຂອງທ່ານ. ຊາຍຄົນນີ້ຊື່ດານຽນ. ສົ່ງຄົນໄປນຳເຂົາມາຫາ ແລ້ວເຂົາຈະບອກໃຫ້ທ່ານຮູ້ຄວາມໝາຍແຫ່ງຂໍ້ຄວາມທັງຫຼາຍນີ້.’
ດັ່ງນັ້ນດານຽນຈຶ່ງຖືກນຳເຂົ້າມາເຝົ້າທັນທີ. ຫຼັງຈາກປະຕິເສດຮັບເອົາຂອງຂວັນໃດໆ ດານຽນກໍ່ເລີ່ມບອກເຫດຜົນທີ່ຄັ້ງນຶ່ງພະເຢໂຫວາຈຶ່ງໄດ້ປົດເນບຶກາດເນດຊາເຣປູ່ຂອງເບນຊາດຊາເຣຈາກຕຳແໜ່ງເປັນກະສັດ. ດານຽນທູນວ່າ: ‘ທ່ານໄດ້ຍົກຍໍຕົວຂຶ້ນກັບຄວາມຈອງຫອງ ແລະພະເຢໂຫວາຈຶ່ງໄດ້ລົງໂທດທ່ານ.’
ດານຽນກ່າວແກ່ເບນຊາດຊາເຣວ່າ: ‘ແຕ່ທ່ານຮູ້ສິ່ງທັງໝົດທີ່ໄດ້ເກີດຂຶ້ນແກ່ເນບຶກາດເນດຊາເຣ ແລະທ່ານກໍ່ຍັງຄົງຈອງຫອງອວດຕົວເໝືອນກັບເນບຶກາດເນດຊາເຣ. ທ່ານໄດ້ນຳເອົາຈອກແລະຖ້ວຍທັງຫຼາຍມາຈາກວິຫານຂອງພະເຢໂຫວາມາໃຊ້ແລະດື່ມຈາກຖ້ວຍຈອກເຫຼົ່ານັ້ນ. ທ່ານໄດ້ສັນລະເສີນພະທີ່ເຮັດດ້ວຍໄມ້ແລະຫີນ ແລະທ່ານບໍ່ໄດ້ໃຫ້ກຽດພະຜູ້ສ້າງອົງຍິ່ງໃຫຍ່ຂອງເຮົາ. ດ້ວຍເຫດນີ້ ພະເຈົ້າຈຶ່ງສົ່ງມືນັ້ນມາຂຽນຖ້ອຍຄຳເຫຼົ່ານີ້.’
ດານຽນທູນວ່າ: ‘ຂໍ້ຄວາມທີ່ຂຽນມີດັ່ງນີ້: ເມເນ ເມເນ ເທເກເລແລະເປເຣເຊ.’
‘ເມເນ ໝາຍຄວາມວ່າພະເຈົ້ານັບວັນແຫ່ງອານາຈັກຂອງທ່ານໄວ້ແລ້ວແລະນຳມາເຖິງທີ່ສິ້ນສຸດແລ້ວ. ເທເກເລ ໝາຍຄວາມວ່າທ່ານຖືກຊັ່ງໃນຊິງແລະພົບວ່າບໍ່ດີເລີຍ. ເປເຣເຊ ໝາຍຄວາມວ່າອານາຈັກຂອງທ່ານຖືກມອບໃຫ້ແກ່ຊາວແມດກັບຊາວເປເຣເຊແລ້ວ.’
ຂະນະທີ່ດານຽນຍັງເວົ້າຢູ່ ຊາວແມດກັບຊາວເປເຣເຊກໍ່ເລີ່ມໂຈມຕີນະຄອນບາບີໂລນ. ພວກເຂົາຍຶດເອົານະຄອນບາບີໂລນແລະຂ້າເບນຊາດຊາເຣ. ລາຍມືທີ່ຂຽນເທິງຝາກັ້ນກໍ່ກາຍມາເປັນຄວາມຈິງພາຍໃນຄືນນັ້ນແທ້! ແຕ່ບັດນີ້ຈະມີຫຍັງເກີດຂຶ້ນແກ່ຊົນຍິດສະລາເອນ? ເຮົາຈະໄດ້ຮຽນຮູ້ໃນບໍ່ຊ້າ ແຕ່ໃຫ້ເຮົາເບິ່ງກ່ອນວ່າມີເຫດການອັນໃດເກີດຂຶ້ນກັບດານຽນ.
