ເຄັດລັບການຄົ້ນຄວ້າ
ພະຍາຍາມຮຽນຮູ້ສິ່ງໃໝ່ໆຕອນທີ່ສຶກສາສ່ວນໂຕ
ກ່ອນຈະເລີ່ມສຶກສາສ່ວນໂຕ ເຮົາອາດຖາມໂຕເອງວ່າ: ‘ຂ້ອຍຄາດໝາຍວ່າຈະໄດ້ຫຍັງຈາກການສຶກສາເທື່ອນີ້?’ ເຖິງວ່າເຮົາຄາດໝາຍໄວ້ແລ້ວວ່າຈະໄດ້ຮຽນບາງຢ່າງ ແຕ່ກໍບໍ່ໄດ້ໝາຍຄວາມວ່າຈະບໍ່ມີເລື່ອງໃໝ່ໆທີ່ພະເຢໂຫວາຈະສອນເຮົາ. ເຮົາຈະເຮັດແນວໃດເພື່ອຈະຟັງສິ່ງທີ່ພະເຢໂຫວາກຳລັງພະຍາຍາມສອນເຮົາ?
ອະທິດຖານຂໍສະຕິປັນຍາ. ຂໍພະເຢໂຫວາຊ່ວຍເຈົ້າໃຫ້ເຂົ້າໃຈວ່າເພິ່ນຢາກສອນຫຍັງເຈົ້າໃນຕອນນີ້. (ຢກບ. 1:5) ຢ່າພໍໃຈແຕ່ກັບສິ່ງທີ່ເຈົ້າຮູ້ຢູ່ແລ້ວ.—ສພສ. 3:5, 6
ໃຫ້ຖ້ອຍຄຳຂອງພະເຈົ້າມີຜົນຕໍ່ຊີວິດເຈົ້າ. “ຖ້ອຍຄຳຂອງພະເຈົ້າມີຊີວິດ.” (ຮຣ. 4:12) ທຸກເທື່ອທີ່ອ່ານຄຳພີໄບເບິນ ເຮົາຈະຮຽນແນວໃໝ່ໆ ແລະຄຳພີໄບເບິນກໍຊ່ວຍຊີວິດເຮົາໃນຫຼາຍດ້ານ. ມັນຈະເປັນແບບນັ້ນຖ້າເຮົາຍອມຮັບວ່າເຮົາຈຳເປັນຕ້ອງຮຽນຮູ້ສິ່ງທີ່ພະເຢໂຫວາກຳລັງສອນເຮົາ.
ເຫັນຄ່າທຸກສິ່ງທີ່ພະເຢໂຫວາຈັດກຽມໄວ້ເພື່ອສອນເຮົາ. ຄວາມຮູ້ທີ່ເສີມຄວາມເຊື່ອເປັນຄືກັບ “ຂອງກິນທີ່ດີ” ທີ່ພະເຢໂຫວາກຽມໃຫ້ເຮົາ. (ອຊຢ. 25:6) ດັ່ງນັ້ນ ໃຫ້ອ່ານທຸກບົດຄວາມເຖິງແມ່ນເຈົ້າຈະຄິດວ່າບາງບົດຄວາມບໍ່ມ່ວນທີ່ຈະສຶກສາ. ຖ້າເຈົ້າຍອມຮັບເອົາການຈັດກຽມທຸກຢ່າງຂອງພະເຢໂຫວາ ເຈົ້າກໍຈະມ່ວນກັບການສຶກສາສ່ວນໂຕແລະໄດ້ຮັບປະໂຫຍດນຳ.
