ບົດຄວາມສຶກສາທີ 3
ເຈົ້າຈະປົກປ້ອງຫົວໃຈຂອງເຈົ້າໄດ້ແນວໃດ?
“ຈົ່ງຮັກສາໃຈຂອງເຈົ້າໄວ້ດີກວ່າສິ່ງທັງປວງທີ່ເຈົ້າຮັກສາໄວ້ນັ້ນ.”—ສຸພາ. 4:23
ເພງ 36 ປົກປ້ອງຫົວໃຈຂອງເຈົ້າ
ໃຈຄວາມສຳຄັນ *
1-3. (ກ) ເປັນຫຍັງພະເຢໂຫວາຈຶ່ງຮັກຊາໂລໂມນ ແລະລາວໄດ້ຮັບພອນຫຍັງແດ່? (ຂ) ຄຳຖາມຫຍັງທີ່ເຮົາຈະໄດ້ຮັບຕອບໃນບົດຄວາມນີ້?
ຊາໂລໂມນໄດ້ຂຶ້ນເປັນກະສັດປົກຄອງອິດສະລາແອນຕອນທີ່ລາວຍັງໜຸ່ມ. ໃນໄລຍະທຳອິດຂອງການປົກຄອງ ພະເຢໂຫວາໄດ້ມາຖາມລາວທາງຄວາມຝັນວ່າ: ‘ເຈົ້າຢາກໃຫ້ເຮົາໂຜດປະທານສິ່ງໃດແກ່ເຈົ້າ ເຈົ້າຈົ່ງຂໍສິ່ງນັ້ນເຖີ້ນ.’ ລາວຕອບວ່າ: “ຂ້ານ້ອຍເປັນຄົນໜຸ່ມ. ຂ້ານ້ອຍບໍ່ຮູ້ຈັກເຂົ້າໄປບໍ່ຮູ້ຈັກອອກມາ [“ບໍ່ມີປະສົບການ,” ລ.ມ.] . . . ເຫດສັນນີ້ຂໍພະອົງໂຜດປະທານໃຈ [ທີ່ເຊື່ອ] ຟັງໃຫ້ຂ້າໃຊ້ຂອງພະອົງ.” (1 ກະ. 3:5-10) ການຂໍໃຫ້ມີ ‘ໃຈທີ່ເຊື່ອຟັງ’ ສະແດງວ່າລາວເປັນຄົນຖ່ອມແທ້ໆ! ພະເຢໂຫວາຈຶ່ງຮັກຊາໂລໂມນຫຼາຍອີ່ຫຼີ! (2 ຊາມ. 12:24) ພະເຢໂຫວາພໍໃຈຫຼາຍຈົນບໍ່ພຽງແຕ່ຕອບຄຳຂໍຂອງລາວ ແຕ່ຍັງໃຫ້ລາວ “ມີປັນຍາແລະມີຄວາມເຂົ້າໃຈ.”—1 ກະ. 3:12, ລ.ມ.
2 ຕອນທີ່ຊາໂລໂມນຍັງສັດຊື່ ລາວໄດ້ຮັບພອນຢ່າງຫຼວງຫຼາຍ. ລາວໄດ້ຮັບກຽດໃຫ້ສ້າງວິຫານ “ສຳລັບນາມຊື່ພະເຢໂຫວາພະເຈົ້າຂອງຍິດສະລາເອນ.” (1 ກະ. 8:20) ລາວກາຍເປັນຄົນທີ່ມີຊື່ສຽງໃນເລື່ອງການໄດ້ຮັບສະຕິປັນຍາຈາກພະເຈົ້າ. ພະເຈົ້າໄດ້ດົນໃຈໃຫ້ຂຽນສິ່ງທີ່ລາວເວົ້າໄວ້ໃນ 3 ພະທຳຂອງຄຳພີໄບເບິນເຊິ່ງພະທຳໜຶ່ງຄື ສຸພາສິດ.
3 ພະທຳສຸພາສິດສະບັບແປໂລກໃໝ່ເວົ້າເຖິງຫົວໃຈປະມານຮ້ອຍເທື່ອ. ຕົວຢ່າງໃນສຸພາສິດ 4:23 ບອກວ່າ: “ຈົ່ງຮັກສາໃຈຂອງເຈົ້າໄວ້ດີກວ່າສິ່ງທັງປວງທີ່ເຈົ້າຮັກສາໄວ້ນັ້ນ.” ໃນຂໍ້ນີ້ຄຳວ່າໃຈໝາຍເຖິງຫຍັງ? ເຮົາຈະໄດ້ຮັບຄຳຕອບໃນບົດຄວາມນີ້ ແລະເຮົາຍັງມີ 2 ຄຳຖາມທີ່ຈະໄດ້ຄຳຕອບຄື ຊາຕານພະຍາຍາມເອົາຄວາມຄິດຂອງມັນເຊິ່ງຄືກັບເຊື້ອພະຍາດມາໃສ່ໃນໃຈຂອງເຮົາແນວໃດ? ແລະເຮົາຈະປົກປ້ອງຫົວໃຈຂອງເຮົາໄດ້ແນວໃດ? ເພື່ອເຮົາຈະສາມາດສັດຊື່ຕໍ່ພະເຢໂຫວາໄດ້ສະເໝີ ເຮົາຕ້ອງເຂົ້າໃຈຄຳຕອບທີ່ສຳຄັນເຫຼົ່ານີ້.
“ໃຈຂອງເຈົ້າ” ໝາຍເຖິງຫຍັງ?
4-5. (ກ) ສຸພາສິດ 4:23 ຊ່ວຍເຮົາໃຫ້ເຂົ້າໃຈຄວາມໝາຍຂອງຄຳວ່າ: “ໃຈ” ແນວໃດ? (ຂ) ຕົວຢ່າງເລື່ອງສຸຂະພາບຮ່າງກາຍສອນຫຍັງເຮົາກ່ຽວກັບການປົກປ້ອງຫົວໃຈ?
4 ໃນສຸພາສິດ 4:23 ຄຳວ່າ: “ໃຈ” ແມ່ນຕົວຕົນທີ່ແທ້ຈິງທີ່ຢູ່ພາຍໃນເຊິ່ງໝາຍເຖິງຄວາມຄິດ ຄວາມຮູ້ສຶກ ແຮງກະຕຸ້ນ ແລະຄວາມຕ້ອງການ ບໍ່ແມ່ນສິ່ງທີ່ເຫັນພາຍນອກ.
5 ໃຫ້ເຮົາມາເບິ່ງວ່າເລື່ອງສຸຂະພາບຮ່າງກາຍສອນຫຍັງເຮົາກ່ຽວກັບການປົກປ້ອງຫົວໃຈ. ທຳອິດ ເພື່ອຈະມີຮ່າງກາຍແຂງແຮງ ເຮົາຕ້ອງເລືອກກິນອາຫານທີ່ດີຕໍ່ສຸຂະພາບແລະອອກກຳລັງກາຍເປັນປະຈຳ. ຄ້າຍຄືກັນ ເພື່ອຈະຮັກສາຫົວໃຈໄວ້ໃຫ້ດີ ເຮົາຕ້ອງອ່ານຄຳພີໄບເບິນ ປຶ້ມຕ່າງໆຂອງອົງການ ແລະສະແດງຄວາມເຊື່ອຂອງເຮົາ. ເຮົາສະແດງຄວາມເຊື່ອໂດຍໃຊ້ສິ່ງທີ່ເຮົາຮຽນແລະເວົ້າເລື່ອງຄວາມເຊື່ອຂອງເຮົາ. (ໂລມ 10:8-10; ຢໂກ. 2:26) ສອງ ເມື່ອເບິ່ງຈາກທາງນອກ ເຮົາອາດຄິດວ່າເຮົາມີສຸຂະພາບດີ ແຕ່ທີ່ຈິງທາງໃນເຮົາອາດຕິດເຊື້ອພະຍາດແລ້ວ. ຄ້າຍຄືກັນ ເມື່ອເບິ່ງຈາກການເຮັດກິດຈະກຳກ່ຽວກັບຄວາມເຊື່ອ ເຮົາອາດຄິດວ່າເຮົາມີຄວາມເຊື່ອທີ່ເຂັ້ມແຂງ ແຕ່ຄວາມຄິດທີ່ບໍ່ດີອາດກຳລັງເຕີບໃຫຍ່ໃນຕົວເຮົາ. (1 ໂກ. 10:12; ຢໂກ. 1:14, 15) ເຮົາຕ້ອງຈື່ສະເໝີວ່າຊາຕານຢາກໃຫ້ເຮົາຕິດເຊື້ອຄວາມຄິດຂອງມັນ. ຊາຕານພະຍາຍາມເຮັດແບບນັ້ນແນວໃດ? ແລະເຮົາຈະປົກປ້ອງຕົວເອງແນວໃດ?
ຊາຕານພະຍາຍາມເອົາຄວາມຄິດຂອງມັນໃສ່ໃນໃຈຂອງເຮົາແນວໃດ?
6. ຊາຕານຢາກໃຫ້ເຮົາເປັນຄົນແນວໃດ ແລະເພື່ອຈະບັນລຸເປົ້າໝາຍນັ້ນມັນໃຊ້ວິທີການຫຍັງ?
6 ຊາຕານຢາກໃຫ້ເຮົາເຫັນແກ່ຕົວແລະຂັດຂືນຕໍ່ມາດຕະຖານຂອງພະເຢໂຫວາຄືກັນກັບມັນ. ແຕ່ມັນບໍ່ສາມາດບັງຄັບໃຫ້ເຮົາຄິດແລະເຮັດຄືກັນກັບມັນໄດ້. ດັ່ງນັ້ນ ມັນພະຍາຍາມບັນລຸເປົ້າໝາຍຂອງມັນໃນວິທີອື່ນໆ ເຊັ່ນ: ມັນໄດ້ໃຫ້ຄົນທີ່ຄິດຄືກັບມັນມາຢູ່ອ້ອມຮອບເຮົາ. (1 ໂຢ. 5:19) ມັນຫວັງວ່າເຮົາຈະເລືອກໃຊ້ເວລາຢູ່ກັບຄົນເຫຼົ່ານັ້ນ ທັງໆທີ່ເຮົາຮູ້ຢູ່ແລ້ວວ່າການຄົບຫາທີ່ບໍ່ດີຈະເຮັດໃຫ້ວິທີທີ່ເຮົາຄິດແລະການກະທຳຂອງເຮົາ “ຊົ່ວໄປ.” (1 ໂກ. 15:33) ວິທີການນີ້ໃຊ້ໄດ້ຜົນກັບກະສັດຊາໂລໂມນ. ລາວແຕ່ງດອງກັບຜູ້ຍິງທີ່ບໍ່ໄດ້ນະມັດສະການພະເຢໂຫວາ. ຜູ້ຍິງເຫຼົ່ານັ້ນມີອິດທິພົນຕໍ່ລາວ ແລະໄດ້ ‘ຊັກຊວນໃຈລາວໃຫ້ຫຼົງຜິດ’ ແລ້ວປະຖິ້ມພະເຢໂຫວາ.—1 ກະ. 11:3
ເຮົາຈະປົກປ້ອງຫົວໃຈຂອງເຮົາຈາກຄວາມພະຍາຍາມຂອງຊາຕານທີ່ຈະເອົາຄວາມຄິດຂອງມັນໃສ່ໃຈຂອງເຮົາແນວໃດ? (ເບິ່ງຂໍ້ 7) *
7. ຊາຕານໃຊ້ວິທີການຫຍັງອີກເພື່ອເຜີຍແຜ່ຄວາມຄິດຂອງມັນ ແລະເປັນຫຍັງເຮົາຕ້ອງລະວັງ?
7 ຊາຕານໃຊ້ໜັງແລະລາຍການໂທລະທັດເພື່ອເຜີຍແຜ່ຄວາມຄິດຂອງມັນ. ມັນຮູ້ວ່າການເລົ່າເລື່ອງບໍ່ພຽງແຕ່ໃຫ້ຄວາມມ່ວນຊື່ນກັບເຮົາ ແຕ່ຍັງສອນເຮົາໃຫ້ຮູ້ວິທີຄິດ ຮູ້ສຶກ ແລະເຮັດ. ພະເຍຊູເອງກໍໃຊ້ການເລົ່າເລື່ອງເພື່ອສອນ. ຕົວຢ່າງ: ເພິ່ນເລົ່າເລື່ອງຊາຍຊາວສະມາລີແລະລູກຊາຍທີ່ໜີອອກຈາກບ້ານເຊິ່ງຜານມູນມໍລະດົກຈົນໝົດ. (ມັດ. 13:34; ລືກາ 10:29-37; 15:11-32) ຄົນທີ່ຄິດແບບຊາຕານອາດໃຊ້ການເລົ່າເລື່ອງເພື່ອເອົາຄວາມຄິດຂອງຊາຕານໃສ່ໃນໃຈເຮົາ. ເຮົາຕ້ອງເປັນຄົນສົມເຫດສົມຜົນ ເພາະວ່າໜັງແລະລາຍການໂທລະທັດສາມາດໃຫ້ຄວາມຮູ້ແລະຄວາມມ່ວນຊື່ນໄດ້ ແລະບໍ່ແມ່ນວ່າທຸກເລື່ອງຈະມີຄວາມຄິດຂອງຊາຕານເຈືອປົນ. ແຕ່ເຮົາຕ້ອງລະວັງເມື່ອເຮົາເລືອກຄວາມບັນເທີງ ຂໍໃຫ້ຖາມຕົວເອງວ່າ: ‘ໜັງຫຼືລາຍການໂທລະທັດນີ້ສອນຂ້ອຍໃຫ້ເຮັດທຸກຢ່າງຕາມຄວາມຕ້ອງການຂອງຮ່າງກາຍບໍ?’ (ຄລາ. 5:19-21; ເອເຟ. 2:1-3) ເຈົ້າຈະເຮັດແນວໃດຖ້າເຈົ້າເຫັນວ່າລາຍການໜຶ່ງສົ່ງເສີມແນວຄິດຂອງຊາຕານ? ແນ່ນອນ ເຈົ້າຄົງຢາກຈະຫຼີກໜີມັນຄືກັບໜີພະຍາດຕິດຕໍ່ແມ່ນບໍ!
8. ພໍ່ແມ່ສາມາດເຮັດຫຍັງໄດ້ແດ່ເພື່ອຊ່ວຍລູກໃຫ້ປົກປ້ອງຫົວໃຈ?
8 ພໍ່ແມ່ມີໜ້າທີ່ຮັບຜິດຊອບທີ່ຈະຕ້ອງປົກປ້ອງລູກບໍ່ໃຫ້ຊາຕານເອົາຄວາມຄິດຂອງມັນມາໃສ່ໃນໃຈຂອງລູກ. ແນ່ນອນ ເຈົ້າຈະເຮັດທຸກສິ່ງເພື່ອປົກປ້ອງລູກຈາກພະຍາດຕິດຕໍ່. ເຈົ້າຈະອະນາໄມເຮືອນແລະກຳຈັດສິ່ງທີ່ອາດເຮັດໃຫ້ລູກຕິດເຊື້ອພະຍາດ. ຄ້າຍຄືກັນ ເຈົ້າຕ້ອງປົກປ້ອງລູກຈາກໜັງ ລາຍການໂທລະທັດ ເກມ ແລະເວັບໄຊທີ່ມີເຊື້ອຄວາມຄິດຂອງຊາຕານເຈືອປົນ. ພະເຢໂຫວາມອບສິດໃຫ້ເຈົ້າປົກປ້ອງຫົວໃຈຂອງລູກ. (ສຸພາ. 1:8; ເອເຟ. 6:1, 4) ດັ່ງນັ້ນ ເຈົ້າບໍ່ຕ້ອງຢ້ານທີ່ຈະຕັ້ງກົດໃນຄອບຄົວຕາມມາດຕະຖານຂອງຄຳພີໄບເບິນ. ໃຫ້ບອກລູກໃຫ້ຮູ້ວ່າອັນໃດເບິ່ງໄດ້ອັນໃດເບິ່ງບໍ່ໄດ້ ແລະອະທິບາຍໃຫ້ລູກເຂົ້າໃຈວ່າເປັນຫຍັງຈຶ່ງຕັ້ງກົດ. (ມັດ. 5:37) ເມື່ອລູກໃຫຍ່ຂຶ້ນ ໃຫ້ຝຶກຝົນເຂົາເຈົ້າໃຫ້ຮູ້ຈັກໄຈ້ແຍກສິ່ງທີ່ຖືກສິ່ງທີ່ຜິດຕາມມາດຕະຖານຂອງພະເຢໂຫວາ. (ເຫບ. 5:14) ຂໍໃຫ້ຈື່ວ່າ ລູກຂອງເຈົ້າຈະຮຽນຮູ້ຈາກສິ່ງທີ່ເຈົ້າເຮັດຫຼາຍກວ່າສິ່ງທີ່ເຈົ້າເວົ້າ.—ບັນຍັດ. 6:6, 7; ໂລມ 2:21
9. ຄວາມຄິດໜຶ່ງທີ່ຊາຕານສົ່ງເສີມແມ່ນຫຍັງ ແລະເປັນຫຍັງຈຶ່ງອັນຕະລາຍ?
9 ຊາຕານຍັງພະຍາຍາມເອົາຄວາມຄິດຂອງມັນໃສ່ໃນໃຈຂອງເຮົາທີ່ວ່າ ເຮົາຄວນໄວ້ໃຈສະຕິປັນຍາຂອງມະນຸດຫຼາຍກວ່າຄວາມຄິດຂອງພະເຢໂຫວາ. (ໂກໂລ. 2:8) ຄວາມຄິດໜຶ່ງທີ່ຊາຕານສົ່ງເສີມຄື ການຢາກເປັນຄົນຮັ່ງມີເປັນສິ່ງສຳຄັນທີ່ສຸດໃນຊີວິດ. ຄົນທີ່ຄິດແບບນັ້ນອາດຈະເປັນຄົນຮັ່ງມີຫຼືທຸກຍາກກໍໄດ້. ບໍ່ວ່າຈະເປັນແນວໃດ ເຂົາເຈົ້າກໍສ່ຽງອັນຕະລາຍ. ຍ້ອນຫຍັງ? ຍ້ອນວ່າເຂົາເຈົ້າອາດຈະສົນໃຈແຕ່ຫາເງິນໃຫ້ໄດ້ຫຼາຍໆຈົນຍອມເສຍສຸຂະພາບ ສາຍສຳພັນກັບຄອບຄົວ ແລະແມ່ນແຕ່ສາຍສຳພັນກັບພະເຈົ້າເພື່ອຈະໄດ້ຕາມເປົ້າໝາຍນັ້ນ. (1 ຕີໂມ. 6:10) ເຮົາຮູ້ຄຸນຄ່າທີ່ພະເຢໂຫວາພໍ່ໃນສະຫວັນໃຫ້ເຮົາເບິ່ງເລື່ອງເງິນຄຳຢ່າງເໝາະສົມ.—ຜູ້ປ. 7:12; ລືກາ 12:15
ເຮົາຈະປົກປ້ອງຫົວໃຈຂອງເຮົາໄດ້ແນວໃດ?
ຄືກັບຄົນຍາມແລະຄົນເຝົ້າປະຕູໃນສະໄໝກ່ອນ ເຈົ້າຕ້ອງຕື່ນຕົວຢູ່ສະເໝີແລະເຮັດທຸກສິ່ງເພື່ອບໍ່ໃຫ້ສິ່ງທີ່ບໍ່ດີເຂົ້າມາໃນໃຈຂອງເຈົ້າ (ເບິ່ງຂໍ້ 10-11) *
10-11. (ກ) ເຮົາຕ້ອງເຮັດຫຍັງເພື່ອປົກປ້ອງຫົວໃຈຂອງເຮົາໄວ້? (ຂ) ຄົນຍາມໃນສະໄໝບູຮານເຮັດວຽກຫຍັງ ແລະສະຕິຮູ້ສຶກຜິດຊອບຂອງເຮົາເຮັດວຽກຄືກັບຄົນຍາມແນວໃດ?
10 ເພື່ອເຮົາຈະປົກປ້ອງຫົວໃຈໄວ້ໄດ້ ເຮົາຕ້ອງຮູ້ຈັກອັນຕະລາຍແລະລົງມືປົກປ້ອງທັນທີ. ໃນສຸພາສິດ 4:23 ຄຳວ່າ: “ຮັກສາ” ຫຼືປົກປ້ອງເຮັດໃຫ້ເຮົາຄິດເຖິງວຽກຂອງຄົນຍາມ. ໃນສະໄໝຊາໂລໂມນປົກຄອງ ຄົນຍາມຈະຢືນຢູ່ເທິງກຳແພງເມືອງແລະຮ້ອງສົ່ງສັນຍານຖ້າເຫັນວ່າມີອັນຕະລາຍ. ເມື່ອຄິດຕາມພາບນີ້ຊ່ວຍເຮົາໃຫ້ເຂົ້າໃຈວ່າ ເຮົາຕ້ອງເຮັດແນວໃດເພື່ອປ້ອງກັນບໍ່ໃຫ້ຄວາມຄິດຂອງຊາຕານເຂົ້າມາໃນໃຈຂອງເຮົາ.
11 ໃນສະໄໝບູຮານ ຄົນຍາມເຮັດວຽກໃກ້ຊິດກັບຜູ້ເຝົ້າປະຕູ. (2 ຊາມ. 18:24-26) ທັງສອງເຮັດວຽກນຳກັນເພື່ອເຮັດໃຫ້ແນ່ໃຈວ່າປະຕູປິດໄວ້ແຈບດີເມື່ອສັດຕູມາໃກ້. (ນເຫ. 7:1-3) ສະຕິຮູ້ສຶກຜິດຊອບຂອງເຮົາທີ່ໄດ້ຮັບການຝຶກຝົນຕາມຫຼັກພະຄຳພີ * ເຮັດໜ້າທີ່ຄືກັບຄົນຍາມ ມັນຈະເຕືອນເຮົາເມື່ອຊາຕານພະຍາຍາມເອົາຄວາມຄິດທີ່ບໍ່ດີເຂົ້າມາໃນຫົວໃຈຂອງເຮົາ ເຊິ່ງຈະສົ່ງຜົນຕໍ່ຄວາມຄິດ ຄວາມຮູ້ສຶກ ແຮງກະຕຸ້ນ ຫຼືຄວາມຕ້ອງການຂອງເຮົາ. ເມື່ອສະຕິຮູ້ສຶກຜິດຊອບຂອງເຮົາສົ່ງສັນຍານເຕືອນ ເຮົາຕ້ອງຟັງແລະອັດປະຕູຫົວໃຈ.
12-13. ເຮົາອາດຖືກລໍ້ໃຈໃຫ້ເຮັດຫຍັງ ແຕ່ເຮົາຄວນເຮັດແນວໃດ?
12 ຂໍໃຫ້ຄິດເຖິງຕົວຢ່າງທີ່ສະແດງໃຫ້ເຫັນເຖິງວິທີທີ່ເຮົາຈະປົກປ້ອງຕົວເອງໄວ້ຈາກຄວາມຄິດຂອງຊາຕານ. ພະເຢໂຫວາສອນເຮົາວ່າ: “ຢ່າລົມກັນໃນເລື່ອງເຫຼົ່ານີ້ເລີຍຄື ການຜິດສິນລະທຳທາງເພດ ແລະການກະທຳທີ່ບໍ່ສະອາດທຸກຮູບແບບ.” (ເອເຟ. 5:3, ລ.ມ.) ແຕ່ເຮົາຈະເຮັດແນວໃດຖ້າໝູ່ຢູ່ບ່ອນເຮັດວຽກຫຼືໂຮງຮຽນເລີ່ມເວົ້າກ່ຽວກັບການຜິດສິນລະທຳທາງເພດ? ເຮົາຮູ້ແລ້ວວ່າເຮົາຄວນ “ປະຕິເສດຄວາມປະໝາດເສຍ [“ການເຮັດຊົ່ວ,” ລ.ມ.] ແລະຄວາມຄຶດຢາກໄດ້ສິ່ງຂອງໂລກ.” (ຕິໂຕ 2:12) ສະຕິຮູ້ສຶກຜິດຊອບຂອງເຮົາເຊິ່ງເປັນຄືກັບຄົນຍາມອາດຈະສົ່ງສັນຍານເຕືອນໄພໃຫ້ເຮົາ. (ໂລມ 2:15) ແຕ່ເຮົາຈະຟັງສັນຍານນັ້ນບໍ? ກົງກັນຂ້າມ ເຮົາອາດຈະຖືກລໍ້ໃຈໃຫ້ຟັງຫຼືເບິ່ງຮູບທີ່ເຂົາເຈົ້າກຳລັງເບິ່ງຢູ່. ແຕ່ນີ້ເປັນເວລາທີ່ຈະຕ້ອງອັດປະຕູເມືອງໂດຍປ່ຽນເລື່ອງເວົ້າຫຼືຍ່າງໜີ.
13 ເຮົາຕ້ອງກ້າຫານເພື່ອຕ້ານທານຄວາມກົດດັນຈາກໝູ່ທີ່ເຮັດໃຫ້ເຮົາຄິດຫຼືເຮັດສິ່ງທີ່ບໍ່ດີ. ເຮົາແນ່ໃຈໄດ້ວ່າພະເຢໂຫວາເຫັນຄວາມພະຍາຍາມຂອງເຮົາ ແລະພະອົງຈະເຮັດໃຫ້ເຮົາເຂັ້ມແຂງແລະມີສະຕິປັນຍາເພື່ອຕ້ານທານຄວາມຄິດແບບຊາຕານ. (2 ຂ່າວ. 16:9; ເອຊາ. 40:29; ຢໂກ. 1:5) ແຕ່ຍັງມີຫຍັງອີກບໍທີ່ເຮົາເຮັດໄດ້ເພື່ອຮັກສາຫົວໃຈຂອງເຮົາ?
ປົກປ້ອງຫົວໃຈຕໍ່ໆໄປ
14-15. (ກ) ເຮົາຕ້ອງເປີດຫົວໃຈຮັບເອົາຫຍັງ ແລະເຮົາຈະເຮັດແນວໃດເພື່ອຮັບເອົາຄວາມຄິດນັ້ນ? (ຂ) ສຸພາສິດ 4:20-22 ຊ່ວຍເຮົາໃຫ້ໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນໄດ້ແນວໃດ? (ເບິ່ງຂອບ “ ວິທີຄິດຕຶກຕອງ”).
14 ເພື່ອປົກປ້ອງຫົວໃຈຂອງເຮົາ ເຮົາຕ້ອງບໍ່ພຽງແຕ່ປິດບໍ່ຮັບເອົາສິ່ງທີ່ບໍ່ດີ ແຕ່ເຮົາຕ້ອງເປີດຮັບເອົາສິ່ງທີ່ດີນຳ. ຂໍໃຫ້ນຶກພາບເຖິງເມືອງທີ່ມີກຳແພງອີກເທື່ອໜຶ່ງ. ຜູ້ເຝົ້າປະຕູບໍ່ພຽງແຕ່ປິດປະຕູເພື່ອບໍ່ໃຫ້ສັດຕູບຸກເຂົ້າເມືອງ ແຕ່ຈະຕ້ອງເປີດປະຕູເພື່ອໃຫ້ອາຫານແລະເຄື່ອງໃຊ້ຂອງສອຍເຂົ້າມາ. ຖ້າບໍ່ເປີດປະຕູນີ້ເລີຍ ປະຊາຊົນກໍຈະອຶດຫິວຕາຍ. ຄ້າຍຄືກັນ ເຮົາກໍຕ້ອງເປີດຮັບເອົາຄວາມຄິດຂອງພະເຈົ້າເປັນປະຈຳ.
15 ຄວາມຄິດຂອງພະເຢໂຫວາຖືກຂຽນໄວ້ໃນຄຳພີໄບເບິນ ດັ່ງນັ້ນ ທຸກເທື່ອທີ່ເຮົາອ່ານ ເຮົາກໍຍອມໃຫ້ຄວາມຄິດຂອງພະເຢໂຫວາສົ່ງຜົນຕໍ່ວິທີທີ່ເຮົາຄິດ ຄວາມຮູ້ສຶກ ແລະການກະທຳຂອງເຮົາ. ເຮົາຈະໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນໄດ້ແນວໃດ? ການອະທິດຖານເປັນເລື່ອງສຳຄັນ. ພີ່ນ້ອງຍິງຄົນໜຶ່ງບອກວ່າ: “ກ່ອນຂ້ອຍອ່ານຄຳພີໄບເບິນ ຂ້ອຍໄດ້ອະທິດຖານເຖິງພະເຢໂຫວາ ຂໍພະອົງຊ່ວຍໃຫ້ຂ້ອຍ ‘ເຫັນສິ່ງທີ່ຍອດຢ້ຽມຢ່າງຊັດເຈນ’ ໃນພະຄຳພີ.” (ເພງ. 119:18, ລ.ມ.) ເຮົາຍັງຕ້ອງຄິດຕຶກຕອງສິ່ງທີ່ເຮົາໄດ້ອ່ານ. ເມື່ອເຮົາອະທິດຖານ ອ່ານ ແລະຄິດຕຶກຕອງ ພະຄຳຂອງພະເຈົ້າກໍຈະເຂົ້າໄປ ‘ພາຍໃນໃຈເຮົາ’ ແລະເຮົາກໍຈະເລີ່ມຮັກຄວາມຄິດຂອງພະເຢໂຫວາ.—ອ່ານສຸພາສິດ 4:20-22; ເພງ. 119:97
16. ການເບິ່ງລາຍການໂທລະທັດ JW ເປັນປະໂຫຍດຕໍ່ເຮົາແນວໃດ?
16 ອີກວິທີໜຶ່ງທີ່ຈະຍອມໃຫ້ຄວາມຄິດຂອງພະເຈົ້າສົ່ງຜົນຕໍ່ເຮົາຄື ການເບິ່ງລາຍການໂທລະທັດ JW ແຕ່ລະເດືອນ. ຜົວເມຍຄູ່ໜຶ່ງບອກວ່າ: “ລາຍການໂທລະທັດປະຈຳເດືອນເປັນການຕອບຄຳອະທິດຖານຂອງເຮົາແທ້ໆ! ລາຍການນີ້ເສີມຄວາມເຊື່ອເຮົາໃຫ້ເຂັ້ມແຂງແລະໃຫ້ກຳລັງໃຈເຮົາ ເມື່ອເຮົາຮູ້ສຶກເສົ້າຫຼືເຫງົາ. ເຮົາມັກຟັງມິວສິກວິດີໂອເລື້ອຍໆຢູ່ເຮືອນ. ເຮົາຟັງຕອນແຕ່ງກິນ ເຮັດອະນາໄມ ແລະພັກຜ່ອນກິນນ້ຳຊາ.” ລາຍການເຫຼົ່ານີ້ຊ່ວຍປົກປ້ອງຫົວໃຈຂອງເຮົາ ແລະຍັງສອນເຮົາໃຫ້ຄິດຄືກັບພະເຢໂຫວາແລະຕ້ານທານຄວາມຄິດຂອງຊາຕານ.
17-18. (ກ) ຕາມທີ່ຂຽນໄວ້ໃນ 1 ກະສັດ 8:61 ເມື່ອເຮົານຳໃຊ້ສິ່ງທີ່ເຮົາຮຽນຮູ້ຈາກພະເຢໂຫວາຈະມີຜົນແນວໃດ? (ຂ) ເຮົາຮຽນຮູ້ຫຍັງຈາກຕົວຢ່າງຂອງກະສັດເອເຊເກຍເຊ? (ຄ) ຄືກັບຄຳອະທິດຖານຂອງດາວິດໃນຄຳເພງ 139:23, 24 ເຮົາສາມາດອະທິດຖານຂໍຫຍັງ?
17 ແຕ່ລະເທື່ອທີ່ເຮົາເຫັນປະໂຫຍດຈາກການເຮັດສິ່ງທີ່ຖືກຕ້ອງ ຄວາມເຊື່ອຂອງເຮົາກໍເຂັ້ມແຂງຂຶ້ນ. (ຢໂກ. 1:2, 3) ເຮົາດີໃຈທີ່ເຮັດໃຫ້ພະເຢໂຫວາພູມໃຈທີ່ເອີ້ນເຮົາວ່າເປັນລູກຂອງພະອົງແລະເຮົາກໍຢາກເຮັດໃຫ້ພະອົງພໍໃຈຫຼາຍຂຶ້ນ. (ສຸພາ. 27:11) ການທົດສອບແຕ່ລະເທື່ອເປັນໂອກາດທີ່ເຮົາຈະສະແດງວ່າເຮົາບໍ່ໄດ້ຮັບໃຊ້ພະເຢໂຫວາພໍ່ຂອງເຮົາແບບເຄິ່ງໆກາງໆ. (ເພງ. 119:113) ແຕ່ເປັນການພິສູດວ່າເຮົາຮັກພະອົງສຸດຫົວໃຈ ແລະຕັ້ງໃຈເຊື່ອຟັງຄຳສັ່ງແລະເຮັດຕາມໃຈປະສົງຂອງພະອົງ.—ອ່ານ 1 ກະສັດ 8:61
18 ເຮົາຍັງຈະເຮັດຜິດພາດຢູ່ບໍ? ແມ່ນ ຍ້ອນເຮົາເປັນຄົນບໍ່ສົມບູນແບບ. ຖ້າເຮົາສະດຸດຫຼືເຮັດຜິດພາດ ຂໍໃຫ້ຈື່ຕົວຢ່າງຂອງກະສັດເອເຊເກຍເຊ. ລາວເຮັດຜິດ ແຕ່ລາວກັບໃຈ ແລະຮັບໃຊ້ພະອົງຕໍ່ໆໄປ “ຢ່າງສຸດຫົວໃຈ.” (ເອຊາ. 38:3-6; 2 ຂ່າວ. 29:1, 2; 32:25, 26) ຂໍໃຫ້ເຮົາປະຕິເສດຄວາມພະຍາຍາມຂອງຊາຕານທີ່ຈະເອົາຄວາມຄິດຂອງມັນມາໃສ່ໃຈຂອງເຮົາ. ໃຫ້ເຮົາອະທິດຖານເພື່ອຈະພັດທະນາ ‘ໃຈທີ່ເຊື່ອຟັງ.’ (1 ກະ. 3:9; ອ່ານຄຳເພງ 139:23, 24) ສິ່ງສຳຄັນທີ່ສຸດເພື່ອຈະຮັກສາຄວາມສັດຊື່ຕໍ່ພະເຢໂຫວາກໍຄື ເຮົາຕ້ອງປົກປ້ອງຫົວໃຈຂອງເຮົາກ່ອນສິ່ງອື່ນໃດທັງໝົດ.
ເພງ 54 ເສັ້ນທາງນີ້ແຫຼະ
^ ຂໍ້ 5 ເຮົາຈະຮັກສາຄວາມສັດຊື່ຕໍ່ພະເຢໂຫວາ ຫຼືເຮົາຈະຍອມໃຫ້ຊາຕານລໍ້ໃຈເຮົາໃຫ້ເຊົາຮັບໃຊ້ພະເຢໂຫວາ? ຄຳຕອບບໍ່ໄດ້ຂຶ້ນຢູ່ກັບຄວາມຮ້າຍແຮງຂອງການທົດສອບ ແຕ່ມັນຂຶ້ນກັບວ່າເຮົາຈະປົກປ້ອງຫົວໃຈຂອງເຮົາໄດ້ດີສ່ຳໃດ. ຄຳວ່າ “ໃຈ” ໝາຍເຖິງຫຍັງ? ຊາຕານພະຍາຍາມເອົາຄວາມຄິດຂອງມັນໃສ່ໃນໃຈຂອງເຮົາແນວໃດ? ແລະເຮົາຈະປົກປ້ອງຫົວໃຈຂອງເຮົາໄດ້ແນວໃດ? ເຮົາຈະໄດ້ຮັບຄຳຕອບໃນບົດຄວາມນີ້.
^ ຂໍ້ 11 ການອະທິບາຍບາງສຳນວນ: ພະເຢໂຫວາໃຫ້ເຮົາມີຄວາມສາມາດກວດສອບຄວາມຄິດ ຄວາມຮູ້ສຶກ ການກະທຳ ແລະຕັດສິນຕົວເອງ. ຄຳພີໄບເບິນເອີ້ນຄວາມສາມາດນັ້ນວ່າ ສະຕິຮູ້ສຶກຜິດຊອບ. (ໂລມ 2:15; 9:1) ສະຕິຮູ້ສຶກຜິດຊອບທີ່ໄດ້ຮັບການຝຶກຝົນຕາມຫຼັກພະຄຳພີແມ່ນສະຕິຮູ້ສຶກຜິດຊອບທີ່ອີງໃສ່ມາດຕະຖານຂອງພະເຢໂຫວາທີ່ບອກໄວ້ໃນຄຳພີໄບເບິນ ເພື່ອຕັດສິນວ່າສິ່ງທີ່ເຮົາຄິດ ເວົ້າ ຫຼືເຮັດນັ້ນແມ່ນຖືກຫຼືຜິດ.
