ໄວ້ວາງໃຈພະຄລິດຜູ້ນຳຂອງເຮົາ

ເປີດ

“ຜູ້ໜຶ່ງຜູ້ດຽວເປັນເຈົ້ານາຍຂອງທ່ານທັງຫຼາຍແມ່ນພະຄລິດ.”—ມັດທາຍ 23:10

1, 2. ໂຢຊວຍມີໜ້າທີ່ຮັບຜິດຊອບທີ່ສຳຄັນອັນໃດຫຼັງຈາກໂມເຊຕາຍ?

ພະເຢໂຫວາບອກໂຢຊວຍວ່າ: “ທ່ານໂມເຊຂ້າໃຊ້ຂອງເຮົາໄດ້ຕາຍໄປແລ້ວ ແລະບັດນີ້ເຈົ້າຈົ່ງລຸກຂຶ້ນຂວ້າມແມ່ນໍ້າຢູລະເດນນີ້ທັງເຈົ້າກັບຄົນທັງປວງນີ້ເຂົ້າໄປໃນແຜ່ນດິນທີ່ເຮົາປະທານໃຫ້ແກ່ພວກລູກຫຼານຍິດສະລາເອນ.” (ໂຢຊວຍ 1:1, 2) ນີ້ເປັນການປ່ຽນແປງຄັ້ງໃຫຍ່ແທ້ໆສຳລັບໂຢຊວຍເຊິ່ງເປັນຜູ້ຊ່ວຍໂມເຊມາເກືອບ 40 ປີແລ້ວ!

²ໂມເຊເປັນຜູ້ທີ່ນຳໜ້າຊາດອິດສະລາແອນມາເປັນເວລາດົນແລ້ວ ແຕ່ໃນຕອນນີ້ໂຢຊວຍຈະຕ້ອງມາເຮັດໜ້າທີ່ນີ້ແທນໂມເຊ. ດັ່ງນັ້ນ ໂຢຊວຍອາດສົງໄສວ່າຊາວອິດສະລາແອນຈະຍອມຮັບລາວໃຫ້ເປັນຜູ້ນຳຂອງເຂົາເຈົ້າບໍ? (ພະບັນຍັດ 34:8, 10-12) ປຶ້ມອ້າງອີງກ່ຽວກັບຄຳພີໄບເບິນຫົວໜຶ່ງເວົ້າເຖິງໂຢຊວຍ 1:1, 2 ວ່າ: ບໍ່ວ່າຈະໃນສະໄໝອະດີດຫຼືສະໄໝປັດຈຸບັນ ຊ່ວງເວລາທີ່ຫຍຸ້ງຍາກແລະອັນຕະລາຍທີ່ສຸດຕໍ່ຄວາມໝັ້ນຄົງຂອງປະເທດຊາດກໍຄືການປ່ຽນຜູ້ນຳໃໝ່.

3, 4. ພະເຈົ້າອວຍພອນໂຢຊວຍແນວໃດທີ່ລາວໄວ້ວາງໃຈພະອົງ? ແລະເຮົາອາດສົງໄສຫຍັງ?

³ໂຢຊວຍມີເຫດຜົນທີ່ຈະກັງວົນ ແຕ່ລາວກໍໄວ້ວາງໃຈພະເຢໂຫວາແລະຟ້າວເຮັດຕາມຄຳແນະນຳຂອງພະອົງ. (ໂຢຊວຍ 1:9-11) ພະເຈົ້າອວຍພອນໂຢຊວຍທີ່ລາວເຊື່ອຟັງພະອົງ ໂດຍສົ່ງທູດສະຫວັນອົງໜຶ່ງມາຊີ້ນຳລາວແລະຊາວອິດສະລາແອນ. ທູດສະຫວັນອົງນີ້ຄົງຕ້ອງເປັນໂຄສົກຂອງພະເຈົ້າເຊິ່ງເປັນລູກຊາຍກົກຂອງພະອົງ.—ອົບພະຍົບ 23:20-23; ໂຢຮັນ 1:1

⁴ພະເຢໂຫວາຊ່ວຍຊາດອິດສະລາແອນໃຫ້ປັບຕົວໄດ້ດີກັບການປ່ຽນແປງທີ່ຈະເກີດຂຶ້ນເພາະໂຢຊວຍເປັນຜູ້ນຳຄົນໃໝ່. ໃນສະໄໝຂອງເຮົາກໍມີການປ່ຽນແປງຄັ້ງໃຫຍ່ຫຼາຍຢ່າງເກີດຂຶ້ນຄືກັນ. ເຮົາອາດສົງໄສວ່າ: ‘ໃນຂະນະທີ່ອົງການຂອງພະເຢໂຫວາກຳລັງກ້າວໜ້າຂຶ້ນເລື້ອຍໆ ເຮົາມີເຫດຜົນບໍທີ່ຈະໄວ້ວາງໃຈພະເຍຊູຜູ້ນຳທີ່ພະເຈົ້າແຕ່ງຕັ້ງ?’ (ອ່ານມັດທາຍ 23:10) ເພື່ອຈະຕອບຄຳຖາມນີ້ ເຮົາຈະມາເບິ່ງວ່າພະເຢໂຫວາຊີ້ນຳປະຊາຊົນຂອງພະອົງໃນອະດີດແນວໃດໃນໄລຍະທີ່ມີການປ່ຽນແປງ.

ການນຳພາປະຊາຊົນຂອງພະເຈົ້າເຂົ້າສູ່ແຜ່ນດິນແຫ່ງຄຳສັນຍາ

5. ໂຢຊວຍເຈິເລື່ອງທີ່ບໍ່ທຳມະດາຫຍັງຕອນໃກ້ຈະຮອດເມືອງເຢລິໂກ? (ເບິ່ງຮູບທຳອິດ)

⁵ບໍ່ດົນຫຼັງຈາກຊາວອິດສະລາແອນຂ້າມແມ່ນໍ້າຢູລະເດນ ໂຢຊວຍກໍເຈິກັບເລື່ອງທີ່ບໍ່ທຳມະດາ. ຕອນໃກ້ຈະຮອດເມືອງເຢລິໂກ ລາວໄດ້ພົບຜູ້ຊາຍຄົນໜຶ່ງທີ່ຖືດາບຢູ່. ໂຢຊວຍຖາມລາວວ່າ: “ທ່ານຢູ່ຝ່າຍພວກເຮົາຫຼືຢູ່ຝ່າຍພວກສັດຕູ?” ໂຢຊວຍແປກໃຈທີ່ຄົນນັ້ນບອກວ່າລາວເປັນ: “ຫົວໜ້າແຫ່ງກອງທັບຂອງພະເຢໂຫວາ” ເຊິ່ງກໍຄືທູດສະຫວັນທີ່ພ້ອມຈະປົກປ້ອງປະຊາຊົນຂອງພະເຈົ້າ. (ອ່ານໂຢຊວຍ 5:13-15) ເຖິງວ່າພະຄຳພີຂໍ້ອື່ນໆຈະບອກວ່າພະເຢໂຫວາເປັນຜູ້ເວົ້າກັບໂຢຊວຍໂດຍກົງ ແຕ່ເບິ່ງຄືວ່າພະເຈົ້າໄດ້ໃຊ້ທູດສະຫວັນອົງດຽວກັນນີ້ເວົ້າແທນພະອົງຄືກັບທີ່ໄດ້ເຮັດໃນຫຼາຍໆຄັ້ງໃນອະດີດ.—ອົບພະຍົບ 3:2-4; ໂຢຊວຍ 4:1, 15; 5:2, 9; ກິດຈະການ 7:38; ຄາລາຊີ 3:19

6-8. (ກ) ເປັນຫຍັງຄຳແນະນຳບາງຢ່າງຂອງທູດສະຫວັນຈຶ່ງເບິ່ງຄືແປກໆ? (ຂ) ເຮົາຮູ້ໄດ້ແນວໃດວ່າຄຳແນະນຳນັ້ນສະຫຼາດແລະເໝາະກັບເວລາ? (ເບິ່ງໄຂເງື່ອນ)

⁶ທູດສະຫວັນບອກໂຢຊວຍຢ່າງຊັດເຈນວ່າລາວຕ້ອງເຮັດຫຍັງເພື່ອຈະເອົາຊະນະເມືອງເຢລິໂກໄດ້. ທຳອິດ ຄຳແນະນຳບາງຢ່າງເບິ່ງຄືວ່າແປກໆ. ທູດສະຫວັນບອກໂຢຊວຍວ່າທະຫານທຸກຄົນຕ້ອງຮັບສິນຕັດ. ໝາຍຄວາມວ່າເຂົາເຈົ້າຈະໄປສູ້ຮົບບໍ່ໄດ້ສອງສາມມື້. ນີ້ແມ່ນເວລາທີ່ທະຫານຈະຕ້ອງເຮັດສິນຕັດແທ້ໆບໍ?—ຕົ້ນເດີມ 34:24, 25; ໂຢຊວຍ 5:2, 8

⁷ພວກທະຫານອາດສົງໄສວ່າ: ‘ເຮົາຈະປົກປ້ອງຄອບຄົວໄດ້ແນວໃດ ຖ້າພວກສັດຕູມາໂຈມຕີຄ້າຍ?’ ແຕ່ກໍມີບາງສິ່ງທີ່ບໍ່ຄາດຄິດເກີດຂຶ້ນ! ແທນທີ່ທະຫານເມືອງເຢລິໂກຈະມາໂຈມຕີ ເຂົາເຈົ້າພັດຢ້ານຊາວອິດສະລາແອນ. ຄຳພີໄບເບິນບອກວ່າ: “ເມືອງເຢລິໂກກໍໄດ້ງັບປະຕູເມືອງດີໆຕໍ່ໜ້າພວກລູກຫຼານຍິດສະລາເອນບໍ່ມີໃຜອອກໄປແລະບໍ່ມີໃຜເຂົ້າມາ.” (ໂຢຊວຍ 6:1) ເລື່ອງນີ້ຕ້ອງເຮັດໃຫ້ຊາວອິດສະລາແອນໄວ້ວາງໃຈຕໍ່ການຊີ້ນຳຂອງພະເຈົ້າຫຼາຍຂຶ້ນແທ້ໆ!

⁸ທູດສະຫວັນບອກໂຢຊວຍວ່າບໍ່ຕ້ອງໃຫ້ຊາວອິດສະລາແອນໄປໂຈມຕີເມືອງເຢລິໂກ. ແຕ່ໃຫ້ຍ່າງອ້ອມເມືອງນັ້ນແທນໂດຍຍ່າງມື້ລະໜຶ່ງຮອບຫົກມື້ ສ່ວນມື້ທີເຈັດໃຫ້ຍ່າງເຈັດຮອບ. ພວກທະຫານອາດຄິດວ່າ: ‘ມັນເສຍເວລາແລະເສຍແຮງລ້າໆ!’ ແຕ່ພະເຢໂຫວາຜູ້ນຳທີ່ຊາວອິດສະລາແອນເບິ່ງບໍ່ເຫັນຮູ້ດີວ່າກຳລັງເຮັດຫຍັງຢູ່! ການເຮັດຕາມຄຳແນະນຳຂອງພະອົງບໍ່ພຽງແຕ່ເຮັດໃຫ້ຄວາມເຊື່ອຊາວອິດສະລາແອນເຂັ້ມແຂງຂຶ້ນ ແຕ່ຍັງເຮັດໃຫ້ບໍ່ຕ້ອງໄປສູ້ຮົບກັບທະຫານເມືອງເຢລິໂກນຳອີກ.—ໂຢຊວຍ 6:2-5; ເຫບເລີ 11:30 * (ເບິ່ງໄຂເງື່ອນ)

9. ເປັນຫຍັງເຮົາຄວນເຮັດຕາມຄຳແນະນຳທຸກຢ່າງຈາກອົງການຂອງພະເຈົ້າ? ໃຫ້ຍົກຕົວຢ່າງ.

⁹ເຮົາສາມາດຮຽນຫຍັງໄດ້ຈາກເລື່ອງນີ້? ບາງຄັ້ງອົງການຂອງພະເຢໂຫວາກໍເຮັດສິ່ງຕ່າງໆໃນວິທີໃໝ່ໆແລະເຮົາກໍອາດບໍ່ເຂົ້າໃຈເຫດຜົນ. ຕົວຢ່າງເຊັ່ນ: ເຮົາອາດບໍ່ແນ່ໃຈວ່າມັນຈະດີແທ້ໆບໍທີ່ຈະໃຊ້ມືຖືຫຼືແທັບເລັດໃນການສຶກສາສ່ວນຕົວ ໃນການປະກາດ ແລະໃນການປະຊຸມ. ແຕ່ຕອນນີ້ເຮົາເຫັນວ່າການໃຊ້ສິ່ງເຫຼົ່ານີ້ເປັນປະໂຫຍດຫຼາຍແທ້ໆ. ເມື່ອເຮົາເຫັນຜົນດີຂອງການປ່ຽນແປງນັ້ນ ຄວາມເຊື່ອຂອງເຮົາກໍເຂັ້ມແຂງຂຶ້ນແລະເຮົາກໍເປັນນໍ້າໜຶ່ງໃຈດຽວກັນຫຼາຍຂຶ້ນ.

ພະຄລິດໄດ້ຊີ້ນຳຄລິດສະຕຽນໃນສະຕະວັດທຳອິດແນວໃດ?

10. ໃຜທີ່ຢູ່ເບື້ອງຫຼັງການປະຊຸມທີ່ສຳຄັນຂອງຄະນະກຳມະການປົກຄອງໃນເມືອງເຢຣຶຊາເລມໃນເລື່ອງການຮັບສິນຕັດ?

¹⁰ປະມານ 13 ປີຫຼັງຈາກທີ່ໂຄເນເລຍເຊິ່ງເປັນຄົນຕ່າງຊາດທີ່ບໍ່ໄດ້ຮັບສິນຕັດເຂົ້າມາເປັນຄລິດສະຕຽນ ຄລິດສະຕຽນຊາວຢິວບາງຄົນຍັງບອກວ່າການຮັບສິນຕັດເປັນເລື່ອງສຳຄັນທີ່ຕ້ອງເຮັດ. (ກິດຈະການ 15:1, 2) ພີ່ນ້ອງໃນເມືອງອັນຕີອົກໄດ້ຖຽງກັນກ່ຽວກັບເລື່ອງຮັບສິນຕັດ. ດັ່ງນັ້ນພວກຜູ້ເຖົ້າແກ່ຈຶ່ງມອບໝາຍໂປໂລໃຫ້ໄປຖາມຄະນະກຳມະການປົກຄອງຢູ່ເມືອງເຢຣຶຊາເລມ. ແຕ່ຜູ້ໃດທີ່ເປັນຜູ້ຢູ່ເບື້ອງຫຼັງຂອງເລື່ອງນີ້? ໂປໂລບອກວ່າ: “ຂ້ອຍໄປທີ່ນັ້ນຕາມທີ່ໄດ້ຮັບການເປີດເຜີຍຈາກສະຫວັນ.” ເຫັນໄດ້ຢ່າງຈະແຈ້ງວ່າພະຄລິດເປັນຜູ້ຊີ້ນຳເພື່ອເລື່ອງນີ້ຈະໄດ້ຮັບຄຳຕອບໂດຍທາງຄະນະກຳມະການປົກຄອງ.—ຄາລາຊີ 2:1-3, ລ.ມ.

ພະເຍຊູເປັນຜູ້ນຳປະຊາຄົມຄລິດສະຕຽນໃນສະຕະວັດທຳອິດ (ເບິ່ງຂໍ້ 10, 11)

11. (ກ) ຄລິດສະຕຽນຊາວຢິວບາງຄົນຍັງມີຄວາມຄິດແນວໃດກັບເລື່ອງການຮັບສິນຕັດ? (ຂ) ໂປໂລສະແດງໃຫ້ເຫັນແນວໃດວ່າລາວຖ່ອມຕົວເຮັດຕາມຜູ້ເຖົ້າແກ່ໃນເມືອງເຢຣຶຊາເລມ? (ເບິ່ງໄຂເງື່ອນ)

¹¹ພະຄລິດຊີ້ນຳຄະນະກຳມະການປົກຄອງເພື່ອໃຫ້ເຂົ້າໃຈຢ່າງຊັດເຈນວ່າຄລິດສະຕຽນທີ່ບໍ່ແມ່ນຊາວຢິວບໍ່ຈຳເປັນຕ້ອງຮັບສິນຕັດ. (ກິດຈະການ 15:19, 20) ແຕ່ຫຼາຍປີຜ່ານໄປ ຄລິດສະຕຽນຊາວຢິວຫຼາຍຄົນກໍຍັງໃຫ້ລູກຊາຍຮັບສິນຕັດຢູ່. ຕໍ່ມາຜູ້ເຖົ້າແກ່ໃນເມືອງເຢຣຶຊາເລມໄດ້ຍິນຂ່າວລືວ່າໂປໂລບໍ່ນັບຖືກົດໝາຍຂອງໂມເຊ. ດັ່ງນັ້ນ ຜູ້ເຖົ້າແກ່ຈຶ່ງບອກໂປໂລໃຫ້ເຮັດບາງສິ່ງເພື່ອສະແດງໃຫ້ເຫັນວ່າລາວນັບຖືກົດໝາຍຂອງໂມເຊ. * (ເບິ່ງໄຂເງື່ອນ) (ກິດຈະການ 21:20-26) ຜູ້ເຖົ້າແກ່ບອກໂປໂລໃຫ້ພາຜູ້ຊາຍ 4 ຄົນໄປວິຫານນຳເພື່ອໃຫ້ຄົນອື່ນເຫັນວ່າລາວນັບຖືກົດໝາຍຂອງໂມເຊ. ໂປໂລອາດເວົ້າວ່າ: ‘ບໍ່ເຂົ້າໃຈເລີຍ! ເປັນຫຍັງຄືມາບອກໃຫ້ຂ້ອຍເຮັດແບບນີ້? ຄລິດສະຕຽນຊາວຢິວທີ່ບໍ່ເຂົ້າໃຈເລື່ອງການຮັບສິນຕັດພຸ້ນທີ່ມີບັນຫາ.’ ແຕ່ໂປໂລເຂົ້າໃຈວ່າຜູ້ເຖົ້າແກ່ຢາກໃຫ້ຄລິດສະຕຽນທຸກຄົນເປັນນໍ້າໜຶ່ງໃຈດຽວກັນ ດັ່ງນັ້ນ ລາວຈຶ່ງຖ່ອມຕົວເຮັດຕາມຄຳແນະນຳຂອງເຂົາເຈົ້າ. ເຮົາອາດສົງໄສວ່າເປັນຫຍັງພະເຍຊູຄືຍອມໃຫ້ບັນຫາເລື່ອງການຮັບສິນຕັດແກ່ຍາວມາຫຼາຍປີ ທັງໆທີ່ກົດໝາຍຂອງໂມເຊກໍຖືກຍົກເລີກຕັ້ງແຕ່ພະເຍຊູຕາຍໄປແລ້ວ.—ໂກໂລດ 2:13, 14

12. ເປັນຫຍັງພະເຍຊູຍອມໃຫ້ບັນຫາເລື່ອງການຮັບສິນຕັດຍັງຄົງມີຢູ່ຕໍ່ໄປກ່ອນທີ່ເພິ່ນຈະຈັດການໃຫ້ຮຽບຮ້ອຍ?

¹²ເພື່ອຈະປັບຕົວໃຫ້ຍອມຮັບຄວາມເຂົ້າໃຈໃໝ່ຕ້ອງໃຊ້ເວລາ. ຄລິດສະຕຽນຊາວຢິວບາງຄົນຕ້ອງໃຊ້ເວລາດົນທີ່ຈະຍອມຮັບຄວາມຈິງທີ່ວ່າເຂົາເຈົ້າບໍ່ໄດ້ຢູ່ພາຍໃຕ້ກົດໝາຍຂອງໂມເຊແລ້ວ. (ໂຢຮັນ 16:12) ເຂົາເຈົ້າຄິດວ່າການຮັບສິນຕັດເປັນສິ່ງທີ່ສະແດງເຖິງການມີສາຍສຳພັນທີ່ພິເສດກັບພະເຈົ້າ. (ຕົ້ນເດີມ 17:9-12) ສ່ວນບາງຄົນກໍຢ້ານວ່າຖ້າບໍ່ເຮັດຄືຄົນອື່ນກໍຈະຖືກພວກຊາວຢິວຂົ່ມເຫງ. (ຄາລາຊີ 6:12) ແຕ່ຕໍ່ມາ ພະຄລິດກໍໄດ້ໃຫ້ຄຳແນະນຳກັບເຂົາເຈົ້າຫຼາຍຂຶ້ນຜ່ານທາງຈົດໝາຍຂອງໂປໂລ.—ໂລມ 2:28, 29; ຄາລາຊີ 3:23-25

ພະຄລິດຍັງຊີ້ນຳປະຊາຄົມຄລິດສະຕຽນ

13. ອັນໃດຈະຊ່ວຍເຮົາໃຫ້ສະໜັບສະໜູນການຊີ້ນຳຂອງພະເຍຊູໃນທຸກມື້ນີ້?

¹³ພະເຍຊູຍັງເປັນຜູ້ນຳປະຊາຄົມຄລິດສະຕຽນໃນທຸກມື້ນີ້ນຳ. ດັ່ງນັ້ນ ຖ້າອົງການມີການປັບປ່ຽນບາງຢ່າງທີ່ເຈົ້າບໍ່ເຂົ້າໃຈ ຂໍໃຫ້ເຈົ້າຄິດເຖິງວິທີທີ່ພະຄລິດຊີ້ນຳປະຊາຊົນຂອງພະເຈົ້າໃນອະດີດ. ບໍ່ວ່າຈະເປັນໃນສະໄໝຂອງໂຢຊວຍຫຼືສະໄໝຂອງພວກອັກຄະສາວົກ ພະຄລິດກໍໄດ້ໃຫ້ຄຳແນະນຳທີ່ສະຫຼາດສະເໝີເພື່ອປົກປ້ອງປະຊາຊົນຂອງພະເຈົ້າ ຊ່ວຍໃຫ້ຄວາມເຊື່ອເຂົາເຈົ້າເຂັ້ມແຂງຂຶ້ນແລະເປັນໜຶ່ງດຽວກັນ.—ເຫບເລີ 13:8

ການຊີ້ນຳທີ່ທາດສັດຊື່ແລະສຸຂຸມໄດ້ໃຫ້ເຮົາໃນທຸກມື້ນີ້ພິສູດວ່າພະເຍຊູເປັນຫ່ວງເຮົາ

14-16. ການຊີ້ນຳຈາກ “ທາດທີ່ສັດຊື່ແລະສຸຂຸມ” ພິສູດວ່າແນວໃດວ່າພະເຍຊູຢາກຊ່ວຍເຮົາໃຫ້ມີຄວາມເຊື່ອເຂັ້ມແຂງ?

¹⁴ໃນທຸກມື້ນີ້ “ທາດທີ່ສັດຊື່ແລະສຸຂຸມ” ໄດ້ໃຫ້ການຊີ້ນຳທີ່ຈຳເປັນກັບເຮົາເມື່ອເຮົາຕ້ອງການ. (ມັດທາຍ 24:45, ລ.ມ.) ການຊີ້ນຳນີ້ພິສູດວ່າພະເຍຊູເປັນຫ່ວງເຮົາ. ພີ່ນ້ອງມາກເຊິ່ງມີລູກ 4 ຄົນບອກວ່າ: “ຊາຕານພະຍາຍາມເຮັດໃຫ້ປະຊາຄົມອ່ອນແອໂດຍໂຈມຕີຄອບຄົວ. ຕອນນີ້ຍ້ອນມີການສະໜັບສະໜູນໃຫ້ເຮັດການນະມັດສະການປະຈຳຄອບຄົວທຸກອາທິດ ຫົວໜ້າຄອບຄົວຈຶ່ງເຫັນຄຳສັ່ງທີ່ຈະແຈ້ງວ່າ: ຕ້ອງປົກປ້ອງຄອບຄົວ!”

¹⁵ເມື່ອເຮົາເຫັນວ່າພະເຍຊູຊີ້ນຳເຮົາແນວໃດ ເຮົາກໍຈະເຂົ້າໃຈຫຼາຍຂຶ້ນວ່າເພິ່ນຕ້ອງການຊ່ວຍເຮົາໃຫ້ມີຄວາມເຊື່ອເຂັ້ມແຂງ. ຕົວຢ່າງ: ຜູ້ເຖົ້າແກ່ຄົນໜຶ່ງຊື່ແພັດທຣິກບອກວ່າ: “ທຳອິດ ບາງຄົນຮູ້ສຶກບໍ່ມີກຳລັງໃຈທີ່ຈະໄປປະກາດກັບກຸ່ມນ້ອຍໆໃນຕອນທ້າຍອາທິດ.” ແຕ່ລາວບອກວ່າການປ່ຽນແປງນີ້ສະແດງໃຫ້ເຫັນວິທີທີ່ພະເຍຊູເປັນຫ່ວງທຸກຄົນໃນປະຊາຄົມ. ຕົວຢ່າງ: ພີ່ນ້ອງບາງຄົນເປັນຄົນຂີ້ອາຍບໍ່ກ້າອອກປະກາດຫຼືບໍ່ຄ່ອຍໄດ້ໄປປະກາດ ແຕ່ການປັບປ່ຽນໃໝ່ນີ້ເຮັດໃຫ້ເຂົາເຈົ້າຮູ້ສຶກມີຄ່າແລະເປັນປະໂຫຍດຫຼາຍຂຶ້ນຕໍ່ປະຊາຄົມ ແລະນີ້ໄດ້ເສີມຄວາມເຊື່ອຂອງເຂົາເຈົ້າຫຼາຍແທ້ໆ.

¹⁶ພະເຍຊູຍັງຊ່ວຍເຮົາໃຫ້ຈົດຈໍ່ຢູ່ກັບວຽກປະກາດເຊິ່ງເປັນວຽກທີ່ສຳຄັນທີ່ສຸດໃນຕອນນີ້. (ອ່ານມາລະໂກ 13:10) ອັງເດເປັນຜູ້ເຖົ້າແກ່ຄົນໜຶ່ງທີ່ພະຍາຍາມເຮັດຕາມຄຳແນະນຳໃໝ່ໆທຸກຢ່າງຈາກອົງການຂອງພະເຢໂຫວາ. ລາວບອກວ່າ: “ການຫຼຸດຄົນໃນສຳນັກງານສາຂາລົງເຕືອນເຮົາໃຫ້ຮູ້ວ່ານີ້ເປັນເວລາທີ່ເລັ່ງດ່ວນແລະຕ້ອງທຸ່ມເທກຳລັງເຮັດວຽກປະກາດ.”

ເຮົາຈະສະໜັບສະໜູນການຊີ້ນຳຂອງພະຄລິດແນວໃດ?

17, 18. ເປັນຫຍັງເຮົາຄວນເບິ່ງໄປທີ່ຜົນດີຂອງການປັບຕົວໃຫ້ເຂົ້າກັບການປ່ຽນແປງ?

¹⁷ການຊີ້ນຳທີ່ໄດ້ຮັບຈາກພະເຍຊູຄລິດກະສັດຂອງເຮົາຈະຊ່ວຍເຮົາໃນຕອນນີ້ແລະໃນອະນາຄົດ. ດັ່ງນັ້ນ ຂໍໃຫ້ເບິ່ງໄປທີ່ຜົນດີທີ່ເຈົ້າໄດ້ຮັບຈາກການປັບປ່ຽນຕາມຄຳແນະນຳໃໝ່. ເມື່ອນະມັດສະການປະຈຳຄອບຄົວໃຫ້ລົມກັນເບິ່ງວ່າການປ່ຽນແປງໃນການປະຊຸມຫຼືການປະກາດຊ່ວຍຄອບຄົວເຈົ້າແນວໃດ.

ເຈົ້າກຳລັງຊ່ວຍຄອບຄົວແລະຄົນອື່ນໆໃຫ້ປັບຕົວກັບການປ່ຽນແປງໃນອົງການຂອງພະເຢໂຫວາບໍ? (ເບິ່ງຂໍ້ 17, 18)

¹⁸ຖ້າເຮົາຈື່ວ່າການເຮັດຕາມຄຳສັ່ງຈາກອົງການຂອງພະເຢໂຫວາເຮັດໃຫ້ໄດ້ຮັບຜົນດີຫຼາຍຢ່າງ ກໍງ່າຍຂຶ້ນທີ່ເຮົາຈະເຮັດຕາມຄຳແນະນຳນັ້ນແລະມີຄວາມສຸກ. ຕົວຢ່າງ: ດຽວນີ້ເຮົາບໍ່ໄດ້ພິມປຶ້ມຫຼາຍຄືແຕ່ກ່ອນ ເຮົາຈຶ່ງປະຢັດເງິນໄດ້ ແລະຍ້ອນເຮົາໃຊ້ເຕັກໂນໂລຊີໃໝ່ໆ ເຮົາຈຶ່ງສາມາດປະກາດຂ່າວດີກັບຜູ້ຄົນໄດ້ຫຼາຍຂຶ້ນ. ເຮົາຈະໃຊ້ມືຖືຫຼືແທັບເລັດຂອງເຮົາເພື່ອອ່ານໜັງສືຫຼືເບິ່ງວິດີໂອຫຼາຍຂຶ້ນໄດ້ບໍ? ນີ້ເປັນວິທີທີ່ເຮົາຈະສະໜັບສະໜູນພະຄລິດ ເຊິ່ງເພິ່ນຢາກໃຫ້ເຮົາໃຊ້ຊັບພະຍາກອນຂອງອົງການຢ່າງສະຫຼາດ.

19. ເປັນຫຍັງເຮົາຄວນສະໜັບສະໜູນການຊີ້ນຳຂອງພະຄລິດ?

¹⁹ເມື່ອເຮົາສະໜັບສະໜູນການຊີ້ນຳຂອງພະຄລິດ ເຮົາຈະຊ່ວຍພີ່ນ້ອງໃຫ້ມີຄວາມເຊື່ອເຂັ້ມແຂງແລະເປັນນໍ້າໜຶ່ງໃຈດຽວກັນຫຼາຍຂຶ້ນ. ອັງເດເວົ້າເຖິງການຫຼຸດຈຳນວນຄົນຂອງຄອບຄົວເບເທນທົ່ວໂລກຫຼ້າສຸດວ່າ: “ພີ່ນ້ອງທີ່ເຄີຍຮັບໃຊ້ໃນເບເທນເຊິ່ງຍອມຮັບການປັບປ່ຽນໄດ້ສະແດງນໍ້າໃຈທີ່ດີຫຼາຍຈົນເຮັດໃຫ້ຂ້ອຍໄວ້ວາງໃຈໃນການຊີ້ນຳຂອງພະຄລິດແລະຮູ້ສຶກນັບຖືເຂົາເຈົ້າ. ເຂົາເຈົ້າກ້າວໃຫ້ທັນກັບລົດກະສັດຂອງພະເຢໂຫວາໂດຍມີຄວາມສຸກກັບການເຮັດວຽກມອບໝາຍທຸກຢ່າງທີ່ໄດ້ຮັບ.”

ມີຄວາມເຊື່ອແລະໄວ້ວາງໃຈຜູ້ນຳຂອງເຮົາ

20, 21. (ກ) ເປັນຫຍັງເຮົາສາມາດໄວ້ວາງໃຈພະຄລິດຜູ້ນຳຂອງເຮົາ? (ຂ) ເຮົາຈະພິຈາລະນາເລື່ອງຫຍັງໃນບົດຄວາມຕໍ່ໄປ?

²⁰ອີກບໍ່ດົນ ພະເຍຊູຄລິດຜູ້ນຳຂອງເຮົາຈະໄດ້ “ໄຊຊະນະຢ່າງເດັດຂາດ” ແລະຈະ “ເຮັດສິ່ງທີ່ໜ້າເກງຂາມ.” (ຄຳປາກົດ 6:2, ລ.ມ.; ຄຳເພງ 45:4, ລ.ມ.) ແມ່ນແຕ່ຕອນນີ້ເພິ່ນກໍກຳລັງກຽມເຮົາສຳລັບຊີວິດໃນໂລກໃໝ່ແລະວຽກທີ່ເຮົາຈະເຮັດຢູ່ຫັ້ນ. ຕອນນັ້ນ ເຮົາຈະໄດ້ສອນຄົນທີ່ຟື້ນຂຶ້ນມາຈາກຕາຍແລະຊ່ວຍກັນເຮັດໃຫ້ໂລກນີ້ເປັນສວນອຸທິຍານ.

²¹ຖ້າເຮົາໄວ້ວາງໃຈພະເຍຊູຜູ້ນຳແລະກະສັດຂອງເຮົາບໍ່ວ່າຈະເກີດຫຍັງຂຶ້ນ ເພິ່ນກໍຈະພາເຮົາເຂົ້າໄປໃນໂລກໃໝ່. (ອ່ານຄຳເພງ 46:1-3) ທຸກມື້ນີ້ອາດມີການປ່ຽນແປງທີ່ເຮົາຮູ້ສຶກວ່າຮັບໄດ້ຍາກ ໂດຍສະເພາະຖ້າມັນສົ່ງຜົນກະທົບຕໍ່ເຮົາແບບບໍ່ໄດ້ຄາດຄິດ. ຖ້າສິ່ງນັ້ນເກີດຂຶ້ນ ເຮົາຈະຍັງມີຄວາມສະຫງົບໃຈແລະມີຄວາມເຊື່ອໃນພະເຢໂຫວາໄດ້ແນວໃດ? ເຮົາຈະພິຈາລະນາເລື່ອງນີ້ໃນບົດຄວາມຕໍ່ໄປ.

^ ຂໍ້ 8 ນັກບູຮານຄະດີໄດ້ຄົ້ນພົບເມັດເຂົ້າຈຳນວນຫຼາຍໃນຊາກເມືອງເຢລິໂກ ເຊິ່ງຊາວເມືອງເກັບກ່ຽວໄວ້ແຕ່ຍັງບໍ່ໄດ້ກິນ. ເລື່ອງນີ້ສະໜັບສະໜູນເລື່ອງໃນຄຳພີໄບເບິນທີ່ບອກເຮົາວ່າມີການລ້ອມເມືອງນີ້ໃນເວລາສັ້ນໆແລະຊາວອິດສະລາແອນຖືກສັ່ງຫ້າມບໍ່ໃຫ້ກິນເຂົ້າຂອງເມືອງນີ້. ເນື່ອງຈາກເປັນລະດູເກັບກ່ຽວຈຶ່ງເປັນເວລາທີ່ເໝາະຫຼາຍສຳລັບຊາວອິດສະລາແອນທີ່ຈະໄປຍຶດເອົາເມືອງນັ້ນ ເພາະມີອາຫານອຸດົມສົມບູນໃນທົ່ງນາ.

^ ຂໍ້ 11 ເບິ່ງຫໍສັງເກດການ (ບໍ່ມີໃນພາສາລາວ) ສະບັບ 15 ມີນາ 2003 ໜ້າ 24 ຂອບ “ໂປໂລຖ່ອມໃຈຕອບຮັບການທົດສອບ.”

ການອະທິບາຍບາງສຳນວນ

ການໄວ້ວາງໃຈພະຄລິດຜູ້ນຳ ໝາຍເຖິງການເຊື່ອວ່າພະເຍຊູກຳລັງນຳໜ້າອົງການຂອງພະເຢໂຫວາ ແລະຄຳແນະນຳທຸກຢ່າງຂອງເພິ່ນແມ່ນມາຈາກພະເຢໂຫວາ. ດັ່ງນັ້ນ ເມື່ອອົງການມີການປັບປ່ຽນບາງຢ່າງ ຜູ້ຮັບໃຊ້ຂອງພະເຢໂຫວາກໍບໍ່ໄດ້ກັງວົນ. ເຂົາເຈົ້າຍິນດີທີ່ຈະເຮັດຕາມຄຳແນະນຳ ເຖິງວ່າຈະບໍ່ເຂົ້າໃຈເຫດຜົນທັງໝົດ.

ຫໍສັງເກດການສະບັບສຶກສາ