ສະມາຊິກຄະນະກຳມະການປົກຄອງຄົນໃໝ່
ຕອນເຊົ້າຂອງວັນພຸດທີ 24 ມັງກອນ 2018 ສະມາຊິກຄອບຄົວເບເທນຢູ່ສະຫະລັດອາເມຣິກາ ແລະການາດາໄດ້ຟັງຄຳປະກາດທີ່ພິເສດວ່າ: ພີ່ນ້ອງ ເຄັນເນັດ ຄຸກ ຈູເນຍ ໄດ້ເປັນສະມາຊິກໃໝ່ໃນຄະນະກຳມະການປົກຄອງຂອງພະຍານພະເຢໂຫວາ.
ພີ່ນ້ອງ ເຄັນເນັດ ຄຸກເກີດແລະເຕີບໃຫຍ່ໃນເຂດທາງໃຕ້ຂອງພາກກາງລັດເພັນຊິນເວເນຍ ປະເທດສະຫະລັດອາເມຣິກາ. ກ່ອນຮຽນຈົບຊັ້ນມັດທະຍົມປາຍ ລາວໄດ້ຮຽນຄວາມຈິງຈາກໝູ່ຢູ່ໂຮງຮຽນແລະຮັບບັບເຕມາໃນວັນທີ 7 ມິຖຸນາ 1980. ລາວເລີ່ມເປັນໄພໂອເນຍປະຈຳໃນວັນທີ 1 ກັນຍາ 1982. ຫຼັງຈາກເປັນໄພໂອເນຍ 2 ປີ ລາວກໍຖືກເຊີນໃຫ້ເຂົ້າມາຮັບໃຊ້ຢູ່ເບເທນໃນວໍຄິວ ລັດນິວຢອກຕັ້ງແຕ່ວັນທີ 12 ຕຸລາ 1984.
ໃນໄລຍະ 25 ປີທຳອິດ ພີ່ນ້ອງ ເຄັນເນັດ ຄຸກເຮັດວຽກຫຼາຍຢ່າງໃນໂຮງພິມແລະສຳນັກງານເບເທນ. ລາວແຕ່ງດອງກັບພີ່ນ້ອງເຈມີໃນປີ 1996 ແລະພີ່ນ້ອງເຈມີກໍເຂົ້າມາຮັບໃຊ້ໃນເບເທນນຳກັນຢູ່ວໍຄິວ. ໃນເດືອນທັນວາປີ 2009 ພີ່ນ້ອງ ເຄັນເນັດ ຄຸກກັບເມຍຖືກຍ້າຍໄປຢູ່ສູນການສຶກສາວັອດທາວເວີໃນແພັດເທີສັນ ລັດນິວຢອກ. ພີ່ນ້ອງ ເຄັນເນັດ ຄຸກເຮັດວຽກຢູ່ພະແນກຕອບຈົດໝາຍ. ຫຼັງຈາກທີ່ຍ້າຍກັບໄປຢູ່ວໍຄິວບໍ່ດົນ ເຂົາເຈົ້າກໍຖືກຍ້າຍໄປຢູ່ບຸກລິນ ລັດນິວຢອກໃນເດືອນເມສາ 2016 ແລະ 5 ເດືອນຕໍ່ມາເຂົາເຈົ້າກໍຍ້າຍໄປຢູ່ວໍວິກ ລັດນິວຢອກເຊິ່ງເປັນສຳນັກງານໃຫຍ່. ໃນເດືອນມັງກອນ ປີ 2017 ພີ່ນ້ອງ ເຄັນເນັດ ຄຸກໄດ້ຮັບການແຕ່ງຕັ້ງໃຫ້ເປັນຜູ້ຊ່ວຍຄະນະກຳມະການຝ່າຍການຂຽນຂອງຄະນະກຳມະການປົກຄອງ.