ອີຊາກໄດ້ເມຍທີ່ດີ
ບົດ 16
ອີຊາກໄດ້ເມຍທີ່ດີ
ຜູ້ຍິງໃນຮູບນີ້ແມ່ນໃຜເຈົ້າຮູ້ບໍ? ເຂົາຊື່ເລເບກາ. ແລະຜູ້ຊາຍທີ່ເຂົາກຳລັງມາພົບຄືອີຊາກ. ເຂົາຈະກາຍເປັນເມຍຂອງຜູ້ຊາຍນັ້ນ. ເລື່ອງນີ້ເກີດຂຶ້ນໄດ້ຢ່າງໃດ?
ເອົາລະ ອັບລາຫາມພໍ່ຂອງອີຊາກຢາກໄດ້ເມຍທີ່ດີໃຫ້ລູກຊາຍຂອງທ່ານ. ເຂົາບໍ່ຢາກໃຫ້ອີຊາກແຕ່ງດອງກັບຜູ້ຍິງຊາວການາອານ ເພາະວ່າຊາວຊົນເຫຼົ່ານີ້ນະມັດສະການພະເຈົ້າປອມ. ດ້ວຍເຫດນີ້ ອັບລາຫາມເອີ້ນຄົນຮັບໃຊ້ຂອງເຂົາແລະກ່າວວ່າ: ‘ເຮົາຕ້ອງການໃຫ້ເຈົ້າກັບໄປຫາຍາດຕິພີ່ນ້ອງຂອງເຮົາໃນເມືອງຄາຣານແລະຫາເມຍໃຫ້ອີຊາກລູກຊາຍຂອງເຮົາ’
ຄົນໃຊ້ຂອງອັບລາຫາມກໍ່ນຳອູດສິບຕົວມາແລະອອກເດີນທາງໄກທັນທີ. ເມື່ອເຂົາເຂົ້າມາໃກ້ຈະເຖິງບ່ອນທີ່ຍາດພີ່ນ້ອງຂອງອັບລາຫາມຢູ່ ເຂົາໄດ້ຢຸດພັກທີ່ນ້ຳສ້າງແຫ່ງນຶ່ງ. ຕອນນັ້ນເປັນເວລາບ່າຍໆ ເປັນເວລາເມື່ອພວກຜູ້ຍິງໃນເມືອງອອກມາຕັກນ້ຳຈາກນ້ຳສ້າງ. ດັ່ງນັ້ນ ຄົນຮັບໃຊ້ຂອງອັບລາຫາມຈຶ່ງອະທິດຖານເຖິງພະເຢໂຫວາ: ‘ຂໍໃຫ້ຜູ້ຍິງສາວຜູ້ທີ່ເອົານ້ຳໃຫ້ຂ້າພະເຈົ້າແລະຕົວອູດດື່ມເປັນຜູ້ທີ່ພະອົງເລືອກໃຫ້ເປັນເມຍຂອງອີຊາກ.’
ໃນບໍ່ຊ້າ ເລເບກາກໍ່ຍ່າງອອກມາຕັກນ້ຳ. ເມື່ອຄົນຮັບໃຊ້ຂໍດື່ມນ້ຳ ເຂົາເອົາໃຫ້ດື່ມ. ຄັນແລ້ວນາງກໍ່ໄດ້ຕັກນ້ຳໃຫ້ອູດທັງຫຼາຍທີ່ພວມຫິວດື່ມດ້ວຍ. ນັ້ນເປັນວຽກໜັກເພາະວ່າຕົວອູດດື່ມນ້ຳຫຼາຍແທ້ໆ.
ເມື່ອເລເບກາໃຫ້ນ້ຳແລ້ວ ຄົນຮັບໃຊ້ຂອງອັບລາຫາມຖາມເຖິງຊື່ພໍ່ຂອງນາງ. ເຂົາຍັງຖາມອີກວ່າ ຕົນຈະຄ້າງຄືນທີ່ບ້ານຂອງເຂົາໄດ້ບໍ. ເລເບກາກ່າວວ່າ: ‘ພໍ່ຂອງຂ້ອຍຊື່ເບທຶເອນ ແລະທີ່ບ້ານມີທີ່ວ່າງພໍທີ່ທ່ານຈະພັກນຳເຮົາໄດ້.’ ຄົນຮັບໃຊ້ຂອງອັບລາຫາມຮູ້ແລ້ວວ່າເບທຶເອນເປັນລູກຂອງນາໂກເຣອ້າຍຂອງອັບລາຫາມ. ແລ້ວກໍ່ຄູ້ເຂົ່າລົງແລະຂອບຄຸນພະເຢໂຫວາທີ່ພະອົງໄດ້ນຳຕົນໃຫ້ມາເຖິງຍາດພີ່ນ້ອງຂອງອັບລາຫາມ.
ຄ່ຳຄືນນັ້ນເອງຄົນຮັບໃຊ້ຂອງອັບລາຫາມໄດ້ບອກໃຫ້ເບທຶເອນແລະລາບານອ້າຍຂອງເລເບກາໃຫ້ຊາບເຖິງຄວາມມຸ່ງໝາຍທີ່ຕົນໄດ້ມາ. ເຂົາທັງສອງໄດ້ເຫັນດີເຫັນຊອບທີ່ຈະໃຫ້ເລເບກາໄປກັບເຂົາແລະແຕ່ງດອງກັບອີຊາກ. ເລເບກາເວົ້າວ່າຢ່າງໃດ? ເຂົາກ່າວວ່າ: ‘ຍິນດີ’ ທີ່ຈະໄປດ້ວຍ. ດັ່ງນັ້ນເຊົ້າມື້ຕໍ່ມາພວກເຂົາຈຶ່ງຂຶ້ນຂີ່ອູດແລະເລີ່ມເດີນທາງໄກກັບການາອານ.
ເມື່ອພວກເຂົາມາເຖິງກໍ່ເປັນຍາມແລງແລ້ວ. ເລເບກາແລເຫັນຊາຍຄົນນຶ່ງຍ່າງຢູ່ທົ່ງນາ. ຊາຍຜູ້ນັ້ນຄືອີຊາກ. ເຂົາດີໃຈທີ່ໄດ້ເຫັນເລເບກາ. ຊາລາແມ່ຂອງເຂົາຕາຍໄປສາມປີກ່ອນນີ້ເທົ່ານັ້ນ ແລະເຂົາກໍ່ຍັງເສົ້າໃຈໃນເລື່ອງນີ້ຢູ່. ແຕ່ບັດນີ້ອີຊາກຮູ້ສຶກຮັກເລເບກາຫຼາຍແລະເຂົາມີຄວາມສຸກອີກ.
ເລື່ອງທີ່ເຈົ້າອາດຈະມັກ
ສອນລູກໃຫ້ເປັນຄົນດີ
ເລເບກາຢາກເຮັດໃຫ້ພະເຢໂຫວາດີໃຈ
ຖ້າຢາກເປັນຄືກັບເລເບກາ ເຮົາຕ້ອງເຮັດຫຍັງ? ເຊີນອ່ານເລື່ອງຂອງເລເບກາແລະຮຽນຮູ້ຕື່ມອີກກ່ຽວກັບລາວ
