ບົດຄວາມສຶກສາທີ 36
ເພງທີ 89 ຟັງ ເຮັດຕາມ ແລ້ວຈະໄດ້ພອນ
“ໃຫ້ເຮັດຕາມຄຳສອນຂອງພະເຈົ້າສະເໝີ”
“ໃຫ້ເຮັດຕາມຄຳສອນຂອງພະເຈົ້າສະເໝີ. ຢ່າເປັນແຕ່ຜູ້ຟັງ.”—ຢກບ. 1:22
ຈຸດສຳຄັນ
ບົດນີ້ຈະຊ່ວຍເຮົາໃຫ້ຢາກອ່ານຄຳພີໄບເບິນທຸກມື້ ຄິດຕຶກຕອງ ແລະເອົາສິ່ງທີ່ໄດ້ອ່ານໄປໃຊ້ໃນຊີວິດໃຫ້ຫຼາຍຂຶ້ນ.
1-2. ອັນໃດເຮັດໃຫ້ຜູ້ນະມັດສະການຂອງພະເຢໂຫວາມີຄວາມສຸກ? (ຢາໂກໂບ 1:22-25)
ພະເຢໂຫວາແລະພະເຢຊູຢາກໃຫ້ເຮົາມີຄວາມສຸກ. ຜູ້ຂຽນເພງສັນລະເສີນ 119:2 ເວົ້າວ່າ: “ຄົນທີ່ເຮັດຕາມຂໍ້ເຕືອນໃຈຂອງເພິ່ນ ແລະຊອກຫາເພິ່ນສຸດຫົວໃຈກໍມີຄວາມສຸກ.” ພະເຢຊູກໍເວົ້າຄືກັນວ່າ: “ຄົນທີ່ມີຄວາມສຸກແມ່ນຄົນທີ່ໄດ້ຍິນຄຳສອນຂອງພະເຈົ້າແລະເຮັດຕາມສິ່ງນັ້ນ.”—ລກ. 11:28
2 ພວກເຮົາທີ່ເປັນຜູ້ນະມັດສະການຂອງພະເຢໂຫວາມີຄວາມສຸກຫຼາຍ. ຍ້ອນຫຍັງ? ມີຫຼາຍເຫດຜົນທີ່ເຮັດໃຫ້ເຮົາຮູ້ສຶກແບບນັ້ນ ແຕ່ເຫດຜົນໜຶ່ງທີ່ສຳຄັນຫຼາຍທີ່ເຮັດໃຫ້ເຮົາມີຄວາມສຸກແມ່ນ ຍ້ອນເຮົາອ່ານຄຳພີໄບເບິນເປັນປະຈຳແລະພະຍາຍາມເຕັມທີທີ່ຈະເອົາສິ່ງທີ່ໄດ້ຮຽນໄປໃຊ້ໃນຊີວິດ.—ອ່ານຢາໂກໂບ 1:22-25
3. ເຮົາໄດ້ປະໂຫຍດຫຍັງເມື່ອເຮັດຕາມສິ່ງທີ່ໄດ້ອ່ານໃນຄຳພີໄບເບິນ?
3 ເຮົາໄດ້ປະໂຫຍດຫຼາຍຢ່າງເມື່ອ “ເຮັດຕາມຄຳສອນຂອງພະເຈົ້າສະເໝີ.” ປະໂຫຍດຢ່າງໜຶ່ງທີ່ເຮົາໄດ້ແມ່ນເຮົາເຮັດໃຫ້ພະເຢໂຫວາພໍໃຈ. ການຮູ້ເລື່ອງນີ້ເຮັດໃຫ້ເຮົາມີຄວາມສຸກຫຼາຍ. (ປຍຈ. 12:13) ເມື່ອເຮົາເຮັດຕາມສິ່ງທີ່ໄດ້ອ່ານໃນຄຳພີໄບເບິນ ຄອບຄົວຂອງເຮົາກໍມີຄວາມສຸກຫຼາຍຂຶ້ນ ແລະເຮົາຍັງມີສາຍສຳພັນທີ່ດີກັບພີ່ນ້ອງຄົນອື່ນນຳ. ເຈົ້າຄືຊິໄດ້ເຫັນແລ້ວວ່າມັນເປັນແບບນັ້ນແທ້ໆໃນຊີວິດຂອງເຈົ້າ. ນອກຈາກນັ້ນ ເຮົາຈະບໍ່ຕ້ອງເຈິກັບບັນຫາຫຼາຍຢ່າງຄືກັບຄົນທີ່ບໍ່ໄດ້ເຮັດຕາມມາດຕະຖານຂອງພະເຢໂຫວາ. ທີ່ຈິງ ເຮົາທຸກຄົນເຫັນດີກັບສິ່ງທີ່ກະສັດດາວິດເວົ້າ. ຫຼັງຈາກທີ່ລາວເວົ້າເຖິງກົດໝາຍ ຂໍ້ກຳນົດ ແລະການຕັດສິນຂອງພະເຢໂຫວາໃນເພງທີ່ລາວແຕ່ງ ລາວເວົ້າໃນຕອນທ້າຍວ່າ: “ຜູ້ທີ່ເຮັດຕາມຈະໄດ້ລາງວັນໃຫຍ່.”—ພສ. 19:7-11
4. ເປັນຫຍັງຈຶ່ງຍາກຫຼາຍທີ່ຈະມີເວລາອ່ານແລະສຶກສາຄຳພີໄບເບິນ?
4 ໃນແຕ່ລະມື້ເຮົາຫຍຸ້ງຫຼາຍ ບາງເທື່ອຈຶ່ງຍາກຫຼາຍທີ່ຈະມີເວລາອ່ານແລະສຶກສາຄຳພີໄບເບິນ ແຕ່ເຮົາຕ້ອງເຮັດແບບນັ້ນເພື່ອຈະຮູ້ວ່າພະເຢໂຫວາຢາກໃຫ້ເຮົາເຮັດຫຍັງ. ໃຫ້ເຮົາເບິ່ງຄຳແນະນຳບາງຢ່າງທີ່ຈະຊ່ວຍເຮົາໃຫ້ອ່ານຄຳພີໄບເບິນໄດ້ເປັນປະຈຳ. ນອກຈາກນັ້ນ ເຮົາຍັງຈະເບິ່ງວ່າອັນໃດຈະຊ່ວຍເຮົາໃຫ້ຄິດຕຶກຕອງກ່ຽວກັບສິ່ງທີ່ອ່ານແລະເອົາສິ່ງທີ່ໄດ້ຮຽນໄປໃຊ້ໃນຊີວິດ.
ຈັດເວລາໄວ້ເພື່ອອ່ານຄຳພີໄບເບິນ
5. ເຮົາມີໜ້າທີ່ຮັບຜິດຊອບຫຍັງແດ່ທີ່ເຮັດໃຫ້ເຮົາຫຍຸ້ງຫຼາຍ?
5 ຜູ້ຮັບໃຊ້ຂອງພະເຢໂຫວາສ່ວນຫຼາຍມີຊີວິດທີ່ຫຍຸ້ງແທ້ໆ. ເຮົາຕ້ອງໃຊ້ເວລາຫຼາຍໃນການເຮັດໜ້າທີ່ຮັບຜິດຊອບຂອງເຮົາຕາມທີ່ບອກໄວ້ໃນຄຳພີໄບເບິນ. ຕົວຢ່າງເຊັ່ນ: ເຮົາຕ້ອງເຮັດວຽກເພື່ອລ້ຽງໂຕເອງແລະຄອບຄົວ. (1ຕມ. 5:8) ຫຼາຍຄົນຕ້ອງເບິ່ງແຍງຄົນໃນຄອບຄົວທີ່ເຈັບປ່ວຍຫຼືເຖົ້າແລ້ວ ແລະເຮົາທຸກຄົນຕ້ອງເບິ່ງແຍງສຸຂະພາບຂອງໂຕເອງເຊິ່ງກໍຕ້ອງໃຊ້ເວລາຄືກັນ. ນອກຈາກໜ້າທີ່ຮັບຜິດຊອບເຫຼົ່ານີ້ແລ້ວ ເຮົາຍັງມີວຽກມອບໝາຍໃນປະຊາຄົມ ແລະເຮົາຍັງມີອີກວຽກໜຶ່ງທີ່ສຳຄັນຫຼາຍ ນັ້ນແມ່ນເຮົາຕ້ອງໄປປະກາດ. ເມື່ອຄິດເຖິງໜ້າທີ່ຮັບຜິດຊອບເຫຼົ່ານີ້ ເຈົ້າຈະຊອກເວລາໄດ້ແນວໃດເພື່ອອ່ານຄຳພີໄບເບິນເປັນປະຈຳ ຄິດຕຶກຕອງ ແລະເອົາສິ່ງທີ່ໄດ້ຮຽນໄປໃຊ້ໃນຊີວິດ?
6. ເຈົ້າຈະໃຫ້ການອ່ານຄຳພີໄບເບິນເປັນສິ່ງທີ່ສຳຄັນໄດ້ແນວໃດ? (ເບິ່ງຮູບນຳ)
6 ການອ່ານຄຳພີໄບເບິນເປັນໜຶ່ງໃນສິ່ງທີ່ “ສຳຄັນກວ່າ” ສຳລັບເຮົາ. ດັ່ງນັ້ນ ເຮົາຕ້ອງຈັດເວລາໄວ້ເພື່ອອ່ານຄຳພີໄບເບິນ. (ຟລປ. 1:10) ເພງສັນລະເສີນບົດທຳອິດເວົ້າເຖິງຄົນທີ່ມີຄວາມສຸກວ່າ: “ລາວມັກກົດໝາຍຂອງພະເຢໂຫວາຫຼາຍ ແລະລາວຄິດຕຶກຕອງກ່ຽວກັບກົດໝາຍຂອງເພິ່ນທັງກາງເວັນແລະກາງຄືນ.” (ພສ. 1:1, 2) ຈາກຂໍ້ນີ້ເຮົາເຫັນແຈ້ງວ່າເຮົາຕ້ອງຈັດເວລາໄວ້ເພື່ອອ່ານຄຳພີໄບເບິນ. ຕອນໃດເປັນເວລາທີ່ດີທີ່ສຸດທີ່ຈະອ່ານຄຳພີໄບເບິນ? ເຮົາແຕ່ລະຄົນອາດເລືອກເວລາບໍ່ຄືກັນ ແຕ່ສິ່ງສຳຄັນແມ່ນເຮົາຕ້ອງເລືອກເວລາທີ່ເຮົາສາມາດອ່ານຄຳພີໄບເບິນໄດ້ເປັນປະຈຳ. ພີ່ນ້ອງຊາຍຊື່ວິກເຕີ້ເວົ້າວ່າ: “ຂ້ອຍມັກອ່ານຄຳພີໄບເບິນຕອນເຊົ້າໆ. ເຖິງວ່າຂ້ອຍບໍ່ແມ່ນຄົນທີ່ມັກຕື່ນເຊົ້າ ແຕ່ຂ້ອຍກໍຮູ້ສຶກວ່າຕອນເຊົ້າບໍ່ມີແນວລົບກວນຫຼາຍ ສະໝອງປອດໂປ່ງ ແລະມີສະມາທິຫຼາຍກວ່າ.” ບາງເທື່ອເຈົ້າອາດຈະຮູ້ສຶກຄືກັບວິກເຕີ້. ໃຫ້ຖາມໂຕເອງວ່າ: ‘ຕອນໃດເປັນເວລາທີ່ດີທີ່ສຸດສຳລັບຂ້ອຍທີ່ຈະອ່ານຄຳພີໄບເບິນ?’
ຕອນໃດເປັນເວລາທີ່ດີທີ່ສຸດທີ່ຈະອ່ານຄຳພີໄບເບິນ? ຕອນໃດທີ່ເຈົ້າສາມາດອ່ານຄຳພີໄບເບິນໄດ້ເປັນປະຈຳ? (ເບິ່ງຂໍ້ 6)
ຄິດຕຶກຕອງສິ່ງທີ່ເຈົ້າອ່ານ
7-8. ອັນໃດອາດເຮັດໃຫ້ເຮົາບໍ່ໄດ້ຮັບປະໂຫຍດເຕັມທີຈາກການອ່ານຄຳພີໄບເບິນ? ຂໍໃຫ້ຍົກຕົວຢ່າງ.
7 ເຮົາອາດຈະອ່ານຫຼາຍໆ ແຕ່ບໍ່ໄດ້ໃຊ້ເວລາຄິດຕຶກຕອງໃນສິ່ງທີ່ອ່ານ. ເຈົ້າເຄີຍເປັນບໍທີ່ອ່ານບາງຢ່າງແລະຫຼັງຈາກນັ້ນກໍຈື່ບໍ່ໄດ້ປານໃດ? ເຮົາທຸກຄົນເຄີຍເປັນ. ເຮົາອາດເປັນແບບນັ້ນຄືກັນຕອນທີ່ອ່ານຄຳພີໄບເບິນ. ບາງເທື່ອເຮົາອາດຕັ້ງເປົ້າໝາຍທີ່ຈະອ່ານໃຫ້ໄດ້ຫຼາຍໆບົດ ເຊິ່ງເປັນສິ່ງທີ່ເປັນຕາຊົມເຊີຍ. ເຮົາທຸກຄົນຄວນຕັ້ງເປົ້າໝາຍແລະເຮັດຕາມໃຫ້ໄດ້. (1ກຣ. 9:26) ເຮົາບໍ່ພຽງແຕ່ອ່ານຄຳພີໄບເບິນເທົ່ານັ້ນ ແຕ່ເຮົາຢາກໄດ້ຮັບປະໂຫຍດເຕັມທີຈາກການອ່ານຄຳພີໄບເບິນນຳ.
8 ໃຫ້ຄິດເຖິງຕົວຢ່າງນີ້: ພືດຕ້ອງອາໄສນ້ຳຝົນເປັນຫຼັກເພື່ອຈະຢູ່ລອດໄດ້. ແຕ່ຖ້າຝົນຕົກແຮງໆໃນເວລາສັ້ນໆ ພື້ນດິນກໍຈະມີນ້ຳຫຼາຍໂພດ. ເມື່ອເປັນແນວນັ້ນ ເຖິງຈະມີຝົນຕົກມາຕື່ມອີກກໍຈະບໍ່ມີປະໂຫຍດຫຍັງ. ມັນຈະດີກວ່າຖ້າຝົນຕົກລົງມາຄ່ອຍໆ ຍ້ອນນ້ຳຈະຊຶມລົງດິນໄດ້ດີແລະເຮັດໃຫ້ພືດໃຫຍ່. ຄ້າຍຄືກັນ ເຮົາບໍ່ຄວນອ່ານຄຳພີໄບເບິນແບບຟ້າວຟັ່ງຫຼືອ່ານໄວໂພດຈົນບໍ່ໄດ້ຄິດຕຶກຕອງ ບໍ່ຈື່ສິ່ງທີ່ໄດ້ຮຽນ ແລະເອົາໄປໃຊ້ບໍ່ໄດ້.—ຢກບ. 1:24
ດິນຕ້ອງໃຊ້ເວລາໃນການດູດເອົານ້ຳຝົນ. ເຮົາກໍຕ້ອງໃຊ້ເວລາໃນການຄິດຕຶກຕອງກ່ຽວກັບຄຳພີໄບເບິນແລະເອົາສິ່ງທີ່ໄດ້ອ່ານໄປໃຊ້ (ເບິ່ງຂໍ້ 8)
9. ເຮົາຄວນເຮັດແນວໃດຖ້າຮູ້ສຶກວ່າໂຕເອງອ່ານຄຳພີໄບເບິນໄວໂພດ?
9 ບາງເທື່ອເຈົ້າອ່ານຄຳພີໄບເບິນໄວໂພດບໍ? ຖ້າເປັນແບບນັ້ນ ເຈົ້າຄວນເຮັດແນວໃດ? ໃຫ້ອ່ານຊ້າໆ. ພະຍາຍາມຄິດກ່ຽວກັບສິ່ງທີ່ເຈົ້າກຳລັງອ່ານຫຼືຫາກໍອ່ານ. ການເຮັດແບບນີ້ບໍ່ຍາກເກີນໄປ. ເຈົ້າອາດຈະໃຊ້ເວລາສຶກສາສ່ວນໂຕດົນກວ່າເກົ່າເພື່ອຈະມີເວລາຫຼາຍຂຶ້ນໃນການຄິດຕຶກຕອງ ຫຼືເຈົ້າອາດເລືອກທີ່ຈະອ່ານຂໍ້ຄຳພີໜ້ອຍລົງເພື່ອຈະໃຊ້ເວລາຫຼາຍຂຶ້ນສຳລັບຄິດຕຶກຕອງ. ວິກເຕີ້ທີ່ເວົ້າເຖິງກ່ອນໜ້ານີ້ເວົ້າວ່າ: “ຂ້ອຍຈະບໍ່ອ່ານຄຳພີໄບເບິນຫຼາຍບົດ ຂ້ອຍຈະອ່ານແຕ່ບົດດຽວເທົ່ານັ້ນ. ຍ້ອນຂ້ອຍເລືອກອ່ານຕອນເຊົ້າໆ ຂ້ອຍຈຶ່ງຄິດຕຶກຕອງໃນສິ່ງທີ່ອ່ານໄດ້ໝົດມື້.” ບໍ່ວ່າເຈົ້າຈະເລືອກອ່ານໜ້ອຍຫຼືຫຼາຍ ສິ່ງສຳຄັນແມ່ນເຈົ້າຕ້ອງອ່ານຊ້າໆເພື່ອຈະຄິດຕຶກຕອງສິ່ງທີ່ອ່ານ.—ພສ. 119:97; ເບິ່ງຂອບ “ ຄຳຖາມສຳລັບຄິດຕຶກຕອງ”
10. ຂໍໃຫ້ຍົກຕົວຢ່າງວ່າເຈົ້າອາດຈະເອົາສິ່ງທີ່ໄດ້ອ່ານໄປໃຊ້ແນວໃດ? (1 ເທຊະໂລນິກ 5:17, 18)
10 ບໍ່ວ່າເຈົ້າຈະອ່ານຄຳພີໄບເບິນຕອນໃດແລະໃຊ້ເວລາດົນປານໃດ ໃຫ້ຊອກຫາວິທີເອົາສິ່ງທີ່ໄດ້ຮຽນໄປໃຊ້ນຳ. ຕອນທີ່ເຈົ້າອ່ານສ່ວນໜຶ່ງຂອງຄຳພີໄບເບິນໃຫ້ຖາມໂຕເອງວ່າ: ‘ຂ້ອຍຈະເອົາສິ່ງທີ່ໄດ້ອ່ານມາໃຊ້ໃນມື້ນີ້ຫຼືໄວໆນີ້ໄດ້ແນວໃດ?’ ສົມມຸດວ່າເຈົ້າອ່ານ 1 ເທຊະໂລນິກ 5:17, 18. (ອ່ານ) ຫຼັງຈາກທີ່ອ່ານ 2 ຂໍ້ນີ້ແລ້ວ ເຈົ້າອາດຢຸດແລະຄິດວ່າ ເຈົ້າອະທິດຖານເລື້ອຍປານໃດ ແລະອະທິດຖານແບບມີຄວາມໝາຍບໍ? ນອກຈາກນັ້ນ ເຈົ້າສາມາດຄິດເຖິງສິ່ງທີ່ເຈົ້າຈະຂອບໃຈພະເຢໂຫວາໄດ້ນຳ ເຊັ່ນ: ເຈົ້າອາດກຳນົດວ່າເຈົ້າຢາກຄິດເຖິງ 3 ຢ່າງທີ່ເຈົ້າຈະຂອບໃຈພະເຢໂຫວາໃນແຕ່ລະມື້. ພຽງແຕ່ເຈົ້າໃຊ້ເວລາສັ້ນໆຄິດກ່ຽວກັບເລື່ອງນີ້ ເຈົ້າກໍໄດ້ຮັບປະໂຫຍດແລ້ວ. ໃຫ້ຄິດເບິ່ງວ່າເຈົ້າແຮ່ງຈະໄດ້ຮັບປະໂຫຍດຫຼາຍສ່ຳໃດເມື່ອເຈົ້າເຮັດແບບນີ້ທຸກມື້ກັບທຸກເລື່ອງທີ່ເຈົ້າອ່ານ. ແນ່ນອນວ່າເຈົ້າຈະເປັນຜູ້ຟັງແລະຜູ້ເຮັດຕາມຄຳສອນຂອງພະເຈົ້າທີ່ດີຂຶ້ນ! ຖ້າເຈົ້າອ່ານຄຳພີໄບເບິນແລ້ວເຫັນວ່າມີຫຼາຍຢ່າງທີ່ຕ້ອງປັບປຸງ ເຈົ້າຈະເຮັດແນວໃດ?
ຕັ້ງເປົ້າໝາຍທີ່ສົມເຫດສົມຜົນ
11. ເປັນຫຍັງບາງເທື່ອເຈົ້າອາດຮູ້ສຶກທໍ້ໃຈ? ຂໍໃຫ້ຍົກຕົວຢ່າງ.
11 ຕອນທີ່ອ່ານຄຳພີໄບເບິນ ບາງເທື່ອເຈົ້າອາດຮູ້ສຶກທໍ້ໃຈຍ້ອນເຫັນວ່າມີຫຼາຍຢ່າງທີ່ເຈົ້າຕ້ອງປັບປຸງ. ຕົວຢ່າງເຊັ່ນ: ສົມມຸດວ່າມື້ທຳອິດເຈົ້າອາດອ່ານເຈິຄຳແນະນຳທີ່ບອກວ່າຢ່າລຳອຽງ. (ຢກບ. 2:1-8) ເຈົ້າກໍເຫັນວ່າເຈົ້າຈະປັບປຸງວິທີທີ່ເຈົ້າປະຕິບັດຕໍ່ຄົນອື່ນໃຫ້ດີຂຶ້ນ. ເຈົ້າຈຶ່ງຕັດສິນໃຈວ່າຈະປ່ຽນແປງໂຕເອງບາງຢ່າງ ເຊິ່ງກໍເປັນເລື່ອງທີ່ດີຫຼາຍ. ມື້ທີ 2 ເຈົ້າໄດ້ອ່ານຂໍ້ຄຳພີທີ່ເນັ້ນຄວາມສຳຄັນຂອງການຄວບຄຸມຄຳເວົ້າ. (ຢກບ. 3:1-12) ເຈົ້າກໍຮູ້ວ່າບາງເທື່ອເຈົ້າໄດ້ເວົ້າໃນແງ່ລົບ ເຈົ້າຈຶ່ງຄິດວ່າຈະເວົ້າໃນແງ່ບວກແລະໃຫ້ກຳລັງໃຈພີ່ນ້ອງຫຼາຍຂຶ້ນ. ມື້ທີ 3 ເຈົ້າໄດ້ອ່ານເຈິຄຳແນະນຳທີ່ເຕືອນວ່າບໍ່ໃຫ້ເປັນໝູ່ກັບໂລກ. (ຢກບ. 4:4-12) ເຈົ້າກໍເຫັນວ່າເຈົ້າຕ້ອງລະວັງຫຼາຍຂຶ້ນຕອນທີ່ເລືອກຄວາມບັນເທີງ. ເມື່ອຮອດມື້ທີ 4 ເຈົ້າອາດຮູ້ສຶກວ່າມີຫຼາຍຢ່າງແທ້ໆທີ່ເຈົ້າຕ້ອງປັບປຸງໂຕເອງ.
12. ເມື່ອເຈົ້າອ່ານຄຳພີໄບເບິນແລະເຫັນວ່າມີຫຼາຍຢ່າງທີ່ຕ້ອງປັບປຸງ ເປັນຫຍັງເຈົ້າບໍ່ຄວນທໍ້ໃຈ? (ເບິ່ງໄຂເງື່ອນນຳ)
12 ຖ້າເຈົ້າເຫັນວ່າມີຫຼາຍຢ່າງທີ່ຕ້ອງປັບປຸງ ກໍຢ່າຟ້າວທໍ້ໃຈ ຍ້ອນວ່ານີ້ເປັນຫຼັກຖານສະແດງວ່າເຈົ້າມີຫົວໃຈທີ່ດີ. ຄົນທີ່ມີຫົວໃຈຖ່ອມ ຕອນທີ່ອ່ານຄຳພີໄບເບິນລາວຈະເບິ່ງວ່າມີຈຸດໃດແດ່ທີ່ລາວສາມາດປັບປຸງໃຫ້ດີຂຶ້ນໄດ້. a ໃຫ້ຈື່ໄວ້ວ່າການປູກຝັງ “ນິດໄສໃໝ່” ເປັນສິ່ງທີ່ເຮົາຕ້ອງເຮັດແບບຕໍ່ເນື່ອງ. (ກລຊ. 3:10) ສິ່ງໃດຈະຊ່ວຍເຈົ້າໃຫ້ເຮັດຕາມຄຳສອນຂອງພະເຈົ້າໄດ້ສະເໝີ?
13. ເຈົ້າຈະຕັ້ງເປົ້າໝາຍທີ່ສົມເຫດສົມຜົນໄດ້ແນວໃດ? (ເບິ່ງຮູບນຳ)
13 ແທນທີ່ຈະເຮັດຕາມຄຳແນະນຳທັງໝົດບາດດຽວ ເຈົ້າສາມາດເລືອກທີ່ຈະເຮັດຕາມເປົ້າໝາຍໜຶ່ງຫຼືສອງຢ່າງກ່ອນ. (ສພສ. 11:2) ເຈົ້າອາດຈະເຮັດແບບນີ້ ໃຫ້ຂຽນອອກມາວ່າມີຫຍັງແດ່ທີ່ເຈົ້າຢາກປັບປຸງ. ຈາກນັ້ນ ໃຫ້ເລືອກໜຶ່ງຫຼືສອງຈຸດທີ່ເຈົ້າຢາກເຮັດກ່ອນ ສ່ວນທີ່ເຫຼືອກໍເອົາໄວ້ເຮັດຕາມຫຼັງ. ເຈົ້າຈະເລືອກແນວໃດ?
ແທນທີ່ເຈົ້າຈະເຮັດຕາມຄຳແນະນຳທັງໝົດບາດດຽວ ເປັນຫຍັງບໍ່ລອງຕັ້ງເປົ້າໝາຍທີ່ສົມເຫດສົມຜົນເບິ່ງ? ເຈົ້າອາດເລືອກທີ່ຈະເຮັດຕາມເປົ້າໝາຍໜຶ່ງຫຼືສອງຢ່າງກ່ອນ (ເບິ່ງຂໍ້ 13-14)
14. ເຈົ້າສາມາດເລີ່ມຈາກເປົ້າໝາຍແບບໃດກ່ອນ?
14 ເຈົ້າອາດເລີ່ມຈາກສິ່ງທີ່ເຈົ້າສາມາດເຮັດໄດ້ງ່າຍ ຫຼືເລີ່ມຈາກສິ່ງທີ່ເຈົ້າຄິດວ່າຕ້ອງປັບປຸງຫຼາຍທີ່ສຸດກ່ອນ. ເມື່ອເຈົ້າມີເປົ້າໝາຍແລ້ວ ກໍໃຫ້ຄົ້ນເບິ່ງໃນປຶ້ມຕ່າງໆຂອງອົງການໂດຍໃຊ້ຫ້ອງສະໝຸດອອນລາຍຂອງວັອດສ໌ທາວເວີ ຫຼືຄູ່ມືຄົ້ນຄວ້າສຳລັບພະຍານພະເຢໂຫວາ. ໃຫ້ອະທິດຖານກ່ຽວກັບເປົ້າໝາຍຂອງເຈົ້າ ຂໍພະເຢໂຫວາຊ່ວຍເຈົ້າໃຫ້ມີ “ທັງຄວາມຕ້ອງການແລະກຳລັງ.” (ຟລປ. 2:13) ຈາກນັ້ນ ໃຫ້ເອົາສິ່ງທີ່ເຈົ້າໄດ້ຮຽນໄປໃຊ້. ເມື່ອເຈົ້າເຮັດຕາມເປົ້າໝາຍທຳອິດໄດ້ແລ້ວ ເຈົ້າກໍຈະມີແຮງກະຕຸ້ນທີ່ຈະເຮັດຕາມເປົ້າໝາຍອື່ນໆຕໍ່ໄປ. ເມື່ອເຈົ້າເຫັນວ່າເຈົ້າປ່ຽນແປງໂຕເອງແລະມີຄຸນລັກສະນະແບບຄລິດສະຕຽນ ເຈົ້າກໍຈະຮູ້ສຶກງ່າຍຂຶ້ນທີ່ຈະປັບປຸງໃນເລື່ອງອື່ນໆນຳ.
ໃຫ້ຄຳສອນຂອງພະເຈົ້າ “ເກີດຜົນກັບພວກເຈົ້າ”
15. ພະຍານພະເຢໂຫວາກັບຄົນທົ່ວໄປທີ່ອ່ານຄຳພີໄບເບິນຕ່າງກັນແນວໃດ? (1 ເທຊະໂລນິກ 2:13)
15 ບາງຄົນບອກວ່າເຂົາເຈົ້າອ່ານຄຳພີໄບເບິນຈົບຫຼາຍຮອບແລ້ວ. ແຕ່ເຂົາເຈົ້າເຊື່ອແທ້ໆບໍໃນສິ່ງທີ່ຄຳພີໄບເບິນສອນ? ເຂົາເຈົ້າເອົາສິ່ງທີ່ໄດ້ອ່ານໄປໃຊ້ໃນຊີວິດຫຼືປັບປຸງໂຕເອງຕາມຄຳສອນໃນຄຳພີໄບເບິນບໍ? ເປັນຕາເສຍດາຍທີ່ເຂົາເຈົ້າບໍ່ໄດ້ເຮັດແບບນັ້ນ. ແຕ່ພວກເຮົາທີ່ເປັນພະຍານພະເຢໂຫວາຮຽນແບບຄລິດສະຕຽນໃນສະຕະວັດທຳອິດທີ່ຍອມຮັບວ່າຄຳພີໄບເບິນເປັນຄືກັບ “ຄຳສອນຂອງພະເຈົ້າແທ້ໆ.” ນອກຈາກນັ້ນ ເຮົາຍັງພະຍາຍາມເຕັມທີທີ່ຈະໃຫ້ຄຳສອນຂອງພະເຈົ້າເກີດຜົນໃນຊີວິດຂອງເຮົາ ເຊິ່ງໝາຍເຖິງການເຮັດຕາມສິ່ງທີ່ຄຳພີໄບເບິນສອນ.—ອ່ານ 1 ເທຊະໂລນິກ 2:13
16. ອັນໃດຈະຊ່ວຍເຮົາໃຫ້ເປັນຄົນທີ່ເຮັດຕາມຄຳສອນຂອງພະເຈົ້າ?
16 ບໍ່ແມ່ນເລື່ອງງ່າຍສະເໝີໄປທີ່ເຮົາຈະອ່ານແລະເຮັດຕາມຄຳສອນໃນຄຳພີໄບເບິນ. ເຮົາອາດຮູ້ສຶກວ່າຍາກທີ່ຈະຊອກເວລາອ່ານຄຳພີໄບເບິນ ຫຼືເຮົາອາດຈະອ່ານຄຳພີໄບເບິນໄວໂພດແລະບໍ່ໄດ້ຄິດຕຶກຕອງ ຫຼືເຮົາອາດຮູ້ສຶກທໍ້ໃຈເມື່ອເຫັນວ່າມີຫຼາຍຢ່າງແທ້ໆທີ່ຕ້ອງປັບປຸງ. ບໍ່ວ່າເຈົ້າຈະເຈິຂໍ້ທ້າທາຍແບບໃດ ພະເຢໂຫວາສາມາດຊ່ວຍເຈົ້າໃຫ້ເອົາຊະນະໄດ້. ຂໍໃຫ້ເຈົ້າຍອມຮັບຄວາມຊ່ວຍເຫຼືອຈາກພະເຢໂຫວາແລະເຮັດຕາມຄຳສອນຂອງເພິ່ນ ຢ່າເປັນຄົນທີ່ຟັງແລ້ວກໍລືມ. ແຮ່ງເຮົາອ່ານຄຳພີໄບເບິນແລະເອົາໄປໃຊ້ ເຮົາກໍແຮ່ງຈະມີຄວາມສຸກໃນຊີວິດຫຼາຍຂຶ້ນ.—ຢກບ. 1:25
ເພງທີ 94 ເຮົາຂອບໃຈພະເຈົ້າສຳລັບພະຄຳພີ
