ບົດຄວາມສຶກສາທີ 32
ເພງທີ 44 ຄຳອະທິດຖານຂອງຄົນທຸກໃຈ
ພະເຢໂຫວາຢາກໃຫ້ທຸກຄົນກັບໃຈ
“ພະເຢໂຫວາ . . . ບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.”—2ປຕ. 3:9
ຈຸດສຳຄັນ
ເພື່ອຊ່ວຍໃຫ້ເຂົ້າໃຈວ່າການກັບໃຈໝາຍເຖິງຫຍັງ ເປັນຫຍັງການກັບໃຈຈຶ່ງສຳຄັນຫຼາຍ ແລະພະເຢໂຫວາຊ່ວຍທຸກຄົນແນວໃດໃຫ້ກັບໃຈ.
1. ການກັບໃຈໝາຍເຖິງຫຍັງ?
ເມື່ອເຮົາເຮັດຜິດ ເປັນເລື່ອງສຳຄັນທີ່ເຮົາຕ້ອງກັບໃຈ. ໃນຄຳພີໄບເບິນ ຄົນທີ່ກັບໃຈແມ່ນຄົນທີ່ເສຍໃຈໃນຄວາມຜິດທີ່ໂຕເອງເຮັດ ລາວປ່ຽນແປງຄວາມຄິດ ເຊົາເຮັດສິ່ງນັ້ນ ແລະຕັ້ງໃຈທີ່ຈະບໍ່ກັບໄປເຮັດຜິດຊ້ຳອີກ.—ເບິ່ງສ່ວນອະທິບາຍຄຳສັບຄຳວ່າ “ກັບໃຈ”
2. ເປັນຫຍັງເຮົາທຸກຄົນຕ້ອງຮຽນເລື່ອງການກັບໃຈ? (ເນເຮມີຢາ 8:9-11)
2 ມະນຸດທຸກຄົນຕ້ອງຮຽນຮູ້ເລື່ອງການກັບໃຈ. ຍ້ອນຫຍັງ? ຍ້ອນເຮົາເຮັດຜິດທຸກມື້. ເຮົາທີ່ເປັນລູກຫຼານຂອງອາດາມກັບເອວາເປັນຄົນບາບແລະຕ້ອງຕາຍ. (ຣມ. 3:23; 5:12) ບໍ່ມີໃຜໜີລອດຈາກບາບແລະຄວາມຕາຍໄດ້. ແມ່ນແຕ່ຄົນທີ່ມີຄວາມເຊື່ອເຂັ້ມແຂງຄືກັບອັກຄະສາວົກໂປໂລກໍຮູ້ວ່າບໍ່ງ່າຍທີ່ຈະຕໍ່ສູ້ກັບບາບ. (ຣມ. 7:21-24) ແຕ່ນີ້ໝາຍຄວາມວ່າຊີວິດເຮົາຈະເສົ້າຕະຫຼອດເວລາຍ້ອນເຮົາເປັນຄົນບາບບໍ? ບໍ່ແມ່ນ ພະເຢໂຫວາເປັນພະເຈົ້າທີ່ເມດຕາ ແລະເພິ່ນຢາກໃຫ້ເຮົາມີຄວາມສຸກ. ໃຫ້ຄິດເຖິງຕົວຢ່າງຂອງຄົນຢິວໃນສະໄໝຂອງເນເຫມີຢາ. (ອ່ານເນເຮມີຢາ 8:9-11) ພະເຢໂຫວາບໍ່ຢາກໃຫ້ເຂົາເຈົ້າຮູ້ສຶກເສຍໃຈຫຼາຍເກີນໄປຍ້ອນຄວາມຜິດທີ່ເຂົາເຈົ້າເຄີຍເຮັດ ເພິ່ນຢາກໃຫ້ເຂົາເຈົ້ານະມັດສະການເພິ່ນຢ່າງມີຄວາມສຸກ. ພະເຢໂຫວາຮູ້ວ່າການກັບໃຈເຮັດໃຫ້ມີຄວາມສຸກ. ດັ່ງນັ້ນ ເພິ່ນຈຶ່ງສອນເຮົາກ່ຽວກັບເລື່ອງນີ້. ຖ້າເຮົາກັບໃຈ ເຮົາກໍໝັ້ນໃຈໄດ້ວ່າພະເຢໂຫວາພໍ່ທີ່ມີຄວາມເມດຕາຈະຍົກໂທດໃຫ້ເຮົາ.
3. ເຮົາຈະຮຽນຫຍັງໃນບົດນີ້?
3 ໃຫ້ເຮົາຮຽນຮູ້ຫຼາຍຂຶ້ນກ່ຽວກັບການກັບໃຈ. ໃນບົດນີ້ເຮົາຈະເບິ່ງ 3 ຈຸດນຳກັນ. ຈຸດທຳອິດ ພະເຢໂຫວາສອນຫຍັງຄົນອິດສະຣາເອນເລື່ອງການກັບໃຈ. ຈຸດທີ 2 ພະເຢໂຫວາຊ່ວຍຄົນທີ່ເຮັດຜິດແນວໃດໃຫ້ກັບໃຈ ແລະຈຸດທີ 3 ພະເຢຊູສອນຫຍັງພວກລູກສິດເລື່ອງການກັບໃຈ.
ພະເຢໂຫວາສອນຫຍັງຄົນອິດສະຣາເອນເລື່ອງການກັບໃຈ
4. ພະເຢໂຫວາສອນຫຍັງຄົນອິດສະຣາເອນເລື່ອງການກັບໃຈ?
4 ຕອນທີ່ພະເຢໂຫວາຕັ້ງຄົນອິດສະຣາເອນໃຫ້ເປັນຊາດໜຶ່ງ ເພິ່ນໄດ້ເຮັດສັນຍາກັບເຂົາເຈົ້າ. ຖ້າເຂົາເຈົ້າເຊື່ອຟັງກົດໝາຍຂອງພະເຢໂຫວາ ເພິ່ນຈະປົກປ້ອງແລະອວຍພອນເຂົາເຈົ້າ. ພະເຢໂຫວາຮັບຮອງກັບເຂົາເຈົ້າຜ່ານທາງໂມເຊວ່າ: “ກົດໝາຍທີ່ຂ້ອຍບອກພວກເຈົ້າໃນມື້ນີ້ ບໍ່ຍາກເກີນໄປທີ່ພວກເຈົ້າຈະເຂົ້າໃຈ ແລະທັງບໍ່ຍາກເກີນໄປທີ່ພວກເຈົ້າຈະເຮັດຕາມ.” (ພບຍ. 30:11, 16) ແຕ່ຖ້າຄົນອິດສະຣາເອນບໍ່ເຊື່ອຟັງກົດໝາຍຂອງພະເຢໂຫວາ ຫຼືຖ້າເຂົາເຈົ້າເລືອກທີ່ຈະນະມັດສະການພະເຈົ້າອື່ນ ພະເຢໂຫວາຈະບໍ່ປົກປ້ອງແລະບໍ່ອວຍພອນເຂົາເຈົ້າອີກຕໍ່ໄປ ແລະເຂົາເຈົ້າຈະຕ້ອງເຈິກັບຄວາມທຸກຍາກລຳບາກ. ແຕ່ເຖິງຈະເປັນແນວນັ້ນກໍບໍ່ໄດ້ໝາຍຄວາມວ່າພະເຢໂຫວາຈະປະຖິ້ມເຂົາເຈົ້າ. ເຂົາເຈົ້າສາມາດ ‘ກັບມາຫາພະເຢໂຫວາພະເຈົ້າຂອງ [ເຂົາເຈົ້າ] ແລະເຊື່ອຟັງ [ເພິ່ນ].’ (ພບຍ. 30:1-3, 17-20) ເວົ້າງ່າຍໆກໍຄື ເຂົາເຈົ້າສາມາດກັບໃຈໄດ້. ຖ້າເຮັດແບບນັ້ນ ພະເຢໂຫວາຈະໃກ້ຊິດກັບເຂົາເຈົ້າແລະອວຍພອນເຂົາເຈົ້າຄືເກົ່າ.
5. ພະເຢໂຫວາສະແດງໃຫ້ເຫັນແນວໃດວ່າເພິ່ນບໍ່ໄດ້ໝົດຫວັງກັບຄົນອິດສະຣາເອນ? (2 ກະສັດ 17:13, 14)
5 ຄົນອິດສະຣາເອນທີ່ພະເຢໂຫວາເລືອກໃຫ້ເປັນປະຊາຊົນຂອງເພິ່ນໄດ້ເຮັດຜິດຕໍ່ເພິ່ນຫຼາຍເທື່ອ. ນອກຈາກເຂົາເຈົ້າຈະນະມັດສະການພະເຈົ້າປອມແລ້ວ ເຂົາເຈົ້າຍັງເຮັດຊົ່ວຫຼາຍຢ່າງ. ຍ້ອນແນວນີ້ ເຂົາເຈົ້າຈຶ່ງເຈິກັບຄວາມຍາກລຳບາກ. ແຕ່ພະເຢໂຫວາບໍ່ໄດ້ໝົດຫວັງໃນໂຕເຂົາເຈົ້າ ເພິ່ນໄດ້ສົ່ງຜູ້ພະຍາກອນໄປຫາເຂົາເຈົ້າຫຼາຍເທື່ອເພື່ອກະຕຸ້ນເຂົາເຈົ້າໃຫ້ກັບໃຈແລະກັບມາຫາເພິ່ນ.—ອ່ານ 2 ກະສັດ 17:13, 14
6. ພະເຢໂຫວາໄດ້ໃຊ້ພວກຜູ້ພະຍາກອນຂອງເພິ່ນໄປເຕືອນຄົນອິດສະຣາເອນແນວໃດໃຫ້ເຫັນວ່າເປັນຫຍັງຈຶ່ງຕ້ອງກັບໃຈ? (ເບິ່ງຮູບນຳ)
6 ເມື່ອຄົນອິດສະຣາເອນບໍ່ເຊື່ອຟັງພະເຢໂຫວາ ຫຼາຍເທື່ອເພິ່ນໄດ້ໃຊ້ພວກຜູ້ພະຍາກອນໃຫ້ໄປແກ້ໄຂເຂົາເຈົ້າແລະເຕືອນວ່າຈະເກີດຫຍັງຂຶ້ນຖ້າເຂົາເຈົ້າບໍ່ປ່ຽນແປງໂຕເອງ. ຕົວຢ່າງເຊັ່ນ: ພະເຢໂຫວາເວົ້າຜ່ານທາງຜູ້ພະຍາກອນເຢເຣມີຢາວ່າ: “ອິດສະຣາເອນທີ່ຫັກຫຼັງເຮົາເອີ້ຍ ໃຫ້ກັບມາສະ. ເຮົາຈະບໍ່ເບິ່ງເຈົ້າແບບໃຈຮ້າຍແລ້ວ ຍ້ອນເຮົາສັດຊື່ຕໍ່ເຈົ້າ . . . ເຮົາຈະບໍ່ຄຽດໃຫ້ເຈົ້າຕະຫຼອດໄປ ຂໍພຽງແຕ່ເຈົ້າຍອມຮັບວ່າໄດ້ເຮັດຜິດ.” (ຢຣມ. 3:12, 13) ພະເຢໂຫວາໄດ້ໃຫ້ຜູ້ພະຍາກອນໂຢເອນໄປບອກເຂົາເຈົ້າວ່າ: “ໃຫ້ພວກເຈົ້າກັບມາຫາເຮົາດ້ວຍສຸດຫົວໃຈ.” (ຢອ. 2:12, 13) ພະເຢໂຫວາຍັງສົ່ງຜູ້ພະຍາກອນເອຊາຢາໄປບອກເຂົາເຈົ້າວ່າ: “ໃຫ້ພວກເຈົ້າເຮັດໃຫ້ໂຕເອງສະອາດ. ຢ່າເຮັດສິ່ງທີ່ບໍ່ດີຢູ່ຕໍ່ໜ້າເຮົາ. ໃຫ້ພວກເຈົ້າເຊົາເຮັດສິ່ງທີ່ຊົ່ວ.” (ອຊຢ. 1:16-19) ນອກຈາກນັ້ນ ພະເຢໂຫວາເວົ້າກັບເຂົາເຈົ້າຜ່ານທາງເອເຊກຽນວ່າ: “ເຮົາບໍ່ດີໃຈທີ່ເຫັນຄົນຊົ່ວຕາຍ ແຕ່ເຮົາຢາກໃຫ້ລາວເຊົາເຮັດຊົ່ວເພື່ອຈະມີຊີວິດຢູ່ຕໍ່ໄປ. ເຮົາບໍ່ດີໃຈທີ່ເຫັນຜູ້ໃດຜູ້ໜຶ່ງຕາຍ. ດັ່ງນັ້ນ ໃຫ້ເຊົາເຮັດຊົ່ວເພື່ອຈະມີຊີວິດຢູ່ຕໍ່ໄປ.” (ອຊກ. 18:23, 32) ພະເຢໂຫວາດີໃຈຫຼາຍເມື່ອເຫັນປະຊາຊົນຂອງເພິ່ນກັບໃຈ ຍ້ອນເພິ່ນຢາກໃຫ້ເຂົາເຈົ້າມີຊີວິດຕະຫຼອດໄປ. ພະເຢໂຫວາມີແຕ່ລໍຖ້າໃຫ້ປະຊາຊົນຂອງເພິ່ນກັບໃຈກ່ອນ ແລ້ວເພິ່ນຈຶ່ງຊ່ວຍເຂົາເຈົ້າບໍ? ໃຫ້ເຮົາມາເບິ່ງບາງຕົວຢ່າງນຳກັນກ່ຽວກັບເລື່ອງນີ້.
ເມື່ອຄົນອິດສະຣາເອນບໍ່ເຊື່ອຟັງ ຫຼາຍເທື່ອພະເຢໂຫວາໄດ້ໃຊ້ພວກຜູ້ພະຍາກອນໃຫ້ໄປເຕືອນເຂົາເຈົ້າໃຫ້ກັບໃຈ (ເບິ່ງຂໍ້ 6-7)
7. ພະເຢໂຫວາສອນຄົນອິດສະຣາເອນແນວໃດໂດຍໃຊ້ເລື່ອງຂອງໂຮເຊອາກັບເມຍຂອງລາວ?
7 ພະເຢໂຫວາສອນຄົນອິດສະຣາເອນໂດຍໃຊ້ເລື່ອງຊີວິດຈິງຂອງໂກເມທີ່ເປັນເມຍຂອງຜູ້ພະຍາກອນໂຮເຊອາ. ຫຼັງຈາກທີ່ໂກເມຫຼິ້ນຊູ້ ລາວກໍໜີຈາກໂຮເຊອາແລ້ວໄປຢູ່ກັບຜູ້ຊາຍຄົນອື່ນ. ພະເຢໂຫວາໄດ້ເຮັດແນວໃດເພື່ອຊ່ວຍລາວ? ພະເຢໂຫວາຜູ້ທີ່ສາມາດອ່ານຫົວໃຈທຸກຄົນບອກໂຮເຊອາວ່າ: “ໃຫ້ເຈົ້າຮັກຜູ້ຍິງຄົນນັ້ນອີກເທື່ອໜຶ່ງ ເຖິງວ່າລາວຈະເຄີຍຮັກຜູ້ຊາຍຄົນອື່ນແລະຫຼິ້ນຊູ້. ໃຫ້ເຈົ້າຮັກລາວຄືກັບທີ່ພະເຢໂຫວາຮັກພວກອິດສະຣາເອນ ເຖິງວ່າເຂົາເຈົ້າໄປຫາພະເຈົ້າອື່ນ.” (ຮຊອ. 3:1; ສພສ. 16:2) ຂໍໃຫ້ສັງເກດວ່າເມຍຂອງໂຮເຊອາຍັງເຮັດຜິດຮ້າຍແຮງຢູ່ ແຕ່ພະເຢໂຫວາບອກໂຮເຊອາໃຫ້ໄປຫາລາວ ຍົກໂທດໃຫ້ລາວ ແລະເອົາລາວກັບມາເປັນເມຍຄືເກົ່າ. a ພະເຢໂຫວາໃຊ້ຕົວຢ່າງນີ້ເພື່ອສອນຄົນອິດສະຣາເອນວ່າເພິ່ນຮູ້ສຶກແນວໃດກັບເຂົາເຈົ້າ. ເຖິງວ່າເຂົາເຈົ້າໄດ້ເຮັດຜິດຮ້າຍແຮງ ແຕ່ເພິ່ນກໍຍັງຮັກແລະພະຍາຍາມຊ່ວຍເຂົາເຈົ້າໃຫ້ກັບໃຈແລະປ່ຽນແປງແນວທາງຊີວິດໃໝ່. ຕົວຢ່າງນີ້ສອນເຮົາໃຫ້ຮູ້ວ່າພະເຢໂຫວາສາມາດອ່ານຫົວໃຈມະນຸດທຸກຄົນໄດ້ ແລະເພິ່ນພະຍາຍາມຊ່ວຍຄົນທີ່ຍັງເຮັດຜິດຮ້າຍແຮງຢູ່ໃຫ້ກັບໃຈ. (ສພສ. 17:3) ໃຫ້ເຮົາມາເບິ່ງຕື່ມວ່າພະເຢໂຫວາເຮັດແບບນັ້ນແນວໃດ.
ພະເຢໂຫວາຊ່ວຍຄົນທີ່ເຮັດຜິດແນວໃດໃຫ້ກັບໃຈ
8. ພະເຢໂຫວາໄດ້ເຮັດແນວໃດເພື່ອຊ່ວຍກາອິນໃຫ້ກັບໃຈ? (ປະຖົມມະການ 4:3-7) (ເບິ່ງຮູບນຳ)
8 ກາອິນເປັນລູກຊາຍກົກຂອງອາດາມກັບເອວາ. ລາວໄດ້ຮັບບາບຈາກພໍ່ແມ່ເຊິ່ງເຮັດໃຫ້ລາວຢາກເຮັດຜິດ. ບໍ່ພຽງແຕ່ເທົ່ານັ້ນ ຄຳພີໄບເບິນຍັງບອກວ່າ: “ການກະທຳຂອງລາວຊົ່ວ.” (1ຢຮ. 3:12) ນີ້ອາດເປັນເຫດຜົນທີ່ພະເຢໂຫວາ “ບໍ່ພໍໃຈກາອິນແລະເຄື່ອງບູຊາຂອງລາວ” ຕອນທີ່ລາວເອົາໃຫ້ພະເຢໂຫວາ. ແທນທີ່ກາອິນຈະປ່ຽນແປງໂຕເອງ ລາວພັດ “ໃຈຮ້າຍແລະຄຽດແຮງ.” ພະເຢໂຫວາເຮັດແນວໃດ? ເພິ່ນເວົ້າກັບກາອິນແບບກົງໆ. (ອ່ານປະຖົມມະການ 4:3-7) ຂໍໃຫ້ສັງເກດວ່າພະເຢໂຫວາເວົ້າດີໆກັບກາອິນແລະບອກລາວວ່າຖ້າລາວປ່ຽນແປງໂຕເອງແລະເຮັດດີ ເພິ່ນກໍຈະອວຍພອນລາວ. ພະເຢໂຫວາຍັງເຕືອນກາອິນນຳວ່າຖ້າລາວບໍ່ເຊົາໃຈຮ້າຍ ລາວກໍຈະເຮັດຜິດເຊິ່ງຈະສົ່ງຜົນເສຍຕາມມາ. ເປັນຕາເສຍດາຍທີ່ກາອິນບໍ່ຟັງພະເຢໂຫວາ. ລາວບໍ່ຍອມໃຫ້ພະເຢໂຫວາຊ່ວຍລາວໃຫ້ກັບໃຈ. ຫຼັງຈາກກາອິນບໍ່ຟັງພະເຢໂຫວາ ເພິ່ນເຊົາຊ່ວຍຄົນບາບຄົນອື່ນໃຫ້ກັບໃຈບໍ? ບໍ່ໄດ້ເຊົາ!
ພະເຢໂຫວາເວົ້າດີໆກັບກາອິນແລະບອກລາວວ່າຖ້າລາວປ່ຽນແປງໂຕເອງແລະເຮັດດີ ເພິ່ນກໍຈະອວຍພອນລາວ. ພະເຢໂຫວາຍັງເຕືອນກາອິນນຳວ່າຖ້າລາວບໍ່ເຊົາໃຈຮ້າຍ ລາວກໍຈະເຮັດຜິດເຊິ່ງຈະສົ່ງຜົນເສຍຕາມມາ. (ເບິ່ງຂໍ້ 8)
9. ພະເຢໂຫວາຊ່ວຍດາວິດແນວໃດໃຫ້ກັບໃຈ?
9 ພະເຢໂຫວາຮັກກະສັດດາວິດຫຼາຍ. ເພິ່ນເຖິງຂັ້ນເອີ້ນລາວວ່າ “ຄົນທີ່ເຮົາພໍໃຈ.” (ກຈກ. 13:22) ແຕ່ດາວິດເຮັດຜິດຮ້າຍແຮງ ລາວຫຼິ້ນຊູ້ແລະຂ້າຄົນ. ຕາມກົດໝາຍຂອງໂມເຊແລ້ວ ດາວິດສົມຄວນຕາຍ. (ລລວ. 20:10; ຈຊບ. 35:31) ແຕ່ພະເຢໂຫວາຢາກຊ່ວຍດາວິດໃຫ້ກັບໃຈ b ເພິ່ນຈຶ່ງສົ່ງຜູ້ພະຍາກອນນາທານໄປຫາດາວິດເຖິງວ່າຕອນນັ້ນດາວິດບໍ່ໄດ້ສະແດງໃຫ້ເຫັນວ່າລາວກັບໃຈ. ນາທານໃຊ້ຕົວຢ່າງປຽບທຽບທີ່ເຂົ້າເຖິງຫົວໃຈຈົນກະຕຸ້ນດາວິດໃຫ້ກັບໃຈ. (2ຊມ. 12:1-14) ດາວິດຂຽນເພງສັນລະເສີນບົດໜຶ່ງຈາກໃຈທີ່ສະແດງໃຫ້ເຫັນວ່າລາວກັບໃຈແທ້ໆ. (ພສ. 51, ຫົວບົດ) ເພງສັນລະເສີນບົດນັ້ນຍັງຊ່ວຍຫຼາຍຄົນທີ່ເຮັດຜິດໃຫ້ກັບໃຈຄືກັນ. ເຮົາດີໃຈແທ້ໆທີ່ພະເຢໂຫວາສະແດງຄວາມຮັກຕໍ່ດາວິດແລະຊ່ວຍລາວໃຫ້ກັບໃຈ.
10. ເຈົ້າຮູ້ສຶກແນວໃດທີ່ພະເຢໂຫວາອົດທົນກັບເຮົາແລະຍົກໂທດໃຫ້ເຮົາ?
10 ພະເຢໂຫວາຊັງບາບແລະຄວາມຊົ່ວທຸກຮູບແບບ. (ພສ. 5:4, 5) ແຕ່ພະເຢໂຫວາຮັກເຮົາ ເມື່ອເຮົາເຮັດຜິດເພິ່ນກໍຢາກຊ່ວຍເຮົາ. ເພິ່ນພະຍາຍາມຊ່ວຍຄົນທີ່ເຮັດຜິດໃຫ້ກັບໃຈແລະໃກ້ຊິດກັບເພິ່ນເຖິງວ່າເຂົາເຈົ້າໄດ້ເຮັດຜິດຮ້າຍແຮງ. ເຮົາດີໃຈແທ້ໆທີ່ຮູ້ເລື່ອງນີ້. ເມື່ອເຮົາຄິດເຖິງຄວາມອົດທົນແລະການຍົກໂທດຂອງພະເຢໂຫວາ ເຮົາກໍຢາກຕັ້ງໃຈທີ່ຈະສັດຊື່ຕໍ່ເພິ່ນແລະຟ້າວກັບໃຈເມື່ອເຮັດຜິດ. ຕອນນີ້ເຮົາຈະມາເບິ່ງວ່າພະເຢຊູສອນຫຍັງພວກລູກສິດເລື່ອງການກັບໃຈ.
ພະເຢຊູສອນຫຍັງພວກລູກສິດເລື່ອງການກັບໃຈ
11-12. ພະເຢຊູໃຊ້ຕົວຢ່າງປຽບທຽບຫຍັງເພື່ອສອນເຮົາໃຫ້ຮູ້ວ່າພະເຢໂຫວາເປັນພະເຈົ້າທີ່ພ້ອມຈະໃຫ້ອະໄພ? (ເບິ່ງຮູບໜ້າປົກ)
11 ໃນປີ 29 ກໍຮອດເວລາທີ່ເມຊີອາປາກົດໂຕໃນໂລກນີ້ ພະເຢໂຫວາໄດ້ໃຊ້ໂຢຮັນຜູ້ໃຫ້ບັບເຕມາປະກາດກັບປະຊາຊົນຂອງເພິ່ນແລະກະຕຸ້ນເຂົາເຈົ້າໃຫ້ກັບໃຈ. ເມື່ອພະເຢຊູເລີ່ມເຮັດວຽກຮັບໃຊ້ ເພິ່ນກໍໄດ້ສອນປະຊາຊົນວ່າເປັນເລື່ອງສຳຄັນຫຼາຍແທ້ໆທີ່ຕ້ອງກັບໃຈ.—ມທ. 3:1, 2; 4:17
12 ຕອນທີ່ພະເຢຊູຮັບໃຊ້ຢູ່ໂລກນີ້ ເພິ່ນສອນຜູ້ຄົນໃຫ້ຮູ້ວ່າພະເຢໂຫວາເປັນພະເຈົ້າທີ່ພ້ອມຈະໃຫ້ອະໄພ. ພະເຢຊູເຮັດແບບນັ້ນໂດຍໃຊ້ຕົວຢ່າງປຽບທຽບເລື່ອງລູກທີ່ຫຼົງທາງ. ລູກຜູ້ນີ້ເລືອກທີ່ຈະໃຊ້ຊີວິດແບບເສເພໄລຍະໜຶ່ງ. ແຕ່ຫຼັງຈາກນັ້ນ ລາວກໍ “ເລີ່ມສຳນຶກໂຕ” ແລະກັບມາເຮືອນ. ພໍ່ຂອງລາວຮູ້ສຶກແນວໃດ? ພະເຢຊູເວົ້າວ່າ ຕອນທີ່ລູກ “ຍັງຢູ່ໄກໆ ພໍ່ກໍແນມເຫັນແລະຮູ້ສຶກອີ່ຕົນລາວ ພໍ່ຈຶ່ງແລ່ນໄປຫາ ທັງກອດແລະຈູບລາວ.” ລູກຊາຍຜູ້ນີ້ບໍ່ໄດ້ຄາດໝາຍວ່າພໍ່ຈະຍົກໂທດໃຫ້ ລາວຈຶ່ງຂໍເປັນຄົນຮັບໃຊ້ຢູ່ເຮືອນຂອງພໍ່. ແຕ່ພໍ່ກໍພ້ອມທີ່ຈະຍົກໂທດໃຫ້ລາວ ຮັບລາວກັບເຂົ້າມາໃນຄອບຄົວ ແລະເອີ້ນລາວວ່າ: “ລູກຂອງຂ້ອຍຜູ້ນີ້.” ພໍ່ເວົ້າວ່າ: “ລາວເຄີຍຫຼົງທາງ ແຕ່ຕອນນີ້ລາວກັບມາແລ້ວ.” (ລກ. 15:11-32) ຕອນທີ່ພະເຢຊູມີຊີວິດຢູ່ໃນສະຫວັນກ່ອນທີ່ເພິ່ນຈະມາໂລກນີ້ ມີຫຼາຍເທື່ອທີ່ເພິ່ນໄດ້ເຫັນວ່າພໍ່ຂອງເພິ່ນສະແດງຄວາມເຫັນອົກເຫັນໃຈແລະພ້ອມທີ່ຈະຍົກໂທດໃຫ້ຄົນເຮັດຜິດທີ່ກັບໃຈ. ຕົວຢ່າງປຽບທຽບຂອງພະເຢຊູເຮັດໃຫ້ເຮົາອົບອຸ່ນໃຈແລະເຮັດໃຫ້ໝັ້ນໃຈວ່າພະເຢໂຫວາເປັນພະເຈົ້າທີ່ເມດຕາແທ້ໆ.
ພໍ່ໃນຕົວຢ່າງປຽບທຽບເລື່ອງລູກທີ່ຫຼົງທາງຟ້າວແລ່ນໄປກອດລູກຊາຍທີ່ກັບມາເຮືອນ (ເບິ່ງຂໍ້ 11-12)
13-14. ອັກຄະສາວົກເປໂຕໄດ້ຮຽນຫຍັງໃນເລື່ອງການກັບໃຈ ແລະລາວສອນຄົນອື່ນແນວໃດໃນເລື່ອງນີ້? (ເບິ່ງຮູບນຳ)
13 ອັກຄະສາວົກເປໂຕໄດ້ຮຽນຫຼາຍຢ່າງຈາກພະເຢຊູເລື່ອງການກັບໃຈແລະການໃຫ້ອະໄພ. ເປໂຕເຮັດຜິດພາດຫຼາຍເທື່ອ ແຕ່ພະເຢຊູກໍພ້ອມທີ່ຈະຍົກໂທດໃຫ້ລາວ. ຕົວຢ່າງເຊັ່ນ: ຫຼັງຈາກທີ່ເປໂຕປະຕິເສດຮອດ 3 ເທື່ອວ່າບໍ່ຮູ້ຈັກພະເຢຊູ ລາວກໍຮູ້ສຶກຜິດແລະເສຍໃຈຫຼາຍ. (ມທ. 26:34, 35, 69-75) ແຕ່ຫຼັງຈາກທີ່ພະເຢຊູຟື້ນຄືນມາຈາກຕາຍ ເພິ່ນກໍໄປຫາເປໂຕເປັນສ່ວນໂຕ. (ລກ. 24:33, 34; 1ກຣ. 15:3-5) ພະເຢຊູຮູ້ວ່າເປໂຕກັບໃຈແລ້ວ ແລະເພິ່ນຢາກໃຫ້ລາວໝັ້ນໃຈວ່າເພິ່ນໄດ້ຍົກໂທດໃຫ້ລາວແລ້ວ.—ເບິ່ງມາຣະໂກ 16:7 ແລະຂໍ້ມູນສຳລັບສຶກສາຂອງຄຳວ່າ “ແລະເປໂຕ” (ພາສາໄທ)
14 ເປໂຕຮູ້ແລະເຂົ້າໃຈວ່າການກັບໃຈແລະການໃຫ້ອະໄພໝາຍເຖິງຫຍັງ. ເປໂຕເຄີຍເຈິເລື່ອງນີ້ດ້ວຍໂຕເອງ ລາວຈຶ່ງສອນຄົນອື່ນໃນເລື່ອງນີ້ໄດ້. ບໍ່ດົນຫຼັງຈາກເທດສະການເພັນເຕກອດ ເປໂຕໄດ້ບັນລະຍາຍໃຫ້ຄົນຢິວກຸ່ມໜຶ່ງຟັງ. ລາວເວົ້າວ່າເຂົາເຈົ້າໄດ້ຂ້າເມຊີອາແລ້ວ ແລະລາວໄດ້ກະຕຸ້ນເຂົາເຈົ້າດ້ວຍຄວາມຮັກວ່າ: “ໃຫ້ກັບໃຈແລະປ່ຽນແປງຊີວິດໃໝ່ເພື່ອຄວາມຜິດຂອງພວກເຈົ້າຈະຖືກລົບລ້າງ ແລ້ວຈາກນີ້ໄປພວກເຈົ້າຈະໄດ້ຮັບຄວາມສົດຊື່ນຈາກພະເຢໂຫວາ.” (ກຈກ. 3:14, 15, 17, 19) ເປໂຕເຮັດໃຫ້ເຫັນວ່າການກັບໃຈຈະກະຕຸ້ນຄົນທີ່ເຮັດຜິດໃຫ້ຫັນກັບ ເຊິ່ງໝາຍຄວາມວ່າເຂົາເຈົ້າຕ້ອງປ່ຽນແປງຄວາມຄິດແລະການກະທຳ ແລະກັບມາເຮັດສິ່ງທີ່ພະເຈົ້າພໍໃຈ. ນອກຈາກນັ້ນ ເປໂຕຍັງບອກວ່າພະເຢໂຫວາຈະລົບລ້າງຄວາມຜິດຂອງເຂົາເຈົ້າແລະເຮັດຄືກັບວ່າຄວາມຜິດນັ້ນບໍ່ເຄີຍມີ. ຫຼາຍສິບປີຕໍ່ມາ ເປໂຕໄດ້ຮັບຮອງກັບຄລິດສະຕຽນວ່າ: “ພະເຢໂຫວາ . . . ອົດທົນກັບພວກເຈົ້າຍ້ອນບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.” (2ປຕ. 3:9) ນີ້ເປັນຄວາມຫວັງທີ່ດີແທ້ໆສຳລັບຄລິດສະຕຽນທຸກຄົນເຖິງວ່າເຂົາເຈົ້າຈະເຮັດຜິດຮ້າຍແຮງກໍຕາມ.
ພະເຢຊູສະແດງຄວາມຮັກໂດຍໃຫ້ອະໄພແລະເຮັດໃຫ້ອັກຄະສາວົກທີ່ກັບໃຈຮູ້ສຶກໝັ້ນໃຈ (ເບິ່ງຂໍ້ 13-14)
15-16. (ກ) ໂປໂລໄດ້ຮຽນຫຍັງກ່ຽວກັບການໃຫ້ອະໄພ? (1 ຕີໂມທຽວ 1:12-15) (ຂ) ເຮົາຈະຮຽນຫຍັງໃນບົດຕໍ່ໄປ?
15 ໂຊໂລຈາກເມືອງຕາໂຊເຮັດຜິດຫຼາຍຢ່າງ. ລາວຂົ່ມເຫງລູກສິດຂອງພະເຢຊູຢ່າງໜັກ. (ກຈກ. 7:58–8:3) ຄລິດສະຕຽນສ່ວນຫຼາຍຄືຊິຄິດວ່າບໍ່ມີທາງທີ່ລາວຈະກັບໃຈແລະປ່ຽນແປງໂຕເອງໄດ້ ແຕ່ພະເຢຊູບໍ່ໄດ້ຄິດແບບນັ້ນ. ພະເຢຊູຮູ້ວ່າໂຊໂລສາມາດກັບໃຈແລະປ່ຽນແປງໂຕເອງໄດ້. ທັງພະເຢຊູແລະພະເຢໂຫວາເຫັນຄຸນລັກສະນະທີ່ດີໃນໂຕຂອງໂຊໂລ. ພະເຢຊູເວົ້າວ່າ: “ຜູ້ຊາຍຄົນນີ້ເປັນເຄື່ອງມືທີ່ຂ້ອຍເລືອກໄວ້ເພື່ອປະກາດຊື່ຂອງຂ້ອຍ.” (ກຈກ. 9:15) ພະເຢຊູເຖິງຂັ້ນເຮັດການອັດສະຈັນເພື່ອຊ່ວຍໂຊໂລໃຫ້ກັບໃຈ. (ກຈກ. 9:1-9, 17-20) ຫຼັງຈາກທີ່ໂຊໂລເຂົ້າມາເປັນຄລິດສະຕຽນແລ້ວ ລາວກໍຖືກເອີ້ນວ່າໂປໂລ ແລະລາວມັກເວົ້າເລື້ອຍໆວ່າລາວໄດ້ຮັບຄວາມເມດຕາຈາກພະເຢໂຫວາແລະພະເຢຊູຫຼາຍແທ້ໆ. (ອ່ານ 1 ຕີໂມທຽວ 1:12-15) ໂປໂລສອນພີ່ນ້ອງວ່າ: “ພະເຈົ້າເມດຕາເຈົ້າຫຼາຍແທ້ໆແລະພະຍາຍາມຊ່ວຍເຈົ້າໃຫ້ກັບໃຈ.”—ຣມ. 2:4.
16 ເມື່ອໂປໂລໄດ້ຍິນວ່າມີການເຮັດຜິດສິນລະທຳຢູ່ປະຊາຄົມໃນເມືອງໂກຣິນໂທ ລາວຈັດການກັບເລື່ອງນີ້ແນວໃດ? ເຮົາຈະໄດ້ຮຽນຈາກຄຳເວົ້າຂອງໂປໂລທີ່ວ່າພະເຢໂຫວາສະແດງຄວາມຮັກແນວໃດເມື່ອເພິ່ນສັ່ງສອນຜູ້ຮັບໃຊ້ຂອງເພິ່ນ ແລະເພິ່ນສະແດງຄວາມເມດຕາແນວໃດເມື່ອເຂົາເຈົ້າກັບໃຈ. ເຮົາຍັງຈະຮຽນວ່າເຮົາຈະຮຽນແບບພະເຢໂຫວາແນວໃດໃນເລື່ອງນີ້? ໃນບົດຕໍ່ໄປ ເຮົາຈະມາເບິ່ງເລື່ອງທັງໝົດນີ້ຢ່າງລະອຽດ.
ເພງທີ 33 ມອບພາລະຂອງເຈົ້າໄວ້ກັບພະເຢໂຫວາ
a ໃນກໍລະນີຂອງໂຮເຊອາເປັນເຫດການທີ່ບໍ່ປົກກະຕິ. ໃນທຸກມື້ນີ້ ພະເຢໂຫວາບໍ່ໄດ້ຮຽກຮ້ອງໃຫ້ຜູ້ທີ່ບໍ່ໄດ້ເຮັດຜິດຕ້ອງຢູ່ກັບຄູ່ຂອງໂຕເອງຕໍ່ໄປທີ່ເຮັດຜິດສິນລະທຳ. ທີ່ຈິງ ພະເຢໂຫວາໃຫ້ພະເຢຊູລູກຊາຍຂອງເພິ່ນອະທິບາຍວ່າຜົວຫຼືເມຍສາມາດປະກັບຄູ່ຂອງໂຕເອງທີ່ເຮັດຜິດໄດ້ຖ້າລາວຢາກເຮັດແບບນັ້ນ.—ມທ. 5:32; 19:9
b ເບິ່ງບົດຄວາມ “ການໃຫ້ອະໄພຂອງພະເຢໂຫວາມີຄວາມໝາຍແນວໃດສຳລັບເຈົ້າ?” ໃນຫໍສັງເກດການ 15 ພະຈິກ 2012 ໜ້າ 21-23 ຂໍ້ 3-10. (ພາສາໄທ)
