ຄຳຖາມຈາກຜູ້ອ່ານ
ຫຼັງຈາກທີ່ພະເຢຊູເກີດ ເປັນຫຍັງໂຢເຊັບແລະມາຣີຈຶ່ງຍັງຢູ່ໃນເມືອງເບັດເລເຮັມຕໍ່ແທນທີ່ຈະກັບຄືນບ້ານເກີດທີ່ເມືອງນາຊາເຣັດ?
ຄຳພີໄບເບິນບໍ່ໄດ້ອະທິບາຍເຫດຜົນກ່ຽວກັບເລື່ອງນີ້ ແຕ່ໄດ້ໃຫ້ລາຍລະອຽດບາງຢ່າງທີ່ອາດຈະມີຜົນຕໍ່ການຕັດສິນໃຈໃນການເລືອກຢູ່ຕໍ່ຂອງເຂົາເຈົ້າ.
ທູດສະຫວັນອົງໜຶ່ງໄດ້ມາບອກມາຣີວ່າລາວຈະມີລູກ. ຕອນທີ່ທູດສະຫວັນມາບອກເລື່ອງນີ້ ມາຣີແລະໂຢເຊັບໄດ້ອາໄສຢູ່ເມືອງນາຊາເຣັດໃນແຂວງຄາລີເລ. (ລກ. 1:26-31; 2:4) ຕໍ່ມາ ເມື່ອເຂົາເຈົ້າກັບມາຈາກປະເທດເອຢິບ ເຂົາເຈົ້າກໍກັບຄືນໄປເມືອງນາຊາເຣັດ. ພະເຢຊູໄດ້ເຕີບໃຫຍ່ຢູ່ເມືອງນັ້ນ ແລະເຂົາເຈົ້າເອີ້ນເພິ່ນວ່າຊາວນາຊາເຣັດ. (ມທ. 2:19-23) ສະນັ້ນ ມີເຫດຜົນທີ່ຈະບອກໄດ້ວ່າພະເຢຊູ ໂຢເຊັບແລະມາຣີກໍກ່ຽວຂ້ອງກັບນາຊາເຣັດແທ້ໆ.
ມາຣີມີພີ່ນ້ອງທີ່ຊື່ເອລີຊາເບັດເຊິ່ງມີບ້ານຢູ່ເມືອງຢູດາ. ຜົວຂອງເອລີຊາເບັດເປັນປະໂລຫິດຊື່ເຊກາຣີຢາແລະເອລີຊາເບັດຍັງເປັນແມ່ຂອງໂຢຮັນຜູ້ໃຫ້ບັບເຕມາ. (ລກ. 1:5, 9, 13, 36) ມາຣີໄດ້ໄປຢາມເອລີຊາເບັດແລະພັກຢູ່ນຳລາວສາມເດືອນໃນເມືອງຢູດາ. ຈາກນັ້ນ ມາຣີກໍກັບໄປເມືອງນາຊາເຣັດ. (ລກ. 1:39, 40, 56) ດັ່ງນັ້ນ ມາຣີຈຶ່ງມີຄວາມລຶ້ງເຄີຍກັບເມືອງຢູດາ.
ໃນເວລາຕໍ່ມາ ໂຢເຊັບໄດ້ເຮັດຕາມຄຳສັ່ງທີ່ໃຫ້ໄປ “ຈົດທະບຽນ” ສຳມະໂນຄົວ. ດັ່ງນັ້ນ ໂຢເຊັບຈຶ່ງເດີນທາງແຕ່ເມືອງນາຊາເຣັດໄປເມືອງເບັດເລເຮັມ ເຊິ່ງເປັນ “ບ້ານເກີດຂອງດາວິດ” ແລະໄດ້ມີການພະຍາກອນໄວ້ວ່າເມຊີອາຈະມາເກີດໃນເມືອງນີ້. (ລກ. 2:3, 4; 1ຊມ. 17:15; 20:6; ມກ. 5:2) ຫຼັງຈາກພະເຢຊູເກີດແລ້ວ ໂຢເຊັບບໍ່ຢາກໃຫ້ມາຣີກັບແອນ້ອຍເດີນທາງໄກເພື່ອຈະກັບໄປນາຊາເຣັດ. ເຂົາເຈົ້າຈຶ່ງພັກຢູ່ເມືອງເບັດເລເຮັມຕໍ່ໄປ ເຊິ່ງຢູ່ຫ່າງຈາກເມືອງເຢຣູຊາເລັມປະມານ 9 ກິໂລແມັດ. ຍ້ອນແນວນີ້ມັນຈຶ່ງສະດວກສຳລັບເຂົາເຈົ້າທີ່ຈະພາແອນ້ອຍຂອງເຂົາເຈົ້າໄປວິຫານແລະຖວາຍເຄື່ອງບູຊາໃຫ້ຖືກຕ້ອງຕາມກົດໝາຍ.—ລລວ. 12:2, 6-8; ລກ. 2:22-24
ທູດສະຫວັນໄດ້ບອກມາຣີກ່ອນໜ້ານີ້ແລ້ວວ່າລູກຂອງລາວຈະໄດ້ນັ່ງ “ບັນລັງຂອງດາວິດ” ແລະຈະໄດ້ປົກຄອງ “ເປັນກະສັດ.” ເປັນໄປໄດ້ທີ່ໂຢເຊັບແລະມາຣີຖືວ່າເປັນເລື່ອງສຳຄັນທີ່ພະເຢຊູເກີດໃນເມືອງຂອງດາວິດ. (ລກ. 1:32, 33; 2:11, 17) ເຂົາເຈົ້າອາດຄິດວ່າເປັນເລື່ອງສຳຄັນທີ່ຈະຢູ່ໃນເມືອງນັ້ນຕໍ່ໄປເພື່ອຈະເບິ່ງວ່າພະເຢໂຫວາຕ້ອງການໃຫ້ເຂົາເຈົ້າເຮັດຫຍັງ.
ເຮົາບໍ່ຮູ້ວ່າເຂົາເຈົ້າຢູ່ໃນເມືອງເບັດເລເຮັມດົນປານໃດກ່ອນພວກໝໍໂຫນມາຢາມ. ແຕ່ວ່າຕອນນັ້ນເຂົາເຈົ້າຢູ່ໃນເຮືອນແລ້ວແລະລູກຊາຍກໍເປັນ “ເດັກນ້ອຍ” ແລ້ວ. (ມທ. 2:11) ດັ່ງນັ້ນ ເບິ່ງຄືວ່າແທນທີ່ຈະເດີນທາງກັບໄປເມືອງນາຊາເຣັດ ເຂົາເຈົ້າພັດໄດ້ຢູ່ໃນເມືອງເບັດເລເຮັມດົນພໍສົມຄວນຈົນຄິດວ່າເບັດເລເຮັມເປັນບ້ານຂອງເຂົາເຈົ້າໄປແລ້ວ.
ເຮໂຣດໄດ້ອອກຄຳສັ່ງໃຫ້ຂ້າ “ເດັກນ້ອຍຜູ້ຊາຍທຸກຄົນທີ່ອາຍຸຕັ້ງແຕ່ 2 ປີລົງມາເຊິ່ງຢູ່ໃນເບັດເລເຮັມ.” (ມທ. 2:16) ທູດສະຫວັນໄດ້ມາເຕືອນໂຢເຊັບກ່ຽວກັບເລື່ອງນັ້ນ. ໂຢເຊັບຈຶ່ງພາມາຣີແລະພະເຢຊູໄປປະເທດເອຢິບແລະອາໄສຢູ່ຫັ້ນຈົນເຮໂຣດຕາຍ. ຫຼັງຈາກນັ້ນ ໂຢເຊັບກໍໄດ້ພາຄອບຄົວຂອງລາວກັບໄປນາຊາເຣັດ. ເປັນຫຍັງເຂົາເຈົ້າຈຶ່ງບໍ່ກັບໄປເມືອງເບັດເລເຮັມ? ຍ້ອນວ່າໃນຕອນນັ້ນອາກເຄລາອັດໄດ້ປົກຄອງຢູດາຍແທນເຮໂຣດພໍ່ຂອງລາວ ແລະລາວເປັນຄົນທີ່ໂຫດຮ້າຍ. ນອກຈາກນັ້ນ ທູດສະຫວັນຍັງເຕືອນໂຢເຊັບວ່າບໍ່ໃຫ້ກັບໄປເມືອງເບັດເລເຮັມ. ດັ່ງນັ້ນ ໂຢເຊັບຈຶ່ງພາຄອບຄົວຢູ່ນາຊາເຣັດຕໍ່ ເຊິ່ງເປັນບ່ອນທີ່ປອດໄພທີ່ຈະລ້ຽງພະເຢຊູໃຫ້ເຕີບໃຫຍ່ແລະມີຄວາມເຊື່ອເຂັ້ມແຂງ.—ມທ. 2:19-22; 13:55; ລກ. 2:39, 52
ເບິ່ງຄືວ່າໂຢເຊັບຕາຍກ່ອນທີ່ພະເຢຊູຈະເປີດໂອກາດໃຫ້ຄົນໄດ້ຂຶ້ນສະຫວັນ. ດັ່ງນັ້ນ ໂຢເຊັບຈະຖືກປຸກໃຫ້ຄືນມາຈາກຕາຍເພື່ອມີຊີວິດຢູ່ເທິງໂລກນີ້. ຫຼາຍຄົນມີໂອກາດທີ່ຈະເຈິໂຢເຊັບແລະຖາມລາວກ່ຽວກັບລາຍລະອຽດຕື່ມວ່າເປັນຫຍັງລາວກັບມາຣີຈຶ່ງຍັງຢູ່ໃນເບັດເລເຮັມຫຼັງຈາກພະເຢຊູເກີດ.
