“ຜູ້ໃດຢູ່ຝ່າຍພະເຢໂຫວາ?”
“ຈົ່ງຢ້ານຢຳພະເຢໂຫວາພະເຈົ້າຂອງເຈົ້າ. ຈົ່ງບົວລະບັດພະອົງແລະຈົ່ງຕິດນຳພະອົງ.”—ພະບັນຍັດ 10:20
1, 2. (ກ) ເປັນຫຍັງການຢູ່ຝ່າຍພະເຢໂຫວາຈຶ່ງສະຫຼາດ? (ຂ) ເຮົາຈະພິຈາລະນາຫຍັງໃນບົດຄວາມນີ້?
ເປັນເລື່ອງສະຫຼາດທີ່ເຮົາຈະໃກ້ຊິດກັບພະເຢໂຫວາ. ບໍ່ມີໃຜມີພະລັງອຳນາດ ສະຕິປັນຍາແລະຄວາມຮັກຫຼາຍກວ່າພະອົງອີກແລ້ວ! ແນ່ນອນວ່າເຮົາຢາກສັດຊື່ພັກດີແລະຢູ່ຝ່າຍພະອົງສະເໝີ. (ຄຳເພງ 96:4-6) ແຕ່ມີຜູ້ນະມັດສະການພະເຈົ້າບາງຄົນບໍ່ໄດ້ເຮັດແບບນັ້ນ.
2 ໃນບົດຄວາມນີ້ ເຮົາຈະພິຈາລະນາຕົວຢ່າງຂອງຄົນທີ່ອ້າງວ່າຢູ່ຝ່າຍພະເຢໂຫວາແຕ່ກໍຍັງເຮັດສິ່ງທີ່ພະອົງກຽດຊັງ. ບົດຮຽນສຳຄັນທີ່ເຮົາໄດ້ຮຽນຈາກຕົວຢ່າງຂອງເຂົາເຈົ້າຈະຊ່ວຍເຮົາໃຫ້ສັດຊື່ພັກດີຕໍ່ພະເຢໂຫວາສະເໝີ.
ພະເຢໂຫວາກວດເບິ່ງຫົວໃຈຂອງເຮົາ
3. ເປັນຫຍັງພະເຢໂຫວາພະຍາຍາມຊ່ວຍກາອີນ ແລະພະອົງບອກຫຍັງລາວ?
3 ຂໍໃຫ້ຄິດເຖິງຕົວຢ່າງຂອງກາອີນ. ລາວບໍ່ໄດ້ນະມັດສະການພະປອມ ແຕ່ພະເຢໂຫວາກໍບໍ່ຍອມຮັບການນະມັດສະການຂອງລາວ. ຍ້ອນຫຍັງ? ຍ້ອນພະເຢໂຫວາເຫັນແນວໂນ້ມທີ່ບໍ່ດີໃນຫົວໃຈຂອງກາອີນ. (1 ໂຢຮັນ 3:12) ພະອົງເຕືອນລາວວ່າ: “ຖ້າເຈົ້າປ່ຽນໃຈມາເຮັດດີ ເຮົາຈະພໍໃຈເຈົ້າ ແຕ່ຖ້າເຈົ້າບໍ່ປ່ຽນ ບາບກໍຈະຊຸ້ມຖ້າໂດດຄຸບເຈົ້າຢູ່ທີ່ປະຕູ ເຈົ້າໜ້າຈະເອົາຊະນະມັນບໍ່ແມ່ນບໍ?” (ຕົ້ນເດີມ 4:6, 7, ລ.ມ.) ພະເຢໂຫວາເຮັດໃຫ້ເຫັນຊັດເຈນວ່າຖ້າກາອີນກັບໃຈແລະເລືອກຢູ່ຝ່າຍພະອົງ ພະອົງກໍຈະຢູ່ກັບກາອີນ.
4. ເມື່ອກາອີນມີໂອກາດຢູ່ຝ່າຍພະເຢໂຫວາ ແຕ່ລາວໄດ້ເຮັດຫຍັງ?
4 ຖ້າກາອີນປ່ຽນແປງຄວາມຄິດ ພະເຢໂຫວາກໍຈະຍອມຮັບການນະມັດສະການຂອງລາວອີກຄັ້ງ. ແຕ່ກາອີນບໍ່ຟັງຄວາມພະເຈົ້າ ລາວຍອມໃຫ້ຄວາມຄິດແລະຄວາມຕ້ອງການທີ່ເຫັນແກ່ຕົວພາລາວໃຫ້ເຮັດສິ່ງທີ່ຊົ່ວ. (ຢາໂກໂບ 1:14, 15) ຕອນກາອີນຍັງນ້ອຍ ລາວອາດບໍ່ເຄີຍຄິດວ່າຈະເປັນຜູ້ຕໍ່ຕ້ານພະເຢໂຫວາ. ແຕ່ຕອນນີ້ລາວບໍ່ສົນໃຈຄຳເຕືອນ ລາວກະບົດຕໍ່ພະເຈົ້າ ແລະເຖິງຂັ້ນຂ້ານ້ອງຊາຍຕົວເອງ!
5. ຄວາມຄິດແບບໃດອາດເຮັດໃຫ້ພະເຈົ້າບໍ່ພໍໃຈເຮົາ?
5 ຄືກັບກາອີນ ຄລິດສະຕຽນໃນທຸກມື້ນີ້ອາດອ້າງວ່ານະມັດສະການພະເຢໂຫວາ ແຕ່ແທ້ໆແລ້ວພັດເຮັດສິ່ງທີ່ພະເຢໂຫວາກຽດຊັງ. (ຢູເດ 11) ລາວອາດກະຕືລືລົ້ນໃນວຽກປະກາດແລະໄປປະຊຸມເປັນປະຈຳ ແຕ່ລາວກໍຍັງປ່ອຍໃຫ້ຕົວເອງມີຈິນຕະນາການໃນເລື່ອງທີ່ຜິດສິນລະທຳ ມີຄວາມຄິດທີ່ໂລບ ແລະຄວາມກຽດຊັງ. (1 ໂຢຮັນ 2:15-17; 3:15) ຄວາມຄິດແບບນີ້ຈະພາໃຫ້ລົງມືເຮັດຜິດໄດ້. ຄົນອື່ນໆອາດບໍ່ຮູ້ຈັກສິ່ງທີ່ເຮົາຄິດຫຼືເຮັດ ແຕ່ພະເຢໂຫວາຮູ້ ແລະພະອົງກໍຮູ້ຖ້າເຮົາບໍ່ໄດ້ຢູ່ຝ່າຍພະອົງແທ້ໆ.—ອ່ານເຢເຣມີ 17:9, 10
6. ພະເຢໂຫວາຊ່ວຍເຮົາແນວໃດໃຫ້ເອົາຊະນະຄວາມຕ້ອງການທີ່ຜິດໆ?
6 ເຖິງວ່າເຮົາຈະເຮັດຜິດ ແຕ່ພະເຢໂຫວາກໍຍັງບໍ່ໝົດຫວັງໃນຕົວເຮົາ. ຖ້າເຮົາກຳລັງໄປໃນທາງທີ່ຜິດ ພະອົງກໍບອກເຮົາວ່າ: “ຈົ່ງຫຼົບມາຫາເຮົາແລະເຮົາຈະຄືນມາຫາພວກທ່ານ.” (ມາລາກີ 3:7) ພະເຢໂຫວາຮູ້ວ່າເຮົາມີຈຸດອ່ອນທີ່ຕ້ອງສູ້ກັບມັນ ແຕ່ພະອົງຢາກໃຫ້ເຮົາເຂັ້ມແຂງແລະເຊົາເຮັດຊົ່ວ. (ເອຊາອີ 55:7) ຖ້າເຮົາເຮັດຕາມພະອົງບອກ ພະອົງສັນຍາວ່າຈະຊ່ວຍແລະໃຫ້ກຳລັງກັບເຮົາເພື່ອເອົາຊະນະຄວາມຕ້ອງການທີ່ຜິດໆໄດ້.—ຕົ້ນເດີມ 4:7
ຢ່າຫຼອກຕົວເອງ
7. ຊາໂລໂມນສູນເສຍສາຍສຳພັນທີ່ມີກັບພະເຢໂຫວາໄດ້ແນວໃດ?
7 ຕອນທີ່ຊາໂລໂມນຍັງນ້ອຍ ລາວມີສາຍສຳພັນທີ່ດີກັບພະເຢໂຫວາ. ພະເຢໂຫວາເຮັດໃຫ້ລາວເປັນຄົນສະຫຼາດຫຼາຍແລະໃຫ້ລາວສ້າງວິຫານທີ່ສວຍງາມໃນເຢຣຶຊາເລມເຊິ່ງເປັນວຽກທີ່ສຳຄັນຫຼາຍ. ແຕ່ຕໍ່ມາລາວໄດ້ສູນເສຍສາຍສຳພັນທີ່ດີກັບພະເຈົ້າ. (1 ກະສັດ 3:12; 11:1, 2) ກົດໝາຍຂອງພະເຈົ້າບອກກະສັດວ່າ: “ຢ່າເອົາເມຍຫຼາຍຄົນເພື່ອໃຈແຫ່ງຕົນຈະບໍ່ເວັ້ນໜີ.” (ພະບັນຍັດ 17:17) ຊາໂລໂມນບໍ່ໄດ້ເຊື່ອຟັງກົດໝາຍນີ້ ລາວເຖິງກັບມີເມຍ 700 ຄົນແລະນາງສະໜົມອີກ 300 ຄົນ! (1 ກະສັດ 11:3) ເມຍຂອງລາວຫຼາຍຄົນເປັນຄົນຕ່າງຊາດເຊິ່ງນະມັດສະການພະປອມ. ດັ່ງນັ້ນ ຊາໂລໂມນຈຶ່ງບໍ່ໄດ້ເຊື່ອຟັງກົດໝາຍຂອງພະເຈົ້າທີ່ບໍ່ໃຫ້ແຕ່ງດອງກັບຄົນຕ່າງຊາດ.—ພະບັນຍັດ 7:3, 4
8. ຊາໂລໂມນໄດ້ເຮັດສິ່ງທີ່ຊົ່ວຫຍັງແດ່?
8 ຊາໂລໂມນຄ່ອຍໆເຊົາຮັກກົດໝາຍຂອງພະເຢໂຫວາແລະໄດ້ເຮັດສິ່ງທີ່ຊົ່ວຫຼາຍ. ລາວໄດ້ສ້າງແທ່ນບູຊາສຳລັບພະປອມອາດໂທເຣດແລະເກໂມຊ. ຈາກນັ້ນ ລາວກັບພວກເມຍກໍພາກັນນະມັດສະການພະປອມເຫຼົ່ານີ້. ລາວໄດ້ສ້າງແທ່ນບູຊາເຫຼົ່ານີ້ເທິງພູເຂົາທີ່ຢູ່ຕໍ່ໜ້າເມືອງເຢຣຶຊາເລມ ເຊິ່ງເປັນບ່ອນທີ່ລາວສ້າງໄດ້ວິຫານຂອງພະເຢໂຫວາ! (1 ກະສັດ 11:5-8; 2 ກະສັດ 23:13) ຊາໂລໂມນອາດຫຼອກຕົວເອງວ່າພະເຢໂຫວາຄົງບໍ່ສົນໃຈສິ່ງຊົ່ວທີ່ລາວເຮັດ ຕາບໃດທີ່ລາວຍັງຖວາຍເຄື່ອງບູຊາຢູ່ທີ່ວິຫານຂອງພະອົງ.
9. ເກີດຫຍັງຂຶ້ນເມື່ອຊາໂລໂມນບໍ່ເຊື່ອຟັງຄຳເຕືອນຂອງພະເຈົ້າ?
9 ພະເຢໂຫວາບໍ່ເຄີຍເບິ່ງຂ້າມການເຮັດຜິດ. ຄຳພີໄບເບິນບອກວ່າ: “ພະເຢໂຫວາໄດ້ມີຄວາມຄຽດຕໍ່ສູ້ຊາໂລໂມນ ຍ້ອນໃຈທ່ານໄດ້ເວັ້ນໜີຈາກພະເຢໂຫວາ.” ພະອົງພະຍາຍາມຊ່ວຍຊາໂລໂມນ ພະອົງ ‘ໄດ້ປາກົດແກ່ທ່ານ 2 ເທື່ອ ແລະໄດ້ສັ່ງທ່ານດ້ວຍການນັ້ນເພື່ອບໍ່ໃຫ້ທ່ານໄປຕາມຮູບພະຕ່າງໆ ແລະທ່ານບໍ່ໄດ້ຖືຮັກສາຄຳສັ່ງຂອງພະເຢໂຫວາ.’ ຜົນກໍຄື ພະເຢໂຫວາບໍ່ຍອມຮັບແລະບໍ່ສະໜັບສະໜູນຊາໂລໂມນ. ພະອົງບໍ່ໃຫ້ລູກຫຼານຂອງລາວປົກຄອງຊາດອິດສະລາແອນທັງຊາດ ແລະເຂົາເຈົ້າກໍມີບັນຫາຮ້າຍແຮງຕະຫຼອດຫຼາຍຮ້ອຍປີ.—1 ກະສັດ 11:9-13
10. ອັນໃດທີ່ອາດທຳລາຍສາຍສຳພັນຂອງເຮົາກັບພະເຢໂຫວາ?
10 ຖ້າເຮົາເລືອກຄົບຫາກັບໝູ່ທີ່ບໍ່ເຂົ້າໃຈແລະບໍ່ນັບຖືມາດຕະຖານຂອງພະເຈົ້າ ເຂົາເຈົ້າອາດມີອິດທິພົນຕໍ່ຄວາມຄິດແລະທຳລາຍສາຍສຳພັນຂອງເຮົາກັບພະເຢໂຫວາໄດ້. ເຂົາເຈົ້າອາດເປັນຄົນໃນປະຊາຄົມທີ່ບໍ່ໄດ້ມີສາຍສຳພັນທີ່ໃກ້ຊິດກັບພະເຢໂຫວາ. ຫຼືອາດເປັນຍາດພີ່ນ້ອງ ເພື່ອນບ້ານ ເພື່ອນຮ່ວມງານ ຫຼືໝູ່ຢູ່ໂຮງຮຽນທີ່ບໍ່ໄດ້ນະມັດສະການພະອົງ. ຖ້າຄົນທີ່ເຮົາໃຊ້ເວລານຳບໍ່ໄດ້ໃຊ້ຊີວິດຕາມມາດຕະຖານຂອງພະເຢໂຫວາ ເຂົາເຈົ້າກໍອາດມີອິດທິພົນກັບເຮົາຈົນທຳລາຍສາຍສຳພັນຂອງເຮົາກັບພະເຢໂຫວາໄດ້.
ຄົນທີ່ເຮົາຄົບຫາເປັນໝູ່ສົ່ງຜົນຕໍ່ສາຍສຳພັນຂອງເຮົາກັບພະເຢໂຫວາແນວໃດ? (ເບິ່ງຂໍ້ 11)
11. ອັນໃດຈະຊ່ວຍເຮົາໃຫ້ຮູ້ວ່າຈະເລືອກຄົບໝູ່ແບບໃດ?
11 ອ່ານ 1 ໂກລິນໂທ 15:33. ຄົນທົ່ວໄປສ່ວນໃຫຍ່ກໍເປັນຄົນນິດໄສດີ ແລະຄົນທີ່ບໍ່ໄດ້ນະມັດສະການພະເຢໂຫວາກໍບໍ່ໄດ້ເຮັດສິ່ງທີ່ຊົ່ວສະເໝີໄປ. ເຈົ້າເອງກໍອາດຈະຮູ້ຈັກກັບຄົນທີ່ເປັນແບບນັ້ນ. ແຕ່ນີ້ກໍບໍ່ໄດ້ໝາຍຄວາມວ່າເຂົາເຈົ້າຈະສາມາດເປັນໝູ່ທີ່ດີໄດ້. ເຈົ້າອາດຖາມຕົວເອງວ່າ: ເຂົາເຈົ້າຈະສົ່ງຜົນແນວໃດຕໍ່ສາຍສຳພັນຂອງເຈົ້າກັບພະເຢໂຫວາ? ເຂົາເຈົ້າຊ່ວຍເຈົ້າໃຫ້ໃກ້ຊິດກັບພະເຢໂຫວາຫຼາຍຂຶ້ນບໍ? ອັນໃດເປັນສິ່ງສຳຄັນແທ້ໆຕໍ່ເຂົາເຈົ້າ? ເຂົາເຈົ້າລົມກັນເລື່ອງຫຍັງແດ່? ເລື່ອງທີ່ເຂົາເຈົ້າລົມກັນສ່ວນໃຫຍ່ແລ້ວເປັນເລື່ອງແຟຊັ່ນ ເງິນຄຳ ໂທລະສັບ ຄອມພິວເຕີ ແທັບເລັດ ແລະຄວາມບັນເທີງຕ່າງໆບໍ? ເຂົາເຈົ້າມັກວິຈານຄົນອື່ນບໍ? ເຂົາເຈົ້າມັກເລົ່າເລື່ອງຕະຫຼົກລາມົກບໍ? ພະເຍຊູເຕືອນວ່າ: “ໃຈເຕັມໄປດ້ວຍສິ່ງຢ່າງໃດ ປາກກໍກ່າວອອກຕາມສິ່ງຢ່າງນັ້ນ.” (ມັດທາຍ 12:34) ຖ້າເຈົ້າຮູ້ວ່າໝູ່ທີ່ຄົບຫາຈະເຮັດໃຫ້ສາຍສຳພັນຂອງເຈົ້າກັບພະເຢໂຫວາເສຍຫາຍ ເຈົ້າອາດຕ້ອງເຮັດຫຍັງບາງຢ່າງ! ໂດຍບໍ່ໃຊ້ເວລາກັບເຂົາເຈົ້າຫຼາຍເກີນໄປ ແລະຖ້າຈຳເປັນເຈົ້າຕ້ອງເຊົາຄົບຫາເລີຍ.—ສຸພາສິດ 13:20
ພະເຢໂຫວາຢາກໃຫ້ເຮົາສັດຊື່ພັກດີຕໍ່ພະອົງ
12. (ກ) ພະເຢໂຫວາເວົ້າຫຍັງກັບພວກອິດສະລາແອນຫຼັງຈາກທີ່ເຂົາເຈົ້າອອກມາຈາກເອຢິບ? (ຂ) ພວກອິດສະລາແອນຕອບແນວໃດເມື່ອພະເຈົ້າຂໍໃຫ້ເຂົາເຈົ້າສັດຊື່ພັກດີຕໍ່ພະອົງ?
12 ເຮົາຍັງຮຽນຮູ້ຈາກສິ່ງທີ່ເກີດຂຶ້ນກັບພວກອິດສະລາແອນຫຼັງຈາກທີ່ພະເຢໂຫວາຊ່ວຍເຂົາເຈົ້າໃຫ້ເປັນອິດສະຫຼະຈາກເອຢິບ. ຕອນທີ່ປະຊາຊົນມາເຕົ້າໂຮມກັນຢູ່ໜ້າພູເຂົາຊີນາອີ ພະເຢໂຫວາມາປາກົດຕໍ່ໜ້າເຂົາເຈົ້າຢ່າງອັດສະຈັນ! ເຂົາເຈົ້າກໍເຫັນເມກຕຶບໜາ ຟ້າເຫຼື້ອມຟ້າຮ້ອງ ຄວັນ ແລະໄດ້ຍິນສຽງດັງຄືສຽງແກ. (ອົບພະຍົບ 19:16-19) ຈາກນັ້ນ ເຂົາເຈົ້າກໍໄດ້ຍິນພະເຢໂຫວາປະກາດວ່າ ພະອົງ “ແມ່ນພະເຈົ້າຫວງແຫນ” ເຊິ່ງເປັນພະເຈົ້າທີ່ຕ້ອງການໃຫ້ນະມັດສະການພະອົງພຽງຜູ້ດຽວ. ພະອົງສັນຍາວ່າຈະສັດຊື່ພັກດີຕໍ່ຄົນທີ່ຮັກແລະເຊື່ອຟັງຄຳສັ່ງຂອງພະອົງ. (ອ່ານອົບພະຍົບ 20:1-6) ພະເຢໂຫວາເຮັດໃຫ້ປະຊາຊົນອິດສະລາແອນຮູ້ວ່າຖ້າເຂົາເຈົ້າຢູ່ຝ່າຍພະອົງ ພະອົງກໍຈະຢູ່ຝ່າຍເຂົາເຈົ້າ. ຖ້າເຈົ້າຢູ່ກັບພວກອິດສະລາແອນໃນຕອນນັ້ນ ເຈົ້າຈະຮູ້ສຶກແນວໃດເມື່ອໄດ້ຍິນສຽງຂອງພະເຢໂຫວາ? ເຈົ້າອາດຈະຕອບຄືກັບພວກອິດສະລາແອນວ່າ: “ຖ້ອຍຄຳທັງປວງທີ່ພະເຢໂຫວາໄດ້ບອກໄວ້ນັ້ນເຮົາທັງຫຼາຍຈະຂັບຕາມ.” (ອົບພະຍົບ 24:3) ແຕ່ບໍ່ດົນຫຼັງຈາກນັ້ນກໍມີບາງສິ່ງທີ່ທົດສອບຄວາມສັດຊື່ພັກດີຂອງພວກອິດສະລາແອນ. ສິ່ງນັ້ນແມ່ນຫຍັງ?
13. ຄວາມສັດຊື່ພັກດີຂອງພວກອິດສະລາແອນຖືກທົດສອບແນວໃດ?
13 ພວກອິດສະລາແອນຢ້ານພະລັງອຳນາດທີ່ພະເຢໂຫວາສະແດງໃຫ້ເຂົາເຈົ້າເຫັນໃນຕອນນັ້ນ ດັ່ງນັ້ນ ໂມເຊຈຶ່ງຂຶ້ນໄປພູເຂົາຊີນາອີແລະລົມກັບພະອົງແທນພວກອິດສະລາແອນ. (ອົບພະຍົບ 20:18-21) ເວລາກໍຜ່ານໄປດົນແລ້ວ ໂມເຊກໍບໍ່ລົງມາຈັກເທື່ອ ພວກອິດສະລາແອນຈຶ່ງຄິດວ່າເຂົາເຈົ້າຄ້າງຢູ່ໃນປ່າກັນດານໂດຍບໍ່ມີຜູ້ນຳໜ້າ. ເຂົາເຈົ້າໄດ້ເຮັດຫຍັງ? ເຂົາເຈົ້າອາດວາງໃຈຜູ້ນຳທີ່ເປັນມະນຸດຄືໂມເຊຫຼາຍເກີນໄປ. ເຂົາເຈົ້າກັງວົນຫຼາຍຈົນບອກອາໂລນວ່າ: “ຈົ່ງມາສ້າງພະທີ່ຈະນຳໜ້າພວກເຮົາໄປ ເຫດວ່າທ່ານໂມເຊຜູ້ນັ້ນທີ່ໄດ້ນຳໜ້າພວກເຮົາອອກມາຈາກປະເທດເອຄີບໂຕ ທ່ານໄດ້ໄປທີ່ໃດພວກເຮົາກໍຫາຮູ້ບໍ່ໄດ້.”—ອົບພະຍົບ 32:1, 2
14. ພວກອິດສະລາແອນຫຼອກຕົວເອງແນວໃດ? ແລະພະເຢໂຫວາຮູ້ສຶກແນວໃດ?
14 ພວກອິດສະລາແອນຮູ້ວ່າການນະມັດສະການຮູບປັ້ນເປັນສິ່ງທີ່ຜິດ. (ອົບພະຍົບ 20:3-5) ແຕ່ເຂົາເຈົ້າກໍເລີ່ມຂາບໄຫວ້ຮູບປັ້ນງົວຄຳໄວແທ້ໆ! ເຖິງວ່າເຂົາເຈົ້າຈະບໍ່ໄດ້ເຊື່ອຟັງກົດໝາຍຂອງພະເຢໂຫວາ ແຕ່ເຂົາເຈົ້າກໍຍັງຫຼອກຕົວເອງວ່າເຂົາເຈົ້າຍັງຢູ່ຝ່າຍພະອົງ. ອາໂລນເຖິງກັບເອີ້ນການນະມັດສະການຮູບປັ້ນງົວຄຳນັ້ນວ່າເປັນ “ວັນເທສະການລ້ຽງກັນແກ່ພະເຢໂຫວາ”! ພະເຢໂຫວາເຮັດແນວໃດກັບເລື່ອງນີ້? ພະອົງບອກໂມເຊໃຫ້ໄປບອກປະຊາຊົນວ່າເຂົາເຈົ້າ “ໄດ້ທຳການຊົ່ວຮ້າຍ” ແລະປະຖິ້ມ ‘ແນວທາງທີ່ເຮົາໄດ້ສັ່ງເຂົາ.’ ພະເຢໂຫວາຮູ້ສຶກໃຈຮ້າຍຫຼາຍຈົນເຖິງຂະໜາດຄິດຈະທຳລາຍຊາດນີ້ທັງໝົດ.—ອົບພະຍົບ 32:5-10
ພະເຢໂຫວາໃຫ້ພວກອິດສະລາແອນເລືອກເອງວ່າເຂົາເຈົ້າຢາກຈະຢູ່ຝ່າຍພະອົງຫຼືບໍ່
15, 16. ໂມເຊແລະອາໂລນສະແດງເຫັນແນວໃດວ່າເຂົາເຈົ້າຢູ່ຝ່າຍພະເຢໂຫວາແທ້ໆ? (ເບິ່ງຮູບທຳອິດ)
15 ແຕ່ພະເຢໂຫວາເປັນພະເຈົ້າທີ່ເມດຕາ ພະອົງບໍ່ໄດ້ຕັດສິນໃຈທຳລາຍຄົນທັງຊາດ. ກົງກັນຂ້າມ ພະອົງໃຫ້ເຂົາເຈົ້າເລືອກເອງວ່າຢາກຈະຢູ່ຝ່າຍພະອົງຫຼືບໍ່. (ອົບພະຍົບ 32:14) ເມື່ອໂມເຊເຫັນຄົນໂຫ່ຮ້ອງ ຮ້ອງເພງແລະເຕັ້ນລຳຕໍ່ໜ້າຮູບປັ້ນງົວຄຳ ລາວກໍໄປທຳລາຍຮູບປັ້ນນັ້ນຈົນມຸ່ນເປັນຝຸ່ນ. ແລ້ວລາວກໍຮ້ອງອອກມາວ່າ: “ຜູ້ໃດຢູ່ຝ່າຍພະເຢໂຫວາ? ຜູ້ນັ້ນຈົ່ງອອກມານຳເຮົາເຖີ້ນ.” ແລະ “ລູກຫຼານເລວີທັງປວງໄດ້ໂຮມກັນກັບທ່ານໂມເຊ.”—ອົບພະຍົບ 32:17-20, 26
16 ເຖິງວ່າອາໂລນຈະເປັນຜູ້ທີ່ເຮັດຮູບປັ້ນງົວຄຳ ແຕ່ລາວກັບພວກເລວີກໍກັບໃຈແລະເລືອກຢູ່ຝ່າຍພະເຢໂຫວາ. ຄົນທີ່ສັດຊື່ພັກດີເຫຼົ່ານີ້ເຮັດໃຫ້ທຸກຄົນເຫັນຈະແຈ້ງວ່າເຂົາເຈົ້າບໍ່ຢູ່ຝ່າຍຄົນທີ່ເຮັດຜິດ. ນີ້ເປັນການເລືອກທີ່ສະຫຼາດ ເພາະໃນມື້ນັ້ນຫຼາຍພັນຄົນທີ່ນະມັດສະການຮູບປັ້ນງົວຄຳກໍຕ້ອງຕາຍ ແຕ່ຄົນທີ່ຢູ່ຝ່າຍພະເຢໂຫວາລອດຊີວິດ ແລະພະອົງຍັງສັນຍາວ່າຈະອວຍພອນເຂົາເຈົ້ານຳ.—ອົບພະຍົບ 32:27-29
17. ເຮົາໄດ້ບົດຮຽນຫຍັງຈາກສິ່ງທີ່ໂປໂລຂຽນກ່ຽວກັບຮູບປັ້ນງົວຄຳ?
17 ເຮົາໄດ້ບົດຮຽນຫຍັງ? ໂປໂລບອກວ່າ: “ການທັງຫຼາຍນັ້ນເປັນແບບຢ່າງແກ່ເຮົາ” ເພື່ອເຮົາຈະບໍ່ “ເປັນຄົນນົບຮູບ.” ໂປໂລອະທິບາຍວ່າເລື່ອງຕ່າງໆ “ຂຽນໄວ້ແລ້ວເພື່ອຈະເຕືອນສະຕິເຮົາທັງຫຼາຍຜູ້ທີ່ໄດ້ເຖິງທີ່ສຸດອາຍຸທັງຫຼາຍ. ຢ່າງນີ້ຄົນນັ້ນທີ່ຄຶດວ່າຕົວຢັ້ງຢືນຢູ່ ຈົ່ງລະວັງໃຫ້ດີຢ້ານວ່າຈະຕົກລົງເສຍ.” (1 ໂກລິນໂທ 10:6, 7, 11, 12) ດັ່ງທີ່ໂປໂລເວົ້າມາ ແມ່ນແຕ່ຄົນທີ່ນະມັດສະການພະເຢໂຫວາກໍອາດເຮັດຊົ່ວໄດ້. ເຂົາເຈົ້າອາດເຖິງກັບຄິດວ່າພະເຢໂຫວາຍັງຍອມຮັບເຂົາເຈົ້າ. ແຕ່ການທີ່ຄົນເຮົາບອກວ່າຢາກເປັນໝູ່ກັບພະເຢໂຫວາແລະອ້າງວ່າຕົວເອງສັດຊື່ພັກດີຕໍ່ພະອົງ ນັ້ນກໍບໍ່ໄດ້ໝາຍຄວາມວ່າພະເຢໂຫວາຈະພໍໃຈລາວແທ້ໆ.—1 ໂກລິນໂທ 10:1-5
18. ອັນໃດອາດເຮັດໃຫ້ເຮົາຄ່ອຍໆອອກຫ່າງຈາກພະເຢໂຫວາ ແລະຜົນເປັນແນວໃດ?
18 ເມື່ອໂມເຊຍັງບໍ່ລົງມາຈາກພູເຂົາຊີນາອີຕາມທີ່ພວກອິດສະລາແອນຄາດຫວັງ ເຂົາເຈົ້າກໍເລີ່ມກັງວົນ. ຖ້າອະວະສານຂອງລະບົບນີ້ຍັງບໍ່ທັນມາຕາມທີ່ເຮົາຄາດຫວັງ ເຮົາກໍອາດຮູ້ສຶກກັງວົນຄືກັນ. ເຮົາອາດເລີ່ມຄິດວ່າຄຳສັນຍາທີ່ດີໆຂອງພະເຢໂຫວາຍັງອີກດົນກວ່າຈະເກີດຂຶ້ນແທ້ ແລະອາດເລີ່ມສົນໃຈແຕ່ຄວາມຕ້ອງການຂອງຕົວເອງແທນທີ່ຈະສົນໃຈສິ່ງທີ່ພະອົງຕ້ອງການໃຫ້ເຮົາເຮັດ. ຖ້າເຮົາບໍ່ລະວັງ ເຮົາອາດຄ່ອຍໆອອກຫ່າງຈາກພະເຢໂຫວາແລະອາດເຮັດສິ່ງທີ່ບໍ່ເຄີຍຄິດວ່າຈະເຮັດ.
19. ເຮົາຄວນຈື່ຫຍັງໄວ້ສະເໝີ? ແລະຍ້ອນຫຍັງ?
19 ພະເຢໂຫວາຢາກໃຫ້ເຮົາເຊື່ອຟັງພະອົງຢ່າງສຸດໃຈແລະນະມັດສະການພະອົງຜູ້ດຽວ. (ອົບພະຍົບ 20:5) ຍ້ອນຫຍັງພະອົງຈຶ່ງຢາກໃຫ້ເຮົາເຮັດແບບນັ້ນ? ຍ້ອນວ່າພະອົງຮັກເຮົາ. ຖ້າເຮົາບໍ່ໄດ້ເຮັດສິ່ງທີ່ພະອົງຕ້ອງການ ເຮົາກໍຈະເຮັດສິ່ງທີ່ຊາຕານຕ້ອງການ ແລະນັ້ນກໍເປັນອັນຕະລາຍກັບເຮົາແທ້ໆ. ໂປໂລບອກວ່າ: “ທ່ານທັງຫຼາຍຈະກິນແຕ່ຈອກຂອງພະອົງເຈົ້າແລະແຕ່ຈອກຂອງຜີທັງຫຼາຍບໍ່ໄດ້ ຈະຮັບປະທານທີ່ ‘ໂຕະຂອງພະອົງເຈົ້າ’ ແລະທີ່ໂຕະຂອງຜີທັງຫຼາຍບໍ່ໄດ້.”—1 ໂກລິນໂທ 10:21
ໃກ້ຊິດກັບພະເຢໂຫວາສະເໝີ!
20. ພະເຢໂຫວາຊ່ວຍເຮົາແນວໃດເຖິງວ່າເຮົາຈະເຮັດຜິດ?
20 ກາອີນ ຊາໂລໂມນ ແລະພວກອິດສະລາແອນມີໂອກາດກັບໃຈແລະປ່ຽນແປງຕົວເອງ. (ກິດຈະການ 3:19) ເຫັນໄດ້ແຈ້ງວ່າພະເຢໂຫວາບໍ່ໄດ້ໝົດຫວັງກັບຄົນຂອງພະອົງທັນທີທີ່ເຂົາເຈົ້າເຮັດຜິດພຽງເທື່ອດຽວ ຄືກັບທີ່ພະເຢໂຫວາໃຫ້ອະໄພອາໂລນ. ໃນທຸກມື້ນີ້ພະເຢໂຫວາໃຫ້ຄຳເຕືອນດ້ວຍຄວາມຮັກກັບເຮົາເພື່ອປົກປ້ອງເຮົາບໍ່ໃຫ້ເຮັດສິ່ງຊົ່ວ. ພະອົງໃຊ້ຄຳພີໄບເບິນ ສັບພະໜັງສື ແລະພີ່ນ້ອງຄລິດສະຕຽນເພື່ອເຕືອນເຮົາ. ຖ້າເຮົາຕັ້ງໃຈຟັງຄຳເຕືອນຂອງພະອົງ ເຮົາກໍໝັ້ນໃຈໄດ້ວ່າພະອົງຈະເມດຕາເຮົາແນ່ນອນ.
21. ເມື່ອຄວາມສັດຊື່ພັກດີຂອງເຮົາຖືກທົດສອບ ເຮົາຕ້ອງເຮັດຫຍັງ?
21 ຄວາມກະລຸນາທີ່ຍິ່ງໃຫຍ່ຂອງພະເຢໂຫວາມີຈຸດມຸ່ງໝາຍ. (2 ໂກລິນໂທ 6:1) ຄວາມກະລຸນານີ້ເຮັດໃຫ້ພວກເຮົາມີໂອກາດທີ່ຈະ “ປະຕິເສດຄວາມປະໝາດເສຍ [“ການເຮັດຊົ່ວ,” ລ.ມ.] ແລະຄວາມຄຶດຢາກໄດ້ສິ່ງຂອງໂລກ.” (ອ່ານຕິໂຕ 2:11-14) ໃນສະໄໝນີ້ ມີຫຼາຍສະຖານະການ ທີ່ທົດສອບຄວາມສັດຊື່ພັກດີຂອງເຮົາທີ່ມີຕໍ່ພະເຢໂຫວາ. ດັ່ງນັ້ນ ຂໍໃຫ້ເຮົາຕັ້ງໃຈທີ່ຈະຢູ່ຝ່າຍພະເຢໂຫວາແທ້ໆ. ຂໍໃຫ້ຈື່ໄວ້ສະເໝີວ່າເຮົາຕ້ອງ ‘ຢ້ານຢຳພະເຢໂຫວາພະເຈົ້າຂອງເຈົ້າ. ບົວລະບັດພະອົງແລະຕິດນຳພະອົງ’ ສະເໝີ!—ພະບັນຍັດ 10:20
