ບົດຄວາມສຶກສາທີ 33
“ຄົນທັງຫຼາຍທີ່ຟັງທ່ານ” ຈະລອດ
“ຈົ່ງລະວັງຕົວເອງແລະໃນການສັ່ງສອນດ້ວຍດີ. ຈົ່ງຕັ້ງໝັ້ນຄົງຢູ່ໃນສິ່ງທັງຫຼາຍນີ້ ເຫດວ່າເມື່ອກະທຳຢ່າງນັ້ນທ່ານຈະຊ່ອຍຕົວເອງໃຫ້ພົ້ນແລະຄົນທັງຫຼາຍທີ່ຟັງທ່ານດ້ວຍ.”—1 ຕີໂມ. 4:16
ເພງ 67 “ຈົ່ງປະກາດພະຄຳ”
ໃຈຄວາມສຳຄັນ *
1. ເຮົາຢາກໃຫ້ຄົນໃນຄອບຄົວແລະຍາດພີ່ນ້ອງຂອງເຮົາເຮັດຫຍັງ?
ພີ່ນ້ອງຍິງຄົນໜຶ່ງຊື່ພໍລີນ *ບອກວ່າ: “ໃນໄລຍະທຳອິດທີ່ຂ້ອຍໄດ້ຮຽນຄວາມຈິງ ຂ້ອຍຢາກໃຫ້ທຸກຄົນໃນຄອບຄົວໄດ້ເຂົ້າໂລກໃໝ່ນຳກັນກັບຂ້ອຍ. ຂ້ອຍຢາກໃຫ້ອ້າຍເຫວນຜົວຂອງຂ້ອຍແລະລູກຊາຍມາຮັບໃຊ້ພະເຢໂຫວາແທ້ໆ.” ເຈົ້າມີຄົນໃນຄອບຄົວຫຼືຍາດພີ່ນ້ອງທີ່ຍັງບໍ່ທັນໄດ້ຮູ້ຈັກແລະຮັກພະເຢໂຫວາບໍ? ເຈົ້າອາດຮູ້ສຶກຄືກັບພໍລີນທີ່ຢາກໃຫ້ຄົນໃນຄອບຄົວມາຮັບໃຊ້ພະເຢໂຫວາ.
2. ເຮົາຈະພິຈາລະນາຄຳຖາມຫຍັງໃນບົດຄວາມນີ້?
2 ເຮົາບໍ່ສາມາດບັງຄັບຄົນໃນຄອບຄົວແລະຍາດພີ່ນ້ອງໃຫ້ຍອມຮັບຂ່າວດີ ແຕ່ເຮົາສາມາດຊ່ວຍພວກເຂົາໃຫ້ເປີດໃຈຮັບຟັງຂ່າວສານໃນຄຳພີໄບເບິນໄດ້. (2 ຕີໂມ. 3:14, 15) ເປັນຫຍັງເຮົາຄວນປະກາດກັບຄົນໃນຄອບຄົວແລະຍາດພີ່ນ້ອງ? ເປັນຫຍັງເຮົາຕ້ອງພະຍາຍາມຄິດເຖິງຮູ້ສຶກຂອງພວກເຂົາ? ມີສິ່ງໃດແດ່ທີ່ເຮົາສາມາດເຮັດໄດ້ເພື່ອຈະຊ່ວຍຄົນໃນຄອບຄົວແລະຍາດພີ່ນ້ອງໃຫ້ມາຮັກພະເຢໂຫວາຄືກັນກັບເຮົາ? ແລະທຸກຄົນໃນປະຊາຄົມຈະຊ່ວຍເຮົາໄດ້ແນວໃດ?
ເປັນຫຍັງເຮົາຄວນປະກາດກັບຄົນໃນຄອບຄົວແລະຍາດພີ່ນ້ອງ?
3. ຕາມ 2 ເປໂຕ 3:9 ເປັນຫຍັງເຮົາຄວນປະກາດກັບຄົນໃນຄອບຄົວແລະຍາດພີ່ນ້ອງ?
3 ອີກບໍ່ດົນ ພະເຢໂຫວາຈະທຳລາຍໂລກນີ້. ມີພຽງແຕ່ຄົນທີ່ “ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຮັບຊີວິດຕະຫຼອດໄປ” ເທົ່ານັ້ນທີ່ຈະລອດ. (ກິດ. 13:48, ລ.ມ.) ເຮົາໃຊ້ເວລາແລະກຳລັງຂອງເຮົາຫຼາຍອີ່ຫຼີເພື່ອປະກາດກັບຄົນແປກໜ້າໃນເຂດຂອງເຮົາ ດັ່ງນັ້ນ ຈຶ່ງເປັນເລື່ອງທຳມະດາທີ່ເຮົາຢາກຊ່ວຍຄົນໃນຄອບຄົວແລະຍາດພີ່ນ້ອງຂອງເຮົາໃຫ້ມາຮັບໃຊ້ພະເຢໂຫວາ. ພະເຢໂຫວາພໍ່ທີ່ຮັກຂອງເຮົາ “ບໍ່ຢາກໃຫ້ຄົນໜຶ່ງຄົນໃດຈິບຫາຍ ແຕ່ວ່າຈະໃຫ້ຄົນທັງປວງປະໃຈເກົ່າເອົາໃຈໃໝ່.”—ອ່ານ 2 ເປໂຕ 3:9
4. ເຮົາອາດຈະເຮັດຫຍັງຜິດເມື່ອປະກາດຄົນໃນຄອບຄົວແລະຍາດພີ່ນ້ອງ?
4 ເຮົາຕ້ອງຈື່ໄວ້ສະເໝີວ່າມີສິ່ງທີ່ຄວນເຮັດແລະບໍ່ຄວນເຮັດເມື່ອປະກາດຂ່າວສານເລື່ອງຄວາມລອດ. ຕົວຢ່າງ: ເຮົາອາດຈະເວົ້າມ່ວນໆຢູ່ແລ້ວເມື່ອປະກາດກັບຄົນແປກໜ້າ ແຕ່ຕອນທີ່ເຮົາປະກາດກັບຄົນໃນຄອບຄົວແລະຍາດພີ່ນ້ອງ ເຮົາອາດຈະເວົ້າກົງໂພດ.
5. ກ່ອນທີ່ຈະປະກາດກັບຄົນໃນຄອບຄົວແລະຍາດພີ່ນ້ອງ ເຮົາຄວນຈື່ຫຍັງໄວ້?
5 ເມື່ອຄິດຄືນຫຼັງຕອນທີ່ເຮົາພະຍາຍາມປະກາດກັບຄົນໃນຄອບຄົວແລະຍາດພີ່ນ້ອງເທື່ອທຳອິດ ພວກເຮົາຫຼາຍຄົນອາດຮູ້ສຶກບໍ່ດີ. ອັກຄະສາວົກໂປໂລແນະນຳຄລິດສະຕຽນວ່າ: “ໃຫ້ຖ້ອຍຄຳຂອງທ່ານທັງຫຼາຍອອກເລື້ອຍ ດ້ວຍພະຄຸນ ເຄັມດ້ວຍເກືອ ທ່ານທັງຫຼາຍຕ້ອງຮູ້ຈັກວ່າສົມຄວນຈະຕອບແກ່ທຸກຄົນດ້ວຍຄຳຢ່າງໃດ.” (ໂກໂລ. 4:5, 6) ເປັນເລື່ອງດີທີ່ຈະຈື່ຄຳແນະນຳນີ້ເມື່ອເຮົາລົມກັບຄົນໃນຄອບຄົວແລະຍາດພີ່ນ້ອງ ເພາະເຮົາອາດຈະເຮັດໃຫ້ພວກເຂົາຄຽດໄດ້ແທນທີ່ພວກເຂົາຈະຟັງ.
ມີສິ່ງໃດແດ່ທີ່ເຮົາສາມາດເຮັດໄດ້ເພື່ອຈະຊ່ວຍຄົນໃນຄອບຄົວແລະຍາດພີ່ນ້ອງ?
ການປະພຶດຂອງເຈົ້າແລະການຄິດເຖິງຄວາມຮູ້ສຶກຂອງຄົນໃນຄອບຄົວແລະຍາດພີ່ນ້ອງເປັນການປະກາດທີ່ດີທີ່ສຸດ (ເບິ່ງຂໍ້ 6-8) *
6-7. ຂໍໃຫ້ຍົກຕົວຢ່າງວ່າເປັນຫຍັງຈຶ່ງສຳຄັນທີ່ຄລິດສະຕຽນຈະຕ້ອງຄິດເຖິງຄວາມຮູ້ສຶກຂອງຄູ່ແຕ່ງດອງທີ່ບໍ່ມີຄວາມເຊື່ອດຽວກັນ.
6 ຄິດເຖິງຄວາມຮູ້ສຶກຂອງພວກເຂົາ. ພໍລີນເຊິ່ງເວົ້າເຖິງກ່ອນໜ້ານີ້ບອກວ່າ: “ທຳອິດ ຂ້ອຍເວົ້າແຕ່ເລື່ອງພະເຈົ້າແລະເລື່ອງຄຳພີໄບເບິນກັບຜົວຕະຫຼອດຈົນບໍ່ໄດ້ເວົ້າເລື່ອງອື່ນເລີຍ.” ແຕ່ເຫວນບໍ່ຄ່ອຍຮູ້ຈັກຄຳພີໄບເບິນຈຶ່ງບໍ່ເຂົ້າໃຈວ່າພໍລີນເວົ້າເລື່ອງຫຍັງ. ສຳລັບເຫວນແລ້ວ ເບິ່ງຄືວ່າໃນຫົວຂອງເມຍມີແຕ່ເລື່ອງສາສະໜາ. ລາວຢ້ານວ່າເມຍອາດຈະຖືກຕົວະແລະເປັນພວກນິກາຍທີ່ອັນຕະລາຍ.
7 ພໍລີນຍອມຮັບວ່າມີໄລຍະໜຶ່ງລາວໃຊ້ເວລາກັບພີ່ນ້ອງໃນຕອນແລງແລະຕອນທ້າຍອາທິດຫຼາຍໂພດ ທັງໄປປະຊຸມ ໄປປະກາດ ແລະກໍໄປສັງສັນ. ພໍລີນບອກວ່າ: “ອ້າຍເຫວນຮູ້ສຶກເຫງົາເພາະບາງເທື່ອທີ່ກັບມາເຮືອນກໍບໍ່ເຈິຜູ້ໃດເລີຍ.” ນີ້ເຮັດໃຫ້ເຂົ້າໃຈໄດ້ເລີຍວ່າເຫວນຄິດຮອດເມຍແລະລູກຊາຍ. ລາວບໍ່ຮູ້ເລີຍວ່າເມຍກັບລູກໄປໃສແລະໄປກັບໃຜ ແລະເບິ່ງຄືວ່າໝູ່ໃໝ່ຂອງເມຍສຳຄັນຫຼາຍກວ່າລາວ ລາວຈຶ່ງຂູ່ວ່າຈະຢ່າຮ້າງກັບພໍລີນ. ເຈົ້າຄິດວ່າສິ່ງທີ່ພໍລີນເຮັດນັ້ນໄດ້ຄິດເຖິງຄວາມຮູ້ສຶກຂອງຜົວບໍ?
8. ຕາມ 1 ເປໂຕ 3:1, 2 ສິ່ງໃດເຮັດໃຫ້ຄົນໃນຄອບຄົວແລະຍາດພີ່ນ້ອງຂອງເຮົາປະທັບໃຈຫຼາຍທີ່ສຸດ?
8 ໃຫ້ພວກເຂົາເຫັນການປະພຶດທີ່ດີຂອງເຈົ້າ. ຫຼາຍເທື່ອຄົນໃນຄອບຄົວແລະຍາດພີ່ນ້ອງຂອງເຮົາປະທັບໃຈສິ່ງທີ່ເຮົາເຮັດ ຫຼາຍກວ່າສິ່ງທີ່ເຮົາເວົ້າ. (ອ່ານ 1 ເປໂຕ 3:1, 2) ໃນທີ່ສຸດ ພໍລີນກໍເຂົ້າໃຈເລື່ອງນີ້. ລາວເວົ້າວ່າ: “ຂ້ອຍຮູ້ວ່າອ້າຍເຫວນຮັກຂ້ອຍແລະລູກ ລາວບໍ່ໄດ້ຕ້ອງການທີ່ຈະຢ່າຮ້າງກັບຂ້ອຍແທ້ໆ. ແຕ່ຄຳຂູ່ຂອງລາວເຮັດໃຫ້ຂ້ອຍຮູ້ວ່າຂ້ອຍຕ້ອງເລີ່ມເຮັດຕາມຄຳແນະນຳຂອງພະເຢໂຫວາເລື່ອງຊີວິດຄູ່. ແທນທີ່ຈະມີແຕ່ເວົ້າຢ່າງດຽວ ຂ້ອຍກໍຕ້ອງວາງຕົວຢ່າງທີ່ດີນຳ.” ພໍລີນລົມເລື່ອງຄຳພີໄບເບິນກັບຜົວໜ້ອຍລົງ ແລະໄດ້ເລີ່ມລົມເລື່ອງທົ່ວໄປແທນ. ເຫວນກໍເຫັນວ່າພໍລີນສະຫງົບຫຼາຍຂຶ້ນ ແລະລູກຊາຍກໍຄຳຮູ້ແລະຟັງຄວາມຫຼາຍຂຶ້ນ. (ສຸພາສິດ 31:18, 27, 28) ເມື່ອເຫວນສັງເກດເຫັນວ່າຄຳພີໄບເບິນສົ່ງຜົນດີຕໍ່ຄອບຄົວ ລາວກໍເລີ່ມຄິດແລະເປີດໃຈຮັບຟັງຂ່າວສານໃນຄຳພີໄບເບິນ.—1 ໂກ. 7:12-14, 16
9. ເປັນຫຍັງເຮົາຕ້ອງພະຍາຍາມຊ່ວຍຄົນໃນຄອບຄົວແລະຍາດພີ່ນ້ອງຕໍ່ໆໄປ?
9 ພະຍາຍາມຊ່ວຍຄົນໃນຄອບຄົວແລະຍາດພີ່ນ້ອງຕໍ່ໆໄປ. ພະເຢໂຫວາວາງຕົວຢ່າງທີ່ດີໃຫ້ເຮົາ. ພະອົງໃຫ້ໂອກາດຜູ້ຄົນ “ເທື່ອແລ້ວເທື່ອອີກ” ເພື່ອພວກເຂົາຈະຕອບຮັບຄວາມຈິງແລະໄດ້ຮັບຊີວິດ. (ຢເຣ. 44:4, ລ.ມ.) ອັກຄະສາວົກໂປໂລກໍບອກຕີໂມເຕໃຫ້ພະຍາຍາມຊ່ວຍຄົນອື່ນຕໍ່ໆໄປ. ຍ້ອນຫຍັງ? ຍ້ອນວ່າການເຮັດແບບນັ້ນຈະຊ່ວຍທັງລາວແລະຄົນທີ່ຟັງລາວໃຫ້ລອດ. (1 ຕີໂມ. 4:16) ເຮົາຮັກຄົນໃນຄອບຄົວແລະຍາດພີ່ນ້ອງຂອງເຮົາ ເຮົາຈຶ່ງຢາກໃຫ້ພວກເຂົາຮູ້ຈັກຄວາມຈິງໃນຄຳພີໄບເບິນ. ເມື່ອເວລາຜ່ານໄປ ຄຳເວົ້າແລະການກະທຳຂອງພໍລີນໄດ້ສົ່ງຜົນດີຕໍ່ຄອບຄົວຂອງລາວ. ຕອນນີ້ລາວມີຄວາມສຸກຫຼາຍທີ່ຜົວໄດ້ຮັບໃຊ້ພະເຢໂຫວາກັບລາວ ເຊິ່ງທັງສອງຄົນກໍເປັນໄພໂອເນຍແລະຜົວຂອງລາວກໍເປັນຜູ້ເຖົ້າແກ່.
10. ເປັນຫຍັງເຮົາຕ້ອງອົດທົນ?
10 ອົດທົນ. ຕອນທີ່ເຮົາຕັດສິນໃຈໃຊ້ຊີວິດຕາມມາດຕະຖານຂອງພະເຢໂຫວາ ເຮົາໄດ້ປ່ຽນແປງຕົວເອງແລະຄວາມເຊື່ອຂອງເຮົາ ນີ້ອາດເຮັດໃຫ້ຄົນໃນຄອບຄົວແລະຍາດພີ່ນ້ອງຂອງເຮົາຍອມຮັບໄດ້ຍາກ. ສິ່ງທຳອິດທີ່ພວກເຂົາສັງເກດເຫັນຄື ເຮົາບໍ່ສະຫຼອງບຸນຕ່າງໆທາງສາສະໜາແລະບໍ່ຫຍຸ້ງກ່ຽວກັບການເມືອງ. ທຳອິດຄົນໃນຄອບຄົວແລະຍາດພີ່ນ້ອງບາງຄົນກໍອາດຈະໃຈຮ້າຍໃຫ້ເຮົາຫຼາຍ. (ມັດ. 10:35, 36) ແຕ່ເຮົາຄວນໝົດຫວັງໃນຕົວພວກເຂົາບໍ? ຖ້າເຮົາເຊົາຊ່ວຍພວກເຂົາໃຫ້ເຂົ້າໃຈຄວາມເຊື່ອຂອງເຮົາ ກໍເທົ່າກັບວ່າເຮົາຕັດສິນພວກເຂົາແລ້ວວ່າພວກເຂົາບໍ່ສົມຄວນທີ່ຈະໄດ້ຮັບຊີວິດຕະຫຼອດໄປ. ພະເຢໂຫວາບໍ່ໄດ້ມອບວຽກໃຫ້ເຮົາໄປຕັດສິນຄົນອື່ນ ເພາະພະອົງມອບໜ້າທີ່ນີ້ໃຫ້ພະເຍຊູ. (ໂຢ. 5:22) ຖ້າເຮົາອົດທົນ ໃນທີ່ສຸດຄົນໃນຄອບຄົວແລະຍາດພີ່ນ້ອງຂອງເຮົາອາດຈະເຕັມໃຈຕອບຮັບຄວາມຈິງ.—ເບິ່ງຂອບ “ ໃຊ້ເວັບໄຊຂອງເຮົາໃຫ້ເປັນປະໂຫຍດ.”
11-13. ເຈົ້າໄດ້ຮຽນຮູ້ຫຍັງຈາກວິທີທີ່ອາລິດສ໌ປະຕິບັດກັບພໍ່ແມ່?
11 ໃຫ້ເຮັດດີແຕ່ຕ້ອງໜັກແໜ້ນໃນຄວາມເຊື່ອ. (ສຸພາ. 15:2) ຂໍໃຫ້ມາເບິ່ງຕົວຢ່າງຂອງອາລິດສ໌. ຕອນທີ່ລາວຢູ່ໄກຈາກພໍ່ແມ່ ລາວໄດ້ຮຽນຮູ້ເລື່ອງພະເຢໂຫວາ ແຕ່ພໍ່ແມ່ຂອງລາວບໍ່ເຊື່ອວ່າມີພະເຈົ້າແລະຍັງພົວພັນກັບການເມືອງ. ລາວຮູ້ວ່າລາວຕ້ອງຟ້າວບອກພໍ່ແມ່ໃຫ້ຮູ້ກ່ຽວກັບຂ່າວດີທີ່ລາວໄດ້ຮຽນ. ລາວບອກວ່າ: “ຖ້າເຈົ້າມີແຕ່ລໍຖ້າ ບໍ່ເວົ້າເລື່ອງຄວາມເຊື່ອໃໝ່ແລະກິດຈະກຳທາງສາສະໜາໃຫ້ຄົນໃນຄອບຄົວຟັງຈັກເທື່ອ ພວກເຂົາກໍຈະຕົກໃຈຫຼາຍຖ້າມາຮູ້ນຳຫຼັງ.” ອາລິດສ໌ພະຍາຍາມຄິດເຖິງເລື່ອງທີ່ລາວຫວັງວ່າພໍ່ແມ່ຈະສົນໃຈເຊັ່ນ: ຄວາມຮັກ. ຈາກນັ້ນ ລາວກໍຂຽນຈົດໝາຍໄປຫາພໍ່ແມ່ ແລະບອກວ່າຄຳພີໄບເບິນເວົ້າແນວໃດກ່ຽວກັບເລື່ອງນີ້ ແລ້ວກໍຖາມວ່າພວກເພິ່ນຄິດແນວໃດ. (1 ໂກ. 13:1-13) ລາວຂອບໃຈພໍ່ແມ່ທີ່ເບິ່ງແຍງລາວຢ່າງດີແລະລ້ຽງລາວຈົນໃຫຍ່ ແລະລາວກໍໄດ້ສົ່ງຂອງຂວັນໄປໃຫ້ພວກເພິ່ນ. ຕອນທີ່ກັບໄປຢາມພໍ່ແມ່ຢູ່ເຮືອນ ລາວໄດ້ຊ່ວຍແມ່ເຮັດວຽກເຮືອນທຸກຢ່າງ. ທຳອິດ ພໍ່ແມ່ບໍ່ມັກທີ່ລາວບອກວ່າລາວໄດ້ປ່ຽນຄວາມເຊື່ອໃໝ່.
12 ຕອນທີ່ອາລິດສ໌ຢູ່ເຮືອນກັບພໍ່ແມ່ ລາວຍັງອ່ານຄຳພີໄບເບິນທຸກມື້. ລາວບອກວ່າ: “ນີ້ຊ່ວຍແມ່ໃຫ້ເຂົ້າໃຈວ່າຄຳພີໄບເບິນສຳຄັນຫຼາຍສ່ຳໃດສຳລັບຂ້ອຍ.” ໃນຂະນະດຽວກັນ ພໍ່ຂອງລາວກໍໄດ້ຕັດສິນໃຈຮຽນບາງຢ່າງໃນຄຳພີໄບເບິນເພື່ອເບິ່ງວ່າເປັນຫຍັງລູກຈຶ່ງປ່ຽນໄປ ແລະຍັງຢາກຈັບຜິດໃນສິ່ງທີ່ຄຳພີໄບເບິນບອກ. ອາລິດສ໌ບອກວ່າ: “ຂ້ອຍເອົາຄຳພີໄບເບິນໃຫ້ພໍ່ຫົວໜຶ່ງ ແລະຂຽນຂໍ້ຄວາມໃສ່ເຈ້ຍນ້ອຍໃຫ້ພໍ່ນຳ.” ຜົນເປັນແນວໃດ? ພໍ່ຂອງລາວຈັບຜິດໃນສິ່ງທີ່ຄຳພີໄບເບິນບອກບໍ່ໄດ້ເລີຍ ແທນທີ່ຈະເປັນແນວນັ້ນ ເພິ່ນປະທັບໃຈຫຼາຍກັບສິ່ງທີ່ໄດ້ອ່ານໃນຄຳພີໄບເບິນ.
13 ເຮົາຕ້ອງໜັກແໜ້ນແລະເຮັດດີຕໍ່ໄປ ເຖິງວ່າຈະຕ້ອງອົດທົນກັບຄວາມຍາກລຳບາກ. (1 ໂກ. 4:12 ສ່ວນ ຂ) ຕົວຢ່າງ: ອາລິດສ໌ຕ້ອງອົດທົນທີ່ແມ່ໄດ້ຕໍ່ຕ້ານລາວ ລາວບອກວ່າ: “ຕອນທີ່ຂ້ອຍຮັບບັບເຕມາ ແມ່ບອກວ່າຂ້ອຍເປັນ ‘ລູກຊົ່ວ.’” ອາລິດສ໌ເຮັດແນວໃດ? ລາວບອກວ່າ: “ແທນທີ່ຂ້ອຍຈະເຊົາເວົ້າເລື່ອງຄວາມເຊື່ອໃໝ່ຂອງຂ້ອຍ ຂ້ອຍອະທິບາຍດ້ວຍຄວາມນັບຖືວ່າເປັນຫຍັງຂ້ອຍຈຶ່ງຕັດສິນໃຈເປັນພະຍານພະເຢໂຫວາ ແລະຍຶດໝັ້ນກັບການຕັດສິນໃຈນັ້ນ. ຂ້ອຍພະຍາຍາມເຮັດໃຫ້ແມ່ໝັ້ນໃຈວ່າຂ້ອຍຍັງຮັກແມ່ແທ້ໆ. ເຮົາສອງຄົນຮ້ອງໄຫ້ນຳກັນ ແລະຂ້ອຍກໍເຮັດອາຫານແຊບໆໃຫ້ແມ່ກິນ. ຕັ້ງແຕ່ນັ້ນມາ ແມ່ຂອງຂ້ອຍກໍເລີ່ມຍອມຮັບວ່າຄຳພີໄບເບິນເຮັດໃຫ້ຂ້ອຍເປັນຄົນທີ່ດີຂຶ້ນ.”
14. ເປັນຫຍັງເຮົາຕ້ອງໜັກແໜ້ນເມື່ອຖືກຄົນໃນຄອບຄົວແລະຍາດພີ່ນ້ອງກົດດັນເຮົາ?
14 ມັນອາດຕ້ອງໃຊ້ເວລາຊົ່ວຊິເຮັດໃຫ້ຄົນໃນຄອບຄົວແລະຍາດພີ່ນ້ອງເຂົ້າໃຈວ່າການຮັບໃຊ້ພະເຢໂຫວາເປັນເລື່ອງທີ່ສຳຄັນຫຼາຍສຳລັບເຮົາ. ຕົວຢ່າງ ຕອນທີ່ອາລິດສ໌ຕັດສິນໃຈເປັນໄພໂອເນຍແທນທີ່ຈະເຮັດວຽກຕາມທີ່ພໍ່ແມ່ຂອງລາວບອກ ແມ່ລາວກໍຮ້ອງໄຫ້ອີກ. ແຕ່ອາລິດສ໌ຍັງຄົງໜັກແໜ້ນ. ລາວເວົ້າວ່າ: “ຖ້າເຈົ້າຍອມແພ້ຕໍ່ຄວາມກົດດັນດ້ານໃດດ້ານໜຶ່ງ ຄອບຄົວຂອງເຈົ້າກໍຈະພະຍາຍາມຫາສິ່ງອື່ນມາເຮັດໃຫ້ເຈົ້າປ່ຽນໃຈ. ແຕ່ຖ້າເຈົ້າໜັກແໜ້ນແລະເຮັດດີຕໍ່ໄປ ບາງຄົນໃນຄອບຄົວກໍອາດຈະຟັງເຈົ້າ.” ນີ້ເປັນສິ່ງເກີດຂຶ້ນກັບຄອບຄົວອາລິດສ໌. ຕອນນີ້ທັງພໍ່ແລະແມ່ຂອງລາວຮັບໃຊ້ເປັນໄພໂອເນຍ ແລະພໍ່ຂອງລາວກໍເປັນຜູ້ເຖົ້າແກ່.
ທຸກຄົນໃນປະຊາຄົມຈະມີສ່ວນຊ່ວຍກັນໄດ້ແນວໃດ?
ພີ່ນ້ອງໃນປະຊາຄົມຈະມີສ່ວນຊ່ວຍຄົນໃນຄອບຄົວແລະຍາດພີ່ນ້ອງຂອງເຮົາໄດ້ແນວໃດ? (ເບິ່ງຂໍ້ 15-16) *
15. ຕາມມັດທາຍ 5:14-16 ແລະ 1 ເປໂຕ 2:12 “ການດີ” ອາດຊ່ວຍຄົນໃນຄອບຄົວແລະຍາດພີ່ນ້ອງຂອງເຮົາໄດ້ແນວໃດ?
15 ພະເຢໂຫວາໃຊ້ “ການດີ” ຂອງພີ່ນ້ອງໃນປະຊາຄົມຊັກນຳຜູ້ຄົນໃຫ້ເຂົ້າມາຫາພະອົງ. (ອ່ານມັດທາຍ 5:14-16; 1 ເປໂຕ 2:12) ຖ້າຄູ່ຂອງເຈົ້າບໍ່ໄດ້ເປັນພະຍານພະເຢໂຫວາ ລາວເຄີຍພົບພີ່ນ້ອງໃນປະຊາຄົມຂອງເຈົ້າບໍ? ພໍລີນເຊິ່ງເວົ້າເຖິງກ່ອນໜ້ານີ້ໄດ້ຊວນພີ່ນ້ອງມາຫຼິ້ນຢູ່ເຮືອນຂອງລາວເພື່ອໃຫ້ຜົວມີໂອກາດໄດ້ຮູ້ຈັກພີ່ນ້ອງຫຼາຍຂຶ້ນ. ເຫວນຄິດເຖິງຕອນທີ່ພີ່ນ້ອງຄົນໜຶ່ງຊ່ວຍລາວໃຫ້ຮູ້ວ່າແທ້ໆແລ້ວພະຍານພະເຢໂຫວາເປັນຄົນແບບໃດ ລາວບອກວ່າ: “ພີ່ນ້ອງຊາຍຄົນນັ້ນຍອມລາພັກວຽກເພື່ອມາເບິ່ງເຕະບານນຳຂ້ອຍ. ນີ້ຊ່ວຍໃຫ້ຂ້ອຍຮູ້ວ່າລາວກໍຄືກັບຄົນທຳມະດາທົ່ວໄປ.”
16. ເປັນຫຍັງເຮົາຄວນຊວນຄົນໃນຄອບຄົວແລະຍາດພີ່ນ້ອງເຂົ້າຮ່ວມປະຊຸມ?
16 ວິທີທີ່ດີເລີດຢ່າງໜຶ່ງທີ່ຈະຊ່ວຍຄົນໃນຄອບຄົວແລະຍາດພີ່ນ້ອງຂອງເຮົາກໍຄື ຊວນໄປປະຊຸມກັບເຮົາ. (1 ໂກ. 14:24, 25) ການປະຊຸມເທື່ອທຳອິດທີ່ເຫວນເຂົ້າຮ່ວມຄືການປະຊຸມອະນຸສອນ ເພາະຈັດຂຶ້ນຫຼັງເລີກວຽກແລະໃຊ້ເວລາສັ້ນໆ. ເຫວນເວົ້າວ່າ: “ຂ້ອຍກໍບໍ່ເຂົ້າໃຈປານໃດໃນສິ່ງທີ່ຜູ້ບັນລະຍາຍເວົ້າ ແຕ່ສິ່ງທີ່ຂ້ອຍຈື່ກໍຄືຄົນຢູ່ຫັ້ນ. ພວກເຂົາຈັບມືທັກທາຍຂ້ອຍ ເຮັດໃຫ້ຂ້ອຍຮູ້ເລີຍວ່າພວກເຂົາເປັນຄົນຈິງໃຈ.” ພີ່ນ້ອງຜົວເມຍຄູ່ໜຶ່ງໃນປະຊາຄົມເຮັດດີກັບພໍລີນຫຼາຍ ພວກເຂົາຊ່ວຍລາວກັບລູກຊາຍໄປປະຊຸມແລະປະກາດ. ໃນທີ່ສຸດເມື່ອເຫວນຕັດສິນໃຈຢາກຮຽນຮູ້ກ່ຽວກັບຄວາມເຊື່ອໃໝ່ຂອງພໍລີນ ເຫວນກໍໄດ້ຂໍຜູ້ທີ່ເປັນຜົວມາສອນຄຳພີໄບເບິນໃຫ້ລາວ.
17. ເຮົາບໍ່ຄວນໂທດຕົວເອງເລື່ອງຫຍັງ? ແຕ່ເປັນຫຍັງເຮົາຕ້ອງພະຍາຍາມຊ່ວຍຄົນໃນຄອບຄົວແລະຍາດພີ່ນ້ອງຂອງເຮົາຕໍ່ໆໄປ?
17 ເຮົາຢາກໃຫ້ຄົນໃນຄອບຄົວແລະຍາດພີ່ນ້ອງຂອງເຮົາທຸກຄົນມາຮັບໃຊ້ພະເຢໂຫວາຄືກັນກັບເຮົາ. ແຕ່ເຖິງວ່າເຮົາຈະພະຍາຍາມເຕັມທີແລ້ວເພື່ອຊ່ວຍພວກເຂົາໃຫ້ມາຮັບໃຊ້ພະເຈົ້າ ພວກເຂົາກໍອາດຈະບໍ່ມາ. ຖ້າເປັນແບບນັ້ນ ເຮົາກໍບໍ່ຄວນໂທດຕົວເອງທີ່ພວກເຂົາຕັດສິນໃຈແບບນັ້ນ. ເຮົາບໍ່ສາມາດບັງຄັບໃຜໃຫ້ມາເຊື່ອແບບເຮົາ. ແຕ່ຖ້າພວກເຂົາເຫັນວ່າເຮົາມີຄວາມສຸກຫຼາຍຍ້ອນຮັບໃຊ້ພະເຢໂຫວາ ມັນກໍອາດສົ່ງຜົນດີຕໍ່ພວກເຂົາຫຼາຍ. ດັ່ງນັ້ນ ຂໍໃຫ້ເຮົາອະທິດຖານເພື່ອພວກເຂົາ ເວົ້າແບບຜ່ອນສັ້ນຜ່ອນຍາວ ແລະພະຍາຍາມຊ່ວຍພວກເຂົາຕໍ່ໆໄປ! (ກິດ. 20:20) ຖ້າເຈົ້າເຮັດແບບນັ້ນ ຂໍໃຫ້ໝັ້ນໃຈວ່າພະເຢໂຫວາຈະອວຍພອນເຈົ້າ ແລະຖ້າຄົນໃນຄອບຄົວແລະຍາດພີ່ນ້ອງຂອງເຈົ້າຟັງເຈົ້າ ພວກເຂົາກໍຈະລອດ!
ເພງ 57 ປະກາດກັບຄົນທຸກຊະນິດ
^ ຂໍ້ 5 ເຮົາຢາກໃຫ້ຄົນໃນຄອບຄົວແລະຍາດພີ່ນ້ອງຂອງເຮົາຮູ້ຈັກພະເຢໂຫວາ ແຕ່ພວກເຂົາຕ້ອງເລືອກເອງວ່າຈະຮັບໃຊ້ພະເຢໂຫວາຫຼືບໍ່. ໃນບົດຄວາມນີ້ເຮົາຈະພິຈາລະນາສິ່ງທີ່ເຮົາສາມາດເຮັດໄດ້ເພື່ອຊ່ວຍຄົນໃນຄອບຄົວແລະຍາດພີ່ນ້ອງໃຫ້ຟັງເຮົາງ່າຍຂຶ້ນ.
^ ຂໍ້ 1 ບາງຊື່ເປັນຊື່ສົມມຸດ.
^ ຂໍ້ 53 ຄຳອະທິບາຍຮູບພາບ: ພີ່ນ້ອງຊາຍຄົນໜຶ່ງກຳລັງຊ່ວຍພໍ່ແປງລົດ ເຊິ່ງພໍ່ຂອງລາວບໍ່ໄດ້ເປັນພະຍານພະເຢໂຫວາ ເມື່ອໄດ້ໂອກາດເໝາະສົມລາວກໍເປີດວິດີໂອໃນເວັບໄຊ jw.org® ໃຫ້ພໍ່ເບິ່ງ.
^ ຂໍ້ 55 ຄຳອະທິບາຍຮູບພາບ: ພີ່ນ້ອງຍິງຄົນໜຶ່ງຕັ້ງໃຈຟັງຜົວທີ່ບໍ່ໄດ້ເປັນພະຍານພະເຢໂຫວາເລົ່າເລື່ອງວຽກ. ຫຼັງຈາກນັ້ນ ລາວກໍຫຼິ້ນເກມກັບລູກກັບຜົວ.
^ ຂໍ້ 57 ຄຳອະທິບາຍຮູບພາບ: ພີ່ນ້ອງຍິງໄດ້ຊວນພີ່ນ້ອງໃນປະຊາຄົມມາເຮືອນຂອງລາວ. ພີ່ນ້ອງພະຍາຍາມທີ່ຈະຮູ້ຈັກຜົວຂອງລາວ. ຕໍ່ມາ ຜົວຂອງລາວກໍເຂົ້າຮ່ວມການປະຊຸມອະນຸສອນກັບລາວ.
