ສອນຄວາມຈິງ
“ໂອ້ພະເຢໂຫວາ . . . ພະຄຳແຫ່ງພະອົງທັງສິ້ນເປັນຄວາມຈິງ.”—ຄຳເພງ 119:159, 160
1, 2. (ກ) ວຽກຫຍັງສຳຄັນທີ່ສຸດໃນຊີວິດຂອງພະເຍຊູ ແລະຍ້ອນຫຍັງ? (ຂ) ເຮົາຕ້ອງເຮັດຫຍັງເພື່ອຈະເປັນ “ເພື່ອນຮ່ວມງານຂອງພະເຈົ້າ” ທີ່ປະສົບຜົນສຳເລັດ?
ພະເຍຊູຄລິດເປັນຊ່າງໄມ້ແລະຕໍ່ມາກໍເປັນຜູ້ປະກາດແລະສອນ. (ມາລະໂກ 6:3; ໂລມ 15:8) ເພິ່ນເຮັດວຽກທັງສອງຢ່າງນີ້ໄດ້ສົມບູນແບບ. ໃນຖານະຊ່າງໄມ້ ເພິ່ນຮຽນຮູ້ວິທີທີ່ຈະໃຊ້ເຄື່ອງມືເພື່ອປະດິດເຄື່ອງໃຊ້ທີ່ເຮັດຈາກໄມ້. ໃນຖານະຜູ້ປະກາດແລະສອນເພິ່ນກໍໃຊ້ຄວາມຮູ້ທີ່ເລິກເຊິ່ງຈາກພະຄຳພີເພື່ອຊ່ວຍຜູ້ຄົນໃຫ້ເຂົ້າໃຈຄວາມຈິງໃນພະຄຳຂອງພະເຈົ້າ. (ມັດທາຍ 7:28; ລືກາ 24:32, 45) ຕອນທີ່ພະເຍຊູອາຍຸ 30 ປີ ເພິ່ນໄດ້ເຊົາເປັນຊ່າງໄມ້ແລະກໍມາເປັນຜູ້ປະກາດແລະສອນເພາະເພິ່ນຮູ້ວ່ານີ້ເປັນວຽກທີ່ສຳຄັນທີ່ສຸດ. ພະເຍຊູບອກວ່າການປະກາດຂ່າວດີເລື່ອງລາຊະອານາຈັກຂອງພະເຈົ້າເປັນເຫດຜົນໜຶ່ງທີ່ພະເຈົ້າສົ່ງເພິ່ນມາໃນໂລກ. (ມັດທາຍ 20:28; ລືກາ 3:23; 4:43) ພະເຍຊູໃຫ້ການປະກາດຂ່າວດີເປັນສິ່ງສຳຄັນໃນຊີວິດ ແລະເພິ່ນກໍຢາກໃຫ້ຄົນອື່ນເຮັດແບບນັ້ນຄືກັນ.—ມັດທາຍ 9:35-38
2 ພວກເຮົາສ່ວນຫຼາຍບໍ່ໄດ້ເປັນຊ່າງໄມ້ ແຕ່ເຮົາທຸກຄົນເປັນຜູ້ປະກາດແລະສອນທີ່ສອນຂ່າວດີໃຫ້ກັບຄົນອື່ນໆ. ວຽກນີ້ສຳຄັນຫຼາຍຈົນພະເຈົ້າຕ້ອງລົງມາມີສ່ວນຮ່ວມນຳ. ທີ່ຈິງເຮົາຖືກເອີ້ນວ່າ: “ເພື່ອນຮ່ວມງານຂອງພະເຈົ້າ.” (1 ໂກລິນໂທ 3:9, ລ.ມ.; 2 ໂກລິນໂທ 6:4) ເຮົາເຫັນດີກັບຜູ້ຂຽນຄຳເພງທີ່ບອກວ່າ: “ພະຄຳແຫ່ງພະອົງທັງສິ້ນເປັນຄວາມຈິງ.” (ຄຳເພງ 119:159, 160) ແມ່ນແລ້ວ ພະຄຳຂອງພະເຢໂຫວາເປັນຄວາມຈິງ. ນີ້ເປັນເຫດຜົນທີ່ເຮົາຢາກໝັ້ນໃຈວ່າເຮົາໃຊ້ “ພະຄຳແຫ່ງຄວາມຈິງດ້ວຍຢ່າງສັດຊື່ [ຖືກຕ້ອງ]” ເມື່ອເຮົາປະກາດ. (ອ່ານ 2 ຕີໂມເຕ 2:15) ດັ່ງນັ້ນ ເຮົາຈຶ່ງພະຍາຍາມປັບປຸງຄວາມສາມາດທີ່ຈະໃຊ້ຄຳພີໄບເບິນ ແລະເຄື່ອງມືຫຼັກໃນການສອນຜູ້ຄົນກ່ຽວກັບພະເຢໂຫວາ ພະເຍຊູ ແລະລາຊະອານາຈັກໃຫ້ຊຳນານຫຼາຍຂຶ້ນ. ເພື່ອຈະຊ່ວຍເຮົາໃຫ້ເຮັດວຽກປະກາດສຳເລັດ ອົງການຂອງພະເຢໂຫວາໄດ້ຈັດໃຫ້ເຮົາມີເຄື່ອງມືອື່ນໆອີກທີ່ເປັນປະໂຫຍດແລະເຮົາກໍຕ້ອງຮຽນຮູ້ວິທີໃຊ້ຄືກັນ. ເຄື່ອງມືເຫຼົ່ານີ້ມີຢູ່ໃນກ່ອງເຄື່ອງມືສຳລັບການສອນຂອງເຮົາ.
3. ໃນກິດຈະການ 13:48 ບອກວ່າເຮົາຄວນຊອກຫາຄົນແບບໃດ?
3 ບາງຄັ້ງເຈົ້າອາດສົງໄສວ່າເປັນຫຍັງເຮົາຈຶ່ງເອີ້ນວ່າກ່ອງເຄື່ອງມືສຳລັບການສອນ ບໍ່ແມ່ນກ່ອງເຄື່ອງມືສຳລັບການປະກາດ. ເຫດຜົນກໍຍ້ອນວ່າການ “ປະກາດ” ໝາຍເຖິງການປະກາດຂ່າວສານກັບຜູ້ຄົນ. ແຕ່ “ການສອນ” ໝາຍເຖິງການອະທິບາຍຂ່າວສານໃຫ້ຜູ້ຄົນເຂົ້າໃຈໃນສິ່ງທີ່ເຂົາເຈົ້າໄດ້ຍິນແລະກະຕຸ້ນເຂົາເຈົ້າໃຫ້ເຮັດຕາມຈາກສິ່ງທີ່ໄດ້ຮຽນ. ໃນຂະນະທີ່ໂລກນີ້ກຳລັງຈະເຖິງຈຸດຈົບ ເຮົາຕ້ອງສົນໃຈໄປທີ່ການເລີ່ມການສຶກສາຄຳພີໄບເບິນແລະການສອນຄວາມຈິງໃຫ້ກັບຜູ້ຄົນເພື່ອທີ່ເຂົາເຈົ້າຈະໄດ້ເຂົ້າມາເປັນລູກສິດຂອງພະຄລິດ. ນີ້ໝາຍຄວາມວ່າເຮົາຕ້ອງກະຕືລືລົ້ນທີ່ຈະຊອກຫາ “ຄົນທີ່ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປ” ແລະຊ່ວຍເຂົາເຈົ້າໃຫ້ເລີ່ມຮັບໃຊ້ພະເຢໂຫວາ.—ອ່ານກິດຈະການ 13:44-47, 48 *
4. ເຮົາຈະພົບ “ຄົນທີ່ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປ” ໄດ້ແນວໃດ?
4 ເຮົາຈະພົບ “ຄົນທີ່ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປ” ໄດ້ແນວໃດ? ຄລິດສະຕຽນໃນສະຕະວັດທຳອິດໃຊ້ພຽງວິທີດຽວເພື່ອຈະພົບຄົນແບບນັ້ນຄືການປະກາດ. ພະເຍຊູບອກພວກລູກສິດວ່າ: “ເມື່ອເຂົ້າໄປໃນໝູ່ບ້ານໃດເມືອງໃດກໍຕາມ ໃຫ້ໄປຫາຄົນທີ່ເຕັມໃຈຕ້ອນຮັບເຈົ້າແລະສົນໃຈຟັງ.” (ມັດທາຍ 10:11, ລ.ມ.) ເຮົາຕ້ອງເຮັດຄືກັນໃນທຸກມື້ນີ້. ແນ່ນອນ ຖ້າເຮົາພົບຄົນທີ່ຍິ່ງ ບໍ່ສົນໃຈແທ້ໆ ແລະບໍ່ຢາກຮູ້ເລື່ອງພະເຈົ້າ ເຮົາກໍບໍ່ໄດ້ຄາດໝາຍວ່າເຂົາເຈົ້າຈະຟັງຂ່າວດີ. ແຕ່ເຮົາກຳລັງຊອກຫາຄົນທີ່ສົນໃຈ ຖ່ອມຕົວ ແລະຢາກຮູ້ຈັກຄວາມຈິງແທ້ໆ. ເຮົາອາດສົມທຽບການຊອກຫາຄົນທີ່ສົນໃຈກັບສິ່ງທີ່ພະເຍຊູເຮັດຕອນທີ່ເພິ່ນເປັນຊ່າງໄມ້. ກ່ອນທີ່ເພິ່ນຈະເຮັດເຟີນິເຈີ ປະຕູ ແອກ ແລະອື່ນໆ ທຳອິດເພິ່ນຕ້ອງຊອກຫາໄມ້ທີ່ເໝາະສົມ. ຈາກນັ້ນ ເພິ່ນກໍໄປເອົາກ່ອງເຄື່ອງມືມາ ແລ້ວໃຊ້ຄວາມສາມາດເຮັດສິ່ງນັ້ນ. ໃນທຸກມື້ນີ້ກໍຄືກັນ ທຳອິດເຮົາຕ້ອງໄປຊອກຫາຄົນທີ່ສົນໃຈກ່ອນ ຈາກນັ້ນ ເຮົາກໍໃຊ້ເຄື່ອງມືແລະຄວາມສາມາດເພື່ອຊ່ວຍເຂົາເຈົ້າໃຫ້ເຂົ້າມາເປັນລູກສິດ.—ມັດທາຍ 28:19, 20
5. ເຮົາຕ້ອງຮູ້ຫຍັງກ່ຽວກັບກ່ອງເຄື່ອງມືສຳລັບການສອນ? ຂໍໃຫ້ຍົກຕົວຢ່າງ. (ເບິ່ງຮູບທຳອິດ)
5 ໃນກ່ອງເຄື່ອງມື ເຄື່ອງມືແຕ່ລະຢ່າງກໍມີຈຸດປະສົງບໍ່ຄືກັນ. ຕົວຢ່າງ: ຂໍໃຫ້ຄິດເຖິງເຄື່ອງມືທີ່ພະເຍຊູໃຊ້ຕອນທີ່ເປັນຊ່າງໄມ້. * (ເບິ່ງໄຂເງື່ອນ) ເພິ່ນຕ້ອງໃຊ້ເຄື່ອງມືເພື່ອວັດແທກ ໝາຍ ຕັດ ເຈາະ ແລະເຮັດໃຫ້ໄມ້ເປັນຮູບຮ່າງ ຈົນເຖິງໃຊ້ເຄື່ອງມືທີ່ເຮັດໃຫ້ໄມ້ລຽບແລ້ວເອົາມາປະກອບເຂົ້າກັນ. ຄ້າຍຄືກັນ ເຄື່ອງມືແຕ່ລະຢ່າງໃນກ່ອງເຄື່ອງມືສຳລັບການສອນຂອງເຮົາກໍມີຈຸດປະສົງບໍ່ຄືກັນ. ດັ່ງນັ້ນ ຂໍໃຫ້ເຮົາຮຽນຮູ້ວິທີທີ່ຈະໃຊ້ເຄື່ອງມືທີ່ສຳຄັນເຫຼົ່ານີ້.
ເຄື່ອງມືທີ່ບອກຜູ້ຄົນວ່າເຮົາແມ່ນໃຜ
6, 7. (ກ) ເຈົ້າເຄີຍໃຊ້ນາມບັດແນວໃດ? (ຂ) ເປັນຫຍັງເຮົາຈຶ່ງໃຊ້ໃບເຊີນເຂົ້າຮ່ວມການປະຊຸມປະຈຳປະຊາຄົມ?
6 ນາມບັດ. ເຖິງວ່ານາມບັດຈະນ້ອຍ ແຕ່ມັນກໍເປັນເຄື່ອງມືທີ່ມີປະສິດທິພາບຫຼາຍທີ່ຈະບອກຜູ້ຄົນໃນຮູ້ວ່າເຮົາແມ່ນໃຜແລະແນະນຳເຂົາເຈົ້າໃຫ້ເຂົ້າເວັບໄຊ jw.org. ໃນເວັບໄຊ ເຂົາເຈົ້າຈະຮູ້ຈັກເຮົາຫຼາຍຂຶ້ນແລະເຖິງກັບສະໝັກຂໍຮຽນຄຳພີໄບເບິນ. ມີຫຼາຍກວ່າ 4 ແສນຄົນທີ່ຂໍຮຽນຄຳພີໄບເບິນທາງເວັບໄຊ jw.org ແລະມີຫຼາຍຮ້ອຍຄົນທີ່ເຮັດແບບນັ້ນເພີ່ມຂຶ້ນທຸກໆມື້! ເຈົ້າສາມາດເອົານາມບັດຕິດໂຕໄວ້ຈັກສອງສາມອັນ ແລະເອົາໃຫ້ເມື່ອລົມກັບຜູ້ຄົນ.
7 ໃບເຊີນ. ໃບເຊີນການມາປະຊຸມຂອງເຮົາ ມີຂໍ້ຄວາມບອກວ່າ: “ຂໍເຊີນທ່ານໃຫ້ມາສຶກສາຄຳພີໄບເບິນກັບພວກເຮົາ ພະຍານພະເຢໂຫວາ.” ແລະໃນໃບເຊີນກໍບອກວ່າເຈົ້າສາມາດມາຮຽນໄດ້ “ທີ່ການປະຊຸມສາທາລະນະ” ຫຼື “ສຶກສາຄຳພີໄບເບິນກັບຜູ້ສອນເປັນສ່ວນຕົວ.” ດັ່ງນັ້ນ ໃບເຊີນຈຶ່ງບອກຜູ້ຄົນວ່າເຮົາແມ່ນໃຜແລະຍັງເຊີນ “ຄົນທີ່ຮູ້ຕົວວ່າຈຳເປັນຕ້ອງເພິ່ງພະເຈົ້າ” ໃຫ້ສຶກສາຄຳພີໄບເບິນກັບເຮົານຳອີກ. (ມັດທາຍ 5:3, ລ.ມ.) ແນ່ນອນເຮົາຍິນດີຕ້ອນຮັບຜູ້ຄົນທີ່ເຂົ້າຮ່ວມການປະຊຸມຂອງເຮົາບໍ່ວ່າເຂົາເຈົ້າຈະຕອບຮັບການສຶກສາຄຳພີໄບເບິນຫຼືບໍ່. ເມື່ອເຂົາເຈົ້າມາການປະຊຸມຂອງເຮົາ ເຂົາເຈົ້າຈະເຫັນວ່າເຂົາເຈົ້າສາມາດຮຽນຮູ້ຫຼາຍຕື່ມອີກກ່ຽວກັບຄຳພີໄບເບິນ.
8. ເປັນຫຍັງຈຶ່ງສຳຄັນທີ່ຈະເຊີນຜູ້ຄົນໃຫ້ມາປະຊຸມຢ່າງໜ້ອຍໜຶ່ງຄັ້ງ? ຂໍໃຫ້ຍົກຕົວຢ່າງ.
8 ເປັນເລື່ອງສຳຄັນທີ່ເຮົາຈະເຊີນຜູ້ຄົນໃຫ້ເຂົ້າຮ່ວມການປະຊຸມຂອງເຮົາຢ່າງໜ້ອຍໜຶ່ງຄັ້ງ. ເພາະເມື່ອເຂົາເຈົ້າມາປະຊຸມ ເຂົາເຈົ້າກໍຈະເຫັນວ່າພະຍານພະເຢໂຫວາສອນຄວາມຈິງຈາກຄຳພີໄບເບິນແລະຊ່ວຍຜູ້ຄົນໃຫ້ຮູ້ຈັກພະເຈົ້າ ເຊິ່ງສາສະໜາປອມບໍ່ໄດ້ເຮັດແບບນັ້ນ. (ເອຊາອີ 65:13) ຕົວຢ່າງ: ຄູ່ຜົວເມຍໜຶ່ງໃນປະເທດສະຫະລັດອາເມຣິກາຊື່ເຣແລະລິນດາສັງເກດເຫັນຄວາມແຕກຕ່າງເມື່ອຫຼາຍປີກ່ອນ. ເຂົາເຈົ້າເຊື່ອໃນພະເຈົ້າແລະຢາກຮູ້ຈັກພະອົງຫຼາຍຂຶ້ນ. ດັ່ງນັ້ນ ເຂົາເຈົ້າຈຶ່ງຕັດສິນໃຈໄປທຸກໂບດໃນເມືອງນັ້ນແລະຊອກຫາ 2 ສິ່ງກ່ອນທີ່ຈະເຂົ້າເປັນສະມາຊິກ. ທຳອິດ ເຂົາເຈົ້າຕ້ອງໄດ້ຄວາມຮູ້ຈາກໂບດນັ້ນ ແລະສອງ ສະມາຊິກຂອງໂບດຕ້ອງແຕ່ງຕົວເໝາະກັບການເປັນຜູ້ຮັບໃຊ້ພະເຈົ້າ. ເຂົາເຈົ້າໃຊ້ເວລາຫຼາຍປີເພື່ອຈະໄປຄົບທຸກໂບດເພາະມີຫຼາຍໂບດ. ແຕ່ເຂົາເຈົ້າກໍຮູ້ສຶກຜິດຫວັງຫຼາຍເພາະບໍ່ໄດ້ຮຽນຮູ້ຫຍັງເລີຍ ແລະສະມາຊິກແຕ່ລະຄົນຂອງໂບດກໍແຕ່ງຕົວບໍ່ເປັນຕາໜ້ານັບຖືຫຼາຍ. ຫຼັງຈາກທີ່ເຂົາເຈົ້າໄປໂບດສຸດທ້າຍຕາມລາຍການທີ່ໄດ້ວາງແຜນໄວ້ ລິນດາກໍໄປເຮັດວຽກແລະເຣກໍກັບບ້ານ. ຕອນທີ່ເຣຂັບລົດກັບບ້ານ ລາວໄດ້ຜ່ານຫໍປະຊຸມລາຊະອານາຈັກ ລາວຄິດວ່າ: ‘ຂ້ອຍຊິເຂົ້າໄປເບິ່ງກ່ອນວ່າເຂົາເຈົ້າພາກັນເຮັດຫຍັງຢູ່ຫັ້ນ.’ ນີ້ເປັນປະສົບການທີ່ດີທີ່ສຸດເທົ່າທີ່ລາວເຄີຍປະສົບມາ! ທຸກຄົນໃນຫໍປະຊຸມໃຈດີ ເປັນມິດ ແລະແຕ່ງຕົວສຸພາບຮຽບຮ້ອຍຫຼາຍ. ເຣນັ່ງຢູ່ແຖວໜ້າແລະລາວກໍມັກສິ່ງທີ່ລາວໄດ້ຮຽນຮູ້! ນີ້ເຮັດໃຫ້ເຮົາຄິດເຖິງຕອນທີ່ໂປໂລເວົ້າເຖິງຄົນໜຶ່ງທີ່ມາການປະຊຸມເທື່ອທຳອິດເຊິ່ງລາວບອກວ່າ: “ພະເຈົ້າສະຖິດຢູ່ໃນທ່າມກາງພວກທ່ານເປັນແທ້.” (1 ໂກລິນໂທ 14:23-25) ຫຼັງຈາກນັ້ນ ເຣກໍມາການປະຊຸມທຸກໆວັນອາທິດ ແລ້ວລາວກໍເລີ່ມມາປະຊຸມກາງອາທິດທຸກທິດ ແລະລິນດາກໍເລີ່ມມານຳຄືກັນ. ເຖິງວ່າທັງສອງຈະອາຍຸ 70 ປາຍປີແລ້ວ ແຕ່ເຂົາເຈົ້າກໍຍັງສຶກສາຄຳພີໄບເບິນແລະກໍຮັບບັບເຕມາ.
ເຄື່ອງມືທີ່ໃຊ້ເລີ່ມສົນທະນາ
9, 10. (ກ) ເປັນຫຍັງແຜ່ນພັບຈຶ່ງໃຊ້ງ່າຍ? (ຂ) ຂໍໃຫ້ອະທິບາຍວິທີໃຊ້ແຜ່ນພັບການປົກຄອງຂອງພະເຈົ້າແມ່ນຫຍັງ?
9 ແຜ່ນພັບ. ເຮົາມີ 8 ແຜ່ນພັບໃນກ່ອງເຄື່ອງມື. ມັນໃຊ້ງ່າຍຫຼາຍ ແລະໃຊ້ໄດ້ດີໃນການເລີ່ມສົນທະນາ. ຕັ້ງແຕ່ມີການອອກແຜ່ນພັບຄັ້ງທຳອິດໃນປີ 2013 ກໍໄດ້ມີການພິມແຜ່ນພັບເຫຼົ່ານີ້ອອກມາ 5 ພັນລ້ານແຜ່ນ! ແຜ່ນພັບທັງໝົດມີຮູບແບບຄືກັນ. ດັ່ງນັ້ນ ຖ້າເຈົ້າຮູ້ວິທີໃຊ້ແຜ່ນພັບໜຶ່ງໄດ້ ເຈົ້າກໍຈະໃຊ້ທຸກອັນໄດ້ຄືກັນ! ເຈົ້າຈະໃຊ້ແຜ່ນພັບເພື່ອເລີ່ມລົມກັບບາງຄົນໄດ້ແນວໃດ?
10 ຖ້າເຈົ້າຢາກໃຊ້ແຜ່ນພັບການປົກຄອງຂອງພະເຈົ້າແມ່ນຫຍັງ? ເຈົ້າກໍໃຫ້ຄົນນັ້ນເບິ່ງຄຳຖາມຢູ່ທາງໜ້າ ແລ້ວຖາມວ່າ: “ເຈົ້າເຄີຍສົງໄສບໍວ່າ ການປົກຄອງຂອງພະເຈົ້າແມ່ນຫຍັງ? ເຈົ້າຄິດວ່າ . . . ?” ຈາກນັ້ນໃຫ້ລາວເບິ່ງ 3 ຄຳຕອບວ່າຈະເລືອກອັນໃດ. ບໍ່ຕ້ອງບອກວ່າລາວຕອບຖືກຫຼືຜິດ ແຕ່ໃຫ້ເປີດໄປໃນແຜ່ນພັບທີ່ມີຫົວຂໍ້ “ຄຳພີໄບເບິນກ່າວວ່າ” ແລ້ວກໍອ່ານຂໍ້ພະຄຳພີທີ່ດານຽນ 2:44 ແລະເອຊາອີ 9:6. ຈາກນັ້ນ ໃຫ້ເປີດໄປດ້ານຫຼັງແຜ່ນພັບໄປທີ່ຫົວຂໍ້ “ສິ່ງທີ່ຄວນຄິດເຖິງ” ແລະຖາມວ່າ: “ພາຍໃຕ້ການປົກຄອງຂອງພະເຈົ້າເຮົາຈະມີຊີວິດແບບໃດ?” ເຈົ້າຈະຕອບຄຳຖາມນີ້ຕອນທີ່ກັບໄປຢາມຄັ້ງຕໍ່ໄປ. ເມື່ອເຈົ້າກັບມາຫາລາວອີກ ເຈົ້າສາມາດໃຊ້ບົດຮຽນທີ 7 ໃນຈຸນລະສານຂ່າວດີຈາກພະເຈົ້າ! ເຊິ່ງເປັນໜຶ່ງໃນເຄື່ອງມືທີ່ຈະເລີ່ມການສຶກສາຄຳພີໄບເບິນ.
ເຄື່ອງມືທີ່ເຮັດໃຫ້ສົນໃຈຄຳພີໄບເບິນ
11. ວາລະສານຂອງເຮົາຖືກອອກແບບມາເພື່ອຫຍັງ? ແລະເຮົາຕ້ອງຮູ້ຫຍັງກ່ຽວກັບວາລະສານ?
11 ວາລະສານ. ຫໍສັງເກດການແລະຕື່ນເຖີດ! (ບໍ່ມີໃນພາສາລາວ) ເປັນວາລະສານທີ່ຖືກແປແລະຖືກພິມແຈກຈ່າຍຫຼາຍທີ່ສຸດໃນໂລກ! ເນື່ອງຈາກມີຜູ້ຄົນໃນຫຼາຍປະເທດອ່ານວາລະສານເຫຼົ່ານີ້ ດັ່ງນັ້ນຈຶ່ງມີການອອກແບບຫົວຂໍ້ທີ່ຢູ່ໜ້າປົກເພື່ອດຶງດູດຄວາມສົນໃຈຂອງຜູ້ຄົນທີ່ຢູ່ທຸກຫົນທຸກແຫ່ງ. ເຮົາຄວນໃຊ້ວາລະສານນີ້ເພື່ອຊ່ວຍຜູ້ຄົນໃຫ້ຮູ້ວ່າສິ່ງທີ່ສຳຄັນທີ່ສຸດໃນຊີວິດໃນຕອນນີ້ແມ່ນຫຍັງ. ແຕ່ກ່ອນອື່ນ ເຮົາຕ້ອງຮູ້ກ່ອນວ່າແຕ່ລະວາລະສານອອກແບບມາເພື່ອຄົນແບບໃດ.
12. (ກ) ວາລະສານຕື່ນເຖີດ! ອອກແບບມາເພື່ອໃຜ ແລະຈຸດປະສົງຫຼັກເພື່ອຫຍັງ? (ຂ) ເມື່ອບໍ່ດົນມານີ້ເຈົ້າມີປະສົບການທີ່ດີແນວໃດໃນການໃຊ້ເຄື່ອງມືນີ້?
12 ຕື່ນເຖີດ! ຖືກອອກແບບມາເພື່ອຄົນທີ່ຮູ້ກ່ຽວກັບຄຳພີໄບເບິນໜ້ອຍໜຶ່ງຫຼືບໍ່ຮູ້ເລີຍ. ເຂົາເຈົ້າອາດບໍ່ຮູ້ກ່ຽວກັບຄຳສອນຂອງຄລິດສະຕຽນ ບໍ່ໄວ້ໃຈໃນສາສະໜາ ແລະບໍ່ຮູ້ວ່າຄຳພີໄບເບິນຊ່ວຍເຂົາເຈົ້າໄດ້ແນວໃດ. ຈຸດປະສົງຫຼັກຂອງຕື່ນເຖີດ! ແມ່ນເພື່ອເຮັດໃຫ້ຜູ້ອ່ານເຊື່ອວ່າພະເຈົ້າມີຈິງ. (ໂລມ 1:20; ເຫບເລີ 11:6) ແລະຍັງຊ່ວຍໃຫ້ຜູ້ອ່ານເຊື່ອວ່າຄຳພີໄບເບິນ “ເປັນຄຳສອນຂອງພະເຈົ້າແທ້ໆ.” (1 ເທຊະໂລນີກ 2:13, ລ.ມ.) ໃນປີ 2018 ມີ 3 ສະບັບເຊິ່ງມີຫົວຂໍ້ຕໍ່ໄປນີ້: “ເຄັດລັບທີ່ເຮັດໃຫ້ມີຄວາມສຸກ” “12 ເຄັດລັບທີ່ເຮັດໃຫ້ຄອບຄົວມີຄວາມສຸກ” ແລະ “ຮັບມືກັບຄວາມໂສກເສົ້າເມື່ອສູນເສຍຄົນທີ່ຮັກ”
13. (ກ) ຫໍສັງເກດການ ສະບັບສາທາລະນະອອກແບບມາເພື່ອໃຜ? (ຂ) ເມື່ອບໍ່ດົນມານີ້ເຈົ້າມີປະສົບການທີ່ດີແນວໃດໃນການໃຊ້ເຄື່ອງມືນີ້?
13 ຈຸດປະສົງຫຼັກຂອງຫໍສັງເກດການ ສະບັບສາທາລະນະແມ່ນເພື່ອອະທິບາຍຄຳສອນຂອງຄຳພີໄບເບິນເພື່ອຄົນທີ່ນັບຖືພະເຈົ້າແລະຄຳພີໄບເບິນຢູ່ແລ້ວ. ເຂົາເຈົ້າອາດຮູ້ເລື່ອງໃນຄຳພີໄບເບິນແດ່ແລ້ວ ແຕ່ບໍ່ໄດ້ເຂົ້າໃຈຄຳສອນແທ້ໆ. (ໂລມ 10:2; 1 ຕີໂມເຕ 2:3, 4) ໃນປີ 2018 ມີ 3 ສະບັບທີ່ຈະຕອບຄຳຖາມຕໍ່ໄປນີ້: “ຄຳພີໄບເບິນຍັງໃຊ້ໄດ້ກັບສະໄໝຂອງເຮົາບໍ?” “ອະນາຄົດຈະໄປແນວໃດ?” ແລະ “ພະເຈົ້າສົນໃຈເຈົ້າບໍ?”
ເຄື່ອງມືທີ່ກະຕຸ້ນໃຈ
14. (ກ) 4 ວິດີໂອໃນກ່ອງເຄື່ອງມືສຳລັບການສອນອອກແບບມາເພື່ອຫຍັງ? (ຂ) ເຈົ້າມີປະສົບການທີ່ດີແນວໃດເມື່ອໃຊ້ວິດີໂອເຫຼົ່ານີ້?
14 ວິດີໂອ. ໃນສະໄໝຂອງພະເຍຊູ ຊ່າງໄມ້ມີແຕ່ເຄື່ອງມືທີ່ໃຊ້ແຮງຄົນ. ແຕ່ສະໄໝນີ້ ຊ່າງໄມ້ຈະໃຊ້ເຄື່ອງມືໄຟຟ້າເຊັ່ນ: ເລື່ອຍ ສະຫວ່ານ ແລະເຄື່ອງຂັດ. ທຸກມື້ນີ້ເມື່ອເຮົາປະກາດ ນອກຈາກເຮົາຈະມີສິ່ງພິມແລ້ວ ເຮົາກໍຍັງມີວິດີໂອທີ່ສວຍງາມໃຫ້ຜູ້ຄົນເບິ່ງ. ມີ 4 ວິດີໂອໃນກ່ອງເຄື່ອງມືຄື: ເປັນຫຍັງຈຶ່ງສຶກສາຄຳພີໄບເບິນ? ພວກເຮົາສຶກສາຄຳພີໄບເບິນແນວໃດ? ພວກເຮົາເຮັດຫຍັງຢູ່ທີ່ຫໍປະຊຸມລາຊະອານາຈັກ? ແລະພະຍານພະເຢໂຫວາ—ພວກເຮົາແມ່ນໃຜ? ວິດີໂອສັ້ນທີ່ບໍ່ເກີນ 2 ນາທີເໝາະກັບການປະກາດໃນຄັ້ງທຳອິດ. ສ່ວນວິດີໂອທີ່ມີຄວາມຍາວກວ່າຈະໃຊ້ເມື່ອກັບໄປຢາມແລະສຳລັບຄົນທີ່ມີເວລາຫຼາຍ. ວິດີໂອເຫຼົ່ານີ້ເປັນເຄື່ອງມືທີ່ສຸດຍອດຫຼາຍເພາະມັນກະຕຸ້ນຜູ້ຄົນໃຫ້ຢາກສຶກສາຄຳພີໄບເບິນແລະມາການປະຊຸມຂອງເຮົາ.
15. ການທີ່ຜູ້ຄົນໄດ້ເບິ່ງວິດີໂອໃນພາສາຂອງຕົວເອງສົ່ງຜົນແນວໃດ? ຂໍໃຫ້ຍົກຕົວຢ່າງ.
15 ຕົວຢ່າງ: ພີ່ນ້ອງຍິງໄດ້ພົບກັບຜູ້ຍິງຄົນໜຶ່ງທີ່ຍ້າຍມາຈາກໄມໂຄນີເຊຍແລະພາສາແມ່ຂອງລາວກໍແມ່ນພາສາແຢບ. ພີ່ນ້ອງຍິງໄດ້ເປີດວິດີໂອເປັນຫຍັງຈຶ່ງສຶກສາຄຳພີໄບເບິນ? ໃນພາສາແຢບໃຫ້ລາວເບິ່ງ. ຕອນທີ່ເບິ່ງວິດີໂອ ລາວເວົ້າວ່າ: “ບໍ່ຢາກເຊື່ອເລີຍ! ພາສາຂອງຂ້ອຍຕົ່ວໜິ ຂ້ອຍຮູ້ໄດ້ເລີຍວ່າສຽງທີ່ຜູ້ຊາຍນັ້ນເວົ້າມາຈາກເກາະດຽວກັບຂ້ອຍ.” ຫຼັງຈາກນັ້ນ ລາວກໍເວົ້າຕື່ມວ່າລາວຈະອ່ານແລະເບິ່ງທຸກສິ່ງທີ່ເປັນພາສາຂອງລາວໃນເວັບໄຊ jw.org. (ສົມທຽບກັບກິດຈະການ 2:8, 11) ອີກຕົວຢ່າງໜຶ່ງແມ່ນປະສົບການຂອງພີ່ນ້ອງຍິງໃນສະຫະລັດອາເມຣິກາເຊິ່ງມີຫຼານຊາຍຢູ່ອີກທະວີບໜຶ່ງ. ພີ່ນ້ອງຍິງໄດ້ສົ່ງລິ້ງວິດີໂອດຽວກັນນີ້ໃຫ້ຫຼານເຊິ່ງເປັນພາສາຂອງຫຼານ. ຫຼັງຈາກທີ່ຫຼານຊາຍເບິ່ງວິດີໂອແລ້ວກໍສົ່ງອີເມວຫາລາວວ່າ: “ຂ້ອຍມັກສ່ວນທີ່ບອກວ່າໂລກຢູ່ພາຍໃຕ້ການປົກຄອງຂອງມານຮ້າຍ. ຂ້ອຍໄດ້ຂໍຮຽນຄຳພີໄບເບິນແລ້ວ.” ເລື່ອງນີ້ໜ້າຕື່ນເຕັ້ນຫຼາຍເພາະຫຼານຊາຍຢູ່ໃນປະເທດທີ່ວຽກຂອງເຮົາຖືກສັ່ງຫ້າມ!
ເຄື່ອງມືທີ່ໃຊ້ສອນຄວາມຈິງ
16. ໃຫ້ອະທິບາຍຈຸດປະສົງຂອງຈຸນລະສານຕໍ່ໄປນີ້: (ກ) ເຊື່ອຟັງພະເຈົ້າແລ້ວຈະມີຊີວິດຕະຫລອດໄປ. (ຂ) ຂ່າວດີຈາກພະເຈົ້າ! (ຄ) ໃຜກຳລັງເຮັດຕາມໃຈປະສົງຂອງພະເຢໂຫວາໃນທຸກມື້ນີ້?
16 ຈຸນລະສານ. ເຮົາຈະສອນຄວາມຈິງແນວໃດໃຫ້ຄົນທີ່ອ່ານໜັງສືບໍ່ເກັ່ງຫຼືຄົນທີ່ບໍ່ມີປຶ້ມກ່ຽວກັບຄຳພີໄບເບິນເລີຍໃນພາສາຂອງລາວ? ເຮົາສາມາດໃຊ້ຈຸນລະສານເຊື່ອຟັງພະເຈົ້າແລ້ວຈະມີຊີວິດຕະຫລອດໄປ. * (ເບິ່ງໄຂເງື່ອນ) ຈຸນລະສານຂ່າວດີຈາກພະເຈົ້າ! ເປັນເຄື່ອງມືທີ່ດີເລີດຫຼາຍທີ່ຈະເລີ່ມການສຶກສາຄຳພີໄບເບິນ. ເຈົ້າສາມາດໃຫ້ຜູ້ຄົນເບິ່ງ 14 ຫົວຂໍ້ທີ່ຢູ່ດ້ານຫຼັງຂອງປຶ້ມນີ້ແລ້ວຖາມລາວວ່າສົນໃຈຫົວຂໍ້ໃດຫຼາຍທີ່ສຸດ ແລ້ວກໍເລີ່ມຮຽນບົດນັ້ນເລີຍ. ເຈົ້າໄດ້ພະຍາຍາມທີ່ຈະກັບໄປຢາມລາວບໍ? ຈຸນລະສານອີກຫົວໜຶ່ງໃນກ່ອງເຄື່ອງມືຂອງເຮົາແມ່ນປຶ້ມໃຜກຳລັງເຮັດຕາມໃຈປະສົງຂອງພະເຢໂຫວາໃນທຸກມື້ນີ້? ປຶ້ມນີ້ອອກແບບມາເພື່ອຊ່ວຍນັກສຶກສາໃຫ້ຮູ້ຈັກອົງການຂອງເຮົາ. ເພື່ອຈະຮຽນວິທີໃຊ້ຈຸນລະສານນີ້ກັບນັກສຶກສາແຕ່ລະຄົນ ໃຫ້ເບິ່ງຊີວິດຄລິດສະຕຽນແລະວຽກຮັບໃຊ້—ຄູ່ມືການປະຊຸມ ເດືອນມີນາ 2017.
17. (ກ) ປຶ້ມສຳລັບສຶກສາແຕ່ລະຫົວມີຈຸດປະສົງຫຍັງ? (ຂ) ພີ່ນ້ອງໃໝ່ທຸກຄົນຕ້ອງເຮັດຫຍັງເຖິງວ່າຈະຮັບບັບເຕມາແລ້ວ ແລະຍ້ອນຫຍັງ?
17 ປຶ້ມ. ຫຼັງຈາກເຈົ້າເລີ່ມສຶກສາຈຸນລະສານກັບຄົນໜຶ່ງແລ້ວເຈົ້າສາມາດປ່ຽນປຶ້ມຄຳພີໄບເບິນສອນແນວໃດແທ້ໆ? ຕອນໃດກໍໄດ້. ປຶ້ມນີ້ຈະຊ່ວຍຜູ້ຄົນໃຫ້ຮຽນຮູ້ກ່ຽວກັບຄຳສອນພື້ນຖານໃນຄຳພີໄບເບິນຫຼາຍຂຶ້ນ. ຖ້ານັກສຶກສາກ້າວໜ້າແລະສຶກສາປຶ້ມຫົວນີ້ຈົບແລ້ວ ເຈົ້າກໍສືບຕໍ່ສຶກສາປຶ້ມ “ຮັກສາຕົວໄວ້ໃນຄວາມຮັກຂອງພະເຈົ້າ”. ປຶ້ມຫົວນີ້ຈະສອນນັກສຶກສາໃຫ້ຮູ້ວິທີໃຊ້ຫຼັກການໃນຄຳພີໄບເບິນ. ຂໍໃຫ້ຈື່ໄວ້ວ່າແມ່ນແຕ່ຫຼັງຈາກທີ່ຮັບບັບເຕມາແລ້ວ ພີ່ນ້ອງໃໝ່ກໍຍັງຕ້ອງສືບຕໍ່ສຶກສາໃຫ້ຈົບທັງສອງຫົວ. ນີ້ຈະຊ່ວຍລາວໃຫ້ມີຄວາມເຊື່ອເຂັ້ມແຂງໃນພະເຢໂຫວາແລະຮັກສາຄວາມພັກດີຕໍ່ພະອົງ.—ອ່ານໂກໂລດ 2:6, 7
ກ່ອງເຄື່ອງມືສຳລັບການສອນມີເຄື່ອງມືຕ່າງໆທີ່ຈຳເປັນເພື່ອສອນຂ່າວດີໃຫ້ກັບຜູ້ຄົນ
18. (ກ) 1 ຕີໂມເຕ 4:16 ກະຕຸ້ນເຮົາໃຫ້ເຮັດຫຍັງໃນຖານະເປັນຄູສອນຄວາມຈິງ ແລະຜົນເປັນແນວໃດ? (ຂ) ເມື່ອເຮົາໃຊ້ເຄື່ອງມືສຳລັບການສອນເປົ້າໝາຍຂອງເຮົາແມ່ນຫຍັງ?
18 ເຮົາທີ່ເປັນພະຍານພະເຢໂຫວາມີໜ້າທີ່ຮັບຜິດຊອບທີ່ຈະສອນ “ຂ່າວດີທີ່ເປັນຄວາມຈິງ” ໃຫ້ຜູ້ຄົນ ເຊິ່ງຈະຊ່ວຍເຂົາເຈົ້າໃຫ້ມີຊີວິດຕະຫຼອດໄປ. (ໂກໂລດ 1:5, ລ.ມ.; ອ່ານ 1 ຕີໂມເຕ 4:16) ເພື່ອຈະຊ່ວຍເຮົາເຮັດແບບນີ້ໄດ້ ເຮົາຕ້ອງມີເຄື່ອງມືສຳລັບການສອນທີ່ຈຳເປັນ. (ເບິ່ງຂອບ “ ກ່ອງເຄື່ອງມືສຳລັບການສອນ”) ໃຫ້ເຮົາໃຊ້ເຄື່ອງມືເຫຼົ່ານີ້ຢ່າງເຕັມທີ. ເຮົາແຕ່ລະຄົນສາມາດເລືອກໄດ້ວ່າຈະໃຊ້ເຄື່ອງມືອັນໃດແລະຕອນໃດ. ຂໍຈື່ໄວ້ວ່າເປົ້າໝາຍຂອງເຮົາບໍ່ແມ່ນພຽງແຕ່ຢາຍປຶ້ມເທົ່ານັ້ນ ແລະເຮົາບໍ່ຄວນໃຫ້ປຶ້ມກັບຄົນທີ່ບໍ່ສົນໃຈຂ່າວດີ. ເປົ້າໝາຍຂອງເຮົາຄືເຮັດໃຫ້ຄົນທີ່ຈິງໃຈ ຄົນທີ່ຖ່ອມຕົວ ແລະຄົນທີ່ຢາກຮູ້ຈັກພະເຈົ້າແທ້ໆໃຫ້ເປັນລູກສິດຂອງພະອົງ ເພາະວ່າເຂົາເຈົ້າເປັນ “ຄົນທີ່ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປ.”—ກິດຈະການ 13:48; ມັດທາຍ 28:19, 20
^ ຂໍ້ 3 ກິດຈະການ 13:48 (ລ.ມ.) ບອກວ່າ: “ພໍຄົນຕ່າງຊາດໄດ້ຍິນຢ່າງນັ້ນກໍດີໃຈຫຼາຍແລະຍົກຍ້ອງຄຳສອນຂອງພະເຢໂຫວາ ທຸກຄົນທີ່ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປກໍເຂົ້າມາເປັນລູກສິດ.”
^ ຂໍ້ 5 ເບິ່ງຫໍສັງເກດການ 1 ສິງຫາ 2010 (ບໍ່ມີໃນພາສາລາວ) ໃນບົດຄວາມ “ຊ່າງໄມ້” ແລະຂອບ “ກ່ອງເຄື່ອງມືຂອງຊ່າງໄມ້.”
^ ຂໍ້ 16 ຖ້າຜູ້ສົນໃຈອ່ານໜັງສືບໍ່ໄດ້ ເຈົ້າສາມາດໃຊ້ຈຸນລະສານເຊື່ອຟັງພະເຈົ້າ ເຊິ່ງສ່ວນຫຼາຍຈະມີຮູບພາບທີ່ໃຫ້ລາວເບິ່ງຕາມໄປນຳໄດ້.
