“ພົບກັນໃໝ່ໃນອຸທິຍານ!”
“ເຈົ້າຈະຢູ່ກັບເຮົາໃນທີ່ສຸກກະເສີມ [“ອຸທິຍານ,” ລ.ມ.]”—ລືກາ 23:43
1, 2. ຜູ້ຄົນມີຄວາມຄິດຕ່າງກັນແນວໃດກ່ຽວກັບອຸທິຍານ?
ພີ່ນ້ອງຈຳນວນຫຼາຍໄດ້ມາເມືອງເຊອູນ ປະເທດເກົາຫຼີເພື່ອເຂົ້າຮ່ວມການປະຊຸມໃຫຍ່. ເມື່ອເຂົາເຈົ້າກຳລັງອອກຈາກສະຖານທີ່ການປະຊຸມ ພີ່ນ້ອງທ້ອງຖິ່ນຢືນອ້ອມຂ້າງເຂົາເຈົ້າໄດ້ໂບກມືລາແລະຮ້ອງວ່າ: “ພົບກັນໃໝ່ໃນອຸທິຍານ!” ນີ້ເປັນເຫດການທີ່ຊາບຊຶ້ງໃຈແທ້ໆ. ເຈົ້າຄິດວ່າເຂົາເຈົ້າເວົ້າເຖິງອຸທິຍານຫຍັງ?
2 ປັດຈຸບັນຜູ້ຄົນມີຄວາມຄິດຕ່າງກັນກ່ຽວກັບອຸທິຍານ. ບາງຄົນບອກວ່າອຸທິຍານເປັນພຽງເລື່ອງເພີ້ຝັນ. ສ່ວນບາງຄົນກໍບອກວ່າເປັນບ່ອນໃດກໍໄດ້ທີ່ເຮັດໃຫ້ເຂົາເຈົ້າມີຄວາມສຸກ. ຄົນໜຶ່ງທີ່ອຶດຢາກນັ່ງຢູ່ໂຕະທີ່ມີອາຫານເຕັມໂຕະອາດຮູ້ສຶກວ່າຕົວເອງໄດ້ຢູ່ໃນອຸທິຍານແລ້ວ. ຫຼາຍປີແລ້ວທີ່ຜູ້ຍິງຄົນໜຶ່ງເບິ່ງຮ່ອມພູທີ່ມີດອກໄມ້ຫຼາຍໆ ລາວປະທັບໃຈເຖິງຂັ້ນອຸທານວ່າ: “ປ້າໂທ! ປານອຸທິຍານເລີຍນໍ!” ເຈົ້າເດຄິດວ່າອຸທິຍານແມ່ນຫຍັງ? ເຈົ້າຫວັງວ່າຈະມີອຸທິຍານໃນອະນາຄົດບໍ?
3. ຄຳພີໄບເບິນເວົ້າເຖິງອຸທິຍານຄັ້ງທຳອິດໃນພະທຳໃດ?
3 ຄຳພີໄບເບິນເວົ້າກ່ຽວກັບອຸທິຍານທີ່ເຄີຍມີໃນອະດີດແລະຈະມີອີກໃນອະນາຄົດ. ເຮົາອ່ານພົບຄຳວ່າອຸທິຍານຄັ້ງທຳອິດຢູ່ທີ່ພະທຳທຳອິດຂອງຄຳພີໄບເບິນ. ໃນຕົ້ນເດີມ 2:8 ບອກວ່າ: “ພະເຢໂຫວາພະເຈົ້າໄດ້ປູກຝັງສວນໜຶ່ງໄວ້ຢູ່ໃນບ່ອນຊື່ເອເດນ [ຫຼື ອຸທິຍານແຫ່ງຄວາມເພີດເພີນ, ດູເອ ເວີຊັນ ຂອງກາໂຕລິກ] ທາງທິດບົວລະພາ ແລະຄົນທີ່ພະອົງໄດ້ປັ້ນນັ້ນພະອົງໄດ້ເອົາມາຕັ້ງຢູ່ໃນສວນນັ້ນ.” (ເຮົາເຮັດເປັນໂຕເຂັ້ມ) ຄຳວ່າ: “ອຸທິຍານ” ແປວ່າ “ສວນ” ແລະຄຳວ່າ: “ເອເດນ” ແປວ່າ “ເພີດເພີນ.” ສວນເອເດນເປັນບ່ອນທີ່ເຮັດໃຫ້ເພີດເພີນແທ້ໆທັງງາມແລະມີອາຫານຫຼາກຫຼາຍ ຄົນກັບສັດຢູ່ນຳກັນຢ່າງສະຫງົບສຸກ.—ຕົ້ນເດີມ 1:29-31
4. ເປັນຫຍັງເຮົາສາມາດບອກໄດ້ວ່າສວນເອເດນເປັນອຸທິຍານ?
4 ໃນພາສາເຫບເລີຄຳວ່າ: “ສວນ” ແປວ່າ ປາຣາເດຊອດ ໃນພາສາເກັຣກ. ປຶ້ມສາລານຸກົມໄຊໂຄລພີເດຍ ຂຽນໂດຍມັກຄລິນຕັອກ ແລະສະຕຣອງອະທິບາຍວ່າເມື່ອຄົນເກັຣກໄດ້ຍິນຄຳວ່າປາຣາເດຊອດ ລາວກໍຈະນຶກພາບເຖິງສວນທີ່ສວຍງາມ ປອດໄພ ມີຕົ້ນໄມ້ໃຫຍ່ທີ່ຂຽວສົດງົດງາມ ມີໝາກໄມ້ຫຼາກຫຼາຍຊະນິດ ມີແມ່ນໍ້າລຳເຊທີ່ໃສສະອາດເຊິ່ງເຮັດໃຫ້ມີຫຍ້າງອກຂຶ້ນ ແລະມີກວາງກັບແກະມາກິນຫຍ້າຢູ່ຫັ້ນ.—ສົມທຽບຕົ້ນເດີມ 2:15, 16
5, 6. ເປັນຫຍັງອາດາມແລະເອວາຈຶ່ງເສຍໂອກາດທີ່ຈະມີຊີວິດໃນອຸທິຍານ ແລະບາງຄົນອາດຈະສົງໄສໃນເລື່ອງຫຍັງ?
5 ພະເຢໂຫວາໄດ້ໃຫ້ອາດາມແລະເອວາຢູ່ໃນສວນແບບນັ້ນເຊິ່ງເປັນອຸທິຍານ. ແຕ່ຍ້ອນເຂົາເຈົ້າບໍ່ເຊື່ອຟັງພະເຢໂຫວາ ທັງເຂົາເຈົ້າແລະລູກຫຼານຈຶ່ງເສຍໂອກາດທີ່ຈະມີຊີວິດໃນອຸທິຍານ. (ຕົ້ນເດີມ 3:23, 24) ເຖິງວ່າອຸທິຍານນີ້ຈະມີຢູ່ຈົນຮອດນໍ້າຖ້ວມໃຫຍ່ໃນສະໄໝໂນເອ ແຕ່ກໍບໍ່ມີມະນຸດຄົນໃດໄດ້ຢູ່ໃນອຸທິຍານນັ້ນ.
6 ບາງຄົນອາດສົງໄສວ່າ ‘ຈະມີອຸທິຍານເທິງໂລກນີ້ອີກບໍ?’ ແທ້ໆແລ້ວອຸທິຍານຈະເປັນແນວໃດ? ຖ້າເຈົ້າເຊື່ອວ່າຈະຢູ່ນຳຄົນທີ່ເຈົ້າຮັກໃນອຸທິຍານ ເຈົ້າມີເຫດຜົນທີ່ດີຫຍັງທີ່ຈະເຊື່ອແບບນັ້ນ? ເຈົ້າສາມາດອະທິບາຍໄດ້ບໍວ່າເປັນຫຍັງເຈົ້າເຊື່ອໝັ້ນວ່າຈະມີອຸທິຍານໃນອະນາຄົດ?
ຫຼັກຖານທີ່ວ່າຈະມີອຸທິຍານໃນອະນາຄົດ
7, 8. (ກ) ພະເຢໂຫວາໄດ້ເຮັດສັນຍາຫຍັງກັບອັບລາຫາມ? (ຂ) ສັນຍາທີ່ພະເຢໂຫວາໄດ້ເຮັດກັບອັບລາຫາມອາດເຮັດໃຫ້ລາວຄິດແນວໃດ?
7 ຄຳພີໄບເບິນຕອບຄຳຖາມກ່ຽວກັບອຸທິຍານໄດ້ດີທີ່ສຸດ ຍ້ອນຄຳພີໄບເບິນມາຈາກພະເຢໂຫວາ ຜູ້ທີ່ໄດ້ສ້າງອຸທິຍານທຳອິດນັ້ນ. ຂໍໃຫ້ຄິດເຖິງສິ່ງທີ່ພະເຈົ້າບອກອັບລາຫາມທີ່ເປັນໝູ່ຂອງພະອົງ. ພະເຈົ້າບອກວ່າຈະໃຫ້ອັບລາຫາມມີລູກຫຼານຫຼາຍ “ເໝືອນດັ່ງເມັດດິນຊາຍທີ່ຝັ່ງນໍ້າທະເລ.” ຈາກນັ້ນ ພະເຢໂຫວາໄດ້ເຮັດສັນຍາທີ່ສຳຄັນກັບອັບລາຫາມວ່າ: “ຊາວປະເທດທັງປວງທົ່ວແຜ່ນດິນໂລກຈະໄດ້ຄວາມພອນດ້ວຍເຊື້ອສາຍຂອງເຈົ້າ ເພາະເຫດເຈົ້າໄດ້ເຊື່ອຟັງຄວາມເຮົາ.” (ຕົ້ນເດີມ 22:17, 18) ຕໍ່ມາ ພະເຢໂຫວາກໍສັນຍາແບບນີ້ກັບລູກຊາຍແລະຫຼານຂອງອັບລາຫາມ.—ອ່ານຕົ້ນເດີມ 26:4; 28:14
8 ຄຳພີໄບເບິນບໍ່ໄດ້ບອກວ່າອັບລາຫາມຄິດວ່າສຸດທ້າຍມະນຸດຈະໄດ້ຮັບລາງວັນໃນອຸທິຍານເທິງສະຫວັນ. ດັ່ງນັ້ນ ເມື່ອພະເຈົ້າສັນຍາວ່າ “ຊາວປະເທດທັງປວງທົ່ວແຜ່ນດິນໂລກຈະໄດ້ຄວາມພອນ” ອັບລາຫາມຄົງຕ້ອງຄິດວ່າຈະໄດ້ຮັບຄວາມພອນນີ້ຢູ່ເທິງແຜ່ນດິນໂລກ. ແຕ່ຄຳພີໄບເບິນມີຫຼັກຖານຢ່າງດຽວນີ້ບໍທີ່ສະແດງວ່າຈະມີອຸທິຍານເທິງແຜ່ນດິນໂລກ?
9, 10. ຫຼັງຈາກສະໄໝອັບລາຫາມ ມີຄຳສັນຍາຫຍັງແດ່ທີ່ເຮັດໃຫ້ເຮົາເຊື່ອໝັ້ນໄດ້ວ່າຈະມີອຸທິຍານອີກໃນອະນາຄົດ?
9 ພະເຈົ້າດົນໃຈດາວິດທີ່ເປັນລູກຫຼານຂອງອັບລາຫາມໃຫ້ເວົ້າເຖິງອະນາຄົດວ່າ: “ຄົນຮ້າຍຈະບໍ່ຢູ່ຕໍ່ໄປ.” (ຄຳເພງ 37:1, 2, 10) ກົງກັນຂ້າມ “ຄົນທັງຫຼາຍທີ່ມີໃຈອ່ອນຫວານຈະມີແຜ່ນດິນໄວ້ ແລະມີຄວາມສະໜຸກດ້ວຍຄວາມສຸກສຳລານອັນບໍລິບູນ.” ດາວິດຍັງບອກອີກວ່າ: “ຄົນຊອບທຳທັງຫຼາຍຈະມີແຜ່ນດິນໄວ້ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.” (ຄຳເພງ 37:11, 29; 2 ຊາເມືອນ 23:2) ເຈົ້າຄິດວ່າສັນຍາເຫຼົ່ານີ້ສົ່ງຜົນແນວໃດຕໍ່ຜູ້ຄົນທີ່ຢາກເຮັດຕາມໃຈປະສົງຂອງພະເຈົ້າ? ເຂົາເຈົ້າສາມາດເຊື່ອໝັ້ນໄດ້ວ່າມື້ໜຶ່ງໂລກນີ້ຈະມີແຕ່ຄົນຊອບທຳແລະຈະເປັນອຸທິຍານຄືກັບສວນເອເດນອີກ.
ຄຳພະຍາກອນເຫຼົ່ານັ້ນທີ່ສຳເລັດເປັນຈິງເຮັດໃຫ້ເຮົາມີເຫດຜົນທີ່ຈະເຊື່ອໝັ້ນໄດ້ວ່າໂລກຈະເປັນອຸທິຍານອີກໃນອະນາຄົດ
10 ແຕ່ເມື່ອເວລາຜ່ານໄປ ຄົນອິດສະລາແອນສ່ວນຫຼາຍທີ່ອ້າງວ່າຮັບໃຊ້ພະເຢໂຫວາໄດ້ປະຖິ້ມພະອົງແລະການນະມັດສະການແທ້. ດັ່ງນັ້ນ ພະເຢໂຫວາຈຶ່ງໃຫ້ຊາວບາບີໂລນເອົາຊະນະປະຊາຊົນຂອງພະອົງ ທຳລາຍແຜ່ນດິນ ແລະຈັບຫຼາຍຄົນໃຫ້ໄປເປັນຊະເລີຍ. (2 ຂ່າວຄາວ 36:15-21; ເຢເຣມີ 4:22-27) ແຕ່ຜູ້ພະຍາກອນຂອງພະເຈົ້າໄດ້ບອກລ່ວງໜ້າວ່າປະຊາຊົນຂອງພະອົງຈະກັບມາບ້ານເກີດເມືອງນອນຫຼັງຈາກ 70 ປີຜ່ານໄປ. ເຖິງວ່າຄຳພະຍາກອນເຫຼົ່ານັ້ນໄດ້ສຳເລັດໄປແລ້ວ ແຕ່ກໍຍັງມີຄວາມໝາຍສຳລັບເຮົາໃນປັດຈຸບັນ. ຕອນທີ່ເຮົາພິຈາລະນາບາງຄຳພະຍາກອນນີ້ ຂໍໃຫ້ສັງເກດເຫດຜົນທີ່ເຮົາສາມາດເຊື່ອໝັ້ນໄດ້ວ່າໂລກຈະເປັນອຸທິຍານອີກໃນອະນາຄົດ.
11. ພະທຳເອຊາອີ 11:6-9 ສຳເລັດເປັນຈິງຄັ້ງທຳອິດເມື່ອໃດ ແຕ່ເຮົາອາດຈະມີຄຳຖາມຫຍັງອີກ?
11 ອ່ານເອຊາອີ 11:6-9. ພະເຈົ້າບອກໂດຍຜ່ານທາງຜູ້ພະຍາກອນເອຊາອີວ່າເມື່ອເຂົາເຈົ້າກັບໄປບ້ານເກີດກໍຈະມີແຕ່ຄວາມສະຫງົບສຸກ. ບໍ່ມີໃຜຕ້ອງຢ້ານວ່າຈະມີຄົນຫຼືສັດຮ້າຍມາທຳຮ້າຍ. ທັງຜູ້ສູງອາຍຸກັບຄົນໜຸ່ມຈະຢູ່ຢ່າງປອດໄພ. ສະພາບການທີ່ສະຫງົບສຸກແບບນີ້ຄົງເຮັດໃຫ້ເຈົ້າຄິດເຖິງສວນເອເດນແມ່ນບໍ? (ເອຊາອີ 51:3) ເອຊາອີຍັງບອກວ່າທົ່ວທັງໂລກ “ຈະເຕັມໄປດ້ວຍຄວາມຮູ້ຈັກພະເຢໂຫວາຄືນໍ້າທັງຫຼາຍຖ້ວມພື້ນນໍ້າທະເລ” ບໍ່ພຽງແຕ່ຊາດອິດສະລາແອນເທົ່ານັ້ນ. ແຕ່ເຫດການນີ້ຈະເກີດຂຶ້ນເມື່ອໃດ? ເຫັນໄດ້ແຈ້ງວ່າຈະເກີດຂຶ້ນໃນອະນາຄົດ.
12. (ກ) ຄົນທີ່ກັບມາຈາກບາບີໂລນໄດ້ຮັບພອນຫຍັງແດ່? (ຂ) ມີຫຍັງທີ່ສະແດງວ່າເອຊາອີ 35:5-10 ຈະຍັງສຳເລັດເປັນຈິງອີກໃນອະນາຄົດ?
12 ອ່ານເອຊາອີ 35:5-10. ຂໍໃຫ້ສັງເກດສິ່ງທີ່ເອຊາອີບອກໄວ້ລ່ວງໜ້າວ່າເມື່ອຊາວອິດສະລາແອນອອກຈາກບາບີໂລນກັບໄປບ້ານເກີດ ເຂົາເຈົ້າຈະບໍ່ຖືກໂຈມຕີໂດຍສັດຫຼືຄົນ. ລາວບອກວ່າດິນຂອງເຂົາເຈົ້າຈະເກີດພືດຜົນທີ່ດີຫຼາຍເພາະມີນໍ້າຢ່າງຫຼວງຫຼາຍຄ້າຍຄືກັບສວນເອເດນ. (ຕົ້ນເດີມ 2:10-14; ເຢເຣມີ 31:12) ຄຳພະຍາກອນນີ້ສຳເລັດແຕ່ສະເພາະໃນສະໄໝຂອງຊາວອິດສະລາແອນເທົ່ານັ້ນບໍ? ຂໍໃຫ້ສັງເກດ ຄຳພະຍາກອນຍັງບອກອີກວ່າຄົນຕາບອດ ຄົນຂາພິການ ແລະຄົນຫູໜວກຈະໄດ້ຮັບການປິ່ນປົວ. ແຕ່ນີ້ບໍ່ໄດ້ເກີດຂຶ້ນກັບຊາວອິດສະລາແອນທີ່ກັບມາຈາກບາບີໂລນ. ພະເຈົ້າສະແດງໃຫ້ເຫັນວ່າພະອົງຈະປິ່ນປົວພະຍາດທັງໝົດໃນອະນາຄົດ.
13, 14. ເອຊາອີ 65:21-23 ສຳເລັດເປັນຈິງແນວໃດເມື່ອອິດສະລາແອນກັບມາຈາກບາບີໂລນ? ແຕ່ໃນຄຳພະຍາກອນນີ້ມີສ່ວນໃດທີ່ຍັງບໍ່ທັນສຳເລັດ? (ເບິ່ງຮູບທຳອິດ)
13 ອ່ານເອຊາອີ 65:21-23. ເມື່ອຊາວຢິວກັບໄປບ້ານເກີດ ເຂົາເຈົ້າບໍ່ໄດ້ເຈິເຮືອນທີ່ສວຍງາມ ແລະບໍ່ໄດ້ມີທົ່ງນາກັບສວນໄວ້ໃຫ້ພ້ອມປູກຝັງ. ແຕ່ຍ້ອນພະເຢໂຫວາອວຍພອນເຂົາເຈົ້າ ທຸກຢ່າງຈຶ່ງປ່ຽນໄປໃນທີ່ສຸດ. ຂໍໃຫ້ນຶກພາບວ່າປະຊາຊົນຈະຕ້ອງດີໃຈສໍ່າໃດ ເມື່ອປຸກເຮືອນແລະໄດ້ຢູ່ໃນເຮືອນນັ້ນ ເມື່ອໄດ້ກິນໝາກໄມ້ພືດຜັກທີ່ແຊບໆທີ່ເຂົາເຈົ້າປູກເອງ!
14 ຂໍໃຫ້ສັງເກດຕາມຄຳພະຍາກອນນີ້ ອາຍຸຂອງເຮົາຈະ “ທໍ່ວັນຄືນທັງຫຼາຍແຫ່ງກົກໄມ້.” ກົກໄມ້ບາງຊະນິດມີອາຍຸຫຼາຍພັນປີ. ເພື່ອຈະມີອາຍຸຫຼາຍປານນັ້ນມະນຸດຕ້ອງມີສຸຂະພາບທີ່ແຂງແຮງ. ຖ້າເຂົາເຈົ້າມີຊີວິດໃນສະພາບແວດລ້ອມທີ່ສະຫງົບສຸກແລະສວຍງາມດັ່ງທີ່ເອຊາອີບອກໄວ້ ມັນຄົງຈະເປັນອຸທິຍານທີ່ໜ້າງຶດງໍ້ຫຼາຍແທ້ໆ! ແລະຄຳພະຍາກອນນັ້ນກໍຈະສຳເລັດເປັນຈິງ!
ຄຳສັນຍາຂອງພະເຍຊູກ່ຽວກັບອຸທິຍານຈະສຳເລັດເປັນຈິງແນວໃດ? (ເບິ່ງຂໍ້ 15, 16)
15. ພະທຳເອຊາອີໄດ້ເວົ້າເຖິງພອນຫຍັງແດ່?
15 ຂໍໃຫ້ຄິດເຖິງຄຳສັນຍາຕ່າງໆທີ່ເຮົາໄດ້ພິຈາລະນາໄປແລ້ວ ຄຳສັນຍາເຫຼົ່ານັ້ນສະແດງໃຫ້ເຫັນແນວໃດວ່າຈະມີອຸທິຍານໃນອະນາຄົດ. ແຜ່ນດິນໂລກຈະມີແຕ່ຜູ້ຄົນທີ່ພະເຢໂຫວາອວຍພອນ. ຈະບໍ່ມີໃຜຕ້ອງຢ້ານວ່າຈະຖືກໂຈມຕີໂດຍສັດຫຼືຄົນອຳມະຫິດ. ຄົນທີ່ຕາບອດ ຫູໜວກ ແລະພິການຈະໄດ້ຮັບການປິ່ນປົວ. ຜູ້ຄົນຈະປຸກເຮືອນຕົວເອງ ແລະປູກພືດຜັກໝາກໄມ້ຂອງຕົວເອງ. ເຂົາເຈົ້າຈະມີອາຍຸຍືນຍາວກວ່າຕົ້ນໄມ້. ສະນັ້ນ ຄຳພີໄບເບິນໃຫ້ຫຼັກຖານວ່າອຸທິຍານກຳລັງຈະມາ. ແຕ່ບາງຄົນທີ່ເຮົາລົມນຳອາດບອກເຮົາວ່າຄຳພະຍາກອນເຫຼົ່ານີ້ບໍ່ໄດ້ໝາຍຄວາມວ່າຈະມີອຸທິຍານເທິງໂລກ. ເຈົ້າຈະບອກເຂົາເຈົ້າແນວໃດ? ເຈົ້າຈະຍົກເຫດຜົນຫຍັງທີ່ວ່າຈະມີອຸທິຍານແທ້ໆໃນໂລກນີ້? ພະເຍຊູຜູ້ຊາຍທີ່ຍິ່ງໃຫຍ່ທີ່ສຸດທີ່ເຄີຍມີຊີວິດຢູ່ໃນໂລກໄດ້ໃຫ້ເຫດຜົນທີ່ໜັກແໜ້ນໃນເລື່ອງນີ້!
ເຈົ້າຈະຢູ່ກັບເຮົາໃນອຸທິຍານ!
16, 17. ພະເຍຊູຢູ່ໃສຕອນທີ່ເວົ້າເຖິງອຸທິຍານ?
16 ເຖິງວ່າພະເຍຊູບໍ່ໄດ້ເຮັດຜິດ ແຕ່ເພິ່ນກໍຍັງຖືກຕັດສິນປະຫານຊີວິດເທິງເສົາທໍລະມານພ້ອມກັບອາດຊະຍາກອນຄົນຢິວ 2 ຄົນທີ່ຢູ່ທັງສອງຂ້າງຂອງເພິ່ນ. ອາດຊະຍາກອນຄົນໜຶ່ງຮູ້ວ່າພະເຍຊູເປັນກະສັດ ລາວຈຶ່ງຂໍວ່າ: “ພະອົງເຈົ້າຂ້າ ເມື່ອພະອົງຈະມາໃນແຜ່ນດິນຂອງພະອົງ ຂໍເຊີນລະນຶກຄຶດຮອດຂ້າພະເຈົ້າເຖີ້ນ.” (ລືກາ 23:39-42) ສັນຍານີ້ທີ່ພະເຍຊູໄດ້ເຮັດກັບອາດຊະຍາກອນມີຄວາມໝາຍຕໍ່ອະນາຄົດຂອງເຈົ້ານຳ. ຄຳເວົ້າຂອງພະເຍຊູບັນທຶກໄວ້ໃນລືກາ 23:43. ຜູ້ຊ່ຽວຊານດ້ານຄຳພີໄບເບິນບາງຄົນບອກວ່າປະໂຫຍກໃນພາສາເດີມຄວນຈະແປວ່າ: “ຈິງແທ້ເຮົາກ່າວແກ່ເຈົ້າວ່າ ໃນວັນນີ້ເຈົ້າຈະຢູ່ກັບເຮົາໃນທີ່ສຸກກະເສີມ [“ອຸທິຍານ,” ລ.ມ.].” ແຕ່ເຂົາເຈົ້າມີຄຳເຫັນທີ່ຕ່າງກັນໃນເລື່ອງຕຳແໜ່ງຂອງໝາຍຈຸດ (,) ຫຼືຍະຫວ່າງໃນປະໂຫຍກນີ້. ສະນັ້ນ ພະເຍຊູໝາຍເຖິງຫຍັງເມື່ອເວົ້າວ່າ: “ໃນວັນນີ້”?
17 ຫຼາຍພາສາໃນປັດຈຸບັນໃຊ້ໝາຍຈຸດຫຼືຍະຫວ່າງເພື່ອເຮັດໃຫ້ຄວາມໝາຍຂອງປະໂຫຍກແຈ້ງຂຶ້ນ. ແຕ່ສຳເນົາຄຳພີໄບເບິນພາສາເກັຣກທີ່ເກົ່າແກ່ທີ່ສຸດບາງສະບັບບໍ່ໄດ້ໃສ່ເຄື່ອງໝາຍວັກຕອນຢ່າງສະເໝີຕົ້ນສະເໝີປາຍ. ດັ່ງນັ້ນ ເຮົາອາດສົງໄສວ່າ ພະເຍຊູກຳລັງໝາຍຄວາມວ່າ: “ເຮົາກ່າວແກ່ເຈົ້າວ່າ ໃນວັນນີ້ເຈົ້າຈະຢູ່ກັບເຮົາໃນທີ່ສຸກກະເສີມ [“ອຸທິຍານ,” ລ.ມ.]”? ຫຼືໝາຍຄວາມວ່າ: “ເຮົາກ່າວແກ່ເຈົ້າໃນວັນນີ້ວ່າ ເຈົ້າຈະຢູ່ກັບເຮົາໃນທີ່ສຸກກະເສີມ [“ອຸທິຍານ,” ລ.ມ.]” ຜູ້ແປໃສ່ຍະຫວ່າງ ຫຼືໝາຍຈຸດກ່ອນຫຼືຫຼັງຄຳວ່າ: “ໃນວັນນີ້” ຕາມທີ່ເຂົາເຈົ້າຄິດເອງ ແລະເຮົາເຫັນການແບ່ງປະໂຫຍກສອງແບບນີ້ໃນຄຳພີໄບເບິນຫຼາຍສະບັບໃນປັດຈຸບັນ.
18, 19. ອັນໃດຊ່ວຍເຮົາໃຫ້ເຂົ້າໃຈຄວາມໝາຍຂອງພະເຍຊູ?
18 ແນວໃດກໍຕາມ ຂໍໃຫ້ຈື່ສິ່ງທີ່ພະເຍຊູບອກກັບລູກສິດກ່ຽວກັບການຕາຍຂອງເພິ່ນ. ເພິ່ນບອກວ່າ: “ບຸດມະນຸດຈະຢູ່ໃນທ້ອງດິນ 3 ວັນ 3 ຄືນ.” ແລະຍັງບອກອີກວ່າ: “ບຸດມະນຸດຈະເປັນທີ່ມອບໄວ້ໃນມືຄົນທັງຫຼາຍ ແລະເຂົາຈະໃຫ້ພະອົງຕາຍ ແລະໃນວັນທີ 3 ພະອົງຈະເປັນຄືນມາຈາກຕາຍ.” (ມັດທາຍ 12:40; 16:21; 17:22, 23; ມາລະໂກ 10:34) ອັກຄະສາວົກເປໂຕບອກວ່າເລື່ອງນີ້ເກີດຂຶ້ນແທ້. (ກິດຈະການ 10:39, 40) ດັ່ງນັ້ນ ພະເຍຊູບໍ່ໄດ້ເຂົ້າອຸທິຍານໃນມື້ທີ່ເພິ່ນກັບອາດຊະຍາກອນຕາຍ. ຄຳພີໄບເບິນບອກວ່າພະເຍຊູຢູ່ “ໃນຫຼຸມສົບ” ເກືອບເຖິງສາມມື້ກ່ອນທີ່ພະເຈົ້າຈະປຸກເພິ່ນໃຫ້ຟື້ນຄືນຈາກຕາຍ.—ກິດຈະການ 2:31, 32, ລ.ມ. * (ເບິ່ງໄຂເງື່ອນ)
19 ພະເຍຊູໃຊ້ສຳນວນ “ຈິງແທ້ເຮົາກ່າວແກ່ເຈົ້າໃນວັນນີ້” ເປັນຄຳນຳໜ້າຂອງສັນຍາທີ່ເພິ່ນເຮັດກັບອາດຊະຍາກອນ. ຜູ້ຄົນໃນສະໄໝໂມເຊມັກເວົ້າແບບນີ້. ມີເທື່ອໜຶ່ງໂມເຊເອງກໍຍັງເວົ້າວ່າ: “ຄຳທັງຫຼາຍທີ່ເຮົາສັ່ງແກ່ເຈົ້າໃນວັນນີ້ຈົ່ງຖືຮັກສາໄວ້ໃນໃຈຂອງເຈົ້າ.”—ພະບັນຍັດ 6:6; 7:11; 8:1, 19; 30:15
20. ມີຫຍັງອີກທີ່ຊ່ວຍໃຫ້ເຮົາເຂົ້າໃຈສິ່ງທີ່ພະເຍຊູເວົ້າ?
20 ນັກແປຄຳພີໄບເບິນຄົນໜຶ່ງເຊິ່ງເປັນຄົນໃນເຂດທີ່ພະເຍຊູເຄີຍຢູ່ບອກວ່າ: “ໃນຂໍ້ຄວາມນີ້ມີການເນັ້ນຄຳວ່າ ‘ວັນນີ້’ ແລະຄວນອ່ານວ່າ ‘ຈິງແທ້ເຮົາກ່າວແກ່ເຈົ້າໃນວັນນີ້ວ່າ ເຈົ້າຈະຢູ່ກັບເຮົາໃນທີ່ສຸກກະເສີມ [“ອຸທິຍານ,” ລ.ມ.]’ ຄຳສັນຍານີ້ເຮັດໃນວັນໜຶ່ງ ແຕ່ຈະເຮັດໃຫ້ສຳເລັດໃນອີກວັນໜຶ່ງ.” ລາວຍັງບອກອີກວ່າຄົນໃນເຂດນີ້ມັກເວົ້າແບບນີ້ແລະມີຄວາມໝາຍວ່າ “ໄດ້ສັນຍາໃນວັນໜຶ່ງແລະຈະເຮັດຕາມສັນຍາຢ່າງແນ່ນອນ.” ຄຳພີໄບເບິນສະບັບແປພາສາຊີເຣຍທີ່ຂຽນໃນສະຕະວັດທີ 5 ແປຂໍ້ນີ້ວ່າ: “ອາແມນ ຂ້ອຍບອກເຈົ້າໃນວັນນີ້ວ່າເຈົ້າຈະຢູ່ກັບຂ້ອຍໃນສວນເອເດນ.” ເຮົາທຸກຄົນຄວນຈະໄດ້ຮັບກຳລັງໃຈຈາກຄຳສັນຍານີ້.
21. ອາດຊະຍາກອນນັ້ນບໍ່ໄດ້ໄປໃສ ແລະຍ້ອນຫຍັງ?
21 ເມື່ອພະເຍຊູເວົ້າກັບອາດຊະຍາກອນກ່ຽວກັບອຸທິຍານ ເພິ່ນບໍ່ໄດ້ໝາຍເຖິງໄປສະຫວັນ. ເຮົາຮູ້ໄດ້ແນວໃດ? ເຫດຜົນໜຶ່ງກໍຄື ອາດຊະຍາກອນບໍ່ຮູ້ວ່າພະເຍຊູໄດ້ສັນຍາກັບອັກຄະສາວົກທີ່ສັດຊື່ໃຫ້ປົກຄອງຮ່ວມກັບເພິ່ນໃນສະຫວັນ. (ລືກາ 22:29) ອີກເຫດຜົນໜຶ່ງຄື ລາວບໍ່ຍັງໄດ້ຮັບບັບເຕມາເທື່ອ. (ໂຢຮັນ 3:3-6, 12) ສະນັ້ນ ເມື່ອພະເຍຊູສັນຍາກັບລາວ ເພິ່ນຕ້ອງໝາຍເຖິງອຸທິຍານເທິງແຜ່ນດິນໂລກ. ຫຼາຍປີຕໍ່ມາ ອັກຄະສາວົກໂປໂລເວົ້າກ່ຽວກັບນິມິດທີ່ລາວໄດ້ເຫັນຜູ້ຊາຍຄົນໜຶ່ງຖືກ “ຍົກຂຶ້ນໄປໃນທີ່ສຸກກະເສີມ [“ອຸທິຍານ,” ລ.ມ.]” ເຖິງວ່າໂປໂລກັບອັກຄະສາວົກຄົນອື່ນໆຖືກເລືອກໃຫ້ຮ່ວມປົກຄອງກັບພະເຍຊູໃນສະຫວັນ ແຕ່ໂປໂລເວົ້າເຖິງອຸທິຍານທີ່ຈະມີໃນອະນາຄົດ. * (ເບິ່ງໄຂເງື່ອນ) ອຸທິຍານນີ້ຈະຢູ່ແຜ່ນດິນໂລກບໍ? ເຈົ້າຈະຢູ່ໃນອຸທິຍານນັ້ນໄດ້ບໍ?
ສິ່ງທີ່ເຈົ້າຄາດຫວັງໄດ້
22, 23. ເຈົ້າສາມາດຄາດຫວັງຫຍັງໄດ້?
22 ຈື່ໄດ້ບໍວ່າດາວິດໄດ້ເວົ້າເຖິງເວລາທີ່ “ຄົນຊອບທຳທັງຫຼາຍຈະມີແຜ່ນດິນໄວ້.” (ຄຳເພງ 37:29; 2 ເປໂຕ 3:13) ດາວິດໝາຍເຖິງເວລາທີ່ທຸກຄົນໃນໂລກຈະເຊື່ອຟັງຫຼັກການອັນຊອບທຳຂອງພະເຈົ້າ. ຄຳພະຍາກອນໃນເອຊາອີ 65:22 ຂຽນວ່າ: “ວັນຄືນທັງຫຼາຍແຫ່ງພວກຂອງເຮົາຈະມີຫຼາຍທໍ່ວັນຄືນທັງຫຼາຍແຫ່ງກົກໄມ້.” ຂໍ້ນີ້ສະແດງວ່າຄົນທີ່ຮັບໃຊ້ພະເຢໂຫວາໃນໂລກໃໝ່ຂອງພະອົງຈະມີຊີວິດຍືນຍາວຫຼາຍພັນປີ. ເຈົ້າຄາດຫວັງແບບນັ້ນໄດ້ບໍ? ໄດ້ ເພາະຕາມຄຳປາກົດ 21:1-4 ພະເຈົ້າຈະອວຍພອນມະນຸດ ແລະພອນຢ່າງໜຶ່ງແມ່ນ “ຄວາມຕາຍຈະບໍ່ມີອີກຕໍ່ໄປ.”
23 ຄຳພີໄບເບິນສອນເລື່ອງອຸທິຍານຢ່າງຈະແຈ້ງ. ອາດາມກັບເອວາເສຍໂອກາດທີ່ຈະມີຊີວິດຕະຫຼອດໄປໃນອຸທິຍານ ແຕ່ແຜ່ນດິນໂລກຈະເປັນອຸທິຍານອີກເທື່ອໜຶ່ງ. ພະເຈົ້າຈະອວຍພອນຜູ້ຄົນໃນໂລກນີ້ຕາມທີ່ພະອົງສັນຍາໄວ້. ດາວິດບອກວ່າຄົນທີ່ອ່ອນນ້ອມຖ່ອມຕົວກັບຄົນຊອບທຳຈະໄດ້ຢູ່ໃນໂລກແລະມີຊີວິດຕະຫຼອດໄປ. ຄຳພະຍາກອນຕ່າງໆໃນພະທຳເອຊາອີຊ່ວຍເຮົາໃຫ້ເຂົ້າໃຈວ່າຈະມີເວລາທີ່ເຮົາຈະໄດ້ມີຄວາມສຸກກັບຊີວິດໃນໂລກທີ່ເປັນອຸທິຍານທີ່ສວຍງາມ. ນັ້ນຈະເກີດຂຶ້ນເມື່ອໃດ? ເມື່ອຄຳສັນຍາທີ່ພະເຍຊູໄດ້ເຮັດກັບອາດຊະຍາກອນສຳເລັດເປັນຈິງ. ເຈົ້າຈະໄດ້ຢູ່ໃນອຸທິຍານນັ້ນ. ເມື່ອເວລານັ້ນມາເຖິງ ຄຳເວົ້າຂອງພີ່ນ້ອງທີ່ເວົ້າຢູ່ການປະຊຸມໃຫຍ່ໃນປະເທດເກົາຫຼີກໍຈະເປັນຈິງທີ່ວ່າ: “ພົບກັນໃໝ່ໃນອຸທິຍານ!”
^ ຂໍ້ 18 ສາດສະດາຈານ ຊີ. ມາວິນ ແພັດ ຂຽນວ່າຜູ້ຊ່ຽວຊານດ້ານຄຳພີໄບເບິນຫຼາຍຄົນເຊື່ອວ່າເມື່ອພະເຍຊູເວົ້າວ່າ “ໃນວັນນີ້” ເພິ່ນໝາຍຄວາມວ່າ ເພິ່ນຈະຕາຍແລະເຂົ້າອຸທິຍານທັນທີເລີຍໃນມື້ນັ້ນ ຫຼືພາຍໃນ 24 ຊົ່ວໂມງ. ສາດສະດາຈານແພັດບອກວ່າ ຄຳເຫັນນີ້ບໍ່ສອດຄ່ອງກັບຂໍ້ອື່ນໆໃນຄຳພີໄບເບິນ ເຊັ່ນ: ຄຳພີໄບເບິນບອກວ່າຫຼັງຈາກພະເຍຊູຕາຍແລ້ວກໍຢູ່ໃນຫຼຸມຝັງສົບ ຈາກນັ້ນເພິ່ນຈຶ່ງຂຶ້ນສະຫວັນ.—ມັດທາຍ 12:40; ກິດຈະການ 2:31; ໂລມ 10:7
^ ຂໍ້ 21 ເບິ່ງບົດຄວາມ “ຄຳຖາມຈາກຜູ້ອ່ານ” ຢູ່ຫໍສັງເກດການ ສະບັບສຶກສາເດືອນທັນວາ 2018 (ພາສາໄທ).
