ເວົ້າແຕ່ຄວາມຈິງ
“ທຸກຄົນຈົ່ງປາກ [ຄວາມ]ຈິງແກ່ເພື່ອນບ້ານ.”—ຊາກາລີ 8:16
1, 2. ຊາຕານໄດ້ເຮັດຫຍັງເພື່ອທຳຮ້າຍມະນຸດໃຫ້ຫຼາຍທີ່ສຸດ?
ເຄື່ອງປະດິດສ້າງຫຼາຍຢ່າງ ເຊັ່ນ: ໂທລະສັບ ດອກໄຟ ລົດ ແລະຕູ້ເຢັນເຮັດໃຫ້ຊີວິດຂອງເຮົາສະດວກຂຶ້ນ. ສ່ວນສິ່ງອື່ນໆ ເຊັ່ນ: ລູກປືນ ກັບລະເບີດ ຢາສູບ ແລະລະເບີດປະລະມານູ ສິ່ງເຫຼົ່ານີ້ເປັນອັນຕະລາຍຫຼາຍຕໍ່ຊີວິດ. ແຕ່ມີບາງສິ່ງທີ່ມີມາດົນແລ້ວກ່ອນສິ່ງເຫຼົ່ານີ້ ແລະມັນກໍທຳຮ້າຍມະນຸດໄດ້ຫຼາຍທີ່ສຸດ. ມັນແມ່ນຫຍັງ? ການຕົວະນັ້ນເອງ! ການຕົວະແມ່ນການເວົ້າບາງສິ່ງທີ່ບໍ່ແມ່ນຄວາມຈິງ ເພື່ອໃຊ້ຫຼອກລວງຄົນອື່ນ. ໃຜເປັນຜູ້ທຳອິດທີ່ເວົ້າຕົວະ? ພະຍາມານນັ້ນເອງ! ພະເຍຊູຄລິດເອີ້ນມັນວ່າເປັນ “ພໍ່ແຫ່ງຄວາມຕົວະ.” (ອ່ານໂຢຮັນ 8:44) ຕອນໃດທີ່ມັນເວົ້າຕົວະເປັນເທື່ອທຳອິດ?
2 ຊາຕານເປັນຜູ້ເວົ້າຕົວະເມື່ອຫຼາຍພັນປີທີ່ຜ່ານມາໃນສວນເອເດນ. ອາດາມແລະເອວາໃຊ້ຊີວິດຢ່າງມີຄວາມສຸກໃນສວນອຸທິຍານທີ່ສວຍງາມທີ່ພະເຢໂຫວາໄດ້ສ້າງໄວ້ໃຫ້ເຂົາເຈົ້າຢູ່. ແຕ່ພະເຈົ້າບອກເຂົາເຈົ້າວ່າຖ້າພວກເຈົ້າກິນໝາກໄມ້ “ແຕ່ຕົ້ນໄມ້ແຫ່ງຄວາມຮູ້ການດີແລະຊົ່ວ” ພວກເຈົ້າຈະຕາຍ. ເຖິງວ່າຊາຕານຈະຮູ້ເລື່ອງນີ້ ແຕ່ມັນກໍຍັງໃຊ້ງູມາບອກເອວາວ່າ: “ພວກເຈົ້າຈະບໍ່ຕາຍດອກ.” ນີ້ເປັນຄຳຕົວະເທື່ອທຳອິດ. ຊາຕານຍັງເວົ້າອີກວ່າ: “ພະເຈົ້າຮູ້ຢູ່ວ່າພວກເຈົ້າຫາກກິນໝາກໄມ້ນັ້ນໃນວັນໃດ ຕາຂອງພວກເຈົ້າຈະມືນແຈ້ງຂຶ້ນໃນວັນນັ້ນ ແລະພວກເຈົ້າຈະເປັນເໝືອນພະເຈົ້າ ຮູ້ຈັກການດີແລະຊົ່ວ.”—ຕົ້ນເດີມ 2:15-17; 3:1-5
3. ເປັນຫຍັງຄຳຕົວະຂອງຊາຕານມີຈຸດປະສົງຮ້າຍ ແລະມີຫຍັງເກີດຂຶ້ນຕາມມາ?
3 ຄຳຕົວະຂອງຊາຕານມີຈຸດປະສົງຮ້າຍຍ້ອນມັນຮູ້ວ່າຖ້າເອວາເຊື່ອຟັງມັນແລ້ວກິນໝາກໄມ້ ເອວາກໍຈະຕາຍ. ສິ່ງນັ້ນກໍເກີດຂຶ້ນແທ້ໆ ເມື່ອອາດາມແລະເອວາບໍ່ເຊື່ອຟັງຄຳສັ່ງຂອງພະເຢໂຫວາ ໃນທີ່ສຸດເຂົາເຈົ້າກໍຕາຍ. (ຕົ້ນເດີມ 3:6; 5:5) ແຮ່ງຮ້າຍກວ່ານັ້ນອີກ ຍ້ອນບາບຂອງອາດາມ “ຄວາມຕາຍໄດ້ມາຖືກຄົນທັງປວງ.” ທີ່ຈິງ “ຄວາມຕາຍໄດ້ຄຸ້ມຄອງ . . . ເທິງຄົນທັງປວງທີ່ບໍ່ໄດ້ຜິດຕາມຢ່າງຄວາມຜິດຂອງທ່ານອາດາມ.” (ໂລມ 5:12, 14) ຍ້ອນແນວນີ້ ພວກເຮົາຈຶ່ງເປັນຄົນບໍ່ສົມບູນແບບແລະບໍ່ໄດ້ມີຊີວິດຕະຫຼອດໄປຄືກັບທີ່ພະເຈົ້າຢາກໃຫ້ເປັນ. ກົງກັນຂ້າມ ຊີວິດຂອງເຮົາມີພຽງແຕ່ “70 ປີ ຖ້າແຂງແຮງຫຼາຍກໍຢູ່ໄດ້ເຖິງ 80 ປີ” ແລະຊີວິດກໍ “ເຕັມໄປດ້ວຍຄວາມລຳບາກແລະຄວາມທຸກ.” (ຄຳເພງ 90:10, ລ.ມ.) ສິ່ງທີ່ເກີດຂຶ້ນທັງໝົດນີ້ກໍເປັນຍ້ອນຄຳຕົວະຂອງຊາຕານ!
4. (ກ) ມີຄຳຖາມຫຍັງທີ່ເຮົາຕ້ອງຮູ້ຄຳຕອບ? (ຂ) ໃນຄຳເພງ 15:1, 2 ບອກວ່າຄົນແບບໃດທີ່ຈະໄດ້ເປັນໝູ່ກັບພະເຢໂຫວາ?
4 ພະເຍຊູບອກວ່າຊາຕານ “ບໍ່ໄດ້ຕັ້ງຢູ່ໃນຄວາມຈິງ ເຫດວ່າຄວາມຈິງໃນມັນກໍບໍ່ມີ” ແລະມັນກໍບໍ່ປ່ຽນໄປ ມັນຍັງ “ລໍ້ລວງທົ່ວແຜ່ນດິນໂລກທີ່ຄົນອາໄສ” ດ້ວຍຄຳຕົວະຂອງມັນ. (ຄຳປາກົດ 12:9) ແຕ່ເຮົາບໍ່ຢາກໃຫ້ຊາຕານຫຼອກລວງເຮົາ ດັ່ງນັ້ນ ເຮົາຕ້ອງຮູ້ຄຳຕອບຂອງ 3 ຄຳຖາມຄື: ຊາຕານຫຼອກລວງຜູ້ຄົນແນວໃດໃນທຸກມື້ນີ້? ເປັນຫຍັງຜູ້ຄົນຈຶ່ງເວົ້າຕົວະ? ເຮົາຈະເປັນຄົນເວົ້າຄວາມຈິງສະເໝີໄດ້ແນວໃດ ເພື່ອຈະບໍ່ສູນເສຍສາຍສຳພັນທີ່ດີກັບພະເຢໂຫວາຄືກັບທີ່ອາດາມແລະເອວາໄດ້ເຮັດ?—ອ່ານຄຳເພງ 15:1, 2
ຊາຕານຫຼອກລວງມະນຸດແນວໃດ
5. ຊາຕານໃຊ້ວິທີໃດເພື່ອຫຼອກລວງຜູ້ຄົນໃນທຸກມື້ນີ້?
5 ເປັນໄປໄດ້ທີ່ເຮົາຈະບໍ່ໃຫ້ຊາຕານຫຼອກເຮົາ. ອັກຄະສາວົກໂປໂລບອກວ່າ: “ພວກເຮົາຮູ້ແຜນການຂອງມັນແລ້ວ.” (2 ໂກລິນໂທ 2:11, ທ.ປ.) ເຮົາຮູ້ວ່າຊາຕານຄວບຄຸມໂລກນີ້ທັງໝົດ ເຊິ່ງລວມເຖິງສາສະໜາປອມ ລັດຖະບານທີ່ເສື່ອມຊາມ ແລະທຸລະກິດທີ່ເຫັນແກ່ໄດ້. (1 ໂຢຮັນ 5:19) ດັ່ງນັ້ນ ເຮົາຈຶ່ງບໍ່ແປກໃຈທີ່ຊາຕານແລະພວກຂອງມັນມີອິດທິພົນເຮັດໃຫ້ຜູ້ຄົນ “ເວົ້າຕົວະ.” (1 ຕີໂມເຕ 4:1, 2) ຕົວຢ່າງ: ນັກທຸລະກິດບາງຄົນໃຊ້ການໂຄສະນາເກີນຈິງເພື່ອຫຼອກລວງຜູ້ຄົນໃຫ້ຊື້ສິນຄ້າທີ່ອັນຕະລາຍ ແລະເຂົາເຈົ້າກໍໄດ້ເງິນຫຼາຍໆ.
6, 7. (ກ) ເປັນຫຍັງການຕົວະຂອງຜູ້ນຳສາສະໜາຈຶ່ງຊົ່ວຮ້າຍຫຼາຍ? (ຂ) ເລື່ອງຕົວະຫຍັງແດ່ທີ່ເຈົ້າເຄີຍໄດ້ຍິນຜູ້ນຳສາສະໜາສອນ?
6 ການຕົວະຂອງຜູ້ນຳສາສະໜາເປັນການຕົວະຊົ່ວຮ້າຍຫຼາຍ. ຍ້ອນຫຍັງ? ຍ້ອນວ່າຖ້າມີບາງຄົນເຊື່ອຄຳສອນຕົວະແລະເຮັດສິ່ງທີ່ພະເຈົ້າກຽດຊັງ ຄົນນັ້ນກໍຈະສູນເສຍຊີວິດຕະຫຼອດໄປ. (ໂອເຊ 4:9) ພະເຍຊູຮູ້ວ່າພວກຜູ້ນຳສາສະໜາໃນສະໄໝຂອງເພິ່ນກໍຫຼອກລວງຜູ້ຄົນ. ພະອົງເວົ້າຢ່າງໜັກແໜ້ນວ່າ: “ພວກຄູສອນສາສະໜາແລະຟາລິຊຽນ ພວກຄົນຫຼອກລວງ ພວກເຈົ້າຕ້ອງຮັບໂທດໜັກແທ້ໆ ເພາະເຈົ້າມັກເດີນທາງໄປທົ່ວທັງທາງບົກແລະທາງທະເລເພື່ອຈະໄດ້ຈັກຄົນໜຶ່ງມາເຂົ້າສາສະໜາ ແຕ່ເມື່ອໄດ້ມາແລ້ວ ກໍເຮັດໃຫ້ຄົນນັ້ນຕ້ອງໄດ້ຮັບໂທດໃນເກເຮນນາ” ເຊິ່ງເປັນການທຳລາຍຕະຫຼອດໄປ. (ມັດທາຍ 23:15, ລ.ມ.) ພະເຍຊູບອກວ່າພວກຜູ້ນຳສາສະໜາປອມເຫຼົ່ານັ້ນເປັນຄືກັບພະຍາມານ ພໍ່ຂອງເຂົາເຈົ້າເຊິ່ງ “ເປັນຜູ້ຂ້າຄົນ.”—ໂຢຮັນ 8:44
7 ໃນສະໄໝຂອງເຮົາກໍມີຜູ້ນຳສາສະໜາຫຼາຍຄືກັນ. ຄົນເຫຼົ່ານີ້ຖືກເອີ້ນວ່າ: ອາຈານ ນັກເທດ ລັບບີ້ ຫຼືອື່ນໆ. ຄືກັບພວກຟາລິຊຽນ ເຂົາເຈົ້າບໍ່ໄດ້ສອນຄວາມຈິງຈາກພະຄຳຂອງພະເຈົ້າ ແຕ່ເຂົາເຈົ້າ “ໄດ້ເອົາຄວາມຈິງຂອງພະເຈົ້າປ່ຽນເປັນຄຳຕົວະ.” (ໂລມ 1:18, 25) ຄຳຕົວະບາງຢ່າງຂອງເຂົາເຈົ້າແມ່ນໄຟນະລົກ ມະນຸດມີວິນຍານອະມະຕະ ວຽນວາຍຕາຍເກີດ ແລະພະເຈົ້າຍອມຮັບຮູບແບບຊີວິດຂອງຄົນຮັກຮ່ວມເພດແລະການແຕ່ງດອງຂອງຄົນເພດດຽວກັນ.
8. ໃນອີກບໍ່ດົນພວກຜູ້ນຳທາງການເມືອງຈະຕົວະເລື່ອງຫຍັງ? ແຕ່ເຮົາຄວນມີທ່າທີແນວໃດ?
8 ພວກນັກການເມືອງກໍຄືກັນ ເຂົາເຈົ້າເວົ້າຕົວະຫຼອກລວງປະຊາຊົນ. ຄຳຕົວະອີກຢ່າງໜຶ່ງທີ່ໃຫຍ່ທີ່ສຸດທີ່ເຂົາເຈົ້າຈະເວົ້າໃນອີກບໍ່ດົນຄື ຈະນຳ “ສະຫງົບສຸກແລະປອດໄພ” ມາສູ່ໂລກ ແລະເມື່ອໃດທີ່ເຂົາເຈົ້າເຮັດແບບນັ້ນ “ຄວາມພິນາດຈະເກີດກັບພວກເຂົາທັນທີໂດຍບໍ່ທັນຮູ້ຕົວ.” ດັ່ງນັ້ນ ເຮົາບໍ່ຄວນເຊື່ອພວກຜູ້ນຳທາງການເມືອງເຫຼົ່ານັ້ນທີ່ເວົ້າວ່າສິ່ງຕ່າງໆກຳລັງດີຂຶ້ນ. ຄວາມຈິງຄືເຮົາ “ຮູ້ດີວ່າວັນຂອງພະເຢໂຫວາຈະມາເໝືອນຂະໂມຍທີ່ມາຕອນກາງຄືນ.”—1 ເທຊະໂລນີກ 5:1-4, ລ.ມ.
ເປັນຫຍັງຜູ້ຄົນຈຶ່ງຕົວະ
9, 10. (ກ) ເປັນຫຍັງຜູ້ຄົນຈຶ່ງເວົ້າຕົວະ ແລະຜົນທີ່ຕາມມາແມ່ນຫຍັງ? (ຂ) ເຮົາຄວນຈື່ຫຍັງໄວ້ກ່ຽວກັບພະເຢໂຫວາ?
9 ທຸກມື້ນີ້ ບໍ່ແມ່ນແຕ່ຜູ້ມີອຳນາດເທົ່ານັ້ນທີ່ເວົ້າຕົວະ. ບົດຄວາມໜຶ່ງທີ່ຊື່ “ເປັນຫຍັງເຮົາຈຶ່ງເວົ້າຕົວະ?” ຂອງຍຸທິຈິດ ພັດຕາຊາຈີບອກວ່າ: “ການຕົວະເປັນນິດໄສທີ່ຝັງແໜ້ນເຊິ່ງມີໃນຕົວມະນຸດ.” ເວົ້າອີກຢ່າງໜຶ່ງຄື ຜູ້ຄົນຄິດວ່າມັນເປັນເລື່ອງທຳມະດາທີ່ຈະເວົ້າຕົວະ. ຜູ້ຄົນມັກຕົວະເລື້ອຍໆເພື່ອປົກປ້ອງຕົວເອງ ບາງເທື່ອກໍປົກປິດຂໍ້ຜິດພາດຫຼືຄວາມຜິດຮ້າຍແຮງ. ເຂົາເຈົ້າຍັງຕົວະໃນວິທີຕ່າງໆເພື່ອຈະໄດ້ເງິນ ຫຼືຜົນປະໂຫຍດສຳລັບຕົວເອງ. ບົດຄວາມຂອງຍຸທິຈິດຍັງບອກອີກວ່າການເວົ້າຕົວະເປັນເລື່ອງທຳມະດາສຳລັບບາງຄົນ “ທີ່ຈະຕົວະຄົນແປກໜ້າ ເພື່ອນຮ່ວມງານ ໝູ່ເພື່ອນ ແລະຄົນຮັກ.”
ເຖິງວ່າຄົນເຮົາຈະຫຼອກລວງຄົນອື່ນໄດ້ ແຕ່ເຂົາເຈົ້າບໍ່ມີທາງຫຼອກລວງພະເຢໂຫວາໄດ້
10 ຜົນຂອງການຕົວະທັງໝົດເປັນແນວໃດ? ຜົນກໍຄືມັນໄດ້ທຳລາຍສາຍສຳພັນແລະເຮັດໃຫ້ບໍ່ເຊື່ອໃຈກັນອີກຕໍ່ໄປ. ຕົວຢ່າງ: ລອງນຶກພາບຜົວທີ່ສັດຊື່ຈະຮູ້ສຶກເສຍໃຈຫຼາຍສໍ່າໃດ ຖ້າຮູ້ວ່າເມຍຂອງລາວໄປລັກມີຊູ້ແລະເວົ້າຕົວະເພື່ອປິດບັງເລື່ອງນີ້ໄວ້. ຫຼືລອງຄິດເບິ່ງວ່າມັນຈະຮ້າຍແຮງສໍ່າໃດ ຖ້າຜູ້ຊາຍຄົນໜຶ່ງເຮັດບໍ່ດີຕໍ່ລູກຕໍ່ເມຍຕອນຢູ່ບ້ານ ແຕ່ເມື່ອຢູ່ຕໍ່ໜ້າຄົນອື່ນກໍເຮັດທຳທ່າວ່າຮັກແລະເປັນຫ່ວງລູກເມຍ. ເຖິງວ່າຄົນແບບນັ້ນຈະຫຼອກລວງຄົນອື່ນໄດ້ ແຕ່ເຮົາຄວນຈື່ໄວ້ວ່າເຂົາເຈົ້າບໍ່ມີທາງຫຼອກລວງພະເຢໂຫວາໄດ້. ຄຳພີໄບເບິນບອກວ່າ: “ສັບພະທຸກສິ່ງເປືອຍຕົວແລະປາກົດແຈ້ງ” ຕໍ່ໜ້າພະເຢໂຫວາ.—ເຫບເລີ 4:13
11. ຕົວຢ່າງທີ່ບໍ່ດີຂອງອານາເນຍແລະສະຟີລາສອນພວກເຮົາແນວໃດ? (ເບິ່ງຮູບທຳອິດ)
11 ຄຳພີໄບເບິນມີຕົວຢ່າງຂອງສອງຜົວເມຍຄູ່ໜຶ່ງທີ່ເຮັດຄືກັບຊາຕານທີ່ຕົວະພະເຈົ້າ. ອານາເນຍແລະສະຟີລາພະຍາຍາມຫຼອກລວງພວກອັກຄະສາວົກ. ເຂົາເຈົ້າໄດ້ຂາຍຊັບສິນບາງຢ່າງແລະແບ່ງເງິນບາງສ່ວນໄປບໍລິຈາກໃຫ້ພວກອັກຄະສາວົກ. ເນື່ອງຈາກອານາເນຍແລະສະຟີລາຢາກໄດ້ໜ້າໄດ້ຕາໃນປະຊາຄົມ ເຂົາເຈົ້າກໍເລີຍບອກພວກອັກຄະສາວົກວ່ານີ້ແມ່ນເງິນທັງໝົດທີ່ເອົາມາບໍລິຈາກ. ແຕ່ພະເຢໂຫວາຮູ້ວ່າເຂົາເຈົ້າເວົ້າຕົວະ ແລະພະອົງກໍໄດ້ລົງໂທດເຂົາເຈົ້າ.—ກິດຈະການ 5:1-10
12. ຈະເກີດຫຍັງຂຶ້ນກັບຄົນທີ່ເວົ້າຕົວະແບບມີຈຸດປະສົງຮ້າຍທີ່ບໍ່ກັບໃຈ ແລະຍ້ອນຫຍັງ?
12 ພະເຢໂຫວາຮູ້ສຶກແນວໃດກັບຄົນທີ່ເວົ້າຕົວະ? ທຸກຄົນທີ່ເວົ້າຕົວະແບບມີຈຸດປະສົງຮ້າຍແລະບໍ່ກັບໃຈຈະມີຈຸດຈົບຄືກັບຊາຕານທີ່ຈະຖືກ “ຖິ້ມລົງໃນບຶງໄຟ.” ເຊິ່ງກໍໝາຍຄວາມວ່າເຂົາເຈົ້າຈະຖືກທຳລາຍຕະຫຼອດໄປ. (ຄຳປາກົດ 20:10; 21:8; ຄຳເພງ 5:6) ຍ້ອນຫຍັງ? ຍ້ອນວ່າພະເຢໂຫວາເບິ່ງຄົນທີ່ເວົ້າຕົວະແບບນັ້ນຄືກັບເບິ່ງຄົນອື່ນໆ “ທີ່ເຮັດຕົວຄືໝາ” ເຊິ່ງກໍຄື ຄົນທີ່ເຮັດສິ່ງທີ່ໜ້າລັງກຽດໃນສາຍຕາພະເຈົ້າ.—ຄຳປາກົດ 22:15, ລ.ມ.
13. ເຮົາໄດ້ຮູ້ຫຍັງກ່ຽວກັບພະເຢໂຫວາ ແລະການທີ່ຮູ້ເລື່ອງນີ້ກະຕຸ້ນເຮົາໃຫ້ລົງມືເຮັດຫຍັງ?
13 ເຮົາຮູ້ວ່າພະເຢໂຫວາ “ບໍ່ເປັນຄົນຈຶ່ງຈະເວົ້າຕົວະ” ແລະ “ພະເຈົ້າຈະເວົ້າຕົວະບໍ່ໄດ້.” (ຈົດເຊັນບັນຊີ 23:19; ເຫບເລີ 6:18) “ພະເຢໂຫວາກຽດຊັງ . . . ລີ້ນທີ່ເວົ້າບໍ່ຈິງ.” (ສຸພາສິດ 6:16, 17) ຖ້າເຮົາຢາກໃຫ້ພະເຢໂຫວາພໍໃຈ ເຮົາຕ້ອງເວົ້າແຕ່ຄວາມຈິງ. ດັ່ງນັ້ນ ຂໍໃຫ້ເຮົາ “ຢ່າເວົ້າຕົວະກັນແລະກັນ.”—ໂກໂລດ 3:9
ເຮົາ ‘ປາກຄວາມຈິງ’
14. (ກ) ອັນໃດເຮັດໃຫ້ຄລິດສະຕຽນແທ້ແຕກຕ່າງຈາກສະມາຊິກຂອງສາສະໜາປອມ? (ຂ) ຂໍໃຫ້ອະທິບາຍຫຼັກການໃນລືກາ 6:45?
14 ສິ່ງໜຶ່ງທີ່ຄລິດສະຕຽນແທ້ແຕກຕ່າງຈາກສະມາຊິກຂອງສາສະໜາປອມແມ່ນຫຍັງ? ເຮົາ ‘ປາກຄວາມຈິງ.’ (ອ່ານຊາກາລີ 8:16, 17) ໂປໂລບອກວ່າ: “ພວກເຮົາໄດ້ຍົກຍໍເຮົາເອງເໝືອນເປັນຂ້າໃຊ້ຂອງພະເຈົ້າ . . . ດ້ວຍຖ້ອຍຄຳແຫ່ງຄວາມຈິງ.” (2 ໂກລິນໂທ 6:4, 7) ພະເຍຊູບອກວ່າຄົນທີ່ມີ “ໃຈເຕັມໄປດ້ວຍສິ່ງຢ່າງໃດ” ກໍຈະເວົ້າອອກມາຢ່າງນັ້ນ. (ລືກາ 6:45) ນີ້ໝາຍຄວາມວ່າຄົນທີ່ມີໃຈສັດຊື່ຈະເວົ້າຄວາມຈິງ. ລາວຈະເວົ້າຄວາມຈິງກັບຄົນແປກໜ້າ ເພື່ອນຮ່ວມງານ ໝູ່ເພື່ອນ ແລະຄົນຮັກ. ຂໍໃຫ້ເຮົາມາເບິ່ງບາງຕົວຢ່າງເຊິ່ງຈະຊ່ວຍເຮົາໃຫ້ສາມາດເປັນຄົນສັດຊື່ໃນທຸກສິ່ງ.
ເຈົ້າເຫັນບໍ ຊີວິດຂອງພີ່ນ້ອງຍິງຄົນນີ້ມີບັນຫາຫຍັງ? (ເບິ່ງຂໍ້ 15, 16)
15. (ກ) ເປັນຫຍັງມັນຈຶ່ງບໍ່ດີທີ່ຈະໃຊ້ຊີວິດແບບຕີສອງໜ້າ? (ຂ) ອັນໃດຈະຊ່ວຍໃຫ້ໄວລຸ້ນເອົາຊະນະຄວາມກົດດັນຈາກຄົນລຸ້ນດຽວກັນ? (ເບິ່ງໄຂເງື່ອນ)
15 ຖ້າເຈົ້າເປັນໄວລຸ້ນ ເຈົ້າອາດຢາກໃຫ້ຄົນລຸ້ນດຽວກັນຍອມຮັບເຈົ້າ. ຍ້ອນມີຄວາມຕ້ອງການແບບນີ້ ໄວລຸ້ນບາງຄົນຈຶ່ງໃຊ້ຊີວິດແບບຕີສອງໜ້າ. ເຂົາເຈົ້າເຮັດຕົວເປັນຄົນດີຕອນທີ່ຢູ່ກັບຄອບຄົວແລະພີ່ນ້ອງໃນປະຊາຄົມ ແຕ່ຕອນທີ່ໃຊ້ສື່ສັງຄົມອອນລາຍ ຫຼືຕອນຢູ່ກັບຄົນທີ່ບໍ່ໄດ້ຮັບໃຊ້ພະເຢໂຫວາພັດເປັນຄົນລະຄົນ. ເຂົາເຈົ້າອາດໃຊ້ພາສາທີ່ບໍ່ສຸພາບ ນຸ່ງເຄື່ອງບໍ່ຮຽບຮ້ອຍ ຟັງເພງທີ່ມີເນື້ອຫາທີ່ບໍ່ດີ ເມົາເຫຼົ້າ ໃຊ້ຢາເສບຕິດ ລັກມີແຟນ ຫຼືເຮັດສິ່ງທີ່ບໍ່ດີອື່ນໆ. ການເຮັດແບບນີ້ເຂົາເຈົ້າກໍກຳລັງຕົວະພໍ່ແມ່ ຕົວະພີ່ນ້ອງ ແລະຕົວະພະເຢໂຫວາ. (ຄຳເພງ 26:4, 5) ແຕ່ພະເຢໂຫວາຮູ້ເມື່ອເຮົາທຳທ່ານັບຖືພະອົງ ແລະກໍຍັງເຮັດສິ່ງທີ່ພະອົງກຽດຊັງ. (ມາລະໂກ 7:6) ຄືຊິດີຫຼາຍຖ້າເຮົາເຮັດຕາມທີ່ສຸພາສິດບອກທີ່ວ່າ: “ຢ່າໃຫ້ໃຈຂອງເຈົ້າຫຶງສາຄົນຮ້າຍທັງຫຼາຍ ແຕ່ວ່າຈົ່ງຢ້ານຢຳພະເຢໂຫວາໝົດວັນ.”—ສຸພາສິດ 23:17 * (ເບິ່ງໄຂເງື່ອນ)
16. ເຮົາຕ້ອງຕອບແນວໃດເມື່ອຂຽນຂໍ້ມູນລົງໃນໃບສະໝັກເພື່ອຮັບໃຊ້ເຕັມເວລາປະເພດພິເສດ?
16 ຖ້າເຈົ້າຕ້ອງການຈະຮັບໃຊ້ເປັນໄພໂອເນຍປະຈຳຫຼືເປັນຜູ້ຮັບໃຊ້ເຕັມເວລາປະເພດພິເສດເຊັ່ນຢູ່ທີ່ເບເທນ ເຈົ້າຕ້ອງຂຽນຂໍ້ມູນລົງໃນໃບສະໝັກ. ເປັນສິ່ງສຳຄັນຫຼາຍທີ່ເຈົ້າຈະໃຫ້ຄຳຕອບທີ່ກົງກັບຄຳຖາມກ່ຽວກັບສຸຂະພາບ ຄວາມບັນເທີງທີ່ເຈົ້າເລືອກ ແລະສິນລະທຳຂອງເຈົ້າ (ເຫບເລີ 13:18) ແຕ່ຖ້າເຮົາໄດ້ເຮັດສິ່ງທີ່ພະເຢໂຫວາກຽດຊັງແລະບາງສິ່ງທີ່ລົບກວນສະຕິຮູ້ສຶກຜິດຊອບຂອງເຮົາ ແລ້ວຍັງບໍ່ໄດ້ບອກເລື່ອງນີ້ກັບຜູ້ເຖົ້າແກ່ເດ? ໃຫ້ຂໍຄວາມຊ່ວຍເຫຼືອຈາກເຂົາເຈົ້າເພື່ອເຈົ້າຈະຮັບໃຊ້ພະເຢໂຫວາດ້ວຍສະຕິຮູ້ສຶກຜິດຊອບທີ່ສະອາດ.—ໂລມ 9:1; ຄາລາຊີ 6:1
17. ເຮົາຄວນເຮັດແນວໃດເມື່ອຖືກເຈົ້າໜ້າທີ່ສອບສວນໃນເລື່ອງກ່ຽວກັບພີ່ນ້ອງຂອງເຮົາ?
17 ເຈົ້າຈະເຮັດແນວໃດຖ້າວຽກຮັບໃຊ້ໃນເຂດທີ່ເຈົ້າອາໄສຢູ່ຖືກສັ່ງຫ້າມ ແລະເຈົ້າໜ້າທີ່ກໍຈັບເຈົ້າແລ້ວສອບສວນເລື່ອງກ່ຽວກັບພີ່ນ້ອງ? ເຈົ້າຄວນບອກເຂົາເຈົ້າທຸກຢ່າງທີ່ເຈົ້າຮູ້ບໍ? ພະເຍຊູໄດ້ເຮັດແນວໃດເມື່ອເຈົ້າໜ້າທີ່ໂລມສອບສວນເພິ່ນ? ພະເຍຊູເຮັດຕາມຫຼັກການໃນຄຳພີໄບເບິນທີ່ວ່າ “ມີເວລາມິດປາກແລະມີເວລາເວົ້າ” ແລະບາງເທື່ອເພິ່ນກໍບໍ່ໄດ້ເວົ້າຫຍັງເລີຍ! (ຜູ້ເທສະໜາປ່າວປະກາດ 3:1, 7; ມັດທາຍ 27:11-14) ຖ້າເຮົາຕົກຢູ່ໃນສະຖານະການແບບນີ້ ເຮົາຕ້ອງເປັນຄົນຮອບຄອບແລະລະມັດລະວັງເພື່ອຈະບໍ່ເຮັດໃຫ້ພີ່ນ້ອງຂອງເຮົາຕົກຢູ່ໃນອັນຕະລາຍ.—ສຸພາສິດ 10:19; 11:12
ເຈົ້າຈະຮູ້ໄດ້ແນວໃດວ່າເວລາໃດຄວນມິດແລະເວລາໃດຄວນເວົ້າຄວາມຈິງທັງໝົດ? (ເບິ່ງຂໍ້ 17, 18)
18. ເຮົາມີໜ້າທີ່ຫຍັງ ຖ້າຜູ້ເຖົ້າແກ່ຖາມເຮົາກ່ຽວກັບພີ່ນ້ອງທີ່ເຮັດຜິດ?
18 ເຈົ້າຈະເຮັດແນວໃດຖ້າຮູ້ວ່າມີຜູ້ໃດຜູ້ໜຶ່ງໃນປະຊາຄົມກຳລັງເຮັດບາບຮ້າຍແຮງ? ຜູ້ເຖົ້າແກ່ມີໜ້າທີ່ຮັບຜິດຊອບຮັກສາປະຊາຄົມໃຫ້ສະອາດທາງດ້ານສິນລະທຳ. ເຂົາເຈົ້າອາດຈະຖາມກ່ຽວກັບສິ່ງທີ່ເຈົ້າຮູ້. ເຈົ້າຈະເຮັດແນວໃດ ຖ້າຄົນນັ້ນເປັນໝູ່ສະໜິດຫຼືເປັນຍາດພີ່ນ້ອງຂອງເຈົ້າ? ຄຳພີໄບເບິນບອກວ່າ: “ຄົນທີ່ໃຫ້ການຢ່າງສັດຊື່ຈະເວົ້າຄວາມຈິງ.” (ສຸພາສິດ 12:17; 21:28, ລ.ມ.) ດັ່ງນັ້ນ ເຈົ້າມີໜ້າທີ່ທີ່ຈະຕ້ອງບອກຜູ້ເຖົ້າແກ່ຕາມຄວາມຈິງແລະບໍ່ຄວນປິດບັງໄວ້. ຜູ້ເຖົ້າແກ່ຕ້ອງມີຄວາມຮູ້ທີ່ຖືກຕ້ອງ ເພື່ອຈະຫາວິທີທີ່ດີທີ່ສຸດຊ່ວຍຄົນທີ່ເຮັດຜິດໃຫ້ກັບມາມີສາຍສຳພັນທີ່ດີກັບພະເຢໂຫວາອີກຄັ້ງ.—ຢາໂກໂບ 5:14, 15
19. ເຮົາຈະພິຈາລະນາຫຍັງໃນບົດຄວາມຕໍ່ໄປ?
19 ດາວິດອະທິດຖານເຖິງພະເຢໂຫວາວ່າ: “ຄວາມຈິງກັບຄວາມສັດຊື່ຄືສິ່ງທີ່ພະອົງຕ້ອງການ.” (ຄຳເພງ 51:6) ດາວິດຮູ້ວ່າສິ່ງທີ່ສຳຄັນແມ່ນສິ່ງທີ່ຢູ່ພາຍໃນ. ຄລິດສະຕຽນແທ້ຈະ “ປາກ [ຄວາມ] ຈິງກັບເພື່ອນບ້ານ” ສະເໝີ. ມີວິທີອື່ນອີກທີ່ເຮົາຈະສະແດງວ່າແຕກຕ່າງຈາກສະມາຊິກຂອງສາສະໜາປອມຄືການສອນຄວາມຈິງຈາກຄຳພີໄບເບິນ. ໃນບົດຄວາມຕໍ່ໄປ ເຮົາຈະມາເບິ່ງວ່າເຮົາຈະເຮັດແບບນັ້ນໄດ້ແນວໃດໃນເຂດປະກາດ.
^ ຂໍ້ 15 ເບິ່ງປຶ້ມຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມທີ 2 (ບໍ່ມີໃນພາສາລາວ) ໃນບົດທີ 15 “ຂ້ອຍຈະຕ້ານທານຄວາມກົດດັນຈາກເພື່ອນໆໄດ້ແນວໃດ?” ແລະບົດທີ 16 “ການຕີສອງໜ້າຜິດບ່ອນໃດ?”
