ບົດຄວາມສຶກສາທີ 25
ຜູ້ດູແລຂໍໃຫ້ເຈົ້າຮຽນແບບກິເດໂອນ
“ຂ້ອຍບໍ່ມີເວລາພໍທີ່ຈະເລົ່າຕໍ່ກ່ຽວກັບກີເດໂອນ.”—ຮຣ. 11:32
ເພງ 124 ສັດຊື່ຕະຫຼອດໄປ
ໃຈຄວາມສຳຄັນ a
1. ຕາມ 1 ເປໂຕ 5:2 ຜູ້ດູແລໄດ້ຮັບສິດທິພິເສດຫຍັງ?
ຜູ້ດູແລໃນທຸກມື້ນີ້ໄດ້ຮັບມອບໝາຍຈາກພະເຢໂຫວາໃຫ້ດູແລແກະຂອງເພິ່ນ. ຜູ້ດູແລເຫັນຄ່າສິດທິພິເສດທີ່ໄດ້ຮັບໃຊ້ພີ່ນ້ອງແລະເຂົາເຈົ້າພະຍາຍາມ “ທີ່ຈະດູແລພວກເຂົາ [ພີ່ນ້ອງ] ແທ້ໆ.” (ຢເຣ. 23:4; ອ່ານ 1 ເປໂຕ 5:2) ພວກເຮົາເຫັນຄ່າຜູ້ດູແລແທ້ໆ!
2. ຜູ້ດູແລອາດເຈິບັນຫາຫຍັງແດ່?
2 ຕອນທີ່ຜູ້ດູແລເຮັດໜ້າທີ່ຂອງເຂົາເຈົ້າ ເຂົາເຈົ້າອາດເຈິບັນຫາຫຼາຍຢ່າງ. ຢ່າງໜຶ່ງກໍຄືຜູ້ດູແລຕ້ອງເຮັດວຽກຫຼາຍແທ້ໆເພື່ອຈະເບິ່ງແຍງພີ່ນ້ອງໃນປະຊາຄົມ. ໂທນີເຊິ່ງເປັນຜູ້ດູແລຢູ່ສະຫະລັດອາເມຣິກາຕ້ອງຮຽນຮູ້ທີ່ຈະເປັນຄົນຈຽມຕົວຫຼາຍຂຶ້ນຕອນທີ່ຈະຮັບວຽກໃນປະຊາຄົມ. ລາວບອກວ່າ: “ຕອນທີ່ໂຄວິດ-19 ເລີ່ມລະບາດໃໝ່ໆ ຂ້ອຍພະຍາຍາມເຮັດວຽກຫຼາຍຂຶ້ນເພື່ອຈະຈັດການປະຊຸມແລະການປະກາດ. ແຕ່ບໍ່ວ່າຂ້ອຍຈະເຮັດຫຼາຍສ່ຳໃດ ມັນກໍຍັງມີວຽກຫຼາຍຢ່າງທີ່ຕ້ອງເຮັດອີກ ແລະເຮັດໃຫ້ຂ້ອຍບໍ່ຄ່ອຍມີເວລາທີ່ຈະອ່ານຄຳພີໄບເບິນ ສຶກສາສ່ວນຕົວ ແລະອະທິດຖານ.” ອິນຣີເຊິ່ງເປັນຜູ້ດູແລຈາກປະເທດໂກໂຊໂວເຈິບັນຫາທີ່ຕ່າງກັນ ເຂດທີ່ລາວຢູ່ມີສົງຄາມ. ລາວຮູ້ສຶກວ່າເປັນເລື່ອງຍາກທີ່ຈະເຮັດຕາມຄຳແນະນຳຂອງອົງການ. ລາວບອກວ່າ: “ຂ້ອຍຮູ້ສຶກຢ້ານຕອນທີ່ສຳນັກງານສາຂາມອບໝາຍໃຫ້ຂ້ອຍໄປຊ່ວຍພີ່ນ້ອງທີ່ຢູ່ໃນເຂດອັນຕະລາຍ ມັນຍາກຫຼາຍແທ້ໆທີ່ຈະສະແດງຄວາມກ້າຫານ. ຂ້ອຍຄິດວ່າຄຳແນະນຳຂອງອົງການບໍ່ຄ່ອຍມີເຫດຜົນປານໃດ.” ທິມທີ່ເປັນມິດຊັນນາຣີຢູ່ໃນເຂດອາຊີຮູ້ສຶກວ່າເປັນເລື່ອງຍາກຫຼາຍທີ່ລາວຈະເຮັດວຽກທຸກຢ່າງໃຫ້ແລ້ວໃນແຕ່ລະມື້. ລາວບອກວ່າ: “ບາງເທື່ອຂ້ອຍຮູ້ສຶກໝົດເຫື່ອໝົດແຮງທັງກາຍແລະໃຈ.” ອັນໃດຈະຊ່ວຍຜູ້ດູແລທີ່ເຈິເລື່ອງຄ້າຍໆກັນນີ້ໃຫ້ຮັບມືໄດ້?
3. ເຮົາທຸກຄົນໄດ້ຮັບປະໂຫຍດຫຍັງຈາກຕົວຢ່າງຂອງຜູ້ຕັດສິນກີເດໂອນ?
3 ຜູ້ດູແລສາມາດຮຽນຫຼາຍຢ່າງຈາກຜູ້ຕັດສິນກີເດໂອນ. (ຮຣ. 6:12; 11:32) ກີເດໂອນໄດ້ຮັບມອບໝາຍຈາກພະເຢໂຫວາໃຫ້ດູແລແລະປົກປ້ອງປະຊາຊົນຂອງເພິ່ນ. (ຜຕສ. 2:16; 1ຂຄ. 17:6) ຜູ້ດູແລໃນທຸກມື້ນີ້ກໍເປັນຄືກັບກີເດໂອນ. ພະເຢໂຫວາມອບໝາຍໃຫ້ເຂົາເຈົ້າດູແລປະຊາຊົນຂອງເພິ່ນໃນຊ່ວງທີ່ຍາກລຳບາກນີ້. (ກຈກ. 20:28; 2ຕມ. 3:1) ເຮົາສາມາດຮຽນຈາກຕົວຢ່າງຂອງກີເດໂອນໃນເລື່ອງຄວາມຈຽມຕົວ ຄວາມຖ່ອມ ແລະການເຊື່ອຟັງ. ນອກຈາກນັ້ນ ກີເດໂອນຍັງເປັນຕົວຢ່າງທີ່ດີໃນເລື່ອງຄວາມອົດທົນນຳ. ບໍ່ວ່າເຮົາຈະເປັນຜູ້ດູແລຫຼືບໍ່ ເຮົາທຸກຄົນສາມາດເຫັນຄ່າຜູ້ດູແລຫຼາຍຂຶ້ນໄດ້ແລະຊ່ວຍເຂົາເຈົ້າທີ່ເຮັດວຽກໜັກໃນການເບິ່ງແຍງປະຊາຄົມ.—ຮຣ. 13:17
ຕອນທີ່ຮູ້ສຶກຍາກທີ່ຈະເປັນຄົນຖ່ອມແລະຈຽມຕົວ
4. ກີເດໂອນສະແດງຄວາມຖ່ອມແລະຄວາມຈຽມຕົວແນວໃດ?
4 ກີເດໂອນເປັນຄົນຖ່ອມແລະຈຽມຕົວ. b ຕອນທີ່ພະເຢໂຫວາໃຫ້ທູດສະຫວັນມາບອກກັບກີເດໂອນວ່າລາວຖືກເລືອກໃຫ້ຊ່ວຍຄົນອິດສະຣາເອນໃຫ້ລອດຈາກຄົນມິດີອານທີ່ແຂງແຮງ ກີເດໂອນເວົ້າດ້ວຍຄວາມຖ່ອມວ່າ: “ຈຸ້ມເຈື້ອຂອງລູກເປັນຈຸ້ມເຈື້ອທີ່ນ້ອຍທີ່ສຸດໃນຕະກູນມານາເຊ ແລະລູກກໍບໍ່ໄດ້ເປັນຄົນສຳຄັນອີ່ຫຍັງໃນເຮືອນຂອງພໍ່.” (ຜຕສ. 6:15, ລ.ມ.) ກີເດໂອນຮູ້ສຶກວ່າລາວບໍ່ເໝາະສົມທີ່ຈະເຮັດວຽກທີ່ພະເຢໂຫວາມອບໝາຍໃຫ້ລາວ. ແຕ່ພະເຢໂຫວາຮູ້ວ່າລາວເໝາະສົມທີ່ຈະເຮັດວຽກນີ້ ແລະລາວກໍສາມາດເຮັດວຽກມອບໝາຍໄດ້ສຳເລັດເພາະພະເຢໂຫວາຊ່ວຍລາວ.
5. ສິ່ງໃດອາດເຮັດໃຫ້ຜູ້ດູແລຮູ້ສຶກວ່າຍາກທີ່ຈະເປັນຄົນຖ່ອມແລະຈຽມຕົວ?
5 ຜູ້ດູແລພະຍາຍາມເຕັມທີທີ່ຈະເປັນຄົນຖ່ອມແລະຈຽມຕົວ. (ມກ. 6:8; ກຈກ. 20:18, 19) ເຂົາເຈົ້າບໍ່ຢາກອວດຄວາມສາມາດຫຼືຄວາມສຳເລັດຂອງຕົວເອງ. ແລະເມື່ອເຂົາເຈົ້າເຮັດຜິດພາດ ເຂົາເຈົ້າກໍຈະບໍ່ຈົມຢູ່ກັບຄວາມຮູ້ສຶກທີ່ວ່າໂຕເອງບໍ່ມີຄ່າທີ່ເຮັດວຽກອອກມາບໍ່ດີ. ເຖິງວ່າຈະເປັນແນວນັ້ນ ກໍອາດບໍ່ງ່າຍທີ່ຜູ້ດູແລຈະສະແດງຄວາມຖ່ອມແລະຈຽມຕົວ. ຕົວຢ່າງເຊັ່ນ ລາວອາດຈະຮັບເອົາວຽກມອບໝາຍຫຼາຍໆແລະຕໍ່ມາກໍຮູ້ສຶກວ່າຍາກທີ່ຈະເຮັດໃຫ້ແລ້ວທັງໝົດ. ຫຼືລາວອາດຖືກຕຳໜິຫຼືໄດ້ຮັບຄຳຊົມເຊີຍຈາກຄົນອື່ນ. ຖ້າຜູ້ດູແລເຈິສະຖານະການແບບນີ້ ເຂົາເຈົ້າຈະຮຽນຫຍັງໄດ້ຈາກຕົວຢ່າງຂອງກີເດໂອນ?
ຜູ້ດູແລທີ່ຈຽມຕົວຈະຮຽນແບບກີເດໂອນໂດຍເຕັມໃຈຂໍຄວາມຊ່ວຍເຫຼືອຈາກຄົນອື່ນ ເຊັ່ນ ຕອນທີ່ຈັດການປະກາດໂດຍໃຊ້ລໍ້ວາງສະແດງປຶ້ມ (ເບິ່ງຂໍ້ 6)
6. ຜູ້ດູແລຈະຮຽນຫຍັງໄດ້ຈາກຄວາມຈຽມຕົວຂອງກີເດໂອນ? (ເບິ່ງຮູບພາບ)
6 ຂໍຄວາມຊ່ວຍເຫຼືອ. ຄົນທີ່ຈຽມຕົວຈະຮູ້ຂີດຈຳກັດຂອງໂຕເອງ. ກີເດໂອນກໍເປັນແບບນັ້ນ ເພາະລາວເປັນຄົນຈຽມຕົວ ລາວຈຶ່ງຂໍຄວາມຊ່ວຍເຫຼືອຈາກຄົນອື່ນ. (ຜຕສ. 6:27, 35; 7:24) ຜູ້ດູແລທີ່ສະຫຼາດຈະເຮັດຄ້າຍໆກັນນີ້. ໂທນີເຊິ່ງເວົ້າເຖິງກ່ອນໜ້ານີ້ບອກວ່າ: “ຍ້ອນຂ້ອຍຖືກສອນມາຕັ້ງແຕ່ຍັງນ້ອຍວ່າ ຜູ້ໃດໃຊ້ໃຫ້ເຮັດວຽກຫຍັງກໍໃຫ້ເຮັດໂລດ. ຂ້ອຍກໍເລີຍມີນິດໄສມັກຮັບເອົາວຽກຫຼາຍໆເກີນທີ່ຕົວເອງຈະເຮັດໄດ້. ຂ້ອຍຈຶ່ງຕັດສິນໃຈເອົາຫົວຂໍ້ເລື່ອງຄວາມຈຽມຕົວມາລົມກັນໃນການນະມັດສະການປະຈຳຄອບຄົວແລ້ວຖາມເມຍວ່າລາວຄິດແນວໃດ. ຂ້ອຍຍັງໄດ້ເບິ່ງວິດີໂອໃນເວັບໄຊ jw.org ນຳທີ່ຊື່ວ່າ ຮຽນແບບພະເຢຊູເຮັດໂດຍຝຶກສອນ ໄວ້ວາງໃຈ ແລະມອບອຳນາດໃຫ້ຄົນອື່ນ.” ໂທນີເລີ່ມຂໍໃຫ້ພີ່ນ້ອງຄົນອື່ນຊ່ວຍວຽກທີ່ລາວເຮັດ. ຜົນເປັນແນວໃດ? ລາວບອກວ່າ: “ວຽກໃນປະຊາຄົມກໍມີຄົນເຮັດຈົນແລ້ວ ແລະຂ້ອຍກໍມີເວລາຫຼາຍຂຶ້ນທີ່ຈະເສີມຄວາມເຊື່ອຂອງຕົວເອງໃຫ້ເຂັ້ມແຂງ.”
7. ຜູ້ດູແລຈະຮຽນແບບກີເດໂອນໄດ້ແນວໃດເມື່ອມີຄົນມາຕຳໜິ? (ຢາໂກໂບ 3:13)
7 ຢ່າໃຈຮ້າຍເມື່ອຖືກຕຳໜິ. ອີກຢ່າງໜຶ່ງທີ່ຜູ້ດູແລຮູ້ສຶກວ່າຍາກທີ່ຈະເປັນຄົນຖ່ອມແລະຈຽມຕົວກໍຄືເມື່ອເຂົາເຈົ້າຖືກຕຳໜິ. ຕົວຢ່າງຂອງກີເດໂອນສາມາດຊ່ວຍເຂົາເຈົ້າໃນເລື່ອງນີ້ນຳ. ກີເດໂອນຮູ້ວ່າລາວເປັນຄົນບໍ່ສົມບູນແບບແລະເຮັດຜິດພາດໄດ້. ຕອນທີ່ຄົນໃນຕະກູນເອຟຣາອິມມາຕໍ່ວ່າລາວ ລາວບໍ່ໄດ້ໃຈຮ້າຍ. (ຜຕສ. 8:1-3) ລາວເວົ້າດີໆກັບເຂົາເຈົ້າ. ກີເດໂອນສະແດງຄວາມຖ່ອມໂດຍຕັ້ງໃຈຟັງວ່າເຂົາເຈົ້າໃຈຮ້າຍເລື່ອງຫຍັງ ແລະລາວກໍຮູ້ວິທີເວົ້າທີ່ຈະເຮັດໃຫ້ຄົນໃນຕະກູນເອຟຣາອິມຮູ້ສຶກດີຂຶ້ນ. ຜູ້ດູແລທີ່ສະຫຼາດຈະຮຽນແບບກີເດໂອນໂດຍບໍ່ໃຈຮ້າຍງ່າຍເມື່ອຖືກພີ່ນ້ອງຕຳໜິ ແຕ່ຈະຕັ້ງໃຈຟັງວ່າພີ່ນ້ອງຮູ້ສຶກແນວໃດແລ້ວເຂົາເຈົ້າກໍຈະຕອບພີ່ນ້ອງດີໆ. (ອ່ານຢາໂກໂບ 3:13) ຖ້າຜູ້ດູແລເຮັດແບບນີ້ ກໍຈະເຮັດໃຫ້ປະຊາຄົມມີຄວາມສະຫງົບສຸກ.
8. ຜູ້ດູແລຄວນເຮັດແນວໃດເມື່ອມີຄົນມາຊົມເຊີຍ? ຂໍໃຫ້ຍົກຕົວຢ່າງ.
8 ໃຫ້ຍົກຍ້ອງພະເຢໂຫວາ. ຕອນທີ່ຄົນອິດສະຣາເອນຍົກຍ້ອງກີເດໂອນທີ່ລາວເອົາຊະນະພວກມີດີອານໄດ້ ລາວບໍ່ຢາກໃຫ້ຄົນອື່ນມາຍົກຍ້ອງລາວ ແຕ່ລາວຢາກໃຫ້ຄຳຍົກຍ້ອງນັ້ນແກ່ພະເຢໂຫວາ. (ຜຕສ. 8:22, 23) ຜູ້ດູແລຈະຮຽນແບບກີເດໂອນໄດ້ແນວໃດ? ເຂົາເຈົ້າຄວນຍົກຍ້ອງພະເຢໂຫວາເມື່ອເຮັດວຽກມອບໝາຍໄດ້ສຳເລັດ. (1ກຣ. 4:6, 7) ຕົວຢ່າງເຊັ່ນ: ຖ້າມີພີ່ນ້ອງມາຊົມເຊີຍຜູ້ດູແລຄົນໜຶ່ງວ່າລາວສອນໄດ້ດີ ລາວຄວນບອກວ່າເລື່ອງທີ່ລາວສອນກໍມາຈາກຄຳພີໄບເບິນ. ຫຼືລາວອາດບອກວ່າອົງການຂອງພະເຢໂຫວາຝຶກເຮົາທຸກຄົນໄດ້ດີຫຼາຍ. ບາງເທື່ອຜູ້ດູແລອາດຕ້ອງຄິດວ່າລາວຢາກໃຫ້ຄົນອື່ນປະທັບໃຈໃນຕົວລາວຫຼືລາວກຳລັງເຮັດໃຫ້ຄົນອື່ນຍົກຍ້ອງພະເຢໂຫວາ. ໃຫ້ເຮົາມາເບິ່ງຕົວຢ່າງຂອງຜູ້ດູແລຄົນໜຶ່ງທີ່ຊື່ຕີໂມທີ. ຕອນທີ່ລາວໄດ້ຮັບການແຕ່ງຕັ້ງໃຫ້ເປັນຜູ້ດູແລໃໝ່ໆ ລາວມັກບັນຍາຍສາທາລະນະຫຼາຍ. ລາວບອກວ່າ: “ຂ້ອຍມັກໃຊ້ຄຳນຳແລະຕົວຢ່າງຍາວໆທີ່ມີລາຍລະອຽດຫຼາຍ. ພີ່ນ້ອງຫຼາຍຄົນເລີຍປະທັບໃຈແລະມັກມາຊົມເຊີຍຂ້ອຍ. ແຕ່ມັນກໍເຮັດໃຫ້ພີ່ນ້ອງສົນໃຈທີ່ຕົວຂອງຂ້ອຍແທນທີ່ຈະສົນໃຈພະເຢໂຫວາຫຼືສົນໃຈຄຳພີໄບເບິນ.” ຕໍ່ມາຕີໂມທີກໍຮູ້ວ່າລາວຕ້ອງປ່ຽນວິທີການສອນເພື່ອຈະບໍ່ເຮັດໃຫ້ຄົນສົນໃຈທີ່ຕົວຂອງລາວຫຼາຍເກີນໄປ. (ສຸພາ. 27:21) ແລ້ວຜົນເປັນແນວໃດ? ລາວບອກວ່າ: “ຕອນນີ້ ພີ່ນ້ອງຫຼາຍຄົນບອກວ່າຄຳບັນຍາຍຂອງຂ້ອຍຊ່ວຍເຂົາເຈົ້າໃຫ້ເອົາຊະນະບັນຫາ ໃຫ້ອົດທົນກັບຄວາມຍາກລຳບາກ ຫຼືເຮັດໃຫ້ເຂົາເຈົ້າໃກ້ຊິດກັບພະເຢໂຫວາຫຼາຍຂຶ້ນ. ນີ້ກໍເລີຍເຮັດໃຫ້ຂ້ອຍມີຄວາມສຸກຫຼາຍກວ່າເມື່ອຫຼາຍປີກ່ອນຕອນທີ່ເຂົາເຈົ້າມາຊົມເຊີຍຍ້ອນປະທັບໃຈໃນຕົວຂ້ອຍ.”
ຕອນທີ່ຮູ້ສຶກວ່າຍາກທີ່ຈະເຊື່ອຟັງຫຼືກ້າຫານ
ກີເດໂອນຄັດຈຳນວນທະຫານຂອງລາວອອກຢ່າງເຊື່ອຟັງ ລາວເລືອກເອົາທະຫານແຕ່ 300 ຄົນທີ່ຕື່ນຕົວຢູ່ສະເໝີ (ເບິ່ງຂໍ້ 9)
9. ເປັນຫຍັງຈຶ່ງບໍ່ງ່າຍທີ່ກີເດໂອນຈະເຊື່ອຟັງແລະກ້າຫານ? (ເບິ່ງຮູບໜ້າປົກ)
9 ຫຼັງຈາກທີ່ກີເດໂອນໄດ້ຖືກແຕ່ງຕັ້ງໃຫ້ເປັນຜູ້ຕັດສິນນຳໜ້າຄົນອິດສະຣາເອນ ລາວຕ້ອງເຊື່ອຟັງແລະກ້າຫານ. ກີເດໂອນໄດ້ຮັບວຽກມອບໝາຍທີ່ອັນຕະລາຍຫຼາຍ ນັ້ນກໍຄືໃຫ້ທຳລາຍແທ່ນບູຊາພະບາອານຂອງພໍ່ລາວ. (ຜຕສ. 6:25, 26) ນອກຈາກນັ້ນ ຫຼັງຈາກທີ່ກີເດໂອນລວບລວມທະຫານໄດ້ ພະເຢໂຫວາກໍສັ່ງໃຫ້ລາວຄັດຈຳນວນທະຫານອອກຕັ້ງສອງເທື່ອ. (ຜຕສ. 7:2-7) ໃນທີ່ສຸດ ພະເຢໂຫວາກໍສັ່ງໃຫ້ລາວໂຈມຕີສັດຕູໃນຕອນກາງຄືນ.—ຜຕສ. 7:9-11
10. ເປັນຫຍັງອາດເປັນເລື່ອງຍາກທີ່ຜູ້ດູແລຈະເຊື່ອຟັງ?
10 ຜູ້ດູແລຄວນ “ພ້ອມຈະເຊື່ອຟັງ.” (ຢກບ. 3:17) ຜູ້ດູແລທີ່ເຊື່ອຟັງຈະພ້ອມສະເໝີທີ່ຈະເຮັດຕາມຄຳແນະນຳຈາກຄຳພີໄບເບິນແລະອົງການຂອງພະເຢໂຫວາ. ນີ້ຈຶ່ງເຮັດໃຫ້ລາວເປັນຕົວຢ່າງທີ່ດີໃຫ້ກັບພີ່ນ້ອງຄົນອື່ນ. ແຕ່ບາງຄັ້ງກໍບໍ່ງ່າຍທີ່ຈະເຮັດແບບນັ້ນ ເຊັ່ນ: ອົງການອາດມີຄຳແນະນຳຫຼາຍຢ່າງແລະມີການປ່ຽນແປງໄວຫຼາຍ. ລາວເລີຍອາດຮູ້ສຶກວ່າຍາກທີ່ຈະເຮັດຕາມໃຫ້ທັນອົງການ. ນອກຈາກນັ້ນ ລາວອາດສົງໄສວ່າຄຳແນະນຳບາງຢ່າງມັນໃຊ້ໄດ້ແທ້ໆບໍ? ຫຼືມັນເປັນຄຳແນະນຳທີ່ສະຫຼາດແທ້ໆບໍ? ຫຼືລາວອາດໄດ້ຮັບວຽກມອບໝາຍໃຫ້ເຮັດວຽກທີ່ອາດເຮັດໃຫ້ລາວຖືກຈັບ. ແລ້ວຜູ້ດູແລຈະຮຽນແບບການເຊື່ອຟັງຂອງກີເດໂອນໄດ້ແນວໃດເມື່ອເຈິສະຖານະການເຫຼົ່ານີ້?
11. ຜູ້ດູແລຈະສະແດງໃຫ້ເຫັນແນວໃດວ່າເຂົາເຈົ້າເຊື່ອຟັງ?
11 ຕັ້ງໃຈຟັງການຊີ້ນຳແລະເຮັດຕາມ. ພະເຢໂຫວາບອກວິທີທີ່ກີເດໂອນຈະທຳລາຍແທ່ນບູຊາຂອງພໍ່ລາວ ແລະຍັງບອກວ່າຈະຕັ້ງແທ່ນບູຊາຂອງເພິ່ນຢູ່ບ່ອນໃດ ແລະຈະຖວາຍສັດຫຍັງແດ່ເປັນເຄື່ອງບູຊາ. ກີເດໂອນເຮັດຕາມການຊີ້ນຳຂອງພະເຢໂຫວາທັນທີໂດຍບໍ່ສົງໄສ. ທຸກມື້ນີ້ ຜູ້ດູແລກໍໄດ້ຮັບການຊີ້ນຳຈາກອົງການຂອງພະເຢໂຫວາໂດຍທາງຈົດໝາຍ ຄຳປະກາດ ແລະຄູ່ມືຕ່າງໆທີ່ຊ່ວຍໃຫ້ພີ່ນ້ອງທຸກຄົນປອດໄພແລະສະໜິດກັບພະເຢໂຫວາຫຼາຍຂຶ້ນ. ເຮົາຮັກຜູ້ດູແລທີ່ເຮັດຕາມການຊີ້ນຳຂອງອົງການຢ່າງສັດຊື່! ເມື່ອເຂົາເຈົ້າເຮັດແບບນັ້ນ ພີ່ນ້ອງທຸກຄົນໃນປະຊາຄົມກໍໄດ້ຮັບປະໂຫຍດ.—ເພງ. 119:112
12. ເມື່ອມີການປັບປ່ຽນການຊີ້ນຳຈາກອົງການ ຜູ້ດູແລຈະເຮັດຕາມຄຳແນະນຳໃນເຮັບເຣີ 13:17 ແນວໃດ?
12 ພ້ອມທີ່ຈະປັບປ່ຽນ. ຂໍໃຫ້ຄິດເຖິງຕອນທີ່ພະເຢໂຫວາບອກກີເດໂອນໃຫ້ຄັດຈຳນວນທະຫານອອກຫຼາຍກວ່າ 99 ເປີເຊັນ. (ຜຕສ. 7:8) ກີເດໂອນອາດຈະຄິດວ່າ: ‘ຕ້ອງເຮັດຂະໜາດນີ້ເລີຍຫວາ? ແລ້ວຈະຊະນະເຂົາເຈົ້າໄດ້ຢູ່ບໍ?’ ເຖິງວ່າຈະເປັນແນວນັ້ນ ແຕ່ລາວກໍເຊື່ອຟັງພະເຢໂຫວາ. ຜູ້ດູແລໃນທຸກມື້ນີ້ກໍຮຽນແບບກີເດໂອນໄດ້ໂດຍເຊື່ອຟັງແມ່ນແຕ່ຕອນທີ່ອົງການບອກໃຫ້ເຮັດບາງຢ່າງທີ່ບໍ່ຄືເກົ່າ. (ອ່ານເຮັບເຣີ 13:17) ຕົວຢ່າງເຊັ່ນ: ໃນປີ 2014 ຄະນະກຳມະການປົກຄອງໄດ້ປັບປ່ຽນວິທີການໃຊ້ເງິນສຳລັບການສ້າງຫໍປະຊຸມແລະຫໍປະຊຸມໃຫຍ່. (2ກຣ. 8:12-14) ແຕ່ກີ້ ຖ້າປະຊາຄົມໃດຢາກສ້າງຫໍປະຊຸມ ປະຊາຄົມນັ້ນຈະຢືມເງິນຈາກອົງການມາສ້າງ ແລ້ວຈາກນັ້ນກໍຕ້ອງຈ່າຍໃຫ້ອົງການຄືນ. ແຕ່ຕອນນີ້ ຖ້າປະຊາຄົມໃດມີຄວາມຈຳເປັນທີ່ຈະຕ້ອງສ້າງຫໍປະຊຸມເຖິງວ່າຈະບໍ່ຄ່ອຍມີເງິນບໍລິຈາກ ອົງການກໍຈະເອົາເງິນໃຫ້ເຊິ່ງເງິນນັ້ນມາຈາກເງິນບໍລິຈາກຂອງພີ່ນ້ອງທຸກປະຊາຄົມທົ່ວໂລກ. ຕອນທີ່ໂຮເຊໄດ້ຍິນການປ່ຽນແປງເລື່ອງນີ້ ທຳອິດລາວສົງໄສວ່າອົງການຕັດສິນໃຈແບບນີ້ມັນດີແທ້ໆບໍ? ລາວຄິດວ່າ: ‘ຖ້າເຮັດແບບນີ້ ຄືຊິບໍ່ມີໂອກາດໄດ້ສ້າງຫໍປະຊຸມໃໝ່ໆແມ່ນແຕ່ຫຼັງດຽວ ແລະຢູ່ປະເທດເຮົາບໍ່ມີໃຜເຮັດແບບນີ້ດອກ.’ ແຕ່ສິ່ງໃດຊ່ວຍໂຮເຊໃຫ້ເຮັດຕາມການຕັດສິນໃຈຂອງອົງການໃນເລື່ອງນີ້? ລາວບອກວ່າ: “ຄຳເວົ້າທີ່ຢູ່ໃນສຸພາສິດ 3:5, 6 ເຕືອນຂ້ອຍໃຫ້ວາງໃຈພະເຢໂຫວາ. ແລ້ວອົງການຂອງພະເຢໂຫວາກໍຕັດສິນໃຈຖືກແທ້ໆ! ເພາະທຸກຢ່າງອອກມາດີຫຼາຍ ຕອນນີ້ບໍ່ພຽງແຕ່ສາມາດສ້າງຫໍປະຊຸມໄດ້ຫຼາຍຂຶ້ນເທົ່ານັ້ນ ແຕ່ເຮົາທຸກຄົນຍັງໄດ້ຮຽນຮູ້ທີ່ຈະບໍລິຈາກແບບສະເລ່ຍກັນຄືກັບທີ່ຄຳພີໄບເບິນບອກໄວ້.”
ເຖິງຈະຢູ່ໃນເຂດທີ່ມີການສັ່ງຫ້າມ ແຕ່ເຮົາກໍປະກາດຢ່າງກ້າຫານໄດ້ (ເບິ່ງຂໍ້ 13)
13. (ກ) ກີເດໂອນໝັ້ນໃຈໃນເລື່ອງຫຍັງ? (ຂ) ຜູ້ດູແລຈະຮຽນແບບກີເດໂອນແນວໃດ? (ເບິ່ງຮູບພາບ)
13 ເຮັດຕາມຄວາມຕ້ອງການຂອງພະເຢໂຫວາຢ່າງກ້າຫານ. ກີເດໂອນເຊື່ອຟັງພະເຢໂຫວາເຖິງວ່າຈະຢ້ານແລະຕ້ອງສ່ຽງອັນຕະລາຍ. (ຜຕສ. 9:17) ແຕ່ຫຼັງຈາກທີ່ພະເຢໂຫວາຮັບຮອງກັບກີເດໂອນ ລາວກໍໝັ້ນໃຈວ່າພະເຢໂຫວາຈະຊ່ວຍລາວໃຫ້ປົກປ້ອງປະຊາຊົນຂອງເພິ່ນ. ຜູ້ດູແລທີ່ຢູ່ໃນເຂດທີ່ວຽກຂອງເຮົາຖືກສັ່ງຫ້າມກໍຮຽນແບບກີເດໂອນ. ເຂົາເຈົ້ານຳໜ້າໃນການປະຊຸມແລະປະກາດຢ່າງກ້າຫານເຖິງຈະຖືກຂົ່ມຂູ່ວ່າຈະຖືກຈັບ ຖືກສອບສວນ ຖືກທຳຮ້າຍທາງຮ່າງກາຍ ຫຼືອາດຕ້ອງຕົກວຽກ. c ໃນລະຫວ່າງຄວາມທຸກລຳບາກຄັ້ງໃຫຍ່ ຜູ້ດູແລກໍຕ້ອງກ້າຫານຫຼາຍກວ່ານັ້ນອີກເພື່ອຈະເຊື່ອຟັງຄຳສັ່ງທີ່ອາດຕ້ອງເຮັດໃຫ້ສ່ຽງອັນຕະລາຍ. ຄຳແນະນຳນັ້ນອາດກ່ຽວຂ້ອງກັບການປະກາດຄຳພິພາກສາທີ່ເປັນຄືກັບໝາກເຫັບຫຼືອາດເປັນຄຳແນະນຳທີ່ຊ່ວຍໃຫ້ເຮົາລອດຊີວິດຕອນທີ່ໂຄກຂອງແຜ່ນດິນມາໂຄກມາໂຈມຕີປະຊາຊົນຂອງພະເຢໂຫວາ.—ເອເຊກ. 38:18; ພນມ. 16:21
ຕອນທີ່ຮູ້ສຶກວ່າຍາກທີ່ຈະອົດທົນ
14. ເປັນຫຍັງຈຶ່ງຍາກທີ່ກີເດໂອນຈະອົດທົນ?
14 ກີເດໂອນຕ້ອງເຮັດວຽກໜັກຫຼາຍໃນຖານະທີ່ເປັນຜູ້ຕັດສິນ. ຕອນທີ່ລາວຕໍ່ສູ້ກັບພວກມີດີອານໃນຕອນກາງຄືນຈົນພວກນັ້ນໄດ້ແຕກໜີໄປ ກີເດໂອນໄດ້ໄລ່ຕາມເຂົາເຈົ້າໄປຕັ້ງແຕ່ຮ່ອມພູເຢດຊະເຣເອນຈົນໄປຮອດແມ່ນ້ຳຈໍແດນ ເຊິ່ງໃນລະຫວ່າງທາງນັ້ນອາດຈະມີຟຸ່ມໜາມແລະຫຍ້າທີ່ໜາແໜ້ນ. (ຜຕສ. 7:22) ແຕ່ກີເດໂອນບໍ່ໄດ້ຢຸດຢູ່ສ່ຳນັ້ນ. ລາວກັບທະຫານອີກ 300 ຄົນໄດ້ໄລ່ຕິດຕາມພວກສັດຕູໄປເຖິງວ່າຈະຮູ້ສຶກເມື່ອຍຫຼາຍ. ແລະໃນທີ່ສຸດເຂົາເຈົ້າກໍໄລ່ທັນພວກສັດຕູແລະເອົາຊະນະພວກນັ້ນໄດ້.—ຜຕສ. 8:4-12
15. ເປັນຫຍັງຈຶ່ງຍາກທີ່ຜູ້ດູແລຈະອົດທົນ?
15 ບາງເທື່ອຜູ້ດູແລອາດຮູ້ສຶກໝົດແຮງຫຼືເມື່ອຍທັງກາຍແລະໃຈຍ້ອນເບິ່ງແຍງປະຊາຄົມແລະຄອບຄົວຂອງຕົວເອງ. ເມື່ອເປັນແບບນັ້ນ ຜູ້ດູແລຈະຮຽນແບບກີເດໂອນໄດ້ແນວໃດ?
ພີ່ນ້ອງຫຼາຍຄົນທີ່ຕ້ອງການຄວາມຊ່ວຍເຫຼືອໄດ້ຮັບກຳລັງໃຈຈາກຜູ້ດູແລ (ເບິ່ງຂໍ້ 16-17)
16-17. ສິ່ງໃດຊ່ວຍກີເດໂອນໃຫ້ອົດທົນໄດ້? ແລະຜູ້ດູແລສາມາດໝັ້ນໃຈໃນເລື່ອງຫຍັງ? (ເອຊາຢາ 40:28-31) (ເບິ່ງຮູບພາບ)
16 ໝັ້ນໃຈວ່າພະເຢໂຫວາຈະໃຫ້ກຳລັງກັບເຈົ້າ. ກີເດໂອນໝັ້ນໃຈວ່າພະເຢໂຫວາຈະໃຫ້ກຳລັງກັບລາວແລະຊ່ວຍລາວໃຫ້ເຂັ້ມແຂງ ແລ້ວພະເຢໂຫວາກໍເຮັດແບບນັ້ນແທ້ໆ. (ຜຕສ. 6:14, 34) ມີເທື່ອໜຶ່ງທີ່ກີເດໂອນກັບທະຫານຂອງລາວໄດ້ແລ່ນໄລ່ຕາມກະສັດມີດີອານ 2 ອົງທີ່ອາດກຳລັງຂີ່ອູດໜີໄປ. ພະເຢໂຫວາກໍໄດ້ຊ່ວຍລາວກັບທະຫານໃຫ້ຈັບກະສັດ 2 ອົງນັ້ນໄດ້ແລະຊະນະໃນການຕໍ່ສູ້. (ຜຕສ. 8:12, 21) ຜູ້ດູແລກໍວາງໃຈພະເຢໂຫວາໄດ້ ເພາະເພິ່ນ “ບໍ່ເຄີຍເມື່ອຍຫຼືໝົດແຮງ.” ເພິ່ນຈະໃຫ້ກຳລັງກັບຜູ້ດູແລເພື່ອຊ່ວຍເຂົາເຈົ້າໃຫ້ເຮັດວຽກມອບໝາຍຕໍ່ໆໄປ.—ອ່ານເອຊາຢາ 40:28-31
17 ໃຫ້ເຮົາມາເບິ່ງປະສົບການຂອງພີ່ນ້ອງມັດທິວ ເຊິ່ງເປັນຄົນໜຶ່ງໃນຄະນະກຳມະການປະສານງານກັບໂຮງໝໍ. ສິ່ງໃດຊ່ວຍລາວໃຫ້ອົດທົນໄດ້? ມັດທິວບອກວ່າ: “ຂ້ອຍມີກຳລັງອົດທົນໄດ້ທຸກສິ່ງແທ້ໆຄືກັບທີ່ບອກໄວ້ໃນຟີລິບປອຍ 4:13. ຫຼາຍເທື່ອຕອນທີ່ຂ້ອຍເມື່ອຍທັງກາຍແລະໃຈຈົນຮູ້ສຶກວ່າເຮັດຕໍ່ບໍ່ໄຫວແລ້ວ ຂ້ອຍຈະອະທິດຖານຢ່າງຈິງຈັງຂໍໃຫ້ພະເຢໂຫວາຊ່ວຍຂ້ອຍໃຫ້ມີແຮງແລະກັບມາເຂັ້ມແຂງໄດ້ອີກເພື່ອຂ້ອຍຈະຊ່ວຍພີ່ນ້ອງຕໍ່ໄປໄດ້. ທຸກເທື່ອທີ່ອະທິດຖານແລ້ວ ຂ້ອຍກໍຮູ້ສຶກເລີຍວ່າພະເຢໂຫວາໃຫ້ກຳລັງກັບຂ້ອຍ ເຮັດໃຫ້ຂ້ອຍມີແຮງຂຶ້ນມາອີກແລະເຮັດໃຫ້ຂ້ອຍອົດທົນໄດ້.” ຜູ້ດູແລທີ່ທຸ່ມເທຕົວເອງກໍເປັນຄືກັບກີເດໂອນ. ເຂົາເຈົ້າອາດເຈິອຸປະສັກຫຼາຍຢ່າງຕອນທີ່ເສຍສະລະຕົວເອງເພື່ອເອົາໃຈໃສ່ຝູງແກະຂອງພະເຈົ້າ. ທີ່ຈິງ ເຂົາເຈົ້າຄວນຈຽມຕົວແລະບໍ່ເຮັດເກີນຂີດຈຳກັດຂອງຕົວເອງ ແຕ່ເຂົາເຈົ້າກໍໝັ້ນໃຈໄດ້ວ່າພະເຢໂຫວາຈະຟັງຄຳອະທິດຖານຂໍຄວາມຊ່ວຍເຫຼືອຂອງເຂົາເຈົ້າ. ແລ້ວເພິ່ນຈະຊ່ວຍໃຫ້ເຂົາເຈົ້າມີກຳລັງທີ່ຈະອົດທົນໄດ້.—ເພງ. 116:1; ຟລປ. 2:13
18. ຜູ້ດູແລຈະຮຽນແບບກີເດໂອນໄດ້ແນວໃດ?
18 ຜູ້ດູແລໄດ້ບົດຮຽນຫຼາຍຢ່າງຈາກຕົວຢ່າງຂອງກີເດໂອນ. ຜູ້ດູແລຕ້ອງເປັນຄົນຖ່ອມແລະຈຽມຕົວທັງຕອນທີ່ຮັບເອົາວຽກມອບໝາຍແລະຕອນທີ່ຖືກຕຳໜິຫຼືໄດ້ຮັບຄຳຊົມເຊີຍ. ເຂົາເຈົ້າຕ້ອງເຊື່ອຟັງແລະກ້າຫານ ໂດຍສະເພາະເມື່ອຈຸດຈົບຂອງໂລກນີ້ມາໃກ້ແລ້ວ. ນອກຈາກນັ້ນ ເຂົາເຈົ້າຕ້ອງໝັ້ນໃຈວ່າບໍ່ວ່າຈະເຈິອຸປະສັກຫຍັງ ພະເຢໂຫວາຈະໃຫ້ກຳລັງກັບເຂົາເຈົ້າແລະຊ່ວຍໃຫ້ເຂົາເຈົ້າເຂັ້ມແຂງ. ຍ້ອນແນວນີ້ ເຮົາທຸກຄົນຈຶ່ງເຫັນຄ່າຜູ້ດູແລທີ່ເຮັດວຽກໜັກແລະເຮົາຮູ້ສຶກ “ຮັກແລະນັບຖືຄົນແບບນັ້ນ.”—ຟລປ. 2:29
ເພງ 120 ຮຽນແບບຄວາມອ່ອນໂຍນຂອງພະຄລິດ
a ກີເດໂອນໄດ້ຮັບການແຕ່ງຕັ້ງຈາກພະເຢໂຫວາໃຫ້ດູແລແລະປົກປ້ອງປະຊາຊົນຂອງເພິ່ນ. ໃນຊ່ວງທີ່ເຂົາເຈົ້າເຈິຄວາມຍາກລຳບາກ ລາວກໍໄດ້ຮັບໃຊ້ພະເຢໂຫວາຢ່າງສັດຊື່ເປັນເວລາ 40 ປີ. ແຕ່ລາວກໍເຈິບັນຫາຫຼາຍຢ່າງ. ເຮົາຈະມາເບິ່ງນຳກັນວ່າຕົວຢ່າງຂອງລາວຊ່ວຍຜູ້ດູແລໃນທຸກມື້ນີ້ແນວໃດເມື່ອເຈິກັບບັນຫາ.
b ຄວາມຖ່ອມແລະຄວາມຈຽມຕົວຄ້າຍຄືກັນຫຼາຍ. ຖ້າເຮົາເປັນຄົນຈຽມຕົວ ເຮົາກໍຈະຮູ້ຂີດຈຳກັດຂອງຕົວເອງ. ແລະຖ້າເຮົາເປັນຄົນຖ່ອມ ເຮົາກໍຈະເບິ່ງວ່າຄົນອື່ນດີກວ່າເຮົາ. (ຟລປ. 2:3) ຕາມປົກກະຕິແລ້ວ ຄົນຈຽມຕົວຈະເປັນຄົນຖ່ອມນຳ.
c ເບິ່ງບົດຄວາມທີ່ຊື່ວ່າ “ນະມັດສະການພະເຢໂຫວາຕໍ່ໆໄປເຖິງວ່າຈະຖືກສັ່ງຫ້າມ” ໃນຫໍສັງເກດການ ເດືອນ ກໍລະກົດ ປີ 2019 ໜ້າ 10-11 ຂໍ້ 10-13
