ບົດຄວາມສຶກສາທີ 27
ເປັນຫຍັງເຮົາຄວນຢ້ານຢຳພະເຢໂຫວາ?
“ພວກເຈົ້າຕ້ອງຢ້ານຢຳພະເຢໂຫວາພະເຈົ້າຂອງພວກເຈົ້າ.”—ພບຍ. 10:20, ລ.ມ.
ເພງ 8 ພະເຢໂຫວາເປັນທີ່ເພິ່ງຂອງພວກເຮົາ
ໃຈຄວາມສຳຄັນ a
1-2. ຕາມພະບັນຍັດ 10:20 ເຮົາຕ້ອງເຮັດຫຍັງຖ້າເຮົາຢາກເປັນໝູ່ກັບພະເຈົ້າ?
ຖ້າເຈົ້າຢາກເປັນໝູ່ສະໜິດກັບໃຜຄົນໜຶ່ງໄປດົນໆເຈົ້າຕ້ອງເປັນຄົນແບບໃດ? ເຈົ້າອາດຈະຕອບທັນທີວ່າໝູ່ທີ່ດີຈະຕ້ອງຮັກແລະຊ່ວຍເຫຼືອກັນ. ແຕ່ເຈົ້າອາດຈະບໍ່ຄິດວ່າຄວາມຢ້ານຈະເຮັດໃຫ້ຄົນເຮົາເປັນໝູ່ສະໜິດກັນໄດ້. ແຕ່ໃນຂໍ້ຄຳພີຫຼັກຂອງບົດຄວາມນີ້ບອກວ່າຄົນທີ່ຢາກສະໜິດກັບພະເຢໂຫວາຕ້ອງ “ຢ້ານຢຳ” ເພິ່ນ.—ອ່ານພະບັນຍັດ 10:20
2 ບໍ່ວ່າເຮົາຈະຮັບໃຊ້ພະເຢໂຫວາມາດົນສ່ຳໃດແລ້ວ ເຮົາທຸກຄົນກໍຕ້ອງຢ້ານຢຳເພິ່ນສະເໝີ. ແຕ່ການຢ້ານຢຳພະເຢໂຫວາໝາຍຄວາມວ່າແນວໃດ? ສິ່ງໃດຈະຊ່ວຍເຮົາໃຫ້ຢ້ານຢຳເພິ່ນ? ແລະເຮົາຈະໄດ້ບົດຮຽນຫຍັງຈາກໂອບາດີຢາ ປະໂລຫິດໃຫຍ່ເຢໂຮຢາດາແລະກະສັດເຢໂຮອາດກ່ຽວກັບການຢ້ານຢຳພະເຈົ້າ?
ການຢ້ານຢຳພະເຢໂຫວາໝາຍຄວາມວ່າແນວໃດ?
3. ຄວາມຢ້ານມີປະໂຫຍດກັບເຮົາແນວໃດ?
3 ການຢ້ານຢຳພະເຢໂຫວາຄືການຢ້ານວ່າຈະເຮັດໃຫ້ເພິ່ນເສຍໃຈ. ເມື່ອໄດ້ຍິນຄຳວ່າຢ້ານ ເຮົາອາດຮູ້ສຶກບໍ່ດີ. ແຕ່ຄວາມຢ້ານກໍມີປະໂຫຍດແລະເຮັດໃຫ້ເຮົາຕັດສິນໃຈຢ່າງສະຫຼາດໄດ້ ເຊັ່ນ: ການຢ້ານວ່າຈະຕົກຈາກບ່ອນທີ່ສູງກໍຈະເຮັດໃຫ້ເຮົາບໍ່ໄປຢູ່ໃກ້ໜ້າຜາຫຼາຍເກີນໄປ. ການຢ້ານວ່າຈະໄດ້ຮັບບາດເຈັບຈະເຮັດໃຫ້ເຮົາບໍ່ໄປຢູ່ໃນບ່ອນທີ່ເຫັນວ່າບໍ່ປອດໄພ. ແລະການຢ້ານຈະເສຍໝູ່ຫຼືມີບັນຫາກັບຄົນທີ່ເຮົາຮັກຈະເຮັດໃຫ້ເຮົາລະວັງທີ່ຈະບໍ່ເວົ້າຫຼືບໍ່ເຮັດບາງຢ່າງທີ່ເຮັດໃຫ້ເຂົາເຈົ້າເສຍໃຈ.
4. ຊາຕານຢາກໃຫ້ເຮົາຮູ້ສຶກແນວໃດກັບພະເຢໂຫວາ?
4 ຊາຕານຢາກໃຫ້ຜູ້ຄົນຢ້ານພະເຢໂຫວາ. ມັນຢາກໃຫ້ເຮົາຄິດຄືກັບເອລີຟັດ ນັ້ນກໍຄືຢາກໃຫ້ເຮົາເຊື່ອວ່າພະເຢໂຫວາເປັນພະເຈົ້າທີ່ໃຈຮ້າຍແລະຢາກລົງໂທດມະນຸດ ແລະເຮົາບໍ່ມີທາງເຮັດໃຫ້ພະເຈົ້າພໍໃຈໄດ້. (ໂຢບ 4:18, 19) ມັນຢາກໃຫ້ເຮົາຢ້ານພະເຢໂຫວາຈົນເຊົາຮັບໃຊ້ເພິ່ນ. ເຮົາບໍ່ຄວນຢ້ານພະເຢໂຫວາ ແຕ່ເຮົາຄວນຢ້ານທີ່ຈະເຮັດໃຫ້ເພິ່ນເສຍໃຈ.
5. ການຢ້ານຢຳພະເຢໂຫວາໝາຍຄວາມວ່າແນວໃດ?
5 ຄົນທີ່ຢ້ານຢຳພະເຢໂຫວາຈະຮັກເພິ່ນແລະບໍ່ຢາກເຮັດສິ່ງໃດທີ່ຈະທຳລາຍສາຍສຳພັນທີ່ລາວມີກັບພະເຢໂຫວາ. ພະເຢຊູກໍ “ຢຳເກງ” ພະເຢໂຫວາ. (ຮຣ. 5:7) ເພິ່ນບໍ່ໄດ້ຮູ້ສຶກຢ້ານພະເຢໂຫວາ ແຕ່ເພິ່ນຮັກແລະເຕັມໃຈເຊື່ອຟັງພະເຢໂຫວາ. (ອຊຢ. 11:2, 3; ຢຮ. 14:21, 31) ເຮົາກໍສາມາດເຮັດຄືກັບພະເຢຊູໄດ້ໂດຍສະແດງຄວາມນັບຖືແລະຢ້ານຢຳພະເຢໂຫວາຍ້ອນເພິ່ນສະແດງຄວາມຮັກໃນທຸກສິ່ງທີ່ເພິ່ນເຮັດ. ເພິ່ນເປັນພະເຈົ້າທີ່ສະຫຼາດ ຍຸຕິທຳ ແລະມີລິດເດດ. ນອກຈາກນັ້ນ ເຮົາຍັງຮູ້ວ່າພະເຢໂຫວາຮັກເຮົາຫຼາຍແລະສົນໃຈວ່າເຮົາເຮັດຕາມທີ່ເພິ່ນສອນຫຼືບໍ່. ແລະສິ່ງທີ່ເຮົາເຮັດມີຜົນຕໍ່ເພິ່ນນຳ ເຊັ່ນ: ຖ້າເຮົາບໍ່ເຊື່ອຟັງ ພະເຢໂຫວາກໍເສຍໃຈ ແລະຖ້າເຮົາເຊື່ອຟັງ ເພິ່ນກໍດີໃຈແລະມີຄວາມສຸກ.—ເພງ. 78:41; ສຸພາ. 27:11
ສິ່ງທີ່ຈະຊ່ວຍເຮົາໃຫ້ຢ້ານຢຳພະເຢໂຫວາ
6. ສິ່ງໜຶ່ງທີ່ຈະຊ່ວຍເຮົາໃຫ້ຢ້ານຢຳພະເຢໂຫວາແມ່ນຫຍັງ? (ຄຳເພງ 34:11)
6 ຄົນເຮົາບໍ່ໄດ້ເກີດມາພ້ອມກັບຄວາມຢ້ານຢຳພະເຢໂຫວາແບບອັດຕະໂນມັດ ແຕ່ເຮົາຕ້ອງອອກຄວາມພະຍາຍາມທີ່ຈະມີຄຸນລັກສະນະນີ້. (ອ່ານຄຳເພງ 34:11) ສິ່ງໜຶ່ງທີ່ຈະຊ່ວຍເຮົາໃຫ້ມີຄຸນລັກສະນະນີ້ກໍຄືສັງເກດເບິ່ງສິ່ງທີ່ພະເຢໂຫວາສ້າງ. ແຮ່ງເຮົາເຫັນສະຕິປັນຍາ ລິດເດດ ແລະຄວາມຮັກທີ່ເພິ່ນສະແດງຕໍ່ເຮົາຈາກ “ສິ່ງທີ່ເພິ່ນສ້າງ” ເຮົາກໍແຮ່ງຈະຮັກແລະນັບຖືເພິ່ນຫຼາຍຂຶ້ນ. (ຣມ. 1:20) ພີ່ນ້ອງຍິງຄົນໜຶ່ງທີ່ຊື່ເອດຣຽນບອກວ່າ “ເມື່ອຂ້ອຍສັງເກດເບິ່ງສິ່ງທີ່ຢູ່ໃນທຳມະຊາດແລະເຫັນວ່າພະເຢໂຫວາເປັນພະເຈົ້າທີ່ສະຫຼາດຂະໜາດໃດ ຂ້ອຍຮູ້ເລີຍວ່າພະເຢໂຫວາຮູ້ດີວ່າສິ່ງໃດດີທີ່ສຸດສຳລັບຂ້ອຍ.” ເມື່ອເອດຣຽນໄດ້ຄິດຕຶກຕອງກ່ຽວກັບສິ່ງນີ້ ລາວກໍບອກວ່າ “ຂ້ອຍຈະບໍ່ຍອມໃຫ້ສິ່ງໃດມາທຳລາຍສາຍສຳພັນທີ່ຂ້ອຍມີຕໍ່ພະເຢໂຫວາ ເຊິ່ງເປັນຜູ້ໃຫ້ຊີວິດຂ້ອຍ.” ໃນອາທິດນີ້ ໃຫ້ເຈົ້າລອງຫາເວລາທີ່ຈະຄິດຕຶກຕອງກ່ຽວກັບສິ່ງທີ່ພະເຢໂຫວາສ້າງໄດ້ບໍ? ການເຮັດແບບນີ້ຈະຊ່ວຍເຈົ້າໃຫ້ຮັກແລະນັບຖືພະເຢໂຫວາຫຼາຍຂຶ້ນ.—ເພງ. 111:2, 3
7. ການອະທິດຖານຊ່ວຍເຮົາໃຫ້ຢ້ານຢຳພະເຢໂຫວາແນວໃດ?
7 ອີກສິ່ງໜຶ່ງທີ່ຈະຊ່ວຍເຮົາໃຫ້ຢ້ານຢຳພະເຢໂຫວາກໍຄືການອະທິດຖານເປັນປະຈຳ. ແຮ່ງເຮົາອະທິດຖານ ເຮົາກໍແຮ່ງຮູ້ຈັກເພິ່ນດີຂຶ້ນ. ທຸກເທື່ອທີ່ເຮົາຂໍພະເຢໂຫວາໃຫ້ກຳລັງກັບເຮົາເພື່ອຈະອົດທົນກັບຄວາມຍາກລຳບາກໄດ້ ມັນກໍແຮ່ງເຮັດໃຫ້ເຮົາເຫັນວ່າເພິ່ນມີພະລັງອຳນາດຫຼາຍສ່ຳໃດ. ເມື່ອເຮົາຂອບໃຈພະເຢໂຫວາທີ່ຍອມເສຍສະລະລູກຊາຍທີ່ຮັກຂອງເພິ່ນ ມັນກໍແຮ່ງເຮັດໃຫ້ເຮົາຄິດວ່າເພິ່ນຮັກເຮົາຫຼາຍສ່ຳໃດ. ແລະເມື່ອເຮົາອ້ອນວອນຂໍເພິ່ນໃຫ້ຊ່ວຍເຮົາໃຫ້ຮັບມືກັບບັນຫາ ມັນກໍແຮ່ງເຮັດໃຫ້ເຮົາຮູ້ວ່າເພິ່ນເປັນພະເຈົ້າທີ່ສະຫຼາດຫຼາຍ. ການອະທິດຖານແບບນີ້ຊ່ວຍເຮົາໃຫ້ນັບຖືພະເຢໂຫວາຫຼາຍຂຶ້ນແລະເຮັດໃຫ້ເຮົາຕັ້ງໃຈແທ້ໆທີ່ຈະບໍ່ຍອມໃຫ້ສິ່ງໃດມາທຳລາຍສາຍສຳພັນທີ່ເຮົາມີກັບເພິ່ນ.
8. ເຮົາຕ້ອງເຮັດຫຍັງອີກເພື່ອຈະຢ້ານຢຳພະເຢໂຫວາສະເໝີ?
8 ເຮົາຈະຢ້ານຢຳພະເຢໂຫວາສະເໝີໄດ້ໂດຍການອ່ານແລະຄົ້ນຄວ້າຄຳພີໄບເບິນເປັນປະຈຳແລະມີເປົ້າໝາຍທີ່ຈະຮຽນຮູ້ຈາກຕົວຢ່າງທີ່ດີແລະບໍ່ດີຂອງຄົນໃນຄຳພີໄບເບິນ. ໃຫ້ເຮົາມາເບິ່ງຕົວຢ່າງຜູ້ຮັບໃຊ້ທີ່ສັດຊື່ສອງຄົນຂອງພະເຢໂຫວາ ນັ້ນກໍຄືໂອບາດີຢາເຊິ່ງເປັນຜູ້ເບິ່ງແຍງວັງຂອງກະສັດອາຮາບ ແລະປະໂລຫິດໃຫຍ່ເຢໂຮຢາດາ. ນອກຈາກນັ້ນ ເຮົາຈະມາເບິ່ງວ່າເຮົາໄດ້ບົດຮຽນຫຍັງຈາກເຢໂຮອາດກະສັດຂອງຢູດາ ເຊິ່ງຕອນທຳອິດເປັນກະສັດທີ່ດີແຕ່ຕໍ່ມາໄດ້ເຊົາຮັບໃຊ້ພະເຢໂຫວາ.
ກ້າຫານຄືກັບໂອບາດີຢາ
9. ການທີ່ໂອບາດີຢາຢ້ານຢຳພະເຢໂຫວາເປັນປະໂຫຍດກັບລາວແນວໃດ? (1 ກະສັດ 18:3, 12)
9 ເທື່ອທຳອິດທີ່ຄຳພີໄບເບິນເວົ້າເຖິງໂອບາດີຢາ b ຄຳພີໄບເບິນບອກວ່າ “ໂອບາດີຢາເປັນຄົນທີ່ຢ້ານຢຳພະເຢໂຫວາຫຼາຍ.” (ອ່ານ 1 ກະສັດ 18:3, 12) ການທີ່ໂອບາດີຢາຢ້ານຢຳພະເຢໂຫວາເປັນປະໂຫຍດກັບລາວແນວໃດ? ຍ້ອນລາວຢ້ານຢຳພະເຢໂຫວາ ລາວຈຶ່ງເປັນຄົນສັດຊື່ແລະໄວ້ໃຈໄດ້. ນີ້ຈຶ່ງເຮັດໃຫ້ກະສັດມອບໝາຍໃຫ້ລາວເບິ່ງແຍງວັງ. (ສົມທຽບກັບນຮຢ. 7:2) ນອກຈາກນັ້ນ ການທີ່ລາວຢ້ານຢຳພະເຢໂຫວາເຮັດໃຫ້ລາວມີຄວາມກ້າຫານເປັນພິເສດ ແລະຄຸນລັກສະນະນີ້ກໍຈຳເປັນຫຼາຍສຳລັບລາວເພາະໃນຕອນນັ້ນກະສັດອາຮາບທີ່ຊົ່ວຮ້າຍກຳລັງປົກຄອງອິດສະຣາເອນ. ອາຮາບ “ຊົ່ວຫຼາຍກວ່າທຸກຄົນທີ່ປົກຄອງກ່ອນລາວ.” (1ກສ. 16:30, ລ.ມ.) ບໍ່ພຽງເທົ່ານັ້ນ ເຢເຊເບນທີ່ເປັນເມຍຂອງອາຮາບເປັນຜູ້ນະມັດສະການພະບາອານ. ເຢເຊເບນຊັງພະເຢໂຫວາຫຼາຍຈົນເຖິງຂັ້ນພະຍາຍາມກຳຈັດການນະມັດສະການແທ້ໃຫ້ໝົດໄປຈາກອິດສະຣາເອນສິບຕະກູນ. ເຢເຊເບນເຖິງຂັ້ນຂ້າຜູ້ພະຍາກອນຂອງພະເຢໂຫວາໄປຫຼາຍຄົນ. (1ກສ. 18:4) ເຫັນໄດ້ວ່າໂອບາດີຢາຢູ່ໃນຊ່ວງເວລາທີ່ຍາກລຳບາກແລະອັນຕະລາຍຫຼາຍສຳລັບຜູ້ທີ່ນະມັດສະການພະເຢໂຫວາ.
10. ໂອບາດີຢາສະແດງໃຫ້ເຫັນແນວໃດວ່າລາວເປັນຄົນກ້າຫານຫຼາຍ?
10 ໂອບາດີຢາສະແດງໃຫ້ເຫັນແນວໃດວ່າລາວເປັນຄົນກ້າຫານຫຼາຍ? ຕອນທີ່ເຢເຊເບນສັ່ງໃຫ້ຂ້າຜູ້ພະຍາກອນຂອງພະເຢໂຫວາ ໂອບາດີຢາໄດ້ເອົາຜູ້ພະຍາກອນຂອງພະເຢໂຫວາ “100 ຄົນໄປເຊື່ອງຢູ່ໃນຖ້ຳ ຖ້ຳລະ 50 ຄົນແລະເອົາເຂົ້າເອົານ້ຳໄປໃຫ້ເຂົາເຈົ້າກິນ.” (1ກສ. 18:13, 14, ລ.ມ.) ຖ້າເຢເຊເບນຮູ້ວ່າໂອບາດີຢາເຮັດແບບນີ້ ໂອບາດີຢາຈະຕ້ອງຖືກຂ້າແນ່ນອນ. ທີ່ຈິງ ໂອບາດີຢາກໍເປັນຄົນທຳມະດາຄືກັນກັບເຮົາ ລາວຄືຊິຮູ້ສຶກຢ້ານແລະບໍ່ຢາກຕາຍ. ແຕ່ໂອບາດີຢາຮັກພະເຢໂຫວາແລະຮັກຄົນທີ່ຮັບໃຊ້ເພິ່ນຫຼາຍກວ່າຊີວິດຂອງຕົວເອງ.
ເຖິງວ່າວຽກຂອງເຮົາຈະຖືກສັ່ງຫ້າມ ແຕ່ພີ່ນ້ອງຊາຍກໍກ້າຫານທີ່ຈະເອົາປຶ້ມຂອງອົງການໄປສົ່ງໃຫ້ພີ່ນ້ອງ (ເບິ່ງຂໍ້ 11) d
11. ຜູ້ຮັບໃຊ້ຂອງພະເຢໂຫວາໃນທຸກມື້ນີ້ເປັນຄືກັບໂອບາດີຢາແນວໃດ? (ເບິ່ງຮູບພາບ)
11 ຜູ້ຮັບໃຊ້ພະເຢໂຫວາຫຼາຍຄົນໃນທຸກມື້ນີ້ຢູ່ໃນປະເທດທີ່ວຽກຂອງເຮົາຖືກສັ່ງຫ້າມ. ເຂົາເຈົ້ານັບຖືອຳນາດການປົກຄອງ ແຕ່ເຂົາເຈົ້າກໍເປັນຄືກັບໂອບາດີຢາທີ່ບໍ່ຍອມເຊົານະມັດສະການພະເຢໂຫວາບໍ່ວ່າຈະເກີດຫຍັງຂຶ້ນກໍຕາມ. (ມທ. 22:21) ພີ່ນ້ອງເຫຼົ່ານີ້ຢ້ານຢຳພະເຈົ້າໂດຍເຊື່ອຟັງເພິ່ນຫຼາຍກວ່າມະນຸດ. (ກຈກ. 5:29) ເຂົາເຈົ້າເຮັດແບບນັ້ນໂດຍພະຍາຍາມປະກາດແລະປະຊຸມເປັນປະຈຳເຖິງວ່າຈະເຮັດແບບລັບໆ. (ມທ. 10:16, 28) ນອກຈາກນັ້ນ ເຂົາເຈົ້າພະຍາຍາມຊ່ວຍພີ່ນ້ອງໃຫ້ມີສິ່ງຈຳເປັນເພື່ອຈະມີຄວາມເຊື່ອເຂັ້ມແຂງແລະສະໜິດກັບພະເຢໂຫວາຕໍ່ໆໄປ. ໃຫ້ເຮົາມາເບິ່ງຕົວຢ່າງຂອງພີ່ນ້ອງອອງຣີທີ່ຢູ່ປະເທດໜຶ່ງໃນອາຝຼິກກາ ເຊິ່ງວຽກຂອງເຮົາຖືກສັ່ງຫ້າມໃນໄລຍະໜຶ່ງ. ໃນໄລຍະນັ້ນອອງຣີອາສາເອົາປຶ້ມໄປສົ່ງໃຫ້ພີ່ນ້ອງ. ລາວຂຽນວ່າ: “ທີ່ຈິງແລ້ວ ຂ້ອຍເປັນຄົນຂີ້ອາຍຫຼາຍ. ຂ້ອຍຮູ້ເລີຍວ່າທີ່ຂ້ອຍກ້າເຮັດແບບນັ້ນໄດ້ກໍຍ້ອນຂ້ອຍຢ້ານຢຳພະເຢໂຫວາຫຼາຍ.” ຖ້າເປັນເຈົ້າ ເຈົ້າຈະກ້າຫານຄືກັບອອງຣີໄດ້ບໍ? ໄດ້ແທ້ ຖ້າເຈົ້າຝຶກທີ່ຈະຢ້ານຢຳພະເຢໂຫວາຕັ້ງແຕ່ຕອນນີ້.
ສັດຊື່ພັກດີຄືກັບປະໂລຫິດໃຫຍ່ເຢໂຮຢາດາ
12. ປະໂລຫິດໃຫຍ່ເຢໂຮຢາດາກັບເມຍສັດຊື່ພັກດີຕໍ່ພະເຢໂຫວາແນວໃດ?
12 ຍ້ອນປະໂລຫິດໃຫຍ່ເຢໂຮຢາດາຢ້ານຢຳພະເຢໂຫວາ ລາວຈຶ່ງສັດຊື່ພັກດີຕໍ່ເພິ່ນແລະສົ່ງເສີມການນະມັດສະການແທ້. ເຮົາເຫັນເລື່ອງນີ້ໄດ້ຢ່າງຊັດເຈນຕອນທີ່ອາທາລີຢາລູກສາວຂອງເຢເຊເບນຍຶດບັນລັງແລະຕັ້ງໂຕເອງເປັນລາຊີນີ. ຕອນນັ້ນຫຼາຍຄົນຮູ້ສຶກຢ້ານຫຼາຍ ເພາະອາທາລີຢາເປັນຄົນໂຫດຮ້າຍແລະຢາກໄດ້ອຳນາດຫຼາຍ. ອາທາລີຢາເຖິງຂັ້ນພະຍາຍາມຂ້າຫຼານຊາຍຂອງໂຕເອງທັງໝົດເພື່ອຈະຂຶ້ນປົກຄອງ. (2ຂຄ. 22:10, 11) ແຕ່ມີຫຼານຄົນໜຶ່ງຂອງລາວລອດມາໄດ້ນັ້ນກໍຄືເຢໂຮອາດ ຍ້ອນເຢໂຮຊາເບອາເມຍຂອງເຢໂຮຢາດາຊ່ວຍຊີວິດໄວ້. ຜົວເມຍຄູ່ນີ້ໄດ້ເຊື່ອງເຢໂຮອາດໄວ້ແລະລ້ຽງລາວຈົນໃຫຍ່. ໂດຍວິທີນີ້ ເຂົາເຈົ້າໄດ້ປົກປ້ອງເຊື້ອສາຍຂອງດາວິດ. ເຢໂຮຢາດາສັດຊື່ພັກດີຕໍ່ພະເຢໂຫວາແລະບໍ່ຢ້ານອາທາລີຢາເລີຍ.—ສຸພາ. 29:25
13. ຕອນທີ່ເຢໂຮອາດອາຍຸ 7 ປີ ເຢໂຮຢາດາສະແດງໃຫ້ເຫັນອີກເທື່ອໜຶ່ງແນວໃດວ່າລາວສັດຊື່ພັກດີຕໍ່ພະເຢໂຫວາ?
13 ຕອນທີ່ເຢໂຮອາດອາຍຸ 7 ປີ ເຢໂຮຢາດາກໍສະແດງໃຫ້ເຫັນອີກເທື່ອໜຶ່ງວ່າລາວສັດຊື່ພັກດີຕໍ່ພະເຢໂຫວາ. ລາວວາງແຜນເພື່ອໃຫ້ເຢໂຮອາດເຊິ່ງເປັນເຊື້ອສາຍຂອງດາວິດໄດ້ເປັນກະສັດ. ແຕ່ຖ້າແຜນການນັ້ນລົ້ມເຫຼວ ເຢໂຮຢາດາກໍຕ້ອງຖືກຂ້າ. ຍ້ອນພະເຢໂຫວາອວຍພອນ ແຜນການຂອງລາວກໍເລີຍສຳເລັດ. ຫົວໜ້າວົງຕະກູນແລະຄົນເລວີໄດ້ສະໜັບສະໜູນເຢໂຮຢາດາ. ເຢໂຮອາດຈຶ່ງໄດ້ເປັນກະສັດແລະອາທາລີຢາກໍຖືກຂ້າ. (2ຂຄ. 23:1-5, 11, 12, 15; 24:1) ຈາກນັ້ນ “ເຢໂຮຢາດາໄດ້ໃຫ້ກະສັດແລະປະຊາຊົນສັນຍາກັບພະເຢໂຫວາວ່າ ເຂົາເຈົ້າຈະເປັນປະຊາຊົນຂອງພະເຢໂຫວາຕະຫຼອດໄປ.” (2ກສ. 11:17, ລ.ມ.) ນອກຈາກນັ້ນ ເຢໂຮຢາດາຍັງ “ໄດ້ໃຫ້ຄົນຍາມປະຕູທຸກບ່ອນຢູ່ວິຫານຂອງພະເຢໂຫວາເພື່ອຄົນທີ່ບໍ່ສະອາດຈະເຂົ້າໄປໃນວິຫານບໍ່ໄດ້.”—2ຂຄ. 23:19, ລ.ມ.
14. ພະເຢໂຫວາໃຫ້ກຽດເຢໂຮຢາດາແນວໃດຍ້ອນລາວໄດ້ໃຫ້ກຽດເພິ່ນ?
14 ພະເຢໂຫວາເຄີຍບອກວ່າ “ເຮົາຈະໃຫ້ກຽດຜູ້ທີ່ໃຫ້ກຽດເຮົາ.” ແລ້ວເພິ່ນກໍໄດ້ໃຫ້ກຽດເຢໂຮຢາດາແທ້ໆ. (1ຊມ. 2:30, ລ.ມ.) ຕົວຢ່າງເຊັ່ນ ເພິ່ນໃຫ້ມີການບັນທຶກເລື່ອງຂອງເຢໂຮຢາດາໄວ້ໃນຄຳພີໄບເບິນເພື່ອສອນເຮົາ. (ຣມ. 15:4) ນອກຈາກນັ້ນ ຕອນທີ່ເຢໂຮຢາດາຕາຍ ລາວກໍໄດ້ຮັບກຽດເປັນພິເສດໂດຍຖືກຝັງໄວ້ກັບ “ພວກກະສັດຢູ່ເມືອງຂອງດາວິດ ຍ້ອນລາວເຮັດສິ່ງທີ່ດີຫຼາຍຢ່າງໃຫ້ພວກອິດສະຣາເອນ ໃຫ້ພະເຈົ້າທ່ຽງແທ້ ແລະວິຫານຂອງເພິ່ນ.”—2ຂຄ. 24:15, 16, ລ.ມ.
ຖ້າເຮົາຢ້ານຢຳພະເຢໂຫວາຄືກັບປະໂລຫິດໃຫຍ່ເຢໂຮຢາດາ ເຮົາກໍຈະພັກດີຕໍ່ພີ່ນ້ອງແລະຊ່ວຍເຫຼືອເຂົາເຈົ້າ (ເບິ່ງຂໍ້ 15) e
15. ເຮົາໄດ້ບົດຮຽນຫຍັງຈາກເລື່ອງຂອງເຢໂຮຢາດາ? (ເບິ່ງຮູບພາບ)
15 ເລື່ອງຂອງເຢໂຮຢາດາຊ່ວຍໃຫ້ຮູ້ວ່າເຮົາຈະຢ້ານຢຳພະເຢໂຫວາແນວໃດໄດ້ແດ່. ຜູ້ດູແລຮຽນແບບເຢໂຮຢາດາໄດ້ໂດຍເອົາໃຈໃສ່ປົກປ້ອງພີ່ນ້ອງໃນປະຊາຄົມ. (ກຈກ. 20:28) ຜູ້ສູງອາຍຸກໍສາມາດຮຽນແບບເຢໂຮຢາດາໄດ້. ຖ້າເຂົາເຈົ້າຢ້ານຢຳພະເຢໂຫວາແລະສັດຊື່ພັກດີຕໍ່ພະເຢໂຫວາສະເໝີ ເພິ່ນຈະບໍ່ປະຖິ້ມຫຼືເບິ່ງຂ້າມເຂົາເຈົ້າ ແຕ່ເພິ່ນຍັງຈະໃຊ້ເຂົາເຈົ້າໃຫ້ເຮັດວຽກເພື່ອໃຫ້ຄວາມຕ້ອງການຂອງເພິ່ນສຳເລັດ. ນອກຈາກນັ້ນ ພະເຢໂຫວາໃຫ້ກຽດເຢໂຮຢາດາ. ຄົນທີ່ຍັງໜຸ່ມສາມາດຮຽນແບບພະເຢໂຫວາໄດ້ໂດຍນັບຖືແລະໃຫ້ກຽດຜູ້ສູງອາຍຸ ໂດຍສະເພາະແມ່ນພີ່ນ້ອງທີ່ຮັບໃຊ້ຢ່າງສັດຊື່ມາຫຼາຍປີ. (ສຸພາ. 16:31) ແລະເຮົາທຸກຄົນກໍຮຽນແບບຫົວໜ້າວົງຕະກູນແລະຄົນເລວີທີ່ສະໜັບສະໜູນເຢໂຮຢາດາໄດ້ໂດຍພັກດີແລະເຊື່ອຟັງຄົນທີ່ນຳໜ້າໃນປະຊາຄົມແລະອົງການ.—ຮຣ. 13:17
ຢ່າເປັນຄືກັບກະສັດເຢໂຮອາດ
16. ສິ່ງໃດສະແດງໃຫ້ເຫັນວ່າກະສັດເຢໂຮອາດເປັນຄົນທີ່ບໍ່ເຂັ້ມແຂງແລະບໍ່ໝັ້ນຄົງ?
16 ຕອນທຳອິດເຢໂຮອາດເປັນກະສັດທີ່ດີ ເພາະປະໂລຫິດເຢໂຮຢາດາຊ່ວຍລາວໃຫ້ຮັກພະເຢໂຫວາແລະຢາກເຮັດໃຫ້ເພິ່ນພໍໃຈ. (2ກສ. 12:2) ແຕ່ຫຼັງຈາກທີ່ເຢໂຮຢາດາຕາຍ ເຢໂຮອາດກໍໄປຟັງພວກເຈົ້ານາຍທີ່ຫັນໄປນະມັດສະການພະປອມ. ຜົນເປັນແນວໃດ? ລາວກັບປະຊາຊົນ “ເລີ່ມນະມັດສະການເສົາໄມ້ສັກສິດແລະຮູບປັ້ນຕ່າງໆ.” (2ຂຄ. 24:4, 17, 18, ລ.ມ.) ເຖິງວ່າພະເຢໂຫວາຈະຮູ້ສຶກເສຍໃຈຫຼາຍກ່ຽວກັບເລື່ອງນີ້ ແຕ່ເພິ່ນກໍຍັງພະຍາຍາມຊ່ວຍເຂົາເຈົ້າຫຼາຍເທື່ອໂດຍ “ສົ່ງພວກຜູ້ພະຍາກອນມາຊ່ວຍເຂົາເຈົ້າໃຫ້ກັບມາຫາເພິ່ນ . . . ແຕ່ເຂົາເຈົ້າກໍບໍ່ຟັງ.” ກະສັດກັບປະຊາຊົນເຖິງຂັ້ນບໍ່ຍອມຟັງເຊຄາຣີຢາເຊິ່ງເປັນລູກຊາຍຂອງເຢໂຮຢາດາ ທັງໆທີ່ເຊຄາຣີຢາເປັນຜູ້ພະຍາກອນແລະເປັນປະໂລຫິດ ແຖມຍັງເປັນຍາດພີ່ນ້ອງຂອງເຢໂຮອາດນຳ. ບໍ່ພຽງເທົ່ານັ້ນ ເຢໂຮອາດບໍ່ສຳນຶກບຸນຄຸນຄອບຄົວທີ່ເຄີຍຊ່ວຍຊີວິດລາວເລີຍ. ລາວເຖິງຂັ້ນສັ່ງຂ້າເຊຄາຣີຢາ.—2ຂຄ. 22:11; 24:19-22, ລ.ມ.
17. ເຢໂຮອາດມີຈຸດຈົບແນວໃດ?
17 ເຢໂຮອາດບໍ່ໄດ້ຢ້ານຢຳພະເຢໂຫວາສະເໝີ ເລີຍເກີດເລື່ອງທີ່ບໍ່ດີກັບລາວ. ພະເຢໂຫວາບອກວ່າ “ເຮົາຈະບໍ່ເຫັນຄ່າຜູ້ທີ່ບໍ່ນັບຖືເຮົາ.” (1ຊມ. 2:30, ລ.ມ.) ແລ້ວກໍເປັນແບບນັ້ນແທ້ໆເພາະຕໍ່ມາພວກຊີເຣຍເອົາຊະນະເຢໂຮອາດ “ທີ່ມີທະຫານຫຼາຍກວ່າ” ແລະເຮັດໃຫ້ລາວໄດ້ຮັບ “ບາດເຈັບໜັກ” ທັງໆທີ່ກອງທັບພວກຊີເຣຍມີຈຳນວນໜ້ອຍກວ່າ. ຫຼັງຈາກທີ່ພວກຊີເຣຍຍົກກອງທັບກັບໄປ ຄົນຂອງເຢໂຮອາດໄດ້ວາງແຜນຂ້າລາວຍ້ອນລາວຂ້າເຊຄາຣີຢາ ແຕ່ເຢໂຮອາດບໍ່ໄດ້ຖືກຝັງ “ໃນບ່ອນຝັງສົບຂອງພວກກະສັດ” ເພາະປະຊາຊົນເບິ່ງວ່າລາວເປັນກະສັດທີ່ຊົ່ວຮ້າຍຫຼາຍ.—2ຂຄ. 24:23-25; ເບິ່ງຂໍ້ມູນສຳລັບສຶກສາໃນມັດທາຍ 23:35 ຂອງຄຳວ່າ “ບາຣາຂີຢາ” c
18. ຕາມທີ່ບອກໄວ້ໃນເຢເຣມີ 17:7, 8 ເຮົາຈະບໍ່ເປັນຄືກັບເຢໂຮອາດໄດ້ແນວໃດ?
18 ເຮົາໄດ້ບົດຮຽນຫຍັງຈາກເລື່ອງຂອງເຢໂຮອາດ? ເຢໂຮອາດເປັນຄືກັບຕົ້ນໄມ້ທີ່ບໍ່ໄດ້ຢັ່ງຮາກລົງເລິກເຊິ່ງຕ້ອງໄດ້ເພິ່ງໄມ້ຄ້ຳ ແຕ່ເມື່ອບໍ່ມີໄມ້ຄ້ຳເຊິ່ງໝາຍເຖິງເຢໂຮຢາດາບໍ່ຢູ່ແລ້ວ ພໍມີຄົນທີ່ນະມັດສະການພະປອມມາຊັກຈູງ ເຢໂຮອາດກໍຖິ້ມພະເຢໂຫວາໄປ. ຄືກັບຕົ້ນໄມ້ທີ່ບໍ່ໄດ້ຢັ່ງຮາກລົງເລິກແລະບໍ່ມີໄມ້ຄ້ຳ ເມື່ອລົມພັດ ມັນກໍລົ້ມລົງ. ຕົວຢ່າງປຽບທຽບນີ້ເຮັດໃຫ້ເຫັນວ່າ ເຮົາບໍ່ຄວນຢ້ານຢຳພະເຢໂຫວາພຽງເພາະຢາກເຮັດຕາມຄອບຄົວຫຼືຄົນອື່ນໆໃນປະຊາຄົມ. ເພື່ອເຮົາຈະສະໜິດກັບພະເຢໂຫວາສະເໝີ ເຮົາຕ້ອງຮັກແລະຢ້ານຢຳເພິ່ນດ້ວຍຕົວເອງແລະຕ້ອງເຮັດແບບນັ້ນຫຼາຍຂຶ້ນເລື້ອຍໆໂດຍສຶກສາຄົ້ນຄວ້າຄຳພີໄບເບິນ ຄິດຕຶກຕອງ ແລະອະທິດຖານເປັນປະຈຳ.—ອ່ານເຢເຣມີ 17:7, 8; ກລຊ. 2:6, 7
19. ພະເຢໂຫວາຮຽກຮ້ອງຫຍັງຈາກເຮົາ?
19 ພະເຢໂຫວາບໍ່ໄດ້ຮຽກຮ້ອງຈາກເຮົາຫຼາຍເກີນໄປ. ສິ່ງທີ່ເພິ່ນຢາກໄດ້ຈາກເຮົາມີບອກໄວ້ໃນຜູ້ເທສະໜາປ່າວປະກາດ 12:13 (ລ.ມ.) ທີ່ບອກວ່າ “ໃຫ້ຢ້ານຢຳພະເຈົ້າທ່ຽງແທ້ແລະເຮັດຕາມຄຳສັ່ງຂອງພະອົງ ເພາະນີ້ເປັນໜ້າທີ່ທັງໝົດຂອງມະນຸດ.” ຖ້າເຮົາຢ້ານຢຳພະເຢໂຫວາ ບໍ່ວ່າເຮົາຈະເຈິບັນຫາຫຍັງໃນອະນາຄົດ ເຮົາກໍຍັງຈະສັດຊື່ແລະພັກດີຕໍ່ເພິ່ນໄດ້ຄືກັບໂອບາດີຢາແລະເຢໂຮຢາດາ. ແລະຈະບໍ່ມີຫຍັງມາທຳລາຍສາຍສຳພັນທີ່ເຮົາມີກັບພະເຢໂຫວາໄດ້.
ເພງ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
a ຄຳພີໄບເບິນບອກເຮົາໃຫ້ຢ້ານຢຳພະເຈົ້າ. ບົດຄວາມນີ້ຈະຊ່ວຍເຮົາໃຫ້ເຂົ້າໃຈວ່າການຢ້ານຢຳພະເຢໂຫວາໝາຍຄວາມວ່າແນວໃດ ແລະສິ່ງໃດຈະຊ່ວຍເຮົາໃຫ້ຢ້ານຢຳພະເຢໂຫວາ. ນອກຈາກນັ້ນ ເຮົາຍັງຈະມາເບິ່ງວ່າການຢ້ານຢຳພະເຢໂຫວາຈະຊ່ວຍເຮົາແນວໃດໃຫ້ກ້າຫານແລະຮັບໃຊ້ເພິ່ນຢ່າງສັດຊື່ພັກດີຕໍ່ໆໄປ.
b ໂອບາດີຢາຄົນນີ້ບໍ່ແມ່ນຄົນດຽວກັນກັບໂອບາດີຢາທີ່ເປັນຜູ້ພະຍາກອນ ເຊິ່ງເປັນຄົນທີ່ຂຽນປຶ້ມໂອບາດີຢາແລະມີຊີວິດຫຼາຍຮ້ອຍປີຫຼັງຈາກນັ້ນ.
c (ພາສາໄທ)
d ຄຳອະທິບາຍຮູບພາບ: ໃນຮູບພາບສົມມຸດ ໃນປະເທດທີ່ວຽກຂອງເຮົາຖືກສັ່ງຫ້າມ ພີ່ນ້ອງຊາຍຄົນໜຶ່ງໄດ້ເອົາປຶ້ມຂອງອົງການໄປໃຫ້ພີ່ນ້ອງຄົນອື່ນ.
e ຄຳອະທິບາຍຮູບພາບ: ພີ່ນ້ອງຍິງທີ່ຍັງໜຸ່ມຮຽນວິທີປະກາດທາງໂທລະສັບຈາກພີ່ນ້ອງຍິງທີ່ສູງອາຍຸ. ພີ່ນ້ອງຊາຍທີ່ສູງອາຍຸເປັນຕົວຢ່າງທີ່ດີໃນເລື່ອງການປະກາດສາທາລະນະຢ່າງກ້າຫານ ແລະພີ່ນ້ອງຊາຍທີ່ມີປະສົບການກຳລັງຝຶກພີ່ນ້ອງໃຫ້ດູແລຮັກສາຫໍປະຊຸມ.
