ບົດຄວາມສຶກສາທີ 38
ເພງທີ 25 ສົມບັດອັນລ້ຳຄ່າຂອງພະເຈົ້າ
ເຈົ້າເອົາໃຈໃສ່ຟັງຄຳເຕືອນບໍ?
“ຜູ້ໜຶ່ງຈະຖືກເອົາໄປ ແຕ່ອີກຜູ້ໜຶ່ງຈະຖືກປະໄວ້.”—ມທ. 24:40
ຈຸດສຳຄັນ
ເຮົາຈະເບິ່ງຕົວຢ່າງປຽບທຽບ 3 ເລື່ອງຂອງພະເຢຊູ ແລະເຮົາຈະເບິ່ງວ່າຕົວຢ່າງເຫຼົ່ານີ້ກ່ຽວຂ້ອງແນວໃດກັບການຕັດສິນທີ່ຈະເກີດຂຶ້ນໃນໄລຍະທ້າຍໆຂອງສະໄໝສຸດທ້າຍ.
1. ອີກບໍ່ດົນພະເຢຊູຈະເຮັດຫຍັງ?
ເຮົາມີຊີວິດຢູ່ໃນໄລຍະທີ່ໜ້າຕື່ນເຕັ້ນຫຼາຍ! ອີກບໍ່ດົນ ພະເຢຊູຈະຕັດສິນທຸກຄົນທີ່ຢູ່ໃນໂລກນີ້. ກ່ອນຈະຮອດຕອນນັ້ນ ເພິ່ນບອກວ່າຈະມີ “ສັນຍານ” ທີ່ບອກໃຫ້ຮູ້ວ່າເພິ່ນກັບມາແລະບອກໃຫ້ຮູ້ວ່າເຮົາຢູ່ໃນ “ສະໄໝສຸດທ້າຍຂອງໂລກນີ້.” (ມທ. 24:3) ໃນປຶ້ມມັດທາຍບົດ 24 ແລະ 25 ແລະມາຣະໂກບົດ 13 ແລະລູກາບົດ 21 ໄດ້ເວົ້າເຖິງສັນຍານເຫຼົ່ານີ້.
2. ເຮົາຈະຮຽນຫຍັງໃນບົດນີ້ ແລະເລື່ອງເຫຼົ່ານີ້ຈະຊ່ວຍເຮົາແນວໃດ?
2 ພະເຢຊູໃຊ້ຕົວຢ່າງປຽບທຽບ 3 ເລື່ອງເພື່ອເຕືອນເຮົາ ເຊິ່ງກໍຄືຕົວຢ່າງປຽບທຽບເລື່ອງແກະກັບແບ້ ເລື່ອງຜູ້ສາວບໍລິສຸດທີ່ສະຫຼາດກັບຜູ້ສາວບໍລິສຸດທີ່ໂງ່ ແລະເລື່ອງເງິນຕະລັນ. ແຕ່ລະເລື່ອງຊ່ວຍເຮົາໃຫ້ເຂົ້າໃຈວ່າພະເຢຊູຈະຕັດສິນແຕ່ລະຄົນຕາມການກະທຳຂອງລາວ. ໃນບົດນີ້ ເຮົາຈະເບິ່ງຕົວຢ່າງປຽບທຽບເຫຼົ່ານີ້ແລະເບິ່ງວ່າເຮົາຈະໄດ້ບົດຮຽນຫຍັງ. ເລື່ອງທຳອິດທີ່ເຮົາຈະເບິ່ງແມ່ນເລື່ອງແກະກັບແບ້.
ແກະກັບແບ້
3. ພະເຢຊູຈະຕັດສິນວ່າໃຜເປັນແກະຫຼືເປັນແບ້ຕອນໃດ?
3 ໃນຕົວຢ່າງປຽບທຽບເລື່ອງແກະກັບແບ້ ພະເຢຊູບອກວ່າເພິ່ນຈະຕັດສິນຄົນໂດຍເບິ່ງວ່າເຂົາເຈົ້າຍອມຮັບເອົາຂ່າວດີບໍ່ ແລະເຂົາເຈົ້າສະໜັບສະໜູນຜູ້ຖືກເລືອກຫຼືບໍ່. (ມທ. 25:31-46) ໃນໄລຍະ “ຄວາມທຸກລຳບາກຄັ້ງໃຫຍ່” ພະເຢຊູຈະຕັດສິນວ່າໃຜເປັນແກະຫຼືເປັນແບ້ກ່ອນສົງຄາມອາມາເຄໂດນເລີ່ມຕົ້ນ. (ມທ. 24:21) ຄືກັບທີ່ຜູ້ລ້ຽງແກະແຍກແກະອອກຈາກແບ້ ພະເຢຊູກໍຈະແຍກຄົນທີ່ສະໜັບສະໜູນຜູ້ຖືກເລືອກຢ່າງສັດຊື່ອອກຈາກຄົນທີ່ບໍ່ໄດ້ເຮັດແບບນັ້ນ.
4. ຕາມເອຊາຢາ 11:3, 4 ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢຊູຈະຕັດສິນຢ່າງຍຸຕິທຳ? (ເບິ່ງຮູບໜ້າປົກນຳ)
4 ຄຳພີໄບເບິນບອກວ່າພະເຢຊູຜູ້ຕັດສິນທີ່ພະເຢໂຫວາແຕ່ງຕັ້ງຈະຕັດສິນຢ່າງຍຸຕິທຳ. (ອ່ານເອຊາຢາ 11:3, 4) ເພິ່ນສັງເກດເບິ່ງຄວາມຄິດ ຄຳເວົ້າ ແລະການກະທຳຂອງທຸກຄົນ ລວມທັງວິທີທີ່ເຂົາເຈົ້າປະຕິບັດກັບຜູ້ຖືກເລືອກ. (ມທ. 12:36, 37; 25:40) ພະເຢຊູຈະຮູ້ວ່າໃຜສະໜັບສະໜູນຜູ້ຖືກເລືອກແລະວຽກຂອງເຂົາເຈົ້າ. a ວິທີໜຶ່ງທີ່ສຳຄັນຫຼາຍທີ່ຈະສະໜັບສະໜູນຜູ້ຖືກເລືອກແມ່ນການຊ່ວຍເຂົາເຈົ້າໃນວຽກປະກາດ. ຄົນທີ່ເຮັດແບບນັ້ນຈະຖືກຕັດສິນວ່າເປັນ “ຄົນທີ່ເຮັດສິ່ງທີ່ຖືກຕ້ອງ” ແລະຈະມີໂອກາດທີ່ຈະມີ “ຊີວິດຕະຫຼອດໄປ” ຢູ່ໃນໂລກ. (ມທ. 25:46, ໄຂເງື່ອນ; ພນມ. 7:16, 17) ນີ້ເປັນລາງວັນທີ່ດີແທ້ໆສຳລັບຜູ້ທີ່ຮັກສາຄວາມສັດຊື່! ຖ້າເຂົາເຈົ້າສັດຊື່ຕໍ່ໆໄປໃນໄລຍະຄວາມທຸກລຳບາກຄັ້ງໃຫຍ່ແລະຫຼັງຈາກນັ້ນ ຊື່ຂອງເຂົາເຈົ້າກໍຈະຍັງຢູ່ໃນ “ປຶ້ມລາຍຊື່ຄົນທີ່ຈະໄດ້ຊີວິດ.”—ພນມ. 20:15
ໃນອະນາຄົດໃກ້ໆນີ້ ພະເຢຊູຈະຕັດສິນວ່າໃຜເປັນແກະຫຼືເປັນແບ້ (ເບິ່ງຂໍ້ 4)
5. ຕົວຢ່າງປຽບທຽບເລື່ອງແກະກັບແບ້ກະຕຸ້ນເຮົາໃຫ້ເປັນຄົນແບບໃດ? ແລະໃຜແດ່ທີ່ຈະໄດ້ຮັບປະໂຫຍດຈາກຕົວຢ່າງປຽບທຽບນີ້?
5 ພິສູດວ່າເປັນຄົນທີ່ສັດຊື່ແລະພັກດີ. ຕົວຢ່າງປຽບທຽບຂອງພະເຢຊູເລື່ອງແກະກັບແບ້ແມ່ນສຳລັບຜູ້ທີ່ມີຄວາມຫວັງທີ່ຈະມີຊີວິດຕະຫຼອດໄປໃນໂລກ. ຄົນເຫຼົ່ານີ້ສະແດງຄວາມເຊື່ອໂດຍຊ່ວຍຜູ້ຖືກເລືອກໃນວຽກປະກາດແລະເຮັດຕາມການຊີ້ນຳຂອງທາດທີ່ສັດຊື່ແລະສຸຂຸມເຊິ່ງເປັນຄົນກຸ່ມນ້ອຍໆທີ່ພະເຢຊູເລືອກ. (ມທ. 24:45) ຄົນທີ່ມີຄວາມຫວັງທີ່ຈະໄປສະຫວັນກໍຕ້ອງເອົາໃຈໃສ່ຟັງຄຳເຕືອນທີ່ຢູ່ໃນຕົວຢ່າງປຽບທຽບນີ້ຄືກັນ. ຍ້ອນຫຍັງ? ຍ້ອນພະເຢຊູສັງເກດເບິ່ງຄວາມຄິດ ຄຳເວົ້າ ແລະການກະທຳຂອງເຂົາເຈົ້າ. ເຂົາເຈົ້າຕ້ອງພິສູດວ່າເປັນຄົນທີ່ສັດຊື່ຄືກັນ. ທີ່ຈິງ ພະເຢຊູເວົ້າເຖິງຕົວຢ່າງປຽບທຽບອີກ 2 ເລື່ອງທີ່ກ່ຽວຂ້ອງກັບຜູ້ຖືກເລືອກໂດຍສະເພາະ. ຕົວຢ່າງ 2 ເລື່ອງນີ້ຢູ່ໃນມັດທາຍບົດ 25. ໃຫ້ເຮົາມາເບິ່ງຕົວຢ່າງປຽບທຽບເລື່ອງທຳອິດນຳກັນ ເຊິ່ງແມ່ນເລື່ອງຜູ້ສາວບໍລິສຸດທີ່ສະຫຼາດກັບຜູ້ສາວບໍລິສຸດທີ່ໂງ່.
ຜູ້ສາວບໍລິສຸດທີ່ສະຫຼາດກັບຜູ້ສາວບໍລິສຸດທີ່ໂງ່
6. ຜູ້ສາວບໍລິສຸດ 5 ຄົນສະແດງໃຫ້ເຫັນແນວໃດວ່າເຂົາເຈົ້າເປັນຄົນສະຫຼາດ? (ມັດທາຍ 25:6-10)
6 ໃນຕົວຢ່າງປຽບທຽບເລື່ອງຜູ້ສາວບໍລິສຸດ ພະເຢຊູເວົ້າເຖິງຜູ້ສາວບໍລິສຸດ 10 ຄົນທີ່ອອກໄປຕ້ອນຮັບເຈົ້າບ່າວ. (ມທ. 25:1-4) ເຂົາເຈົ້າລໍຖ້າທີ່ຈະເຂົ້າໄປໃນງານແຕ່ງດອງພ້ອມກັບເຈົ້າບ່າວ. ພະເຢຊູເວົ້າວ່າ ຜູ້ສາວບໍລິສຸດ 5 ຄົນເປັນ “ຄົນສະຫຼາດ” ແລະອີກ 5 ຄົນເປັນ “ຄົນໂງ່.” ຜູ້ສາວທີ່ສະຫຼາດກຽມພ້ອມແລະຕື່ນໂຕຢູ່ສະເໝີ. ເຂົາເຈົ້າກຽມພ້ອມທີ່ຈະຖ້າເຈົ້າບ່າວເຖິງວ່າຈະດົນແລະເດິກສ່ຳໃດກໍຕາມ. ເຂົາເຈົ້າເອົາຕະກຽງໄປນຳແລະຍັງເອົານ້ຳມັນໄປເພື່ອອີກຍ້ອນຢ້ານວ່າເຈົ້າບ່າວຈະມາຊ້າ. ເຂົາເຈົ້າກຽມພ້ອມເພື່ອໃຫ້ຕະກຽງຮຸ່ງຢູ່ຕະຫຼອດ. (ອ່ານມັດທາຍ 25:6-10) ເມື່ອເຈົ້າບ່າວມາຮອດ ຜູ້ສາວທີ່ສະຫຼາດກໍເຂົ້າໄປໃນງານແຕ່ງດອງພ້ອມກັບເຈົ້າບ່າວ. ຄ້າຍຄືກັນ ຜູ້ຖືກເລືອກກໍຕ້ອງກຽມພ້ອມແລະຕື່ນໂຕຢູ່ສະເໝີແລະສັດຊື່ຈົນຮອດຕອນທີ່ພະເຢຊູມາ ແລ້ວເຂົາເຈົ້າຈະໄດ້ລາງວັນໂດຍໄດ້ຮ່ວມປົກຄອງກັບພະເຢຊູໃນການປົກຄອງທີ່ຢູ່ໃນສະຫວັນ. b (ພນມ. 7:1-3) ຜູ້ສາວ 5 ຄົນທີ່ໂງ່ເດເປັນແນວໃດ?
7. ເກີດຫຍັງຂຶ້ນກັບຜູ້ສາວບໍລິສຸດ 5 ຄົນທີ່ໂງ່ ແລະຍ້ອນຫຍັງຈຶ່ງເປັນແບບນັ້ນ?
7 ຜູ້ສາວບໍລິສຸດ 5 ຄົນທີ່ໂງ່ຕ່າງຈາກຜູ້ສາວບໍລິສຸດທີ່ສະຫຼາດ. ຜູ້ສາວທີ່ໂງ່ບໍ່ໄດ້ກຽມພ້ອມຕອນທີ່ເຈົ້າບ່າວມາຮອດ. ຕະກຽງຂອງເຂົາເຈົ້າກຳລັງຊິມອດ ແລະເຂົາເຈົ້າກໍບໍ່ໄດ້ເອົານ້ຳມັນໄປເພື່ອ. ເມື່ອຮູ້ວ່າເຈົ້າບ່າວໃກ້ຈະມາຮອດແລ້ວ ເຂົາເຈົ້າພັດຕ້ອງອອກໄປຊອກຊື້ນ້ຳມັນ. ເຂົາເຈົ້າຈຶ່ງກັບມາບໍ່ທັນຕອນທີ່ເຈົ້າບ່າວມາຮອດ. ແຕ່ “ພວກຜູ້ສາວທີ່ກຽມພ້ອມກໍໄດ້ເຂົ້າໄປໃນງານແຕ່ງດອງກັບເຈົ້າບ່າວ ແລ້ວປະຕູກໍປິດ.” (ມທ. 25:10) ຕໍ່ມາ ເມື່ອຜູ້ສາວທີ່ໂງ່ກັບມາແລະຢາກເຂົ້າໄປໃນງານແຕ່ງດອງ ເຈົ້າບ່າວກໍບອກເຂົາເຈົ້າວ່າ: “ຂ້ອຍບໍ່ຮູ້ຈັກພວກເຈົ້າ.” (ມທ. 25:11, 12) ຜູ້ສາວທີ່ໂງ່ບໍ່ໄດ້ກຽມໂຕໃຫ້ດີພໍທີ່ຈະຖ້າເຈົ້າບ່າວ. ຜູ້ຖືກເລືອກໄດ້ບົດຮຽນຫຍັງຈາກເລື່ອງນີ້?
8-9. ຜູ້ຖືກເລືອກໄດ້ບົດຮຽນຫຍັງຈາກຕົວຢ່າງປຽບທຽບເລື່ອງຜູ້ສາວບໍລິສຸດ? (ເບິ່ງຮູບນຳ)
8 ພິສູດວ່າເປັນຄົນທີ່ກຽມພ້ອມແລະຕື່ນໂຕຢູ່ສະເໝີ. ພະເຢຊູບໍ່ໄດ້ບອກລ່ວງໜ້າວ່າຈະມີຜູ້ຖືກເລືອກ 2 ກຸ່ມ ກຸ່ມໜຶ່ງແມ່ນຄົນທີ່ກຽມພ້ອມສະເໝີຈົນຮອດເວລາທີ່ພະເຢຊູມາຕອນຄວາມທຸກລຳບາກຄັ້ງໃຫຍ່ ແລະອີກກຸ່ມໜຶ່ງແມ່ນຄົນທີ່ບໍ່ໄດ້ກຽມພ້ອມ. ແຕ່ພະເຢຊູກຳລັງອະທິບາຍວ່າຈະເກີດຫຍັງຂຶ້ນກັບຜູ້ຖືກເລືອກຖ້າເຂົາເຈົ້າບໍ່ໄດ້ກຽມພ້ອມທີ່ຈະອົດທົນຢ່າງສັດຊື່ຈົນເຖິງທີ່ສຸດ. ຖ້າເຂົາເຈົ້າບໍ່ກຽມພ້ອມ ເຂົາເຈົ້າກໍຈະບໍ່ໄດ້ຮັບລາງວັນ ເຊິ່ງເປັນຕາເສຍດາຍແທ້ໆ! (ຢຮ. 14:3, 4) ບໍ່ວ່າເຮົາມີຄວາມຫວັງທີ່ຈະໄປສະຫວັນຫຼືມີຊີວິດຢູ່ໃນໂລກນີ້ ເຮົາທຸກຄົນຄວນເອົາໃຈໃສ່ຄຳເຕືອນທີ່ໄດ້ຈາກຕົວຢ່າງປຽບທຽບເລື່ອງຜູ້ສາວບໍລິສຸດ. ເຮົາແຕ່ລະຄົນຕ້ອງເຝົ້າລະວັງແລະກຽມພ້ອມທີ່ຈະອົດທົນຈົນເຖິງທີ່ສຸດ.—ມທ. 24:13
9 ຫຼັງຈາກພະເຢຊູເວົ້າເຖິງຕົວຢ່າງປຽບທຽບເລື່ອງຜູ້ສາວບໍລິສຸດເພື່ອເນັ້ນວ່າຕ້ອງກຽມພ້ອມແລະຕື່ນໂຕຢູ່ສະເໝີ ເພິ່ນກໍເວົ້າເຖິງຕົວຢ່າງປຽບທຽບເລື່ອງເງິນຕະລັນທີ່ເນັ້ນຄວາມສຳຄັນຂອງການເປັນຄົນດຸໝັ່ນ.
ເຮົາແຕ່ລະຄົນຕ້ອງເອົາໃຈໃສ່ຄຳເຕືອນໃນຕົວຢ່າງປຽບທຽບເລື່ອງຜູ້ສາວບໍລິສຸດໂດຍກຽມພ້ອມແລະຕື່ນໂຕຢູ່ສະເໝີເພື່ອຈະອົດທົນຈົນເຖິງທີ່ສຸດ (ເບິ່ງຂໍ້ 8-9)
ເງິນຕະລັນ
10. ທາດ 2 ຄົນພິສູດໃຫ້ເຫັນແນວໃດວ່າເປັນຄົນສັດຊື່? (ມັດທາຍ 25:19-23)
10 ໃນຕົວຢ່າງປຽບທຽບເລື່ອງເງິນຕະລັນ ພະເຢຊູເວົ້າເຖິງທາດ 2 ຄົນທີ່ສັດຊື່ຕໍ່ນາຍແລະທາດອີກຄົນໜຶ່ງທີ່ບໍ່ສັດຊື່. (ມທ. 25:14-18) ທາດ 2 ຄົນພິສູດວ່າເປັນຄົນສັດຊື່ໂດຍເຮັດວຽກໜັກເພື່ອໃຫ້ນາຍໄດ້ເງິນຫຼາຍຂຶ້ນ. ກ່ອນທີ່ນາຍຈະເດີນທາງໄປຕ່າງປະເທດ ລາວເອົາເງິນຕະລັນໃຫ້ເຂົາເຈົ້າເຊິ່ງເປັນເງິນຈຳນວນຫຼາຍ. ທາດທີ່ສັດຊື່ທັງສອງຄົນເປັນຄົນດຸໝັ່ນແລະເອົາເງິນໄປຄ້າຂາຍຈົນໄດ້ກຳໄລ. ຜົນກໍຄື ເມື່ອນາຍກັບມາ ເຂົາເຈົ້າເຮັດໃຫ້ເງິນເພີ່ມຂຶ້ນເປັນ 2 ເທົ່າ. ນາຍຊົມເຊີຍເຂົາເຈົ້າ ເຂົາເຈົ້າຈຶ່ງໄດ້ “ຮ່ວມຍິນດີນຳກັນກັບ [ນາຍຂອງເຂົາເຈົ້າ].” (ອ່ານມັດທາຍ 25:19-23) ແຕ່ທາດຜູ້ທີ 3 ເດເປັນແນວໃດ? ລາວເຮັດຫຍັງກັບເງິນທີ່ນາຍເອົາໃຫ້?
11. ເກີດຫຍັງຂຶ້ນກັບທາດທີ່ “ຂີ້ຄ້ານ” ແລະຍ້ອນຫຍັງຈຶ່ງເປັນແບບນັ້ນ?
11 ທາດຜູ້ທີ 3 ໄດ້ເງິນ 1 ຕະລັນ ແຕ່ລາວ “ຂີ້ຄ້ານ.” ນາຍຄາດໝາຍໃຫ້ລາວເອົາເງິນໄປຄ້າຂາຍ ແຕ່ລາວພັດເອົາເງິນນັ້ນໄປຝັງໄວ້ໃນດິນ. ເມື່ອນາຍກັບມາ ທາດຜູ້ນີ້ກໍເອົາເງິນຕະລັນນັ້ນສົ່ງຄືນໃຫ້ນາຍ ແລະລາວຍັງມີຄວາມຄິດທີ່ບໍ່ດີນຳ. ແທນທີ່ຈະຂໍໂທດນາຍທີ່ບໍ່ໄດ້ເຮັດໃຫ້ເງິນຂອງນາຍເພີ່ມຂຶ້ນ ລາວພັດເວົ້າໃຫ້ນາຍວ່າ: “ເປັນຄົນມັກຮຽກຮ້ອງຈາກຄົນອື່ນ.” ນາຍບໍ່ພໍໃຈທາດຜູ້ນີ້ຫຼາຍ. ບໍ່ພຽງແຕ່ເທົ່ານັ້ນ ນາຍເອົາເງິນຕະລັນຈາກລາວແລະໄລ່ລາວອອກຈາກເຮືອນຂອງນາຍ.—ມທ. 25:24, 26-30
12. ທາດທີ່ສັດຊື່ 2 ຄົນໝາຍເຖິງໃຜໃນທຸກມື້ນີ້?
12 ທາດທີ່ສັດຊື່ 2 ຄົນໝາຍເຖິງຜູ້ຖືກເລືອກທີ່ຮັບໃຊ້ຢ່າງສັດຊື່. ນາຍໝາຍເຖິງພະເຢຊູ. ເພິ່ນຊວນເຂົາເຈົ້າໃຫ້ “ຮ່ວມຍິນດີນຳກັນ” ໂດຍປຸກເຂົາເຈົ້າໃຫ້ຄືນມາຈາກຕາຍເປັນລຳດັບທຳອິດແລະໃຫ້ເຂົາເຈົ້າໄດ້ຮັບລາງວັນໃນສະຫວັນ. (ມທ. 25:21, 23; ພນມ. 20:5ກ) ແຕ່ຕົວຢ່າງທີ່ບໍ່ດີຂອງທາດທີ່ຂີ້ຄ້ານກໍເຕືອນຜູ້ຖືກເລືອກຄືກັນ. ເຂົາເຈົ້າຕ້ອງລະວັງເລື່ອງຫຍັງ?
13-14. ຜູ້ຖືກເລືອກໄດ້ບົດຮຽນຫຍັງຈາກຕົວຢ່າງປຽບທຽບເລື່ອງເງິນຕະລັນ? (ເບິ່ງຮູບນຳ)
13 ພິສູດວ່າເປັນຄົນດຸໝັ່ນແລະຫ້າວຫັນ. ໃນຕົວຢ່າງປຽບທຽບເລື່ອງຜູ້ສາວບໍລິສຸດແລະເລື່ອງເງິນຕະລັນ ພະເຢຊູບໍ່ໄດ້ບອກລ່ວງໜ້າວ່າຜູ້ຖືກເລືອກຈະຂີ້ຄ້ານ ແຕ່ເພິ່ນກຳລັງອະທິບາຍວ່າຈະເກີດຫຍັງຂຶ້ນຖ້າຜູ້ຖືກເລືອກໝົດຄວາມກະຕືລືລົ້ນ. ຖ້າເຂົາເຈົ້າເປັນແບບນັ້ນ ເຂົາເຈົ້າຈະບໍ່ຖືກ “ພະເຈົ້າເອີ້ນແລະເລືອກ” ແລະເຂົາເຈົ້າຈະບໍ່ມີສ່ວນໃນການປົກຄອງທີ່ຢູ່ໃນສະຫວັນ.—2ປຕ. 1:10
14 ຕົວຢ່າງປຽບທຽບຂອງພະເຢຊູເລື່ອງຜູ້ສາວບໍລິສຸດແລະເລື່ອງເງິນຕະລັນເຮັດໃຫ້ເຫັນແຈ້ງວ່າຜູ້ຖືກເລືອກທຸກຄົນຕ້ອງກຽມພ້ອມແລະຕື່ນໂຕຢູ່ສະເໝີແລະຍັງຕ້ອງດຸໝັ່ນແລະຫ້າວຫັນນຳ. ແຕ່ມີເລື່ອງຫຍັງອີກບໍທີ່ພະເຢຊູເຕືອນຜູ້ຖືກເລືອກ? ມີແທ້. ຄຳເຕືອນຂອງເພິ່ນໃນມັດທາຍ 24:40, 41 ຍັງກ່ຽວຂ້ອງກັບການຕັດສິນຄັ້ງສຸດທ້າຍສຳລັບຜູ້ຖືກເລືອກ.
ພະເຢຊູສົນໃຈວ່າຜູ້ຖືກເລືອກແຕ່ລະຄົນຈະພິສູດວ່າເປັນຄົນດຸໝັ່ນແລະຫ້າວຫັນຫຼືບໍ່ (ເບິ່ງຂໍ້ 13-14) d
ໃຜ “ຈະຖືກເອົາໄປ”?
15-16. ມັດທາຍ 24:40, 41 ເຮັດໃຫ້ເຫັນແນວໃດວ່າຜູ້ຖືກເລືອກຕ້ອງເຝົ້າລະວັງຢູ່ສະເໝີ?
15 ກ່ອນພະເຢຊູເລົ່າຕົວຢ່າງປຽບທຽບທັງສາມເລື່ອງ ເພິ່ນເວົ້າເຖິງການຕັດສິນຄັ້ງສຸດທ້າຍສຳລັບຜູ້ຖືກເລືອກເພື່ອບອກໃຫ້ຮູ້ວ່າແມ່ນໃຜທີ່ພະເຈົ້າຍອມຮັບ. ພະເຢຊູເວົ້າເຖິງຜູ້ຊາຍ 2 ຄົນທີ່ເຮັດວຽກຢູ່ທົ່ງນາແລະຜູ້ຍິງ 2 ຄົນທີ່ກຳລັງບົດແປ້ງ. ໃນ 2 ເຫດການນີ້ ເຂົາເຈົ້າກຳລັງເຮັດວຽກຢູ່. ແຕ່ພະເຢຊູບອກວ່າ: “ຜູ້ໜຶ່ງຈະຖືກເອົາໄປ ແຕ່ອີກຜູ້ໜຶ່ງຈະຖືກປະໄວ້.” (ອ່ານມັດທາຍ 24:40, 41) ຫຼັງຈາກເລົ່າເລື່ອງນີ້ແລ້ວ ເພິ່ນກະຕຸ້ນພວກລູກສິດຂອງເພິ່ນວ່າ: “ໃຫ້ເຝົ້າລະວັງຢູ່ສະເໝີ ຍ້ອນພວກເຈົ້າບໍ່ຮູ້ວ່າຜູ້ເປັນນາຍຂອງພວກເຈົ້າຈະມາມື້ໃດ.” (ມທ. 24:42) ພະເຢຊູເວົ້າຄ້າຍໆກັນນີ້ຕອນທີ່ເພິ່ນເລົ່າຕົວຢ່າງປຽບທຽບເລື່ອງຜູ້ສາວບໍລິສຸດ. (ມທ. 25:13) ສອງເລື່ອງນີ້ກ່ຽວຂ້ອງກັນບໍ? ເບິ່ງຄືວ່າກ່ຽວຂ້ອງກັນ. ມີແຕ່ຜູ້ທີ່ຖືກເລືອກແທ້ໆແລະຮັກສາຄວາມສັດຊື່ເທົ່ານັ້ນທີ່ພະເຢຊູຈະ “ເອົາໄປ” ຮ່ວມໃນການປົກຄອງທີ່ຢູ່ໃນສະຫວັນ.—ຢຮ. 14:3
16 ພິສູດວ່າເປັນຄົນທີ່ເຝົ້າລະວັງຢູ່ສະເໝີ. ຖ້າຜູ້ຖືກເລືອກບໍ່ເຝົ້າລະວັງຢູ່ສະເໝີ ລາວຈະບໍ່ຖືກລວມຢູ່ກັບ “ຄົນທີ່ພະເຈົ້າເລືອກໄວ້.” (ມທ. 24:31) ທຸກຄົນທີ່ເປັນຜູ້ຮັບໃຊ້ຂອງພະເຢໂຫວາ ບໍ່ວ່າຈະມີຄວາມຫວັງແບບໃດຄວນເອົາໃຈໃສ່ຄຳເຕືອນຂອງພະເຢຊູທີ່ໃຫ້ເຝົ້າລະວັງຢູ່ສະເໝີແລະຮັກສາຄວາມສັດຊື່ຕໍ່ໆໄປ.
17. ເປັນຫຍັງເຮົາບໍ່ຄວນສົງໄສຖ້າພະເຢໂຫວາຈະເລືອກບາງຄົນໃຫ້ເປັນຜູ້ຖືກເລືອກໃນບໍ່ເທົ່າໃດປີມານີ້?
17 ເຮົາຮູ້ຈັກພະເຢໂຫວາດີ ເຮົາຈຶ່ງໄວ້ໃຈການຕັດສິນຂອງເພິ່ນ. ເຮົາຈະບໍ່ສົງໄສຖ້າເພິ່ນຈະເລືອກບາງຄົນໃຫ້ເປັນຜູ້ຖືກເລືອກໃນບໍ່ເທົ່າໃດປີມານີ້. c ໃຫ້ຄິດເຖິງຕົວຢ່າງປຽບທຽບຂອງພະເຢຊູກ່ຽວກັບຄົນທີ່ເຮັດວຽກຢູ່ສວນໝາກລະແຊັງໃນຊົ່ວໂມງສຸດທ້າຍ. (ມທ. 20:1-16) ຄົນທີ່ຖືກຊວນໃຫ້ມາເຮັດວຽກຢູ່ສວນໝາກລະແຊັງຕອນແລງໄດ້ຄ່າຈ້າງສ່ຳກັບຄົນທີ່ເຮັດວຽກກ່ອນໜ້ານັ້ນ. ຄ້າຍຄືກັນ ບໍ່ວ່າຜູ້ຖືກເລືອກຈະຖືກເລືອກຕອນໃດ ເຂົາເຈົ້າຈະໄດ້ຮັບລາງວັນໃນສະຫວັນຄືກັນຖ້າເຂົາເຈົ້າຮັກສາຄວາມສັດຊື່ຕໍ່ໆໄປ.
ເອົາໃຈໃສ່ຟັງຄຳເຕືອນ
18-19. ເຮົາໄດ້ບົດຮຽນແລະຄຳເຕືອນຫຍັງ?
18 ເຮົາໄດ້ຮຽນຫຍັງແດ່ແລ້ວ? ສຳລັບຄົນທີ່ມີຄວາມຫວັງທີ່ຈະມີຊີວິດຕະຫຼອດໄປໃນໂລກ ຕົວຢ່າງປຽບທຽບເລື່ອງແກະກັບແບ້ເນັ້ນເຖິງຄວາມສຳຄັນທີ່ເຮົາຕ້ອງຮັກສາຄວາມສັດຊື່ແລະພັກດີຕໍ່ພະເຢໂຫວາສະເໝີທັງໃນຕອນນີ້ແລະໃນໄລຍະຄວາມທຸກລຳບາກຄັ້ງໃຫຍ່. ກ່ອນສົງຄາມອາມາເຄໂດນ ພະເຢຊູຈະຕັດສິນວ່າຄົນທີ່ສັດຊື່ສົມຄວນຈະໄດ້ຮັບ “ຊີວິດຕະຫຼອດໄປ.”—ມທ. 25:46
19 ເຮົາຍັງໄດ້ຮຽນກ່ຽວກັບຕົວຢ່າງປຽບທຽບອີກ 2 ເລື່ອງທີ່ເປັນຄຳເຕືອນສຳລັບຜູ້ຖືກເລືອກ. ໃນຕົວຢ່າງປຽບທຽບເລື່ອງຜູ້ສາວບໍລິສຸດທີ່ສະຫຼາດແລະຜູ້ສາວບໍລິສຸດທີ່ໂງ່ ມີ 5 ຄົນເປັນຄົນສະຫຼາດ. ເຂົາເຈົ້າກຽມພ້ອມແລະຕື່ນໂຕຢູ່ສະເໝີເພື່ອຈະລໍຖ້າເຈົ້າບ່າວບໍ່ວ່າຈະຕ້ອງຖ້າດົນປານໃດກໍຕາມ. ແຕ່ຜູ້ສາວບໍລິສຸດທີ່ໂງ່ບໍ່ໄດ້ກຽມພ້ອມ. ເມື່ອເຈົ້າບ່າວມາຮອດ ລາວຈຶ່ງບໍ່ຍອມໃຫ້ເຂົາເຈົ້າເຂົ້າໄປໃນງານແຕ່ງດອງນຳ. ເຮົາກໍຕ້ອງກຽມພ້ອມຄືກັນເພື່ອຈະລໍຖ້າພະເຢຊູມາຕັດສິນໂລກຊົ່ວນີ້ບໍ່ວ່າຈະຕ້ອງຖ້າດົນປານໃດກໍຕາມ. ໃນຕົວຢ່າງປຽບທຽບເລື່ອງເງິນຕະລັນ ເຮົາໄດ້ຮຽນວ່າທາດທີ່ສັດຊື່ 2 ຄົນດຸໝັ່ນແລະຫ້າວຫັນ. ເຂົາເຈົ້າເຮັດວຽກໜັກເພື່ອນາຍແລະເຮັດໃຫ້ນາຍພໍໃຈ ແຕ່ທາດທີ່ຂີ້ຄ້ານຖືກໄລ່ອອກຈາກເຮືອນ. ເຮົາໄດ້ບົດຮຽນຫຍັງ? ເຮົາຕ້ອງດຸໝັ່ນເຮັດວຽກຮັບໃຊ້ພະເຢໂຫວາຈົນເຖິງທີ່ສຸດ. ໃນເລື່ອງສຸດທ້າຍ ເຮົາໄດ້ຮຽນວ່າຜູ້ຖືກເລືອກຕ້ອງເຝົ້າລະວັງຢູ່ສະເໝີເພື່ອເຂົາເຈົ້າຈະຖືກພະເຢຊູເອົາໄປເພື່ອຮັບລາງວັນຢູ່ສະຫວັນ. ເຂົາເຈົ້າລໍຖ້າດ້ວຍໃຈຈົດໃຈຈໍ່ທີ່ຈະຖືກລວບລວມ “ໃຫ້ໄປຢູ່ກັບ” ພະເຢຊູໃນສະຫວັນ. ຫຼັງຈາກສົງຄາມອາມາເຄໂດນ ເຂົາເຈົ້າຈະເປັນເຈົ້າສາວຂອງພະເຢຊູໃນງານແຕ່ງດອງຂອງແກະນ້ອຍຂອງພະເຈົ້າ.—2ທຊ. 2:1; ພນມ. 19:9
20. ພະເຢໂຫວາຈະເຮັດຫຍັງສຳລັບຄົນທີ່ເອົາໃຈໃສ່ຟັງຄຳເຕືອນຂອງເພິ່ນ?
20 ເວລາທີ່ພະເຢຊູຈະຕັດສິນໃກ້ເຂົ້າມາແລ້ວ ແຕ່ເຮົາບໍ່ຕ້ອງຢ້ານ. ຖ້າເຮົາຮັກສາຄວາມສັດຊື່ຢູ່ສະເໝີ ພະເຢໂຫວາພໍ່ທີ່ມີຄວາມຮັກຈະໃຫ້ເຮົາມີ “ກຳລັງທີ່ຫຼາຍກວ່າປົກກະຕິ” ເພື່ອເຮົາ “ຈະລອດ . . . ແລະຢືນຢູ່ຕໍ່ໜ້າລູກມະນຸດໄດ້.” (2ກຣ. 4:7; ລກ. 21:36) ບໍ່ວ່າເຮົາມີຄວາມຫວັງທີ່ຈະໄປສະຫວັນຫຼືມີຊີວິດຢູ່ໃນໂລກນີ້ ເຮົາສາມາດເຮັດໃຫ້ພະເຢໂຫວາພໍໃຈໄດ້ຖ້າເຮົາເອົາໃຈໃສ່ຟັງຄຳເຕືອນທີ່ຢູ່ໃນຕົວຢ່າງປຽບທຽບຂອງພະເຢຊູ. ຍ້ອນຄວາມກະລຸນາທີ່ຍິ່ງໃຫຍ່ຂອງພະເຢໂຫວາ ຊື່ຂອງເຮົາຈະຖືກຂຽນໄວ້ໃນ “ປຶ້ມລາຍຊື່ຄົນທີ່ຈະໄດ້ຊີວິດ.”—ດນອ. 12:1; ພນມ. 3:5
ເພງທີ 26 ເຈົ້າໄດ້ເຮັດດີກັບເຮົາເຊັ່ນກັນ
a ເບິ່ງບົດຄວາມ “ເຮົາຮູ້ຫຍັງແດ່ກ່ຽວກັບການຕັດສິນຂອງພະເຢໂຫວາໃນອະນາຄົດ?” ໃນຫໍສັງເກດການເດືອນພຶດສະພາ ປີ 2024.
b ສຳລັບຂໍ້ມູນເພີ່ມເຕີມ ເບິ່ງບົດຄວາມ “ເຈົ້າຈະ ‘ເຝົ້າລະວັງຢູ່ສະເໝີ’ ບໍ?” ໃນຫໍສັງເກດການ 15 ມີນາ 2015. (ພາສາໄທ)
d ຄຳອະທິບາຍຮູບ: ພີ່ນ້ອງຍິງທີ່ເປັນຜູ້ຖືກເລືອກສຶກສາກັບຜູ້ຍິງຄົນໜຶ່ງທີ່ລາວເຈິຕອນໄປປະກາດ.
