ບົດຄວາມສຶກສາທີ 36
ສົງຄາມອະລະມະເຄໂດນແມ່ນຂ່າວດີ!
“ເຂົາໄດ້ໃຫ້ກະສັດທັງຫຼາຍມາຊຸມນຸມກັນທີ່ . . . ອະລະມະເຄໂດນ.”—ຄຳປ. 16:16
ເພງ 150 ຈົ່ງຊອກຫາພະເຈົ້າເພື່ອເຈົ້າຈະລອດ
ໃຈຄວາມສຳຄັນ *
1-2. (ກ) ເປັນຫຍັງສົງຄາມອະລະມະເຄໂດນຈຶ່ງເປັນຂ່າວດີສຳລັບມະນຸດ? (ຂ) ເຮົາຈະພິຈາລະນາຄຳຖາມຫຍັງໃນບົດຄວາມນີ້?
ເຈົ້າເຄີຍໄດ້ຍິນຜູ້ຄົນເວົ້າເຖິງ “ອະລະມະເຄໂດນ” ວ່າເປັນສົງຄາມນິວເຄຼຍ ຫຼືໄພພິບັດທາງທຳມະຊາດບໍ? ນີ້ກົງກັນຂ້າມກັບສິ່ງທີ່ຄຳພີໄບເບິນບອກ ຄຳພີໄບເບິນບອກວ່າອະລະມະເຄໂດນແມ່ນຂ່າວດີເພາະເປັນສິ່ງທີ່ເຮັດໃຫ້ມີຄວາມສຸກ! (ຄຳປ. 1:3) ສົງຄາມອະລະມະເຄໂດນບໍ່ແມ່ນການທຳລາຍລ້າງມະນຸດ ແຕ່ເປັນການປົກປ້ອງມະນຸດ! ເປັນແບບນັ້ນໄດ້ແນວໃດ?
2 ຄຳພີໄບເບິນບອກວ່າສົງຄາມອະລະມະເຄໂດນຈະຊ່ວຍມະນຸດໃຫ້ລອດໂດຍທຳລາຍການປົກຄອງຂອງມະນຸດ. ສົງຄາມນີ້ຈະທຳລາຍຄົນຊົ່ວ ແລະປົກປ້ອງຄົນດີ ແລະປົກປ້ອງໂລກຂອງເຮົາບໍ່ໃຫ້ຖືກທຳລາຍ. (ຄຳປ. 11:18) ເພື່ອຈະຊ່ວຍເຮົາໃຫ້ເຂົ້າໃຈເລື່ອງນີ້ຫຼາຍຂຶ້ນ ຂໍໃຫ້ເຮົາພິຈາລະນາ 4 ຄຳຖາມຕໍ່ໄປນີ້: ອະລະມະເຄໂດນແມ່ນຫຍັງ? ມີເຫດການຫຍັງແດ່ທີ່ຈະເກີດຂຶ້ນກ່ອນວັນອະລະມະເຄໂດນ? ເຮົາຕ້ອງເຮັດຫຍັງເພື່ອຈະຢູ່ໃນກຸ່ມຄົນທີ່ລອດຜ່ານສົງຄາມອະລະມະເຄໂດນ? ແລະເຮົາຈະຮັກສາຄວາມສັດຊື່ຕໍ່ພະເຢໂຫວາໄດ້ແນວໃດໃນຂະນະທີ່ວັນອະລະມະເຄໂດນກຳລັງໃກ້ເຂົ້າມາ?
ອະລະມະເຄໂດນແມ່ນຫຍັງ?
3. (ກ) ຄຳວ່າ “ອະລະມະເຄໂດນ” ໝາຍເຖິງຫຍັງ? (ຂ) ຕາມຄຳປາກົດ 16:14, 16 ເປັນຫຍັງເຮົາຮູ້ວ່າອະລະມະເຄໂດນບໍ່ແມ່ນສະຖານທີ່ທີ່ມີຢູ່ແທ້ໃນໂລກ?
3 ອ່ານຄຳປາກົດ 16:14, 16. ຄຳວ່າ “ອະລະມະເຄໂດນ” ປາກົດເທື່ອດຽວໃນຄຳພີໄບເບິນ. ຄຳນີ້ມາຈາກຄຳພາສາເຫບເລີທີ່ແປວ່າ “ພູເຂົາເມຄີດໂດ.” (ຄຳປ. 16:16) ເມຄີດໂດເປັນຊື່ເມືອງໜຶ່ງຂອງອິດສະລາແອນບູຮານ. (ຢຊວຍ. 17:11) ແຕ່ອະລະມະເຄໂດນບໍ່ແມ່ນສະຖານທີ່ທີ່ມີຢູ່ແທ້ໃນໂລກ. ອະລະມະເຄໂດນໝາຍເຖິງເຫດການທີ່ “ກະສັດທັງຫຼາຍທົ່ວແຜ່ນດິນໂລກ” ຈະມາລວມຕົວກັນຕໍ່ສູ້ກັບພະເຢໂຫວາ. (ຄຳປ. 16:14) ແຕ່ໃນບົດຄວາມນີ້ ເຮົາຍັງຈະໃຊ້ຄຳວ່າ “ອະລະມະເຄໂດນ” ເພື່ອໝາຍເຖິງສົງຄາມທີ່ເກີດຂຶ້ນທັນທີຫຼັງຈາກທີ່ກະສັດທົ່ວໂລກມາລວມຕົວກັນ. ເຮົາຮູ້ໄດ້ແນວໃດວ່າອະລະມະເຄໂດນບໍ່ແມ່ນສະຖານທີ່ແທ້ໆ? ທຳອິດ ພູເຂົາເມຄີດໂດບໍ່ມີແທ້. ທີສອງ ພື້ນທີ່ເມືອງເມຄີດໂດນ້ອຍເກີນໄປທີ່ຈະໃຫ້ “ກະສັດທັງຫຼາຍທົ່ວແຜ່ນດິນໂລກ” ລວມທັງກອງທັບແລະອາວຸດສົງຄາມຂອງພວກເຂົາມາລວມກັນຢູ່ຫັ້ນ. ທີສາມ ດັ່ງທີ່ເຮົາຈະເຫັນຕໍ່ໄປໃນບົດຄວາມນີ້ ສົງຄາມອະລະມະເຄໂດນຈະເລີ່ມຂຶ້ນເມື່ອ “ກະສັດທັງຫຼາຍ” ມາໂຈມຕີປະຊາຊົນຂອງພະເຈົ້າເຊິ່ງພວກເຂົາກະຈາຍຢູ່ທົ່ວໂລກ.
4. ເປັນຫຍັງພະເຢໂຫວາໃຊ້ຄຳວ່າເມຄີດໂດເມື່ອເວົ້າເຖິງສົງຄາມໃຫຍ່ຄັ້ງສຸດທ້າຍ?
4 ເປັນຫຍັງພະເຢໂຫວາໃຊ້ຄຳວ່າເມຄີດໂດເມື່ອເວົ້າເຖິງສົງຄາມໃຫຍ່ຄັ້ງສຸດທ້າຍ? ໃນສະໄໝທີ່ຂຽນຄຳພີໄບເບິນ ມີການສູ້ຮົບກັນຫຼາຍເທື່ອຢູ່ເມືອງເມຄີດໂດເຊິ່ງໃກ້ກັບຮ່ອມພູຢີເຊເອນ. ບາງເທື່ອ ພະເຢໂຫວາກໍໄດ້ເຂົ້າແຊກແຊງເພື່ອຊ່ວຍປະຊາຊົນຂອງພະອົງຢູ່ຫັ້ນ ເຊັ່ນ: ພະເຈົ້າໃຊ້ “ນ້ຳເມຄີດໂດ” ຊ່ວຍຜູ້ຕັດສິນບາລາກທີ່ເປັນຄົນອິດສະລາແອນໃຫ້ຮົບຊະນະກອງທັບຂອງຊາວການາອານເຊິ່ງມີແມ່ທັບຊີເຊລາເປັນຜູ້ນຳກອງທັບ. ບາລາກແລະຜູ້ພະຍາກອນຍິງທີ່ຊື່ເດໂບລາຂອບໃຈພະເຢໂຫວາສຳລັບໄຊຊະນະທີ່ໜ້າອັດສະຈັນນີ້ ແລະຮ້ອງເພງວ່າ: “ດາວທັງຫຼາຍໄດ້ເລວເສິກຕໍ່ສູ້ທ່ານຊີເຊຣາ . . . ນ້ຳຫ້ວຍກີໂຊນໄດ້ໄລ່ເຂົາເປັນຊະລາມໄປ.”—ຕັດສິນ. 5:19-21
5. ສົງຄາມອະລະມະເຄໂດນແລະການສູ້ຮົບສະໄໝບາລາກແຕກຕ່າງກັນແນວໃດ?
5 ບາລາກກັບເດໂບລາຮ້ອງເພງທ່ອນສຸດທ້າຍວ່າ: “ໂອ້ພະເຢໂຫວາເຈົ້າຂ້າ ຂໍໃຫ້ສັດຕູທັງປວງຕໍ່ພະອົງຈິບຫາຍຢ່າງນັ້ນເຖີ້ນ ແຕ່ວ່າຂໍໃຫ້ຄົນທັງຫຼາຍທີ່ຮັກພະອົງເປັນເໝືອນດວງຕາເວັນເມື່ອສ່ອງແສງກ້າ.” (ຕັດສິນ. 5:31) ໃນສົງຄາມອະລະມະເຄໂດນສັດຕູຂອງພະເຈົ້າກໍຈະຖືກທຳລາຍຄືກັນ ແລະຄົນທີ່ຮັກພະອົງກໍຈະລອດຊີວິດ. ແຕ່ຈຸດສຳຄັນທີ່ສົງຄາມອະລະມະເຄໂດນແຕກຕ່າງຈາກການສູ້ຮົບໃນສະໄໝບາລາກຄື: ປະຊາຊົນຂອງພະເຈົ້າຈະບໍ່ຕ້ອງຕໍ່ສູ້ ແລະພວກເຂົາບໍ່ໄດ້ມີອາວຸດຫຍັງເລີຍ! “ຄວາມເຂັ້ມແຂງ” ຂອງພວກເຂົາມາຈາກການທີ່ພວກເຂົາ “ມີໃຈທີ່ສະຫງົບແລະວາງໃຈ” ພະເຢໂຫວາແລະກອງທັບສະຫວັນຂອງພະອົງ.—ເອຊາ. 30:15, ລ.ມ.; ຄຳປ. 19:11-15
6. ພະເຢໂຫວາອາດໃຊ້ວິທີໃດແດ່ເພື່ອທຳລາຍສັດຕູຂອງພະອົງໃນສົງຄາມອະລະມະເຄໂດນ?
6 ພະເຢໂຫວາຈະເອົາຊະນະສັດຕູຂອງພະອົງໃນສົງຄາມອະລະມະເຄໂດນແນວໃດ? ພະອົງອາດໃຊ້ຫຼາຍວິທີທີ່ແຕກຕ່າງກັນ. ຕົວຢ່າງ: ພະອົງອາດໃຊ້ແຜ່ນດິນໄຫວ ໝາກເຫັບແລະຟ້າຜ່າ. (ໂຢບ 38:22, 23; ເອເຊກ. 38:19-22) ນອກຈາກນັ້ນ ພະອົງອາດເຮັດໃຫ້ພວກສັດຕູຂ້າກັນເອງ. (2 ຂ່າວ. 20:17, 22, 23) ແລະພະອົງກໍອາດໃຊ້ທູດສະຫວັນໃຫ້ມາຂ້າຄົນຊົ່ວ. (ເອຊາ. 37:36) ແຕ່ບໍ່ວ່າພະເຢໂຫວາຈະໃຊ້ວິທີໃດ ພະອົງກໍຈະຊະນະຢູ່ດີ. ສັດຕູຂອງພະອົງຈະຖືກທຳລາຍທັງໝົດ ແລະທຸກຄົນທີ່ຊອບທຳຈະລອດ.—ສຸພາ. 3:25, 26
ມີເຫດການຫຍັງແດ່ທີ່ຈະເກີດຂຶ້ນກ່ອນວັນອະລະມະເຄໂດນ?
7-8. (ກ) ຕາມ 1 ເທຊະໂລນີກ 5:1-6 ຜູ້ນຳຂອງໂລກຈະປະກາດເລື່ອງຫຍັງທີ່ຜິດປົກກະຕິ? (ຂ) ເປັນຫຍັງຄຳປະກາດນີ້ຈຶ່ງເປັນຄຳຕົວະທີ່ອັນຕະລາຍ?
7 ຈະມີຄຳປະກາດເລື່ອງ “ຄວາມສຸກສຳລານແລະຄວາມຢູ່ສຳບາຍ [“ສະຫງົບສຸກແລະປອດໄພແລ້ວ,” ລ.ມ.]” ກ່ອນ “ວັນຂອງພະອົງເຈົ້າ [ເຢໂຫວາ].” (ອ່ານ 1 ເທຊະໂລນີກ 5:1-6) ຄຳວ່າ “ວັນຂອງພະອົງເຈົ້າ [ເຢໂຫວາ]” ທີ່ບອກໃນ 1 ເທຊະໂລນີກ 5:2 ໝາຍເຖິງ “ຄວາມທຸກລຳບາກຄັ້ງໃຫຍ່.” (ຄຳປ. 7:14, ລ.ມ.) ແລ້ວເຮົາຈະຮູ້ໄດ້ແນວໃດວ່າຕອນໃດຄວາມທຸກລຳບາກຄັ້ງໃຫຍ່ຈະເລີ່ມຕົ້ນ? ຄຳພີໄບເບິນບອກວ່າຈະມີຄຳປະກາດທີ່ຜິດປົກກະຕິ. ຄຳປະກາດນີ້ເປັນສັນຍານບອກໃຫ້ຮູ້ວ່າຄວາມທຸກລຳບາກຄັ້ງໃຫຍ່ຈະເລີ່ມຕົ້ນຂຶ້ນ.
8 ພວກຜູ້ນຳຂອງໂລກຈະປະກາດວ່າ ຈະມີ “ຄວາມສຸກສຳລານແລະຄວາມຢູ່ສຳບາຍ [“ສະຫງົບສຸກແລະປອດໄພແລ້ວ,” ລ.ມ.]” ເປັນຫຍັງພວກເຂົາຈຶ່ງຈະປະກາດແບບນັ້ນ? ຜູ້ນຳສາສະໜາຈະມີສ່ວນຮ່ວມໃນເລື່ອງນີ້ບໍ? ອາດເປັນໄປໄດ້. ແຕ່ເຮົາຮູ້ວ່າຄຳປະກາດນີ້ເປັນຄຳຕົວະທີ່ມາຈາກຜີປີສາດ. ແລະຄຳຕົວະນີ້ອັນຕະລາຍຫຼາຍແທ້ໆເພາະມັນຈະເຮັດໃຫ້ຜູ້ຄົນຄິດວ່າພວກເຂົາປອດໄພຕອນທີ່ຄວາມທຸກລຳບາກຄັ້ງໃຫຍ່ທີ່ສຸດໃນປະຫວັດສາດ
ມະນຸດຈະເລີ່ມຕົ້ນຂຶ້ນ ແລ້ວ “ໃນເວລານັ້ນຄວາມຈິບຫາຍຈະມາເຖິງເຂົາໂດຍເຮວ ເໝືອນດັ່ງການເຈັບປວດມາເຖິງຜູ້ຍິງທີ່ທົງຄັບ.” ຈະເກີດຫຍັງຂຶ້ນກັບຜູ້ຮັບໃຊ້ທີ່ສັດຊື່ຂອງພະເຢໂຫວາ? ພວກເຂົາອາດຈະຕົກໃຈເມື່ອເຫັນວັນຂອງພະເຢໂຫວາເລີ່ມຕົ້ນຂຶ້ນ ແຕ່ພວກເຂົາກໍກຽມພ້ອມສຳລັບວັນນັ້ນ.9. ພະເຢໂຫວາຈະທຳລາຍລະບົບຂອງຊາຕານທັງໝົດບາດດຽວບໍ? ຂໍໃຫ້ອະທິບາຍ.
9 ພະເຢໂຫວາຈະບໍ່ທຳລາຍລະບົບຂອງຊາຕານທັງໝົດບາດດຽວຄືກັບທີ່ເຮັດໃນສະໄໝໂນເອ ແຕ່ພະອົງຈະທຳລາຍມັນໃນສອງຂັ້ນຕອນຫຼັກໆ. ທຳອິດ ພະອົງຈະທຳລາຍບາບີໂລນໃຫຍ່ເຊິ່ງກໍຄືສາສະໜາປອມທັງໝົດ. ຈາກນັ້ນ ໃນສົງຄາມອະລະມະເຄໂດນພະອົງຈະທຳລາຍສ່ວນທີ່ເຫຼືອຂອງລະບົບຊາຕານເຊິ່ງລວມເຖິງການເມືອງ ການທະຫານ ແລະການຄ້າ. ຕອນນີ້ໃຫ້ເຮົາມາເບິ່ງລາຍລະອຽດຂອງສອງຂັ້ນຕອນທີ່ສຳຄັນນັ້ນ.
10. ຕາມຄຳປາກົດ 17:1, 6 ແລະ 18:24 ເປັນຫຍັງພະເຢໂຫວາຈຶ່ງທຳລາຍບາບີໂລນໃຫຍ່?
10 ‘ການຕັດສິນຍິງແມ່ຈ້າງຜູ້ໃຫຍ່ນັ້ນ.’ (ອ່ານຄຳປາກົດ 17:1, 6; 18:24) ບາບີໂລນໃຫຍ່ໄດ້ເຮັດໃຫ້ຫຼາຍຄົນບໍ່ນັບຖືຊື່ພະເຈົ້າ. ມັນສອນເລື່ອງຕົວະກ່ຽວກັບພະເຈົ້າ. ສາສະໜາປອມເປັນຄືກັບຜູ້ຍິງທີ່ຜິດສິນລະທຳ ເພາະມັນບໍ່ສັດຊື່ຕໍ່ພະເຢໂຫວາໂດຍໄປສະໜັບສະໜູນການປົກຄອງຂອງມະນຸດ. ນອກຈາກນັ້ນ ມັນຍັງສວຍໃຊ້ອຳນາດທີ່ມີຂູດຮີດສະມາຊິກແລະເອົາເງິນພວກເຂົາ ແລະມັນຍັງໄດ້ຂ້າຫຼາຍຄົນເຊິ່ງລວມເຖິງຜູ້ຮັບໃຊ້ຂອງພະເຈົ້າບາງຄົນນຳ. (ຄຳປ. 19:2) ພະເຢໂຫວາຈະທຳລາຍບາບີໂລນໃຫຍ່ແນວໃດ?
11. “ສັດຮ້າຍຕົວໜຶ່ງສີແດງຈັດ” ໝາຍເຖິງຫຍັງ ແລະພະເຈົ້າຈະໃຊ້ມັນໃຫ້ທຳລາຍບາບີໂລນໃຫຍ່ແນວໃດ?
11 ພະເຢໂຫວາຈະທຳລາຍ “ຍິງແມ່ຈ້າງຜູ້ໃຫຍ່ນັ້ນ” ໂດຍໃຊ້ “ເຂົາ 10 ອັນ” ຂອງ “ສັດຮ້າຍຕົວຫນຶ່ງສີແດງຈັດ.” ສັດຮ້າຍນັ້ນໝາຍເຖິງອົງການສະຫະປະຊາຊາດ. ເຂົາ 10 ອັນໝາຍເຖິງລັດຖະບານຕ່າງໆທີ່ສະໜັບສະໜູນອົງການນັ້ນ. ເມື່ອຮອດເວລາທີ່ພະເຈົ້າກຳນົດ ອຳນາດທາງການເມືອງເຫຼົ່ານີ້ຈະໂຈມຕີບາບີໂລນໃຫຍ່. ພວກເຂົາ “ຈະກຽດຊັງຍິງແມ່ຈ້າງນັ້ນແລະຈະປຸ້ນຂອງຂອງມັນ” ໂດຍການປຸ້ນຊັບສົມບັດ ແລະເປີດໂປງຄວາມຊົ່ວຮ້າຍຂອງມັນ. (ຄຳປ. 17:3, 16) ການທຳລາຍນັ້ນຈະມາໄວຈົນເບິ່ງຄືວ່າເກີດຂຶ້ນໃນ “ວັນດຽວ.” ແລະຜູ້ທີ່ສະໜັບສະໜູນສາສະໜາປອມຈະຕົກໃຈ ຍ້ອນມັນເຄີຍອວດມາຕະຫຼອດ ວ່າ: “ເຮົານັ່ງຢູ່ເປັນຍິງກະສັດແລະບໍ່ເປັນແມ່ໝ້າຍ ແລະເຮົາຈະບໍ່ເຫັນຄວາມໂສກເສົ້າ.”—ຄຳປ. 18:7, 8
12. ພະເຢໂຫວາຈະບໍ່ຍອມໃຫ້ຊາດຕ່າງໆເຮັດຫຍັງ ແລະຍ້ອນຫຍັງ?
12 ພະເຈົ້າຈະບໍ່ຍອມໃຫ້ຊາດຕ່າງໆທຳລາຍປະຊາຊົນຂອງພະອົງ. ປະຊາຊົນຂອງພະເຈົ້າພູມໃຈທີ່ໄດ້ໃຊ້ຊື່ຂອງພະອົງ ແລະໄດ້ເຊື່ອຟັງຄຳສັ່ງທີ່ໃຫ້ໜີອອກຈາກບາບີໂລນໃຫຍ່. (ກິດ. 15:16, 17; ຄຳປ. 18:4) ພວກເຂົາກໍຍັງໄດ້ອອກຄວາມພະຍາຍາມຢ່າງເຕັມທີທີ່ຈະຊ່ວຍຄົນອື່ນໃຫ້ໜີອອກຈາກມັນຄືກັນ. ເຖິງວ່າຜູ້ຮັບໃຊ້ຂອງພະເຢໂຫວາຈະບໍ່ໄດ້ “ຮັບແຕ່ໄພອັນຕະລາຍທີ່ຖືກເມືອງນັ້ນ” ແຕ່ພວກເຂົາກໍຍັງຕ້ອງມີຄວາມເຊື່ອທີ່ເຂັ້ມແຂງເພື່ອຈະອົດທົນກັບສິ່ງທີ່ຈະເກີດຂຶ້ນຕໍ່ໄປ.
ບໍ່ວ່າຈະຢູ່ໃສໃນໂລກ ປະຊາຊົນຂອງພະເຈົ້າຈະໄວ້ວາງໃຈໃນພະອົງຕອນທີ່ການໂຈມຕີເກີດຂຶ້ນ (ເບິ່ງ ຂໍ້ 13) *
13. (ກ) ໂຄກແມ່ນໃຜ? (ຂ) ຕາມເອເຊກຽນ 38:2, 8, 9 ສິ່ງໃດຈະເຮັດໃຫ້ໂຄກມາໂຈມຕີປະຊາຊົນຂອງພະເຈົ້າ?
13 ການໂຈມຕີຂອງໂຄກ. (ອ່ານເອເຊກຽນ 38:2, 8, 9) ຫຼັງຈາກທີ່ພະເຢໂຫວາທຳລາຍສາສະໜາປອມທັງໝົດ ປະຊາຊົນຂອງພະເຈົ້າຈະໂດດເດັ່ນຄືກັບຕົ້ນໄມ້ຕົ້ນໜຶ່ງທີ່ລອດຈາກພາຍຸ. ແນ່ນອນວ່າຊາຕານຈະຄຽດແຮງ. ມັນຈະລະບາຍຄວາມຄຽດໂດຍໃຊ້ ‘ຖ້ອຍຄຳທີ່ເກີດຈາກການດົນໃຈທີ່ບໍ່ສະອາດ’ ເຊິ່ງກໍຄືການແຜ່ຂໍ້ມູນປອມຂອງພວກຜີປີສາດທີ່ຈະເຮັດໃຫ້ຊາດຕ່າງໆມາລວມຕົວກັນເພື່ອໂຈມຕີປະຊາຊົນຂອງພະເຢໂຫວາ. (ຄຳປ. 16:13, 14, ລ.ມ.) ຊາດຕ່າງໆທີ່ມາລວມຕົວກັນເອີ້ນວ່າ: ‘ໂຄກແຫ່ງມາໂຄກ.’ ເມື່ອຊາດເຫຼົ່ານັ້ນມາໂຈມຕີປະຊາຊົນຂອງພະເຢໂຫວາ ສົງຄາມອະລະມະເຄໂດນກໍຈະເລີ່ມຕົ້ນຂຶ້ນ.—ຄຳປ. 16:16
14. ໂຄກຈະໄດ້ຮຽນຮູ້ຫຍັງ?
14 ໂຄກຈະໄວ້ວາງໃຈ “ກຳລັງ” ຫຼືກອງທັບຂອງມັນເອງ. (2 ຂ່າວ. 32:8, ລ.ມ.) ແຕ່ເຮົາຈະໄວ້ວາງໃຈພະເຢໂຫວາພະເຈົ້າຂອງເຮົາ ເຊິ່ງຊາດຕ່າງໆເບິ່ງວ່າເຮົາໂງ່ຫຼາຍ. ຍ້ອນຫຍັງ? ກໍຍ້ອນວ່າບາບີໂລນໃຫຍ່ມີອຳນາດຫຼາຍ ແຕ່ພະປອມຕ່າງໆນັ້ນບໍ່ສາມາດຊ່ວຍບາບີໂລນໃຫຍ່ໃຫ້ລອດຈາກ “ສັດຮ້າຍ” ແລະ “ເຂົາ 10 ອັນ” ໄດ້! (ຄຳປ. 17:16) ດັ່ງນັ້ນ ໂຄກຫຼືກຸ່ມຊາດຕ່າງໆຈຶ່ງຄິດວ່າຈະທຳລາຍເຮົາໄດ້ງ່າຍໆ. ພວກເຂົາຈະໂຈມຕີປະຊາຊົນຂອງພະເຢໂຫວາ “ຄືເມກທີ່ປົກຫຸ້ມປະເທດໄວ້.” (ເອເຊກ. 38:16) ແຕ່ອີກບໍ່ດົນພວກເຂົາກໍຈະເຫັນວ່າ ພວກເຂົານັ້ນແຫຼະທີ່ກຳລັງຍ່າງເຂົ້າສູ່ກັບດັກ. ໂຄກຈະເປັນຄືກັບຟາໂລຕອນທີ່ຢູ່ໃນທະເລແດງ ເຊິ່ງຈະຮູ້ວ່າແທ້ໆແລ້ວພວກເຂົາກຳລັງຕໍ່ສູ້ກັບພະເຢໂຫວາ.—ອົບ. 14:1-4; ເອເຊກ. 38:3, 4, 18, 21-23
15. ພະເຍຊູຈະເຮັດຫຍັງໃນສົງຄາມອະລະມະເຄໂດນ?
ຄຳປ. 19:11, 14, 15) ແຕ່ຈະເກີດຫຍັງຂຶ້ນກັບຊາຕານສັດຕູເອກຂອງພະເຢໂຫວາທີ່ຕົວະຊາດຕ່າງໆແລະເຮັດໃຫ້ພວກເຂົາມາໂຈມຕີປະຊາຊົນຂອງພະເຢໂຫວາໃນສົງຄາມອະລະມະເຄໂດນ? ພະເຍຊູຈະຖິ້ມມັນແລະພວກຜີປີສາດລົງເຫວເລິກ ເຊິ່ງພວກມັນຈະຖືກຂັງໄວ້ເປັນເວລາໜຶ່ງພັນປີ.—ຄຳປ. 20:1-3
15 ພະຄລິດພ້ອມກັບກອງທັບສະຫວັນຈະປົກປ້ອງປະຊາຊົນຂອງພະເຈົ້າ ແລະທຳລາຍໂຄກກັບພັກພວກຂອງມັນ. (ເຮົາຕ້ອງເຮັດຫຍັງເພື່ອຈະລອດຊີວິດຜ່ານສົງຄາມອະລະມະເຄໂດນ?
16. (ກ) ເຮົາສະແດງວ່າເຮົາຮູ້ຈັກພະເຈົ້າໂດຍເຮັດຫຍັງ? (ຂ) ໃນສົງຄາມອະລະມະເຄໂດນ ຄົນທີ່ຮູ້ຈັກພະເຈົ້າຈະເປັນແນວໃດ?
16 ບໍ່ວ່າເຮົາຫາກໍຮຽນຄວາມຈິງຫຼືຮູ້ຄວາມຈິງມາດົນແລ້ວ ເພື່ອເຮົາຈະລອດຊີວິດຜ່ານວັນອະລະມະເຄໂດນ ເຮົາຕ້ອງສະແດງວ່າເຮົາ “ຮູ້ຈັກພະເຈົ້າ” ແລະ “ເຊື່ອຟັງຄຳປະເສີດແຫ່ງພະເຍຊູຄລິດພະອົງເຈົ້າຂອງເຮົາ.” (2 ເທ. 1:7-9) ການຮູ້ຈັກພະເຈົ້າໝາຍເຖິງການທີ່ເຮົາຮູ້ວ່າພະອົງມັກຫຍັງ ບໍ່ມັກຫຍັງ ແລະມາດຕະຖານຂອງພະອົງເປັນແນວໃດ. ເຮົາຍັງສະແດງວ່າເຮົາຮູ້ຈັກພະເຈົ້າເມື່ອເຮົາຮັກ ເຊື່ອຟັງ ແລະນະມັດສະການພະອົງພຽງຜູ້ດຽວ. (1 ໂຢ. 2:3-5; 5:3) ເມື່ອເຮົາສະແດງວ່າເຮົາຮູ້ຈັກພະເຈົ້າ ເຮົາກໍໄດ້ຮັບກຽດທີ່ ‘ພະອົງຮູ້ຈັກເຮົາ’ ເຊິ່ງຈະຊ່ວຍເຮົາໃຫ້ລອດຜ່ານສົງຄາມອະລະມະເຄໂດນ! (1 ໂກ. 8:3) ຍ້ອນຫຍັງ? ຍ້ອນວ່າການທີ່ ‘ພະອົງຮູ້ຈັກເຮົາ’ ໝາຍຄວາມວ່າພະອົງພໍໃຈເຮົາ.
17. ການ ‘ເຊື່ອຟັງຄຳປະເສີດເລື່ອງພະເຍຊູ’ ໝາຍຄວາມວ່າແນວໃດ?
17 ‘ຄຳປະເສີດເລື່ອງພະເຍຊູ’ ລວມເອົາຄວາມຈິງທັງໝົດທີ່ພະເຍຊູສອນເຊິ່ງເຮົາໄດ້ອ່ານໃນຄຳພີໄບເບິນ. ເຮົາເຊື່ອຟັງຂ່າວດີນີ້ເມື່ອເຮົານຳໃຊ້ຫຼັກການຄຳພີໄບເບິນໃນຊີວິດຂອງເຮົາ. ການເຊື່ອຟັງນີ້ຍັງລວມເຖິງການໃຫ້ວຽກຮັບໃຊ້ພະເຢໂຫວາມາເປັນອັນດັບທຳອິດໃນຊີວິດ ໃຊ້ຊີວິດຕາມມາດຕະຖານຂອງພະເຈົ້າ ແລະປະກາດເລື່ອງລາຊະອານາຈັກຂອງພະເຈົ້າ. (ມັດ. 6:33; 24:14) ນອກຈາກນັ້ນ ເຮົາຍັງຕ້ອງສະໜັບສະໜູນພີ່ນ້ອງຜູ້ຖືກເຈີມຍ້ອນພວກເຂົາເຮັດວຽກທີ່ສຳຄັນ.—ມັດ. 25:31-40
18. ຜູ້ຖືກເຈີມຈະໃຫ້ລາງວັນກັບແກະອື່ນທີ່ສະໜັບສະໜູນພວກເຂົາແນວໃດ?
18 ອີກບໍ່ດົນຜູ້ຮັບໃຊ້ທີ່ຖືກເຈີມຂອງພະເຈົ້າຈະໃຫ້ລາງວັນໂຢ. 10:16) ຈະໃຫ້ລາງວັນແນວໃດ? ກ່ອນສົງຄາມອະລະມະເຄໂດນຈະເລີ່ມຕົ້ນ ຜູ້ຖືກເຈີມທັງໝົດ 144.000 ຄົນຈະຖືກຮັບຂຶ້ນໄປສະຫວັນ ເຊິ່ງພວກເຂົາຈະກາຍເປັນກາຍວິນຍານແລະມີຊີວິດອະມະຕະໃນສະຫວັນ. ພວກເຂົາຈະເປັນສ່ວນໜຶ່ງຂອງກອງທັບສະຫວັນທີ່ກຳຈັດໂຄກແລະປົກປ້ອງ “ຊົນຝູງໃຫຍ່” ເຊິ່ງເປັນປະຊາຊົນຂອງພະເຢໂຫວາ. (ຄຳປ. 2:26, 27; 7:9, 10, ລ.ມ.) ໃນຕອນນັ້ນ ຊົນຝູງໃຫຍ່ຈະມີຄວາມສຸກຫຼາຍແທ້ໆທີ່ໄດ້ສະໜັບສະໜູນຜູ້ຖືກເຈີມຂອງພະເຢໂຫວາຕອນທີ່ພວກເຂົາຍັງຢູ່ແຜ່ນດິນໂລກ.
ກັບ “ແກະອື່ນ” ທີ່ໄດ້ສະໜັບສະໜູນພວກເຂົາ. (ເຮົາຈະຮັກສາຄວາມສັດຊື່ຕໍ່ພະເຢໂຫວາໄດ້ແນວໃດໃນຂະນະທີ່ວັນອະລະມະເຄໂດນກຳລັງໃກ້ເຂົ້າມາ?
19-20. ເຖິງວ່າເຮົາຈະມີບັນຫາຫຼາຍຢ່າງ ແຕ່ເຮົາຈະຮັກສາຄວາມສັດຊື່ໄວ້ໄດ້ແນວໃດໃນຂະນະທີ່ວັນອະລະມະເຄໂດນກຳລັງໃກ້ເຂົ້າມາ?
19 ໃນສະໄໝທີ່ຫຍຸ້ງຍາກນີ້ ປະຊາຊົນຂອງພະເຢໂຫວາຫຼາຍຄົນກຳລັງອົດທົນກັບບັນຫາຫຼາຍຢ່າງ ແຕ່ເຮົາກໍສາມາດອົດທົນດ້ວຍຄວາມສຸກໄດ້. (ຢໂກ. 1:2-4) ສິ່ງທີ່ຊ່ວຍເຮົາໃຫ້ອົດທົນແມ່ນການອະທິດຖານທີ່ມາຈາກຫົວໃຈ. (ລືກາ 21:36) ຄຽງຄູ່ກັບການອະທິດຖານ ເຮົາຕ້ອງສຶກສາແລະຄິດຕຶກຕອງຄຳພີໄບເບິນທຸກມື້ເຊິ່ງລວມເຖິງຄຳພະຍາກອນຕ່າງໆທີ່ໜ້າຕື່ນເຕັ້ນກ່ຽວກັບສະໄໝຂອງເຮົາ. (ເພງ. 77:12) ການເຮັດສິ່ງຕ່າງໆເຫຼົ່ານີ້ພ້ອມທັງການປະກາດຢ່າງເຕັມທີກໍຈະຊ່ວຍສົ່ງເສີມຄວາມຫວັງແລະຄວາມເຊື່ອຂອງເຮົາໃຫ້ເຂັ້ມແຂງຂຶ້ນ!
20 ຂໍໃຫ້ນຶກພາບວ່າເຮົາຈະມີຄວາມສຸກຫຼາຍສ່ຳໃດເມື່ອບາບີໂລນໃຫຍ່ຖືກທຳລາຍແລະອະລະມະເຄໂດນຜ່ານໄປແລ້ວ! ສຳຄັນກວ່ານັ້ນຄື ເຮົາຈະມີຄວາມສຸກຫຼາຍແທ້ໆທີ່ທຸກຄົນນັບຖືຊື່ຂອງພະເຈົ້າແລະການປົກຄອງຂອງພະອົງ. (ເອເຊກ. 38:23) ເລື່ອງສົງຄາມອະລະມະເຄໂດນແມ່ນຂ່າວດີສຳລັບຜູ້ທີ່ຮູ້ຈັກພະເຈົ້າ ເຊື່ອຟັງລູກຊາຍຂອງພະອົງ ແລະອົດທົນຈົນເຖິງທີ່ສຸດ.—ມັດ. 24:13.
ເພງ 143 ອົດທົນເຝົ້າລະວັງແລະເຮັດວຽກຕໍ່ໄປ
^ ຂໍ້ 5 ປະຊາຊົນຂອງພະເຢໂຫວາລໍຖ້າວັນອະລະມະເຄໂດນມາດົນແລ້ວ. ໃນບົດຄວາມນີ້ ເຮົາຈະພິຈາລະນາວ່າ ອະລະມະເຄໂດນແມ່ນຫຍັງ? ມີເຫດການຫຍັງແດ່ທີ່ຈະເກີດຂຶ້ນກ່ອນວັນອະລະມະເຄໂດນ? ແລະເຮົາຈະຮັກສາຄວາມສັດຊື່ຕໍ່ພະເຢໂຫວາໄດ້ແນວໃດໃນຂະນະທີ່ວັນອະລະມະເຄໂດນກຳລັງໃກ້ເຂົ້າມາ?
^ ຂໍ້ 71 ຄຳອະທິບາຍຮູບພາບ: ເມື່ອເຫດການທີ່ໜ້າຕື່ນເຕັ້ນເກີດຂຶ້ນອ້ອມໂຕເຮົາ ເຮົາຈະ (1) ປະກາດຕໍ່ໆໄປໃຫ້ດົນເທົ່າທີ່ເປັນໄປໄດ້ (2) ຮັກສານິດໄສທີ່ດີໃນການສຶກສາ ແລະ (3) ໄວ້ວາງໃຈສະເໝີວ່າພະເຈົ້າຈະປົກປ້ອງເຮົາ.
^ ຂໍ້ 85 ຄຳອະທິບາຍຮູບພາບ: ເຈົ້າໜ້າທີ່ກຳລັງຈະບຸກເຂົ້າເຮືອນຂອງພີ່ນ້ອງຄລິດສະຕຽນ ເຊິ່ງພວກເຂົາເຊື່ອວ່າພະເຍຊູແລະທູດສະຫວັນເຫັນສິ່ງທີ່ກຳລັງເກີດຂຶ້ນ.