ໃຜມີອິດທິພົນຕໍ່ຄວາມຄິດຂອງເຈົ້າ?
“ເຊົາຮຽນແບບຄົນໃນໂລກນີ້.”—ໂລມ 12:2, ລ.ມ.
1, 2. (ກ) ພະເຍຊູຕອບແນວໃດຕອນທີ່ເປໂຕບອກໃຫ້ເພິ່ນອີ່ຕົນຕົວເອງ? (ເບິ່ງຮູບທຳອິດ) (ຂ) ເປັນຫຍັງພະເຍຊູຕອບແບບນັ້ນ?
ລູກສິດຂອງພະເຍຊູຮູ້ສຶກແປກໃຈ! ເຂົາເຈົ້າຄິດວ່າພະເຍຊູຈະກອບກູ້ເອກະລາດຂອງອິດສະລາແອນ ແຕ່ພະເຍຊູພັດບອກວ່າໃນອີກບໍ່ດົນເພິ່ນຈະປະສົບກັບຄວາມທຸກທໍລະມານແລະຕາຍ. ອັກຄະສາວົກເປໂຕບອກວ່າ “ອາຈານ ອີ່ຕົນຕົວເອງແດ່ ອາຈານຈະບໍ່ປະສົບເລື່ອງຮ້າຍໆແບບນັ້ນດອກ.” ພະເຍຊູພັດຕອບວ່າ: “ຢຸດໄດ້ແລ້ວຊາຕານ! ເຈົ້າກຳລັງຂັດຂວາງຂ້ອຍ ທີ່ເຈົ້າຄິດຢູ່ນີ້ບໍ່ແມ່ນຄວາມຄິດຂອງພະເຈົ້າ ແຕ່ເປັນຄວາມຄິດຂອງມະນຸດ.”—ມັດທາຍ 16:21-23, ລ.ມ.; ກິດຈະການ 1:6
2 ການທີ່ພະເຍຊູເວົ້າແບບນີ້ເຮັດໃຫ້ເຫັນແຈ້ງວ່າຄວາມຄິດຂອງພະເຢໂຫວາກັບຄວາມຄິດຂອງໂລກທີ່ຊາຕານປົກຄອງແຕກຕ່າງກັນ. (1 ໂຢຮັນ 5:19) ເປໂຕພະຍາຍາມໃຫ້ພະເຍຊູມີຄວາມຄິດທີ່ເຫັນແກ່ຕົວຄືກັບຫຼາຍຄົນໃນໂລກນີ້. ແຕ່ພະເຍຊູຮູ້ວ່າພະເຢໂຫວາຢາກໃຫ້ເພິ່ນກຽມພ້ອມທີ່ຈະປະສົບກັບຄວາມທຸກທໍລະມານແລະຕາຍໃນອີກບໍ່ດົນ. ຄຳຕອບຈະແຈ້ງຂອງພະເຍຊູສະແດງໃຫ້ເຫັນວ່າເພິ່ນຮັບເອົາຄວາມຄິດຂອງພະເຢໂຫວາແລະປະຕິເສດຄວາມຄິດຂອງຄົນໃນໂລກນີ້.
3. ເປັນຫຍັງຈຶ່ງບໍ່ງ່າຍທີ່ເຮົາຈະຄິດແບບພະເຢໂຫວາແລະບໍ່ຄິດແບບຜູ້ຄົນໃນໂລກ?
ເອເຟດ 2:2) ນອກຈາກນັ້ນ ຜູ້ຄົນທົ່ວໄປໃນໂລກມັກຄິດເຖິງແຕ່ຕົວເອງກ່ອນ ເຊິ່ງເຮົາອາດຖືກລໍ້ໃຈໃຫ້ຄິດຄືກັບເຂົາເຈົ້າ. ຍ້ອນແນວນັ້ນ ມັນຈຶ່ງບໍ່ງ່າຍທີ່ເຮົາຈະຄິດແບບພະເຢໂຫວາ ແຕ່ພັດງ່າຍທີ່ຈະຄິດແບບຜູ້ຄົນທົ່ວໄປໃນໂລກ.
3 ແລ້ວເຮົາເດ ເຮົາຄິດແບບພະເຢໂຫວາຫຼືຄິດແບບຜູ້ຄົນໃນໂລກ? ຍ້ອນເຮົາເປັນຄລິດສະຕຽນ ເຮົາຈຶ່ງພະຍາຍາມຫຼາຍແທ້ໆທີ່ຈະເຮັດໃນສິ່ງທີ່ພະເຢໂຫວາພໍໃຈ. ແຕ່ວິທີຄິດຂອງເຮົາເດ? ເຮົາພະຍາຍາມທີ່ຈະຄິດຄືກັບພະເຢໂຫວາ ຫຼືເບິ່ງເລື່ອງຕ່າງໆຄືກັບພະອົງເບິ່ງບໍ? ການເຮັດແບບນີ້ຕ້ອງອອກຄວາມພະຍາຍາມຫຼາຍ. ກົງກັນຂ້າມ ການຄິດຄືກັບຜູ້ຄົນທົ່ວໄປໃນໂລກເປັນເລື່ອງງ່າຍຫຼາຍ. ນີ້ອາດເປັນຍ້ອນນໍ້າໃຈຂອງໂລກມີຢູ່ອ້ອມຕົວເຮົາ. (4. (ກ) ຈະເກີດຫຍັງຂຶ້ນຖ້າເຮົາໃຫ້ໂລກມີອິດທິພົນຕໍ່ຄວາມຄິດຂອງເຮົາ? (ຂ) ເຮົາຈະຮຽນຫຍັງໃນບົດຄວາມນີ້?
4 ຖ້າເຮົາໃຫ້ໂລກມີອິດທິພົນຕໍ່ຄວາມຄິດຂອງເຮົາ ເຮົາກໍຈະເປັນຄືກັບຄົນທີ່ເຫັນແກ່ຕົວແລະຕ້ອງການຕັດສິນໃຈເອງວ່າອັນໃດຖືກອັນໃດຜິດ. (ມາລະໂກ 7:21, 22) ດັ່ງນັ້ນຈຶ່ງເປັນເລື່ອງສຳຄັນທີ່ເຮົາຕ້ອງຮຽນຮູ້ທີ່ຈະມີ “ຄວາມຄິດຂອງພະເຈົ້າ” ບໍ່ແມ່ນ “ຄວາມຄິດຂອງມະນຸດ.” ບົດຄວາມນີ້ຈະຊ່ວຍເຮົາໃຫ້ເຮັດແບບນັ້ນໄດ້. ເຮົາຈະມາເບິ່ງວ່າເປັນຫຍັງການເບິ່ງເລື່ອງຕ່າງໆຄືກັບພະເຢໂຫວາເບິ່ງບໍ່ໄດ້ຈຳກັດອິດສະຫຼະຫຼາຍເກີນໄປ ແຕ່ເປັນປະໂຫຍດ. ເຮົາຍັງຈະມາເບິ່ງວ່າເຮົາຈະຫຼີກລ່ຽງອິດທິພົນຈາກຄວາມຄິດແບບໂລກນີ້ໄດ້ແນວໃດ. ໃນບົດຄວາມຕໍ່ໄປ ເຮົາຈະຮຽນຮູ້ວ່າເຮົາຈະຮູ້ຄວາມຄິດຂອງພະເຢໂຫວາກ່ຽວກັບເລື່ອງຕ່າງໆໄດ້ແນວໃດແລະຈະຄິດຄືກັບພະອົງໄດ້ແນວໃດ.
ຄວາມຄິດຂອງພະເຢໂຫວາເປັນປະໂຫຍດຕໍ່ເຮົາ
5. ເປັນຫຍັງບາງຄົນບໍ່ຢາກໃຫ້ໃຜກໍຕາມມາມີອິດທິພົນຕໍ່ເຂົາເຈົ້າ?
5 ບາງຄົນບໍ່ຢາກໃຫ້ໃຜກໍຕາມມາມີອິດທິພົນຕໍ່ຄວາມຄິດຂອງເຂົາເຈົ້າ. ເຂົາເຈົ້າບອກວ່າ: “ຂ້ອຍຄິດເອງໄດ້” ເຊິ່ງອາດໝາຍຄວາມວ່າເຂົາເຈົ້າຕ້ອງການຕັດສິນໃຈເອົາເອງແລະຄິດວ່າຕົວເອງມີສິດທີ່ຈະເຮັດແບບນັ້ນ. ເຂົາເຈົ້າບໍ່ຢາກໃຫ້ຄົນອື່ນມາຄວບຄຸມຫຼືມາບັງຄັບໃຫ້ເຮັດຄືກັບຄົນອື່ນ. * (ເບິ່ງໄຂເງື່ອນ)
6. (ກ) ພະເຢໂຫວາໃຫ້ເຮົາມີອິດສະຫຼະແບບໃດ? (ຂ) ເຮົາມີອິດສະຫຼະທີ່ບໍ່ມີຂີດຈຳກັດບໍ?
6 ເຮົາໝັ້ນໃຈໄດ້ວ່າຖ້າເຮົາຍອມຮັບຄວາມຄິດຂອງພະເຢໂຫວາ ເຮົາກໍຍັງມີຄວາມຄິດເປັນຂອງຕົວເອງໄດ້. ໃນ 2 ໂກລິນໂທ 3:17 (ລ.ມ.) ບອກວ່າ: “ຄົນທີ່ໄດ້ຮັບພະລັງຂອງພະເຢໂຫວາກໍມີອິດສະຫຼະ.” ພະເຢໂຫວາໃຫ້ເຮົາມີອິດສະຫຼະທີ່ຈະເລືອກວ່າຢາກເປັນຄົນແບບໃດ. ເຮົາຍັງມີຄວາມມັກສ່ວນຕົວແລະເລືອກສິ່ງທີ່ເຮົາສົນໃຈໄດ້. ພະເຢໂຫວາສ້າງເຮົາມາແບບນີ້. ແຕ່ນີ້ກໍບໍ່ໄດ້ໝາຍຄວາມວ່າເຮົາຈະມີອິດສະຫຼະທີ່ບໍ່ມີຂີດຈຳກັດ. (ອ່ານ 1 ເປໂຕ 2:16) ຕອນທີ່ເຮົາຢາກຮູ້ວ່າອັນໃດຖືກອັນໃດຜິດ ພະເຢໂຫວາຢາກໃຫ້ເຮົາໃຊ້ຄຳພີໄບເບິນຊ່ວຍຊີ້ນຳ. ນີ້ຈຳກັດອິດສະຫຼະຫຼາຍເກີນໄປບໍ ຫຼືເປັນປະໂຫຍດຕໍ່ເຮົາ?
7, 8. ການທີ່ພະເຢໂຫວາຢາກໃຫ້ເຮົາເບິ່ງເລື່ອງຕ່າງໆຄືກັບພະອົງເປັນສິ່ງທີ່ເຂັ້ມງວດຫຼາຍເກີນໄປບໍ? ຂໍໃຫ້ຍົກຕົວຢ່າງ.
7 ເຮົາອາດຍົກຕົວຢ່າງປຽບທຽບໄດ້ແບບນີ້: ພໍ່ແມ່ພະຍາຍາມສອນລູກໃຫ້ເປັນຄົນດີ. ເຂົາເຈົ້າອາດ
ສອນລູກໃຫ້ເປັນຄົນສັດຊື່ ດຸໝັ່ນ ແລະເປັນຫ່ວງຄົນອື່ນ. ນີ້ບໍ່ໄດ້ເຂັ້ມງວດຫຼາຍເກີນໄປ ແຕ່ພໍ່ແມ່ກຳລັງກຽມລູກໃຫ້ພ້ອມເພື່ອຈະປະສົບຜົນສຳເລັດໃນຊີວິດ. ເມື່ອລູກໃຫຍ່ຂຶ້ນແລະອອກຈາກເຮືອນ ລູກກໍຈະມີອິດສະຫຼະເລືອກເອງໄດ້. ຖ້າລູກເລືອກເຮັດຕາມຫຼັກສິນລະທຳທີ່ພໍ່ແມ່ສອນ ກໍເປັນໄປໄດ້ວ່າລູກຈະຕັດສິນໃຈໄດ້ຢ່າງຖືກຕ້ອງຫຼາຍຂຶ້ນ ເຊິ່ງຫຼີກລ່ຽງບັນຫາແລະຄວາມກັງວົນຫຼາຍຢ່າງ ແລະບໍ່ຕ້ອງມາເສຍໃຈພາຍຫຼັງ.ພະເຢໂຫວາເຊີນເຮົາໃຫ້ຮຽນທີ່ຈະເບິ່ງເລື່ອງຕ່າງໆຄືກັບພະອົງເບິ່ງແລະໃຊ້ຊີວິດຕາມມາດຕະຖານຂອງພະອົງ
8 ຄືກັບພໍ່ແມ່ທີ່ດີ ພະເຢໂຫວາກໍຢາກໃຫ້ລູກຂອງພະອົງມີຊີວິດທີ່ມີຄວາມສຸກຫຼາຍທີ່ສຸດເທົ່າທີ່ເປັນໄປໄດ້. (ເອຊາອີ 48:17, 18) ດັ່ງນັ້ນ ພະອົງຈຶ່ງສອນຫຼັກສິນລະທຳພື້ນຖານໃຫ້ເຮົາແລະວິທີທີ່ເຮົາປະຕິບັດຕໍ່ຄົນອື່ນ. ພະເຢໂຫວາເຊີນເຮົາໃຫ້ຮຽນທີ່ຈະເບິ່ງເລື່ອງຕ່າງໆຄືກັບພະອົງເບິ່ງແລະໃຊ້ຊີວິດຕາມມາດຕະຖານຂອງພະອົງ. ນີ້ບໍ່ໄດ້ເຂັ້ມງວດຫຼາຍເກີນໄປ ແຕ່ຊ່ວຍເຮົາໃຫ້ຄິດຮອບຄອບຫຼາຍຂຶ້ນແລະຕັດສິນໃຈດີຂຶ້ນ. (ຄຳເພງ 92:5; ສຸພາສິດ 2:1-5; ເອຊາອີ 55:9) ເຮົາຍັງສາມາດເລືອກສິ່ງທີ່ມັກແລະຕັດສິນໃຈໄດ້ຢ່າງຖືກຕ້ອງ ເຊິ່ງຈະເຮັດໃຫ້ເຮົາມີຄວາມສຸກ. (ຄຳເພງ 1:2, 3) ເມື່ອເຮົາຄິດຄືກັບພະເຢໂຫວາຄິດ ເຮົາຈະໄດ້ຮັບປະໂຫຍດຫຼາຍແທ້ໆ.
ຄວາມຄິດຂອງພະເຢໂຫວາເໜືອກວ່າ
9, 10. ອັນໃດສະແດງໃຫ້ເຫັນວ່າຄວາມຄິດຂອງພະເຢໂຫວາເໜືອກວ່າຄວາມຄິດຂອງຄົນໃນໂລກ?
9 ອີກເຫດຜົນໜຶ່ງທີ່ເຮົາຕ້ອງມີຄວາມຄິດຄືກັບພະເຢໂຫວາຫຼາຍຂຶ້ນກໍຄື ຄວາມຄິດຂອງພະເຢໂຫວາເໜືອກວ່າຄວາມຄິດຂອງຄົນໃນໂລກ. ຄົນໃນໂລກມັກຈະໃຫ້ຄຳແນະນຳວ່າການປະພຶດແບບໃດຖືກຕ້ອງ ເຮັດແນວໃດຄອບຄົວຈຶ່ງຈະມີຄວາມສຸກ ຈະເຮັດແນວໃດຈຶ່ງຈະປະສົບຜົນສຳເລັດໃນວຽກອາຊີບ ແລະເລື່ອງອື່ນໆໃນຊີວິດ. ແຕ່ສ່ວນຫຼາຍແລ້ວ ຄຳແນະນຳເຫຼົ່ານີ້ຂັດກັບຄວາມຄິດຂອງພະເຢໂຫວາ. ເຊັ່ນ: ຄົນໃນໂລກມັກສະໜັບສະໜູນຜູ້ຄົນໃຫ້ເຮັດຕາມຄວາມຕ້ອງການຂອງຕົວເອງເທົ່ານັ້ນ ແລະຍັງເຮັດໃຫ້ເບິ່ງຄືວ່າການເຮັດຜິດສິນລະທຳເປັນເລື່ອງທີ່ຍອມຮັບໄດ້. ບາງເທື່ອກໍແນະນຳວ່າຜົວເມຍຈະມີຄວາມສຸກຫຼາຍກວ່າຖ້າແຍກກັນຢູ່ຫຼືຢ່າຮ້າງກັນຍ້ອນເຫດຜົນເລັກໆໜ້ອຍໆ. ຄຳແນະນຳນີ້ຂັດກັບສິ່ງທີ່ຄຳພີໄບເບິນສອນ. ແຕ່ໃນທຸກມື້ນີ້ຄຳແນະນຳຂອງຄົນໃນໂລກໃຊ້ໄດ້ຜົນກວ່າຄຳແນະນຳໃນຄຳພີໄບເບິນບໍ?
10 ພະເຍຊູບອກວ່າ: “ສະຕິປັນຍາທີ່ແທ້ຈິງກໍເຫັນໄດ້ຈາກຜົນທີ່ປາກົດອອກມາ.” (ມັດທາຍ 11:19, ລ.ມ.) ເຖິງວ່າໂລກຈະກ້າວໜ້າຫຼາຍທາງດ້ານເຕັກໂນໂລຊີ ແຕ່ມັນກໍບໍ່ສາມາດແກ້ໄຂບັນຫາໃຫຍ່ໆທີ່ເຮັດໃຫ້ເຮົາບໍ່ມີຄວາມສຸກ ເຊັ່ນ: ສົງຄາມ ການແບ່ງແຍກເຊື້ອຊາດ ແລະອາຊະຍາກຳ. ນອກຈາກນັ້ນ ຄົນໃນໂລກຍັງເບິ່ງວ່າການເຮັດຜິດສິນລະທຳທາງເພດເປັນເລື່ອງທີ່ຍອມຮັບໄດ້. ແຕ່ຫຼາຍຄົນພັດບອກວ່າການເຮັດຜິດສິນລະທຳທາງເພດທຳລາຍຄອບຄົວ ທຳລາຍສຸຂະພາບ ແລະມີຜົນທີ່ບໍ່ດີຕາມມາ. ແລ້ວຄຳ ແນະນຳຂອງພະເຢໂຫວາເດ? ຄລິດສະຕຽນທີ່ຄິດຄືກັບພະເຢໂຫວາມີຄອບຄົວທີ່ມີຄວາມສຸກຫຼາຍກວ່າ ມີສຸຂະພາບດີກວ່າ ແລະມີສັນຕິສຸກກັບພີ່ນ້ອງທົ່ວໂລກ. (ເອຊາອີ 2:4; ກິດຈະການ 10:34, 35; 1 ໂກລິນໂທ 6:9-11) ນີ້ພິສູດໃຫ້ເຫັນຢ່າງຈະແຈ້ງວ່າຄວາມຄິດຂອງພະເຢໂຫວາເໜືອກວ່າຄວາມຄິດຂອງຄົນໃນໂລກ.
11. ໃຜມີອິດທິພົນຕໍ່ຄວາມຄິດຂອງໂມເຊ ແລະຜົນເປັນແນວໃດ?
11 ຜູ້ຮັບໃຊ້ທີ່ສັດຊື່ຂອງພະເຢໂຫວາໃນອະດີດຮູ້ດີວ່າຄວາມຄິດຂອງພະອົງເໜືອກວ່າແທ້ໆ ຕົວຢ່າງເຊັ່ນ: ເຖິງວ່າໂມເຊໄດ້ຮັບການສອນດ້ວຍ “ວິຊາປັນຍາແຫ່ງຊາວເອຄີບໂຕທັງໝົດ” ແຕ່ລາວຮູ້ວ່າສະຕິປັນຍາແທ້ແມ່ນມາຈາກພະເຢໂຫວາ. (ກິດຈະການ 7:22; ຄຳເພງ 90:12) ດັ່ງນັ້ນ ລາວຈຶ່ງບອກພະອົງວ່າ: “ຂໍເຊີນພະອົງໂຜດສຳແດງທາງຂອງພະອົງໃຫ້ຂ້ານ້ອຍເຫັນ.” (ອົບພະຍົບ 33:13) ຍ້ອນໂມເຊໃຫ້ພະເຢໂຫວາມີອິດທິພົນຕໍ່ຄວາມຄິດຂອງລາວ ພະອົງຈຶ່ງໃຊ້ລາວໃນວິທີທີ່ໜ້າງຶດງໍ້ເພື່ອເຮັດໃຫ້ຈຸດປະສົງຂອງພະອົງສຳເລັດ ແລະພະອົງໃຫ້ກຽດລາວໂດຍເອີ້ນລາວວ່າເປັນຄົນໜຶ່ງທີ່ມີຄວາມເຊື່ອທີ່ຍິ່ງໃຫຍ່.—ເຫບເລີ 11:24-27
12. ໂປໂລໄດ້ອີງໃສ່ຫຍັງໃນການຕັດສິນໃຈ?
12 ອັກຄະສາວົກໂປໂລເປັນຄົນທີ່ສະຫຼາດ ມີການສຶກສາທີ່ດີ ແລະລາວເວົ້າໄດ້ຢ່າງໜ້ອຍສອງພາສາ. (ກິດຈະການ 5:34; 21:37, 39; 22:2, 3) ແຕ່ລາວບໍ່ໄດ້ເຮັດຕາມທີ່ໂລກສອນ ລາວພັດຕັດສິນໃຈໂດຍອີງໃສ່ຄຳສອນຈາກຄຳພີໄບເບິນ. (ອ່ານກິດຈະການ 17:2; 1 ໂກລິນໂທ 2:6, 7, 13) ຜົນກໍຄື ລາວປະສົບຜົນສຳເລັດຫຼາຍໃນວຽກຮັບໃຊ້ແລະລໍຖ້າລາງວັນທີ່ຄົງຢູ່ຕະຫຼອດໄປ.—2 ຕີໂມເຕ 4:8
13. ການປ່ຽນຄວາມຄິດເພື່ອຈະເບິ່ງສິ່ງຕ່າງໆຄືກັບພະເຢໂຫວາເບິ່ງເປັນຄວາມຮັບຜິດຊອບຂອງໃຜ?
13 ເຫັນໄດ້ແຈ້ງວ່າຄວາມຄິດຂອງພະເຈົ້າເໜືອກວ່າຄວາມຄິດຂອງໂລກຫຼາຍ. ຖ້າເຮົາເຮັດຕາມມາດຕະຖານຂອງພະເຈົ້າ ເຮົາຈະປະສົບຜົນສຳເລັດແລະມີຄວາມສຸກແທ້. ແຕ່ພະເຢໂຫວາຈະບໍ່ບັງຄົບເຮົາໃຫ້ຄິດຄືກັບພະອົງ. “ທາດທີ່ສັດຊື່ແລະສຸຂຸມ” ບໍ່ໄດ້ຄວບຄຸມຄວາມຄິດຂອງເຮົາແລະຜູ້ເຖົ້າແກ່ກໍບໍ່ໄດ້ເຮັດແບບນັ້ນຄືກັນ. (ມັດທາຍ 24:45, ລ.ມ.; 2 ໂກລິນໂທ 1:24) ການປ່ຽນຄວາມຄິດເພື່ອຈະເບິ່ງສິ່ງຕ່າງໆຄືກັບພະເຢໂຫວາເບິ່ງເປັນຄວາມຮັບຜິດຊອບຂອງເຮົາ. ເຮົາຈະເຮັດແບບນັ້ນໄດ້ແນວໃດ?
ຢ່າໃຫ້ໂລກມີອິດທິພົນຕໍ່ເຈົ້າ
14, 15. (ກ) ເພື່ອຈະຄິດຄືກັບພະເຢໂຫວາ ເຮົາຕ້ອງຄິດຕຶກຕອງເລື່ອງຫຍັງ? (ຂ) ເປັນຫຍັງເຮົາບໍ່ຍອມໃຫ້ຄວາມຄິດຂອງໂລກເຂົ້າມາໃນຄວາມຄິດຂອງເຮົາ? ຂໍໃຫ້ຍົກຕົວຢ່າງ.
14 ໂລມ 12:2 (ລ.ມ.) ບອກວ່າ: “ເຊົາຮຽນແບບຄົນໃນໂລກນີ້ ແຕ່ໃຫ້ປ່ຽນແປງຕົວເອງໂດຍປ່ຽນຄວາມຄິດຂອງເຈົ້າໃໝ່ ເພື່ອເຈົ້າຈະໄດ້ກວດເບິ່ງໃຫ້ແນ່ໃຈວ່າອັນໃດຄືສິ່ງທີ່ພະເຈົ້າຕ້ອງການໃຫ້ເຮົາເຮັດເຊິ່ງເປັນສິ່ງທີ່ດີ ສົມບູນ ແລະເຮັດໃຫ້ພະອົງພໍໃຈ.” ຂໍ້ຄຳພີນີ້ສອນເຮົາວ່າບໍ່ວ່າສິ່ງໃດຈະມີອິດທິພົນຕໍ່ຄວາມຄິດຂອງເຮົາກ່ອນຮຽນຮູ້ຄວາມຈິງ ເຮົາກໍປ່ຽນຄວາມຄິດແລະຄິດຄືກັບພະເຢໂຫວາຫຼາຍຂຶ້ນໄດ້. ເຖິງວ່າກຳມະພັນແລະປະສົບການໃນຊີວິດຈະມີຜົນຕໍ່ວິທີຄິດຂອງເຮົາໃນລະດັບໜຶ່ງ ແຕ່ຄວາມຄິດຂອງເຮົາປ່ຽນແປງໄດ້. ສ່ວນຫຼາຍມັນຈະປ່ຽນຕາມສິ່ງທີ່ເຮົາເລືອກຈະຄິດ. ຖ້າເຮົາຄິດຕຶກຕອງກ່ຽວກັບເລື່ອງຄວາມຄິດຂອງພະເຢໂຫວາ ເຮົາກໍຈະພິສູດດ້ວຍຕົວເອງວ່າຄວາມຄິດຂອງພະອົງຖືກຕ້ອງສະເໝີ ແລະຈະເຮັດໃຫ້ເຮົາຢາກເບິ່ງເລື່ອງຕ່າງໆຄືກັບພະອົງເບິ່ງ.
15 ແຕ່ເພື່ອເຮົາຈະຄິດຄືກັບພະເຢໂຫວາ ເຮົາຕ້ອງ “ເຊົາຮຽນແບບຄົນໃນໂລກນີ້.” ນີ້ໝາຍຄວາມວ່າເຮົາຕ້ອງເຊົາເບິ່ງ ເຊົາອ່ານ ແລະເຊົາຟັງສິ່ງໃດກໍຕາມຂັດກັບຄວາມຄິດຂອງພະເຈົ້າ. ເພື່ອຊ່ວຍເຮົາໃຫ້ເຂົ້າໃຈວ່າເລື່ອງນີ້ສຳຄັນສໍ່າໃດ ຂໍໃຫ້ມາເບິ່ງຕົວຢ່າງນີ້: ຄົນໜຶ່ງຢາກມີສຸຂະພາບທີ່ດີຂຶ້ນ ລາວອາດເລືອກກິນອາຫານທີ່ດີຕໍ່ສຸຂະພາບ. ແຕ່ຄວາມພະຍາຍາມທັງໝົດຂອງລາວຈະບໍ່ມີຄວາມໝາຍຫຍັງ ຖ້າລາວກິນອາຫານທີ່ບູດເນົ່າໄປນຳ! ຄ້າຍຄືກັນ ຖ້າເຮົາຍອມໃຫ້ຄວາມຄິດຂອງໂລກເຂົ້າມາໃນຄວາມຄິດຂອງເຮົາ ຄວາມພະຍາຍາມທັງໝົດທີ່ເຮົາຮຽນຮູ້ຄວາມຄິດຂອງພະເຢໂຫວາກໍຈະບໍ່ມີຄວາມໝາຍ.
16. ເຮົາຕ້ອງປົກປ້ອງຕົວເອງຈາກຫຍັງ?
16 ເຮົາຈະຫຼີກລ່ຽງຄວາມຄິດແບບໂລກທັງໝົດໄດ້ບໍ? ບໍ່ໄດ້. ຍ້ອນເຮົາຢູ່ໃນໂລກນີ້ ເຮົາຈຶ່ງໄດ້ຮັບຄວາມຄິດບາງຢ່າງຂອງໂລກ. (1 ໂກລິນໂທ 5:9, 10) ແມ່ນແຕ່ຕອນທີ່ເຮົາໄປປະກາດ ເຮົາຈະໄດ້ຍິນຄວາມຄິດເຫັນທີ່ບໍ່ດີແລະຄວາມເຊື່ອທີ່ບໍ່ຖືກຕ້ອງ. ເຖິງວ່າເຮົາຈະຫຼີກລ່ຽງຄວາມຄິດທີ່ຜິດໆເຫຼົ່ານັ້ນບໍ່ໄດ້ທັງໝົດ ແຕ່ເຮົາກໍບໍ່ຈຳເປັນຕ້ອງເກັບມາຄິດຫຼືເຫັນດີກັບຄວາມຄິດແບບນັ້ນ. ຄືກັບພະເຍຊູ ເຮົາຄວນຟ້າວກຳຈັດຄວາມຄິດແບບຊາຕານອອກໄປ. ຖ້າເຮົາຫຼີກລ່ຽງຄວາມຄິດແບບໂລກຢ່າງສຸດຄວາມສາມາດ ເຮົາກໍຈະປົກປ້ອງຕົວເອງໄດ້.—ອ່ານສຸພາສິດ 4:23
17. ເຮົາຕ້ອງເຮັດຫຍັງເພື່ອຈະຫຼີກລ່ຽງຄວາມຄິດແບບໂລກໂດຍບໍ່ຈຳເປັນ?
17 ຕົວຢ່າງ: ເຮົາຕ້ອງລະວັງເມື່ອເລືອກຄົນທີ່ຈະມາເປັນໝູ່. ຄຳພີໄບເບິນເຕືອນວ່າ ຖ້າເຮົາໄປສະໜິດກັບຄົນທີ່ບໍ່ໄດ້ນະມັດສະການພະເຢໂຫວາ ເຮົາກໍຈະເລີ່ມຄິດຄືກັບເຂົາເຈົ້າ. (ສຸພາສິດ 13:20; 1 ໂກລິນໂທ 15:12, 32, 33) ເຮົາຍັງຕ້ອງລະວັງເມື່ອເລືອກຄວາມບັນເທີງ. ຖ້າເຮົາປະຕິເສດຄວາມບັນເທີງທີ່ສົ່ງເສີມເລື່ອງວິວັດທະນາການ ຄວາມຮຸນແຮງ ແລະການຜິດສິນລະທຳ ເຮົາກໍຈະຫຼີກລ່ຽງແນວຄິດທີ່ບໍ່ດີທີ່ເປັນພິດຕໍ່ຄວາມຄິດຂອງເຮົາເຊິ່ງ “ຂັດກັບຄວາມຮູ້ກ່ຽວກັບພະເຈົ້າ.”—2 ໂກລິນໂທ 10:5, ລ.ມ.
ເຮົາສອນລູກບໍ່ໃຫ້ເບິ່ງຄວາມບັນເທີງທີ່ເປັນອັນຕະລາຍບໍ? (ເບິ່ງຂໍ້ 18, 19)
18, 19. (ກ) ເປັນຫຍັງເຮົາຕ້ອງລະວັງຄວາມຄິດຂອງໂລກທີ່ນຳສະເໜີແບບແອບແຝງ? (ຂ) ມີຄຳຖາມຫຍັງແດ່ທີ່ເຮົາຕ້ອງຖາມຕົວເອງ ແລະຍ້ອນຫຍັງ?
ມັດທາຍ 22:36-39) ນອກຈາກນັ້ນ ຍັງມີກາຕູນ ໜັງ ແລະປຶ້ມສຳລັບເດັກນ້ອຍ ເຖິງວ່າສ່ວນຫຼາຍອາດເປັນທີ່ຍອມຮັບໄດ້ ແຕ່ມັນສາມາດເຮັດໃຫ້ເດັກນ້ອຍຍອມຮັບການເຮັດຜິດສິນລະທຳໂດຍບໍ່ຮູ້ຕົວ.
18 ເຮົາຕ້ອງເບິ່ງໃຫ້ອອກແລະບໍ່ຮັບຄວາມຄິດແບບໂລກ ເມື່ອມີການນຳສະເໜີແບບແອບແຝງ. ຕົວຢ່າງ: ບາງລາຍງານຂ່າວຖືກນຳສະເໜີໃນແບບທີ່ສົ່ງເສີມແນວຄວາມຄິດທາງການເມືອງ ແລະຂ່າວສານບາງເລື່ອງກໍສົ່ງເສີມເປົ້າໝາຍແລະຄວາມສຳເລັດແບບໂລກ. ໜັງບາງເລື່ອງຫຼືປຶ້ມບາງຫົວກໍສົ່ງເສີມຄວາມຄິດທີ່ວ່າ “ຂ້ອຍຕ້ອງມາກ່ອນ” ຫຼື “ຄອບຄົວຕ້ອງມາກ່ອນ” ແລະເຮັດໃຫ້ເບິ່ງຄືວ່າຄວາມຄິດແບບນີ້ມີເຫດຜົນ ໜ້າສົນໃຈ ແລະເຖິງກັບເປັນສິ່ງທີ່ຖືກຕ້ອງ. ແຕ່ຄວາມຄິດເຫຼົ່ານີ້ຂັດກັບຄຳພີໄບເບິນທີ່ບອກວ່າ ເຮົາແລະຄອບຄົວຈະມີຄວາມສຸກແທ້ໆຖ້າເຮົາຮັກພະເຢໂຫວາຫຼາຍກວ່າທຸກສິ່ງ. (19 ນີ້ບໍ່ໄດ້ໝາຍຄວາມວ່າເປັນເລື່ອງຜິດທີ່ເຮົາຈະມ່ວນກັບຄວາມບັນເທີງທີ່ດີ. ແຕ່ເຮົາຄວນຈະຖາມຕົວເອງວ່າ: ‘ຂ້ອຍເບິ່ງອອກບໍວ່າຄວາມບັນເທີງນີ້ມີຄວາມຄິດແບບໂລກຢູ່? ຂ້ອຍໄດ້ປົກປ້ອງທັງລູກກັບຕົວເອງຈາກບາງເລື່ອງທີ່ມາທາງໂທລະທັດແລະສິ່ງທີ່ອ່ານບໍ? ຂ້ອຍໄດ້ຊ່ວຍລູກໃຫ້ເບິ່ງເລື່ອງຕ່າງໆຄືກັບພະເຢໂຫວາບໍເພື່ອລູກຈະບໍ່ໄດ້ຮັບອິດທິພົນຈາກຄວາມຄິດຂອງໂລກທີ່ເຂົາເຈົ້າໄດ້ຍິນແລະໄດ້ເຫັນ?’ ຖ້າເຮົາເບິ່ງອອກວ່າຄວາມຄິດຂອງພະເຈົ້າກັບຄວາມຄິດຂອງໂລກແຕກຕ່າງກັນ ເຮົາກໍຈະ “ເຊົາຮຽນແບບຄົນໃນໂລກນີ້.”
ໃຜມີອິດທິພົນຕໍ່ຄວາມຄິດຂອງເຈົ້າໃນຕອນນີ້?
20. ອັນໃດເປັນສິ່ງທີ່ກຳນົດວ່າໃຜມີອິດທິພົນຕໍ່ຄວາມຄິດຂອງເຈົ້າ?
20 ເຮົາຕ້ອງຈື່ໄວ້ວ່າມີ 2 ແຫຼ່ງຂໍ້ມູນເທົ່ານັ້ນຄື ແຫຼ່ງໜຶ່ງມາຈາກພະເຢໂຫວາ ແລະອີກແຫຼ່ງໜຶ່ງມາຈາກຊາຕານແລະໂລກຂອງມັນ. ໃຜມີອິດທິພົນຕໍ່ຄວາມຄິດຂອງເຈົ້າ? ຄຳຕອບຄືເຈົ້າຮັບຂໍ້ມູນມາຈາກໃສ. ຖ້າເຮົາຮັບຄວາມຄິດຂອງໂລກ ໂລກກໍຈະມີອິດທິພົນຕໍ່ຄວາມຄິດຂອງເຮົາ ແລະເຮົາກໍຈະຄິດແລະເຮັດແບບເຫັນແກ່ຕົວ. ດັ່ງນັ້ນ ເປັນເລື່ອງສຳຄັນທີ່ເຮົາຈຳເປັນຕ້ອງລະວັງທີ່ຈະເລືອກສິ່ງທີ່ເຮົາເບິ່ງ ອ່ານ ຟັງ ແລະຄິດ.
21. ເຮົາຈະຮຽນຫຍັງໃນບົດຄວາມຕໍ່ໄປ?
21 ໃນບົດຄວາມນີ້ ເຮົາໄດ້ຮຽນໄປແລ້ວວ່າເພື່ອຈະຄິດຄືກັບພະເຢໂຫວາ ເຮົາຕ້ອງຫຼີກລ່ຽງຄວາມຄິດຂອງໂລກ. ແຕ່ເຮົາຕ້ອງຄິດຕຶກຕອງກ່ຽວກັບຄວາມຄິດຂອງພະເຈົ້າເພື່ອເຮົາຈະຄິດຄືກັບພະອົງຫຼາຍຂຶ້ນ. ໃນບົດຄວາມຕໍ່ໄປເຮົາຈະຮຽນຮູ້ວ່າເຮົາຈະເຮັດແບບນັ້ນໄດ້ແນວໃດ.
^ ຂໍ້ 5 ທີ່ຈິງ ແມ່ນແຕ່ຄົນທີ່ມີອິດສະຫຼະຫຼາຍທີ່ສຸດກໍຍັງໄດ້ຮັບອິດທິພົນຈາກຄົນອື່ນ. ຕົວຢ່າງ: ບໍ່ວ່າເຮົາຈະຄິດເລື່ອງທີ່ເລິກເຊິ່ງເຊັ່ນ: ຊີວິດເກີດຂຶ້ນມາໄດ້ແນວໃດ ຫຼືເລື່ອງງ່າຍໆເຊັ່ນ: ຈະນຸ່ງເຄື່ອງຊຸດໃດ ຄົນອື່ນກໍມີອິດທິພົນຕໍ່ເຮົາບໍ່ຫຼາຍກໍໜ້ອຍ. ແຕ່ເຮົາເລືອກໄດ້ວ່າຈະໃຫ້ໃຜມີອິດທິພົນຕໍ່ເຮົາ.