ຄຳຖາມຈາກຜູ້ອ່ານ
ການໝາຍທີ່ເວົ້າເຖິງໃນ 2 ເທຊະໂລນິກ 3:14 ເຮັດໂດຍຜູ້ເບິ່ງແຍງຫຼືໂດຍພີ່ນ້ອງໃນປະຊາຄົມ?
ອັກຄະສາວົກໂປໂລຂຽນຈົດໝາຍໄປຫາຄລິດສະຕຽນໃນເມືອງເທຊະໂລນິກວ່າ: “ຖ້າຜູ້ໃດບໍ່ເຊື່ອຟັງສິ່ງທີ່ພວກເຮົາບອກໃນຈົດໝາຍສະບັບນີ້ ກໍໃຫ້ໝາຍຄົນນີ້ໄວ້.” (2ທຊ. 3:14, ໄຂເງື່ອນ) ກ່ອນໜ້ານີ້ເຄີຍມີການອະທິບາຍວ່າເລື່ອງນີ້ເປັນຄຳແນະນຳສຳລັບຜູ້ເບິ່ງແຍງ. ຖ້າໃຜບໍ່ຍອມເຊື່ອຟັງຫຼັກການໃນຄຳພີໄບເບິນທັງໆທີ່ໄດ້ຮັບຄຳແນະນຳຫຼາຍເທື່ອແລ້ວ ຜູ້ເບິ່ງແຍງກໍຈະບັນລະຍາຍເພື່ອເຕືອນພີ່ນ້ອງໃນປະຊາຄົມ ແລ້ວເຂົາເຈົ້າກໍຈະບໍ່ໃຊ້ເວລາຫຼາຍເກີນໄປຫຼືບໍ່ສະໜິດກັບຜູ້ທີ່ຖືກໝາຍ.
ແຕ່ຈຳເປັນຕ້ອງມີການປັບປ່ຽນຄວາມເຂົ້າໃຈໃໝ່ກ່ຽວກັບເລື່ອງນີ້. ຕອນນີ້ເຮົາເຂົ້າໃຈວ່າຄຳແນະນຳຂອງໂປໂລໝາຍເຖິງຄລິດສະຕຽນແຕ່ລະຄົນຄວນຕັດສິນໃຈເອົາເອງວ່າຈະເຮັດແນວໃດໃນແຕ່ລະສະຖານະການ. ສະນັ້ນ ບໍ່ຈຳເປັນທີ່ຜູ້ເບິ່ງແຍງຈະບັນລະຍາຍເພື່ອເຕືອນພີ່ນ້ອງໃນປະຊາຄົມອີກຕໍ່ໄປ. ເປັນຫຍັງຕ້ອງມີການປັບປ່ຽນໃນເລື່ອງນີ້? ໃຫ້ເຮົາມາເບິ່ງແວດບົດຂອງຈົດໝາຍທີ່ໂປໂລຂຽນນຳກັນ.
ໂປໂລສັງເກດວ່າບາງຄົນໃນປະຊາຄົມເປັນ “ຄົນທີ່ບໍ່ເຊື່ອຟັງ.” ເຂົາເຈົ້າບໍ່ຍອມເຊື່ອຟັງຄຳແນະນຳທີ່ມາຈາກພະຄຳພີ. ຕອນທີ່ລາວໄປຢາມພີ່ນ້ອງຢູ່ເມືອງເທຊະໂລນິກກ່ອນໜ້ານີ້ ລາວໄດ້ແນະນຳເຂົາເຈົ້າວ່າ: “ຖ້າຜູ້ໃດບໍ່ຢາກເຮັດວຽກ ກໍບໍ່ຕ້ອງໃຫ້ລາວກິນເຂົ້າ.” ແຕ່ກໍຍັງມີບາງຄົນໃນປະຊາຄົມທີ່ບໍ່ຢາກເຮັດວຽກຫາລ້ຽງໂຕເອງທັງໆທີ່ສາມາດເຮັດໄດ້. ນອກຈາກນັ້ນ ເຂົາເຈົ້າຍັງມັກໄປຫຍຸ້ງເລື່ອງຂອງຄົນອື່ນນຳ. ຄລິດສະຕຽນຄວນປະຕິບັດແນວໃດກັບຄົນແບບນີ້ທີ່ບໍ່ເຊື່ອຟັງ?—2ທຊ. 3:6, 10-12
ໂປໂລບອກວ່າໃຫ້ “ໝາຍຄົນນີ້ໄວ້.” ຄຳພາສາກຣີກທີ່ໂປໂລໃຊ້ເຮັດໃຫ້ຄິດເຖິງການລະບຸໂຕບາງຄົນແລະລະວັງເພື່ອຈະບໍ່ໄດ້ຮັບອິດທິພົນຈາກລາວ. ໂປໂລໃຫ້ຄຳແນະນຳນີ້ກັບພີ່ນ້ອງທຸກຄົນໃນປະຊາຄົມ ບໍ່ແມ່ນແຕ່ຜູ້ເບິ່ງແຍງ. (2ທຊ. 1:1; 3:6) ສະນັ້ນ ຖ້າຄລິດສະຕຽນແຕ່ລະຄົນສັງເກດວ່າມີບາງຄົນບໍ່ເຊື່ອຟັງຄຳແນະນຳທີ່ມາຈາກຄຳພີໄບເບິນ ລາວອາດເລືອກທີ່ຈະ “ເຊົາຄົບຫາ” ກັບຄົນແບບນີ້ທີ່ບໍ່ເຊື່ອຟັງ.
ນີ້ໝາຍຄວາມວ່າເຮົາຄວນປະຕິບັດກັບຜູ້ນັ້ນຄືກັບປະຕິບັດກັບຄົນທີ່ຖືກຕັດອອກຈາກປະຊາຄົມບໍ? ບໍ່ແມ່ນ. ໂປໂລບອກຕື່ມອີກວ່າ: “ໃຫ້ເຕືອນສະຕິລາວຕໍ່ໄປຍ້ອນລາວຍັງເປັນພີ່ນ້ອງຢູ່.” ສະນັ້ນ ເຮົາຍັງໄປປະຊຸມແລະໄປປະກາດກັບຄົນທີ່ຖືກໝາຍໄດ້ຢູ່ ແຕ່ເຮົາອາດເລືອກທີ່ຈະບໍ່ໃຊ້ເວລາຄົບຫາກັບລາວແບບອື່ນຫຼືບໍ່ໄປສັງສັນກັບລາວ. ຍ້ອນຫຍັງ? ໂປໂລບອກວ່າ: “ເພື່ອລາວຈະຮູ້ສຶກອາຍ.” ເມື່ອເຮົາເລືອກທີ່ຈະບໍ່ໃຊ້ເວລາຄົບຫາກັບລາວແບບນີ້ອາດເຮັດໃຫ້ລາວຮູ້ສຶກອາຍໃນສິ່ງທີ່ລາວກຳລັງເຮັດຢູ່ແລະປ່ຽນແປງໂຕເອງ.—2ທຊ. 3:14, 15
ໃນທຸກມື້ນີ້ເຮົາຈະເຮັດຕາມຄຳແນະນຳນີ້ໄດ້ແນວໃດ? ທຳອິດ ເຮົາຕ້ອງແນ່ໃຈວ່າສິ່ງທີ່ພີ່ນ້ອງຄົນນັ້ນເຮັດເປັນການ “ບໍ່ເຊື່ອຟັງ” ຕາມທີ່ໂປໂລບອກໄວ້ແທ້ໆ. ໂປໂລບໍ່ໄດ້ໝາຍເຖິງຄົນທີ່ໃຊ້ໃຈຮູ້ຜິດຮູ້ຖືກໃນການຕັດສິນໃຈຕ່າງຈາກເຮົາຫຼືມັກບໍ່ຄືເຮົາ ແລະລາວບໍ່ໄດ້ໝາຍເຖິງຄົນທີ່ເຮັດໃຫ້ເຮົາເສຍໃຈ ແຕ່ໂປໂລກຳລັງເວົ້າເຖິງຄົນທີ່ຕັ້ງໃຈບໍ່ເຊື່ອຟັງຄຳແນະນຳຂອງພະເຢໂຫວາ.
ຖ້າເຮົາສັງເກດວ່າມີພີ່ນ້ອງບາງຄົນມັກບໍ່ເຊື່ອຟັງ aຄຳແນະນຳຂອງພະເຢໂຫວາ ເຮົາຈະຕັດສິນໃຈເອົາເອງວ່າຈະບໍ່ໃຊ້ເວລາຄົບຫາກັບລາວແບບອື່ນຫຼືບໍ່ໄປສັງສັນກັບລາວ. ຍ້ອນເລື່ອງນີ້ເປັນການຕັດສິນໃຈສ່ວນໂຕ ເຮົາຈະບໍ່ເວົ້າເລື່ອງນີ້ກັບຄົນອື່ນນອກຈາກຄົນໃນຄອບຄົວທີ່ຢູ່ເຮືອນຫຼັງດຽວກັບເຮົາທີ່ເປັນພະຍານພະເຢໂຫວາ. ເຮົາຍັງຈະໄປປະຊຸມແລະໄປປະກາດກັບລາວ ແຕ່ຖ້າເຫັນວ່າລາວປ່ຽນແປງໂຕເອງແລ້ວ ເຮົາກໍຈະໃຊ້ເວລາເຮັດແນວອື່ນກັບລາວແບບທີ່ເຄີຍເຮັດແຕ່ກີ້.
a ຕົວຢ່າງເຊັ່ນ: ຄົນທີ່ອາດບໍ່ຢາກເຮັດວຽກຫາລ້ຽງໂຕເອງທັງໆທີ່ສາມາດເຮັດໄດ້ ຄົນທີ່ອາດບໍ່ເຊົາເປັນແຟນກັບຄົນທີ່ບໍ່ແມ່ນພະຍານ ຫຼືຄົນທີ່ອາດສ້າງຄວາມແຕກແຍກໃນປະຊາຄົມຫຼືເວົ້າຫຼັບຫຼັງເຮັດໃຫ້ຄົນອື່ນເສຍຫາຍ. (1ກຣ. 7:39; 2ກຣ. 6:14; 2ທຊ. 3:11, 12; 1ຕມ. 5:13) ຄົນທີ່ຍັງເຮັດແບບນີ້ຕໍ່ໆໄປແມ່ນ “ຄົນທີ່ບໍ່ເຊື່ອຟັງ.”
