ເຈົ້າຢາກເປັນຄົນສຳຄັນສຳລັບໃຜ?
“ພະເຈົ້າບໍ່ເປັນບໍ່ຊອບທຳຈະລືມກິດຈະການຂອງທ່ານທັງຫຼາຍ ແລະຄວາມຮັກທີ່ທ່ານທັງຫຼາຍໄດ້ສຳແດງສຳລັບນາມຊື່ຂອງພະອົງ.”—ເຫບເລີ 6:10
1. ຕາມທຳມະຊາດແລ້ວເຮົາທຸກຄົນຢາກໄດ້ຫຍັງ?
ເຈົ້າຮູ້ສຶກແນວໃດເມື່ອຄົນທີ່ເຈົ້າຮູ້ຈັກແລະນັບຖືລືມຊື່ເຈົ້າ ແລະໜັກກວ່ານັ້ນຄືຈື່ເຈົ້າບໍ່ໄດ້ເລີຍ? ນີ້ຄົງເຮັດໃຫ້ເຈົ້າເສຍໃຈຫຼາຍແທ້ໆ. ຍ້ອນຫຍັງ? ຍ້ອນເປັນເລື່ອງທຳມະຊາດທີ່ເຮົາທຸກຄົນຢາກໃຫ້ຄົນອື່ນໃຫ້ຄວາມສຳຄັນກັບເຮົາ. ເຮົາບໍ່ພຽງແຕ່ຢາກໃຫ້ຄົນອື່ນຮູ້ວ່າເຮົາແມ່ນໃຜ ແຕ່ເຮົາຢາກໃຫ້ຮູ້ວ່າເຮົາເປັນຄົນແບບໃດແລະເຄີຍປະສົບຜົນສຳເລັດຫຍັງມາແດ່.—ຈົດເຊັນບັນຊີ 11:16; ໂຢບ 31:6
2, 3. ຄວາມຮູ້ສຶກຕາມທຳມະຊາດທີ່ຢາກໃຫ້ຄົນອື່ນໃຫ້ຄວາມສຳຄັນອາດສົ່ງຜົນແນວໃດກັບເຮົາ? (ເບິ່ງຮູບທຳອິດ)
2 ແຕ່ຖ້າເຮົາບໍ່ລະວັງ ຄວາມຮູ້ສຶກຕາມທຳມະຊາດທີ່ຢາກໃຫ້ຄົນອື່ນໃຫ້ຄວາມສຳຄັນອາດສົ່ງຜົນເສຍຕໍ່ເຮົາໄດ້. ໂລກຂອງຊາຕານອາດເຮັດໃຫ້ເຮົາຢາກເປັນຄົນມີຊື່ສຽງແລະເປັນຄົນສຳຄັນ. ຖ້າເປັນແບບນັ້ນ ເຮົາກໍບໍ່ໄດ້ໃຫ້ກຽດແລະນະມັດສະການພະເຢໂຫວາພໍ່ຂອງເຮົາທີ່ຢູ່ໃນສະຫວັນຢ່າງທີ່ພະອົງສົມຄວນໄດ້ຮັບ.—ຄຳປາກົດ 4:11
ລືກາ 20:46, 47) ໃນທາງກົງກັນຂ້າມ ພະເຍຊູຊົມເຊີຍແມ່ໝ້າຍທຸກຍາກຄົນໜຶ່ງທີ່ໄດ້ບໍລິຈາກເງິນສອງຫຼຽນນ້ອຍໆເຊິ່ງບໍ່ມີໃຜສັງເກດເຫັນ. (ລືກາ 21:1-4) ເຫັນໄດ້ແຈ້ງວ່າ ຄວາມຄິດຂອງພະເຍຊູໃນເລື່ອງການເປັນຄົນສຳຄັນແຕກຕ່າງຈາກຄົນອື່ນຫຼາຍແທ້ໆ. ບົດຄວາມນີ້ຈະຊ່ວຍເຮົາໃຫ້ມີຄວາມຄິດທີ່ຖືກຕ້ອງໃນເລື່ອງການເປັນຄົນສຳຄັນໃນແບບທີ່ພະເຢໂຫວາຢາກໃຫ້ເຮົາມີ.
3 ໃນສະໄໝຂອງພະເຍຊູ ພວກຫົວໜ້າສາສະໜາມີຄວາມຄິດທີ່ບໍ່ຖືກຕ້ອງກ່ຽວກັບເລື່ອງການຢາກໃຫ້ຄົນອື່ນໃຫ້ຄວາມສຳຄັນ. ພະເຍຊູຈຶ່ງເຕືອນລູກສິດວ່າ: “ທ່ານທັງຫຼາຍຈົ່ງລະວັງໃຫ້ດີດ້ວຍພວກສະໝຽນທີ່ຊອບໃຈຈະທຽວໄປມາຫົ່ມເສື້ອຊັ້ນຍາວແລະທີ່ມັກໄດ້ຮັບຄວາມຄຳນັບທີ່ກາງຕະຫຼາດແລະມັກທີ່ນັ່ງສູງໃນໂຮງທຳແລະໃນການລ້ຽງກັນ” ເພິ່ນບອກອີກວ່າ: “ພວກນີ້ຈະຮັບໂທດຢ່າງໜັກກວ່າ.” (ເປັນຄົນສຳຄັນສຳລັບພະເຈົ້າ
4. ການເປັນຄົນສຳຄັນສຳລັບໃຜຄືສິ່ງທີ່ດີທີ່ສຸດ ແລະຍ້ອນຫຍັງ?
4 ການເປັນຄົນທີ່ສຳຄັນສຳລັບໃຜຄືສິ່ງທີ່ດີທີ່ສຸດ? ຫຼາຍຄົນຄິດວ່າການໄດ້ຮຽນສູງໆ ການທີ່ປະສົບຜົນສຳເລັດທາງທຸລະກິດ ຫຼືການມີຊື່ສຽງໃນວົງການບັນເທີງແລະກິລາຈະເຮັດໃຫ້ເຂົາເຈົ້າເປັນຄົນສຳຄັນ. ແຕ່ໂປໂລບອກວ່າ: “ດຽວນີ້ ຄັນທ່ານທັງຫຼາຍຮູ້ຈັກພະເຈົ້າແລ້ວ ຫຼືດີກວ່າອີກພະເຈົ້າຮູ້ຈັກທ່ານທັງຫຼາຍ ເປັນສັນໃດທ່ານທັງຫຼາຍຫຼົບໄປຫາຮີດຄອງອັນຕາເວທະນາແລະຂາດປະໂຫຍດນັ້ນ ທ່ານທັງຫຼາຍຢາກໄດ້ເປັນທາດແຫ່ງສິ່ງທັງຫຼາຍນັ້ນອີກຫຼື?” (ຄາລາຊີ 4:9) ເປັນສິດທິພິເສດແທ້ໆທີ່ພະເຢໂຫວາພະເຈົ້າເຊິ່ງເປັນຜູ້ປົກຄອງສູງສຸດແຫ່ງເອກະພົບ “ຮູ້ຈັກ” ເຮົາ! ພະອົງຮູ້ວ່າເຮົາແມ່ນໃຜ ພະອົງຮັກເຮົາ ແລະຢາກໃຫ້ເຮົາສະໜິດກັບພະອົງ. ພະເຢໂຫວາສ້າງເຮົາເພື່ອຈະໃຫ້ເຮົາເປັນໝູ່ກັບພະອົງ.—ຜູ້ເທສະໜາປ່າວປະກາດ 12:13, 14
5. ເຮົາຕ້ອງເຮັດຫຍັງເພື່ອຈະເປັນໝູ່ກັບພະເຢໂຫວາໄດ້?
5 ເຮົາຮູ້ວ່າໂມເຊເປັນໝູ່ກັບພະເຢໂຫວາ. ຕອນທີ່ລາວອ້ອນວອນພະອົງວ່າ: “ຂໍເຊີນພະອົງໂຜດສຳແດງທາງຂອງພະອົງໃຫ້ຂ້ານ້ອຍເຫັນ” ແລະພະອົງກໍຕອບລາວວ່າ: “ສິ່ງນີ້ທີ່ເຈົ້າໄດ້ຂໍແລ້ວເຮົາຈະກະທຳດ້ວຍ ເຫດວ່າເຈົ້າໄດ້ພົບພະຄຸນຕໍ່ຕາເຮົາແລ້ວ ແລະເຮົາໄດ້ຮູ້ຈັກເຈົ້າດ້ວຍນາມຊື່.” (ອົບພະຍົບ 33:12-17) ທີ່ຈິງ ພະເຢໂຫວາກໍຍັງຮູ້ຈັກເຮົາແຕ່ລະຄົນເປັນຢ່າງດີ. ແຕ່ເຮົາຕ້ອງເຮັດຫຍັງເພື່ອຈະເປັນໝູ່ກັບພະເຢໂຫວາໄດ້? ເຮົາຕ້ອງຮັກພະອົງແລະອຸທິດຊີວິດໃຫ້ພະອົງ.—ອ່ານ1 ໂກລິນໂທ 8:3
6, 7. ອັນໃດອາດເຮັດໃຫ້ເຮົາສູນເສຍສາຍສຳພັນທີ່ດີກັບພະເຢໂຫວາ?
6 ແຕ່ເທົ່ານັ້ນຍັງບໍ່ພໍ ເຮົາຕ້ອງຮັກສາສາຍສຳພັນທີ່ມີຄ່າກັບພະເຢໂຫວາຕໍ່ໆໄປ. ຄືກັບຄລິດສະຕຽນສະຕະວັດທຳອິດໃນເມືອງຄາລາຊີ ເຮົາຕ້ອງເຊົາເປັນທາດຂອງ “ຮີດຄອງອັນຕາເວທະນາແລະຂາດປະໂຫຍດ” ຂອງໂລກນີ້ ເຊິ່ງລວມເຖິງການປະສົບຄວາມສຳເລັດແລະການມີຊື່ສຽງໃນໂລກ. (ຄາລາຊີ 4:9) ຄລິດສະຕຽນໃນເມືອງນັ້ນກໍຮູ້ຈັກພະເຈົ້າຢູ່ແລ້ວ ແລະພະເຈົ້າກໍຮູ້ຈັກເຂົາເຈົ້າ. ແຕ່ໂປໂລບອກວ່າພີ່ນ້ອງເຫຼົ່ານີ້ “ຫຼົບໄປຫາ” ສິ່ງທີ່ບໍ່ມີຄ່າອີກ. ແທ້ໆແລ້ວໂປໂລກຳລັງຖາມເຂົາເຈົ້າວ່າ: “ເປັນສັນໃດທ່ານທັງຫຼາຍຫຼົບໄປຫາຮີດຄອງອັນຕາເວທະນາແລະຂາດປະໂຫຍດນັ້ນ ທ່ານທັງຫຼາຍຢາກໄດ້ເປັນທາດແຫ່ງສິ່ງທັງຫຼາຍນັ້ນອີກຫຼື?”
7 ເລື່ອງແບບນີ້ອາດເກີດຂຶ້ນກັບເຮົາໄດ້ບໍ? ໄດ້ແທ້. ຄືກັບໂປໂລ ເມື່ອເຮົາເຂົ້າມາເປັນພະຍານພະເຢໂຫວາ ເຮົາໄດ້ປະຖິ້ມຊື່ສຽງແລະຄວາມສຳເລັດໃນໂລກຂອງຊາຕານ. (ອ່ານຟີລິບ 3:7, 8) ເຮົາອາດຖິ້ມ ທຶນການສຶກສາ ວຽກທີ່ດີ ຫຼືໂອກາດທີ່ຈະຫາເງິນໄດ້ຫຼາຍໆ ຫຼືເຮົາອາດມີພອນສະຫວັນດ້ານດົນຕີແລະກິລາເຊິ່ງອາດຈະເຮັດໃຫ້ເຮົາມີຊື່ສຽງແລະຮັ່ງມີ ແຕ່ເຮົາກໍຖິ້ມໂອກາດເຫຼົ່ານັ້ນທັງໝົດ. (ເຫບເລີ 11:24-27) ເປັນເລື່ອງທີ່ບໍ່ສະຫຼາດເລີຍທີ່ເຮົາຈະຄຶດເສຍໃຈແລະຮູ້ສຶກວ່າຊີວິດຈະດີກວ່ານີ້ຖ້າຕອນນັ້ນໄດ້ເອົາຈິງເອົາຈັງໃນເລື່ອງເຫຼົ່ານັ້ນ! ຖ້າເຮົາຄິດແນວນັ້ນ ເຮົາກໍອາດກັບໄປຫາສິ່ງຕ່າງໆຂອງໂລກນີ້ ເຊິ່ງເຮົາເຄີຍຖືວ່າເປັນ “ຮີດຄອງອັນຕາເວທະນາແລະຂາດປະໂຫຍດ.”
ໃຫ້ພະຍາຍາມເປັນຄົນສຳຄັນສຳລັບພະເຢໂຫວາ
8. ສິ່ງໃດຈະຊ່ວຍໃຫ້ເຮົາຢາກເປັນຄົນສຳຄັນສຳລັບພະເຢໂຫວາແລະຮູ້ສຶກແບບນັ້ນຫຼາຍຂຶ້ນ?
8 ເຮົາຄວນຢາກເປັນຄົນສຳຄັນສຳລັບພະເຢໂຫວາບໍ່ແມ່ນຢາກເປັນຄົນສຳຄັນສຳລັບໂລກ ແລ້ວອັນໃດຈະຊ່ວຍເຮົາໃຫ້ມີຄວາມຮູ້ສຶກແບບນັ້ນຫຼາຍຂຶ້ນ? ເຮົາຕ້ອງຄິດເຖິງຄວາມຈິງທີ່ສຳຄັນ 2 ຢ່າງ. ທຳອິດ ພະເຢໂຫວາໃຫ້ຄວາມສຳຄັນສະເໝີ ກັບຄົນທີ່ຮັບໃຊ້ພະອົງຢ່າງສັດຊື່. (ອ່ານເຫບເລີ 6:10; 11:6) ພະເຢໂຫວາເບິ່ງວ່າຜູ້ຮັບໃຊ້ທຸກຄົນຂອງພະອົງມີຄ່າຫຼາຍ ເຖິງຂະໜາດທີ່ພະອົງຖືວ່າການບໍ່ສົນໃຈຜູ້ຮັບໃຊ້ຄົນໜຶ່ງເປັນການເຮັດສິ່ງທີ່ “ບໍ່ຊອບທຳ.” ພະອົງຮູ້ຈັກທຸກຄົນທີ່ເປັນ ‘ຄົນຂອງພະອົງ.’ (2 ຕີໂມເຕ 2:19) ນອກຈາກນັ້ນ ພະອົງກໍ “ຮູ້ຈັກຮີດຄອງຂອງພວກຄົນຊອບທຳ” ແລະຮູ້ວິທີຊ່ວຍເຂົາເຈົ້າໃຫ້ລອດ.—ຄຳເພງ 1:6; 2 ເປໂຕ 2:9
9. ຂໍໃຫ້ຍົກຕົວຢ່າງທີ່ສະແດງໃຫ້ເຫັນວ່າພະເຢໂຫວາຮັກຄົນຂອງພະອົງ.
9 ບາງຄັ້ງພະເຢໂຫວາເຮັດໃຫ້ເຫັນວ່າພະອົງຮັກຄົນຂອງພະອົງໃນວິທີທີ່ພິເສດຫຼາຍ. (2 ຂ່າວຄາວ 20:20, 29) ຕົວຢ່າງ: ຂໍໃຫ້ຄິດເຖິງວິທີທີ່ພະເຢໂຫວາຊ່ວຍຄົນຂອງພະອົງໃຫ້ລອດຢູ່ທີ່ທະເລແດງ ຕອນທີ່ກອງທັບໃຫຍ່ຂອງຟາໂລໄລ່ຕາມເຂົາເຈົ້າມາ. (ອົບພະຍົບ 14:21-30; ຄຳເພງ 106:9-11) ເຫດການນີ້ເປັນເລື່ອງທີ່ໜ້າຕື່ນເຕັ້ນຫຼາຍຈົນຜູ້ຄົນໃນປະເທດແຖວນັ້ນຊ່າລືກັນໄປເຖິງ 40 ປີ. (ໂຢຊວຍ 2:9-11) ເຮົາຮູ້ສຶກໄດ້ກຳລັງໃຈແທ້ໆທີ່ຄິດເຖິງວິທີທີ່ພະເຢໂຫວາຮັກຜູ້ຮັບໃຊ້ຂອງພະອົງໃນອະດີດແລະໃຊ້ພະລັງເພື່ອຊ່ວຍເຂົາເຈົ້າ. ເພາະອີກບໍ່ດົນໂຄກແຫ່ງມາໂຄກກໍຈະໂຈມຕີເຮົາແລ້ວ. (ເອເຊກຽນ 38:8-12) ໃນຕອນນັ້ນ ເຮົາຈະມີຄວາມສຸກຫຼາຍທີ່ໄດ້ພະຍາຍາມເປັນຄົນສຳຄັນສຳລັບພະເຢໂຫວາບໍ່ແມ່ນສຳລັບໂລກນີ້.
ບາງຄັ້ງພະເຢໂຫວາກໍໃຫ້ລາງວັນກັບຜູ້ຮັບໃຊ້ຂອງພະອົງໃນແບບທີ່ບໍ່ຄາດຄິດ
10. ຄວາມຈິງຢ່າງທີສອງທີ່ເຮົາຕ້ອງຄິດເຖິງແມ່ນຫຍັງ?
10 ຄວາມຈິງຢ່າງທີສອງທີ່ເຮົາຕ້ອງຄິດເຖິງຄືພະເຢໂຫວາອາດໃຫ້ຄວາມສຳຄັນກັບເຮົາໃນແບບທີ່ເຮົາບໍ່ຄາດຄິດ. ຖ້າຄົນເຮົາເຮັດດີເພື່ອຈະໃຫ້ຄົນອື່ນຍົກຍ້ອງ ພະເຢໂຫວາກໍຈະບໍ່ໃຫ້ລາງວັນກັບລາວ. ຍ້ອນຫຍັງ? ຄືກັບທີ່ພະເຍຊູບອກ ເມື່ອຄົນອື່ນຍົກຍ້ອງລາວ ນັ້ນກໍເປັນລາງວັນຂອງລາວແລ້ວ. (ອ່ານມັດທາຍ 6:1-5) ກົງກັນຂ້າມ ພະເຢໂຫວາຜູ້ເຫັນ “ໃນທີ່ລັບລີ້” ກໍເຫັນຄົນເຮັດດີທີ່ບໍ່ມີໃຜຍົກຍ້ອງ. ພະອົງສັງເກດເຫັນສິ່ງທີ່ລາວເຮັດ ແລະຈະໃຫ້ລາງວັນຫຼືອວຍພອນລາວ. ບາງຄັ້ງພະເຢໂຫວາກໍໃຫ້ລາງວັນກັບຜູ້ຮັບໃຊ້ຂອງພະອົງໃນແບບທີ່ບໍ່ຄາດຄິດ. ຂໍໃຫ້ເຮົາມາເບິ່ງບາງຕົວຢ່າງນຳກັນ.
ພະເຢໂຫວາໃຫ້ຄວາມສຳຄັນກັບຜູ້ຍິງທີ່ຖ່ອມຕົວໃນແບບທີ່ບໍ່ຄາດຄິດ
11. ອັນໃດເຮັດໃຫ້ເຮົາເຫັນວ່າພະເຢໂຫວາໃຫ້ຄວາມສຳຄັນກັບມາລີ?
11 ພະເຢໂຫວາເລືອກຜູ້ຍິງຖ່ອມຄົນໜຶ່ງຊື່ມາລີໃຫ້ເປັນແມ່ຂອງພະເຍຊູລູກຊາຍຂອງພະອົງ. ມາລີອາໄສຢູ່ເມືອງນ້ອຍໆຊື່ນາຊາເລດເຊິ່ງໄກຈາກເມືອງເຢຣຶຊາເລມທີ່ມີວິຫານທີ່ສວຍງາມຫຼາຍ. (ອ່ານລືກາ 1:26-33) ເປັນຫຍັງພະເຢໂຫວາເລືອກມາລີ? ທູດສະຫວັນຄາບລຽນມາບອກກັບລາວວ່າລາວ “ໄດ້ຮັບພະຄຸນຕໍ່ໜ້າພະເຈົ້າ.” ເຮົາເຫັນໄດ້ວ່າມາລີເປັນໝູ່ສະໜິດຂອງພະເຢໂຫວາຈາກສິ່ງທີ່ລາວໄດ້ເວົ້າກັບເອລີຊາເບດທີ່ເປັນຍາດພີ່ນ້ອງຂອງລາວ. (ລືກາ 1:46-55) ພະເຢໂຫວາໄດ້ເຝົ້າເບິ່ງມາລີ ແລະເຫັນວ່າລາວສັດຊື່ຕໍ່ພະອົງ ພະອົງຈຶ່ງອວຍພອນລາວໃນແບບທີ່ບໍ່ຄາດຄິດ.
12, 13. ພະເຍຊູໄດ້ຮັບກຽດແນວໃດຕອນທີ່ເພິ່ນເກີດ ແລະຕອນທີ່ມາລີພາເພິ່ນໄປວິຫານຫຼັງຈາກເກີດໄດ້ 40 ມື້?
12 ຕອນທີ່ພະເຍຊູເກີດ ພະເຢໂຫວາໄດ້ບອກໃຫ້ໃຜຮູ້ແດ່? ພະອົງບໍ່ໄດ້ບອກເຈົ້າໜ້າທີ່ລະດັບສູງຫຼືຜູ້ປົກຄອງຄົນໃດໆໃນເຢຣຶຊາເລມແລະເບດເລເຫມ. ແຕ່ພະອົງໄດ້ສົ່ງທູດສະຫວັນໄປບອກພວກຄົນລ້ຽງແກະທີ່ຖ່ອມຕົວເຊິ່ງລ້ຽງແກະຢູ່ນອກເມືອງເບດເລເຫມ. (ລືກາ 2:8-14) ແລ້ວພວກຄົນລ້ຽງແກະກໍໄປຢາມພະເຍຊູ. (ລືກາ 2:15-17) ມາລີແລະໂຢເຊບຄົງຕ້ອງແປກໃຈຫຼາຍແທ້ໆທີ່ເຫັນພະເຍຊູໄດ້ຮັບກຽດໃນວິທີນີ້. ວິທີຂອງພະເຢໂຫວາຕ່າງກັນກັບວິທີຂອງຊາຕານ. ເມື່ອຊາຕານສົ່ງໝໍໂຫນໄປຫາພະເຍຊູແລະພໍ່ແມ່ຂອງເພິ່ນ ທຸກຄົນໃນເຢຣຶຊາເລມກໍໄດ້ຮູ້ວ່າພະເຍຊູເກີດແລ້ວແລະນີ້ກໍເຮັດໃຫ້ເກີດບັນຫາຫຼາຍຢ່າງ. (ມັດທາຍ 2:3) ຜົນກໍຄື ເດັກນ້ອຍທີ່ບໍລິສຸດຫຼາຍຄົນໄດ້ຖືກຂ້າໃນເວລາຕໍ່ມາ.—ມັດທາຍ 2:16
13 ກົດໝາຍທີ່ພະເຢໂຫວາໃຫ້ຊາດອິດສະລາແອນບອກວ່າ ຫຼັງຈາກທີ່ຜູ້ຍິງເກີດລູກໄດ້ 40 ມື້ ລາວຕ້ອງໄປຖວາຍເຄື່ອງບູຊາໃຫ້ພະເຢໂຫວາ. ດັ່ງນັ້ນທັງມາລີ ໂຢເຊບແລະພະເຍຊູຕ້ອງເດີນທາງຈາກເມືອງເບດເລເຫມໄປທີ່ວິຫານໃນເມືອງເຢຣຶຊາເລມປະມານ 9 ກິໂລແມັດ. (ລືກາ 2:22-24) ລະຫວ່າງການເດີນທາງ ມາລີອາດສົງໄສວ່າ ປະໂລຫິດຈະເຮັດບາງສິ່ງທີ່ພິເສດເພື່ອໃຫ້ກຽດພະເຍຊູບໍ? ພະເຍຊູໄດ້ຮັບກຽດແທ້ໆ ແຕ່ບໍ່ແມ່ນໃນແບບທີ່ມາລີຄິດ. ພະເຢໂຫວາເລືອກຊີເມໂອນເຊິ່ງ ‘ເປັນຄົນຊອບທຳແລະນັບຖື ພະເຈົ້າ’ ແລະຜູ້ພະຍາກອນຍິງຊື່ອານາເຊິ່ງເປັນແມ່ໝ້າຍອາຍຸ 84 ປີໃຫ້ໄປບອກຜູ້ຄົນວ່າພະເຍຊູຈະເປັນເມຊີຫຼືພະຄລິດຕາມຄຳສັນຍາ.—ລືກາ 2:25-38
14. ພະເຢໂຫວາໃຫ້ລາງວັນຫຍັງກັບມາລີ?
14 ພະເຢໂຫວາຍັງຄົງໃຫ້ຄວາມສຳຄັນກັບມາລີຕໍ່ໄປບໍ ເພາະລາວຮັບໃຊ້ພະອົງຢ່າງສັດຊື່ໂດຍລ້ຽງແລະເບິ່ງແຍງພະເຍຊູເປັນຢ່າງດີ? ແມ່ນແລ້ວ. ພະອົງໄດ້ໃຫ້ມີການບັນທຶກກ່ຽວກັບສິ່ງທີ່ມາລີເວົ້າແລະເຮັດໄວ້ໃນຄຳພີໄບເບິນ. ເບິ່ງຄືວ່າມາລີບໍ່ສາມາດຮ່ວມເດີນທາງໄປກັບພະເຍຊູໃນໄລຍະສາມປີເຄິ່ງທີ່ເພິ່ນເຮັດວຽກຮັບໃຊ້. ອາດເປັນຍ້ອນວ່າລາວເປັນໝ້າຍຈຶ່ງຕ້ອງຢູ່ທີ່ເມືອງນາຊາເລດ. ດັ່ງນັ້ນ ມາລີຈຶ່ງບໍ່ມີປະສົບການທີ່ດີຫຼາຍຢ່າງຄືກັບຄົນອື່ນມີ. ແຕ່ມາລີກໍຢູ່ກັບພະເຍຊູຕອນທີ່ເພິ່ນຕາຍ. (ໂຢຮັນ 19:26) ຕໍ່ມາ ມາລີກໍຢູ່ເມືອງເຢຣຶຊາເລມກັບລູກສິດຂອງພະເຍຊູກ່ອນທີ່ເຂົາເຈົ້າຈະໄດ້ຮັບພະລັງບໍລິສຸດໃນວັນເພນເຕກອດ. (ກິດຈະການ 1:13, 14) ເບິ່ງຄືວ່າມາລີກໍຖືກເຈີມດ້ວຍພະລັງບໍລິສຸດພ້ອມກັບພວກລູກສິດຄົນອື່ນໆ. ຖ້າເປັນແບບນັ້ນກໍໝາຍຄວາມວ່າລາວໄດ້ຮັບໂອກາດທີ່ຈະຢູ່ກັບພະເຍຊູເທິງສະຫວັນຕະຫຼອດໄປ. ນີ້ເປັນລາງວັນທີ່ຍິ່ງໃຫຍ່ແທ້ໆສຳລັບລາວທີ່ເຮັດວຽກຮັບໃຊ້ຢ່າງສັດຊື່!
ພະເຢໂຫວາໃຫ້ຄວາມສຳຄັນກັບລູກຊາຍຂອງພະອົງ
15. ຕອນທີ່ພະເຍຊູຢູ່ເທິງໂລກ ພະເຢໂຫວາໃຫ້ຄວາມສຳຄັນກັບເພິ່ນແນວໃດ?
15 ພະເຍຊູບໍ່ຢາກໄດ້ຮັບກຽດຈາກພວກຫົວໜ້າສາສະໜາແລະພວກຜູ້ນຳທາງການເມືອງ. ການທີ່ໄດ້ຮັບກຽດຈາກພະເຢໂຫວາເປັນສິ່ງສຳຄັນທີ່ສຸດສຳລັບເພິ່ນ. ມີ 3 ຄັ້ງທີ່ພະເຢໂຫວາເວົ້າໂດຍກົງຈາກສະຫວັນເພື່ອໃຫ້ພະເຍຊູຮູ້ວ່າພະອົງຮັກເພິ່ນ. ນີ້ຄົງເຮັດໃຫ້ພະເຍຊູມີກຳລັງໃຈຫຼາຍແທ້ໆ! ຄັ້ງທຳອິດແມ່ນບໍ່ດົນຫຼັງຈາກທີ່ເພິ່ນຮັບບັບເຕມາໃນແມ່ນໍ້າຢູລະເດນ ພະເຢໂຫວາກໍເວົ້າວ່າ: “ນີ້ຄືລູກຊາຍຮັກຂອງເຮົາ ເຮົາພໍໃຈໃນຕົວລາວຫຼາຍ.” (ມັດທາຍ 3:17, ລ.ມ.) ເບິ່ງຄືວ່າໂຢຮັນບັບຕິດໂຕເປັນພຽງຄົນດຽວທີ່ໄດ້ຍິນຄຳເວົ້າເຫຼົ່ານັ້ນ. ຄັ້ງຕໍ່ມາແມ່ນປະມານໜຶ່ງປີກ່ອນທີ່ພະເຍຊູຈະຕາຍ ອັກຄະສາວົກສາມຄົນໄດ້ຍິນພະເຢໂຫວາເວົ້າກັບພະເຍຊູວ່າ: “ນີ້ຄືລູກຊາຍຮັກຂອງເຮົາ ເຮົາພໍໃຈໃນຕົວລາວຫຼາຍ.” (ມັດທາຍ 17:5, ລ.ມ.) ແລະຄັ້ງສຸດທ້າຍແມ່ນພຽງບໍ່ເທົ່າໃດມື້ກ່ອນທີ່ພະເຍຊູຈະຕາຍ ພະເຢໂຫວາກໍເວົ້າແບບນີ້ອີກຈາກສະຫວັນກັບລູກຊາຍຂອງພະອົງ.—ໂຢຮັນ 12:28
ເຈົ້າໄດ້ຮຽນຮູ້ຫຍັງຈາກວິທີທີ່ພະເຢໂຫວາໃຫ້ຄວາມສຳຄັນກັບລູກຊາຍຂອງພະອົງ? (ເບິ່ງຂໍ້ 15-17)
16, 17. ພະເຢໂຫວາໃຫ້ກຽດພະເຍຊູໃນແບບທີ່ບໍ່ຄາດຄິດແນວໃດ?
16 ພະເຍຊູຮູ້ວ່າຜູ້ຄົນຈະເອີ້ນເພິ່ນວ່າເປັນຄົນໝິ່ນປະໝາດແລະຈະຕ້ອງຕາຍຢ່າງໜ້າອັບອາຍ. ແຕ່ວ່າເພິ່ນກໍຍັງອະທິດຖານຂໍໃຫ້ເປັນໄປຕາມຄວາມຕ້ອງການຂອງພະເຈົ້າບໍ່ແມ່ນຂອງເພິ່ນເອງ. (ມັດທາຍ 26:39, 42) ພະເຍຊູ “ຍອມທົນທຸກແລະບໍ່ຄິດເຖິງຄວາມອັບອາຍທີ່ຕ້ອງຕາຍເທິງເສົາທໍລະມານ” ເພາະເພິ່ນຢາກເປັນຄົນສຳຄັນສຳລັບພະເຢໂຫວາ ບໍ່ແມ່ນສຳລັບໂລກນີ້. (ເຫບເລີ 12:2, ລ.ມ.) ພະເຢໂຫວາໃຫ້ຄວາມສຳຄັນກັບພະເຍຊູໂດຍວິທີໃດ?
17 ຕອນທີ່ພະເຍຊູຢູ່ເທິງໂລກ ເພິ່ນອະທິດຖານຂໍໃຫ້ໄດ້ຮັບກຽດຄືກັບທີ່ເພິ່ນເຄີຍມີຕອນທີ່ຢູ່ກັບພໍ່ເທິງສະຫວັນ. (ໂຢຮັນ 17:5) ບໍ່ມີບ່ອນໃດໃນຄຳພີໄບເບິນບອກວ່າພະເຍຊູຫວັງຢາກໄດ້ຫຍັງຫຼາຍກວ່ານັ້ນ. ເພິ່ນບໍ່ໄດ້ຄາດຫວັງຢາກໄດ້ລາງວັນພິເສດຈາກການເຮັດຕາມນໍ້າໃຈຂອງພະເຢໂຫວາ. ແຕ່ພະເຢໂຫວາໄດ້ໃຫ້ຫຍັງກັບເພິ່ນ? ພະອົງໃຫ້ກຽດພະເຍຊູໃນແບບທີ່ເພິ່ນບໍ່ຄາດຄິດ. ຕອນທີ່ພະເຢໂຫວາປຸກພະເຍຊູໃຫ້ຟື້ນຄືນຈາກຕາຍ ພະອົງໄດ້ “ຍົກຖານະເພິ່ນໃຫ້ສູງຂຶ້ນ” ໃນສະຫວັນ ແລະຍັງໃຫ້ເພິ່ນມີຊີວິດທີ່ເປັນອະມະຕະເຊິ່ງບໍ່ເຄີຍມີໃຜໄດ້ຮັບມາກ່ອນ! * (ເບິ່ງໄຂເງື່ອນ) (ຟີລິບ 2:9, ລ.ມ.; 1 ຕີໂມເຕ 6:16) ພະເຢໂຫວາໃຫ້ລາງວັນພະເຍຊູໃນແບບທີ່ສຸດຍອດແທ້ໆເພາະເພິ່ນເຮັດວຽກຮັບໃຊ້ຢ່າງສັດຊື່!
18. ອັນໃດຈະຊ່ວຍເຮົາໃຫ້ຢາກເປັນຄົນສຳຄັນສຳລັບພະເຢໂຫວາບໍ່ແມ່ນສຳລັບໂລກນີ້?
18 ອັນໃດຈະຊ່ວຍເຮົາໃຫ້ຢາກເປັນຄົນສຳຄັນສຳລັບພະເຢໂຫວາບໍ່ແມ່ນສຳລັບໂລກນີ້? ເຮົາຄວນຄິດເຖິງຄວາມຈິງທີ່ວ່າ ພະເຢໂຫວາໃຫ້ຄວາມສຳຄັນສະເໝີກັບຄົນທີ່ຮັບໃຊ້ພະອົງຢ່າງສັດຊື່ ແລະພະອົງກໍມັກໃຫ້ລາງວັນກັບເຂົາເຈົ້າໃນແບບທີ່ບໍ່ຄາດຄິດ. ເຮົາກໍຄົງໄດ້ແຕ່ຈິນຕະນາການວ່າພະເຢໂຫວາຈະອວຍພອນເຮົາແນວໃດໃນອະນາຄົດ. ແຕ່ໃນຂະນະທີ່ເຮົາຍັງອົດທົນກັບບັນຫາແລະຄວາມຫຍຸ້ງຍາກໃນໂລກນີ້ ເຮົາຕ້ອງຈື່ໄວ້ວ່າລະບົບຊົ່ວຂອງຊາຕານກຳລັງຈະສູນຫາຍໄປ ແລະບໍ່ວ່າເຮົາຈະເປັນຄົນສຳຄັນໃນດ້ານໃດຂອງໂລກ ມັນກໍຈະສູນຫາຍໄປຄືກັນ. (1 ໂຢຮັນ 2:17) ພະເຢໂຫວາພໍ່ທີ່ຮັກຂອງເຮົາຈະບໍ່ລືມວຽກທີ່ເຮົາເຮັດແລະຄວາມຮັກທີ່ເຮົາມີຕໍ່ພະອົງ ເພາະພະອົງ “ບໍ່ເປັນບໍ່ຊອບທຳ” ຫຼືບໍ່ເຮັດສິ່ງຊົ່ວ. (ເຫບເລີ 6:10) ພະອົງຈະເຮັດໃຫ້ເຮົາເຫັນວ່າພະອົງຮັກເຮົາໃນແບບທີ່ເຮົາອາດບໍ່ຄາດຄິດມາກ່ອນ!
^ ຂໍ້ 17 ນີ້ເປັນລາງວັນທີ່ບໍ່ມີໃຜເຄີຍຄິດມາກ່ອນ ເພາະໃນພະຄຳພີພາກພາສາເຫບເລີບໍ່ເຄີຍເວົ້າເຖິງຊີວິດອະມະຕະ.