ຄວາມອົດທົນອົດກັ້ນ—ອົດທົນຢ່າງມີຄວາມຫວັງ
ເນື່ອງຈາກຊີວິດໃນ “ສະໄໝສຸດທ້າຍ” ມີແຕ່ຄວາມຫຍຸ້ງຍາກ ເຮົາຈຶ່ງຕ້ອງມີຄວາມອົດທົນອົດກັ້ນຫຼາຍຂຶ້ນກວ່າເກົ່າ. (2 ຕີໂມເຕ 3:1-5, ລ.ມ.) ຫຼາຍຄົນທີ່ຢູ່ອ້ອມຕົວເຮົາບໍ່ເປັນຄົນອົດທົນອົດກັ້ນ. ເຂົາເຈົ້າເຫັນແກ່ຕົວ ມັກໃຈຮ້າຍ ແລະກໍບໍ່ຄວບຄຸມຕົວເອງ. ດັ່ງນັ້ນ ໃຫ້ຖາມຕົວເອງວ່າ: ຂ້ອຍເປັນຄົນບໍ່ມີຄວາມອົດທົນອົດກັ້ນຄືກັບຄົນອ້ອມຂ້າງຂ້ອຍບໍ? ຄວາມອົດທົນອົດກັ້ນທີ່ແທ້ຈິງໝາຍຄວາມວ່າແນວໃດ? ຂ້ອຍຈະມີນິດໄສອົດທົນອົດກັ້ນໄດ້ແນວໃດ?
ຄວາມອົດທົນອົດກັ້ນແມ່ນຫຍັງ?
ຄຳວ່າ “ຄວາມອົດທົນອົດກັ້ນ” ໃນຄຳພີໄບເບິນໝາຍຄວາມວ່າແນວໃດ? ມັນມີຄວາມໝາຍຫຼາຍກວ່າການຍອມທົນກັບບັນຫາໃດໜຶ່ງ ແຕ່ເປັນການອົດທົນຢ່າງມີຈຸດມຸ່ງໝາຍ. ຄົນທີ່ອົດທົນອົດກັ້ນຫວັງວ່າສິ່ງຕ່າງໆຈະດີຂຶ້ນ. ລາວບໍ່ຫ່ວງແຕ່ຕົວເອງ ແຕ່ຍັງເປັນຫ່ວງຄວາມຮູ້ສຶກຂອງຄົນອື່ນນຳ ເຖິງວ່າຄົນນັ້ນຈະເຮັດໃຫ້ລາວຮູ້ສຶກຄຽດຫຼືທຳຮ້າຍລາວກໍຕາມ. ລາວຍັງຫວັງອີກວ່າສາຍສຳພັນຂອງລາວກັບຄົນນັ້ນຈະດີຂຶ້ນ. ເຮົາບໍ່ແປກໃຈທີ່ຄຳພີໄບເບິນເວົ້າວ່າຄວາມອົດທົນອົດກັ້ນເປັນຜົນຂອງຄວາມຮັກ. * (ເບິ່ງໄຂເງື່ອນ) (1 ໂກລິນໂທ 13:4) ຄວາມອົດທົນອົດກັ້ນເປັນສ່ວນໜຶ່ງຂອງ “ຜົນທີ່ເກີດຈາກພະລັງຂອງພະເຈົ້າ.” (ຄາລາຊີ 5:22, 23, ລ.ມ.) ດັ່ງນັ້ນ ເຮົາຕ້ອງເຮັດຫຍັງເພື່ອຈະເປັນຄົນທີ່ອົດທົນອົດກັ້ນແທ້ໆ?
ວິທີທີ່ເຮົາຈະເປັນຄົນອົດທົນອົດກັ້ນ
ເພື່ອຈະເປັນຄົນອົດທົນອົດກັ້ນເຮົາຕ້ອງອະທິດຖານຂໍພະລັງບໍລິສຸດໃຫ້ຊ່ວຍເຮົາ ເຊິ່ງພະເຢໂຫວາໃຫ້ກັບທຸກຄົນທີ່ເຊື່ອໃນພະອົງ. (ລືກາ 11:13) ເຖິງວ່າພະລັງບໍລິສຸດຈະມີພະລັງຫຼາຍ ແຕ່ເຮົາກໍຕ້ອງເຮັດໃຫ້ສອດຄ່ອງກັບສິ່ງທີ່ເຮົາອະທິດຖານ. (ຄຳເພງ 86:10, 11) ນີ້ໝາຍຄວາມວ່າເຮົາຕ້ອງສະແດງຄວາມອົດທົນອົດກັ້ນຢ່າງສຸດຄວາມສາມາດໃນແຕ່ລະມື້ແລະເຮັດຈົນເປັນນິດໄສ. ແຕ່ບາງເທື່ອກໍບໍ່ເປັນຄືກັບທີ່ເຮົາຕັ້ງໃຈໄວ້. ແລ້ວສິ່ງໃດຈະຊ່ວຍເຮົາໄດ້?
ເຮົາຕ້ອງສຶກສາແລະຮຽນແບບຕົວຢ່າງທີ່ສົມບູນແບບຂອງພະເຍຊູ. ເມື່ອໂປໂລເວົ້າເຖິງ “ລັກສະນະນິດໄສໃໝ່” ເຊິ່ງລວມເຖິງຄວາມອົດທົນອົດກັ້ນ ລາວກໍບອກວ່າ: “ຂໍໃຫ້ສັນຕິສຸກຈາກພະຄລິດເປັນພະລັງຄວບຄຸມໃຈພວກເຈົ້າ.” (ໂກໂລດ 3:10, 12, 15, ລ.ມ.) ເພື່ອຈະເຮັດແບບນັ້ນ ເຮົາຕ້ອງເຮັດຕາມຕົວຢ່າງຂອງພະເຍຊູແລະມີຄວາມເຊື່ອແທ້ໆວ່າພະເຈົ້າຈະແກ້ໄຂບັນຫາຕ່າງໆຂອງເຮົາໃນເວລາທີ່ເໝາະສົມ. ຖ້າເຮົາເຊື່ອແບບນັ້ນ ເຮົາຈະບໍ່ສູນເສຍຄວາມອົດທົນອົດກັ້ນບໍ່ວ່າຈະມີຫຍັງເກີດຂຶ້ນຢູ່ອ້ອມຕົວເຮົາກໍຕາມ.—ໂຢຮັນ 14:27; 16:33
ເຮົາທຸກຄົນຢາກໃຫ້ໂລກໃໝ່ມາຮອດໄວໆເທົ່າທີ່ຈະເປັນໄປໄດ້. ແຕ່ເຮົາສາມາດຮຽນຮູ້ທີ່ຈະເປັນຄົນອົດທົນອົດກັ້ນຫຼາຍຂຶ້ນໄດ້ ຖ້າເຮົາຄິດເຖິງວ່າພະເຢໂຫວາຕ້ອງອົດທົນອົດກັ້ນກັບເຮົາຫຼາຍສໍ່າໃດ. ຄຳພີໄບເບິນຮັບຮອງກັບເຮົາວ່າ: “ພະອົງເຈົ້າບໍ່ຄອຍຊ້າໃຫ້ຄຳປະຕິຍານຂອງພະອົງສຳເລັດ ເໝືອນດັ່ງຜູ້ລາງຄົນຄຶດຖືວ່າຊ້າຢູ່ ແຕ່ວ່າພະອົງອົດທົນດົນນານກັບທ່ານທັງຫຼາຍ ບໍ່ຢາກໃຫ້ຄົນໜຶ່ງຄົນໃດຈິບຫາຍ ແຕ່ວ່າຈະໃຫ້ຄົນທັງປວງປະໃຈເກົ່າເອົາໃຈໃໝ່.” (2 ເປໂຕ 3:9) ດັ່ງນັ້ນ ຖ້າເຮົາຄິດເຖິງຄວາມອົດທົນອົດກັ້ນຂອງພະເຢໂຫວາ ເຮົາກໍຈະມີຄວາມອົດທົນອົດກັ້ນກັບຄົນອື່ນຫຼາຍຂຶ້ນຄືກັນ. (ໂລມ 2:4) ມີສະຖານະການໃດແດ່ທີ່ເຮົາຕ້ອງອົດທົນອົດກັ້ນ?
ສະຖານະການທີ່ເຮັດໃຫ້ເຮົາຕ້ອງອົດທົນອົດກັ້ນ
ທຸກໆມື້ມີຫຼາຍຢ່າງໃນຊີວິດທີ່ເຮັດໃຫ້ເຮົາຕ້ອງອົດທົນອົດກັ້ນ ເຊັ່ນ: ເຮົາຕ້ອງອົດທົນອົດກັ້ນທີ່ຈະບໍ່ເວົ້າຕັດຄວາມຄົນອື່ນ ເຖິງວ່າຈະມີບາງເລື່ອງສຳຄັນທີ່ຕ້ອງເວົ້າ. (ຢາໂກໂບ 1:19) ຫຼືຖ້າມີບາງຄົນເຮັດໃຫ້ເຮົາຮູ້ສຶກໃຈຮ້າຍ ເຮົາຍັງຕ້ອງອົດທົນອົດກັ້ນທີ່ຈະບໍ່ສະແດງອາລົມຫຼືທ່າທີທີ່ບໍ່ດີ. ເຮົາຕ້ອງຄິດເຖິງສິ່ງທີ່ພະເຢໂຫວາແລະພະເຍຊູເຮັດຕອນທີ່ເຮົາສະແດງຈຸດອ່ອນອອກມາ. ພວກເພິ່ນບໍ່ໄດ້ເບິ່ງເຈາະຈີ້ມຫາຄວາມຜິດພາດເລັກໆນ້ອຍໆທີ່ເຮົາເຮັດ. ແຕ່ພວກເພິ່ນເບິ່ງຈຸດດີທີ່ເຮົາມີແລະອົດທົນເພື່ອໃຫ້ເວລາເຮົາແກ້ໄຂຕົວເອງ.—1 ຕີໂມເຕ 1:16; 1 ເປໂຕ 3:12
ເຮົາຍັງຕ້ອງອົດທົນອົດກັ້ນເມື່ອບາງຄົນບອກວ່າຄຳເວົ້າແລະສິ່ງທີ່ເຮົາເຮັດມັນຜິດ. ທຳອິດເຮົາອາດຮູ້ສຶກເຄືອງໃຈແລະຢາກປົກປ້ອງຕົວເອງ. ແຕ່ຄຳພີໄບເບິນບອກວ່າ: “ເປັນຄົນອົດທົນດີກວ່າເປັນຄົນຍິ່ງ ຢ່າຄຽດງ່າຍ ເພາະຄວາມຄຽດຢູ່ໃນໃຈຂອງຄົນໂງ່.” (ຜູ້ເທສະໜາປ່າວປະກາດ 7:8, 9, ລ.ມ.) ດັ່ງນັ້ນ ເຖິງວ່າຄຳກ່າວຫານັ້ນຈະບໍ່ແມ່ນຄວາມຈິງ ແຕ່ເຮົາກໍຕ້ອງອົດທົນແລະຄິດໃຫ້ຮອບຄອບກ່ອນທີ່ຈະເຮັດຫຍັງບາງຢ່າງອອກມາ. ພະເຍຊູເອງກໍໄດ້ເຮັດຄືກັນເມື່ອຄົນອື່ນກ່າວຫາເພິ່ນຢ່າງຜິດໆ.—ມັດທາຍ 11:19
ພໍ່ແມ່ກໍຕ້ອງມີຄວາມອົດທົນອົດກັ້ນເປັນພິເສດເມື່ອເຂົາເຈົ້າຢາກຊ່ວຍລູກໃຫ້ເຮັດສິ່ງທີ່ຖືກຕ້ອງ ແລະຫຼີກລ່ຽງຄວາມຕ້ອງການທີ່ຜິດໆ. ຂໍໃຫ້ເບິ່ງຕົວຢ່າງຂອງມັດທີອັດເຊິ່ງຮັບໃຊ້ໃນເບເທນຢູ່ສະແກນດີເນເວຍ. ຕອນທີ່ມັດທີອັດເປັນໄວລຸ້ນ ໝູ່ຢູ່ໂຮງຮຽນຫຼາຍຄົນມັກກວນແລະເຍາະເຍີ້ຍຍ້ອນຄວາມເຊື່ອຂອງລາວ. ທຳອິດພໍ່ແມ່ກໍບໍ່ໄດ້ຮູ້ເລື່ອງນີ້. ແຕ່ຕໍ່ມາເຂົາເຈົ້າສັງເກດວ່າລູກເລີ່ມບໍ່ມີຄວາມໝັ້ນໃຈໃນຄວາມເຊື່ອຂອງຕົວເອງ. ກິວລິດພໍ່ຂອງມັດທີອັດເວົ້າວ່າລາວແລະເມຍຕ້ອງມີຄວາມອົດທົນອົດກັ້ນຫຼາຍແທ້ໆຕໍ່ກັບສະຖານະການນີ້. ມັດທີອັດໄດ້ຖາມຫຼາຍຢ່າງ ເຊັ່ນ: “ພະເຈົ້າແມ່ນໃຜ? ຖ້າຄຳພີໄບເບິນບໍ່ໄດ້ມາຈາກພະເຈົ້າເດ? ເຮົາຈະຮູ້ໄດ້ແນວໃດວ່ານີ້ແມ່ນພະເຈົ້າອົງທ່ຽງແທ້ທີ່ຕ້ອງການສິ່ງນັ້ນສິ່ງນີ້ຈາກເຮົາ?” ລາວອາດຍັງຖາມພໍ່ຂອງລາວອີກວ່າ: “ເປັນຫຍັງຂ້ອຍຈະຖືກພິພາກສາຖ້າຂ້ອຍບໍ່ມີຄວາມຮູ້ສຶກແລະຄວາມເຊື່ອຄືກັບພໍ່?”
ກິວລິດບອກວ່າ: “ບາງເທື່ອລູກຊາຍກໍຖາມແບບໃຈຮ້າຍ ລາວບໍ່ໄດ້ໃຈຮ້າຍໃຫ້ພໍ່ແມ່ ແຕ່ໃຈຮ້າຍໃຫ້ຄຳສອນໃນຄຳພີໄບເບິນເພາະມັນເຮັດໃຫ້ລາວຮູ້ສຶກວ່າຊີວິດຫຍຸ້ງຍາກຫຼາຍ.” ກິວລິດຊ່ວຍລູກແນວໃດ? ລາວບອກວ່າ: “ຂ້ອຍນັ່ງລົມກັບລູກເປັນຊົ່ວໂມງ.” ປົກກະຕິແລ້ວກິວລິດຈະຟັງລູກເວົ້າແລະຖາມເພື່ອຈະເຂົ້າໃຈຄວາມຮູ້ສຶກແລະຄວາມຄິດຂອງລູກ. ລາວອະທິບາຍໃຫ້ລູກຟັງແລະໃຫ້ເວລາລູກຄິດທົບທວນກ່ອນຈະກັບມາ
ລົມກັນອີກ. ບາງຄັ້ງລາວກໍບອກລູກວ່າລາວຂໍເວລາສອງສາມມື້ເພື່ອໄປຄິດກ່ຽວກັບເລື່ອງທີ່ລູກເວົ້າ. ເມື່ອໄດ້ລົມກັນແບບນີ້ເປັນປະຈຳ ມັດທີອັດກໍເລີ່ມເຂົ້າໃຈຄວາມໝາຍຂອງຄ່າໄຖ່ ເຂົ້າໃຈວ່າພະເຢໂຫວາຮັກເຮົາ ແລະພະອົງມີສິດປົກຄອງເຮົາ. ກິວລິດບອກວ່າ: “ມັນຕ້ອງໃຊ້ເວລາແລະຫຼາຍເທື່ອມັນກໍຍາກ ແຕ່ລູກຈະຄ່ອຍໆຮັກພະເຢໂຫວາຫຼາຍຂຶ້ນເລື້ອຍໆ. ຂ້ອຍກັບເມຍມີຄວາມສຸກຫຼາຍແທ້ໆທີ່ໄດ້ຊ່ວຍລູກໃຫ້ຜ່ານຊ່ວງເວລາທີ່ເປັນໄວລຸ້ນ ແລະເຫັນວ່າສິ່ງຕ່າງໆທີ່ເຮົາສອນເຂົ້າເຖິງຫົວໃຈຂອງລາວ. ຄວາມພະຍາຍາມແລະຄວາມອົດທົນຂອງເຮົາຄຸ້ມຄ່າແທ້ໆ.”ຕອນທີ່ກິວລິດກັບເມຍຊ່ວຍລູກຢ່າງອົດທົນ ເຂົາເຈົ້າໝັ້ນໃຈວ່າພະເຢໂຫວາຈະຊ່ວຍເຂົາເຈົ້າ. ກິວລິດບອກວ່າ: “ຂ້ອຍບອກມັດທີອັດເລື້ອຍໆວ່າພໍ່ແມ່ຮັກລູກຫຼາຍ ສິ່ງນີ້ໄດ້ກະຕຸ້ນເຮົາອະທິດຖານເຖິງພະເຢໂຫວາຫຼາຍແທ້ໆເພື່ອຂໍພະອົງຊ່ວຍລູກໃຫ້ມີຄວາມເຂົ້າໃຈ.” ພໍ່ແມ່ຄູ່ນີ້ມີຄວາມສຸກຫຼາຍແທ້ໆທີ່ໄດ້ອົດທົນອົດກັ້ນແລະບໍ່ຍອມແພ້!
ເຮົາຍັງຕ້ອງມີຄວາມອົດທົນອົດກັ້ນເມື່ອເບິ່ງແຍງຄົນໃນຄອບຄົວຫຼືໝູ່ທີ່ເຈັບປ່ວຍຊຳເຮື້ອ. ຂໍໃຫ້ເບິ່ງຕົວຢ່າງຂອງພີ່ນ້ອງແອວເລັນ * (ເບິ່ງໄຂເງື່ອນ) ທີ່ຢູ່ໃນສະແກນດີເນເວຍ.
ປະມານ 8 ປີກ່ອນ ຜົວຂອງແອວເລັນມີອາການເສັ້ນເລືອດໃນສະໝອງແຕກຕັ້ງເຖິງ 2 ເທື່ອ. ຍ້ອນແນວນັ້ນ ຜົວຂອງລາວຈຶ່ງບໍ່ສາມາດມີຄວາມຮູ້ສຶກ ເຊັ່ນ: ຄວາມສຸກ ໂສກເສົ້າ ຫຼືສົງສານ. ສະພາບການນີ້ເປັນເລື່ອງທີ່ຍາກຫຼາຍສຳລັບແອວເລັນ. ລາວບອກວ່າ: “ມັນຕ້ອງໃຊ້ຄວາມອົດທົນອົດກັ້ນຫຼາຍແທ້ໆແລະຕ້ອງອະທິດຖານຫຼາຍໆຄັ້ງ. ຂໍ້ຄຳພີທີ່ຂ້ອຍມັກເຊິ່ງເຮັດໃຫ້ຂ້ອຍມີກຳລັງໃຈແມ່ນຟີລິບ 4:13 ທີ່ບອກວ່າ: ‘ເຮົາອາດກະທຳສັບພະທຸກສິ່ງໄດ້ດ້ວຍພະອົງຜູ້ຊູແຮງຂອງເຮົາ.’” ຍ້ອນຄວາມຊ່ວຍເຫຼືອແລະໄດ້ຮັບພະລັງຈາກພະເຢໂຫວາ ແອວເລັນຈຶ່ງອົດທົນຮັບມືກັບສະຖານະການແບບນີ້ໄດ້.—ຄຳເພງ 62:5, 6
ຮຽນແບບຄວາມອົດທົນອົດກັ້ນຂອງພະເຢໂຫວາ
ແນ່ນອນພະເຢໂຫວາເປັນຕົວຢ່າງທີ່ດີທີ່ສຸດໃນການສະແດງຄວາມອົດທົນອົດກັ້ນ. (2 ເປໂຕ 3:15) ໃນຄຳພີໄບເບິນ ເຮົາໄດ້ອ່ານເລື່ອງຄວາມອົດທົນອົດກັ້ນທີ່ຍິ່ງໃຫຍ່ຂອງພະອົງເລື້ອຍໆ. (ເນເຫມີ 9:30; ເອຊາອີ 30:18) ເຈົ້າຈື່ໄດ້ບໍພະອົງມີທ່າທີແນວໃດຕອນທີ່ອັບລາຫາມຖາມພະອົງຫຼາຍເທື່ອກ່ຽວກັບການທຳລາຍເມືອງຊໍດົມ? ພະອົງບໍ່ເຄີຍເວົ້າຕັດຄວາມຕອນທີ່ອັບລາຫາມເວົ້າ. ພະອົງອົດທົນຟັງແຕ່ລະຄຳຖາມຂອງອັບລາຫາມແລະຄວາມກັງວົນຂອງລາວ. ຕໍ່ມາພະເຢໂຫວາສະແດງໃຫ້ເຫັນວ່າໄດ້ຍິນສິ່ງລາວກັງວົນແລ້ວ ແລະຢືນຢັນກັບລາວວ່າຖ້າມີຄົນຊອບທຳພຽງແຕ່ 10 ຄົນໃນເມືອງຊໍດົມ ພະອົງກໍຈະບໍ່ທຳລາຍເມືອງນີ້. (ຕົ້ນເດີມ 18:22-33) ພະເຢໂຫວາຕັ້ງໃຈຟັງຢ່າງອົດທົນສະເໝີແລະພະອົງບໍ່ເຄີຍຟ້າວເວົ້າຫຼືເຮັດຫຍັງແບບບໍ່ຄິດ!
ຄວາມອົດທົນອົດກັ້ນເປັນສ່ວນສຳຄັນຫຼາຍຂອງລັກສະນະນິດໄສໃໝ່ທີ່ຄລິດສະຕຽນທຸກຄົນຕ້ອງມີ. ຖ້າເຮົາພະຍາຍາມສຸດຄວາມສາມາດທີ່ຈະເປັນຄົນອົດທົນອົດກັ້ນແທ້ໆ ເຮົາກໍຍົກຍ້ອງສັນລະເສີນພະເຢໂຫວາຜູ້ເປັນພໍ່ທີ່ຫ່ວງໃຍແລະອົດທົນອົດກັ້ນກັບເຮົາ ແລະເຮົາຈະຢູ່ກັບ “ຄົນທີ່ໄດ້ຮັບສິ່ງທີ່ພະເຈົ້າສັນຍາເປັນລາງວັນ ເພາະພວກເຂົາມີຄວາມເຊື່ອແລະຄວາມອົດທົນ.”—ເຫບເລີ 6:10-12
^ ຂໍ້ 4 ຄວາມຮັກເປັນຄຸນລັກສະນະທີ່ເວົ້າໄປແລ້ວໃນບົດຄວາມທຳອິດຂອງ 9 ບົດຄວາມຊຸດຜົນທີ່ເກີດຈາກພະລັງຂອງພະເຈົ້າ.
^ ຂໍ້ 15 ຊື່ສົມມຸດ