ໝັ້ນໃຈໃນຄວາມຊ່ວຍເຫຼືອຂອງພະເຈົ້າ
ບົດ 81
ໝັ້ນໃຈໃນຄວາມຊ່ວຍເຫຼືອຂອງພະເຈົ້າ
ຜູ້ຄົນຫຼາຍພັນຄົນເດີນທາງໄກຈາກບາບີໂລນໄປຍັງເຢຣຶຊາເລມ. ແຕ່ເມື່ອພວກເຂົາໄປເຖິງ ເຢຣຶຊາເລມເປັນພຽງແຕ່ສະຖານທີ່ຫັກພັງເທົ່ານັ້ນ. ບໍ່ມີຜູ້ໃດອາໄສຢູ່ທີ່ນັ້ນ. ຊົນຍິດສະລາເອນຕ້ອງກໍ່ສ້າງທຸກສິ່ງຂຶ້ນໃໝ່ອີກ.
ສິ່ງທຳອິດຢ່າງນຶ່ງທີ່ພວກເຂົາກໍ່ສ້າງຂຶ້ນນັ້ນຄືແທ່ນບູຊາ. ນັ້ນເປັນບ່ອນທີ່ພວກເຂົາຈະມາຖວາຍເຄື່ອງບູຊາທີ່ເປັນສັດຫຼືຂອງກຳນັນແກ່ພະເຢໂຫວາ. ສອງສາມເດືອນຕໍ່ມາຊົນຍິດສະລາເອນເລີ່ມກໍ່ສ້າງວິຫານ. ແຕ່ພວກສັດຕູທີ່ອາໄສຢູ່ແດນໃກ້ຄຽງນັ້ນບໍ່ຕ້ອງການໃຫ້ຊົນຍິດສະລາເອນກໍ່ສ້າງວິຫານຂຶ້ນ. ຈຶ່ງພະຍາຍາມຂູ່ໃຫ້ຊົນຍິດສະລາເອນຢ້ານເພື່ອເຮັດໃຫ້ເຂົາເລີກງານກໍ່ສ້າງ. ໃນທີ່ສຸດ ພວກສັດຕູເຫຼົ່ານີ້ຈຶ່ງຊັກຊວນກະສັດອົງໃໝ່ແຫ່ງເປເຣເຊອອກກົດໝາຍໃຫ້ຢຸດງານກໍ່ສ້າງ.
ຫຼາຍປີຜ່ານໄປ. ຕອນນີ້ເປັນເວລາ 17 ປີຕັ້ງແຕ່ຊົນຍິດສະລາເອນເມືອຈາກບາບີໂລນ. ພະເຢໂຫວາສົ່ງຜູ້ທຳນວາຍອາກເກແລະຊາກາລີໄປບອກຜູ້ຄົນໃຫ້ເລີ່ມກໍ່ສ້າງອີກ. ຜູ້ຄົນໝັ້ນໃຈໃນຄວາມຊ່ວຍເຫຼືອຂອງພະເຈົ້າ ແລະເຊື່ອຟັງຜູ້ທຳນວາຍ. ພວກເຂົາລົງມືກໍ່ສ້າງອີກ ເຖິງແມ່ນວ່າມີກົດໝາຍສັ່ງຫ້າມບໍ່ໃຫ້ກໍ່ສ້າງກໍ່ຕາມ.
ດັ່ງນັ້ນທາດນາຍຜູ້ຄຸ້ມຄອງຊາວເປເຣເຊມາຖາມຊົນຍິດສະລາເອນວ່າ ມີສິດອັນໃດທີ່ກໍ່ສ້າງວິຫານ. ຊົນຍິດສະລາເອນບອກທ່ານວ່າເມື່ອພວກເຂົາຢູ່ບາບີໂລນກະສັດຊີຣຶເຊໄດ້ສັ່ງພວກເຂົາວ່າ: ‘ບັດນີ້ຈົ່ງໄປເຢຣຶຊາເລມແລະກໍ່ສ້າງວິຫານຂອງພະເຢໂຫວາພະເຈົ້າຂອງເຈົ້າ.’
ທາດນາຍສົ່ງຈົດໝາຍໄປບາບີໂລນແລະຖາມເຖິງຊີຣຶເຊຜູ້ຊຶ່ງເວລານັ້ນສິ້ນຊີວິດແລ້ວວ່າຊີຣຶເຊໄດ້ກ່າວເຊັ່ນນັ້ນເປັນຄວາມຈິງຫຼືບໍ. ບໍ່ຊ້າມີຈົດໝາຍມາຈາກກະສັດອົງໃໝ່ແຫ່ງເປເຣເຊແຈ້ງວ່າຊີຣຶເຊໄດ້ອອກຄຳສັ່ງດັ່ງນັ້ນຈິງ. ແລະກະສັດຈຶ່ງຂຽນບອກວ່າ: ‘ຈົ່ງປ່ອຍໃຫ້ຊົນຍິດສະລາເອນກໍ່ສ້າງວິຫານແຫ່ງພະເຈົ້າຂອງພວກເຂົາເຖີດ. ແລະເຮົາສັ່ງເຈົ້າໃຫ້ຊ່ວຍພວກເຂົາ.’ ໃນເວລາປະມານສີ່ປີວິຫານກໍ່ສ້າງເສັດແລ້ວແລະຊົນຍິດສະລາເອນຕ່າງກໍ່ມີຄວາມດີອົກດີໃຈຫຼາຍ.
ຫຼາຍປີໄດ້ລ່ວງໄປ. ຕອນນີ້ກໍ່ເກືອບ 48 ປີຕັ້ງແຕ່ວິຫານສ້າງເສັດແລ້ວ. ຜູ້ຄົນໃນເຢຣຶຊາເລມທຸກຍາກ ເມືອງນັ້ນແລະວິຫານຂອງພະເຈົ້າບໍ່ຄ່ອຍຈະງົດງາມໜ້າເບິ່ງປານໃດ. ທີ່ນະຄອນບາບີໂລນນັ້ນ ເອເຊດຣາເຊຊາວຍິດສະລາເອນຮູ້ເຖິງຄວາມຈຳເປັນທີ່ຈະຕ້ອງຕົກແຕ່ງວິຫານຂອງພະເຈົ້າ. ດັ່ງນັ້ນເຈົ້າຮູ້ບໍວ່າເຂົາເຮັດຢ່າງໃດ?
ເອເຊດຣາເຊເຂົ້າໄປເຝົ້າອາເຣຕາເຊເຣເຊ ກະສັດແຫ່ງປະເທດເປເຣເຊ ແລະກະສັດຜູ້ມີນ້ຳໃຈດີອົງນີ້ໄດ້ມອບຂອງກຳນັນຫຼາຍຢ່າງແກ່ເອເຊດຣາເຊເພື່ອນຳໄປເຢຣຶຊາເລມ. ເອເຊດຣາເຊໄດ້ຂໍຮ້ອງຊົນຍິດສະລາເອນໃນບາບີໂລນໃຫ້ຊ່ວຍເຂົາຂົນຂອງກຳນັນເຫຼົ່ານີ້ໄປເຢຣຶຊາເລມ. ຜູ້ຄົນປະມານ 6,000 ຄົນສະເໜີຕົວທີ່ຈະໄປ. ພວກເຂົາມີເງິນ ຄຳແລະສິ່ງທີ່ມີຄ່າອື່ນໆຫຼາຍຢ່າງທີ່ຈະເອົາໄປນຳ.
ເອເຊດຣາເຊເປັນຫ່ວງ ເພາະຕາມຫົນທາງນັ້ນມີພວກຄົນຮ້າຍ. ຄົນເຫຼົ່ານີ້ອາດມາແຍ່ງຊິງເອົາຄຳແລະເງິນຂອງເຂົາ ແລະຂ້າເຂົາເສຍ. ດັ່ງນັ້ນເອເຊດຣາເຊຈຶ່ງຮຽກຜູ້ຄົນມາຮ່ວມຊຸມນຸມກັນ ດັ່ງທີ່ເຈົ້າເຫັນຢູ່ໃນຮູບນີ້. ແລ້ວພວກເຂົາອະທິດຖານຂໍພະເຢໂຫວາປ້ອງກັນເຂົາໃນການເດີນທາງໄກກັບໄປສູ່ເຢຣຶຊາເລມ.
ພະເຢໂຫວາໄດ້ປ້ອງກັນພວກເຂົາ. ຫຼັງຈາກເດີນທາງໄດ້ສີ່ເດືອນພວກເຂົາກໍ່ມາເຖິງເຢຣຶຊາເລມດ້ວຍຄວາມປອດໄພ. ເລື່ອງນີ້ສະແດງໃຫ້ເຫັນບໍ່ແມ່ນບໍທີ່ວ່າພະເຢໂຫວາສາມາດປ້ອງກັນຄົນເຫຼົ່ານັ້ນຊຶ່ງໝັ້ນໃຈໃນຄວາມຊ່ວຍເຫຼືອຂອງພະອົງ?
